An Mensahe na Dapat Niatong Ibalangibog

HALOYON pa bago an Kristianong kapanahonan, sinabihan ni Jehova an fiel na si Abraham manongod sa probisyon na bendisyonan kan “gabos na nasyon sa daga” an saindang sadiri. (Gen. 22:18) Pinasabngan man nia si Salomon na sumurat mapadapit sa sarong pundamental na kahagadan sa gabos na tawo: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.” (Ecl. 12:13) Alagad paano maaaraman nin mga tawo na nag-iistar sa gabos na nasyon an manongod sa mga bagay na ini?

Minsan ngani kaidto pa pirme nang may nagtutubod sa tataramon nin Dios, ipinaririsa kan Biblia na an sigidong paghuhulit na lakop sa globo na talagang makakapaabot kan maogmang bareta sa gabos na nasyon nakareserba sa “aldaw kan Kagurangnan.” Nagpoon ini kan 1914. (Kap. 1:10) May labot sa panahon na ini, ihinula kan Kapahayagan 14:6, 7 na gigibohon an mahalagang marhay na pagbalangibog sa irarom kan pagdirehir nin mga anghel “sa lambang nasyon asin tribo asin tataramon patin banwaan.” Sinda sasadolon: “Matakot kamo sa Dios asin pamurawayon sia, huli ta nag-abot na an oras kan saiyang paghokom, asin kaya sambahon nindo an Saro na naggibo kan langit asin daga asin dagat patin mga burabod nin tubig.” Kabotan nin Dios na ikapaabot an mensaheng ini. Pribilehio niato na makikabtang sa gibohon na iyan.

“Tunay na Dios.” Kan sabihon ni Jehova, “Kamo an sakong mga saksi,” idto nasa kamugtakan na pinagdedebatehan an isyu nin pagka-Dios. (Isa. 43:10) An mensaheng dapat na ipaabot bako sana na maninigong magkaigwa nin relihion o tumubod sa sarong dios an mga tawo. Imbes, kaipuhan na matawan sinda kan oportunidad na makaaram na an Kaglalang kan langit asin daga iyo an solamenteng tunay na Dios. (Isa. 45:5, 18, 21, 22; Juan 17:3) Solamente an tunay na Dios an masasarigan na makasasabi kan ngapit. Pribilehio niato na sabihon na an kaotoban kan tataramon ni Jehova kan nakaagi nagtatao nin marigon na basehan sa pagkompiar na magkakatotoo an gabos na ipinanuga nia para sa ngapit.​—Jos. 23:14; Isa. 55:10, 11.

Siempre, an dakol niatong hinuhulitan nagsasamba sa ibang dios o naghihingakong mayo nin sinasamba. Tangani na dangogon, tibaad kaipuhan na kita pumoon sa bagay na dian pareho kita interesado. Makikinabang kita sa halimbawa na nakasurat sa Gibo 17:22-​31. Mangnoha na dawa mataktika si apostol Pablo, malinaw niang sinabi na maninimbag an gabos na tawo sa Dios na Kaglalang kan langit asin daga.

Pagpamidbid kan Ngaran nin Dios. Dai paglingawan na ipamidbid an ngaran kan tunay na Dios. Namomotan ni Jehova an saiyang ngaran. (Ex. 3:15; Isa. 42:8) Gusto niang mamidbid nin mga tawo an ngaran na iyan. Pinapangyari nia na an saiyang mamuraway na ngaran ikabugtak sa Biblia nin labing 7,000 na beses. Paninimbagan niato na ipamidbid iyan sa mga tawo.​—Deut. 4:35.

An esperansang mabuhay sa ngapit nin gabos na tawo depende sa pakamidbid ninda ki Jehova asin pag-apod sa saiya na may pagtubod. (Joel 2:32; Mal. 3:16; 2 Tes. 1:8) Pero, an kadaklan dai midbid si Jehova. Kaiba dian an kadakol na naghihingako na nagsasamba sa Dios kan Biblia. Dawa kun sinda may Biblia asin binabasa iyan, tibaad dai pa man giraray ninda midbid an personal na ngaran nin Dios ta hinale iyan sa dakol na modernong traduksion. An solamenteng aram nin nagkapira sa ngaran na Jehova iyo na sinabihan sinda kan mga namomoon sa saindang relihion na dai iyan paggamiton.

