Iriba Niatong Ilangkaw an Ngaran ni Jehova

“O pakadakulaa nindo si Jehova sa kaibanan ko, asin iriba niatong ilangkaw an saiyang ngaran.”—SALMO 34:3.

 1. Anong marahay na halimbawa an itinao ni Jesus durante kan saiyang ministeryo sa daga?

KAN banggi nin Nisan 14, 33 C.E., si Jesus asin an saiyang mga apostol iribang nag-aarawit nin pag-omaw ki Jehova sa sarong kuarto sa itaas nin sarong harong sa Jerusalem. (Mateo 26:30) Idto na an kahurihurihi na magigibo iyan kan tawong si Jesus na kaiba an saiyang mga apostol. Minsan siring, angay sana na taposon nia an pakikipagtipon sa sainda sa paaging iyan. Poon sa kapinonan sagkod sa katapusan kan saiyang ministeryo sa daga, inomaw ni Jesus an saiyang Ama asin maigot na ipinamidbid an Saiyang ngaran. (Mateo 4:10; 6:9; 22:37, 38; Juan 12:28; 17:6) Sa katunayan, inotro nia an maogmang imbitasyon kan salmista: “O pakadakulaa nindo si Jehova sa kaibanan ko, asin iriba niatong ilangkaw an saiyang ngaran.” (Salmo 34:3) Kanigoan karahay na halimbawa na dapat niatong arogon!

2, 3. (a) Paano niato naaaraman na an Salmo 34 igwa nin propetikong kahulogan? (b) Ano an eestudyaran niato sa artikulong ini asin sa kasunod?

² Mga pira sanang oras pagkatapos na umawit nin mga pag-omaw kaiba ni Jesus, nagin testigo si apostol Juan sa sarong laen na marhay na pangyayari. Naheling nia an saiyang Kagurangnan asin an duwang kriminal na ginagadan sa mga hariging pasakitan. Binari kan mga soldados na Romano an mga tabay kan duwang kriminal tanganing hidaleon an saindang kagadanan. Minsan siring, ibinabareta ni Juan na dai ninda binari an mga tabay ni Jesus. Kan ranihan kan mga soldados si Jesus, gadan na ini. Sa saiyang Ebanghelyo, ipinaliwanag ni Juan an pangyayaring iyan bilang kaotoban nin saro pang kabtang kan Salmo 34: “Mayo ni sarong tolang nia an maroronot.”—Juan 19:32-36; Salmo 34:20, Septuagint.

³ An Salmo 34 igwa nin dakol na iba pang punto na interesante para sa mga Kristiano. Huli kaini, sa artikulong ini asin sa kasunod, rerepasohon niato an mga kamugtakan kan isurat ni David an salmong iyan dangan eestudyaran niato an nakakaparigon sa boot na laog kan mismong salmong iyan.

An Pagdulag ni David ki Saul

 4. (a) Taano si David ta linahidan bilang sunod na hade kan Israel? (b) Taano ta ‘namotan na marhay’ ni Saul si David?

⁴ Kan si David hoben pa, si Saul an hade kaidto sa Israel. Minsan siring, nagin sumbikalan si Saul asin nawara sa saiya an pag-oyon ni Jehova. Sa dahelan na iyan, sinabihan sia kan propetang si Samuel: “Pinasing ngonyan sa saimo ni Jehova an makahadeng pamamahala sa Israel, asin itatao nia nanggad iyan sa saimong kapwa na mas marahay kisa saimo.” (1 Samuel 15:28) Sa huri, sinabi ni Jehova ki Samuel na lahidan si David, an kangudhan na aking lalaki ni Jese, tanganing magin sunod na hade kan Israel. Mientras tanto, huling hinalean kan espiritu nin Dios, si Hadeng Saul nag-agi nin kamondoan. Si David, na sarong matibay na musikero, dinara sa Gibea tanganing maglingkod sa hade, asin an musika ni David nakapaginhawa ki Saul, na ‘namoot na marhay’ sa saiya.—1 Samuel 16:11, 13, 21, 23.

