Talaga daw na Midbid Kamo nin Dios?

“O Jehova, . . . tatao ka minsan sa gabos kong dalan.”​—SALMO 139:​1, 3.

 1. Gurano kalakop kan pagmate na ‘an iba dai nakasasabot’ sa mga kahaditan, problema, asin kasakitan na inaatubang niato?

IGWA daw na tunay na nakasasabot sa mga kahaditan, kasakitan, asin problema na saindong inaatubang? Sa bilog na kinaban minilyon an tawo, hoben asin gurang, na mayo nin pamilya o paryentes na nagmamakolog kan nangyayari sa sainda. Minsan sa laog nin mga pamilya, an dakol na agom na babae​—iyo, pati mga agom na lalaki—​naghohona na dai talaga nasasabotan kan saindang agom an mga kasakitan na nakapagagabat sainda. Kun beses, huli sa panluluya nin boot, sinda nagrereklamo: “Pero dai mo ako nasasabotan!” Asin dakol na hobenes an nag-isip na mayo man nin nakasasabot sainda. Pero, sa tahaw kan mga nagmawot nin orog na pagsabot nin iba yaon an nagkapira na an buhay kan huri nagkaigwa nin dakulaon na kahulogan. Paano daw iyan nangyari?

 2. Ano an nagpapangyari sa mga parasamba ki Jehova na magkaigwa nin buhay na nakakokontento nanggad?

² Iyan huli ta, baga man lubos na nasasabotan nin mga kapwa tawo an saindang mga saboot o dai, may pagsarig sinda na nasasabotan nin Dios an inaagihan ninda asin na, bilang saiyang mga lingkod, dai ninda kaipuhan na atubangon nin solo an saindang mga problema. (Salmo 46:1) Dugang pa, an Tataramon nin Dios saka an tabang nin mapagmansay na Kristianong kamagurangan nagpapangyari sainda na humeling nin lihis pa sa saindang personal na mga problema. Tinatabangan sinda kan Kasuratan na masabotan na an saindang maimbod na paglilingkod mahalaga sa mga mata nin Dios asin may tiwasay na ngapit para sa mga naglalaom sa saiya asin sa mga probisyon na ginibo nia paagi ki Jesu-Cristo.​—Talinhaga 27:​11; 2 Corinto 4:​17, 18.

3, 4. (a) Paano an pakasabot sa bagay na “si Jehova Dios” asin na sia an “naggibo sa sato” nakatatabang sato na makanompong nin kagayagayahan sa paglilingkod sa saiya? (b) Taano ta igwa kita nin lubos na pagsarig sa mamomoton na pangataman ni Jehova?

³ Tibaad aram nindo an Salmo 100:​2, na nagsasabi: “Maglingkod kamo ki Jehova na may kaogmahan. Umatubang kamo sa saiya na may magayagayang kurahaw.” Pira an talagang nagsasamba ki Jehova sa paaging iyan? An madonong na mga dahelan sa paggibo kaiyan itinatao sa bersikulo 3, na nagpapagirumdom sato: “Arama nindo na si Jehova Dios. Sia an naggibo sa sato, asin bakong kita mismo. Kita an saiyang banwaan asin an mga karnero kan saiyang pasabsaban.” Sa tekstong Hebreo, dian inaapod siang ʼElo·himʹ, sa siring ipinaririsa an kadakulaan nia sa kamahalan, dignidad, asin karahayan. Sia an solamenteng tunay na Dios. (Deuteronomio 4:​39; 7:​9; Juan 17:3) An saiyang mga lingkod nakaaaram kan saiyang pagka-Dios, bako sanang bilang sarong katunayan na itinokdo sa sainda kundi bilang bagay na naeeksperyensiahan ninda asin pinatutunayan ninda paagi sa pagkuyog, pagsarig, asin debosyon.​—1 Cronica 28:​9; Roma 1:20.