Paano daw niato ikapamimidbid sa mga tawo an ngaran nin Dios? Mayo nin arog kaepektibo kan pagpaheling kaiyan sa sainda sa Biblia​​—kun puede sa sadiri nindang kopya. Sa nagkapirang traduksion, an ngaran na iyan minalataw nin rinibong beses. Sa iba, iyan tibaad minalataw sana sa Salmo 83:18 o Exodo 6:3-6, o tibaad yaon iyan sa sarong nota sa ibaba sa Exodo 3:14, 15 o Ex 6:3. Sa dakol na traduksion, an mga tataramon na kasalihid, arog baga kan “Kagurangnan” asin “Dios,” nasa napapalaen na tipo kun personal na ngaran nin Dios an yaon sa teksto kan orihinal na lenguahe. Kun biyo nang hinale nin modernong mga paratradusir an personal na ngaran nin Dios, tibaad kaipuhan kamong gumamit nin mas haloy nang traduksion kan Biblia tanganing ikapaheling sa mga tawo kun ano an ginibo. Sa nagkapirang nasyon puede nindong itokdo an ngaran nin Dios sa relihiosong mga himno o sa inskripsion sa sarong pampublikong edipisyo.

Dawa para sa mga nagsasamba sa ibang dios, magagamit nin epektibo an Jeremias 10:10-​13 sa New World Translation. Iyan bako sanang nagsasabi kan ngaran nin Dios kundi malinaw man na nag-eeksplikar kun siisay sia.

Dai itago an ngaran na Jehova sa likod nin mga apod na arog kan “Dios” asin “Kagurangnan,” arog kan ginigibo kan Kakristianohan. Dai boot sabihon kaini na an ngaran kaipuhan na gamiton sa kapinonan nin gabos na pakikipag-olay. Huli sa prehuwisyo, puputolon nin nagkapira an orolay. Alagad pakabugtak nin basehan kan orolay, dai mag-alangan na gamiton an ngaran nin Dios.

Mahalagang mangnohon na mas parateng ginagamit kan Biblia an personal na ngaran nin Dios kisa total na beses na ginagamit kaiyan an mga titulong “Kagurangnan” asin “Dios.” Dawa siring, dai hiningoa kan mga kagsurat kan Biblia na iiba an ngaran nin Dios sa balang sentence. Iyan ginibo sana ninda sa natural, suelto, asin magalang na paagi. Iyan marahay na arogon.

An Persona na Ipinamimidbid kan Ngaran. Minsan ngani saro nang importanteng katotoohan an mismong bagay na an Dios may personal na ngaran, iyan kapinonan pa sana.

Tangani na kamotan si Jehova asin mag-apod sa saiya na may pagtubod, kaipuhan na maaraman nin mga tawo kun anong klase siang Dios. Kan ipamidbid ni Jehova an ngaran nia ki Moises sa Bukid nin Sinai, dai Nia sana inotro an tataramon na “Jehova.” Inapod Nia an atension sa nagkapirang lataw na mga kualidad Nia. (Ex. 34:6, 7) Iyan halimbawa na dapat niatong arogon.

Baga man kamo nagpapatotoo sa mga bagong interesado o nagpapahayag sa kongregasyon, kun kamo nagtataram manongod sa mga bendisyon kan Kahadean, sabihon kun ano an ipinaririsa kaini manongod sa Dios na nagtatao kan siring na mga panuga. Kun nasasambitan an mga togon nia, idoon an kadonongan asin pagkamoot na ipinababanaag kaiyan. Linawon na an mga kahagadan nin Dios dai nagtatao nin kadepisilan para sa sato kundi, imbes, para sa kapakinabangan niato. (Isa. 48:17, 18; Miq. 6:8) Ipaheling kun paano na an balang kapahayagan kan kapangyarihan ni Jehova may ihinahayag manongod sa saiyang personalidad, sa saiyang mga pamantayan, sa saiyang katuyohan. Apodon an atension sa ipinaheheling na pagkatimbang sa pagparisa ni Jehova kan saiyang mga kualidad. Ipadangog sa mga tawo an pagpahayag nindo kan saboot nindo manongod ki Jehova. An pagkamoot nindo ki Jehova puedeng makatabang na mapukaw an siring na pagkamoot sa iba.

An apretadong mensahe para sa satong kaaldawan nagsasadol sa gabos na matakot sa Dios. Paagi sa satong sinasabi, maninigo na hingoahon niato na pakosogon an siring na diosnon na takot. An takot na ini nakararahay na takot, may pagkangirhat na paggalang ki Jehova, hararom na reberensia para sa saiya. (Sal. 89:7) Kaiba dian an pakarealisar na si Jehova an supremong Hokom asin na an satong esperansang mabuhay sa ngapit depende sa pagkamit niato kan saiyang pag-oyon. (Luc. 12:5; Roma 14:12) Kun siring, an siring na takot kakombinar nin hararom na pagkamoot sa saiya asin, bilang resulta, nin makosogon na kamawotan na panigoan sia. (Deut. 10:12, 13) An diosnon na takot nagpapahiro man sa sato na ikaongis an maraot, kuyogon an mga togon nin Dios, asin sambahon sia na may kompletong puso. (Deut. 5:29; 1 Cron. 28:9; Tal. 8:13) Pinoprotehiran kita kaiyan sa pagprobar na maglingkod sa Dios mantang namomoot sa mga bagay kan kinaban.​—1 Juan 2:15-17.

