Siisay an Makakapagligtas sa mga Naghahagad nin Tabang?

“O Dios, itao mo sa hade an saimong hudisyal na mga desisyon . . . Huli ta ililigtas nia an dukha na naghahagad nin tabang.”—SAL. 72:1, 12.

1. Dapit ki David, ano an manonodan niato manongod sa pagkaherak nin Dios?

NAKAKAPARIGON nanggad sa boot an mga tataramon na iyan, na minalataw na isinurat ni Hadeng David kan suanoy na Israel! Pirang taon bago iyan isurat, nag-agi sia nin grabeng kamondoan pagkatapos na makakomiter nin pagsambay ki Bat-seba. Kan panahon na iyan, si David nakimaherak sa Dios: “Sono sa saimong abundang pagkaherak paraa an sakuyang mga kalapasan. . . . An sakuyang kasalan danay na nasa atubangan ko. . . . Uya! Sa sala ako ipinangaki na may kolog nin pangangaki, asin sa kasalan ipinangidam ako kan sakong ina.” (Sal. 51:1-5) Marahay sana ta kinokonsiderar ni Jehova an satong minanang makasalan na kamugtakan.

2. Paano kita matatabangan kan Salmo 72?

² Naiintindihan ni Jehova an satong makaheherak na kamugtakan. Minsan siring, arog kan ihinula, “ililigtas [kan nombradong Hade nin Dios] an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hamak asin sa dukha, asin an kalag kan mga dukha saiyang ililigtas.” (Sal. 72:12, 13) Paano itatao an kaginhawahan? Sinasabi iyan sa sato kan Salmo 72. An awit na ini, na ginibo mapadapit sa pagigin hade kan aki ni David na si Salomon, patanaw kun paano an katawohan mapapaginhawa sa kasakitan paagi sa pamamahala kan Aki nin Dios, si Jesu-Cristo.

Sarong Patanaw kan Pamamahala ni Cristo

3. Ano an hinagad ni Salomon, asin ano an itinao sa saiya nin Dios?

³ Pagkatapos na ipagboot kan may edad nang si David na gibohon na hade si Salomon, tinawan nia ini nin espesipikong mga instruksion na sinunod nin eksakto ni Salomon. (1 Ha. 1:32-35; 2:1-3) Kan huri, si Jehova nagpaheling ki Salomon sa sarong pangatorogan asin nagsabi: “Sabihon mo kun ano an itatao ko sa saimo.” Saro sana an hinagad ni Salomon: “Tawan mo an saimong lingkod nin makinuyog na puso sa paghokom sa saimong banwaan, sa pagbatid kun ano an marahay asin an maraot.” Huli sa mapakumbabang pakiolay ni Salomon, itinao nin Dios an hinagad nia asin dinagdagan pa Nia iyan.—1 Ha. 3:5, 9-13.

4. Paano an paghade ni Salomon ilinadawan nin saro pang namamahala kan panahon nia?

⁴ Paagi sa bendisyon ni Jehova, an paghade ni Salomon nagresulta sa pinakapambihirang peryodo nin katoninongan asin prosperidad na nangyari sa pamamahala nin arin man na gobyerno sa daga kasuarin man. (1 Ha. 4:25) Kaiba sa mga nakaheling kun anong klase an pamamahala ni Salomon iyo an reyna kan Seba asin an dakol na kaiba kaini. Sinabi nia ki Salomon: “Totoo an tataramon na nadangog ko sa sakong sadiring daga . . . Mayo pa sa kabanga an isinaysay sa sako. Nalabihan mo sa kadonongan asin prosperidad an mga nabareta na dinangog ko.” (1 Ha. 10:1, 6, 7) Pero, orog nanggad na kadonongan an ipinaheling ni Jesus, na tama sanang makakapagsabi dapit sa saiyang sadiri: “Uya! an saro na labi pa kisa ki Salomon yaon digdi.”—Mat. 12:42.

