Si Jehova an Kahirasan Ko

“Ako an saimong kahirasan asin an saimong mana sa tahaw kan mga aki ni Israel.”—BIL. 18:20, NW.

1, 2. (a) Ano an nagin situwasyon kan mga Levita kun dapit sa dagang pamana? (b) Ano an iginarantiya ni Jehova sa mga Levita?

PAGKATAPOS na masakop kan mga Israelita an kadaklan kan Dagang Panuga, nagkonsentrar si Josue sa paghirashiras kan daga. Sa paggibo kaini, kaibanan nia an Halangkaw na Saserdoteng si Eleazar asin an mga namamayo sa mga tribo. (Bil. 34:13-29) Kun dapit sa mga Levita, mayo sinda nin dagang mamanahon na arog kan ibang mga tribo. (Jos. 14:1-5) Taano an mga Levita ta mayo nin teritoryo, o kahirasan, sa Dagang Panuga? Nalingawan daw sinda?

² Makukua niato an simbag sa sinabi ni Jehova sa mga Levita. Tanganing idoon ni Jehova na dai sinda pinapabayaan, sia nagsabi sa sainda: “Ako an [saindong] kahirasan asin an [saindong] mana sa tahaw kan mga aki ni Israel.” (Bil. 18:20, NW) Kanigoan na garantiya ini: “Ako an saimong kahirasan”! Ano an mamamatean mo kun sabihon man iyan sa saimo ni Jehova? Tibaad an enot mong reaksion, ‘Maninigo daw ako sa siring na garantiya kan Makakamhan sa Gabos?’ Tibaad isipon mo man, ‘Talaga daw na si Jehova puedeng magin kahirasan nin siisay man na bakong perpektong Kristiano ngonyan?’ Kalabot ka asin an saimong mga mahal sa buhay sa mga hapot na iyan. Kaya, aramon niato kun ano an kahulogan kan sinabing iyan nin Dios. Makakatabang iyan sa sato na masabotan kun paano si Jehova puedeng magin kahirasan nin mga Kristiano ngonyan. Orog pa dian, sia puedeng magin kahirasan mo, baga man an paglaom mo mabuhay sa langit o sa paraiso digdi sa daga.

Sinustentohan ni Jehova an mga Levita

 3. Paano nangyari na an mga Levita an pinili nin Dios para sa paglilingkod sa saiya?

³ Bago itinao ni Jehova an Ley sa mga Israelita, an payo kan mga pamilya an nagseserbing mga saserdote sa tahaw ninda. Kan itao nin Dios an Ley, iinareglo nia na magkaigwa nin bilog na panahon na mga saserdote asin katabang hale sa tribo ni Levi. Paano ini nangyari? Kan gadanon nin Dios an panganay na mga aki kan mga taga Egipto, pinabanal nia an panganay na mga aki kan mga Israelita, na itinatagama sinda para sa saiya, bilang sadiri nia. Dangan, ginibo nin Dios an mahalagang pagliliwat na ini: “Kinua ko an magña Levita . . . na kasalihid kan gabos na magña pagñanay kan magña aking lalaki ni Israel.” Huling ipinaheling nin sarong sensus na mas dakol an panganay na aking lalaki kan ibang mga tribo nin Israel kisa sa bilang kan mga Levita, may halagang pantubos na ibinayad para sa sobrang bilang na iyan. (Bil. 3:11-13, 41, 46, 47) Sa siring, magigibo na kan mga Levita an papel ninda sa paglilingkod sa Dios nin Israel.

4, 5. (a) Ano an nagin kahulogan para sa mga Levita kan bagay na an Dios an magigin kahirasan ninda? (b) Paano sinustentohan nin Dios an mga Levita?

