Nagtagal Siya Sagkod sa Katapusan

Nadangog ni Elias an bareta: Gadan na si Hading Ahab. Tibaad maisip ta an gurang nang propeta na pighuhuruhapiyap an barabas niya asin nakahiling sa harayo mantang iniisip-isip an dakul na pagkakataon na kaipuhan niyang atubangon an maraot na hading iyan. Grabe an tinagalan ni Elias! Tinakot siya saka linapag asin dikit pang magadan—gabos iyan kagigibuhan ni Ahab saka kan reyna kaini na si Jezebel. Mayo lamang ginibo an hadi tanganing pugulan si Jezebel na ipagbuot na garadanon an dakul sa mga propeta ni Jehova. Mahanab an mag-agom, mala ngani ta nagkumplutan man sinda na gadanon an daing sala asin matanos na lalaking si Nabot, pati na an mga aking lalaki kaini. Huli kaiyan, ipinaabot ni Elias an mensahe nin paghukom ni Jehova na kinokondenar si Ahab pati an bilog niyang dinastiya. Nauutob na an mga tataramon nin Diyos. Nagadan si Ahab sa paaging ihinula ni Jehova.—1 Hade 18:4; 21:1-26; 22:37, 38; 2 Hade 9:26.

Minsan siring, aram ni Elias na kaipuhan pa niyang padagos na magtagal. Buhay pa si Jezebel, asin padagos niyang ginagamit an saiyang makusog na impluwensiya sa saiyang pamilya asin sa nasyon. Mapapaatubang si Elias sa dakul pang kadipisilan, asin dakul pa siyang kaipuhan na itukdo sa saiyang kaiba-iba asin kasalida na si Eliseo. Kaya pag-ulayan ta an tulo sa huring mga asignasyon ni Elias. Mantang nahihiling ta kun paano nakatabang sa saiya an saiyang pagtubod tanganing makatagal, magigin mas malinaw sa sato kun paano ta mapapakusog an satong pagtubod mantang nabubuhay kita sa masakit na mga panahon na ini.

Si Ahazias, na aki ni Ahab asin Jezebel, iyo na ngunyan an hadi kan Israel. Imbes na makanuod sa sala kan saiyang mga magurang, nagsunod siya sa saindang maraot na lakad. (1 Hade 22:52) Arog ninda, nagsamba si Ahazias ki Baal. An pagsamba ki Baal sarong relihiyon na nagpapaati sa gabos na nagsasagibo kaiyan huling kaiba sa mga ritwal kaiyan an prostitusyon sa templo asin dawa ngani an pag-atang nin mga aki. May makakakumbinsir daw ki Ahazias na magbago asin giyahan an saiyang mga nasasakupan na talikdan an arog kaiyan kagrabeng kawaran nin kaimbudan ki Jehova?

Biglang nag-abot an kapahamakan sa aroganteng hoben na hadi. Nahulog si Ahazias asin nairidong marhay huling nabulsot siya sa garo parilyang gibo sa kahoy na nakatakop sa labot na nasa laog kan saiyang kuwarto sa bubungan kan harong niya. Dawa ngani namemeligro na an saiyang buhay, dai man giraray siya nagdulok ki Jehova para sa tabang. Imbes, nagsugo siya nin mga mensahero sa Ekron, na siyudad nin kaiwal na mga Filisteo, tanganing makihumapot sa diyos na si Baal-zebub kun mauumayan pa siya. Naanggot na marhay si Jehova. Nagsugo siya nin anghel ki Elias asin sinabi kaini sa saiya na sabaton an mga mensaherong idto. Pinabalik sinda kan propeta sa hadi dara an maraot na mensahe. Grabe an pagkakasala ni Ahazias huling guminawi siya na garo baga mayo nin Diyos an Israel. Sinabi ni Jehova na dai na nanggad mauumayan si Ahazias.—2 Hade 1:2-4.

Imbes na magsulsol, si Ahazias naghapot: “Ano an itsura kan lalaki na nagsabat sa saindo asin nagsabi kaini sa saindo?” Nagsimbag an mga mensahero paagi sa pagladawan sa simpleng bado nin sarong propeta, asin nagsabi tulos si Ahazias: “Si Elias . . . idto.” (2 Hade 1:7, 8, NW) Mahalagang mangnuhon na simpleng marhay an pamumuhay ni Elias asin nakapokus nanggad siya sa paglilingkod sa Diyos mala ta mabibisto tulos siya sa paglaladawan pa sana kan saiyang simpleng bado. Dai nanggad iyan masasabi ki Ahazias o sa mga magurang niya na mga mahanab asin materyalistiko. Ipinapagirumdom sa sato ngunyan kan halimbawa ni Elias na mamuhay kita sigun sa sadol ni Jesus na papagdanayon na simple an satong buhay asin na ipokus an satong mata sa kun ano an tunay na mahalaga.—Mateo 6:22-24.