 5. Taano ta nagbago an aktitud ni Saul ki David, asin ano an napiritan na gibohon ni David?

⁵ Sa paglihis nin panahon, pinatunayan ni Jehova na nasa kaibanan sia ni David. Tinabangan sia ni Jehova na daogon an Filisteong higante na si Goliat asin sinuportaran si David kan ini magduman sa Israel tanganing tawan nin onra huli sa saiyang kakayahan sa militar. Minsan siring, an bendisyon ni Jehova ki David nagin dahelan na mauri si Saul, asin naongis sia ki David. Duwang beses mantang pinapatugtog ni David an saiyang arpa sa atubangan ni Saul, itinugda sa saiya kan hade an budyak kaini. Sa duwang pangyayaring iyan, nahimo ni David na malawosan an budyak. Kan gibohon ni Saul an ikatolong pagprobar na gadanon sia, narealisar kan sunod na hade sa Israel na kaipuhan siang dumulag tanganing iligtas an saiyang buhay. Pag-abot nin panahon, huli sa padagos na paghihingoa ni Saul na dakopon asin gadanon sia, nagdesisyon si David na magpaili sa luwas kan teritoryo nin Israel.—1 Samuel 18:11; 19:9, 10.

 6. Taano ta ipinagboot ni Saul na gadanon an mga nag-iistar sa Nob?

⁶ Sa pagpasiring nia sa linderos kan Israel, nagpondo si David sa siudad nin Nob, na namumugtakan kan tabernakulo ni Jehova. Minalataw na sa pagdulag ni David may kaiba siang alalay na mga hoben na lalaki, asin si David naghagad nin pagkakan asin inomon para sa mga kaiba nia asin para sa saiya. Naaraman ni Saul na an halangkaw na saserdote nagtao ki David asin sa mga tawohan kaini nin kakanon asin kan espada na kinua ni David sa gadan nang si Goliat. Huli sa kaanggotan, ipinagadan ni Saul an gabos na nag-iistar sa siudad na iyan, kaiba an 85 saserdote.—1 Samuel 21:1, 2; 22:12, 13, 18, 19; Mateo 12:3, 4.

Saro Pang Pakadulag sa Kagadanan

 7. Taano an Gat ta bakong ligtas na lugar na tagoan ni David?

⁷ Hale sa Nob, si David nagdulag nin mga 40 kilometros sa solnopan pasiring sa teritoryo nin Filistea asin nagpaili ki Hadeng Aquis sa ginikanan na banwaan ni Goliat, an Gat. Tibaad inisip ni David na an Gat iyo an pinakahuring lugar na maiisip ni Saul na dumanan tanganing hanapon sia. Pero, dai nahaloy, namidbid si David kan mga lingkod kan hade nin Gat. Kan madangog ni David na namidbid na sia, “natakot sia nin makuri huli ki Aquis na hade sa Gat.”—1 Samuel 21:10-12.

 8. (a) Ano an sinasabi sa sato kan Salmo 56 manongod sa eksperyensia ni David sa Gat? (b) Paano nakaligtas si David sa dikit pang kagadanan?

⁸ Sa siring, si David dinakop kan mga Filisteo. Tibaad sa panahon na ini kinomponer ni David an odok sa pusong salmo na dian nakiolay sia ki Jehova: “Bugtakan an sakuyang mga luha sa saimong supot na anit.” (Salmo 56:8 asin superskripsion) Sa siring, ipinahayag nia an saiyang kompiansa na dai lilingawan ni Jehova an saiyang kamondoan kundi mamomoton na aatamanon asin poprotehiran sia. May naisip man si David na sarong estratehiya tangani na dayaon an hadeng Filisteo. Nagsaginsagin siang bua. Pakaheling kaini, inanggotan ni Hadeng Aquis an saiyang mga lingkod huli sa pagdara nin sarong “rungaw” na tawo sa saiyang atubangan. Malinaw nanggad, sinuportaran ni Jehova an estratehiya ni David. Si David pinalayas sa siudad, na naeksperyensiahan an saro pang pagkaligtas sa dikit pang kagadanan.—1 Samuel 21:13-15.

9, 10. Sa anong dahelan na isinurat ni David an Salmo 34, asin siisay an tibaad nasa isip ni David kan kinokomponer an salmo?