An Ngaran nin Dios​​—“Makosog na Torre.” An mga tawo na talagang nakakamidbid ki Jehova nagkakamit nin dakulang proteksion. Ini bako sanang huli ta ginagamit ninda an saiyang personal na ngaran o nasasabi ninda an nagkapira niang kualidad. Iyan huli ta nagtitiwala sinda ki Jehova mismo. Mapadapit sa sainda, sinasabi kan Talinhaga 18:10: “An ngaran ni Jehova makosog na torre. Dian minadalagan an matanos asin tinatawan nin proteksion.”

Gamiton nin tama an mga oportunidad na sadolon an iba na magtiwala ki Jehova. (Sal. 37:3; Tal. 3:5, 6) An siring na pagtitiwala nagpapaheling nin pagtubod ki Jehova asin sa saiyang mga panuga. (Heb. 11:6) Kun an mga tawo “nag-aapod sa ngaran ni Jehova” huli ta aram ninda na sia an Unibersal na Soberano, namomoot sa saiyang mga dalan, asin lubos na nagtutubod na sia sana an ginigikanan nin tunay na kaligtasan, kun siring​—sinisierto sa sato kan Tataramon nin Dios—​sinda maliligtas. (Roma 10:13, 14) Mantang tinotokdoan nindo an iba, tabangan sinda na maparigon an siring na pagtubod may labot sa balang aspekto nin buhay.

An dakol napapaatubang sa dakulaon na personal na mga problema. Tibaad mayo sindang aram na solusyon. Sadolon sinda na adalan an mga dalan ni Jehova, magtiwala sa saiya, asin iaplikar an saindang nanonodan. (Sal. 25:5) Parigonon an boot ninda na odok na arangon an tabang nin Dios asin pasalamatan sia sa saiyang mga bendisyon. (Fil. 4:6, 7) Kun mamidbid ninda si Jehova, bako sanang sa pagbasa kan nagkapirang sinasabi sa Biblia kundi sa pakaeksperyensia man kan kaotoban kan saiyang mga panuga sa mismong buhay ninda, mamamatean na ninda an katiwasayan na gikan sa talagang pakasabot kun ano an irinerepresentar kan ngaran ni Jehova.​—Sal. 34:8; Jer. 17:7, 8.

Gamiton nin epektibo an balang oportunidad na tabangan an mga tawo na apresyaron an kadonongan sa pagkatakot sa tunay na Dios, si Jehova, asin sa pag-otob kan saiyang mga togon.

PAGKABUHAY nia liwat asin bago sia bumalik sa langit, nagtao nin instruksion si Jesu-Cristo sa saiyang mga disipulo, na an sabi: “Kamo magigin mga saksi ko . . . sagkod sa kaporoporohi kan daga.” (Gibo 1:8) An maimbod na mga lingkod nin Dios sa satong kaaldawan sinasabi na iyo an mga “igwa kan gibohon nin pagpatotoo ki Jesus.” (Kap. 12:17) Gurano kamo kamaurop sa pagtao kan patotoong iyan?

An dakol na sinserong nagsasabi na sinda nagtutubod ki Jesus mayo lamang nin aram manongod sa buhay nia bago nagin tawo. Dai ninda aram na sia talagang tawo kan yaon sia digdi sa daga. Dai ninda nasasabotan kun ano an boot sabihon kan saiyang pagigin Aki nin Dios. Kadikiton an aram ninda manongod sa katongdan nia sa pagkaotob kan katuyohan nin Dios. Dai ninda aram kun ano an ginigibo nia ngonyan, asin dai ninda narerealisar kun paano maaapektaran an buhay ninda kan gigibohon nia sa ngapit. Tibaad magkaigwa pa ngani sinda nin salang paghona na an Mga Saksi ni Jehova dai nagtutubod ki Jesus. Pribilehio niato na hingoahon na ipaaram an katotoohan manongod sa mga bagay na ini.

May iba man na dai nagtutubod na talagang may nabuhay na arog kan Jesus na sinasabi sa Biblia. An iba ibinibilang sana si Jesus na sarong dakulang tawo. Dakol an habo sa ideya na sia Aki nin Dios. An “pagpatotoo ki Jesus” sa siring na mga tawo nagkakaipo nin dakulang paghihingoa, pagpapasensia, asin pagkamataktika.

