“Pag-omaw ki Jehova, O Kalag Ko”

“SA NAKAAGI pa sanang mga bulan an sakong ministeryo nagin nakasusumo asin daing kagayagayahan,” an sabi ni Nancy.a Sa laog nin mga sampulong taon, sia naglingkod bilang payunir, sarong bilog na panahon na parabalangibog kan maogmang bareta. Pero, idinugang nia: “Dai ko gusto an nangyayari sa sako. Garo baga an pag-atubang ko kan mensahe kan Kahadean mas sa paagi na daing entusiasmo asin bakong gayo gikan sa puso. Ano an maninigo kong gibohon?”

Helinga man an kamugtakan ni Keith, magurang sa sarong kongregasyon kan Mga Saksi ni Jehova. Kanigoan an pagkabigla nia na madangog an saiyang agom na magsabi: “Siertong may iba kang iniisip. Sa sinambit mo pa sanang pamibi, nagpasalamat ka sa kakanon, dawa ngani bako man ining panahon nin pagkakan!” Inaadmitir ni Keith: “Naheheling ko na an sakong mga pamibi nagin mekanikal.”

Daing duda, habo nindo na an saindong mga kapahayagan nin pag-omaw ki Jehova Dios magin daing kabuhaybuhay asin mayo sa boot. Sa kabaliktaran, boot nindo na iyan magin odok sa puso, naggigikan sa mga pakamate nin pagpasalamat. Minsan siring, an pagmate dai puedeng isulog o hubaon nin siring sa gubing. Iyan dapat na maggikan sa laog nin saro. Paano an saro makakamate nin pasasalamat gikan sa puso? An ika-103 na Salmo nagtatao sa sato nin pakarorop sa bagay na ini.

Si Hadeng David kan suanoy na Israel an kompositor kan ika-103 na Salmo. Minapoon sia paagi sa mga tataramon na: “Pag-omaw [sa Ingles, “bless”] ki Jehova, O kalag ko, minsan an gabos na nasa sako, sa saiyang banal na ngaran.” (Salmo 103:1) “An termino sa Ingles na bless, na iinaplikar sa Dios,” sabi nin sarong reperensia, “nangangahulogan na omawon, na pirmeng nagpaparisa nin makosog na kapadangatan para sa saiya siring man nin pakamate nin pagpasalamat.” Huling nagmamawot na omawon si Jehova paagi sa puso na pano nin pagkamoot asin apresasyon, sinasadol ni David an saiyang sadiring kalag—sia mismo—na “omawon si Jehova.” Alagad ano an minapukaw kan maogmang pagmate na ini sa puso ni David para sa Dios na saiyang sinasamba?

Si David nagpapadagos: “Dai mo paglingawan an gabos na . . . ginibo” ni Jehova. (Salmo 103:2) An pakamate nin pasasalamat ki Jehova malinaw na konektado sa mapag-apresyar na paghorophorop sa “saiyang mga ginibo.” Ano man nanggad na mga ginibo ni Jehova an nasa isip ni David? An pagheling sa mga linalang ni Jehova Dios, arog kan langit na pano nin bitoon sa maaliwalas na banggi, puede nanggad na panoon an puso nin pagpasalamat para sa Kaglalang. An mabitoon na kalangitan nakatudok na marhay sa boot ni David. (Salmo 8:3, 4; 19:1) Pero sa ika-103 na Salmo, ibang aktibidad ni Jehova an nagigirumdoman ni David.

Si Jehova “Nagpapatawad kan Gabos Mong Kasalan”

Sa salmong ini, isinasaysay ni David an mga gibo nin Dios na mamomoton na kabootan. Nasasambitan an enot asin pangenot sa mga ini, sia nag-aawit: ‘Pinatatawad ni Jehova an gabos mong kasalan.’ (Salmo 103:3) Siertong aram ni David an saiya mismong pagigin makasalan. Pakatapos na komprontaron sia ni Natan na propeta manongod sa saiyang pagsambay na relasyon ki Bat-seba, inadmitir ni David: “Sa saimo [Jehova], sa saimo sanang gayo, nagkasala ako, asin an maraot sa saimong mga mata nagibo ko.” (Salmo 51:4) Paagi sa laglag na puso, sia nakimaherak: “Kaherake ako, O Dios, sono sa saimong mamomoton na kabootan. Sono sa kadakolan kan saimong mga pagkaherak paraa an sakuyang mga kalapasan. Hugasan mo ako nin biyo sa sakong sala, asin linigan mo ako sa sakong kasalan.” (Salmo 51:1, 2) Siertong kanigoan an pasasalamat ni David na mapatawad! Huling bakong sangkap na tawo, nakagibo sia nin iba pang mga kasalan sa saiyang buhay, alagad nungka na sia dai nagsolsol, inako an pagsagwe, asin itinanos an saiyang mga dalan. An paghorophorop sa makangangalas na mga gibo nin kabootan nin Dios para sa saiya nagpahiro ki David na omawon si Jehova.