⁹ Dai sinasabi kan Biblia kun baga an mga nagsusuportar ki David nagdulag kaiba nia pasiring sa Gat o padagos na nagbabantay sa saiya sa kaharaning mga baryo nin Israel. Ano man an kamugtakan, seguradong nagkaigwa nin maogmang pag-iribaiba liwat kan ibareta sa sainda ni David kun paano sia ilinigtas giraray ni Jehova. An pangyayaring iyan iyo an pinagbasaran kan Salmo 34, siring kan ipinapaheling kan superskripsion. Sa enot na pitong bersikulo kan salmo, inoomaw ni David an Dios huli sa pagligtas sa saiya asin iniimbitaran an mga nagsusuportar sa saiya na iriba nindang ilangkaw si Jehova bilang an Dakulang Paraligtas kan Saiyang banwaan.—Salmo 34:3, 4, 7.

¹⁰ Si David asin an saiyang mga tawohan nagin ligtas sa peligro sa lungib nin Adulam sa mabukid na rehion nin Israel, mga 15 kilometros sa sirangan nin Gat. Duman, nagpoon na mag-arabot asin umiba sa sainda an mga Israelita na deskontento sa mga kamugtakan sa irarom kan pamamahala ni Hadeng Saul. (1 Samuel 22:1, 2) Kan komponeron ni David an mga tataramon kan Salmo 34:8-22, posibleng nasa isip nia an mga ini. An mga pagirumdom sa mga bersikulong iyan mahalaga man para sa sato ngonyan, asin seguradong makikinabang kita sa detalyadong pagtokar sa magayon na salmong ini.

An Pangenot daw sa Saimo Kapareho kan ki David?

11, 12. Igwa kita nin anong mga dahelan na omawon si Jehova nin daing ontok?

¹¹ “Oomawon ko si Jehova sa gabos na panahon; an pag-omaw sa saiya pirmeng yaon sa sakong ngoso.” (Salmo 34:1) Namumuhay bilang sarong isinikwal, seguradong dakol an nagin kahaditan ni David pag-abot sa materyal na mga bagay, alagad siring kan ipinapaheling kan mga tataramon na ini, an aroaldaw na mga kahaditan nia dai nakahale sa saiyang determinasyon na omawon si Jehova. Marahayon nanggad na halimbawa para sa sato kun napapaatubang kita sa mga kasakitan! Baga man kita nasa eskuelahan, nasa trabaho, kaiba kan mga kapwa Kristiano, o nasa pampublikong ministeryo, maninigo na an pangenot na kamawotan niato iyo na omawon si Jehova. Isip-isipa na sana an dai mabilang na dahelan niato na gibohon iyan! Halimbawa, mayo nin katapusan an puede niatong maaraman asin ipaggayagaya sa makangangalas na mga gibo nin paglalang ni Jehova. Asin estudyare an saiyang nahaman paagi sa daganon na kabtang kan saiyang organisasyon! Minsan ngani bako sindang sangkap, ginamit ni Jehova sa mapangyaring paagi an maimbod na mga tawo sa presenteng mga panahon. Paano ikakakomparar an mga gibo nin Dios sa mga tawo na iniidolo kan kinaban? Dai daw kamo minaoyon ki David, na nagsurat man: “Mayo ni saro sa mga dios na arog sa saimo, O Jehova, ni igwa man nin mga gibo na arog kan sa saimo”?—Salmo 86:8.

¹² Kapareho ni David, napapahiro kitang omawon nin daing ontok si Jehova huli sa saiyang daing kaparehong mga gibo. Dugang pa, napapalukso an satong puso na maaraman na an Kahadean nin Dios nasa kamot na ngonyan kan permanenteng Paramana ni David, si Jesu-Cristo. (Kapahayagan 11:15) Nangangahulogan ini na an katapusan kan sistemang ini nin mga bagay harani na. Nakataya an daing katapusan na ngapit kan labing anom na bilyon na tawo. Nungka pang nagkaigwa kan siring na pangangaipo na sabihon sa iba an manongod sa Kahadean nin Dios asin kun ano an madali nang gibohon kaiyan para sa katawohan patin tabangan sindang omawon si Jehova kaiba niato. Daing duwa-duwa na an prioridad niato sa buhay iyo na maninigo na gamiton an lambang oportunidad tanganing enkaminaron an iba na akoon an “maogmang baretang” ini bago magin huri an gabos.—Mateo 24:14.

13. (a) Siisay an ipinaghambog ni David, asin anong klaseng mga tawo an naghimate? (b) Paano nadadagka sa Kristianong kongregasyon ngonyan an mga mahoyo?

