Hula ni Isaias—Liwanag Para sa Bilog na Katawohan II

Kapitulo Dies: “Panahon nin Marahay na Boot”

Isaias 49:1-26

1, 2. (a) Anong bendisyon an nakamtan ni Isaias? (b) Sairisay an kalabot sa makahulang mga tataramon na nakasurat sa enot na kabanga kan Isaias kapitulo 49?

HALOY nang nakakamtan kan gabos na fiel na tawo an pag-oyon asin proteksion nin Dios. Alagad dai itinatao ni Jehova an saiyang marahay na boot nin basta kiisay na sana. An saro dapat na makualipikar sa siring na daing kaparehong bendisyon. Saro dian si Isaias. Nakamtan nia an pabor nin Dios asin ginamit sia ni Jehova bilang instrumento tangani na ipaaram sa iba an Saiyang kabotan. An sarong halimbawa kaini nakasurat sa enot na kabanga kan kapitulo 49 kan hula ni Isaias.

² An mga tataramon na ini makahulang isinabi sa banhi ni Abraham. Sa enot na kaotoban, an banhi na iyan iyo an nasyon nin Israel, na naggikan ki Abraham. Minsan siring, an kadaklan na pananaram malinaw na minaaplikar sa haloy nang linalaoman na Banhi ni Abraham, an ipinanugang Mesiyas. An ipinasabong na mga tataramon minaaplikar man sa espirituwal na mga tugang kan Mesiyas, na nagin kabtang kan espirituwal na banhi ni Abraham asin kan “Israel nin Dios.” (Galacia 3:​7, 16, 29; 6:16) Partikularmenteng ilinaladawan kan kabtang na ini kan hula ni Isaias an espesyal na relasyon ni Jehova saka kan saiyang namomotan na Aki, si Jesu-Cristo.​—Isaias 49:26.

Nombrado Asin Protehido ni Jehova

3, 4. (a) Anong suporta igwa an Mesiyas? (b) Kiisay nagtataram an Mesiyas?

³ Nakakamtan kan Mesiyas an marahay na boot, o pag-oyon nin Dios. Itinatao sa saiya ni Jehova an autoridad asin mga kredensial na kaipuhan tanganing otobon an sugo sa saiya. Kun siring, tamang-tama na an magigin Mesiyas nagsasabi: “Paghinanyog kamo sako, O kamong mga isla, asin pagtaong atension, kamong mga grupo nasyonal sa harayo. Inapod ako ni Jehova poon pa sa tulak. Poon pa sa nasa laog na mga kabtang kan sakong ina sinambit nia an sakong ngaran.”​—Isaias 49:1.

⁴ Idinidirehir digdi kan Mesiyas an saiyang sinasabi sa mga banwaan “sa harayo.” Minsan ngani an Mesiyas ipinanuga sa banwaan na Judio, an saiyang ministeryo magigin bendisyon sa gabos na nasyon. (Mateo 25:31-33) An “mga isla” asin an “mga grupo nasyonal,” minsan ngani daing pakipagtipan ki Jehova, maninigong maghimate sa Mesiyas kan Israel huli ta sia sinugo tanganing magtao nin kaligtasan sa bilog na katawohan.

 5. Paano nginaranan an Mesiyas bago pa ngani sia mamundag bilang tawo?

⁵ Sinasabi kan hula na ngangaranan ni Jehova an Mesiyas bago sia mamundag bilang tawo. (Mateo 1:21; Lucas 1:31) Haloy pa bago sia mamundag, si Jesus nginaranan na “Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan.” (Isaias 9:6) An Emmanuel, na posibleng ngaran kan sarong aking lalaki ni Isaias, nagin man sarong makahulang ngaran kan Mesiyas. (Isaias 7:14; Mateo 1:21-23) Dawa an itinaong ngaran na dian mamimidbid an Mesiyas​—an Jesus​—ihinula na bago sia mamundag. (Lucas 1:​30, 31) An ngaran na ini hale sa Hebreong tataramon na nangangahulogan “Si Jehova Kaligtasan.” Malinaw nanggad, bakong si Jesus an nagnombra sa saiyang sadiri bilang Cristo.

