“Biko” daw an mga Paagi nin Dios?

AN “DEUS ESCREVE CERTO POR LINHAS TORTAS” (“TAMA AN pagsurat nin Dios na naggagamit nin tiko na mga linya”) sarong sarabihon sa Brazil. Iyan nagsusuherir na an Dios pirmeng tama an ginigibo alagad kun beses sa paagi na garo baga biko para sa tawo. Halimbawa, kun magadan an saro na nasa kabagsikan nin buhay, dakol an nagsasabi, ‘Inapod sia nin Dios sa langit.’ Kun an saro may kabiadian sa pisikal o napapaatubang sa trahedya, may mga nagsasabi, ‘Kabotan iyan nin Dios.’ Mantang an kagadanan, mga problema sa pisikal, asin iba pang dahelan nin kamondoan sa siring ibinabasol sa Dios, ipinasesentido kan siring na mga kapahayagan na an Dios ‘tiko an pagsurat,’ na an saiyang mga paagi dai masabotan nin tawo.

Taano an dakol na tawong relihioso ta naniniwala na an Dios an may paninimbagan sa kagadanan asin mga kasakitan? An mga paniniwalang ini sa parate basado sa salang pagsabot sa nagkapirang bibihirang teksto sa Biblia. Helingon ta sa halipot an nagkapira kaiyan.

● “Siisay an naggigibo sa pula o sa bongog o sa malinaw an pagheling o sa buta? Bako daw na ako, si Jehova?”—Exodo 4:11.

Nangangahulogan daw ini na an Dios an dapat basolon sa gabos na igwa nin laen-laen na kabiadian? Dai. Dai ini magigin kaoyon kan personalidad nin Dios. An Biblia nagsasabi sa sato: “An lambang linalang nin Dios marahay.” (1 Timoteo 4:4) Bako sia an dapat na basolon kun may namundag na buta, pula, o bongog. An mawot sana nia iyo an ikararahay kan saiyang mga linalang, huli ta sia an Gikanan kan “lambang marahay na balaog asin lambang sangkap na regalo.”—Santiago 1:17.

An satong enot na mga magurang, si Adan asin Eva, na paagi sa saindang sadiring pagpili an nagrebelde tumang sa Dios asin iwinara an saindang pagkasangkap asin kun siring an saindang kakayahan na mangaki nin mga sangkap. (Genesis 3:1-6, 16, 19; Job 14:4) Mantang an saindang mga gikan nag-aagom asin nangangaki, an paorog nang paorog na mga pagkabakong sangkap, kabale an pisikal na mga depekto, nagpoon na mahayag sa tahaw kan mga tawo. Minsan ngani bakong si Jehova Dios an nagpangyari kaini, tinogotan nia iyan na mangyari. Huli kaini, puede niang sabihon na sia an “naggigibo” sa pula, sa bongog, asin sa buta.

● “An ginibong biko dai ikatatanos.”—Eclesiastes 1:15.

An Dios daw an naggibo nin mga biko? Malinaw na bako. An Eclesiastes 7:29 nagsasabi: “Linalang na matanos kan . . . Dios an tawo, alagad ta sinda mismo an nagharanap nin dakol na plano.” An Contemporary English Version itinatao an kahulogan kan bersikulong ini: “Kita biyong sadiosan kan kita lalangon nin Dios, alagad ngonyan kita may piripit na mga isip.” Imbes na kuyogon an matanos na mga pamantayan nin Dios, tuyong pinili nin mga lalaki asin babae, sa kadaklan, na sunodon an saindang sadiring mga plano, mukna, pakana, o dalan—sa saindang ikadadanyar.—1 Timoteo 2:14.

Siring man, arog kan sabi ni apostol Pablo, huli sa kasalan nin katawohan, “an mga linalang ipinasakop sa kasayangan.” (Roma 8:20) Asin an situwasyon na ini “dai ikatatanos” paagi sa mga paghihingoa nin tawo. Paagi sana sa pag-interbenir nin Dios na hahaleon an gabos na kabikoan asin kasayangan sa mga gibo-gibo sa daga.