¹³ “Si Jehova an ipaghahambog kan sakong kalag; an mga mahoyo makakadangog asin maggagayagaya.” (Salmo 34:2) Dai digdi ipinaghahambog ni David an ano man na personal na mga nagibo nia. Halimbawa, dai nia ipinanagsag an pagkadaya nia sa hade nin Gat. Nasabotan nia na prinotehiran sia ni Jehova kan sia nasa Gat asin na nakadulag sia sa tabang ni Jehova. (Talinhaga 21:1) Huli kaini, ipinaghambog ni David, bakong an saiyang sadiri, kundi si Jehova. Huling ibinantog ni David si Jehova, an mga mahoyo nadagka ki Jehova. Ibinantog man ni Jesus an kadakulaan kan ngaran ni Jehova, asin huli kaini nadagka sa Saiya an mga tawong mapakumbaba asin madaling tokdoan. Ngonyan, an mga mahoyo kan gabos na nasyon nadadagka sa internasyonal na kongregasyon kan linahidan na mga Kristiano, na dian si Jesus an Payo. (Colosas 1:18) Napapahiro an puso kan siring na mga mahoyo kun nadadangog ninda an ngaran nin Dios na pinapamuraway kan mapakumbabang mga lingkod nia asin kun nadadangog ninda an mensahe kan Biblia, na pinapangyayari kan banal na espiritu nin Dios na masabotan ninda.—Juan 6:44; Gibo 16:14.

An mga Pagtiripon Nagpapakosog sa Satong Pagtubod

14. (a) Nakontento daw si David na omawon si Jehova sa pribado sana? (b) Anong halimbawa an itinao ni Jesus mapadapit sa mga pagtiripon para sa pagsamba?

¹⁴ “O pakadakulaa nindo si Jehova sa kaibanan ko, asin iriba niatong ilangkaw an saiyang ngaran.” (Salmo 34:3) Si David dai kontento na omawon si Jehova sa pribado sana. Maogma niang inimbitaran an saiyang mga kairiba na iriba nindang ilangkaw an ngaran nin Dios. Kaagid kaiyan, si Jesu-Cristo, an David na Orog na Dakula, naogmang marhay sa pag-omaw ki Jehova sa publiko—sa lokal na sinagoga, sa mga kapiestahan sa templo nin Dios sa Jerusalem, asin sa pakikiiba sa saiyang mga parasunod. (Lucas 2:49; 4:16-19; 10:21; Juan 18:20) Kanigoan kagayagayang pribilehio na sumunod sa halimbawa ni Jesus sa pag-omaw ki Jehova sa gabos na posibleng okasyon kaiba kan mga kapagtubod, nangorogna ngonyan ta “naheheling [niato] na an aldaw harani na”!—Hebreo 10:24, 25.

15. (a) An eksperyensia ni David nagkaigwa nin anong epekto sa saiyang mga tawohan? (b) Paano kita nakikinabang sa pag-atender sa mga pagtiripon niato?

¹⁵ “Ako naghapot ki Jehova, asin sinimbag nia ako, asin ilinigtas nia ako sa gabos kong katakotan.” (Salmo 34:4) Mahalaga ki David an eksperyensiang ini. Huli kaini, padagos siang nagsabi: “An nagsasakit nin makuring ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia.” (Salmo 34:6) Kun nakikiasosyar sa mga kapagtubod, igwa kita nin dakol na oportunidad na magsaysay nin nakakaparigon na mga eksperyensia sa kun paano kita tinabangan ni Jehova na tagalan an masakit na mga kamugtakan. Nagpapakosog ini sa pagtubod kan satong mga kapagtubod, kun paanong an mga kapahayagan ni David nagpakosog sa pagtubod kan saiyang mga parasuportar. Sa kamugtakan ni David, an mga kairiba nia “nagheling [ki Jehova] asin nagkinang, asin an saindang lalauogon dai nanggad mapapasupog.” (Salmo 34:5) Minsan ngani nagdudulag ki Hadeng Saul, dai sinda nasupog. Kompiado sinda na sinusuportaran nin Dios si David, asin an saindang mga lalauogon makinang. Sa kaagid na paagi, an bagong mga interesado saka idtong mga nagin tunay na Kristiano sa halawig nang panahon nag-aasa ki Jehova para sa suporta. Mantang personal nindang naeksperyensiahan an saiyang tabang, an makinang nindang lalauogon nagpapabanaag kan saindang determinasyon na magdanay na maimbod.