⁴ Mantang si Jehova iyo an nabubuhay na Dios, na nakaheheling pati sa satong puso, mayo nin natatago sa saiyang mga mata. Lubos niang aram kun ano an nangyayari sa satong buhay. Nasasabotan nia kun ano an dahelan kan mga problemang inaatubang niato saka an karibokan sa isip asin boot na puwedeng ibunga kaini. Bilang an Kaglalang, midbid nia kita nin orog pa kisa pakamidbid niato sa satong sadiri. Aram man nia kun paano kita matatabangan na makaya an satong kamugtakan asin kun paano magtatao nin nagdadanay na kaginhawahan. Kita mamomoton niang tatabangan​—siring sa pastor na kinakarga an kordero—​mantang kita nagsasarig sa saiya sa bilog niatong puso. (Talinhaga 3:​5, 6; Isaias 40:​10, 11) Dakula an magigibo kan pag-adal sa Salmo 139 tanganing mapakosog an pagsarig na iyan.

An Saro na Nakaheheling kan Gabos Niatong Dalan

 5. Ano an boot sabihon kan ‘pagsiyasat’ sa sato ni Jehova, asin taano ta marahay iyan?

⁵ May hararom na pag-apresyar, an salmistang si David nagsurat: “O Jehova, siniyasat mo ako, asin midbid mo ako.” (Salmo 139:1) Kompiado si David na an pakamidbid ni Jehova sa saiya bakong pan-ibabaw sana. An pagheling nin Dios ki David bakong arog kan tibaad pagheling nin mga tawo, na an rinirisa sana an saiyang pisikal na tindog, an saiyang abilidad sa pagtaram, o an saiyang abilidad sa pagtogtog kan arpa. (1 Samuel 16:​7, 18) “Siniyasat” ni Jehova an kairairaroming pagkatawo ni David asin ginibo iyan na may mamomoton na pagmakolog sa saiyang espirituwal na ikararahay. Kun saro kamo sa debotadong mga lingkod ni Jehova, midbid nia kamo arog kan pagkamidbid nia ki David. Bako daw na iyan minapukaw saindo nin mga saboot na pagpasalamat asin paghanga?

 6. Paano ipinaheheling kan Salmo 139:​2, 3 na aram ni Jehova an gabos niatong ginigibo, pati an gabos niatong iniisip?

⁶ An gabos na aktibidad ni David naheheling ni Jehova, asin aram iyan ni David. “Ika mismo nakaaram kan sakong pagtukaw asin kan sakong pagtindog,” an isinurat kan salmista. “Sinabot mo an sakong pag-isip hale sa harayo. An sakuyang pagbiyahe asin an sakong paghigda saimong sinokol, asin tatao ka minsan sa gabos kong dalan.” (Salmo 139:​2, 3) An bagay na si Jehova nasa kalangitan, na harayo sa daga, dai nakaolang sa pakaaram nia kun ano an ginigibo ni David o kun ano an saiyang iniisip. Saiyang “sinokol,” o maingat na siniyasat, an mga aktibidad ni David, kapwa sa aldaw asin sa banggi, tanganing maaraman kun ano iyan.

 7. (a) Ginagamit an mga pangyayari sa buhay ni David bilang basihan, komentohan an pirang bagay sa satong buhay na aram nin Dios. (b) Paano kita maninigong maapektaran kan pakaaram kaini?