⁴ Ano an nagin kahulogan kan asignasyon na iyan para sa mga Levita? Sinabi ni Jehova na sia an magigin kahirasan ninda sa paagi na imbes na tawan nin dagang pamana, pinagkatiwalaan sinda nin pribilehio nin paglilingkod na daing kaagid an halaga. An “paglilingkod bilang mga saserdote ni Jehova” an kahirasan ninda. (Jos. 18:7, NW) Ipinapaheling kan konteksto nin Bilang 18:20 na dai sinda nagin dukha sa materyal huli kaini. (Basahon an Bilang 18:19, 21, 24.) Dapat na tawan an mga Levita kan “gabos na himoloan [“ikasampulong kabtang,” NW] sa Israel nin siring sa panonondon [“mana,” NW], huli kan saindang paglingkod.” Tatawan sinda nin 10 porsiento kan inani nin mga Israelita asin kan nadagdag na ataman na mga hayop. Dangan, dapat na magkontribwir an mga Levita nin ikasampulong kabtang kan itinao sa sainda, “an orog karahay sa gabos kaiyan,” bilang suporta sa kabilogan na grupo nin mga saserdote.a (Bil. 18:25-29) Itinatao man sa mga saserdote an “gabos na dolot” o banal na kontribusyon na dinadara kan mga aki ni Israel para sa Dios sa lugar nin pagsamba. Sa siring, may marahay na dahelan an mga saserdote na magtubod na susustentohan sinda ni Jehova.

⁵ Minalataw na an Ley ni Moises nagtao nin probisyon para sa saro pa na ikasampulong kabtang, na itinatagama tanganing konsumohon asin ikaogma kan mga pamilya durante kan banal na mga kombension kada taon. (Deut. 14:22-27) Minsan siring, sa katapusan kan kada ikatolo asin ikaanom na taon kan pitong taon na siklo kan Sabbath, ibinubugtak an ikasampulong kabtang na ini sa tata para sa kapakinabangan kan mga dukha saka Levita. Taano ta kaiba an mga Levita sa makikinabang? Huli ta sinda ‘mayong kahirasan o mana’ sa Israel.—Deut. 14:28, 29, NW.

 6. Minsan ngani an mga Levita mayo nin kahirasan na daga sa Israel, saen sinda nag-istar?

⁶ Tibaad isipon nindo, ‘Kun mayo nin daga na iinasignar para sa mga Levita, saen sinda maistar?’ May probisyon sa sainda an Dios. Tinawan nia sinda nin 48 siudad kaiba an mga pasabsaban sa palibot. Kabilang digdi an anom na siudad nin pailihan. (Bil. 35:6-8) Sa siring, may istaran an mga Levita kun dai sinda naglilingkod sa santuaryo nin Dios. Abundang sinusustentohan ni Jehova an mga nagtatao kan saindang panahon asin kosog sa paglilingkod sa saiya. Malinaw nanggad na ikinapaheling kan mga Levita na si Jehova an kahirasan ninda paagi sa pagtitiwala na gusto nia asin may kapangyarihan siang sustentohan sinda.

 7. Ano an kahagadan para sa mga Levita tanganing si Jehova an magin kahirasan ninda?

⁷ Mayo nin sinabi sa Ley na ano man na penalidad sa Israelitang dai nakatao nin ikasampulong kabtang. Apektado an mga saserdote asin Levita kun napapabayaan kan banwaan an pagtao nin ikasampulong kabtang. Nangyari iyan kan panahon ni Nehemias. Bilang resulta, kaipuhan kan mga Levita na magtrabaho sa kaomahan ninda, kaya napabayaan an saindang ministeryo. (Basahon an Nehemias 13:10.) Malinaw nanggad na an sustento para sa mga Levita nakadepende sa espirituwalidad kan nasyon. Apuera kaini, an mga saserdote asin Levita mismo kaipuhan na magtubod ki Jehova asin sa paagi nia nin pagsustento sa sainda.