Bako daw na kita makasalan man? (Roma 5:12) Maski si apostol Pablo nag-agrangay: “Tunay na ako naoogma sa ley nin Dios segun sa sakong pagkatawo sa laog, alagad nakaheheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak. Herak man sa sako! Siisay an maligtas sa sako hale sa hawak na napapairarom sa kagadanan na ini?” (Roma 7:22-24) Makapasasalamat nanggad kita na dai kinukuenta ni Jehova an satong mga kalapasan! Maogma niang pinapara iyan kun kita nagsosolsol asin naghahagad nin kapatawadan.

Pinagigirumdom ni David an saiyang sadiri: ‘Si Jehova pinaoomayan an gabos mong kamatean.’ (Salmo 103:3) Mantang an pagpaomay sarong akto nin pagbabalik sa dati, an kahulogan kaiyan labi pa sa kapatawadan nin salang ginibo. Kalabot dian an paghale kan mga “kamatean”—an maraot na mga epekto kan sala sa satong mga dalan. Sa bagong kinaban na gigibohon nia, talagang hahaleon ni Jehova an pisikal na mga epekto nin kasalan, arog baga nin helang asin kagadanan. (Isaias 25:8; Kapahayagan 21:1-4) Minsan siring, maski ngonyan kita pinaoomayan nin Dios sa espirituwal na mga kamatean. Para sa nagkapira, kabale digdi an maraot na konsensia asin naputol na relasyon sa saiya. “Dai mo paglingawan” an ginibo na ni Jehova personalmente para sa lambang saro sa sato sa bagay na ini.

Saiyang ‘Pinapabalik an Saimong Buhay’

‘Si Jehova pinapabalik an saimong buhay hale sa mismong kotkot,’ an inawit ni David. (Salmo 103:4) An “mismong kotkot” iyo an pankagabsan na lolobngan nin katawohan—an Sheol, o Hades. Dawa bago pa nagin hade sa Israel, nanompongan ni David na nameligro an saiyang buhay. Halimbawa, pinatalubo ni Hadeng Saul kan Israel sa saiyang isip an may intension na gumadan na pagkaongis ki David asin nagprobar na gadanon sia sa laen-laen na okasyon. (1 Samuel 18:9-29; 19:10; 23:6-29) Gusto man kan mga Filisteo na magadan si David. (1 Samuel 21:10-15) Alagad sa lambang pangyayari, isinalbar sia ni Jehova “sa mismong kotkot.” Siertong nakamate nin dakulang pasasalamat si David kan ginigirumdom nia an mga ginibong ini ni Jehova!

Kumusta man kamo? Sinusteniran daw kamo ni Jehova sa mga panahon nin depresyon o mga panahon nin kawaran? O may naaraman daw kamong mga pangyayari na pinabalik nia an buhay kan saiyang fiel na mga Saksi hale sa kotkot nin Sheol sa satong kapanahonan? Seguro natudok na an saindong boot sa pagbasa kan mga pagkasaysay kan saiyang mga gibo nin pagliligtas sa mga pahina kan magasin na ini. Taano ta dai magtao nin panahon na horophoropon na may pag-apresyar an mga ginibong ini kan tunay na Dios? Asin, siempre, kita gabos igwa nin dahelan na pasalamatan si Jehova para sa paglaom na pagkabuhay liwat.—Juan 5:28, 29; Gibo 24:15.

Tinatawan kita ni Jehova kapwa nin buhay asin kan nagpapangyari kaiyan na magin nakagagayagaya asin kapakipakinabang. Ipinahayag kan salmista na an Dios “nagkokorona saimo nin mamomoton na kabootan asin pagkaherak.” (Salmo 103:4) Sa satong panahon nin pangangaipo, si Jehova dai kita binabayaan kundi tinatabangan kita paagi kan saiyang naheheling na organisasyon asin kan nombradong kamagurangan, o pastor, sa kongregasyon. An siring na tabang nagpapangyari sa sato na atubangon an sarong masakit na situwasyon na dai nawawara an satong paggalang sa sadiri asin dignidad. An Kristianong mga pastor nagmamakolog na marhay sa mga karnero. Pinaririgon ninda an boot kan mga may helang asin depresyon patin ginigibo ninda an saindang bilog na makakaya na ikabalik an mga nagkasala. (Isaias 32:1, 2; 1 Pedro 5:2, 3; Judas 22, 23) Minomotibar kan espiritu ni Jehova an mga pastor na ini na magin madinamayon asin mamomoton sa aripompon. An saiyang “mamomoton na kabootan asin pagkaherak” tunay nanggad na siring sa korona na nagsasamno sa sato asin nagtatao sa sato nin dignidad! Dai linilingawan an saiyang mga ginibo, omawon ta si Jehova asin an saiyang banal na ngaran.

