Hula ni Isaias—Liwanag Para sa Bilog na Katawohan II

Kapitulo Desisais: Sarong Mensahe nin Paglaom Para sa mga Bihag na Pinanluluyahan nin Boot

Isaias 55:1-13

 1. Iladawan an situwasyon kan mga desterradong Judio sa Babilonya.

MAMONDONG panahon kaidto sa kasaysayan nin Juda. An katipan na banwaan nin Dios puersahan na kinua sa saindang dagang tinuboan asin ngonyan nagdudusa sa pagkabihag sa Babilonya. Totoo, tinawan sinda nin sarong sokol nin katalingkasan tanganing ipadagos an saindang pangaroaldaw na gibo-gibo. (Jeremias 29:4-7) An nagkapira nagkaigwa nin propesyonal na mga abilidad o nagnegosyo.a (Nehemias 3:​8, 31, 32) Minsan siring, dai nagin pasil an buhay para sa mga bihag na Judio. Sinda nasa kaoripnan, sa pisikal sagkod sa espiri­tuwal. Helingon niato kun paano.

2, 3. Paano naapektaran kan pagkadistiero an pagsamba ki Jehova kan mga Judio?

² Kan laglagon kan mga hukbo nin Babilonya an Jerusalem kan 607 B.C.E., bako sanang dinestroso ninda nin grabe an sarong nasyon; nagdara man sinda nin kalamidad sa tunay na pagsamba. Hinalean ninda nin laog an templo ni Jehova asin linaglag iyan, na rinaot an areglo nin pagkasaserdote paagi sa pagbihag sa nagkapira na kabilang sa tribo ni Levi asin paggadan sa iba pa. Mantang mayo na nin harong nin pagsamba, mayo na nin altar, asin mayo na nin organisadong kabilogan na grupo nin mga saserdote, imposible na para sa mga Judio na magdolot nin mga atang sa tunay na Dios segun sa ipinagboot kan Ley.

³ Puede pa man giraray na papagdanayon kan fiel na mga Judio an saindang relihiosong midbidan paagi sa pagpaturi asin pagsunod sa Ley sagkod sa mapupuede. Halimbawa, puede nindang likayan an ipinagbabawal na mga kakanon asin otobon an Sabbath. Alagad sa paggibo kaiyan, puede sindang olog-ologon kan mga nambihag sa sainda, huli ta ibinibilang kan mga Babilonyo na katontohan an relihiosong mga rituwal kan mga Judio. An panluluya nin boot kan mga desterrado maheheling sa mga tataramon kan salmista: “Sa pangpang kan mga salog nin Babilonya​​—duman kami nagturukaw. Nagtarangis man kami kun nagigirumdoman mi an Sion. Sa mga kahoy na alamo na nasa tahaw nia isinabit mi an samuyang mga arpa. Huli ta duman si mga nagbirihag sa samo naghagad sa samo nin awit, asin si mga nagtutuyatuya sa samo​​—nin paggayagaya: ‘Awita nindo para sa samo an saro sa mga awit nin Sion.’ ”​—Salmo 137:1-3.

 4. Taano ta magigin daing kamanungdanan para sa mga Judio na umasa sa ibang mga nasyon para sa kaligtasan, alagad kiisay sinda puedeng dumolok para sa tabang?

⁴ Kun siring, kiisay makadodolok para sa karangahan an mga bihag na Judio? Saen magikan an saindang kaligtasan? Bako nanggad sa arin man sa nakapalibot na mga nasyon! Gabos iyan daing kosog tumang sa mga hukbo nin Babilonya, asin an dakol antipatiko sa mga Judio. Alagad an situwasyon bakong dai nang paglaom. Si Jehova, na rinebeldehan ninda kaidtong sinda sarong talingkas na banwaan pa, maugayon na nagpaabot sa sainda nin nakapakokosog sa boot na pangagda, minsan ngani sinda desterrado pa.