Mga Indibiduwal na si Jehova an Nagin Kahirasan

 8. Iladawan an nagin kapurisawan kan Levitang si Asaf.

⁸ Si Jehova an nagin kahirasan kan mga Levita bilang tribo. Pero, mahalagang mangnohon na may mga Levita na naggamit kan pananaram na “an sakuyang kahirasan iyo si Jehova” tanganing ipahayag an debosyon asin pagsarig sa Dios. (Lam. 3:24) Kabilang sa sainda an sarong paraawit asin kompositor. Aapodon niato siang Asaf, minsan ngani sia posibleng miembro kan pamilya ni Asaf, an Levitang nangenot sa mga paraawit kan panahon ni Hadeng David. (1 Cron. 6:31-43) Sa Salmo 73 mababasa niato na si Asaf (o saro sa mga naggikan sa saiya) naribaraw. Sia naara sa mga maraot na asensado an buhay asin nagsabi pa ngani: “Totoong gayo na basang sana si paglinigui ko kan sakuyang puso, asin paghanao ko kan sakuyang magña kamot na . . . mayo nin sala.” Minalataw na nalingawan nia an saiyang pribilehio nin paglilingkod; dai nia napahalagahan na si Jehova an kahirasan nia. Napurisaw sia sa espirituwal “sagkod na makadatong [sia] sa santuario nin Dios.”—Sal. 73:2, 3, 12, 13, 17.

9, 10. Taano ta nasabi ni Asaf na an Dios an ‘saiyang kahirasan sagkod lamang’?

⁹ Sa santuaryo, pinonan ni Asaf na mansayon an mga bagay-bagay segun sa pagmansay nin Dios. Naeksperyensiahan na man gayod nindo iyan. Tibaad may panahon na minsan paano nalingawan nindo an saindong espirituwal na mga pribilehio asin nagpoon nang magkonsentrar sa kakulangan nindo sa materyal. Alagad paagi sa pag-adal kan Tataramon nin Dios asin pag-atender sa mga pagtiripon, minansay nindo an mga bagay-bagay nin siring ki Jehova. Nasabotan ni Asaf kun ano an mangyayari sa mga maraot pag-abot nin panahon. Inisip-isip nia an marahay na kamugtakan nia, kaya narealisar nia na sia aalalayan asin gigiyahan ni Jehova. Huli kaini, nasabi ni Asaf ki Jehova: “Sa iba pa sa saimo [dai] ako nin minamauot na anoman sa ibabao nin daga.” (Sal. 73:23, 25) Dangan, sinabi nia na an Dios an saiyang kabtang o kahirasan. (Basahon an Salmo 73:26.) Minsan ngani ‘magluya an laman asin an puso’ kan salmista, an Dios an magigin ‘saiyang kabtang [“kahirasan,” NW] sagkod lamang.’ May kompiansa an salmista na gigirumdomon sia ni Jehova bilang katood. Dai malilingawan an maimbod na paglilingkod nia. (Par. 7:1) Siertong napakosog liwat kaiyan an boot ni Asaf! Sia nag-awit: “An pagharani ko sa Dios iyo an karahayan: ibinugtak ko dian sa Kagurangnan kong si Jehova an sakuyang paglaom.”—Sal. 73:28.

¹⁰ Para ki Asaf, an bagay na si Jehova an kahirasan nia mas mahalaga kisa sa materyal na sustentong itinatao sa saiya bilang Levita. An pangenot na pinanonongdan nia iyo an saiyang pribilehio nin paglilingkod asin relasyon ki Jehova, an pagigin magkatood nia asin kan Kaharohalangkawe. (Sant. 2:21-23) Tanganing mapagdanay kan salmista an relasyon na iyan, kaipuhan nia na pirmeng magtubod ki Jehova, na nagtitiwala sa saiya. Kaipuhan ni Asaf na magtiwala na sa huri magigin nakakakontento an buhay nia kun mamumuhay sia oyon sa pamantayan nin Dios. Makakapagtiwala man kamo sa Makakamhan sa Gabos.