 6. Sa anong paagi na an ngoso kan Mesiyas siring sa sarong matarom na espada, asin paano sia itinago?

⁶ An makahulang mga tataramon kan Mesiyas nagpapadagos: “Asin ginibo nia an sakong ngoso na siring sa matarom na espada. Sa limpoy kan saiyang kamot itinago nia ako. Asin luway-luway ginibo nia akong makinis na pana. Itinago nia ako sa saiyang suksukan nin pana.” (Isaias 49:2) Kan nag-abot na an panahon para ponan kan Mesiyas ni Jehova an saiyang daganon na ministeryo kan 29 C.E., an mga tataramon asin paghiro ni Jesus nagin nanggad siring sa matarom, makinis na mga armas, na nakataros sa puso kan saiyang mga paradangog. (Lucas 4:​31, 32) An saiyang mga tataramon asin paghiro nakapukaw sa grabeng kaanggotan kan dakulang kaiwal ni Jehova, si Satanas, asin an saiyang mga ahente. Poon kan mamundag si Jesus, si Satanas naghihingoang gadanon Sia, alagad si Jesus siring sa sarong pana na itinago sa suksukan nin pana ni Jehova.a May kompiansa siang makaaasa sa proteksion kan saiyang Ama. (Salmo 91:1; Lucas 1:35) Kan dumatong an itinalaan na panahon, itinao ni Jesus an saiyang buhay para sa katawohan. Alagad maabot an panahon na sia maluwas bilang sarong makakamhan na langitnon na guerrero na armado sa laen na sentido, nin matarom na espada na nagluluwas sa saiyang ngoso. Sa panahon na ini, an matarom na espada nagrerepresentar sa autoridad ni Jesus na ipahayag asin gibohon an mga paghokom tumang sa mga kaiwal ni Jehova.​—Kapahayagan 1:16.

An mga Pagpapagal kan Lingkod nin Dios Bakong Sayang

 7. Kiisay minaaplikar an mga tataramon ni Jehova sa Isaias 49:​3, asin taano?

⁷ Ngonyan itinataram ni Jehova an makahulang mga tataramon na ini: “Ika lingkod ko, O Israel, ika na pahehelingan ko kan sakong kagayonan.” (Isaias 49:3) Inaapod ni Jehova an nasyon nin Israel na saiyang lingkod. (Isaias 41:8) Alagad si Jesu-Cristo an Lingkod nin Dios na nakalalabi sa gabos. (Gibo 3:13) Mayo sa mga linalang nin Dios an orog na makapababanaag kan “kagayonan” ni Jehova kisa ki Jesus. Huli kaini, minsan ngani literal na ipinanonongod sa Israel, an mga tataramon na ini totoong minaaplikar ki Jesus.​—Juan 14:9; Colosas 1:15.

 8. Ano an reaksion sa saiya kan mga kahimanwa kan Mesiyas, alagad siisay an inaasahan kan Mesiyas na mahokom sa saiyang kapangganahan?

⁸ Pero, bako daw totoo na si Jesus dinuhagi asin hinaboan kan kadaklan sa saiyang mga kahimanwa? Iyo. Sa pankagabsan, dai inako kan nasyon nin Israel si Jesus bilang an linahidan na Lingkod nin Dios. (Juan 1:11) Para sa saiyang mga katemporanyo, an gabos na ginibo ni Jesus kan yaon pa sia digdi sa daga garo baga bakong gayong mahalaga, mayo ngani nin halaga. An garo baga pagkasudyang ini sa saiyang ministeryo sunod na naunabihan kan Mesiyas: “Mayong kapakanan an pagpapagal ko. Inubos ko an sakong puersa sa bakong tunay asin daing kamanungdanan.” (Isaias 49:4a) An mga tataramon na ini dai man nangangahulogan na nanluya an boot kan Mesiyas. Konsiderara an sunod na sinabi nia: “Totoo nanggad an paghokom sa sako yaon ki Jehova, asin an kabayadan sa sako yaon sa sakong Dios.” (Isaias 49:4b) An kapangganahan kan Mesiyas hohokoman, bako nin mga tawo, kundi nin Dios.

9, 10. (a) Ano an sugo sa Mesiyas na hale ki Jehova, asin ano an nakua niang resulta? (b) Paano maparirigon kan mga naeksperyensiahan kan Mesiyas an boot kan mga Kristiano ngonyan?