Ano man an punto de vista kan mga naghihinanyog sa saindo, kaipuhan na ilaog ninda sa isip an kaaraman manongod ki Jesu-Cristo tangani na maaprobetsaran ninda an probisyon nin Dios para sa buhay na daing sagkod. (Juan 17:3) An malinaw an pagkasabing kabotan nin Dios iyo na an gabos na nabubuhay dapat na “hayag na magrekonoser na si Jesu-Cristo iyo an Kagurangnan” asin dapat na pumasakop sa saiyang autoridad. (Fil. 2:9-11) Sa siring, dai niato basta malilikayan an isyu kun nakakanupar kita nin mga tawo na may makokosog alagad salang opinyon o talagang prehuwisyo. Mantang sa nagkapirang kamugtakan suelto kitang makatataram manongod ki Jesu-Cristo​—dawa sa enot niatong pagdalaw—​sa iba, tibaad kaipuhan na tumao kita nin may diskresion na mga komento na nakatatabang sa mga naghihinanyog sa sato na magin tama na an kaisipan manongod sa saiya. Tibaad kaipuhan man na umisip kita nin mga paagi na ikaintrodusir an dugang pang mga aspekto kan temang iyan sa mga pagdalaw sa ngapit. Minsan siring, tibaad bakong posible na tokaron an gabos na kalabot sagkod na adalan niato sa Biblia an tawong iyan.​—1 Tim. 2:3-7.

An Mahalagang Marhay na Katongdan ni Jesus sa Katuyohan nin Dios. Kaipuhan na tabangan niato an mga tawo na makasabot na mantang si Jesus “an dalan” asin ‘mayo nin makaduduman sa Ama kun bakong huli sa saiya,’ imposible na magkaigwa nin inooyonan na relasyon sa Dios kun mayo nin pagtubod ki Jesu-Cristo. (Juan 14:6) Sagkod na dai narerealisar nin saro an mahalagang marhay na katongdan na itinao ni Jehova sa saiyang panganay na Aki, imposible na masabotan an Biblia. Taano? Huli ta ginibo ni Jehova na an Aking ini an magin mayor na personahe sa pagkaotob kan gabos Niang katuyohan. (Col. 1:17-20) An hula sa Biblia nakasentro sa katotoohan na ini. (Kap. 19:10) Si Jesu-Cristo iyo an saro na paagi sa saiya itinatao an solusyon para sa gabos na problemang pinalataw kan pagrebelde ni Satanas asin kan kasalan ni Adan.​—Heb. 2:5-9, 14, 15.

Tanganing masabotan an katongdan ni Cristo, dapat na rekonoseron nin saro na an mga tawo nasa kaherakherak na kamugtakan na dian dai ninda kayang kaldahon an saindang sadiri. Kita gabos namundag sa kasalan. Ini puedeng makaapektar sa sato sa laen-laen na paagi durante kan satong pagkabuhay. Minsan siring, pag-abot nin panahon, iyan nagbubunga nin kagadanan. (Roma 3:23; 5:12) Makipagrasonan sa mga hinuhulitan nindo manongod sa katotoohan na iyan. Dangan sabihon na paagi sa atang na pantubos ni Jesu-Cristo, mamomoton na pinapangyari ni Jehova na magin posible an pagkakalda sa kasalan asin kagadanan para sa mga minatubod sa probisyon na iyan. (Mar. 10:45; Heb. 2:9) Binubukasan kaini an dalan para sa sainda na magkamit nin buhay na daing katapusan sa pagkasangkap. (Juan 3:16, 36) Dai iyan posible sa ano man na ibang paagi. (Gibo 4:12) Bilang paratokdo, baga man sa pribado o sa kongregasyon, dai sana pagsabihon an mga detalyeng ini. Maboot asin mapasensiang pataluboon sa mga naghihinanyog sa saindo an pagtanaw nin utang na boot sa katongdan ni Cristo bilang Parabalukat niato. An pag-apresyar sa probisyon na ini puedeng magkaigwa nin hararom na epekto sa aktitud, gawe-gawe, asin pasohan sa buhay nin sarong tawo.​—2 Cor. 5:14, 15.

Siempre, saro sanang beses na itinao ni Jesus an saiyang buhay bilang atang. (Heb. 9:28) Minsan siring, sia aktibong naglilingkod ngonyan bilang Halangkaw na Saserdote. Tabangan an iba na masabotan kun ano an kahulogan kaiyan. May inaagihan daw sindang tension, pagkadesganar, pagdusa, o mga problema huli sa daing kabootan na pagtratar nin mga tawong nasa palibot ninda? Kan tawo si Jesus, ini gabos inagihan nia. Aram nia an satong pagmate. Huli sa pagkabakong sangkap, namamatean daw niato an pangangaipo sa pagkaherak nin Dios? Kun kita minaarang nin kapatawadan sa Dios basado sa atang ni Jesus, si Jesus nagigin “paratabang sa Ama.” Sia madinamayon na “nakikimaherak para sa sato.” (1 Juan 2:1, 2; Roma 8:34) Basado sa atang ni Jesus asin paagi sa saiyang serbisyo bilang Halangkaw na Saserdote, nakakadolok kita sa “trono nin dai na kutana maninigong kabootan” ni Jehova tangani na mag-ako nin tabang sa tamang panahon. (Heb. 4:15, 16) Dawa kita bakong sangkap, an tabang na itinatao ni Jesus bilang Halangkaw na Saserdote nagpapangyari sa sato na maglingkod sa Dios na malinig an konsensia.​—Heb. 9:13, 14.