11. Ano an ihinapot ni Jeremias, asin paano iyan nasimbag?

¹¹ An saro pang Levita na minidbid si Jehova bilang saiyang kahirasan iyo si Jeremias. Pag-olayan niato kun ano an boot niang sabihon sa pananaram na iyan. Si Jeremias nakaistar sa Anatot, sarong siudad nin mga Levita harani sa Jerusalem. (Jer. 1:1) Nag-abot an panahon na naribaraw si Jeremias: Taano ta nag-aasenso an mga maraot mantang nagsasakit an mga matanos? (Jer. 12:1) Kan maheling nia an nangyayari sa Jerusalem asin Juda, napiritan siang magreklamo dapit dian. Aram ni Jeremias na matanos si Jehova. Malinaw na nasimbag an hapot ni Jeremias pagkatapos na pasabngan sia ni Jehova na maghula asin otobon Nia an hulang iyan. Kaoyon kan mga hula nin Dios, an mga nagkuyog sa instruksion ni Jehova nag-ako ‘kan saindang buhay bilang samsam’ mantang nalaglag an asensadong mga maraot na nagbaliwala sa patanid.—Jer. 21:9.

12, 13. (a) Ano an nagpahiro ki Jeremias na magsabing: “An sakuyang kahirasan iyo si Jehova,” asin ano an nagin kaisipan nia? (b) Taano ta kaipuhan kan gabos na tribo nin Israel na magpatalubo nin mapaghalat na kaisipan?

¹² Kan huri, mantang pinagmamasdan ni Jeremias an saiyang dagang tinuboan na nadestroso nin grabe, an pagmate nia garo sia naglalakaw sa kadikloman. Garo baga sia pinatukaw ni Jehova “siring kan magña nagkagaradan kaidto pa.” (Lam. 1:1, 16; 3:6) Sinabihan ni Jeremias an masumbikal na nasyon na iyan na magbalik sa saindang langitnon na Ama, alagad huli sa saindang karatan kaipuhan na nin Dios na pabayaan na laglagon an Jerusalem asin Juda. Nakolgan si Jeremias huli kaiyan dawa ngani mayo siang sala. Sa ibong kan pagsakit kan propeta, ginirumdom nia an pagkaherak nin Dios. “Dai kita pinoho,” an sabi nia. Tunay nanggad na kada aga bago an pagkaherak ni Jehova! Kan panahon na iyan, sinabi ni Jeremias: “An sakuyang kahirasan iyo si Jehova.” Nagpadagos sia sa pribilehio nin paglilingkod ki Jehova bilang propeta.—Basahon an Lamentacion 3:22-24.

¹³ Setentang taon na mawawaran nin laog an dagang tinuboan kan mga Israelita. Iyan magdadanay na gaba. (Jer. 25:11) Alagad an pananaram ni Jeremias na “an sakuyang kahirasan iyo si Jehova” naghahayag na sia may kompiansa sa pagkaherak nin Dios, asin iyan an dahelan na sia ‘naglaom’ o nagpaheling nin mapaghalat na kaisipan. Nawara kan gabos na tribo nin Israel an mana ninda, kaya arog sa propeta kaipuhan nindang pataluboon an siring na kaisipan. Si Jehova an solamenteng paglaom ninda. Pakalihis nin 70 taon, an banwaan nin Dios ibinalik sa saindang dagang tinuboan asin nagkapribilehiong paglingkodan sia duman.—2 Cron. 36:20-23.

An Iba Puedeng Magin Kahirasan si Jehova

14, 15. Apuera sa mga Levita, siisay pa an nagpaheling na si Jehova an kahirasan nia, asin taano?

¹⁴ Si Asaf asin Jeremias parehong hale sa tribo ni Levi, alagad mga Levita sana daw an puedeng magkapribilehio na maglingkod ki Jehova? Dai nanggad! An hoben na si David, na magigin hade kaidto kan Israel, inapod an Dios na saiyang kahirasan o “kabtang na sadiri sa daga nin si magña nabubuhay.” (Basahon an Salmo 142:1, 5.) Kan isurat ni David an salmong ini, sia mayo sa palasyo o dawa sa sarong harong. Sia nasa sarong kueba, na nagtatago sa mga kaiwal nia. Sa kisiera duwang pagkakataon, si David nagpaili sa mga kueba—an saro harani sa Adulam asin an saro pa sa kaawagan nin En-gedi. Posibleng marhay na isinurat nia an Salmo 142 sa saro sa mga kuebang iyan.

