Taano ta Naggugurang Asin Nagagadan Kita?

‘Sa aldaw na kumakan ka [kan bunga kan kahoy],’ sinabi nin Diyos ki Adan, ‘magagadan ka.’ (Genesis 2:17) Daing saysay an pagbuot na idto kun si Adan linalang para maggurang dangan magagadan man sana. Aram ni Adan na kun dai siya makakan kan bunga kan kahoy na idto, dai siya magagadan.

Dai kaipuhan ni Adan saka Eva na magkakan kan bunga kan kahoy na idto para masusteniran an saindang buhay—dakul na klase nin kahoy na namumunga an yaon sa hardin. (Genesis 2:9) Paagi sa dai pagkakan kan bunga kan kahoy na idto, maipapahiling kuta kan mag-agom an saindang pagigin masinunod sa Saro na nagtao kan saindang buhay. Maipapahiling man kuta kaiyan na minimidbid ninda an deretso nin Diyos na giyahan sinda.

Para masabutan kun taano ta nagadan si Adan saka Eva, kaipuhan tang siyasaton an sarong pag-uulay na nakaapektar sa sato gabos. Ginamit ni Satanas na Diyablo an sarong halas tanganing maipaabot an sarong mapandayang kaputikan. An Bibliya nagsasabi: ‘Alagad an halas tuso, labi sa gabos na hayop na linalang ni Jehova Diyos. Asin sinabihan niya an babayi: “Totoo na sinabihan kamo nin Diyos na dai kamo magkakan sa gabos na kahoy sa tatamnan?”’—Genesis 3:1.

Nagsimbag si Eva: ‘Makakakakan kami kan bunga kan mga kahoy sa tatamnan. Alagad dapit sa bunga kan kahoy na yaon sa tahaw kan tatamnan, suminabi an Diyos: “Dai kamo magkakan kaiyan, ni dumutdot kaiyan, tanganing dai kamo magadan.”’ Dangan an halas nagsabi saiya: ‘Dai kamo magagadan. Alagad naiisihan nin Diyos na sa aldaw na kumakan kamo kaiyan, mabubuklat an saindong mga mata, asin magigin kamo garo Diyos na tatao kan marahay asin kan maraot.’ Garo man sana sinabi ni Satanas na si Jehova putikon, na ipinapanguri an sarong marahay na bagay sa inot tang mga magurang.—Genesis 3:2-5.

Nagtubod si Eva sa nadangog niya. Pinagmasdan niya an kahoy. Kaakit-akit iyan saka magayunon paghilingon! Kaya nagkua siya kan bunga, asin kinakan iyan. Sinabi pa kan Bibliya: “Dangan tinawan man niya an saiyang agom asin kuminakan man ini.”—Genesis 3:6, An Marahay na Bareta Biblia.

Siguradong namundong marhay an Diyos kan mahiling niya an saiyang namumutan na mga aki na tuyong suminuway saiya! Ano an ginibo niya? Sinabi ni Jehova ki Adan: ‘Mabalik ka sa daga, huli ta diyan ka kinua, huli ta ika kabo-kabo, sa kabo-kabo ka man mabalik.’ (Genesis 3:17-19) Huli kaiyan, “an bilog na buhay ni Adan uminabot nin 930 taon, dangan nagadan siya.” (Genesis 5:5, NW) Si Adan dai nagsakat sa langit ni nabuhay sa sarong runa nin mga espiritu. Dai siya nag-eeksister bago siya lalangon ni Jehova hali sa kabo-kabo kan daga. Kaya kan nagadan siya, nagin siring siya sa daing buhay na kabo-kabo kun sain siya kinua. Dai na siya nag-eeksister. Nakakamundo nanggad!

Huli sa tuyo nindang pagsuway, naiwara ni Adan saka Eva an saindang pagigin perpekto asin an paglaom na mabuhay nin daing katapusan. Nag-agi sinda nin pagbabago sa pisikal; nagin na sindang bakong perpekto asin makasalan. Pero bako sana sinda an naapektaran kan kasalan ninda huli sa saindang pagsuway. Naipasa ninda sa mga aki ninda an saindang makasalan na kamugtakan. An Roma 5:12 nagsasabi: “Paagi sa sarong tawo [si Adan] an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.”

Ilinaladawan kan Bibliya an kasalan saka an kagadanan bilang “an patos na nakakapatos sa gabos na banwaan . . . pati an hinabol na tahob na nakakatahob sa gabos na nasyon.” (Isaias 25:7, NW) An patos na ini nakapatos sa katawuhan na garo sarong nakakahilong ambon na mayo nin makakadulag. Totoo, “dahil ki Adan an gabos nagagadan.” (1 Corinto 15:22) Kaya an hapot, arog kan ihinapot ni apostol Pablo: “Siisay an masalbar sa sako sa hawak na ini na nagdadara sa sakuya nin kagadanan?” Igwa daw nin siisay man?—Roma 7:24.