“Dolok Kamo sa Tubig”

 5. Ano an kahulogan kan mga tataramon na “dolok kamo sa tubig”?

⁵ Paagi ki Isaias, si Jehova makahulang nagtataram sa mga bihag na Judio sa Babilonya: “Hoy, kamo gabos na napapaha! Dolok kamo sa tubig. Asin an mga mayong pirak! Madia kamo, bakal asin kakan. Iyo, madia kamo, bakal kamo nin arak asin gatas minsan mayo nin pirak asin mayo nin bayad.” (Isaias 55:1) An mga tataramon na ini mayaman sa simbolismo. Halimbawa, estudyare an pangagdang: “Dolok kamo sa tubig.” Kun mayo nin tubig, imposibleng mabuhay. Kun mayo an mahalagang marhay na likidong iyan, kitang mga tawo puedeng mabuhay sa laog sana nin mga sarong semana. Huli kaini, angay sana na ginamit ni Jehova an tubig bilang sarong metapora kan magigin epekto kan saiyang mga tataramon sa mga bihag na Judio. An saiyang mensahe makaparerepresko sa sainda, siring sa sarong malipot na inomon sa mainit na aldaw. Tataposon kaiyan an saindang kawaran nin paglaom, na hinahale an saindang pagkapaha sa katotoohan asin katanosan. Asin papanoon sinda kaiyan nin paglaom nin katalingkasan sa pagkabihag. Pero, tanganing makinabang, an mga desterradong Judio kaipuhan na uminom kan mensahe nin Dios, magtaong atension dian, asin kuyogon iyan.

 6. Paano makikinabang an mga Judio kun sinda bumakal nin “arak asin gatas”?

⁶ Si Jehova nag-aalok man nin “arak asin gatas.” Pinakokosog kan gatas an lumbod pang mga hawak asin nagtatabang sa pagtalubo kan mga aki. Kaagid kaiyan, an mga tataramon ni Jehova mapakosog sa saiyang banwaan sa espirituwal asin mapangyari sa sainda na pasarigon an saindang relasyon sa saiya. Pero, kumusta man an arak? An arak parateng ginagamit sa magayagayang mga okasyon. Sa Biblia, iyan konektado sa prosperidad asin paggayagaya. (Salmo 104:15) Sa pagsabi sa saiyang banwaan na “bakal kamo nin arak,” inaasegurar sinda ni Jehova na an bilog na pusong pagbalik sa tunay na pagsamba gigibohon sindang magin “daing iba kundi magayagaya.”​—Deuteronomio 16:15; Salmo 19:8; Talinhaga 10:22.

 7. Taano ta pambihira an pagkaludok ni Jehova sa mga desterrado, asin ano an itinotokdo kaiyan sa sato manongod sa saiya?

⁷ Kanigoan kamaheherakon ni Jehova na mag-alok nin siring na espirituwal na karepreskohan sa desterradong mga Judio! An saiyang pagkaludok lalo na nganing pambihira kun gigirumdomon niato an kasaysayan kan pagigin sumbikalan asin pagrebelde kan mga Judio. Bakong dahel ta sinda maninigo sa pag-oyon ni Jehova. Minsan siring, si salmista David nagsurat dakol na siglo bago kaini: “Si Jehova maheherakon asin maugayon, maluway sa pagkaanggot asin abunda sa mamomoton na kabootan. Dai sia magpaparahanap nin sala sagkod lamang, ni na sia magdadanay na naghihinanakit sagkod sa panahon na daing talaan.” (Salmo 103:​8, 9) Imbes na putolon na an saiyang relasyon sa saiyang banwaan, si Jehova pa an naggibo nin enot na lakdang tanganing makipag-ulian. Tunay nanggad, sia Dios na “may dakulang kaogmahan sa mamomoton na kabootan.”​—Miqueas 7:18.

Napasalang Pagtitiwala

 8. Saen nagtiwala an dakol na Judio, sa ibong kan anong patanid?

⁸ Sagkod ngonyan dakol na Judio an dai pa man giraray lubos na nagtitiwala ki Jehova para sa kaligtasan. Halimbawa, bago buminagsak an Jerusalem, an mga namamahala digdi nag-asa sa makapangyarihan na mga nasyon para sa suporta, na nagpapatotot sinda, sabi ngani, sa Egipto sagkod sa Babilonya. (Ezequiel 16:26-29; 23:14) May marahay na dahelan, pinatanidan sinda ni Jeremias: “Sinumpa an pusog na lalaking nananarig sa daganon na tawo asin ginigibo an laman na mani saiyang takyag, asin na an saiyang puso minarayo ki Jehova mismo.” (Jeremias 17:5) Pero, iyan mismo an ginibo kan banwaan nin Dios!

