LEKSIYON 09

Rumani sa Diyos Paagi sa Pamibi

Imprentadong Edisyon

Namamati mo daw na kaipuhan mo nin giya sa buhay? Igwa ka daw nin mga hapot sa buhay na gusto mong masimbag? Pinangluluyahan ka daw saka kaipuhan mo nin pampakusog nin buot? Gusto mo daw na magin mas harani ki Jehova? Sa gabos na iyan, makakatabang an pamibi. Pero paano kita dapat mamibi? Gabos daw na pamibi dinadangog nin Diyos? Paano mo masisigurado na dadangugon niya an saimong mga pamibi? Aramon ta.

1. Kiisay kita dapat mamibi, asin ano an mga puwede tang ipamibi?

Itinukdo ni Jesus na sa satong Ama sa langit sana kita dapat mamibi. Si Jesus mismo namibi ki Jehova. Sinabi niya: “Mamibi kamo sa arog kaining paagi: ‘Ama niyamo na nasa langit . . .’” (Mateo 6:9) Nagigin mas harani kita ki Jehova pag namimibi kita sa saiya.

Haros dawa ano puwede niyatong ipamibi. Pero siyempre, dapat na kauyon kan kabutan nin Diyos an satong mga pamibi para simbagon niya iyan. Sinasabi kan Bibliya: ‘Ano man na hagadon ta kauyon kan kabutan nin Diyos, dinadangog niya kita.’ (1 Juan 5:14) Nagtao si Jesus nin mga halimbawa kan mahalagang mga bagay na tama sanang ipamibi ta. (Basahon an Mateo 6:9-13.) Apuwera sa personal na mga bagay, dai ta man dapat lingawan sa satong pamibi na pasalamatan an Diyos sa gabos na ginigibo niya para sa sato saka hagadon saiya na tabangan man an iba.

2. Paano kita dapat mamibi?

Sinasabi sa sato kan Bibliya na ‘sabihon ta sa Diyos an laog kan satong puso.’ (Salmo 62:8) Kaya dapat na sinsero saka hali sa puso an satong mga pamibi. Puwede kitang mamibi nin makusog o silensiyo ano man an posisyon ta, nakaluhod man, nakatukaw, o nakatindog, basta nagpapahiling iyan nin paggalang ki Jehova. Puwede kitang mamibi saiya sain man kita saka dawa anong oras.

3. Paano sinisimbag nin Diyos an satong mga pamibi?

Sinisimbag niya iyan sa iba-ibang paagi. Itinao sa sato ni Jehova an saiyang Tataramon, an Bibliya. Sa parati, diyan ta makukua an mga simbag sa satong mga hapot. An pagbasa kan Tataramon nin Diyos “nagpapadunong sa daing eksperyensiya.” (Salmo 19:7; basahon an Santiago 1:5.) Puwede niya kitang tawan nin matuninong na isip pag nag-aagi kita nin mga problema. Saka pag kaipuhan ta talaga nin tabang, puwede niyang gamiton an mga lingkod niya para tabangan kita.

ARAMON PA

Aramon kun paano ka dapat mamibi para dangugon iyan nin Diyos, asin kun paano makakatabang sa saimo an pamibi.

4. Kun ano an dapat tang gibuhon para dangugon nin Diyos an pamibi ta

Anong mga pamibi an inaako saka dai inaako nin Diyos? I-play an VIDEO.

VIDEO: Dinadangog Daw nin Diyos an Gabos na Pamibi?—Excerpt (2:42)

Gusto ni Jehova na mamibi kita sa saiya. Basahon an Salmo 65:2, dangan pag-ulayan an mga hapot na ini:

Sa hiling mo, gusto daw kan “Paradangog nin pamibi” na mamibi ka sa saiya? Taano ta nasabi mo iyan?

Kun gusto tang dangugon kan Diyos an satong mga pamibi, dapat tang sunudon an mga pamantayan niya. Basahon an Mikas 3:4 saka 1 Pedro 3:12, dangan pag-ulayan an hapot na ini:

Paano ta masisigurado na dadangugon ni Jehova an satong mga pamibi?

Pag may giyera, posibleng parehong namimibi an magkalaban na manggana. Sisimbagon daw nin Diyos an arog kaiyan na mga pamibi?

5. Dapat na hali sa puso an mga pamibi ta

May mga tawo na an aram na pamibi su mga tinuom na mga pamibi na nakagimatan na ninda. Pero arog daw kaiyan an gusto nin Diyos na paagi nin pagpamibi sa saiya? Basahon an Mateo 6:7, dangan pag-ulayan an hapot na ini:

Paano ta malilikayan na “pagparauruutruhon an iyo man sanang mga tataramon” sa satong mga pamibi?

Kada aldaw, puwede kang mag-isip nin sarong espesyal na bagay na maipagpapasalamat mo ki Jehova. Kun gigibuhon mo iyan aroaldaw sa laog nin sarong semana, pitong bagay na an maipapamibi mo na dai inuuruutro.

Sarong aking lalaki na nakikipag-ulay sa saiyang mga magurang. — Gusto nin sarong marahay na ama na sabihon saiya kan aki niya kun ano talaga an nasa puso kaini. Gusto man ni Jehova na hali sa puso an mga pamibi ta

6. An pamibi regalo sa sato nin Diyos

Paano makakatabang sa sato an pamibi lalo na pag may inaagihan kitang mga problema? I-play an VIDEO.

VIDEO: An Pamibi Nakakatabang sa Sato na Makayanan an mga Problema (1:32)

Nangangako an Bibliya na matatabangan kita nin pamibi na magkaigwa nin matuninong na isip. Basahon an Filipos 4:6, 7, dangan pag-ulayan an mga hapot na ini:

Dawa ngani dai man pirming nahahali kan pamibi an satong mga problema, paano iyan nakakatabang sa sato?
Ano an pira sa mga gusto mong ipamibi?

Aram mo daw?

An tataramon na “amen” nangangahulugan na “mangyari lugod” o “iyo nanggad.” Puon pa kan mga panahon kan Bibliya, sinasabi na an “amen” pagkatapos kan pamibi.—1 Cronica 16:36.

7. Magtao nin panahon sa pagpamibi

Kun minsan tibaad sibot-sibot kita kaya nalilingawan tang mamibi. Gurano kahalaga ki Jesus an pagpamibi? Basahon an Mateo 14:23 saka Marcos 1:35, dangan pag-ulayan an mga hapot na ini:

Ano an ginibo ni Jesus para magkaigwa siya nin panahon na mamibi?
Ika, ano an pinakamarahay na oras para saimo na mamibi?

Collage: Sarong babayi na namimibi nin dakul na beses kada aldaw. 1. Pag aga. 2. Kaiba kan saiyang mga aki. 3. Pag nasa trabaho. 4. Bago magkakan.

MAY MGA NAGSASABI: “Mayo man talagang nagdadangog sa pamibi. Sa isip lang ’yan saka pampagian lang nin buot.”

Ano an masasabi mo?

SUMARYO

Pag hali sa puso an satong mga pamibi, nagigin mas harani kita sa Diyos asin nagkakaigwa kita nin matuninong na isip saka nin determinasyon na sunudon si Jehova.