Paano Magigin Maugma an Pamilya Mo?—Kabtang 2

An mga aki regalo hali ki Jehova. Inaasahan niya sa mga magurang na iingatan ninda an regalong iyan. Nagtatao si Jehova nin epektibong mga sadol o giya na makakatabang sa mga magurang na magibo iyan. Nagtatao man siya nin giya para sa mga aki kun ano an puwede nindang gibuhon para makatabang na magin maugma an saindang pamilya.

1. Anong giya an itinatao ni Jehova para sa mga magurang?

Inaasahan ni Jehova sa mga magurang na papadabaon ninda an saindang mga aki asin na tatawan ninda sinda nin dakul na panahon. Gusto niya man na protektaran kan mga magurang an saindang mga aki asin na gamiton ninda an mga prinsipyo kan Bibliya bilang giya para sanayon an mga ini. (Talinhaga 1:8) Sa pagsasanay sa mga aki, sinasabi niya sa mga ama: “Padagos sindang padakulaon sa . . . sadol ni Jehova.” (Basahon an Efeso 6:4.) Nauugma si Jehova kun sinusunod kan mga magurang an saiyang mga instruksiyon sa pagpapadakula sa saindang mga aki asin kun dai ninda ipinapasa sa iba an responsabilidad na iyan.

2. Anong giya an itinatao ni Jehova para sa mga aki?

Sinasabi ni Jehova sa mga aki: “Magin masinunod kamo sa saindong mga magurang.” (Basahon an Colosas 3:20.) Pag irinerespeto asin sinusunod kan mga aki an saindang mga magurang, napapaugma ninda si Jehova pati man an saindang mga magurang. (Talinhaga 23:22-25) Nagtao si Jesus nin marahay na halimbawa para sa mga aki. Kan aki pa siya, dawa ngani perpekto siya asin an saiyang mga magurang bako, sinunod asin irinespeto niya sinda.—Lucas 2:51, 52.

3. Paano kamo magigin harani sa Diyos bilang pamilya?

Kun saro kang magurang, siguradong gusto mo na mamutan si Jehova kan mga aki mo. Paano mo sinda matatabangan na magibo iyan? Paagi sa pagsunod sa sinasabi kan Bibliya: “Dapat mong itadom [an tataramon ni Jehova] sa saimong mga aki asin sabihon iyan sa sainda pag nakatukaw ka sa saimong harong asin pag naglalakaw ka sa tinampo.” (Deuteronomio 6:7) An tataramon na “itadom” nangangahulugan na pag-utro kan sarong bagay na itinutukdo. Posibleng marhay na aram mo na kaipuhan mong uruutruhon sa saimong mga aki an sarong bagay para matandaan ninda iyan. Kaya an tekstong ini nangangahulugan na dapat na maghanap ka pirmi nin mga oportunidad para ipakipag-ulay sa mga aki mo an manungod ki Jehova. Magayon kun an pamilya nagtatagama nin oras kada semana para iribang pag-adalan an Bibliya. Kun mayo kamong aki, makikinabang man giraray kamo kun matagama kamo nin oras kada semana para pag-adalan an Tataramon nin Diyos.

ARAMON PA

4. May pagkamuot na sanayon an saindong mga aki

Puwedeng magin dipisil an pagsasanay sa mga aki. Paano makakatabang an Bibliya? Basahon an Santiago 1:19, 20, dangan pag-ulayan an mga hapot na ini:

• Paano maipapahiling kan mga magurang an pagkamuot pag nakikipag-ulay sa saindang mga aki?

• Taano ta dai dapat nuarin man magtao nin disiplina an sarong magurang sa saiyang mga aki pag anggot siya?a

5. Protektaran an saindong mga aki

Para maprotektaran an saimong mga aki, mahalagang marhay na ipakipag-ulay mo sa kada saro sa sainda an manungod sa sex. Tibaad dai ini magin madali. I-play an VIDEO, dangan pag-ulayan an mga hapot na ini:

VIDEO: Protektaran an Saindong mga Aki sa Maraot (2:58)

• Taano ta nadidipisilan an ibang magurang na ipakipag-ulay sa saindang mga aki an manungod sa sex?

• Paano ipinaliwanag kan nagkapirang magurang sa saindang mga aki an manungod sa sex?

Arog kan pigpropesiya kan Bibliya, an kinaban ni Satanas paraot na nin paraot. Basahon an 2 Timoteo 3:1, 13, dangan pag-ulayan an hapot.

• An iba sa maraot na tawo na sinambit sa bersikulo 13 seksuwal na nang-aabuso nin mga aki. Kaya taano ta mahalagang itukdo kan mga magurang sa saindang mga aki an manungod sa sex asin kun paano mapoprotektaran kan mga ini an saindang sadiri laban sa mga nang-aabuso?