 9. Paano puedeng an dakol na Judio ‘nagpaparabayad nin kuarta sa bako man na tinapay’?

⁹ Ngonyan oripon sinda kan saro sa mga nasyon na pinagtiwalaan ninda. Nagkaleksion daw sinda? Puedeng an dakol dai, huli ta si Jehova naghahapot: “Taano ta nagpaparabayad kamo nin kuarta sa bako man na tinapay, asin taano an saindong kapagalan ta para sa dai man nakakabasog?” (Isaias 55:2a) Kun an mga bihag na Judio nagtitiwala sa kiisay man apuera ki Jehova, sinda ‘nagpaparabayad nin kuarta sa bako man na tinapay.’ Siertong dai sinda bubutasan kan Babilonya huli sa palakaw kaiyan na nungkang pagpapuli sa mga bihag. An totoo, daing ikatatao sa desterradong mga Judio an Babilonya, pati na an imperyalismo, komersialismo, asin falsong pagsamba kaiyan.

10. (a) Paano babalosan ni Jehova an desterradong mga Judio kun sinda mahinanyog sa saiya? (b) Ano an ipinakipagtipan ni Jehova ki David?

¹⁰ Nakikimaherak si Jehova sa saiyang banwaan: “Maghinanyog kamo nin odok sa sako, asin magkakan nin marahay, asin pabayaan an saindong kalag na makakua nin dakulang kaogmahan sa taba mismo. Kilingan an saindong talinga asin dolok kamo sa sako. Paghinanyog kamo, asin an saindong kalag magdadanay na buhay, asin magibo ako sa saindo banwaan nin daing sagkod na tipan mapadapit sa mga mamomoton na kabootan ki David na fiel.” (Isaias 55:2b, 3) An solamenteng paglaom kan may espirituwal na malnutrisyon na banwaan na ini nakadepende ki Jehova, na makahulang nagtataram sa sainda ngonyan paagi ki Isaias. An sainda mismong buhay nakadepende sa paghinanyog sa mensahe nin Dios, huli ta sinabi nia na paagi sa paggibo ninda kaiyan, an saindang “kalag magdadanay na buhay.” Pero, ano an “daing sagkod na tipan” na ipakikipagtipan ni Jehova sa mga naghihimate sa saiya? An tipan na iyan “mapadapit sa mga mamomoton na kabootan ki David.” Dakol na siglo bago kaini, nanuga si Jehova ki David na an saiyang trono magigin “masarig sagkod sa panahon na daing talaan.” (2 Samuel 7:16) Huli kaini, an “daing sagkod na tipan” na nasambitan digdi nanonongod sa pamamahala.

Sarong Permanenteng Paramana sa Sarong Daing Katapusan na Kahadean

11. Taano ta para sa mga desterrado sa Babilonya tibaad garo baga harayong mangyari an kaotoban kan panuga nin Dios ki David?

¹¹ Totoo, an ideya nin pamamahala sa linya ni David tibaad garo baga harayong mangyari para sa mga desterradong Judio na idto. Nawara ninda an saindang daga asin an saindang pagigin nasyon pa ngani! Alagad iyan temporaryo sana. Dai liningawan ni Jehova an saiyang pakipagtipan ki David. Gurano man iyan garo baga kaharayong mangyari sa punto de vista nin tawo, an katuyohan nin Dios may labot sa daing katapusan na Kahadean sa linya ni David talagang magigin mapanggana. Alagad paano asin noarin? Kan 537 B.C.E., binutasan ni Jehova an saiyang banwaan sa pagkabihag sa Babilonya asin ibinalik sinda sa saindang dagang tinuboan. Nagresulta daw ini sa pagkaestablisar nin sarong daing katapusan na kahadean? Dai, sinda padagos na nagin sakop nin saro pang paganong imperyo, an Medo-Persia. Dai pa tapos “an itinalaan na mga panahon” tanganing mamahala an mga nasyon. (Lucas 21:24) Mantang mayo pa nin hade sa Israel, an panuga ni Jehova ki David magdadanay na dai pa maootob sa maabot na mga siglo.

