Kun Ano an Ihinahayag kan Bibliya Manungod sa Awtor Kaiyan

1. Taano ta nagpapasalamat ka huli sa Bibliya?

NAGPAPASALAMAT nanggad kita sa Diyos na Jehova huli sa Bibliya! Paagi sa mga pahina kaiyan, tinatawan niya kita nin madunong na sadol na makakatabang sa sato na mapangganahan an mga problema na inaatubang ta ngunyan. Tinawan niya man kita nin magayunon na paglaom para sa maabot na panahon. Urog sa gabos, ginamit ni Jehova an Bibliya tanganing ihayag an dakul na aspekto kan saiyang personalidad. Mantang hinuhurop-hurop ta an saiyang magagayon na kuwalidad, napapahirong marhay an satuyang puso asin namomotibar kita na rumani sa satuyang Diyos paagi sa pagkaigwa nin dayupot na pakikiamigo sa saiya.—Sal. 25:14.

2. Sa anong manlain-lain na paagi ihinayag ni Jehova an saiyang sadiri sa mga tawo?

² Gusto ni Jehova na mamidbid siya kan mga tawo. Kaidto, ihinayag niya an saiyang sadiri paagi sa mga pangaturugan, mga bisyon, asin paagi pa ngani sa mga anghel. (Bil. 12:6; Gibo 10:3, 4) Pero paano niyato mapag-aadalan an mga pangaturugan na ini, mga bisyon, o mga mensahe na hali sa mga anghel kun dai ipinasurat an mga iyan? Iyan an dahilan kaya naggamit si Jehova nin mga lalaki tanganing ‘isurat sa sarong libro’ kun ano an gusto niyang ipaaram sa sato. (Jer. 30:2) Huling “an dalan kan tunay na Diyos perpekto,” makakapagtiwala kita na an paaging ini nin pakikikomunikar sa sato marahayon asin kapaki-pakinabang.—Sal. 18:30.

3. Paano sinigurado ni Jehova na naingatan an Bibliya? (Isaias 40:8)

³ Basahon an Isaias 40:8. An Tataramon nin Diyos rinibong taon nang nagtatao nin marahay na paggiya sa maimbod na mga lalaki asin babayi. Paano iyan nagin posible? An Kasuratan haloy nang isinurat sa nararaot na materyales, kaya mayo talaga kita sa ngunyan nin ano man na orihinal na dokumento. Pero sinigurado ni Jehova na magkaigwa nin mga kopya kan banal na kasuratan. Minsan ngani bakong perpekto an mga parakopya, nagin maingat sindang marhay. Halimbawa, manungod sa Hebreong Kasuratan, sarong iskolar an nagsurat: “Tama sanang sabihon na dai nin ibang suanoy na libro an naipaabot sa sato nin arog kaiyan kaeksakto.” Kaya dawa naglihis an panahon, dawa nararaot an materyales na ginamit, asin dawa bakong perpekto an mga parakopya, makakapagtiwala kita na an mga tataramon na nababasa ta sa satong Bibliya ngunyan iyo an mga kaisipan kan Awtor kaiyan, si Jehova.

4. Ano an pag-uulayan ta sa artikulong ini?

⁴ Si Jehova an Gikanan kan “lambang marahay na balaog asin [kan] lambang perpektong regalo.” (Sant. 1:17) An Bibliya iyo an saro sa pinakamarahay na regalo na itinao sa sato ni Jehova. An sarong regalo may ihinahayag sa sato manungod sa nagtao kaiyan—na talagang midbid niya kita asin na talagang aram niya an mga pangangaipo ta. Totoo man iyan manungod sa Kagtao kan Bibliya. Pag sinisiyasat ta an regalong iyan, dakul kitang naaaraman manungod ki Jehova. Naaaraman ta na talagang midbid niya kita asin na talagang aram niya an mga pangangaipo ta. Sa artikulong ini, pag-uulayan ta kun paano ipinapahiling kan Bibliya an tulo sa mga kuwalidad ni Jehova: an saiyang kadunungan, an saiyang hustisya, asin an saiyang pagkamuot. Inot tang pag-ulayan an mga paagi na ipinapahiling kan Bibliya an kadunungan nin Diyos.