⁹ Orog kisa sa ano pa man, interesado si Jesus sa pag-oyon, o marahay na boot, nin Dios. Sa hula, sinasabi kan Mesiyas: “Ngonyan si Jehova, an Saro na naghaman sa sako poon sa tulak bilang lingkod na sadiri nia, nagsabi na maninigo kong ibalik sa saiya si Jacob, tangani na matipon sa saiya an Israel. Asin pamumurawayon ako sa pagheling ni Jehova, asin an sakong Dios magigin sakong kosog.” (Isaias 49:5) Nagdatong an Mesiyas tanganing ibalik an puso kan mga aki ni Israel sa saindang langitnon na Ama. An kadaklan dai naghimate, alagad an nagkapira iyo. Minsan siring, an tunay na kabayadan sa saiya yaon ki Jehova Dios. An saiyang kapangganahan sinosokol, bakong sono sa pagmansay nin tawo, kundi oyon sa sadiring mga pamantayan ni Jehova.

¹⁰ Ngonyan, may beses na tibaad magsaboot an mga parasunod ni Jesus na garo baga sinda nagpapagal na daing kamanungdanan. Sa nagkapirang lugar, tibaad garo baga kadikit an resulta kan saindang ministeryo kun ikokomparar sa ginibong pagpapagal asin paghihingoa. Pero sinda nagtatagal, naparirigon an boot kan halimbawa ni Jesus. Napapakosog man sinda kan mga tataramon ni apostol Pablo, na nagsurat: “Bilang resulta, namomotan kong mga tugang, magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan.”​—1 Corinto 15:58.

“Liwanag kan mga Nasyon”

11, 12. Paano nagin “liwanag kan mga nasyon” an Mesiyas?

¹¹ Sa hula ni Isaias, pinarigon ni Jehova an boot kan Mesiyas paagi sa pagpagirumdom sa saiya na an pagigin Lingkod nin Dios bakong “bagay na kadikit an halaga.” Si Jesus an ‘mabangon kan mga tribo ni Jacob asin mapabalik giraray minsan kan mga iningatan nin Israel.’ Si Jehova nagpaliwanag pa: “Ika itinao ko man na liwanag kan mga nasyon, tanganing an sakuyang pagliligtas umabot sagkod sa kaporoporohi kan daga.” (Isaias 49:6) Paano pinaliliwanagan ni Jesus an mga banwaan “sagkod sa kaporoporohi kan daga” mantang an saiyang ministeryo sa daga limitado sana sa Israel?

¹² Ipinaheheling kan rekord sa Biblia na an “liwanag [nin Dios] kan mga nasyon” dai naparong kan si Jesus humale sa daga. Mga 15 taon pagkagadan ni Jesus, kinotar kan mga misyonerong si Pablo asin Bernabe an hula sa Isaias 49:6 asin iinaplikar iyan sa mga disipulo ni Jesus, an saiyang espirituwal na mga tugang. Ipinaliwanag ninda: “Si Jehova nagboot sa samo sa mga tataramon na ini, ‘Ninombrahan taka bilang ilaw kan mga nasyon, tanganing ika magin kaligtasan sagkod sa kaporoporohi kan daga.’” (Gibo 13:47) Bago kan saiya mismong kagadanan, naheling ni Pablo na ipinaabot an maogmang bareta nin kaligtasan bako sanang sa mga Judio kundi “sa gabos na linalang sa sirong nin langit.” (Colosas 1:​6, 23) Ngonyan, ipinapadagos kan mga natatada kan linahidan na mga tugang ni Cristo an gibohon na ini. Sinusuportaran kan “dakulang kadaklan” na minilyon na an kabilangan, sinda naglilingkod bilang “liwanag kan mga nasyon” sa labing 230 kadagaan sa bilog na kinaban.​—Kapahayagan 7:9.

13, 14. (a) Anong reaksion sa paghuhulit an napaatubang sa Mesiyas asin sa saiyang mga parasunod? (b) Anong pagkabaliktad nin mga kamugtakan an nangyari?

¹³ Si Jehova nagin nanggad an kosog sa likod kan saiyang Lingkod na Mesiyas, kan linahidan na mga tugang kan Mesiyas, asin kan gabos na kabilang sa dakulang kadaklan na, kaiba ninda, nagpapadagos sa paghuhulit kan maogmang bareta. Totoo, arog ki Jesus, an saiyang mga disipulo napaatubang sa pagmenos asin pagtumang. (Juan 15:20) Alagad sa saiyang itinalaan na panahon, pirmeng pinangyayari ni Jehova na mabaliktad an mga kamugtakan tangani na isalbar asin balosan an saiyang maimbod na mga lingkod. Mapadapit sa Mesiyas, na “hinahamak an kalag” asin “ikinauuyam nin makuri kan mga nasyon,” si Jehova nanunuga: “An mga hade mismo makaheheling asin mabangon nanggad, asin an mga prinsipe, asin sinda maduko, dahelan ki Jehova, na fiel, an Banal kan Israel, na puminili sa saimo.”​—Isaias 49:7.