12. Anong lakdang an ginibo ni Jehova sa pag-otob kan saiyang ginibong tipan sa Kahadean ki David?

¹² Labing 500 na taon pakalihis na butasan an Israel sa pagkabihag sa Babilonya, naggibo si Jehova nin dakulang lakdang tanganing otobon an tipan sa Kahadean kan ibalyo nia an buhay kan saiyang panganay na Aki, an kapinonan kan saiyang paglalang, hale sa langitnon na kamurawayan pasiring sa matris kan birhen na Judiang si Maria. (Colosas 1:15-17) Kan inaanunsiar an pangyayaring iyan, sinabihan kan anghel ni Jehova si Maria: “An sarong ini magigin dakula asin aapodon na Aki kan Kaharohalangkawe; asin itatao sa saiya ni Jehova Dios an trono ni David na saiyang ama, asin sia mamamahala bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.” (Lucas 1:​32, 33) Kaya si Jesus namundag sa makahadeng linya ni David asin nagmana kan deretso sa pagkahade. Pagpinatukaw na sa trono, si Jesus mamamahala “sagkod sa panahon na daing talaan.” (Isaias 9:7; Daniel 7:14) Sa siring bukas na ngonyan an dalan para sa kaotoban kan ginatos na taon nang panuga ni Jehova na tawan si Hadeng David nin permanenteng paramana.

“Komandante sa mga Nasyon”

13. Paanong si Jesus sarong “saksi sa mga nasyon” durante kan saiyang ministeryo sagkod pakatapos na sia sumakat?

¹³ Ano an gigibohon kan magigin hade na ini? Si Jehova nagsasabi: “Uya! Bilang saksi sa mga nasyon sia itinao ko, bilang poon asin komandante sa mga nasyon.” (Isaias 55:4) Kan dumakula si Jesus, sia an representante ni Jehova digdi sa daga, an saksi nin Dios sa mga nasyon. Sa bilog na buhay nia bilang tawo, an saiyang ministeryo nakasentro sa “lagalag na mga karnero kan harong ni Israel.” Minsan siring, sa laog nin halipot na panahon bago sia nagsakat sa langit, sinabihan ni Jesus an saiyang mga parasunod: “Kun siring paduman kamo asin gumibo kamo nin mga disipulo sa mga tawo kan gabos na nasyon . . . Uya! ako danay na nasa saindo sagkod sa pagtatapos kan sistema nin mga bagay.” (Mateo 10:​5, 6; 15:24; 28:​19, 20) Sa siring, pag-abot nin panahon, an mensahe kan Kahadean ipinaabot sa mga bakong Judio, asin an nagkapira sa sainda nagkaigwa nin kabtang sa kaotoban kan tipan na ginibo ki David. (Gibo 13:46) Sa paaging ini, dawa pagkatapos na sia magadan, buhayon liwat, asin sumakat sa langit, si Jesus padagos na nagin “saksi [ni Jehova] sa mga nasyon.”

14, 15. (a) Paano pinatunayan ni Jesus na sia sarong “poon asin komandante”? (b) May anong esperansa an mga parasunod ni Jesus kan enot na siglo?

¹⁴ Si Jesus magigin saro man na “poon asin komandante.” Kaoyon kan makahulang paglaladawan na ini, kan uya digdi sa daga lubos na inako ni Jesus an mga paninimbagan kan saiyang pagkapayo asin nangenot sa gabos na paagi, na nakaakit sa darakulang kadaklan, na tinotokdoan sinda kan mga tataramon nin katotoohan, asin ipinaaaram an mga pakinabang na makakamtan kan mga nagsusunod sa saiyang pamomoon. (Mateo 4:24; 7:​28, 29; 11:5) Epektibo niang sinanay an saiyang mga disipulo, na inaandam sinda na gibohon an kampanya nin paghuhulit sa maabot. (Lucas 10:1-12; Gibo 1:8; Colosas 1:23) Sa laog sana nin tolo may kabangang taon, ikinabugtak ni Jesus an pundasyon para sa nagkakasararo, internasyonal na kongregasyon na may rinibong miembro na hale sa dakol na rasa! Solamente sarong tunay na “poon asin komandante” sana an makagigibo nin siring na dakulaon na gibohon.b

¹⁵ An mga tinipon sa Kristianong kongregasyon kan enot na siglo mga linahidan nin banal na espiritu nin Dios, asin sinda may esperansang magin kaibang namamahala ni Jesus sa saiyang langitnon na Kahadean. (Kapahayagan 14:1) Minsan siring, an hula ni Isaias lampas pa sa kaaldawan kan enot na Kristianismo. Ipinaheheling kan mga ebidensia na nagpoon na mamahala si Jesu-Cristo bilang Hade sa Kahadean nin Dios kaidto sanang 1914. Dai nahaloy pagkatapos kaiyan, an situwasyon sa tahaw kan linahidan na mga Kristiano sa daga nagkaigwa nin dakol na pagkakapareho sa situwasyon kan desterradong mga Judio kan ikaanom na siglo B.C.E. Sa katunayan, an nangyari sa mga Kristianong idto iyo an mas dakulang kaotoban kan hula ni Isaias.

