Magtao Lugod nin Kaumawan ki Jehova an Pagigin Andam Mong Magboluntaryo!

1, 2. (a) Ano an pinapaluwas ni Elifaz asin Bildad manungod sa paghiling nin Diyos sa paglilingkod ta sa saiya? (b) Paano ipinahiling ni Jehova kun ano talaga an sabuot niya sa paglilingkod ta sa saiya?

“MAY serbi daw sa Diyos an tawo? May pakinabang daw sa saiya an siisay man na may pakarurop? Importante daw sa Makakamhan sa Gabos na ika matanos, o may makukua daw siyang ano man huling pinagdadanay mo an saimong integridad?” (Job 22:1-3, NW) Napag-isip-isip mo na daw kun ano an simbag sa mga hapot na iyan? Kan ihapot iyan ni Elifaz na Temanita ki Job, kumbinsido siya na an simbag diyan dai. Nangatanusan pa ngani an amigo niyang si Bildad na Suhita na imposible sa tawo na magin matanos sa mata nin Diyos.—Basahon an Job 25:4.

² Pinapaluwas kan palsong mga pararangang ini na mayo lamang nin serbi ki Jehova an satong mga paghihinguwa na magin maimbod sa saiya, asin na para sa Diyos mayo kitang pagkakaiba sa mga layog-layog asin ulod. (Job 4:19; 25:6) Sa inot na hiling, garo baga mapakumbaba si Elifaz asin si Bildad. (Job 22:29) Kun sa bagay, kun nasa alituktok ka nin bukid o nagtatanaw sa bintana nin eroplano, haros dai mo na mamansayan an ginigibo nin mga tawo sa ibaba. Pero arog daw talaga kaiyan an paghiling ni Jehova sa mga ginigibo niyato para sa Kahadian mantang naghihiling siya sa satong planeta hali sa halangkawon niyang posisyon? Ipinahiling ni Jehova kun ano talaga an sabuot niya sa bagay na iyan kan itanos niya si Elifaz, Bildad, asin Zofar huli sa pagtaram ninda nin kaputikan; sa kabaliktaran, naugma siya ki Job asin inapod ining ‘sakuyang uripon.’ (Job 42:7, 8) Kaya para sa Diyos, talagang ‘may serbi an tawo.’

 3. Ano an sinabi ni Elihu manungod sa mga paghihinguwa niyato tanganing paglingkudan si Jehova, asin ano an buot niyang sabihon?

³ Dai itinanos ni Jehova si Elihu sa hapot niya: ‘Kun ika [matanos], anong itinatao mo sa Diyos? O anong aakuon niya hali sa saimo?’ (Job 35:7) An buot sabihon daw ni Elihu mayong halaga sa Diyos an mga paghihinguwa niyato tanganing paglingkudan Siya? Bako. An buot niyang sabihon iyo na dai nakadepende si Jehova sa satong pagsamba sa saiya. Yaon na ki Jehova an gabos. Mayo kitang maitatao sa saiya para magin mas mayaman siya o mas makusog. An totoo, ano man na marahay na bagay, talento, o kusog na igwa kita, gabos iyan hali sa saiya, asin hinihiling niya kun paano ta iyan ginagamit.

 4. Paano ibinibilang ni Jehova an mga karahayan na ginigibo niyato sa iba?

⁴ Para ki Jehova, pag nagpapahiling kita nin maimbod na pagkamuot sa mga lingkod niya, garo man sana ginigibo niyato iyan sa saiya. ‘Nagpapautang ki Jehova an nagtatao sa dukha, asin itatao Niya sa saiya an saiyang bayad,’ an sabi kan Talinhaga 19:17. Talaga daw na pighihiling ni Jehova an lambang karahayan na ginigibo niyato para sa mga tawong hamak? Ibinibilang daw talaga kan Kaglalang kan Uniberso na may utang siya sa mga tawong nagpapahiling nin pagkahirak, asin na binabayadan niya sinda paagi sa pagtao nin pabor saka mga bendisyon sa sainda? Iyo, asin pinatunayan mismo iyan kan Aki nin Diyos.—Basahon an Lucas 14:13, 14.