¹⁴ Sa huri nagsurat si apostol Pablo sa mga Kristiano sa Filipos manongod sa ihinulang pagkabaliktad na ini nin mga kamugtakan. Ilinadawan nia si Jesus bilang saro na sinupog sa sarong hariging pasakitan alagad pagkatapos kaiyan pinamuraway nin Dios. Itinao ni Jehova sa saiyang Lingkod an “superyor na kamugtakan asin may kabootan na itinao sa saiya an ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod.” (Filipos 2:8-11) Pinatanidan an fiel na mga parasunod ni Cristo na sinda man paglalamagon. Alagad kapareho kan Mesiyas, sinisierto sa sainda an marahay na boot ni Jehova.​—Mateo 5:10-12; 24:9-13; Marcos 10:​29, 30.

“An Espesyalmenteng Panahon nin Pag-ako”

15. Anong espesyal na “panahon” an nasambitan sa hula ni Isaias, asin ano an ipinasesentido kaini?

¹⁵ An hula ni Isaias nagpapadagos paagi sa mahalagang marhay na pahayag. Si Jehova nagsasabi sa Mesiyas: “Sa panahon nin marahay na boot sinimbag taka, asin sa aldaw nin kaligtasan tinabangan taka; asin iningatan taka tanganing ikatao taka bilang tipan para sa banwaan.” (Isaias 49:8a) Sarong kaagid na hula an nakasurat sa Salmo 69:13-18. An salmista nagtataram manongod sa “panahon nin marahay na boot,” na ginagamit an pananaram na “panahon nin pag-ako.” An mga tataramon na ini nagpapasentido na an marahay na boot asin proteksion ni Jehova itinatao sa espesyal na paagi alagad durante sana nin sarong espesipiko asin temporaryong peryodo.

16. Ano an panahon nin marahay na boot ni Jehova para sa suanoy na Israel?

¹⁶ Kasuarin an panahon na iyan nin marahay na boot? Sa orihinal na kamugtakan, an mga tataramon kabtang kan sarong hula dapit sa pagbabalik sa dati asin isinabi bago pa an pagbalik kan mga Judio hale sa pagkadistiero. An nasyon nin Israel nakaeksperyensia nin sarong panahon nin marahay na boot kan nahimo nindang “hirahayon an daga” asin sadirihon giraray an saindang “daing tawong minanang mga rogaring.” (Isaias 49:8b) Dai na sinda “nabibilanggo” sa Babilonya. Kan sinda nagbibiahe papuli, sinegurado ni Jehova na sinda dai ‘nagutom’ o ‘napaha,’ ni ‘tinamaan man sinda nin nakapapasong init o saldang.’ An nagkawararak na mga Israelita nagburunyog pabalik sa saindang dagang tinuboan ‘hale sa harayo . . . , hale sa amihanan asin hale sa solnopan.’ (Isaias 49:9-12) Apisar kan enot na dramatikong kaotoban na ini, ipinaheheling kan Biblia na igwa pa nin ekstendidong mga aplikasyon an hulang ini.

17, 18. Anong panahon nin marahay na boot an itinalaga ni Jehova durante kan enot na siglo?

¹⁷ Enot, kan mamundag si Jesus, ibinalangibog kan mga anghel an katoninongan asin marahay na boot, o pabor nin Dios sa mga tawo. (Lucas 2:​13, 14) An marahay na boot na ini iinalok, bakong sa mga tawo sa pankagabsan, kundi sa mga naggigibo sana nin pagtubod ki Jesus. Kan huri binasa ni Jesus sa publiko an hula sa Isaias 61:​1, 2 asin iinaplikar iyan sa saiyang sadiri bilang an parabalangibog kan “taon nin pag-ako ni Jehova.” (Lucas 4:17-21) Si apostol Pablo nagtaram manongod sa pag-ako ni Cristo nin espesyal na proteksion ni Jehova durante kan mga aldaw kan saiyang laman. (Hebreo 5:7-9) Kaya an panahon na ini nin marahay na boot minaaplikar sa pabor nin Dios ki Jesus durante kan saiyang bilog na buhay bilang tawo.