Pakaginhawa Paagi sa Saro na Orog Kisa ki Salomon

5. Ano an ihinahayag kan Salmo 72, asin anong patanaw an itinatao kaiyan?

⁵ Siyasaton niato ngonyan an laog kan ika-72 na Salmo tanganing maaraman an mga bendisyon sa pamamahala ni Jesu-Cristo, an Saro na Orog Kisa ki Salomon. (Basahon an Salmo 72:1-4.) Ihinahayag kan salmong ini kun ano an saboot ni Jehova manongod sa ‘pamamahala kan saiyang Aki bilang prinsipe,’ an “Prinsipe nin Katoninongan,” si Jesu-Cristo. (Isa. 9:6, 7) Sa paggiya nin Dios, an Saro na Orog Kisa ki Salomon ‘dedepensahan an ipinapakipaglaban kan mga nagsasakit nin makuri asin ililigtas an mga aki kan dukha.’ Magkakaigwa nin katoninongan asin katanosan sa saiyang pamamahala. Mantang nasa daga, nagtao si Jesus nin patanaw dapit sa gigibohon kan maabot na Sangribong Taon na Paghade nia.—Kap. 20:4.

6. Anong mga patanaw dapit sa mga bendisyon kan pamamahala kan Kahadean an itinao ni Jesus?

⁶ Estudyare an nagkapira sa mga ginibo ni Jesu-Cristo na patanaw kan gigibohon nia para sa katawohan bilang kaotoban kan Salmo 72. Tama sanang mapahanga kita sa saiyang dakulang pagmakolog sa mga nagsasakit. (Mat. 9:35, 36; 15:29-31) Halimbawa, sarong lalaki na may lepra an nagdolok ki Jesus asin nakiolay: “Kun boot mo sana, mapapalinig mo ako.” Si Jesus nagsimbag: “Boot ko. Luminig ka.” Asin an lalaki naomayan! (Mar. 1:40-42) Kan huri, nanompongan ni Jesus an sarong balo na nagadanan nin solong aking lalaki. Huling “napahiro nin pagkaherak,” si Jesus nagsabi, “Buhat!” asin buminuhat an aki nia. Buhay na giraray ini!—Luc. 7:11-15.

7, 8. Ano an nagkapirang pagpaheling nin kapangyarihan ni Jesus na magpaomay?

⁷ Tinawan ni Jehova nin kapangyarihan si Jesus na gumibo nin mga milagro. Iinilustrar ini sa nangyari sa “sarong babae na doseng taon nang inaawasan nin dugo.” Minsan ngani “sia pinaagi na sa dakol na kakologan nin dakol na doktor asin naubos na niang ikabayad an gabos na sadiri nia,” naggrabe pa an saiyang helang. An babae nakisusoan sa mga tawo asin dinutaan si Jesus—sarong pagbalga sa Ley para sa sarong ‘inaawasan nin dugo.’ (Lev. 15:19, 25) Narisa ni Jesus na may nagluwas na kapangyarihan sa saiya kaya naghapot sia kun siisay an nagduta sa saiya. Mantang “natatakot asin nagtatakig,” an babae “luminuhod sa atubangan nia saka sinabi sa saiya an bilog na katotoohan.” Sa pakaaram na pinaomayan ni Jehova an babae, maboot ining trinatar ni Jesus asin sinabihan: “Aki, pinaomayan ka kan saimong pagtubod. Lakaw sa katoninongan, asin magin marahay an saimong salud gikan sa masakiton mong helang.”—Mar. 5:25-27, 30, 33, 34.

⁸ An kapangyarihan na magpaomay na itinao nin Dios ki Jesus nakapaomay sa mga may helang, alagad segurado man na may mapuersang epekto iyan sa mga nagmamasid. Halimbawa, bago an saiyang bantog na Sermon sa Bukid, daing duda na dakol an napahanga kan maheling ninda na pinaomayan ni Jesus an mga tawo. (Luc. 6:17-19) Kan si Juan Bautista magsugo nin duwang mensahero tanganing seguradohon na si Jesus an Mesiyas, nanompongan ninda Sia na ‘pinapaomayan an dakol sa mga kahelangan asin grabeng mga kamatean patin marigsok na mga espiritu, asin tinatawan an dakol na buta kan balaog nin pakaheling.’ Dangan sinabi ni Jesus sa duwa: “Ibareta nindo ki Juan an saindong naheling asin nadangog: an mga buta nakakaheling, an mga pilay nagraralakaw, an mga may lepra nagkakarilinigan asin an mga bungog nakakadangog, an mga gadan binubuhay liwat, an mga dukha sinasabihan kan maogmang bareta.” (Luc. 7:19-22) An mensaheng iyan seguradong nakaparigon nanggad ki Juan!