⁷ Kan an pagkamoot sa Dios asin pagsarig sa Saiyang kapangyarihan na magligtas magpahiro ki David bilang barobata na magboluntaryong makilaban sa higanteng Filisteo na si Goliat, aram idto ni Jehova. (1 Samuel 17:​32-37, 45-47) Pakalihis kaini, kan an pakikiiwal nin mga tawo magtao nin makuring kakologan sa puso ni David, kan an kasakitan grabe na kaya sia naghihibi kun banggi, naranga sia kan kaaraman na dinadangog ni Jehova an saiyang pagngayongayo. (Salmo 6:​6, 9; 55:​2-5, 22) Siring man, kan an puso na pano nin pasasalamat magpangyari ki David na horophoropon si Jehova sarong banggi na dai sia napapatorog, aram na gayo iyan ni Jehova. (Salmo 63:​6; ikomparar an Filipos 4:​8, 9.) Sarong banggi kan pinagheheling ni David na nagkakarigos an agom na babae nin sarong kataed, aram man idto ni Jehova, asin naheling nia an nangyari kan itogot ni David, minsan sa halipot sanang panahon, na an Dios haleon nin makasalan na horot sa saiyang isip. (2 Samuel 11:​2-4) Pagkatapos, kan isugo si propeta Natan na iatubang ki David an gabat kan saiyang kasalan, bako sana na nadangog ni Jehova an mga tataramon na nagluwas sa ngoso ni David kundi namansayan man an nagsosolsol na puso na ginikanan kaiyan. (2 Samuel 12:​1-14; Salmo 51:​1, 17) Bako daw na iyan maninigong magpahiro sato na odok na horophoropon kun saen kita minaduman, kun ano an satong ginigibo, asin kun ano an nasa satong puso?

 8. (a) Sa anong paagi na ‘an mga tataramon sa satong dila’ nakaiimpluwensia sa satong kamugtakan sa Dios? (b) Paano mapanggaganahan an mga kaluyahan sa paggamit kan dila? (Mateo 15:​18; Lucas 6:45)

⁸ Mantang aram nin Dios an gabos niatong ginigibo, dai kita maninigong magngalas na aram nia kun paano niato ginagamit an sarong parte nin hawak na arog kasadit kan dila. Aram ini ni Hadeng David, asin sia nagsurat: “Huli ta mayo ni sarong tataramon sa sakong dila, alagad, uya! O Jehova, iyan aram mo na gabos.” (Salmo 139:4) Aram na gayo ni David na an mga aakoon bilang bisita sa tolda ni Jehova mga tawo na dai nagbalobagi sa iba asin nagsayumang gamiton an saindang dila sa pagpalakop nin malaman na mga tsismis na magtatao nin langhad sa sarong dayupot na kamidbid. An mga inooyonan ni Jehova mga tawo na nagtataram kan katotoohan minsan sa saindang puso. (Salmo 15:​1-3; Talinhaga 6:​16-19) Mayo sa sato na napopogolan nin sangkap an satong dila, pero dai inisip ni David na may kaluyahan na mayo na sia nin magigibo na maparahay an saiyang kamugtakan. Inubos nia an dakol na panahon sa pagkompuwesto asin pag-awit nin mga salmo nin pag-omaw ki Jehova. Prangka man niang inadmitir an pangangaipo nia nin tabang asin inarang iyan sa Dios. (Salmo 19:​12-14) Nagkakaipo man daw nin mapagngayongayong atension an paggamit niato sa dila?

 9. (a) Ano an ipinaririsa kan pagkaladawan sa Salmo 139:​5 kun gurano kalubos na aram nin Dios an satong situwasyon? (b) Ini nagtatao sato nin kasarigan sa ano?

⁹ Bakong limitado sana an pagheling ni Jehova sa sato o sa satong situwasyon. Igwa sia kan bilog na ladawan, sa gabos na lado. Ginagamit bilang halimbawa an sarong siudad na nasasalikopan, si David nagsurat: “Sa likod asin sa atubangan, sinalikopan mo ako.” Para ki David, an Dios bakong nananalikop na kaiwal; imbes, sia mapagbantay na guwardia. “Ibinubugtak mo an saimong kamot sa sako,” idinugang ni David, sa siring ipinaririsa an pamomogol asin proteksion nin Dios na ginagamit para sa nagdadanay na pakinabang kan mga namomoot sa saiya. “Makangangalas na marhay para sa sako an siring na kaaraman. Iyan halangkawon na dai ko iyan maaabot,” an inadmitir ni David. (Salmo 139:​5, 6) Kompletong marhay, lubos na marhay, an pakaaram nin Dios sa saiyang mga lingkod na iyan dai niato kayang lubos na masabotan. Pero bastante an aram niato tanganing magsarig na kita tunay na nasasabotan ni Jehova asin na pinakamarahay an tabang na itinatao nia.​—Isaias 48:​17, 18.