5. Ano an sarong paagi na ipinapahiling kan Bibliya an kadunungan nin Diyos?

⁵ Aram ni Jehova na kaipuhan ta an saiyang madunong na sadol. Asin an saiyang regalo, an Bibliya, pano kan saiyang kadunungan. An sadol kan Bibliya igwa nin marahay na epekto sa mga tawo. Binabago kan Bibliya an saindang buhay. Kan isurat an inot na mga libro kan Bibliya, sinabi ni Moises sa banwaan nin Diyos, an mga Israelita: “An mga sinabi ko sa saindo bako man daing saysay, kundi nangangahulugan iyan kan saindong buhay.” (Deu. 32:47) An mga nagsusunod sa Kasuratan puwedeng magkaigwa nin mapanggana asin maugmang buhay. (Sal. 1:2, 3) Dawa ngani haloy nang isinurat an Tataramon nin Diyos, dai nagluya an puwersa kaiyan na tabangan an mga tawo na magkaigwa nin mas marahay na buhay. Halimbawa sa jw.org, sa serye na “Binago kan Bibliya an Saindang Buhay,” makakabasa ka nin labi sa 50 eksperyensiya na nagpapahiling kun paano an Bibliya nagkaigwa nin dakulang “epekto sa . . . mga nagtutubod” diyan ngunyan.—1 Tes. 2:13.

6. Taano ta masasabi ta na mayo nin ibang libro na kapareho kan Bibliya?

⁶ Mayong ibang libro na kapareho kan Tataramon nin Diyos. Taano man? Huling an Awtor kan librong iyan, an Diyos na Jehova, makakamhan sa gabos, daing sagkod, asin daing kaagid an kadunungan. Dakul na iba pang libro an nagdadanay dawa gadan na an mga awtor kaiyan, pero an sadol na yaon sa mga librong iyan sa parati nawawaran nin saysay sa paglihis nin panahon. Sa ibong na lado, an madunong na mga prinsipyo na makukua sa Bibliya daing katapusan; napatunayan iyan na kapaki-pakinabang para sa mga tawo na nabubuhay sa ano man na panahon. Pag binabasa ta an sagradong librong iyan asin hinuhurop-hurop an satong nanunudan, ginagamit kan Awtor kaiyan an saiyang makapangyarihan na banal na espiritu para tabangan kitang maaraman kun paano maiaaplikar sa satong buhay an sadol kan Bibliya. (Sal. 119:27; Mal. 3:16; Heb. 4:12) Iyo, an buhay na Awtor kan Bibliya gustong-gusto kang tabangan. Kaya magayunon nanggad na basahon nin regular an Bibliya!