9. An mga milagro ni Jesus mga patanaw kan ano?

⁹ Totoo, temporaryo sana an itinao ni Jesus na kaginhawahan sa pagsakit durante kan saiyang ministeryo sa daga. An mga pinaomayan o binuhay liwat nia nagadan kan huri. Pero, an mga milagro na ginibo ni Jesus mantang sia nasa daga mga patanaw kan makakamtan kan katawohan na nagdadanay na kaginhawahan durante kan saiyang Mesiyanikong pamamahala.

Sarong Maabot na Paraiso sa Bilog na Daga!

10, 11. (a) Sagkod noarin magdadanay an mga bendisyon kan Kahadean, asin magigin anong klase an pamamahala ni Jesus? (b) Siisay an makakaibahan ni Cristo sa Paraiso, asin paano sia mabubuhay sagkod lamang?

¹⁰ Imahinara kun magigin anong klase an buhay sa Paraiso sa daga. (Basahon an Salmo 72:5-9.) An mga parasamba sa solamenteng tunay na Dios mabubuhay sa Paraiso sagkod na igwa nin saldang asin bulan—iyo, sagkod lamang! Si Hadeng Jesu-Cristo magigin nakakarepresko, ‘na siring sa oran sa ibabaw kan pinutolan na mga doot asin siring sa abundang oran na minabasa sa daga.’

¹¹ Mantang iniimahinar nindo an kaotoban kan salmong ini, dai daw napapahiro an saindong puso kan paglaom na mabuhay sagkod lamang sa sarong paraisong daga? Seguradong naogmang marhay an nakapakong parakasala kan sabihon sa saiya ni Jesus: “Ika makakaibahan ko sa Paraiso.” (Luc. 23:43) Durante kan Sangribong Taon na Paghade ni Jesus, bubuhayon liwat an tawong iyan. Kun magpapasakop sia sa pamamahala ni Cristo, mabubuhay sia digdi sa daga sagkod lamang na may sangkap na salud asin kaogmahan.

12. Durante kan Milenyal na Pamamahala ni Cristo, magkakaigwa nin anong oportunidad an binuhay liwat na mga bakong matanos?

¹² Sa pamamahala kan Saro na Orog Kisa ki Salomon, si Jesu-Cristo, “magsusupang an matanos,” an boot sabihon, mag-ooswag o magtatalubo sinda. (Sal. 72:7) Sa panahon na iyan maheheling nanggad an pagkamoot asin mamomoton na pag-ataman ni Cristo, siring kaidtong yaon sia sa daga. Sa ipinanuga nin Dios na bagong kinaban, dawa “an mga bakong matanos” na bubuhayon liwat tatawan nin mamomoton na oportunidad na kuyogon an mga pamantayan ni Jehova asin mabuhay. (Gibo 24:15) Siempre, an mga nagsasayumang humiro kaoyon kan mga kahagadan nin Dios dai totogotan na padagos na mabuhay asin raoton an katoninongan asin katrangkilohan kan bagong kinaban.

13. Magigin gurano kahiwas an pamamahala kan Kahadean, asin taano ta an katoninongan kaiyan dai noarin man mararaot?

¹³ An pagigin lakop sa bilog na daga kan pamamahala kan Saro na Orog Kisa ki Salomon maririsa sa mga tataramon na ini: “Magkakaigwa sia nin mga sakop poon sa dagat sagkod sa dagat asin poon sa Salog [nin Eufrates] sagkod sa mga poro kan daga. Sa atubangan nia, maduruko an mga nag-eerok sa lugar na mayo nin tubig, asin didilaan kan mismong mga kaiwal nia an alpog.” (Sal. 72:8, 9) Iyo, si Jesu-Cristo mamamahala sa bilog na daga. (Zac. 9:9, 10) An mga nagpapahalaga sa saiyang pamamahala asin sa mga bendisyon kaiyan “maduruko” bilang gikan sa boot na pagpasakop. Sa ibong na lado, an daing pagsolsol na mga parakasala mapopoho dawa kun sinda “sanggatos nang taon.” (Isa. 65:20) “Didilaan [ninda] an alpog.”