Saen Man Kita, Kaya Kitang Tabangan nin Dios

10. Anong nakapakokosog na katotoohan an ipinahahayag kan buhay na paglaladawan sa Salmo 139:​7-12?

¹⁰ Sa pagheling sa mamomoton na pangataman ni Jehova sa laen man na punto-de-vista, an salmista nagpapadagos: “Saen ako makaduduman hale sa saimong espiritu, asin saen ako makadudulag sa saimong lalauogon?” Dai sia nagmamawot na maghingoang dumulag ki Jehova; imbes, aram nia na saen man sia, aram iyan ni Jehova asin, paagi sa banal na espiritu, kaya siang tabangan. “Kun sumakat ako sa langit,” an pagpapadagos nia, “yaon ka duman; asin kun bikladon ko an sakong higdaan sa Sheol, uya! yaon ka man duman. Kun gamiton ko an mga pakpak kan kaagahon, tangani na ako mag-erok sa karayorayoing dagat, duman man gigiyahan ako kan saimong kamot asin kakabiton ako kan saimong toong kamot. Asin kun sasabihon ko: ‘Seguradong dadakopon ako nin kadikloman!’ dangan an banggi magigin maliwanag sa palibot ko. Minsan an kadikloman dai magigin madiklomon para sa saimo, kundi an banggi mismo magliliwanag arog kan aldaw; an kadikloman garo man sana liwanag.” (Salmo 139:​7-12) Mayo kita nin madudumanan, mayo nin kamugtakan na maaatubang niato, na ibubugtak kita sa dai na kayang aboton kan pagheling ni Jehova o kan saiyang espiritu tanganing matabangan kita.

11, 12. (a) Minsan ngani iyan nalingawan ni Jonas sa kadikit na panahon, paano ikinapaheling an kakayahan ni Jehova na makaheling asin tumabang sa kamugtakan ni Jonas? (b) Paano kita maninigong makinabang sa inagihan ni Jonas?

¹¹ Sarong beses nalingawan iyan ni propeta Jonas. Idinestino sia ni Jehova na maghulit sa mga taga-Ninive. Sa dai masiertong dahelan an paghona nia dai nia kaya an asignasyon na iyan. Tibaad huli sa maringis na dangog kan mga Asirio, natakot si Jonas na maglingkod sa Ninive. Kaya prinobaran niang magtago. Sa puwerto nin Jope, luminunad sia sa barkong pa-Tarsis (na iinaasosyar nin dakol sa España, labing 3,500 kilometros sa solnopan nin Ninive). Pero naheling sia ni Jehova na nagsakay sa barko asin natorog sa ibaba. Aram man nin Dios kun haen si Jonas kan sia iapon sa dagat, asin nadangog ni Jehova si Jonas kan sia manuga hale sa tulak kan dakulang sira na ootobon nia an saiyang mga panuga. Ibinalik sa marang daga, tinawan liwat si Jonas nin oportunidad na otobon an asignasyon sa saiya.​—Jonas 1:​3, 17; 2:​1–​3:4.

¹² Mas marahay nanggad kun sa kapinonan pa si Jonas nagsarig na sa espiritu ni Jehova na tabangan siang maotob an asignasyon sa saiya! Pero pagkatapos mapakumbabang isinurat ni Jonas an saiyang inagihan, asin nakatabang an rekord na iyan sa dakol poon kaidto na ipaheling an pagsarig ki Jehova na garo masakit na marhay na kamtan ni Jonas.​—Roma 15:4.

13. (a) Anong asignasyon an maimbod na inotob ni Elias bago sia nagdulag ki Reyna Jezabel? (b) Paano tinabangan ni Jehova si Elias dawa kan sia magtago sa luwas kan teritoryo nin Israel?