¹⁵ Kun iyan an kamugtakan, si Hadeng Saul an naghahanap ki David, na gustong gadanon ini. Nagdulag si David pasiring sa kueba na masakit dumanan. (1 Sam. 22:1, 4) Sa harayong lugar na iyan, tibaad an pagmate ni David sia garo baga mayong kaibang katood na maprotehir asin masuportar sa saiya. (Sal. 142:4) Iyan an panahon na si David nag-apod sa Dios.

16, 17. (a) Ano an mga dahelan na si David nakamate na mayo nang makakatabang sa saiya? (b) Kiisay si David makakadolok para sa tabang?

¹⁶ Kan isurat ni David an Salmo 142, posibleng marhay na naaraman na nia an nangyari sa Halangkaw na Saserdoteng si Ahimelec, na nagtabang sa saiya mantang dai kaini aram na sia nagdudulag ki Saul. An nauuri na si Hadeng Saul ipinagadan si Ahimelec asin an pamilya kaini. (1 Sam. 22:11, 18, 19) An pagmate ni David sia an may paninimbagan sa pagkagadan ninda. Garo baga sia an guminadan sa saserdote na nagtabang sa saiya. Kun kamo an nasa kamugtakan ni David, iyan man daw an mamamatean nindo? Nakadagdag pa sa tension ni David an bagay na mayo siang pahingalo huli ta padagos siang linalapag ni Saul.

¹⁷ Dai naghaloy pagkatapos kaiyan nagadan si Samuel, na naglahid ki David na magin hade pag-abot nin panahon. (1 Sam. 25:1) Posibleng nakadagdag iyan sa pagmate ni David na mayo nang makakatabang sa saiya. Pero, aram ni David kun kiisay sia makakadolok para sa tabang—ki Jehova. An pribilehio nin paglilingkod ni David bakong kapareho kan mga Levita, alagad sia linahidan na para sa saro pang klase nin paglilingkod, an magin hade kan banwaan nin Dios pag-abot nin panahon. (1 Sam. 16:1, 13) Huli kaini, biyong ipinahayag ni David ki Jehova an nasa puso nia asin padagos na nag-asa sa Dios para sa paggiya. Sia puede asin dapat man na magin kahirasan saka pailihan nindo mantang naghihingoa kamong paglingkodan sia.

18. Paano ipinaheling kan mga tawong napag-olayan niato sa artikulong ini na si Jehova an kahirasan ninda?

¹⁸ Si Jehova an nagin kahirasan kan mga tawong napag-olayan niato sa paagi na tinawan sinda nin asignasyon sa paglilingkod sa saiya. Nagsarig sinda na susustentohan sinda nin Dios mantang naglilingkod sa saiya. An Dios puedeng magin kahirasan kan mga Levita asin kan mga nasa ibang mga tribo kan Israel, arog ni David. Paano man nindo ikakapaheling na si Jehova an kahirasan nindo? Pag-oolayan niato iyan sa sunod na artikulo.

[Nota sa Ibaba]

Ano an Isisimbag Nindo?

• Sa anong paagi na si Jehova nagin kahirasan kan mga Levita?

• Ano an ginibo ni Asaf, Jeremias, asin David tanganing ipaheling na si Jehova an kahirasan ninda?

• Anong kualidad an kaipuhan mo tanganing an Dios an magin kahirasan mo?

[Blurb sa pahina 8]

An mga Levita dai tinawan nin dagang pamana. Imbes si Jehova an nagin kahirasan ninda, huling nagkaigwa sinda nin dakulang pribilehio na paglingkodan sia

[Ritrato sa pahina 7]

Paano si Jehova nagin kahirasan kan mga saserdote asin Levita?

[Ritrato sa pahina 9]

Ano an nakatabang ki Asaf tanganing si Jehova padagos na magin kahirasan nia?