Maduminamay na Pagmakolog sa Sato

14, 15. Taano ta masasabi niato na nasasabotan ni Jesus an mga namamatean nin tawo asin na “ililigtas nia an dukha na naghahagad nin tabang”?

¹⁴ An makasalan na katawohan nasa kaherakherak na kamugtakan asin nangangaipo nanggad nin tabang. Alagad igwa kita nin paglaom. (Basahon an Salmo 72:12-14.) Si Jesus, an Saro na Orog Kisa ki Salomon, maduminamay sa sato huling nasasabotan nia an satong pagigin bakong sangkap. Dugang pa, si Jesus nagsakit para sa katanosan, asin itinogot nin Dios na atubangon nia an mga pagbalo na sia sana. Iyo, si Jesus nagsakit na gayo sa emosyon kaya “an saiyang ganot nagin siring sa mga turo nin dugo na nagtuturo sa daga”! (Luc. 22:44) Kan huri, sa hariging pasakitan, sia nagkurahaw: “Dios ko, Dios ko, tadaw ta pinabayaan mo ako?” (Mat. 27:45, 46) Sa ibong kan gabos na sakit na inagihan nia, asin minsan ngani todo-todo an paghihingoa ni Satanas na irayo sia ki Jehova, si Jesus nagdanay na maimbod ki Jehova Dios.

¹⁵ Makakasierto kita na naheheling ni Jesus an satong kolog asin “ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang.” Si Jesus, na may mamomoton na pagmakolog na kapareho kan sa saiyang ama, ‘maghihinanyog sa mga dukha,’ asin ‘magpapaomay kan mga nalugadan an puso, na binobogkosan an saindang makolog na mga kabtang.’ (Sal. 69:33; 147:3) Si Jesus “makakapakidamay sa satong mga kaluyahan,” huli ta sia “nabalo na sa gabos na bagay arog niato.” (Heb. 4:15) Marahayon na maaraman na si Hadeng Jesu-Cristo namamahala na sa langit asin gustong-gustong paginhawahon an nagsasakit na mga tawo!

16. Taano ta makakapakidamay si Salomon sa saiyang mga sakop?

¹⁶ Huling igwa si Salomon nin kadonongan asin pakarorop, daing duda na ‘naherak nanggad sia sa hamak.’ Apuera kaiyan, dakol an makamomondo asin makolog na pangyayari sa buhay nia. Linugos kan tugang niang si Amnon an saiyang tugang na si Tamar, asin si Amnon ginadan kan tugang ni Salomon na si Absalon huli sa krimen na iyan. (2 Sam. 13:1, 14, 28, 29) Inagaw ni Absalon an trono ni David, alagad dai sia nagin mapanggana, asin ginadan sia ni Joab. (2 Sam. 15:10, 14; 18:9, 14) Kan huri, prinobaran kan tugang ni Salomon, si Adonias, na agawon an pagigin hade. Kun nagin mapanggana sia, seguradong nangahulogan ini kan kagadanan ni Salomon. (1 Ha. 1:5) Risang-risa na nasabotan ni Salomon an pagsakit nin tawo huli sa sinabi nia sa pamibi sa inagurasyon kan templo ni Jehova. Dapit sa saiyang mga sakop, an hade namibi: “Aram ninda kada saro an saiyang sadiring damat asin an saiyang sadiring kolog . . . Magpatawad ka [Jehova] asin itao sa lambang saro an sono sa gabos niang dalan.”—2 Cron. 6:29, 30.

17, 18. Anong kolog an kaipuhan na tagalan nin mga lingkod nin Dios, asin ano an nakakatabang sa sainda na magibo iyan?

¹⁷ An ‘satong sadiring kolog’ tibaad resulta kan mga epekto kan nagkapirang pangyayari kan nakaagi. Si Mary,a sarong Saksi ni Jehova na mga labi nang 30 anyos, nagsurat: “May dahelan nanggad ako na magin maogma, alagad sa parate nasusupog asin nababalde ako huli sa sakong nakaagi. Nagreresulta iyan sa grabeng kamondoan, asin napapahibi ako, na garo bago kasuodma sana nangyari an gabos. An mga pangyayaring masakit malingawan nagreresulta pa man giraray sa labi-labing pakamate nin kasalan asin pagkadaing halaga.”