Dugang pa, si Jesus nagkakapot nin dakulang autoridad bilang an designado nin Dios na Payo kan Kristianong kongregasyon. (Mat. 28:18; Efe. 1:22, 23) Bilang siring, sia nagtatao nin kinakaipuhan na pagdirehir kaoyon kan kabotan nin Dios. Kun nagtotokdo kamo sa iba, tabangan sinda na makasabot na si Jesu-Cristo, asin bakong tawo, an Payo kan kongregasyon. (Mat. 23:10) Poon sa enot nindong pakipag-olay sa mga interesado, imbitaran sinda sa mga pagtiripon kan lokal na kongregasyon, na dian inaadalan niato an Biblia sa tabang nin materyales na itinao paagi sa “fiel asin may diskresion na oripon.” Ieksplikar sa sainda bako sanang kun siisay an “oripon” kundi kun siisay man an Kagurangnan tangani na marealisar ninda an pagkapayo ni Jesus. (Mat. 24:45-47) Ipamidbid sinda sa kamagurangan, asin ieksplikar an mga kualipikasyon sono sa Kasuratan na dapat na maabot kan mga ini. (1 Tim. 3:1-7; Tito 1:5-9) Ipaliwanag na an kongregasyon bakong rogaring kan kamagurangan kundi na sinda nagtatabang sa sato na makalakaw sa mga gira ni Jesu-Cristo. (Gibo 20:28; Efe. 4:16; 1 Ped. 5:2, 3) Tabangan an mga interesadong ini na makasabot na may organisado, pambilog na kinaban na sosyedad na nagpupunsionar sa irarom kan pagkapayo ni Cristo.

Sa mga Ebanghelyo, naaaraman niato na kan lumaog si Jesus sa Jerusalem dai nahaloy bago sia magadan, irinukyaw sia kan saiyang mga disipulo bilang “an Saro na minadatong bilang Hade sa ngaran ni Jehova!” (Luc. 19:38) Mantang mas pinag-aadalan nin mga tawo an Biblia, nanonodan ninda na tinawan na ngonyan ni Jehova si Jesus nin autoridad sa pamamahala na nakaaapektar sa mga tawo kan gabos na nasyon. (Dan. 7:13, 14) Kun kamo nagpapahayag sa kongregasyon o namamayo sa pag-adal, pataluboon an pag-apresyar sa maninigong magin kahulogan sa sato gabos kan pamamahala ni Jesus.

Idoon na ipinaheheling kan satong pamumuhay kun baga talagang nagtutubod kita na si Jesu-Cristo Hade asin kun baga boluntad kitang nagpapasakop sa saiyang pamamahala. Isentro an atension sa gibohon na ipinagigibo ni Jesus sa saiyang mga parasunod pagkalahidi sa saiya bilang Hade. (Mat. 24:14; 28:18-20) Tokaron kun ano an sinabi ni Jesus, an Makangangalas na Parahatol, mapadapit sa kun ano an dapat na enoton sa buhay. (Isa. 9:6, 7; Mat. 6:19-34) Darahon an atension sa espiritu na sinabi kan Prinsipe nin Katoninongan na ipaheheling kan saiyang mga parasunod. (Mat. 20:25-27; Juan 13:35) Magmaan na dai kamo magpakanghokom kun baga ginigibo na nin iba an dapat nindang gibohon, kundi enkaminaron sindang estudyaran kun ano an ipinaririsa kan saindang gawe-gawe manongod sa pagpasakop ninda sa pagkahade ni Cristo. Mantang ginigibo nindo iyan, rekonoseron an pangangaipo na gibohon man nindo iyan.

Pagbugtak ki Cristo Bilang an Pundasyon. Ibinabaing kan Biblia an paggibo nin Kristianong disipulo sa pagtogdok na si Jesu-Cristo an pundasyon. (1 Cor. 3:10-15) Tanganing magibo ini, tabangan an mga tawo na mamidbid si Jesus siring sa pagkaladawan sa saiya sa Biblia. Mag-ingat na bako kamo an ibinibilang ninda na sinusunod ninda. (1 Cor. 3:4-7) Darahon an atension ninda ki Jesu-Cristo.