¹⁸ Minsan siring, may dugang pang aplikasyon an hulang ini. Pakatapos kotaron an mga tataramon ni Isaias mapadapit sa panahon nin marahay na boot, si Pablo nagsabi pa: “Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.” (2 Corinto 6:2) Isinurat ni Pablo an mga tataramon na ini 22 na taon pagkagadan ni Jesus. Minalataw na sa pagkamundag kan Kristianong kongregasyon kan Pentecostes nin 33 C.E., pinalawig ni Jehova an saiyang taon nin marahay na boot tanganing ikaiba an linahidan na mga parasunod ni Cristo.

19. Paano makikinabang an mga Kristiano ngonyan sa panahon nin marahay na boot ni Jehova?

¹⁹ Kumusta man an mga parasunod ni Jesus ngonyan na bakong linahidan na mga paramana kan langitnon na kahadean nin Dios? Makikinabang daw sa panahon na ini nin pag-ako an mga may daganon na paglaom? Iyo. Ipinaheheling kan libro sa Biblia na Kapahayagan na ini panahon nin marahay na boot ni Jehova para sa dakulang kadaklan na ‘maluwas sa dakulang kahorasaan’ tanganing magkamit nin buhay sa sarong paraisong daga. (Kapahayagan 7:13-17) Huli kaini, puedeng aprobetsaran kan gabos na Kristiano an limitadong peryodong ini na durante kaiyan iinaalok ni Jehova an saiyang marahay na boot sa bakong sangkap na mga tawo.

20. Paano malilikayan kan mga Kristiano na malipasan an katuyohan kan dai na kutana maninigong kabootan ni Jehova?

²⁰ Nagpatanid nguna si apostol Pablo bago ibinalangibog an panahon nin pag-ako ni Jehova. Nakimaherak sia sa mga Kristiano na “dai . . . akoon an dai na kutana maninigong kabootan nin Dios asin lipasan an katuyohan kaiyan.” (2 Corinto 6:1) Huli kaiyan, inaaprobetsaran kan mga Kristiano an gabos na oportunidad na paogmahon an Dios asin gibohon an saiyang kabotan. (Efeso 5:​15, 16) Para sa saindang ikararahay na sunodon an konseho ni Pablo: “Mag-ingat kamo, mga tugang, ta tibaad tumubo sa siisay man sa saindo an maraot na puso na daing pagtubod paagi sa pagbaya sa nabubuhay na Dios; kundi padagos kamong magpasaradolsadol aroaldaw, sagkod na iyan maaapod pang ‘Ngonyan,’ ta tibaad an siisay man sa saindo mapatagas kan mapandayang kapangyarihan nin kasalan.”​—Hebreo 3:​12, 13.

21. Sa anong magayagayang kapahayagan natatapos an enot na kabtang kan Isaias kapitulo 49?

²¹ Sa katapusan kan makahulang mga pananaram sa pag-oltanan ni Jehova asin kan saiyang Mesiyas, si Isaias nagtaram nin magayagayang kapahayagan: “Magkurahaw kamo sa kaogmahan, kalangitan, asin maggayagaya ka, daga. Magin masinggaya an mga bukid na may maogmang kurahaw. Huli ta rinanga ni Jehova an saiyang banwaan, asin pinahehelingan nin pagkaherak an saiyang mga nagsasakit nin makuri.” (Isaias 49:13) Kanigoan kagayon na mga tataramon nin karangahan para sa mga Israelita kan suanoy asin para sa dakulang Lingkod ni Jehova, si Jesu-Cristo, siring man para sa linahidan na mga lingkod ni Jehova asin sa saindang kaibaibang “ibang karnero” ngonyan!​—Juan 10:16.