7. Paano pinagkasararo kan Bibliya an banwaan nin Diyos kaidto?

⁷ An saro pang pambihirang paagi na ipinapahiling kan Bibliya an kadunungan nin Diyos iyo an kakayahan kaiyan na pagsararuon an banwaan nin Diyos. Kan an mga Israelita lumaog sa Dagang Panuga, nag-istar sinda sa manlain-lain na lugar. An iba nagin mga parasira, an iba man nag-ataman nin mga hayop, asin an iba pa nagin mga paratanom. An mga Israelita na nakaistar sa sarong lugar puwedeng mawara tulos an interes sa kapakanan kan kapwa mga Israelita na nakaistar sa ibang mga parte kan nasyon. Pero naggibo si Jehova nin areglo para sa mga Israelita tanganing magtiripon sa manlain-lain na okasyon para magdangog sa pagbasa asin pagpaliwanag kan saiyang nasusurat na Tataramon. (Deu. 31:10-13; Neh. 8:2, 8, 18) Imahinara kun ano an mamamatian nin sarong maimbod na Israelita pag nag-abot siya sa Jerusalem asin mahiling an tibaad minilyon na kapwa niya mga parasamba hali sa gabos na parte kan nasyon! Paagi kaiyan, tinabangan ni Jehova an saiyang banwaan na magdanay na nagkakasararo. Pag-abot nin panahon, kan maestablisar an Kristiyanong kongregasyon, kompuwesto iyan nin mga lalaki asin babayi na iba-iba an lengguwahe asin kamugtakan sa buhay. Pero huli sa pagkamuot ninda sa Kasuratan, nagkakasararo sinda sa pagsamba sa tunay na Diyos. Masasabutan sana kan mga nagturubod an Tataramon nin Diyos sa tabang kan kapwa mga parasamba asin paagi sa pag-atender sa mga pagtiripon kaiba ninda.—Gibo 2:42; 8:30, 31.

8. Paano pinagkakasararo kan Bibliya an banwaan ni Jehova ngunyan?

⁸ An satuyang madunong na Diyos padagos na tinutukduan asin pinagkakasararo an saiyang banwaan paagi sa Bibliya. Iyan an gikanan kan espirituwal na kakanon na ikinakaugma tang marhay. Regular kitang nagtitiripon sa satong mga pagtiripon kan kongregasyon, mga asembleya, asin mga kumbensiyon para dangugon an pagbasa, pagpaliwanag, asin pagtukar kan Kasuratan. Sa siring, an Bibliya igwa nin mahalagang marhay na papel sa katuyuhan ni Jehova tanganing an saiyang mga parasamba “maglingkod . . . sa saiya na may pagkasararo.”—Sof. 3:9.

9. Anong kuwalidad an kaipuhan para masabutan an mensahe kan Bibliya? (Lucas 10:21)

⁹ Pag-isipan an saro pang ebidensiya kan kadunungan ni Jehova. Dakul na parte kan Kasuratan an ipinasurat niya sa paaging an makakasabot sana kaiyan iyo an mapakumbabang mga parabasa. (Basahon an Lucas 10:21.) An mga tawo sain man na lugar nagbabasa kan Bibliya. Arog kan sinabi nin sarong iskolar, an Bibliya “bako sanang iyo an may pinakadakul na nagbabasa kundi iyo man an pinakabinabasang marhay sa gabos na libro.” Pero an mapakumbaba sana an talagang nakakasabot saka nag-aaplikar kan sinasabi kaiyan.—2 Cor. 3:15, 16.

10. Ano an saro pang paagi na ipinapahiling kan Bibliya an kadunungan ni Jehova?

¹⁰ Nanunudan ta man sa Bibliya an manungod sa kadunungan ni Jehova sa saro pang paagi. Ginagamit ni Jehova an Kasuratan bako sana para tukduan kita bilang sarong grupo kundi para tawan kita nin instruksiyon asin rangahon bilang mga indibidwal. Mantang binabasa ta an saiyang Tataramon, puwede tang mamatian na si Jehova interesado sa sato. (Isa. 30:21) Pag napapaatubang sa problema, gurano mo kaparating binubuksan an Kasuratan asin binabasa an sarong bersikulo na garo baga isinurat iyan para talaga sa saimo? Alagad nakukua kan Bibliya an interes kan minilyon na tawo. Kaya paano nagin posible na an laog kaiyan pirming napapanahon asin tamang-tama sa kinakaipuhan mo? Nagin posible sana iyan huling an Awtor kan Bibliya igwa nin pambihirang kadunungan.—2 Tim. 3:16, 17.