¹⁸ Dakol sa mga lingkod nin Dios an may kaparehong namamatean, alagad ano an puedeng makatabang tanganing magkaigwa sinda kan kosog na kaipuhan sa pagtagal? “Ngonyan, an tunay na mga katood asin sarong espirituwal na pamilya nagpapaogma sa sako,” an sabi ni Mary. “Pinagmamaigotan ko man na isentro an sakong isip sa mga panuga ni Jehova para sa ngapit, asin kompiado ako na an sakong mga kurahaw sa paghagad nin tabang magigin kurahaw nin kagayagayahan.” (Sal. 126:5) Kaipuhan kitang maglaom sa probisyon nin Dios sa sato, an saiyang Aki, na ninombrahan nia bilang Tagapamahala. Mapadapit sa saiyang Aki, ihinula: “Maheherak sia sa hamak asin sa dukha, asin an kalag kan mga dukha saiyang ililigtas. Gikan sa pang-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang pagheling.” (Sal. 72:13, 14) Nakakaparigon nanggad iyan!

Sarong Bagong Kinaban nin Abundansia an Naghahalat sa Sato

19, 20. (a) Arog kan ipinaparisa sa Salmo 72, anong problema an mareresolberan kan pamamahala kan Kahadean? (b) Kiisay maninigong pangenot na mapaduman an onra kan pamamahala ni Cristo, asin ano an namamatean mo manongod sa gigibohon kaiyan?

¹⁹ Probaran giraray nindo na iladawan sa isip an ngapit kan mga matanos sa bagong kinaban nin Dios sa pamamahala kan Saro na Orog Kisa ki Salomon. “Magkakaigwa nin abundang tipasi sa ibabaw kan daga,” an panuga sa sato. Iyan “magsosopay sa alitoktok kan kabukidan.” (Sal. 72:16) Huling sa parate mayo nin naaaning tipasi sa mga alitoktok kan kabukidan, idinodoon kan mga tataramon na ini kun gurano nanggad kamagigin mabunga an daga. An bunga kaiyan “magigin siring kan sa Lebanon,” sarong rehion na abunda an ibinubunga kan panahon kan paghade ni Salomon. Isip-isipa! Mayo na nin kakulangan sa kakanon, mayo nin malnutrisyon, mayo nin nagugutom! Sa panahon na iyan, an gabos magkakaigwa nin “bangkete nin matatabang putahe.”—Isa. 25:6-8; 35:1, 2.

²⁰ Kiisay mapapaduman an onra huli sa gabos na bendisyon na ini? Sa pangenot, sa Daing Sagkod na Hade asin Unibersal na Tagapamahala, si Jehova Dios. Sa panahon na iyan, kita gabos garo man sana magayagayang isasabay an satong tingog sa pantapos na kabtang kan magayon asin nakakaogmang awit na ini: “Logod na an saiyang ngaran [an ki Hadeng Jesu-Cristo] magin sagkod sa panahon na daing talaan; sa atubangan nin saldang logod na maglakop an saiyang ngaran, asin logod na magbendisyon sinda kan saindang sadiri paagi sa saiya; logod na ipahayag siang maogma kan gabos na nasyon. Pag-omawon si Jehova Dios, an Dios nin Israel, na iyo sana an naggigibo nin makangangalas na mga gibo. Asin pag-omawon an saiyang mamuraway na ngaran sagkod sa panahon na daing talaan, asin makapano logod sa bilog na daga an saiyang kamurawayan. Amen asin Amen.”—Sal. 72:17-19.

[Nota sa Ibaba]

Ano an Isisimbag Nindo?

• An Salmo 72 makahulang nagtatao nin patanaw kan ano?

• Siisay an Saro na Orog Kisa ki Salomon, asin magigin gurano kahiwas an saiyang pamamahala?

• Ano an personalmenteng nakakaakit sa saimo manongod sa mga bendisyon na ihinula sa ika-72 na Salmo?

[Ritrato sa pahina 29]

Ano an ipinanganino kan prosperidad na naeksperyensiahan sa paghade ni Salomon?

[Ritrato sa pahina 32]

Bawi nanggad an gabos na paghihingoa na mabuhay sa Paraiso sa pamamahala kan Saro na Orog Kisa ki Salomon