Kun marahay an pagkabugtak kan pundasyon, masasabotan nin mga inaadalan na si Cristo nagwalat nin modelo tangani na kita ‘makasunod nin estrikto sa saiyang mga lakad.’ (1 Ped. 2:21) Tangani na madugangan iyan, enkaminaron an mga inaadalan na basahon an mga Ebanghelyo bako sanang bilang totoong kasaysayan kundi bilang arogan na dapat na sunodon. Tabangan sinda na isapuso an mga aktitud asin kualidad na nagpamidbid ki Jesus. Enkaminaron sinda na obserbaran kun ano an saboot ni Jesus manongod sa saiyang Ama, kun paano nia inatubang an mga sugot asin pagbalo, kun paano sia nagpaheling nin pagpasakop sa Dios, asin kun paano nia trinatar an mga tawo sa irarom nin laen-laen na kamugtakan. Idoon an aktibidad na nakapano sa buhay ni Jesus. Dangan, kun napapaatubang sa mga desisyon asin pagbalo sa buhay, ihahapot nin inaadalan sa saiyang sadiri: ‘Ano daw an gigibohon ni Jesus sa situwasyon na ini? Mapaheling daw nin tamang apresasyon sa ginibo nia para sa sako an sakong igagawe?’

Kun kamo nagpapahayag sa kongregasyon, dai isipon na mantang may pagtubod na ki Jesus an saindong mga tugang, dai na kaipuhan na mag-apod nin espesyal na atension sa saiya. Magkakaigwa nin orog na kahulogan an saindong sinasabi kun gagamiton nindong basehan an pagtubod na iyan. Kun kamo nagtataram manongod sa mga pagtiripon, ikonektar ini sa katongdan ni Jesus bilang Payo kan kongregasyon. Kun tinotokar nindo an ministeryo sa langtad, apodon an atension sa espiritu na ipinaheling ni Jesus mantang ginigibo nia an saiyang ministeryo, asin iatubang an ministeryo na kinokonsiderar an ginigibo ni Cristo bilang Hade sa pagtipon sa mga tawo para sa pagkaligtas pasiring sa bagong kinaban.

Risang-risa na an kaipuhan bako sanang manodan an pundamental na mga katotoohan manongod ki Jesus. Tanganing magin tunay na mga Kristiano, dapat na tumubod sa saiya an mga tawo asin talagang kamotan sia. An siring na pagkamoot nagmomotibar nin maimbod na pagkuyog. (Juan 14:15, 21) Pinapangyayari kaiyan an mga tawo na makapanindogan nin marigon sa pagtubod sa irarom nin kasakitan, magpadagos na maglakaw sa mga gira ni Cristo sa gabos na aldaw kan saindang buhay, magin maygurang na mga Kristiano na marigon na ‘nakagamot asin napatindog sa pundasyon.’ (Efe. 3:17) An siring na gawe nagtatao nin kamurawayan ki Jehova, an Dios asin Ama ni Jesu-Cristo.

KAN nagtatao nin mga detalye mapadapit sa tanda kan saiyang presensia asin kan pagtatapos kan sistema nin mga bagay, ihinula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”​—Mat. 24:14.

Ano man nanggad an mensaheng ini na dapat na tawan nin siring kalakop na publisidad? Iyan manongod sa Kahadean na itinokdo sa sato ni Jesus na ipamibi sa Dios, na sinasabi: “Dumatong logod an kahadean mo.” (Mat. 6:10) Ilinaladawan iyan kan Kapahayagan 11:15 na “kahadean kan satong Kagurangnan [si Jehova] asin kan saiyang Cristo” ta an autoridad na mamahala gikan ki Jehova asin itinao ki Cristo bilang Hade. Minsan siring, mangnoha na an mensahe na sinabi ni Jesus na ibabalangibog sa satong kaaldawan mas mahiwas an sakop kisa ihinulit kan saiyang mga parasunod kan enot na siglo. Sinabi ninda sa mga tawo: “An kahadean nin Dios harani na sa saindo.” (Luc. 10:9) Si Jesus, an linahidan na magin Hade, nasa tanga ninda kaidto. Alagad arog kan nasusurat sa Mateo 24:14, ihinula ni Jesus an pambilog na kinaban na pagpahayag nin saro pang pangyayari sa pagkaotob kan katuyohan nin Dios.

