Nagigirumdoman daw Nindo?

Saindo daw na maingat na hinorophorop an dai pa sana nahahaloy na mga luwas kan An Torrengbantayan? Kun iyo, magigin interesante para sa saindo na girumdomon an mga minasunod:

◻ Paano sinusunod nin dakol na mag-agom ngonyan an marahayon na halimbawa na iwinalat ni Aquila asin Priscila?

Si Aquila asin Priscila naglingkod sa nagkapirang laen-laen na kongregasyon. Arog ninda, dakol na Kristiano sa modernong panahon an nagboluntaryong bumalyo sa lugar na mas dakula an pangangaipo. Naeksperyensiahan man ninda an kagayagayahan asin satispaksion gikan sa pakaheling na nag-ooswag an intereses kan Kahadean asin sa pakapatalubo nin mahalagang marhay na Kristianong mga pagkakatood.​—12/15, pahina 24.

◻ Ano an pagmansay kan Biblia sa mga inomon na de alkohol?

Timbang an pagmansay kan Biblia sa mga inomon na de alkohol. Sa sarong kampi, an Biblia nagsasabi na an arak regalo hale sa Dios. (Salmo 104:​1, 15) Sa ibong na kampi, kinokondenar kaiyan an pagpangana. (Lucas 21:​34; 1 Timoteo 3:​8; Tito 2:3; 1 Pedro 4:​3)​—12/15, pahina 26, 27.

◻ Ano an makahulogan na kabtang kan libro nin Biblia na Haggeo?

Maski ngani an libro nin Haggeo kompuesto nin 38 sanang bersikulo, an ngaran nin Dios ginamit nin 35 beses. An hulang iyan garo daing kabuhaybuhay kun an ngaran na Jehova sinasalidahan kan titulong “Kagurangnan.”​—1/1, pahina 6.

◻ Anong leksion an manonodan niato sa mga kasalan ni David asin Manases?

Apisar kan pagpatawad ni Jehova ki David asin Manases, kaipuhan na mamatean kan mga lalaking ini​—asin kan Israel sa kaibanan ninda—​an mga epekto kan saindang makasalan na mga gibo. (2 Samuel 12:​11, 12; Jeremias 15:​3-5) Sa kaagid na paagi, minsan ngani pinatatawad ngonyan ni Jehova an mga nagkasala na nagsosolsol, tibaad may mga epekto kan saindang gawe na dai malilikayan.​—1/1, pahina 27.

◻ Sa anong paagi na ‘an mga bitis kan mga nagpapahayag kan maogmang bareta’ kan Kahadean nin Dios ‘magayon’? (Isaias 52:7)

Mga bitis an ordinaryo nang nagdadara sa sarong tawo mantang sia naghuhulit sa iba. An mga bitis na iyan tunay na nagrerepresentar sa tawo. Kaya para sa dakol na nagdadangog asin naghihimate sa maogmang bareta kan Kahadean, an siring na mga bitis nin mga mensahero tunay nanggad na magayon paghelingon.​—1/15, pahina 13.

◻ Ano an may duwang kabtang na gibohon na kalabot sa ‘paghulit kan maogmang bareta’? (1 Corinto 9:16)

Enot, kaipuhan niatong ibalangibog an maogmang bareta kan Kahadean. An ikaduwang aspekto kan gibohon na ini may labot sa pagtotokdo sa mga naghihimate sa pagbalangibog kan Kahadean.​—1/15, pahina 23.

◻ Anong personal na mga pakinabang an ibinubunga nin pag-awit nin pan-Kahadean na mga awit sa mga pagtiripon kan kongregasyon?

An pag-awit nagtatao sa sato kan oportunidad na ipahayag an satong mga saboot para sa satong Kaglalang. (Salmo 149:​1, 3) Kun isinasapuso niatong gayo an pag-awit kan kongregasyon, puedeng andamon kaiyan an satong isip asin puso para sa masunod na programa. Puede kitang pahiroon kaiyan na orog pang makikabtang sa pagsamba ki Jehova.​—2/1, pahina 28.

◻ Noarin masasabi na an aldaw nin pagkagadan mas marahay kisa sa aldaw nin pagkamundag? (Eclesiastes 7:1)

An aldaw nin pagkagadan puedeng magin mas marahay kisa sa aldaw nin pagkamundag kun sa panahon na iyan an saro nakagibo na nin marahay na ngaran ki Jehova, na kayang bumuhay liwat sa mga fiel na nagadan. (Juan 11:25)​—2/15, pahina 12.

◻ Taano ta matatabangan kita mismo kan librong Eclesiastes?

Iyan makatatabang sa lambang saro sa sato na itanos an satong punto de vista sa buhay asin sa kun ano an ginigibo niatong sentro kan satong atension. (Eclesiastes 7:​2; 2 Timoteo 3:​16, 17)​—2/15, pahina 16.

◻ Mga pundamentalista daw an Mga Saksi ni Jehova?

Dai. Minsan ngani makosog an saindang relihiosong mga kombiksion, bako sindang pundamentalista sa sentido kan pagkagamit ngonyan sa termino. Dai sinda naggagamit nin mga demonstrasyon asin kadahasan tumang sa mga dai ninda inooyonan. Inaarog ninda an Namomoon sa sainda, si Jesu-Cristo.​—3/1, pahina 6.

◻ An dai pakaaram kan eksaktong oras kan pagdatong ni Jesus tanganing gibohon an pamamalos nin Dios igwa nin anong epekto sa mga Kristiano?

Pinapagdadanay kaini an mga Kristiano na mapagmato asin ini nagtatao sa sainda nin oportunidad sa aroaldaw na patunayan na sinda naglilingkod ki Jehova na may mga motibong bakong paslo.​—3/1, pahina 13.

◻ Ano an maninigo niatong konsideraron bago gumibo nin legal na aksion tumang sa sarong tugang na tibaad nandaya sa sato?

Maninigo niatong konsideraron an posibleng mga epekto sa sato, sa ibang kalabot, sa kongregasyon, asin sa mga tagaluwas. (1 Corinto 6:7)​—3/15, pahina 22.

◻ Paano makakamtan an tunay na kaogmahan?

An tunay na kaogmahan sarong kamugtakan kan puso, na basado sa tunay na pagtubod asin marahay na relasyon ki Jehova. (Mateo 5:3)​—3/15, pahina 23.

◻ Ano an maninigong gibohon nin sarong Kristiano kun apodon para sa katongdan sa hurado?

An lambang Kristiano na napapaatubang sa katongdan sa hurado dapat na aramon kun ano an igagawe, basado sa saiyang pakasabot sa Biblia asin sa saiyang konsensia. (Galacia 6:5)​—4/1, pahina 29.