Aram mo daw?

An mga Saksi ni Jehova nagpoprodusir nin mga publikasyon para matabangan an mga magurang sa pagtukdo sa saindang mga aki manungod sa sex asin para maprotektaran an mga ini sa mga nang-aabuso. Para sa nagkapirang halimbawa, hilingon an:

• Protektaran an Saindong mga Aki (video)

• Makanood sa Dakulang Paratokdo, kapitulo 10 asin 32

• “Tukduan an Saimong Aki Manungod sa Sex” (Magmata! Num. 5 2016)

6. Irespeto an saimong mga magurang

VIDEO: Paano Ako Makikipag-ulay sa mga Magurang Ko? (2:19)

• Taano ta kapaki-pakinabang kun magigin magalang an sarong hoben pag nakikipag-ulay sa saiyang mga magurang?

• Paano matatawan nin onra kan mga hoben an saindang mga magurang pag nakikipag-ulay sa mga ini?

Basahon an Talinhaga 1:8, dangan pag-ulayan an hapot na ini:

• Ano an dapat na magin reaksiyon kan mga hoben pag sinasabihan sinda kan saindang mga magurang kun ano an dapat gibuhon?

7. Sambahon si Jehova bilang pamilya

An mga pamilyang Saksi ni Jehova nagtatagama nin espesipikong oras kada semana para iribang magsamba. Ano an ginigibo sa arog kaiyan na pampamilyang pagsamba? I-play an VIDEO, dangan pag-ulayan an mga hapot na ini:

VIDEO: Pampamilyang Pagsamba—Mga Kadipisilan, mga Bendisyon (8:04)

• Paano magkakaigwa an sarong pamilya nin regular na programa nin pampamilyang pagsamba?

• Ano an puwedeng gibuhon kan mga magurang para magin kapaki-pakinabang asin nakakaugma an saindang pampamilyang pagsamba?—Hilingon an ritrato sa kapinunan kan leksiyon na ini.

• Ano an mga puwedeng makaulang sa saindong pamilya para iriba kamong makapag-adal nin Bibliya?

Sa suanoy na Israel, inaasahan ni Jehova sa mga pamilya na regular nindang pag-uulayan an Kasuratan. Basahon an Deuteronomio 6:6, 7, dangan pag-ulayan an hapot na ini:

• Paano mo maiaaplikar an prinsipyong ini?

Mga puwedeng gibuhon para sa pampamilyang pagsamba:

• Maghanda para sa mga pagtiripon kan kongregasyon.

• Basahon asin pag-ulayan an sarong istorya sa Bibliya na mai-enjoy nindong pamilya.

• Kun may saradit pa kamong aki, mag-download o mag-print nin mga activity sa jw.org para sa mga aki.

• Kun may tin-edyer kamong mga aki, pag-ulayan an sarong artikulo sa jw.org para sa mga tin-edyer.

• Iakto an sarong istorya sa Bibliya kaiba kan saindong mga aki.

• Hilingon saka pag-ulayan an sarong video sa jw.org.

SUMARYO

Gusto ni Jehova na padangaton, sanayon, asin protektaran kan mga magurang an saindang mga aki; na irespeto saka sunudon kan mga aki an saindang mga magurang; asin na an kada pamilya iribang magsamba sa saiya.

Rebyu

• Paano sasanayon asin poprotektaran kan mga magurang an saindang mga aki?

• Paano matatawan nin onra kan mga aki an saindang mga magurang?

• Ano an mga pakinabang kan pagtagama nin oras kada semana para sa pampamilyang pagsamba?

HILINGON MAN

Anong mga leksiyon an dapat manudan kan saimong aki na makakatabang sa saiya pagdakula niya?

“Anim na Aral na Dapat Ituro sa mga Anak” (Gumising! Blg. 2 2019)

Aramon an praktikal na mga giya na itinatao kan Bibliya sa mga nag-aataman sa saindang may edad nang mga magurang.

“Ano an Sinasabi kan Bibliya Manungod sa Pag-ataman sa mga May Edad Nang mga Magurang?” (Artikulo sa jw.org/bcl)

Aramon kun paano an sarong lalaki, na dati dai tatao magpadakula nin mga aki, nagin mapanggana sa pagpadakula nin mga aki.

Tinukduan Kami ni Jehova sa Pagpadakula sa mga Aki Mi (5:58)

Aramon kun ano an puwedeng gibuhon kan mga ama para magin dayupot sa saindang mga aking lalaki.

“Paano Magdadanay na Harani an mga Ama sa Saindang mga Aking Lalaki?” (An Torrengbantayan, Nobyembre 1, 2011)