Pagkabihag Asin Pagkabutas sa Presenteng Panahon

16. Anong kapurisawan an nagin kasunod kan pagtukaw sa trono ni Jesus kan 1914?

¹⁶ An pagtukaw ni Jesus sa trono bilang Hade kan 1914 tinandaan nin daing kaagid na kapurisawan sa kinaban. Taano? Huli ta kan magin Hade, pinalayas ni Jesus si Satanas asin an iba pang maraot na espiritung linalang hale sa langit. Kan malaom sa daga, pinonan ni Satanas na makiguerra tumang sa natatadang mga banal, an natatada kan linahidan na mga Kristiano. (Kapahayagan 12:7-12, 17) Nagdatong an kulminasyon kan 1918 kan haros uminontok an paghuhulit sa publiko asin mabilanggo an responsableng mga opisyal kan Watch Tower Society huli sa falsong mga sahot na sedisyon. Sa paaging ini, an mga lingkod ni Jehova sa presenteng panahon nabihag sa espirituwal, na nagpapagirumdom kan pisikal na pagkabihag kan suanoy na mga Judio. Namugtak sinda sa grabeng katuyawan.

17. Paano nabaliktad an kamugtakan kan mga linahidan kan 1919, asin paano sinda pinasarig?

¹⁷ Minsan siring, dai naghaloy an pagkabihag kan linahidan na mga lingkod nin Dios. Kan Marso 26, 1919, binutasan an nabibilanggong mga opisyal, asin kan huri hinale na an gabos na sahot tumang sa sainda. Ibinubo ni Jehova an banal na espiritu sa saiyang pinatalingkas na banwaan, na pinakokosog sinda para sa gibohon na naghahalat sa sainda. May kagayagayahan, naghimate sinda sa pangagdang “kumua kan tubig nin buhay na daing bayad.” (Kapahayagan 22:17) Nagbakal sinda nin “arak asin gatas minsan mayo nin pirak asin mayo nin bayad” asin pinasarig sa espirituwal para sa makangangalas na paghiwas na mangyayari, bagay na dai naheling antes pa kan linahidan na natatada.

Nagdadaralagan an Sarong Dakulang Kadaklan Pasiring sa Linahidan nin Dios

18. Anong duwang grupo an manonompongan sa tahaw kan mga disipulo ni Jesu-Cristo, asin sa ano sinda minakompuesto ngonyan?

¹⁸ An mga disipulo ni Jesus igwa nin saro sa duwang paglaom. Enot, tinipon an sarong “sadangoton na aripompon” na 144,000 an kabilangan​—mga linahidan na Kristiano na hale pareho sa mga Judio asin Hentil na iyo an “Israel nin Dios” asin may paglaom na mamahala kaiba ni Jesus sa saiyang langitnon na Kahadean. (Lucas 12:32; Galacia 6:16; Kapahayagan 14:1) Ikaduwa, sa huring mga aldaw, naglataw an “sarong dakulang kadaklan” nin “ibang karnero.” An mga ini may paglaom na mabuhay sagkod lamang sa paraisong daga. Bago an biglang pag-abot kan dakulang kahorasaan, an kaburunyogan na ini​—na an kabilangan dai patienot na itinalaga​—naglilingkod kaiba kan sadit na aripompon, asin an duwang grupo minakompuesto sa “sarong aripompon” na sakop nin “sarong pastor.”​—Kapahayagan 7:​9, 10; Juan 10:16.

19. Paanong an “sarong nasyon” na dating dai midbid kan Israel nin Dios naghimate sa pangapodan kan espirituwal na nasyon na iyan?