Huling desididong makabalos, nagsugo si Ahazias nin 50 suldados pati an namamayo sa mga ini tanganing arestaron si Elias. Kan manumpungan ninda si Elias na ‘nagtutukaw sa alituktok kan bukid,’a daing galang na pinagbutan si Elias kan namamayo kan hukbo na sa ngaran kan hadi “bumaba” ini—na posibleng marhay tanganing darahon siya para gadanon. Isipa na sana! Dawa ngani aram ninda na si Elias “lalaking lingkod kan tunay na Diyos,” inisip kan mga suldados na idto na tama sanang takuton ninda siya. Sala nanggad sinda! Sinabi ni Elias sa namamayo: “Buweno, kun lingkod ako kan tunay na Diyos, magbaba lugod an kalayo hali sa kalangitan asin tumtumon ka saka an 50 mong tawuhan.” Dangan huminiro an Diyos! “Nagbaba an kalayo hali sa kalangitan asin tinumtom siya saka an 50 niyang tawuhan.” (2 Hade 1:9, 10, NW) An kapaha-pahamak na kinaabtan kan mga suldados na idto malinaw na pagirumdom na seryosong bagay nanggad para ki Jehova pag iniinsulto asin dai iginagalang kan mga tawo an saiyang mga lingkod.—1 Cronica 16:21, 22.

Nagsugo si Ahazias nin saro pang namamayo kaiba an 50 suldados. Kumpara sa nainot, mas pusok-pusukan pa an ikaduwang namamayo. Dai lamang siya nakanuod sa pagkagadan kan 51 lalaking nainot sa sainda, dawa ngani posibleng nahiling pa niya an mga abo kan mga ini sa gilid kan bukid. Saro pa, dai niya sana inutro an mapang-insultong pagbuot kan nainot sa saiya na “bumaba” si Elias, kundi dinagdagan niya pa iyan nin “tulos”! Kamangmangan nanggad! Kaya siya asin an saiyang mga tawuhan nagkagaradan sa kaparehong paagi kan nainot na grupo. Alagad, mas mangmang nanggad an hadi. Dai pa siya kumbinsido kaya nagpadara siya nin ikatulong grupo nin suldados. Marahay na sana ta mas madunong an ikatulong namamayong ini. Mapakumbaba siyang nagdulok ki Elias asin nakimahirak na palibrehon siya asin an mga kairiba niya. Si Elias, na lingkod nin Diyos, siguradong ipinahiling an pagkahirak ni Jehova sa mapakumbabang namamayo. Sinabi kan anghel ni Jehova ki Elias na mag-iba sa mga suldados na ini. Nagsunod si Elias dangan inutro niya sa maraot na hadi an sinabi ni Jehova. Nangyari an sinabi nin Diyos asin nagadan si Ahazias. Nagduwang taon sana an saiyang pamamahala.—2 Hade 1:11-17, NW.

Paano nakatagal si Elias dawa pa matagas an payo saka rebelyoso an mga tawo sa palibot niya? Mahalaga an hapot na iyan sa panahon ta ngunyan, bakong iyo? Nadisganar ka na daw huling an saro mong amigo o kapamilya dai nagdangog sa marahay na sadol asin nagpadagos sa nakakaraot na dalan? Paano ta makakayanan an siring na pagkadisganar? May manunudan kita sa lugar kun sain nanumpungan kan mga suldados si Elias, “sa alituktok kan bukid.” Dai ta man talaga masasabi kun taano ta yaon duman si Elias, pero makakasigurado kita na bilang sarong tawong mapinamibi, nahiling niya na an katuninungan sa lugar na idto marahay na oportunidad sa saiya na mas magrani pa sa saiyang namumutan na Diyos. (Santiago 5:16-18) Puwede man kitang regular na magtagama nin panahon na solo sana kita tanganing makipag-ulay sa Diyos, na inaapod siya sa pangaran asin isinasabi sa saiya an satong mga problema asin kahaditan. Paagi kaiyan, mas makakatagal kita pag an mga nasa palibot ta minagawi sa paaging bakong madunong asin kapaha-pahamak.