Magin Mapagpasalamat sa Tabang kan mga Anghel

16. Paano ginagamit ni Jehova an saiyang mga anghel tanganing iligtas kita?

¹⁶ “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.” (Salmo 34:7) Dai minansay ni David an pagkaligtas sa saiya ni Jehova bilang sarong bagay na sa saiya sana puedeng mangyari. Totoo, si David linahidan ni Jehova, an sunod na hade nin Israel; alagad aram nia na ginagamit ni Jehova an saiyang mga anghel tanganing bantayan an gabos na maimbod niang parasamba, baga man sinda prominente o hamak. Sa presenteng panahon niato, naeksperyensiahan man kan tunay na mga parasamba an proteksion na itinatao ni Jehova. Sa Nazing Alemania—saka sa Angola, Malawi, Mozambique, asin sa dakol pang ibang nasyon—an mga autoridad naggibo nin kampanya tanganing pohoon an mga Saksi ni Jehova. Nagin basang sana an saindang mga paghihingoa. Imbes, an banwaan ni Jehova sa mga nasyon na iyan padagos na nag-ooswag mantang iriba nindang ilinalangkaw an ngaran nin Dios. Taano? Huling ginagamit ni Jehova an saiyang banal na mga anghel tanganing protehiran asin giyahan an saiyang banwaan.—Hebreo 1:14.

17. Sa anong mga paagi nagtatabang sa sato an mga anghel nin Dios?

¹⁷ Dugang pa, puedeng imaniobra kan mga anghel ni Jehova na mahale sa tahaw kan banwaan ni Jehova an siisay man na nagpapasingkog sa iba. (Mateo 13:41; 18:6, 10) Asin minsan ngani dai niato naaaraman sa panahon na iyan, hinahale kan mga anghel an mga balakid na puedeng makaolang sa satong paglilingkod sa Dios, asin pinoprotehiran ninda kita sa mga bagay na magsasapeligro kan satong relasyon ki Jehova. Pinakamahalaga, ginigiyahan ninda kita sa gibohon na pagpahayag kan “daing katapusan na maogmang bareta” sa gabos na tawo, kaiba an mga lugar na isinasagibo an paghuhulit sa irarom nin peligrosong mga kamugtakan. (Kapahayagan 14:6) An prueba kan pagtabang kan mga anghel parateng isinasaysay sa mga babasahon sa Biblia na ipinupublikar kan Mga Saksi ni Jehova.a An siring na mga eksperyensia dakolon na marhay tanganing sabihon na nagkanorongod sana.

18. (a) Ano an hinahagad tanganing makinabang kita sa tabang kan mga anghel? (b) Ano an totokaron sa masunod na artikulo?

¹⁸ Tanganing padagos na makinabang sa paggiya asin proteksion kan mga anghel, dapat na padagos niatong ilinalangkaw an ngaran ni Jehova dawa sa atubangan nin pagtumang. Girumdomon, an mga anghel nin Dios nagkakampo sana “sa palibot kan mga natatakot [ki Jehova].” Ano an ipinaparisa kaiyan? Ano an pagkatakot sa Dios, asin paano niato makukultibar iyan? Taano ta gugustohon nin sarong mamomoton na Dios na matakot kita sa saiya? Totokaron an mga hapot na ini sa masunod na artikulo.

[Nota sa Ibaba]

Ano an Isisimbag Nindo?

• Anong mga pagbalo an tinagalan ni David bilang sarong hoben?

• Arog ni David, ano an pangenot sa sato?

• Paano niato minamansay an Kristianong mga pagtiripon?

• Paano ginagamit ni Jehova an saiyang mga anghel tanganing tabangan kita?

[Mapa sa pahina 21]

(Para sa aktuwal na format, hilingon an publikasyon)

Rama

Gat

Ziklag

Gibea

Nob

Jerusalem

Betlehem

Adulam

Keila

Hebron

Zif

Hores

Carmelo

Maon

En-gedi

Dagat na Asin

[Credit Line]

Mapa: Basado sa mga mapa na nakua an deretsong ipublikar kan Pictorial Archive (Near Eastern History) Est. asin Survey of Israel

[Ritrato sa pahina 21]

Dawa kan sia sarong dulag, ilinangkaw ni David an ngaran ni Jehova

[Ritrato sa pahina 23]

An satong pagtubod napapakosog mantang hinihinanyog niato an nakakaparigon na mga eksperyensia na isinasaysay sa satong Kristianong mga pagtiripon