 5. Anong mga hapot an pag-uulayan niyato?

⁵ Inimbitaran ni Jehova si propeta Isaias na magin tagapagtaram Niya, na nagpapahiling na nauugma si Jehova na makaibahan an maimbod na mga tawo sa pag-utob kan Saiyang katuyuhan. (Isa. 6:8-10) Gikan sa buot na inako ni Isaias an imbitasyon na iyan asin nagsabi: ‘Uya ako! Sugua ako!’ Sa ngunyan, dakul man an nagpapahiling kan sabuot na kapareho kan ki Isaias. Andam sinda na akuon an masasakit na asignasyon sa paglilingkod ki Jehova. Sa ibong kaiyan, tibaad ihapot pa man giraray nin saro: ‘May serbi daw talaga an personal na pagmamaigot ko? Totoo, nagpapasalamat akong marhay ki Jehova sa oportunidad na itinao niya sako na makapagboluntaryo. Pero magmaigot man ako o dai, bako daw na siguradong may gigibuhon man si Jehova tanganing mautob an saiyang katuyuhan?’ Pag-ulayan ta an mga nangyari kan panahon ni Debora asin Barak para masimbag an mga hapot na iyan.

 6. Ano an pagkakalain kan mga Israelita asin kan hukbo ni Jabin?

⁶ Beynteng taon nang ‘pinapasakitan’ na marhay ni Hading Jabin nin Canaan an mga Israelita. Takot an mga Israelita dawa magluwas sana sa harong. Kun giyera an pag-uulayan, mayo lamang kalaban-laban an mga Israelita. Mayo sindang ano man na armas na pang-atake o pandepensa, mantang an kalaban ninda igwa nin 900 na karwahe na may mga karit na batbat.—Hok. 4:1-3, 13; 5:6-8.a

7, 8. (a) Ano an inot na mga instruksiyon ni Jehova ki Barak? (b) Paano nadaog kan Israel an hukbo ni Jabin? (Hilingon an ritrato sa kapinunan kan artikulo.)

⁷ Sa ibong kaiyan, nagtao si Jehova nin malinaw na pagbuot ki Barak paagi ki propetisa Debora: ‘Hali sa mga tribo ni Neftali asin ni Zebulon, kumua ka nin diyes mil na kalalakihan dangan panginutan mo sinda pasiring sa Bukid nin Tabor. Dadarahon ko saimo si Sisera na pamayo kan hukbo ni Jabin tanganing labanan ka duman sa Salog nin Kison. Dadarahon niya an saiyang mga karwahe sagkod mga suldados, alagad itatao ko saimo an kapangganahan.’—Huk. 4:4-7, BPV.b

⁸ Naglakop an pangapudan. Nagtiripon sa Bukid nin Tabor an mga boluntaryo. Mayong sinayang na oras si Barak sa pagsunod sa mga instruksiyon ni Jehova. (Basahon an Hokom 4:14-16.) Kan mismong ralaban na sa Taanac, bigla na sanang uminuran nin makusog kaya nagin malaboy an palibot. Linapag ni Barak an hukbo ni Sisera sagkod sa Haroset na 24 kilometros an rayo. Mantang nagdudulag, binayaan ni Sisera an dating kinakatakutan alagad ngunyan mayo nang pakinabang na karwahe asin nagpasiring sa Zaananim, na posibleng harani sa Kedes. Nagtago siya sa tolda ni Jael na agom ni Heber na Kenita. Huling pagal-pagal sa ralaban, nakaturog si Sisera. Madalion na sana para sa makusog an buot na si Jael na gadanon siya. (Hok. 4:17-21) Nadaog an kaiwal kan Israel!c

 9. Ano an manunudan ta sa mga detalyeng sinambit sa Hokom 5:20, 21 manungod sa pakikilaban ki Sisera?

⁹ Dapat na magkaibang pag-adalan an kapitulo 4 saka 5 kan Hokom huling may mga detalye sa saro na dai sinambit sa saro. Bilang halimbawa, an Hokom 5:20, 21 nagsasabi: ‘Hali sa langit, an mga bituon nakipag-iwal; hali sa saindang pinaglilibutan nakipag-iwal sinda tumang ki Sisera. Sinighid sinda kan sulog sa Kison.’ Nanunungod daw iyan sa pagtabang nin mga anghel? O nag-uran daw talaga kaidto nin bulalakaw? Mayo nin malinaw na sinasabi an Bibliya. Pero apuwera sa Diyos, siisay pa man an mapaabot kan makusog na pag-uran na iyan sa eksaktong lokasyon asin sa tamang pagkakataon tanganing maguot sa laboy an 900 na karwaheng panggiyera? Tulong beses na sinambit sa Hokom 4:14, 15 na si Jehova talaga an dahilan kan saindang kapangganahan. Mayo nin siisay man sa 10,000 na Israelitang idto na nagboluntaryo an makakapaghambog na siya an nagpagana sa laban.