Si propeta Daniel tinawan nin bisyon kan pangyayaring ini. Naheling nia “an saro na kaagid sa aki nin tawo,” si Jesu-Cristo, na inaako sa “Suanoy kan mga Aldaw,” si Jehova Dios, “an pamamahala asin dignidad patin kahadean, tanganing an mga banwaan, mga grupo nasyonal asin mga lenguahe gabos maglingkod sa saiya.” (Dan. 7:13, 14) An pangyayaring iyan na may unibersal na kahulogan nangyari sa langit kan taon 1914. Pakatapos kaiyan, an Diablo asin an saiyang mga demonyo ihinolog digdi sa daga. (Kap. 12:7-10) An daan na sistema nin mga bagay luminaog na sa huring mga aldaw kaiyan. Alagad bago iyan biyong haleon, ginigibo an lakop sa globong pagbalangibog na an Mesiyanikong Hade ni Jehova namamahala na ngonyan gikan sa saiyang langitnon na trono. Pinaiisi an mga tawo sa gabos na lugar. An reaksion ninda nagpaparisa kan aktitud ninda sa Kaharohalangkawe bilang Namamahala sa “kahadean nin katawohan.”​—Dan. 4:32.

Totoo, may maabot pa​​—dakolon pa! Namimibi pa kita, “Dumatong logod an kahadean mo,” alagad bakong sa punto na sa ngapit pa an pag-establisar kan Kahadean nin Dios. Imbes, iyan nangangahulogan na an langitnon na Kahadean mahiro sa desididong paagi tangani na maotob an mga hula na arog kan Daniel 2:44 asin Kapahayagan 21:2-4. Gigibohon kaiyan an daga na magin paraiso na pano nin mga tawo na namomoot sa Dios asin sa saindang kapwa. Mantang ihinuhulit niato “an maogmang baretang ini kan kahadean,” itinotokdo niato an mga esperansang iyan sa ngapit. Alagad may pagkompiar man na ipinaaaram niato na tinawan na ni Jehova nin lubos na autoridad na mamahala an saiyang Aki. Idinodoon daw nindo an maogmang baretang ini kun kamo naghuhulit manongod sa Kahadean?

Pag-eksplikar kan Kahadean. Paano niato maootob an sugo sa sato na ipahayag an Kahadean nin Dios? Puede niatong pukawon an interes paagi sa pagpoon kan orolay sa laen-laen na tema, alagad maninigo na sa madali magin malinaw na an mensahe niato manongod sa Kahadean nin Dios.

An sarong importanteng aspekto kan gibohon na ini pagbasa o pagkotar nin mga teksto na nagtataram manongod sa Kahadean. Kun kamo nagtataram manongod sa Kahadean, seguradohon na nasasabotan kan mga kaolay nindo kun ano iyan. Tibaad an kaipuhan bako sanang pagsabi na an Kahadean nin Dios sarong gobyerno. An nagkapira tibaad madepisilan na isipon an sarong bagay na dai naheheling arog kan gobyerno. Puede kamong makipagrasonan sa sainda sa laen-laen na paagi. Halimbawa, an grabidad dai naheheling, alagad iyan may mapuersang epekto sa satong buhay. Dai niato naheheling an Saro na kaggibo kan ley nin grabidad, alagad risang-risa na sia may dakulang kapangyarihan. Inaapod sia kan Biblia na “Hade sa panahon na daing sagkod.” (1 Tim. 1:17) O puede nindong sabihon na sa sarong dakulang nasyon, dakol an nungka na nakaabot sa kabisera o personal na naheling an namamahala sa sainda. Naaaraman sana ninda an mga ini sa mga bareta. Siring man, an Biblia, na ipinublikar sa labing 2,200 na lenguahe, nagsasabi sa sato manongod sa Kahadean nin Dios; ipinapaaram kaiyan sa sato kun siisay an tinawan nin autoridad asin kun ano an ginigibo kan Kahadean. An Torrengbantayan, na ipinupublikar sa mas dakol na lenguahe kisa arin pa man na ibang babasahon, “Nagpapahayag kan Kahadean ni Jehova,” arog kan sinasabi sa tutob.

Tanganing matabangan an mga tawo na masabotan kun ano an Kahadean, puede nindong sambiton an nagkapirang bagay na gusto nindang itao nin mga gobyerno: katiwasayan sa pagbuhay, katoninongan, kadaihan nin krimen, imparsial na pagtrato sa gabos na grupong etniko, edukasyon, asin pag-asikaso sa salud. Ipaliwanag na solamente paagi sa Kahadean nin Dios na an mga ini asin an gabos na iba pang nakararahay na kamawotan nin tawo lubos na mapaninigoan.​—Sal. 145:16.

Hingoahon na pukawon sa mga tawo an kamawotan na magin sakop kan Kahadean, na dian si Jesu-Cristo an namamahala bilang Hade. Sabihon an mga milagrong ginibo nia bilang preliminaryong paheling kan gigibohon nia bilang langitnon na Hade. Parateng magtaram manongod sa nakaaakit na mga kualidad na ipinaheling nia. (Mat. 8:2, 3; 11:28-30) Ieksplikar na itinao nia an saiyang buhay para sa sato asin na pagkatapos kaiyan binuhay sia liwat nin Dios sa inmortal na buhay duman sa kalangitan. Hale duman na sia namamahala bilang Hade.​—Gibo 2:29-35.