¹³ Laen man an inagihan ni Elias. Maimbod niang ipinahayag an pagboot ni Jehova na an Israel dai ooranon bilang kastigo sa saindang mga kasalan. (1 Hade 16:​30-33; 17:1) Mapuso niang sinuportaran an tunay na pagsamba sa labanan ni Jehova asin ni Baal sa Bukid nin Carmelo. Asin ginibo nia an paggadan sa 450 propeta ni Baal sa kasapaan nin Cison. Pero kan sa kaanggotan isumpa ni Reyna Jezabel na ipagagadan si Elias, duminulag si Elias. (1 Hade 18:​18-40; 19:​1-4) Yaon daw si Jehova sa pagtabang saiya sa masakit na panahon na idto? Iyo nanggad. Kun si Elias tuminukad sa halangkaw na bukid, na garo masakat sa langit; kun sia nagtago sa kuweba sa irarom kan daga, na garo sa Sheol; kun duminulag sia pasiring sa sarong harayong isla sa rikas na arog kan paglakop sa daga kan liwanag nin kaagahon​—yaon kutana an kamot ni Jehova sa pagpakosog asin paggiya sa saiya. (Ikomparar an Roma 8:​38, 39.) Asin talagang pinakosog ni Jehova si Elias bako sanang paagi sa pagkakan para sa pagbaklay nia kundi siring man paagi sa makangangalas na mga pagpaheling kan Saiyang puwersa aktiba. Mantang naparigon, ginibo ni Elias an sumunod na asignasyon sa saiya bilang propeta.​—1 Hade 19:​5-18.

14. (a) Taano ta salang isipon na an Dios omnipresente? (b) Sa irarom nin anong mga kamugtakan na mamomoton na tinabangan ni Jehova an saiyang mga lingkod sa modernong mga panahon? (c) Paano na minsan kita nasa Sheol, yaon an Dios?

¹⁴ An makahulang mga tataramon kan Salmo 139:​7-12 dai nangangahulogan na an Dios omnipresente, na sia personal na yaon sa gabos na lugar sa gabos na panahon. Laen man an malinaw na ipinaheheling kan Kasuratan. (Deuteronomio 26:​15; Hebreo 9:24) Pero, an saiyang mga lingkod nungka na dai na nia kayang maabot. Totoo iyan sa mga dinara kan saindang teokratikong mga asignasyon sa hararayong lugar. Totoo iyan sa maimbod na mga Saksi sa mga kampo de konsentrasyon na Nazi kan Guerra Mundial II, asin totoo iyan sa mga misyonero na nabilanggong inkomunikado sa Tsina kaidtong huring mga taon nin 1950 asin enot na mga taon nin 1960. Totoo iyan sa namomotan niatong mga tugang na lalaki asin babae sa sarong nasyon sa Aprika Sentral na pirang beses na kinaipuhan na dulagan an saindang mga baryo, pati an nasyon. Kun kaipuhan, kaya ni Jehova na aboton sagkod sa Sheol, an pankagabsan na lolobngan, asin ibalik an mga maimbod paagi sa pagkabuhay liwat.​—Job 14:​13-15; Lucas 20:​37, 38.

An Saro na Tunay na Nakasasabot Sato

15. (a) Gurano kaamay na namasdan ni Jehova an pagdakula niato? (b) Paano ipinaririsa kan pagkasambit kan salmista sa mga bato kun gurano an kaaraman nin Dios sa sato?

¹⁵ Sa pasabong, dinadara kan salmista an atension sa bagay na an pakamidbid nin Dios sa sato bago pa kita mamundag, na sinasabi: “Huli ta ika an naghaman sa sakong mga bato; itinago mo ako sa tulak kan sakuyang ina. Ika oomawon ko huli ta sa makangingirhat na paagi ako makangangalas na ginibo. Makangangalas an saimong mga gibo, na aram na gayo kan sakuyang kalag.” (Salmo 139:​13, 14) An pagsasaro kan mga gene hale sa satong ama asin sa satong ina sa panahon nin pangingidam nagbubunga kan padron na nakaiimpluwensiang marhay sa satong pisikal asin mental na potensial. Nasasabotan nin Dios an potensial na iyan. Sa salmong ini espesyal na nasasambitan an mga bato, na sa parate ginagamit sa Kasuratan na magrepresentar sa kairairaroming kabtang nin personalidad.a (Salmo 7:​9; Jeremias 17:10) Aram na ni Jehova an mga detalyeng ini manongod sa sato bago pa man kita mamundag. Sia man an nagdisenyo na may mamomoton na pagmakolog sa hawak nin tawo tangani na an napertilisar na selula sa matris nin ina gumibo nin nagpoprotehir na bugtakan tanganing ‘itago’ an similya asin protehiran iyan mantang nagdadakula.