Dai Linilingawan ni Jehova an Saiyang Banwaan

22. Paano idinodoon ni Jehova na dai nia noarin man lilingawan an saiyang banwaan?

²² Nagpapadagos ngonyan si Isaias na ibareta an mga kapahayagan ni Jehova. Ihinula nia na an desterradong mga Israelita magkakaigwa nin tendensiang mapagal asin mawaran nin paglaom. Si Isaias nagsasabi: “Padagos na sinasabi kan Sion: ‘Binayaan ako ni Jehova, asin liningawan ako ni Jehova mismo.’” (Isaias 49:14) Totoo daw ini? Inabandonar daw ni Jehova an saiyang banwaan asin liningawan sinda? Bilang representante sa pagtaram ni Jehova, si Isaias nagpapadagos: “Malilingaw daw an agom na babae sa saiyang pinasususo tanganing dai sia maherak sa aki kan saiyang tulak? Minsan makalingaw an mga babaeng ini, pero ako dai malilingaw sa saimo.” (Isaias 49:15) Kanigoan kamamomoton na simbag hale ki Jehova! An pagkamoot nin Dios sa saiyang banwaan nakalalabi kisa pagkamoot nin sarong ina sa saiyang aki. Danay niang iniisip an saiyang mga maimbod. Ginigirumdom nia sinda na garo baga nakaukit sa saiyang mga kamot an saindang ngaran: “Uya! Sa sakong mga palad iinukit taka. An saimong mga lanob danay na nasa atubangan ko.”​—Isaias 49:16.

23. Paano pinarigon ni Pablo an boot kan mga Kristiano na magtiwala na dai sinda lilingawan ni Jehova?

²³ Sa saiyang surat sa mga taga Galacia, sinadol ni apostol Pablo an mga Kristiano: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.” (Galacia 6:9) Isinurat nia sa mga Hebreo an nakaparirigon sa boot na mga tataramon: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Dai kita noarin man maninigong magsaboot na liningawan ni Jehova an saiyang banwaan. Siring kan suanoy na Sion, an mga Kristiano may marahay na dahelan na maggayagaya asin mapasensiang maghalat ki Jehova. Sia marigon na nangangapot sa mga kondisyon asin panuga kan saiyang tipan.

24. Sa anong paagi ibabalik sa dati an Sion, asin ano an mga ihahapot nia?

²⁴ Si Jehova, paagi ki Isaias, nag-alok nin dugang pang karangahan. An mga “minagaba [sa Sion],” magsalang mga Babilonyo o apostatang mga Judio, bako nang peligro. An “mga aki” nin Sion, an desterradong mga Judio na nagdanay na maimbod ki Jehova, “nagdalidali.” Sinda ‘titiponon.’ Sa paghumaring makabalik sa Jerusalem, an mga Judio na pinapuli sa sadiri nindang daga magigin mga samno sa kabiserang siudad ninda, kun paanong an “sarong nobya” nagugubingan nin “mga samno.” (Isaias 49:​17, 18) An lugar nin Sion “laglag.” Imahinara an pagkasorpresa kaini kan bigla ining magkaigwa nin kadakol na nag-iistar kaya garo baga piot na an saiyang erokan. (Basahon an Isaias 49:​19, 20.) Naturalmente, ihahapot nia kun saen hale an gabos na aking ini: “Sasabihon mo nanggad sa saimong puso, ‘Siisay an nagin ama kan mga ini para sa sako, mantang ako babaeng nagadanan nin mga aki asin baog, nadistiero asin dinarang bihag? Kun dapit sa mga ini, siisay an nagpadakula sa sainda? Uya! Ako mismo binayaan na nagsosolo. An mga ini​—saen sinda hale?’” (Isaias 49:21) Kanigoan kaogmang situwasyon para sa dating bawas na Sion!

25. Sa presenteng panahon, anong pagbabalik sa dati an naeksperyensiahan kan espirituwal na Israel?

²⁵ An mga tataramon na ini igwa nin kaotoban sa presenteng panahon. Sa masakit na mga taon kan enot na guerra mundial, an espirituwal na Israel nakaeksperyensia nin sarong peryodo nin kagabaan asin pagkabihag. Alagad sia ibinalik sa dati asin namugtak sa sarong espirituwal na paraiso. (Isaias 35:1-10) Siring sa dati laglag na siudad na ilinadawan ni Isaias, sia naogmang marhay​—sabi ngani​—na sia pano nin magayagaya, aktibong mga parasamba ki Jehova.