Ipinapadagos an saiyang pagsadol sa sadiri, si salmista David nag-aawit: “[Si Jehova] nagpapabasog sa saimong pagkabuhay nin karahayan; an saimong pagkabarobata padagos na nababago arog kan sa agila.” (Salmo 103:5) An buhay na itinatao ni Jehova may satispaksion asin kagayagayahan. Tara, an mismong kaaraman sa katotoohan sarong kayamanan na daing kaagid asin gikanan nin dakulaon na kagayagayahan! Asin horophoropa kun gurano kanakakokontentong marhay an gibohon na itinao sa sato ni Jehova, an paghuhulit asin paggibo nin mga disipulo. Abaa kanakaoogma na makanompong nin saro na interesadong makanood manongod sa tunay na Dios asin tabangan an saro na iyan na mamidbid si Jehova asin omawon sia! Pero, baga man may maghinanyog o dai sa satong komunidad, sarong dakulang pribilehio na magkaigwa nin kabtang sa sarong gibohon na konektado sa pagsantipikar kan ngaran ni Jehova asin pagbindikar kan saiyang soberaniya.

Mantang nagpapadagos sa gibohon na pagbalangibog kan Kahadean nin Dios, siisay an dai napapagal o nanluluya? Alagad padagos na ibinabalik ni Jehova an kosog kan saiyang mga lingkod, na ginigibo sinda na ‘arog nin mga agila’ na may mapuersang mga pakpak asin halangkawon an linalayog sa langit. Makapagpapasalamat nanggad kita na an satong mamomoton na langitnon na Ama nagtatao nin siring na “dinamikong kosog” tanganing fiel na maotob niato an satong ministeryo sa aroaldaw!—Isaias 40:29-31.

Bilang ilustrasyon: Si Clara may bilog na panahon na sekular na trabaho asin siring man mga 50 oras kada bulan an ginagamit sa ministeryo sa langtad. An sabi nia: “Kun minsan napapagal ako, asin pinipirit ko an sadiri ko na lumuwas sa paglilingkod sa langtad huli sana ta may kinaolay akong iibanan. Alagad oras na nasa langtad na ako, pirme akong nakamamate na minakosog.” Tibaad naeksperyensiahan na man nindo an kosog na bunga kan pagsuportar nin Dios sa Kristianong ministeryo. Mapahiro logod kamo na magsabi, siring kan ginibo ni David sa enot na mga tataramon kan salmong ini: “Pag-omaw ki Jehova, O kalag ko, minsan an gabos na nasa sako, sa saiyang banal na ngaran.”

Iliniligtas ni Jehova an Saiyang Banwaan

An salmista nag-aawit man: “Si Jehova naggigibo nin mga akto nin katanosan asin nin hudisyal na mga desisyon para sa gabos na tinitikas. Ipinamidbid nia an saiyang mga dalan ki Moises, an saiyang mga gibo pati sa mga aki ni Israel.” (Salmo 103:6, 7) Posible na nasa isip ni David an ‘paninikas’ sa mga Israelita sa irarom kan mga paradaogdaog na Egipcio kaidtong kaaldawan ni Moises. An paghorophorop sa kun paano ipinamidbid ni Jehova ki Moises an saiyang mga paagi nin pagliligtas siertong nakapukaw nin pakamate nin pagpasalamat sa puso ni David.

Mapahihiro kita na magpasalamat man paagi sa paghorophorop sa mga pagtratar nin Dios sa mga Israelita. Alagad maninigo na dai niato paglingawan na pensaron an mga eksperyensia kan mga lingkod ni Jehova sa presenteng aldaw, arog kan mga sinambit sa kapitulo 29 asin 30 kan librong Jehovah’s Witnesses—Proclaimers of God’s Kingdom. An mga pagkasaysay na pinatunayan paagi sa mga dokumento na yaon dian asin sa iba pang mga publikasyon kan Watch Tower Society nagpapangyari sa sato na maheling kun paano tinabangan ni Jehova an saiyang banwaan sa presenteng mga panahon na tagalan an pagkabilanggo, pagsururog, pagprohibir, kampo de konsentrasyon, asin kampo nin patrabaho sa mga oripon. Nagkaigwa nin mga pagbalo sa mga nasyon na nababanga huli sa guerra, arog kan Burundi, Liberia, Rwanda, asin dating Yugoslavia. Kun nangyayari an paglamag, an kamot ni Jehova pirmeng sinususteniran an saiyang fiel na mga lingkod. An paghorophorop sa mga ginibong ini kan satong dakulang Dios, si Jehova, puedeng gibohon sa sato an ginibo ki David kan pagpensar nia sa pagkasaysay dapit sa pagkaligtas hale sa Egipto.