● “Helinga an gibo kan tunay na Dios, huli ta siisay an makapatatanos sa saiyang ginibong biko?”—Eclesiastes 7:13.

Sa ibang pagtaram, si Hadeng Salomon naghapot: ‘Siisay sa tahaw kan katawohan an makatatanos kan mga depekto asin pagkabakong sangkap na tinotogotan nin Dios?’ Mayo, huli ta igwa nin dahelan kun taano ta tinotogotan ni Jehova Dios na mangyari an mga bagay na ini.

Kun siring, si Salomon nagsusuherir: “Sa marahay na aldaw patunayan na ika nasa karahayan, asin sa kapahapahamak na aldaw helinga na ini ginibo kan tunay na Dios na arog nanggad kaiyan, sa intension na an katawohan dai makadiskobre nin ano man kasunod ninda.” (Eclesiastes 7:14) Maninigo na apresyaron nin saro an aldaw na marahay asin ipaheling an saiyang apresasyon paagi sa pagpabanaag nin karahayan. Maninigo niang mansayon an marahay na aldaw bilang regalo nin Dios. Alagad kumusta kun an aldaw magdara nin kapahamakan? Marahay na “helingon,” an boot sabihon, rekonoseron, nin saro na tinogotan nin Dios na mangyari an kalamidad. Taano ta ginibo nia iyan? Sinasabi ni Salomon: “Sa intension na an katawohan dai makadiskobre nin ano man kasunod ninda.” Ano an boot sabihon kaini?

An bagay na tinotogotan kita nin Dios na mapaatubang kapwa sa mga kagayagayahan asin problema nagpapagirumdom sa sato na dai niato masasabi kun ano an mangyayari sa ngapit. An kapahamakan puedeng mangyari kapwa sa mga matanos asin maraot. Mayo nin puera. Maninigong magpangyari ini sa sato na marealisar an importansia kan pagsarig, bakong sa satong sadiri, kundi sa Dios, na ginigirumdom na “an Dios pagkamoot.” (1 Juan 4:8) Minsan ngani tibaad may mga dai kita nasasabotan ngonyan, makaseseguro kita na pakatapos na mangyari an gabos na bagay, an tinogotan nin Dios magigin para sa kapakinabangan kan gabos na nanonongdan.

An ano man na tinotogotan nia nungkang magbubunga nin daing katapusan na danyos sa mga tama an kamugtakan nin puso. Lininaw ini ni apostol Pedro kan magkomento sia manongod sa pagdusa kan mga kapagtubod kaidtong saiyang panahon: “Pakapagtios nindo sa kadikit na panahon, an Dios kan gabos na dai na kutana maninigong kabootan, na nag-apod sa saindo sa saiyang daing katapusan na kamurawayan na kasaro ni Cristo, iyo an matapos mismo kan saindong pagpatood, paririgonon nia kamo, pakokosogon nia kamo.”—1 Pedro 5:10.

Panahon Tanganing Itanos an mga Bagay

Tinatawan kita ni Jehova nin kosog tanganing tagalan an mga kasakitan niato sa presente. Nanunuga man sia na gibohon na “bago an gabos na bagay.” (Kapahayagan 21:5) Iyo, katuyohan nia na sa dai na mahahaloy ibabalik kan saiyang langitnon na Kahadean an salud kan mga may kabiadian asin aasikasohon an pagbuhay liwat sa mga gadan. Hahaleon man kan gobyernong iyan an saro na an mga dalan talagang biko—si Satanas na Diablo. (Juan 5:28, 29; Roma 16:20; 1 Corinto 15:26; 2 Pedro 3:13) Magigin dakulaon na bendisyon para sa mga tawong matatakton sa Dios sa bilog na daga kun dumatong na an panahon nin Dios na itanos an mga bagay!

[Pasasalamat para sa pinagkuanan kan retrato sa pahina 28]

Job Hearing of His Ruin/The Doré Bible Illustrations/Dover Publications