“Sarong Senyal Para sa mga Banwaan”

26. Anong paggiya an itinao ni Jehova para sa saiyang pinatalingkas na banwaan?

²⁶ Sa makahulang paagi, dinara ngonyan ni Jehova si Isaias sa panahon na an Saiyang banwaan bubutasan hale sa Babilonya. Sinda daw maako nin ano man na paggiya hale sa Dios? Si Jehova nagsisimbag: “Uya! Iiitaas ko an sakong kamot sa mga nasyon, asin sa mga banwaan patitindogon ko an sakong senyal. Asin dadarahon ninda an saimong mga aking lalaki sa daghan, asin papasanon ninda sa abaga an saimong mga aking babae.” (Isaias 49:22) Sa enot na kaotoban, an Jerusalem, na dating kabisera nin gobyerno asin an namumugtakan kan templo ni Jehova, nagin “senyal” ni Jehova. Mga tawo pa nganing prominente asin makapangyarihan na taga ibang nasyon, siring kan “mga hade” asin “mga prinsesa,” an nagtabang sa mga Israelita sa saindang pagbiahe papuli duman. (Isaias 49:23a) An Persianong mga hade na si Ciro asin Artajerjes Longimano saka an saindang pamilya kabilang sa mga nagtabang na ini. (Esdras 5:13; 7:11-26) Asin an mga tataramon ni Isaias igwa pa nin ibang aplikasyon.

27. (a) Sa mas dakulang kaotoban, sa anong “senyal” maburunyog an mga banwaan? (b) Ano an magigin resulta kun an gabos na nasyon mapiritan nang dumuko sa pamamahala kan Mesiyas?

²⁷ An Isaias 11:10 nagtataram manongod sa “sarong senyal para sa mga banwaan.” Iinaplikar ni apostol Pablo an mga tataramon na ini ki Cristo Jesus. (Roma 15:8-12) Huli kaini, sa mas dakulang kaotoban, si Jesus asin an saiyang kairibang namamahala na linahidan nin espiritu iyo an “senyal” ni Jehova na dian nagbuburunyog an mga banwaan. (Kapahayagan 14:1) Sa itinalaan na panahon an gabos na banwaan sa daga​—dawa an mga grupong namamahala ngonyan​—maduko sa pamamahala kan Mesiyas. (Salmo 2:​10, 11; Daniel 2:44) An resulta? Si Jehova nagsasabi: “Mamimidbid mo na ako si Jehova, na manongod sa sako dai magkakasurupog an mga naglalaom sa sako.”​—Isaias 49:23b.

“Ngonyan an Satong Kaligtasan Orog na Harani”

28. (a) Sa anong mga tataramon sinisierto giraray ni Jehova sa saiyang banwaan na sinda bubutasan? (b) Anong pangako ni Jehova an nagpapadagos na balido mapadapit sa saiyang banwaan?

²⁸ Tibaad isip-isipon kan nagkapira sa mga nadistiero sa Babilonya, ‘Posible daw talaga na butasan an Israel?’ Kinonsiderar iyan ni Jehova paagi sa paghapot: “An mga nakua na puede pa daw na kuanon sa sarong makapangyarihan na lalaki mismo, o makakadulag daw an grupo nin mga bihag kan tirano?” (Isaias 49:24) An simbag iyo. Sinisierto sa sainda ni Jehova: “Dawa an grupo nin mga bihag kan makapangyarihan na lalaki kukuanon, asin an mga nakua na kan tirano mismo makakadulag.” (Isaias 49:25a) Kanigoan kanakararangang kasiertohan! Dugang pa, an marahay na boot ni Jehova sa saiyang banwaan may kaibang marigon na pangako na poprotehiran sinda. Sa seguradong pananaram, sia nagsasabi: “Sa siisay man na nakikipaglaban sa saimo ako mismo an makikilaban, asin sa saimong mga aki ako mismo an magliligtas.” (Isaias 49:25b) Nagpapadagos na balido an pangakong iyan. Siring kan nakarekord sa Zacarias 2:​8, si Jehova nagsasabi sa saiyang banwaan: “An nagtitikwil sa saindo nagtitikwil sa basilig kan sakong mata.” Totoo, nakakamtan niato ngonyan an sarong peryodo nin marahay na boot na durante kaiyan an mga banwaan sa bilog na daga may oportunidad na magburunyog sa espirituwal na Sion. Minsan siring, an peryodong iyan nin marahay na boot matatapos.

29. Anong makatatakot na ngapit an naghahalat sa mga habong kumuyog ki Jehova?

²⁹ Ano an mangyayari sa mga may kasutilan na habong kumuyog ki Jehova asin nanlalamag pa ngani sa mga nagsasamba sa saiya? Sinasabi nia: “Ipakakakan ko sa mga nagmamaltrato sa saimo an sadiri nindang laman; asin siring kan sa mahamis na arak mabuburat sinda sa sadiri nindang dugo.” (Isaias 49:26a) Makatatakot nanggad na ngapit! An siring na sutil na mga kalaban mayo nin panhaloyan na ngapit. Sinda lalaglagon. Sa siring, paagi sa pagligtas sa saiyang banwaan sagkod paagi sa paglaglag sa saindang mga kaiwal, si Jehova mamimidbid bilang sarong Paraligtas. “Maaaraman kan gabos na laman na ako, si Jehova, an saimong Paraligtas asin an saimong Paratubos, an Makapangyarihan ni Jacob.”​—Isaias 49:26b.