11. Paano ipinahiling nin Diyos na mayo siya nin pinapalain kan isinusurat an Bibliya?

¹¹ An hustisya saro pang kuwalidad ni Jehova. (Deu. 32:4) An hustisya konektadong marhay sa pagigin mayong pinapalain, asin si Jehova mayong pinapalain. (Gibo 10:34, 35; Roma 2:11) Mahihiling ta an saiyang pagigin mayong pinapalain paagi sa mga lengguwahe na ginamit para isurat an Bibliya. Sa pangkagabsan, an inot na 39 libro kan Bibliya isinurat sa Hebreo, na madaling masabutan kan mga lingkod nin Diyos kan panahon na idto. Minsan siring, kan inot na siglo C.E., an lengguwaheng Griego na an mas ginagamit, kaya an huring 27 libro kan Bibliya panginot nang isinurat sa lengguwaheng iyan. Bako sana sa sarong lengguwahe ipinasurat ni Jehova an saiyang Tataramon. Sa ngunyan, mga walong bilyon na tawo sa daga an nagtataram nin manlain-lain na lengguwahe. Paano nagigin posible na dakulon na tawo an nakakanuod manungod ki Jehova?

12. Ano an sarong paagi na an Daniel 12:4 nauutob sa huring mga aldaw na ini?

¹² Paagi ki propeta Daniel, nanuga si Jehova na sa panahon nin katapusan, “an tunay na kaaraman” na yaon sa Bibliya “magigin abunda.” Dakul an makakasabot kaiyan. (Basahon an Daniel 12:4.) An sarong paagi na nakakatabang na magin abunda an kaaraman na iyan iyo an pagtradusir, pagpublikar, asin pagdistribwir nin mga Bibliya saka mga literatura sa Bibliya. Sa bilog na kinaban, an Bibliya iyo an libro na itrinadusir sa pinakadakul na lengguwahe asin may pinakamahiwas na distribusyon. An mga traduksiyon nin Bibliya na prinodusir kan komersiyal na mga kompanya kun minsan mahalon na marhay. An banwaan ni Jehova naitradusir na an Tataramon nin Diyos, nin bilog o kabtang sana, sa labing 240 na lengguwahe, asin an siisay man puwedeng makakua kan kopya kaiyan nin daing bayad. Bilang resulta, an mga tawo sa gabos na nasyon nakakanuod manungod sa ‘maugmang bareta kan Kahadian’ bago mag-abot an katapusan. (Mat. 24:14) An satuyang Diyos nin hustisya gustong matawan nin oportunidad an pinakadakul na tawo sagkod sa mapupuwede na mamidbid siya paagi sa pagbasa kan saiyang Tataramon. Ginigibo niya iyan huling gabos kita namumutan niyang marhay.

13. Taano ta masasabi ta na ipinapahiling kan Bibliya an pagkamuot ni Jehova? (Juan 21:25)

¹³ An Bibliya nagtatao nin patotoo manungod sa pinakanangungurog na kuwalidad kan Awtor kaiyan, an pagkamuot. (1 Juan 4:8) Pag-isipan kun ano an mga iiniba ni Jehova sa Bibliya asin kun ano an mga dai niya iiniba. Itinao niya kun ano mismo an kaipuhan ta tanganing magkaigwa nin marahay na relasyon sa saiya, magkaigwa nin maugmang buhay ngunyan, asin magkamit nin buhay na daing katapusan. Minsan siring, huling namumutan kita ni Jehova, dai niya kita tinawan nin mga detalye na sobra sa kaya tang masabutan.—Basahon an Juan 21:25.

14. Sa ano pang ibang paagi pinapatunayan kan laog kan Bibliya na namumutan kita nin Diyos?

¹⁴ Ipinahiling man ni Jehova an pagkamuot paagi sa pakikikomunikar sa sato sa paaging nagtatao sa sato nin dignidad. Sa Bibliya, dai niya kita tinatawan nin halabaon na lista nin mga susundon, na garo baga biyong kinokontrol an lambang aspekto kan satong buhay. Imbes, pinupukaw niya an satong kakayahan na mag-isip paagi sa totoong mga istorya nin buhay, nakakapukaw sa buot na mga propesiya, asin praktikal na mga sadol. Sa mga paaging ini, pinapahiro kita kan Tataramon nin Diyos na kamutan siya asin sunudon siya nin gikan sa satong puso.