¹⁹ An pagtipon sa dakulang kadaklan na ini mamamansayan sa minasunod na mga tataramon sa hula ni Isaias: “Uya! An sarong nasyon na dai mo midbid aapodon mo, asin an mga hale sa nasyon na dai nakamidbid sa saimo madaralagan sa saimo, para ki Jehova na saimong Dios, asin para sa Banal kan Israel, huli ta ika pinagayon nia.” (Isaias 55:5) Kan mga taon na kasunod kan saindang pagkabutas sa espirituwal na pagkabihag, sa primero dai nasabotan kan linahidan na natatada na bago an Armagedon, sinda gagamiton sa pag-apod sa sarong dakulang “nasyon” para sa pagsamba ki Jehova. Minsan siring, sa paglihis nin panahon, dakol na sadiosan an puso na mayo nin langitnon na paglaom an nagpoon na makiasosyar sa mga linahidan asin maglingkod ki Jehova na may kaigotan na kapareho kan sa linahidan. Naobserbaran kan mga bagohan na ini an pinagayon na kamugtakan kan banwaan nin Dios, na rinerekonoser na si Jehova nasa sainda. (Zacarias 8:23) Kan mga taon nin 1930, nasabotan kan mga linahidan an tunay na midbidan kan grupong ini, na nagdadakol an kabilangan sa tahaw ninda. Namansayan ninda na may gigibohon pang dakulang pagtitipon. An dakulang kadaklan naghuhumaring makiasosyar sa katipan na banwaan nin Dios, asin may marahay na dahelan sinda.

20. (a) Sa satong kaaldawan, taano ta kaipuhan an apuradong ‘paghanap ki Jehova,’ asin paano ini ginigibo? (b) Ano an magigin reaksion ni Jehova sa mga naghahanap sa saiya?

²⁰ Kan kaaldawan ni Isaias, an pangapodan: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa.” (Isaias 55:6) Sa satong kaaldawan, angay an mga tataramon na ini, para sa mga minakompuesto kan Israel nin Dios sagkod sa nagdadakol na dakulang kadaklan. An bendisyon ni Jehova bakong daing kondisyon, ni an saiyang pangagda itatao sagkod sa daing talaan na panahon. Ngonyan na an panahon na hanapon an pag-oyon nin Dios. Kun dumatong na an itinalaan na panahon nin paghokom ni Jehova, magigin huri nang marhay. Huli kaini, si Isaias nagsasabi: “An maraot na tawo bayaan na an saiyang dalan, asin an maliwag na tawo an saiyang mga kaisipan; asin bumalik sia ki Jehova, na maheherak sa saiya, asin sa satong Dios, huli ta sia bulaos na magpapatawad.”​—Isaias 55:7.

21. Paano an nasyon nin Israel dai nagin fiel sa ipinahayag kan saindang mga apoon?

²¹ An fraseng “bumalik sia ki Jehova” nagpaparisa na an mga nangangaipong magbakle nagkaigwa na kaidto nin relasyon sa Dios. An pananaram na iyan nagpapagirumdom sa sato na an dakol na aspekto kan kabtang na ini kan hula ni Isaias enot na uminaplikar sa mga bihag na Judio sa Babilonya. Dakol na siglo bago kaini, ipinahayag kan mga apoon kan mga bihag na ini an saindang determinasyon na magin makinuyog ki Jehova kan sabihon ninda: “Mayo man lamang sa samong paghonahona na bayaan si Jehova tanganing maglingkod sa ibang mga dios.” (Josue 24:16) Ipinaheheling kan kasaysayan na an ‘dai pinaghonahona’ talagang nangyari​—nin paorootro! An kadaihan nin pagtubod kan banwaan nin Dios an dahelan kun taano ta desterrado sinda sa Babilonya.

22. Taano ta sinabi ni Jehova na an saiyang mga kaisipan asin dalan mas halangkaw kisa kan sa mga tawo?

²² Ano an mangyayari kun sinda magsolsol? Paagi ki Isaias, si Jehova nanunuga na sia “bulaos na magpapatawad.” Asin sinabi pa nia: “ ‘Huling an saindong mga kaisipan bakong an sakong mga kaisipan, minsan an sakong dalan bakong an saindong dalan,’ sabi ni ­Jehova. ‘Huling kun paanong an kalangitan mas halangkaw sa daga, siring man an sakong mga dalan mas halangkaw sa saindong mga dalan, asin an sakong mga kaisipan kisa saindong mga kaisipan.’ ” (Isaias 55:​8, 9) Si Jehova sangkap, asin an saiyang kaisipan asin mga dalan dai maaabot sa kahalangkawan. Dawa an saiyang pagkaherak dakulaon kaya kitang mga tawo dai noarin man makalalaom na kamtan iyan. Pensara ini: Kun kita nagpapatawad sa satong kapwa, iyan sarong kaso nin sarong makasalan na nagpapatawad sa sarong makasalan. Aram niato na maabot an panahon, kita na man an mangangaipong patawadon kan satong kapwa. (Mateo 6:12) Alagad si Jehova, minsan ngani sia dai noarin man nangangaipong patawadon, nagpapatawad nin “bulaos”! Totoo nanggad, sia Dios nin dakulang mamomoton na kabootan. Asin sa saiyang pagkaherak, binubukasan ni Jehova an mga gaha kan kalangitan, na nagpapaoran nin mga bendisyon sa mga minabalik sa saiya nin bilog na puso ninda.​—Malaquias 3:10.