30. Anong mga pagliligtas an ginibo ni Jehova sa kapakanan kan saiyang banwaan, asin ano pa an gigibohon nia?

³⁰ An mga tataramon na iyan enot na uminaplikar kan gamiton ni Jehova si Ciro sa pagpatalingkas sa Saiyang banwaan hale sa kaoripnan sa Babilonya. Uminaplikar man iyan kan 1919 kan gamiton ni Jehova an saiyang pinatukaw sa tronong Aki, si Jesu-Cristo, sa pagpatalingkas sa Saiyang banwaan sa espirituwal na pagkaoripon. Huli kaini, an Biblia nagtataram manongod ki Jehova sagkod ki Jesus bilang mga paraligtas. (Tito 2:11-13; 3:4-6) Si Jehova an satong Paraligtas, asin si Jesus, an Mesiyas, an saiyang “Pangenot na Ahente.” (Gibo 5:31) Tunay nanggad, makangangalas an mga pagliligtas nin Dios paagi ki Jesu-Cristo. Paagi sa maogmang bareta, pinatatalingkas ni Jehova an mga tama an kamugtakan nin puso hale sa kaoripnan sa falsong relihion. Paagi sa atang na pantubos, iliniligtas nia sinda sa kaoripnan sa kasalan asin kagadanan. Kan 1919 ilinigtas nia an mga tugang ni Jesus sa espirituwal na kaoripnan. Asin sa marikas an pagdangadang na guerra nin Armagedon, ililigtas nia an sarong dakulang kadaklan nin fiel na mga tawo sa kalaglagan na maabot sa mga parakasala.

31. Ano an maninigong magin reaksion kan mga Kristiano sa pag-ako kan marahay na boot nin Dios?

³¹ Kun siring, kanigoan na pribilehio an mag-ako kan marahay na boot nin Dios! Gamiton logod niato gabos sa madonong na paagi an panahon na ini nin pag-ako. Asin kita logod humiro kaoyon sa pagkaapurado kan satong mga panahon, na hinihimate an mga tataramon ni Pablo sa mga taga Roma: “Kamo nakakaaram kan panahon, na oras na para sa saindo na magmata sa pagkatorog, huli ta ngonyan an satong kaligtasan orog na harani kisa kan kita magturubod. An banggi makakaagi na; an aldaw naghaharani na. Kun siring isikwal na niato an mga gibo kan kadikloman asin isolog na niato an mga pangalasag kan kaliwanagan. Maglakaw kita nin maninigo na siring baga kun aldaw, bakong sa mariribok na pag-ogma asin pagburat, bakong sa bawal na pagdodorog asin malaswang gawe, bakong sa pag-iriwal asin pangimon. Kundi isolog nindo an Kagurangnan na si Jesu-Cristo, asin dai kamo magparaplano nin patienot para sa mga mawot kan laman.”​—Roma 13:11-14.

32. Sa anong mga bagay makasisierto an banwaan nin Dios?

³² Padagos na tatawan ni Jehova nin pabor an mga naghihimate sa saiyang konseho. Tatawan nia sinda kan kosog asin kakayahan na kinakaipuhan tanganing magibo an paghuhulit kan maogmang bareta. (2 Corinto 4:7) Gagamiton ni Jehova an saiyang mga lingkod siring kan paggamit nia sa saindang Poon, si Jesus. Gigibohon nia na magin “siring sa matarom na espada” an saindang ngoso tangani na ikapaabot ninda sa puso kan mga mahoyo an mensahe kan maogmang bareta. (Mateo 28:​19, 20) Poprotehiran nia an saiyang banwaan “sa limpoy kan saiyang kamot.” Siring sa sarong “makinis na pana,” sinda itatago “sa saiyang suksukan nin pana.” Tunay nanggad, dai babayaan ni Jehova an saiyang banwaan!​—Salmo 94:14; Isaias 49:​2, 15.

[Nota sa Ibaba]