10, 11. Ano an “Meroz,” asin taano ta isinumpa iyan?

¹⁰ Pero may interesanteng bagay kitang mababasa sa kanta na ini ni Debora asin Barak nin pag-umaw ki Jehova may koneksiyon sa milagrosong kapangganahan ninda: ‘“Sumpaon nindo si Meroz,” an sabi kan anghel ni Jehova: “Sumpaon nindo nin makuri an mga nag-iirok sa saiya, huli ta dai sinda nagdurulok sa pagsurog ki Jehova, sa pagsurog ki Jehova sa [kaibanan] kan mga makukusog.”’—Hok. 5:23.

¹¹ Minalataw na nangyari nanggad an sumpa laban sa Meroz kaya dai ta ngunyan masiyerto kun anong lugar talaga iyan. Posible daw na sarong siyudad ini na dai naghimati sa inot na pangapudan para sa mga boluntaryo? Kun diyan man nag-agi si Sisera kan nagdudulag siya, may tsansa daw kuta an mga nakaistar diyan na dakupon siya pero dai ninda iyan ginibo? Paanong dai ninda nabaretaan an pangapudan ni Jehova para sa mga boluntaryo? Sampulong ribong tawo hali sa lugar ninda an tiniripon para sa pakikipaglaban na ini. Ipamugtak tang nahiling kan mga taga Meroz na nag-agi sa lugar ninda an madahas na parapakilaban na si Sisera na solo asin desperadong nagdudulag. Pagkakataon na kutana idto na makatabang sinda sa pag-utob kan katuyuhan ni Jehova asin makamtan an mga bendisyon niya. Pero sa mahalagang marhay na pagkakataon na idto na dapat may ginibo sinda, pinili daw ninda na dai makiaram? Kabaliktaran nanggad sa ginibo kan makusog an buot na si Jael na isinaysay sa mismong kasunod na mga bersikulo!—Hok. 5:24-27.

12. Anong magkalain na sabuot an ipinahiling sa Hukom 5:9, 10, asin ano an manunudan niyato diyan?

¹² Sa Hukom 5:9, 10 (BPV), mahihiling niyato an iba pang pagkakalain sa sabuot kan mga nagmartsa kaiba ni Barak asin kan mga nagdahilan para dai makaiba. Kinomendaran ni Debora asin Barak an “mga [komandante] nin Israel” na boluntaryong “nag-iriba” sa banwaan. Ibang-iba nanggad sinda sa mga “nakalunad sa mga puting asno” na grabe an kapalangkawan asin habong magpartisipar, saka sa mga ‘nagtukaw sa mga kamadero’ na gustong-gusto an maluhong pamumuhay! Bakong arog kan mga ‘naglakaw sa mga tinampo’ na habong masakitan, an mga boluntaryong nagmartsa kaiba ni Barak andam na makilaban sa magapong bakilid nin Tabor asin sa malaboy na dalan sa kababan nin Kison! Idtong gabos na habong masakitan sinabihan na mag-isip. Iyo, kaipuhan nindang isip-isipon an nasayang nindang oportunidad na suportaran an katuyuhan ni Jehova. Iyan man an dapat na gibuhon kan siisay man ngunyan na nag-aalangan na maglingkod nin lubos sa Diyos.

13. Paano napapalain an tribo ni Ruben, ni Dan, asin ni Aser sa tribo ni Zebulon asin ni Neftali?

¹³ Nahiling mismo kan mga nagboluntaryo kun paano binindikar ni Jehova an saiyang soberaniya. Dakul sindang maiistorya sa iba dapit sa mga “kapangganahan” ni Jehova. (Huk. 5:11, BPV) Sa ibong na lado, sinambit sa Hokom 5:15-17 na an mga tribo ni Ruben, ni Dan, asin ni Aser mas nagpokus sa saindang materyal na mga pinagkakainteresan—mga aripumpon, barko, asin mga duungan—kisa sa ipinapagibo ni Jehova. Sa kabaliktaran, an tribo ni Zebulon asin ni Neftali ‘itinaya an saindang buhay’ para suportaran si Debora asin Barak. (Huk. 5:18, BPV) May mahalagang leksiyon para sa sato an magkalain na sabuot na ini may koneksiyon sa boluntaryong paglilingkod.