Mga Bendisyon sa mga Minabalik ki Jehova

23. Paano ilinaladawan ni Jehova an kasiertohan kan kaotoban kan saiyang tataramon?

²³ Si Jehova nanunuga sa saiyang banwaan: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.” (Isaias 55:​10, 11) An gabos na sabihon ni Jehova siertong maootob. Kun paanong an oran asin niebe na nahoholog hale sa kalangitan hinahaman an katuyohan kaini na sagomon an daga asin papagbungahon iyan, biyo man na masasarigan an tataramon ni Jehova na minaluwas sa saiyang ngoso. Kun ano an ipinanuga nia, ootobon nia​—na may absolutong kasiertohan.​—Bilang 23:19.

24, 25. Anong mga bendisyon an nakatagama para sa mga desterradong Judio na naghihiro kaoyon kan mensahe ni Jehova paagi ki Isaias?

²⁴ Huli kaini, kun hihimateon kan mga Judio an mga tataramon na makahulang sinabi sa sainda paagi ki Isaias, seguradong makakamtan ninda an kaligtasan na ipinanuga ni Jehova. Bilang resulta, makaeeksperyensia sinda nin dakulang kagayagayahan. Si Jehova nagsasabi: “Huli ta may paggayagaya na kamo maruluwas, asin kamo ibabalik na may katoninongan. An mismong kabukidan asin mga bulod mag-oogma sa atubangan nindo na may magayagayang kurahaw, asin an mismong mga kahoy kan kapatagan mag-uurupak gabos. Kasalihid kan balagon matubo an kahoy na enebro. Kasalihid kan langaton matubo an mirto. Asin iyan magigin bagay na kabantogan para ki Jehova, sarong tanda sagkod sa panahon na daing talaan na dai mapapara.”​—Isaias 55:​12, 13.

²⁵ Kan 537 B.C.E., an mga desterradong Judio talagang luminuwas sa Babilonya na naggagayagaya. (Salmo 126:​1, 2) Pag-abot ninda sa Jerusalem, inabotan ninda an sarong daga na pano nin kapalongpongan nin mga tonok asin langaton​—girumdomon, an daga napabayaan sa laog nin dakol na dekada. Alagad ngonyan makatatabang na an banwaan nin Dios na pinapuli sa sadiring daga na pangyarihon an magayon na transpormasyon! Haralangkawon na kahoy, arog kan enebro asin mirto, an suminalida sa mga tonok asin langaton. An bendisyon ni Jehova nagigin risang-risa tolos mantang pinaglilingkodan sia kan saiyang banwaan “na may magayagayang kurahaw.” Garo baga an daga mismo an naggagayagaya.

26. Anong binendisyonan na kamugtakan an nakakamtan kan banwaan nin Dios ngonyan?

²⁶ An natatada kan linahidan na mga Kristiano pinatalingkas kan 1919 sa espirituwal na pagkabihag sa sainda. (Isaias 66:8) Kaiba kan dakulang kadaklan nin ibang karnero, sinda ngonyan naglilingkod sa Dios na may paggayagaya sa sarong espirituwal na paraiso. Mantang mayo na nin ano man na mantsa kan Babilonikong impluwensia, igwa sinda nin inooyonan na kamugtakan, na nagin “bagay na kabantogan” para ki Jehova. An saindang espirituwal na prosperidad nagpapamuraway sa saiyang ngaran asin naglalangkaw sa saiya bilang an Dios nin totoong hula. An nagibo na ni Jehova para sa sainda nagpapatunay kan saiyang pagka-Dios asin ebidensia kan saiyang pagigin fiel sa saiyang tataramon asin sa saiyang pagkaherak sa mga nagsosolsol. An gabos logod na padagos na ‘nagbabakal nin arak asin gatas minsan mayo nin pirak asin mayo nin bayad’ maggayagaya sa paglilingkod sa saiya sagkod lamang!

[Mga Nota sa Ibaba]