Helinga man kun paano kita may kapadangatan na iliniligtas ni Jehova sa pagabat na kasalan. Itinao nia “an dugo kan Cristo” tanganing ‘malinigan an satong mga konsensia sa gadan na mga gibo.’ (Hebreo 9:14) Kun pinagsosolsolan ta an satong mga kasalan asin hinahagad an kapatawadan basado sa pinabolos na dugo ni Cristo, irinarayo nin Dios sa sato an satong mga kalapasan—“kun gurano kaharayo kan subangan sa solnopan”—asin ibinabalik kita sa saiyang pabor. Asin isip-isipa an mga probisyon ni Jehova paagi sa Kristianong mga pagtiripon, nakapakokosog na pag-iribaiba, mga pastor sa kongregasyon, asin basado sa Biblia na mga publikasyon na inaako ta paagi sa “fiel asin madonong na oripon.” (Mateo 24:45) Bako daw na an mga ginibong ini ni Jehova nakatatabang sa sato na pakosogon an satong relasyon sa saiya? Si David nagpahayag: “Si Jehova maheherakon asin maugayon, maluway sa pagkaanggot asin abunda sa mamomoton na kabootan. . . . Dai nia ginibo sa sato an sono sa satong mga kasalan; dai man nia itinao sa sato an maninigo sa sato sono sa satong mga pagkakasala.” (Salmo 103:8-14) An paghorophorop sa mamomoton na pag-ataman ni Jehova siertong makapahihiro sa sato na pamurawayon sia asin ibantog an kadakulaan kan saiyang banal na ngaran.

“Omawa Nindo si Jehova, Kamo Gabos na Saiyang Ginibo”

Kun ikokomparar sa pagkadaing kagadanan ni Jehova, an “Dios sa panahon na daing sagkod,” an “mga aldaw” nin “magagadanon na tawo” halipot nanggad—“arog kan sa berdeng doot.” Alagad may pag-apresyar na naghorophorop si David: “An mamomoton na kabootan ni Jehova poon sa panahon na daing sagkod sagkod sa panahon na daing sagkod para sa mga natatakot sa saiya, asin an saiyang katanosan sa mga aki nin mga aki, para sa mga nag-ootob kan saiyang tipan asin para sa mga naggigirumdom sa saiyang mga pagboot sa pag-otob kaiyan.” (Genesis 21:33, nota sa ibaba; Salmo 103:15-18) Dai linilingawan ni Jehova an mga natatakot sa saiya. Sa itinalaan na panahon, itatao nia sa sainda an buhay na daing katapusan.—Juan 3:16; 17:3.

Sa pagpahayag kan saiyang apresasyon sa pagkahade ni Jehova, si David nagsasabi: “Si Jehova mismo nagparigon kan saiyang trono sa mismong kalangitan; asin an saiyang sadiring pagkahade nagsakop sa gabos na bagay.” (Salmo 103:19) Minsan ngani an pagkahade ni Jehova ipinahayag sa naheheling na paagi sa laog nin kadikit na panahon paagi sa kahadean nin Israel, an saiyang trono sa katunayan yaon sa langit. Dahelan sa saiyang pagigin Kaglalang, si Jehova an Soberanong Namamahala sa uniberso asin ginigibo nia an saiyang banal na kabotan sa langit asin digdi sa daga sono sa saiya mismong mga katuyohan.

Sinasadol pa ngani ni David an mga linalang na anghel sa langit. Sia nag-aawit: “Omawa nindo si Jehova, O kamong mga anghel nia, makosog, na nag-ootob kan saiyang tataramon, paagi sa paghinanyog sa tingog kan saiyang tataramon. Omawa nindo si Jehova, kamo gabos na hukbo nia, kamo gabos na ministro nia, na naggigibo kan saiyang kabotan. Omawa nindo si Jehova, kamo gabos na saiyang ginibo, sa gabos na lugar kan saiyang sakop. Omawa si Jehova, O kalag ko.” (Salmo 103:20-22) Dai daw kita maninigong mapahiro man kan paghorophorop niato sa mga gibo nin mamomoton na kabootan ni Jehova para sa sato na omawon sia? Iyo nanggad! Asin makaseseguro kita na an tanog kan satong tingog sa personal na pag-omaw sa Dios dai mawawara sa tahaw kan makosog na koro nin mga paraomaw na kabale pati an matanos na mga anghel. Logod na bilog na puso niatong omawon an satong langitnon na Ama, na pirmeng nagtataram nin marahay manongod sa saiya. Tunay nanggad, isapuso ta an mga tataramon ni David, “Pag-omaw ki Jehova, O kalag ko.”

[Nota sa Ibaba]

[Retrato sa pahina 23]

Si David naghorophorop sa mga gibo nin mamomoton na kabootan ni Jehova. Iyo man daw kamo?