Idoon na namamahala na ngonyan an Kahadean nin Dios hale sa kalangitan. Minsan siring, saboton na dai naheheling kan kadaklan an mga kamugtakan na hinohona ninda na magigin ebidensia kan siring na pamamahala. Rekonoseron iyan, asin ihapot kun baga aram ninda kun ano an sinabi ni Jesu-Cristo na magigin ebidensia kaiyan. Isentro an atension sa nagkapirang aspekto kan tandang kompuesto nin laen-laen na kabtang na yaon sa Mateo kapitulo 24, Marcos kapitulo 13, o Lucas kapitulo 21. Dangan ihapot kun taano an pagtukaw ni Cristo sa trono duman sa langit ta magbubunga kan siring na mga kamugtakan digdi sa daga. Darahon an atension sa Kapahayagan 12:7-​10, 12.

Bilang aktuwal na ebidensia sa ginigibo kan Kahadean nin Dios, basahon an Mateo 24:14, asin iladawan an lakop sa globong programa nin pagtotokdo kan Biblia na nangyayari ngonyan. (Isa. 54:13) Isabi sa mga tawo an manongod sa laen-laen na paadalan na dian nakikinabang an Mga Saksi ni Jehova​​—gabos basado sa Biblia, gabos daing bayad. Ieksplikar na apuera sa satong ministeryo sa harong-harong, nag-oopresir kita nin daing bayad na pagtotokdo sa Biblia sa mga indibiduwal asin pamilya sa labing 230 kadagaan. Anong gobyerno nin tawo an kayang itao an siring kahiwas na programa nin pagtotokdo bako sanang para sa mga sakop kaiyan kundi para man sa mga tawo sa bilog na daga? Imbitaran an mga tawo na magduman sa Kingdom Hall, mag-atender sa mga asamblea asin kombension kan Mga Saksi ni Jehova, tanganing maheling an ebidensia kun paano an pagtotokdong iyan nakakaapektar sa buhay nin mga tawo.​—Isa. 2:2-4; 32:1, 17; Juan 13:35.

Alagad marerealisar daw kan kagharong kun paano apektado an saiya mismong buhay? Puede nindong sabihon nin mataktika na an katuyohan kan pagdalaw nindo ipakipag-olay an oportunidad na bukas sa gabos na pilion an buhay bilang sakop kan Kahadean nin Dios. Paano? Paagi sa pag-adal kun ano an hinahagad nin Dios asin pamumuhay kaoyon kaiyan ngonyan.​—Deut. 30:19, 20; Kap. 22:17.

Pagtabang sa Iba na Enoton an Kahadean. Dawa pakatapos na akoon nin saro an mensahe kan Kahadean, may mga desisyon na dapat niang gibohon. Anong prioridad an itatao nia sa Kahadean nin Dios sa saiya mismong buhay? Sinadol ni Jesus an saiyang mga disipulo na “padagos na hanapon nguna an kahadean.” (Mat. 6:33) Paano niato matatabangan an mga kapwa niato Kristiano na gibohon iyan? Paagi sa pagtao niato mismo nin marahay na halimbawa asin paagi sa pagtokar kan mga oportunidad na yaon. Kun beses, paagi sa paghapot kun baga napensar na nin saro an nagkapirang posibilidad asin paagi sa pag-estorya nin mga eksperyensia tanganing ipaheling kun ano an ginigibo nin iba. Paagi sa pagtokar sa mga salaysay sa Biblia sa paagi na pinarararom kaini an pagkamoot nin saro ki Jehova. Paagi sa pagdodoon kan pagigin tunay kan Kahadean. Paagi sa pagdodoon kun gurano talaga kaimportante kan gibohon na pagbalangibog kan Kahadean. An pinakadakulang karahayan parateng nagigibo, bakong paagi sa pagsabi sa mga tawo kun ano an kaipuhan na gibohon, kundi paagi sa pagpukaw kan kamawotan ninda na gibohon iyan.

Daing duwa-duwa, an mahalagang marhay na mensahe na dapat na ibalangibog niato gabos nagsesentro kan prinsipal na atension ki Jehova Dios, ki Jesu-Cristo, asin sa Kahadean. An mahalagang marhay na mga katotoohan mapadapit sa mga ini maninigong idoon sa satong paghuhulit sa publiko, sa satong mga kongregasyon, asin sa satong personal na buhay. Kun iyan ginigibo niato, ipinaheheling niato na kita talagang nakikinabang sa satong edukasyon sa Teokratikong Paadalan sa Pagmiministro.