Nag-abot na an oras na kaipuhan nang butasan ni Elias an saiyang asignasyon. Mangnuha an ginibo niya. Kan pahali na sinda ni Eliseo sa banwa nin Gilgal, sinabi ni Elias ki Eliseo na magdanay duman mantang siya na lang an mapa-Bethel, na mga 11 kilometros an rayo. Marigon an simbag ni Eliseo: “Isinusumpa ko sa ngaran kan buhay na Diyos na si Jehova asin sa atubangan mo, dai taka babayaan.” Kan makaabot na an duwa sa Bethel, sinabi ni Elias ki Eliseo na siya na sana an mabaklay pa-Jerico, na mga 22 kilometros an rayo. Arog kan dati, marigon an simbag ni Eliseo. Sa ikatulong beses, nangyari an iyo man sanang eksena sa Jerico bago sinda magpasiring sa Salog nin Jordan, na mga 8 kilometro an rayo. Sa giraray, nagin determinado an hoben na lalaki. Dai niya babayaan si Elias!—2 Hade 2:1-6, NW.

Ipinahiling ni Eliseo an sarong mahalagang marhay na kuwalidad—an maimbod na pagkamuot. Ini an pagkamuot na ipinahiling ni Ruth ki Noemi, an pagkamuot na lubos na dedikado sa pinapahilingan kaiyan asin dai iyan binabayaan. (Rut 1:15, 16) Kaipuhan kan gabos na lingkod nin Diyos an kuwalidad na iyan—lalo na ngunyan. Malinaw ta daw na nahihiling an kahalagahan kaiyan arog ni Eliseo?

Siguradong napakusog si Elias sa ipinahiling na maimbod na pagkamuot kan hoben na kaiba-iba niya. Huli kaiyan, nagkapribilehiyo si Eliseo na mahiling an huring milagro ni Elias. Sa may pangpang kan Salog nin Jordan, na masulog saka hararom sa nagkapirang parte, pinakol ni Elias an tubig kan saiyang badong pangpropeta. Nabanga an tubig! Nahiling man an milagrong ini kan “50 sa mga aki kan mga propeta,” na minalataw na kabilang sa nagdadakul na grupo nin mga lalaki na sinasanay tanganing manginot sa dalisay na pagsamba sa nasyon. (2 Hade 2:7, 8, NW) Posibleng marhay na si Elias an nagdidirehir sa programang iyan nin pagsasanay. Pirang taon na an nakaagi, may panahon na paghuna ni Elias siya na sana an natadang maimbod sa nasyon. Puon kaidto, binalusan ni Jehova si Elias huli sa pakatagal kaini—nahiling ni Elias an dakulang pag-uswag sa mga parasamba Niya.—1 Hade 19:10.

Pakabalyo ninda sa Jordan, sinabi ni Elias ki Eliseo: “Hagadon mo na kun ano an gusto mong gibuhon ko para sa saimo bago ako kuanon saimo.” Aram ni Elias na nag-abot na an oras kan paghali niya. Dai siya nauri sa mga pribilehiyo asin kabantugan na makakamtan kan mas hoben niyang amigo. Imbes, gustong-gusto ni Elias na tabangan siya sa ano man na paaging posible. Ini sana an ipinakiulay ni Eliseo: “Puwede tabing mapasakuya an duwang kabtang kan saimong espiritu?” (2 Hade 2:9, NW) Dai man niya buot sabihon na gusto niya nin doble kan banal na espiritu na inako ni Elias. Imbes, hinahagad niya an mana na siring kan sa panganay na aking lalaki, na sigun sa katugunan, dapat na tawan kan pinakadakula o dobleng mana tanganing maisagibo kaini an bagong mga paninimbagan bilang payo kan pamilya. (Deuteronomio 21:17) Bilang espirituwal na tagapagmana ni Elias, malinaw na nahiling niya na kaipuhan niya an kusog nin buot na arog kan ki Elias tanganing magibo an saiyang asignasyon.

Mapakumbabang ipinabaya ni Elias ki Jehova an simbag. Kun tutugutan ni Jehova si Eliseo na mahiling an pagkua nin Diyos ki Elias, buot sabihon, positibo an simbag nin Diyos sa pakiulay ni Eliseo. Asin dai nahaloy, “mantang naglalakaw [na] nag-uulay-ulay” an haloy nang mag-amigo, may makangangalas na nangyari!—2 Hade 2:10, 11, NW.