15. (a) Paano ipinahiling ni Jehova na interesado siya sa mga nagbabasa kan saiyang Tataramon? (b) Sa ritrato, siisay na karakter sa Bibliya an hinuhurop-hurop kan aking babayi, kan hoben na brother, asin kan gurang nang sister? (Gen. 39:1, 10-12; 2 Ha. 5:1-3; Luc. 2:25-38)

¹⁵ Ihinahayag kan Bibliya na interesadong marhay si Jehova sa sato. Paano man? An saiyang Tataramon pano nin mga pagkasaysay na nagpapahayag kan emosyon nin tawo. Masasabutan ta an pagmati kan mga karakter sa Bibliya huling sinda mga tawo “na may pagmati arog kan sa sato.” (Sant. 5:17) An mas mahalaga, paagi sa pag-obserbar kun paano niya tinatratar an mga tawong arog ta, mas nasasabutan niyato na “si Jehova mamumuton na marhay asin mahihirakon.”—Sant. 5:11.

16. Ano an manunudan ta manungod ki Jehova pag nababasa ta sa Bibliya an manungod sa mga indibidwal na nakagibo nin mga pagkakasala? (Isaias 55:7)

¹⁶ Ihinahayag kan Bibliya an pagkamuot ni Jehova sa sato sa saro pang paagi. Inaasigurar kita kan Kasuratan na dai kita babayaan kan satuyang Diyos pag nakagibo kita nin mga pagkakasala. Pauruutrong nagkasala an mga Israelita ki Jehova; pero kan sinsero sindang magsulsol, pinatawad sinda nin Diyos. (Basahon an Isaias 55:7.) Aram man kan mga Kristiyano kan inot na siglo na namumutan sinda nin Diyos. Pinasabngan si apostol Pablo na sadulon an saiyang mga kapagtubod na ‘patawadon asin rangahon’ an lalaki na nakagibo nin magabat na pagkakasala pero nagsulsol. (2 Cor. 2:6, 7; 1 Cor. 5:1-5) Pambihira nanggad na dai isinikwal ni Jehova an saiyang mga parasamba dahil lang ta nagkasala sinda! Imbes, mamumuton niya sindang tinabangan, itinanos, asin inimbitaran na magin mga amigo niya giraray. Nanunuga siya na gigibuhon niya man iyan ngunyan sa gabos na nagsusulsol na parakasala.—Sant. 4:8-10.

17. Taano ta sarong pambihirang regalo an Bibliya?

¹⁷ Tinawan kita ni Jehova nin magayon na regalo. Taano ta pambihirang marhay an saiyang Tataramon? Arog kan nanudan ta, ipinapahiling kan Bibliya an kadunungan nin Diyos, an saiyang hustisya, asin an saiyang pagkamuot. Pinapatunayan kan librong ini na gusto ni Jehova na mamidbid ta siya. Gusto niya na magin mga amigo niya kita.

18. Paano ta maipapahiling na nagpapasalamat kita sa “marahay na balaog” na Bibliya na itinao ni Jehova?

¹⁸ Habo tang baliwalaon an “marahay na balaog” na Tataramon nin Diyos. (Sant. 1:17) Kaya lugod na padagos tang ipahiling an satong pagpapasalamat para diyan. Magigibo ta iyan paagi sa pagbasa kan sagradong mga tataramon na may kaibang pagpamibi asin paghurop-hurop kaiyan. Pag ginigibo ta iyan, makakasigurado kita na bebendisyunan kan pinakanangungurog na Awtor an satong mga paghihinguwa asin na “manunumpungan [ta] an kaaraman manungod sa Diyos.”—Tal. 2:5.