16. (a) Sa anong paagi na itinatampok kan Salmo 139:​15, 16 an nakatataros na kapangyarihan kan pagheling nin Dios? (b) Taano ta maninigo ining makapakosog sa sato?

¹⁶ Dangan, idinodoon an nakatataros na kapangyarihan kan pagheling nin Dios, idinugang kan salmista: “An sakong mga tolang dai natago sa saimo kan gibohon ako sa hilom, kan ako habolon sa kaharohababaing kabtang kan daga [malinaw na poetikong pagsambit sa matris kan saiyang ina alagad may pagkanabi sa paglalang ki Adan hale sa kabokabo]. Naheling kan saimong mga mata an similya sa sako, asin nasusurat sa saimong libro an gabos na kabtang kaiyan, mapadapit sa mga aldaw na iyan [an mga kabtang kan hawak] nahaman kaidtong mayo pa ni saro [na klarong kabtang nin hawak] sa mga iyan.” (Salmo 139:​15, 16) Daing duda iyan​—baga man kita nasasabotan o dai nin mga kapwa niato tawo, si Jehova iyo. Paano kita maninigong maapektaran kaiyan?

17. Kun ibinibilang niatong makangangalas an mga ginibo nin Dios, ini nagpapahiro sato na gibohon an ano?

¹⁷ Inadmitir kan kagsurat sa Salmo 139 na an mga ginibo nin Dios na isinusurat nia makangangalas. Iyan man daw an saboot nindo? An bagay na makangangalas nagpapahiro sa saro na maghorophorop o mag-atento. Posible na iyan an reaksion nindo sa mga pisikal na lalang ni Jehova. (Ikomparar an Salmo 8:​3, 4, 9.) Tinatawan man daw nindo nin siring na paghorophorop an saiyang ginibo sa pag-establisar kan Mesiyanikong Kahadean, an saiyang ginigibo sa pagpahulit kan maogmang bareta sa bilog na daga, asin an pagpabago kan saiyang Tataramon sa mga personalidad nin tawo?​—Ikomparar an 1 Pedro 1:​10-12.

18. Kun makangingirhat para sa sato an ginibo nin Dios, paano iyan makaaapektar sa sato?

¹⁸ Naeeksperyensiahan man daw nindo na an paghorophorop sa ginibo nin Dios makangingirhat, na iyan minapukaw saindo nin tamang pagkatakot, na nakapahihirong marhay, may hararom na epekto sa saindong personalidad asin sa saindong paggamit kan saindong buhay? (Ikomparar an Salmo 66:5.) Kun iyo, pahihiroon kamo kan saindong puso na pamurawayon si Jehova, omawon sia, gumibo nin mga oportunidad na sabihan an iba manongod sa saiyang katuyohan asin sa makangangalas na mga bagay na itinatagama nia para sa mga namomoot sa saiya.​—Salmo 145:​1-3.

[Nota sa Ibaba]

Ano an Komento Nindo?

◻ Paano an pakaaram niato na “si Jehova Dios” nakatatabang sato na paglingkodan siang may kagayagayahan?

◻ Paano maninigong maimpluwensiahan an satong buhay kan pakaaram nin Dios sa gabos niatong ginigibo?

◻ Taano ta nakapakokosog nin boot an bagay na nungka kitang nawawara sa pagheling nin Dios?

◻ Taano ta nasasabotan kita nin Dios sa mga paagi na dai kaya nin tawo?

◻ Taano an arog kaining pag-adal ta nagpapahiro sato na magmawot na pamurawayon si Jehova?