14. Paano niyato maipapahiling ngunyan an satong suporta sa soberaniya ni Jehova?

¹⁴ Sa ngunyan, mayo nin pangapudan sa sato para sa literal na giyera, pero igwa kita kan pribilehiyong magpahiling nin kusog nin buot paagi sa pagigin maigot niyato sa paghuhulit. Mas dakula ngunyan an pangangaipo para sa mga boluntaryo sa organisasyon ni Jehova. Minilyon na tugang na lalaki, babayi, asin mga hoben an gikan sa buot na ipinepresentar an saindang sadiri sa manlain-lain na klase nin bilog na panahon na paglilingkod bilang mga payunir, Bethelite, asin boluntaryo sa pagtugdok nin Kingdom Hall. Dakul man na tugang an nagboboluntaryo sa mga asembleya patin kumbensiyon. Isipa man an mga elder na may magabat na mga responsabilidad sa mga Hospital Liaison Committee asin sa pag-organisar nin mga kumbensiyon. Makakasigurado ka na nauugmang marhay si Jehova sa saimong pagigin andam na magboluntaryo, asin nungka niyang lilingawan iyan.—Heb. 6:10.

15. Paano niyato maaaraman na dai nagluluya an satong entusiyasmo sa paglilingkod ki Jehova?

¹⁵ Marahay na haputon kan lambang saro sa sato an saiyang sadiri: ‘Kontento na daw akong hilingon sana an iba na iyo an magtrabaho? Tinutugutan ko daw na makaulang sa pagigin andam ko na magboluntaryo an sobrang pagpokus sa materyal na mga bagay? Arog ni Barak, Debora, Jael, saka kan 10,000 na boluntaryo, may pagtubod daw ako asin kusog nin buot na gamiton an ano man na igwa ako tanganing magibo an ipinagbubuot ni Jehova? Kun nagpaplano akong magbalyo sa ibang lugar o nasyon para mas magrahay an buhay, ipinapamibi ko daw asin iniisip-isip kun ano an puwedeng magin epekto kaiyan sa pamilya ko saka sa kongregasyon?’d

16. Ano an maitatao mo ki Jehova na mayo pa siya?

¹⁶ Tinatawan kita ni Jehova nin onra paagi sa pagtugot niya sa sato na suportaran an saiyang soberaniya. Natentaran kan Diyablo an inot na tawong si Adan asin Eva na suportaran an saiyang pamamahala, kaya kun makampi ka sa pamamahala nin Diyos saro iyan na makusog asin malinaw na mensahe laban ki Satanas. Nakakapaugma ki Jehova an saimong pagboboluntaryo na pinapahiro nin pagtubod asin integridad. (Tal. 23:15, 16) Ginagamit niya an saimong maimbod na pagsuporta tanganing masimbag an mga pagtuya ni Satanas. (Tal. 27:11) Kaya paagi sa saimong maimbod na pagkuyog, garo ka man sana nagtatao ki Jehova nin sarong bagay na mahalagang marhay para sa saiya, asin talagang ikinakaugma niya iyan.

17. Ano an ipinapahiling kan Hokom 5:31 na mangyayari sa maabot na panahon?

¹⁷ Madali na an panahon na an kinaban mapapano nin mga tawo na sa soberaniya sana ni Jehova magpapasakop. Hinahalat-halat na nanggad niyatong umabot an panahon na iyan! Gusto tang mangyari na an arog kan kinanta ni Debora asin Barak: ‘[Mapara] lugod an gabos mong kaiwal, O Jehova. Alagad an mga namumuot saimo magin lugod siring kan aldaw kun minasubang sa saiyang kakusugan.’ (Hok. 5:31) Masisimbag an pakiulay na ini pag tinapos na ni Jehova an maraot na kinaban ni Satanas! Pag nagpuon na an ralaban nin Armagedon, dai na kakaipuhanon an mga boluntaryong tawo para biyong daugon an mga kalaban. Sa panahon na iyan ‘dai kita mahiro. Mahiling sana kita sa pagliligtas ni Jehova.’ (2 Cron. 20:17) Pero, mantang dai pa iyan nag-aabot, dakulon kitang oportunidad tanganing maigot asin makusog an buot na suportaran an pamamahala ni Jehova.

18. Ano an puwedeng magin epekto sa iba kan pagigin andam mong magboluntaryo?

¹⁸ ‘Huli ta an banwaan [nagboluntaryo], umawa nindo si Jehova!’ Arog kaiyan pinunan ni Debora asin Barak an saindang awit nin kapangganahan. Inumaw ninda bako an mga linalang kundi an Kahuruhalangkawi. (Hok. 5:1, 2) Siring man ngunyan, lugod na an saindong pagigin andam na magboluntaryo makapahiro sa iba na ‘umawon si Jehova!’