Sarong kakaibang liwanag an nahiling sa kalangitan asin parani iyan nin parani. Tibaad maimahinar niyato na biglang nagkaigwa nin naghahagubuhob asin nagsasagiwsiw na alipuros na kaiba kan sarong maliwanag na bagay na marikas na paparani sa duwang lalaki, kaya napiritan sindang magsuwayan, tibaad napaatras na diit pang matumba sa pagkangalas. An nahiling ninda sarong lunadan, sarong karwahe na nagkikinang na garo baga gibo sa kalayo. Aram ni Elias na nag-abot na an saiyang oras. Nagsakay daw siya duman? Mayong sinasabi sa istorya. Ano man an nangyari, namati niya na iiniitaas siya, paitaas sa aire, na dinadara kan alipuros!

Nakatanaw si Eliseo na pano nin paghanga asin paggalang. Huli sa nahihiling niyang makangangalas na pangyayaring ini, aram ni Eliseo na talagang tatawan siya ni Jehova nin “duwang kabtang” kan kusog nin buot ni Elias. Pero mamunduon si Eliseo para isipon iyan. Dai niya aram kun sain pasiring an saiyang namumutan na haloy nang amigo, pero posibleng dai na siya nag-aasa na mahihiling niya pa giraray si Elias. Nagkurahaw siya: “Ama ko, ama ko! An karwahe saka an mga parakabayo kan Israel!” Nakatanaw siya mantang parayo nin parayo an namumutan niyang tagasanay sagkod sa dai na niya ini mahiling; dangan ginisi ni Eliseo an saiyang bado sa grabeng kamunduan.—2 Hade 2:12, NW.

Mantang paitaas sa kalangitan si Elias, nadangog daw niya an mamundong pag-agrangay kan saiyang hoben na amigo asin tibaad napaluha man? Ano man an nangyari, siguradong aram niya na an pagkaigwa nin siring na amigo nakatabang sa saiya na magtagal sa nagkapirang dipisil na pagkakataon. Lugod na makanuod kita sa halimbawa ni Elias asin makipag-amigo sa mga tawong namumuot sa Diyos asin naghihinguwang gibuhon an saiyang kabutan!

Sain nagduman si Elias? Itinutukdo kan nagkapirang relihiyon na dinara siya sa langit tanganing makaibanan nin Diyos. Pero imposible iyan. Pakalihis nin pirang siglo, sinabi ni Jesu-Cristo na mayo nin tawong nagsakat sa langit bago kan panahon niya. (Juan 3:13) Kaya pag nabasa niyato na “dinara kan alipuros si Elias pasiring sa kalangitan,” dapat niyatong ihapot, Anong kalangitan iyan? (2 Hade 2:11, NW) Ginagamit kan Bibliya an tataramon na “kalangitan” bako lang para ipanungod sa istaran ni Jehova kundi pati man sa atmospera kan satong daga, na diyan yaon an panganuron asin an mga gamgam. (Salmo 147:8) Sa kalangitan na iyan nag-itaas si Elias. Tapos, anong nangyari?

Ibinalyo man sana ni Jehova an namumutan na propeta sa bagong asignasyon, sa pagkakataon na ini, sa kataid na kahadian nin Juda. Ipinapahiling kan rekord sa Bibliya na naglilingkod pa diyan si Elias, posibleng pakalihis nin labing pitong taon. An namamahala sa Juda kan panahon na iyan iyo an maraot na hading si Jehoram. Inagom niya an aking babayi ni Ahab asin Jezebel, kaya yaon pa man giraray an maraot na impluwensiya ninda. Sinugo ni Jehova si Elias na magsurat nin mensahe nin paghukom ki Jehoram. Arog kan ihinula, nagadan si Jehoram sa makatatakot na paagi. An mas malala pa, sinasabi kan istorya: “Mayo nin nagmundo kan siya magadan.”—2 Cronica 21:12-20, NW.

An maraot na tawong iyan kabaliktaran nanggad ni Elias! Dai ta aram kun paano o kun kasuarin nagadan si Elias. Pero aram niyato na nagadan siya bako sa paaging arog kan ki Jehoram, na mayong nagmundo kan ini magadan. Napungaw si Eliseo sa saiyang amigo. Siguradong iyo man an iba pang maimbod na mga propeta. Pakalihis nin mga 1,000 taon, mahihiling na pinapahalagahan pa man giraray ni Jehova si Elias huling ginamit niya sa bisyon kan transpigurasyon an representasyon kan namumutan na propetang iyan. (Mateo 17:1-9) Gusto mo daw na arugon si Elias asin magkaigwa nin pagtubod na nagtatagal sa ibong nin mga kasakitan? Kun siring, pirming makipag-amigo sa mga namumuot sa Diyos, pagdanayon na nakapokus an saimong buhay sa espirituwal na mga bagay, asin parating mamibi nin udok sa puso. Lugod na magkaigwa ka man nin permanenteng lugar sa mamumuton na puso ni Jehova!