An Tataramon ni Jehova Buhay

Tampok na mga Kabtang sa Libro nin Isaias—II

MAIMBOD na isinasagibo ni Isaias an sugo sa saiya bilang sarong propeta. Nagin totoo na an mga kapahayagan na itinaram nia tumang sa sampulong tribong kahadean nin Israel. Ngonyan may dugang pa siang sasabihon manongod sa ngapit kan Jerusalem.

An siudad kan Jerusalem lalaglagon, asin dadarahon na bihag an mga nag-iistar dian. Minsan siring, an pagkagaba dai magigin permanente. Pakalihis nin halipot na panahon, ibabalik an tunay na pagsamba. Ini an pundamental na mensahe kan Isaias 36:1–66:24.a Makikinabang kita sa pagkonsiderar sa sinasabi kan mga kapitulong ini huling dakol sa mga propesiya sa kabtang na ini an nagkakaigwa na kan pangultimong kaotoban kaiyan sa satong panahon o maootob sa harani nang ngapit. An kabtang na ini kan libro nin Isaias igwa man nin nakakaogmang mga propesiya may labot sa Mesiyas.

“UYA! MAARABOT AN ALDAW”

(Isaias 36:1–39:8)

Sa ika-14 taon kan paghade ni Hadeng Ezequias (732 B.C.E.), sinakyada kan mga Asirio an Juda. Nanuga si Jehova na idedepensa an Jerusalem. An huma nin pagsakyada natapos kan solong gadanon kan anghel ni Jehova an 185,000 na soldados na Asirio.

Si Ezequias nagkahelang. Sinimbag ni Jehova an saiyang pamibi asin pinaomayan sia, na dinugangan nin 15 taon an saiyang buhay. Kan an hade nin Babilonya magpadara nin mga sugo tanganing pelisitaron sia, si Ezequias daing kadonongan na ipinaheling sa sainda an gabos niang kayamanan. Ipinahayag ni Isaias an mensahe ni Jehova ki Ezequias, na sinasabi: “Uya! Maarabot an aldaw, asin an gabos na yaon sa saimong sadiring harong saka tinipon kan saimong mga apoon sagkod sa aldaw na ini dadarahon nanggad sa Babilonya.” (Isaias 39:5, 6) Labi-labi sanang 100 na taon an nag-agi, nagin totoo an propesiya.

Mga Hapot sa Kasuratan na Sinimbag:

38:8—Ano an “mga tangga” na dian pinasibog an anino? Mantang an mga sundial ginamit sa Egipto sagkod Babilonya kan ikawalong siglo B.C.E., an mga tanggang ini puedeng nanonongod sa mga grado kan sundial na posibleng pagsadiri kan ama ni Ezequias na si Acaz. O tibaad igwa nin hagyan sa laog kan palasyo. An sarong harigi na harani sa may hagyanan tibaad luway-luway na nagtatao nin anino sa mga tangga, na puedeng gamiton sa pagsokol nin oras.

Mga Leksion Para sa Sato:

36:2, 3, 22. Minsan ngani hinale sa paglilingkod bilang sarong mayordomo, si Sebna tinogotan na magpadagos sa paglilingkod sa hade bilang sekretaryo kan kasalida nia. (Isaias 22:15, 19) Kun kita hinale sa sarong katongdan na may paninimbagan sa organisasyon ni Jehova sa ano man na dahelan, bako daw na maninigo kitang magpadagos sa paglilingkod sa Dios sa ano man na katongdan na itinotogot nia?

37:1, 14, 15; 38:1, 2. Sa mga panahon nin kasakitan, madonong na dumolok kita ki Jehova sa pamibi asin lubos kitang magtiwala sa saiya.

37:15-20; 38:2, 3. Kan an Jerusalem nasa irarom kan huma kan mga Asirio, an pangenot na iniisip ni Ezequias iyo an itataong katuyawan sa ngaran ni Jehova huli sa pagbagsak kan Jerusalem. Kan maaraman nia na an saiyang helang nakakagadan, may mga iniisip si Ezequias na labi pa sa pampersonal na intereses nia. An orog na nakapurisaw sa saiya iyo an magigin epekto sa Davidikong linya nin mga hade kan kagadanan nia na mayong paramana. Iniisip man nia kun siisay an mangengenot sa pakikipaglaban sa mga Asirio. Arog ni Ezequias, ibinibilang niatong mas mahalaga kisa kaligtasan niato an pagkasantipikar kan ngaran ni Jehova asin an pagkaotob kan saiyang katuyohan.

38:9-20. An awit na ini ni Ezequias nagtotokdo sa sato na mayo nang orog na mahalaga sa buhay kisa makapag-omaw ki Jehova.

“HIHIRAHAYON SIA”

(Isaias 40:1–59:21)

Tolos-tolos pagkatapos na ihula an pagkalaglag kan Jerusalem asin an ibubungang pagkabihag sa Babilonya, nagpropesiya si Isaias manongod sa pagbabalik sa dati. (Isaias 40:1, 2) “Hihirahayon sia [an Jerusalem],” an sabi sa Isaias 44:28. An mga idolo kan mga dios nin Babilonya dadarahon siring sa mga “bagahe.” (Isaias 46:1) An Babilonya lalaglagon. An gabos na ini nagin totoo pakalihis nin duwang siglo.

Itatao ni Jehova an saiyang lingkod bilang “liwanag kan mga nasyon.” (Isaias 49:6) An “kalangitan” o grupong namamahala na Babilonya “magkakawararak na siring man sana kan aso,” asin an saiyang mga sakop “magkakagaradan na siring sana sa nuknuk”; alagad an ‘bihag na aking babae nin Sion huhubadon an mga gapos sa saiyang liog.’ (Isaias 51:6; 52:2) Sa mga madolok sa saiya asin maghihinanyog, si Jehova masabi: “Magibo ako sa saindo nin daing sagkod na tipan mapadapit sa mga mamomoton na kabootan ki David.” (Isaias 55:3) An pamumuhay na kaoyon kan matanos na mga kahagadan nin Dios magiya sa pakanompong nin ‘labi-labi nanggad na kaogmahan ki Jehova.’ (Isaias 58:14) Sa ibong na lado, an mga sala kan banwaan nagin ‘dahelan kan pagkakasuwayan ninda asin kan saindang Dios.’—Isaias 59:2.

Mga Hapot sa Kasuratan na Sinimbag:

40:27, 28—Taano ta an Israel nagsabi: “An sakong dalan natago ki Jehova, asin an hustisya sa sako nakakadulag sa sakong Dios”? Tibaad hinohona kan nagkapirang Judio sa Babilonya na an mga inhustisya na inaagihan ninda natatago ki Jehova o dai nia naheheling. Ipinagirumdom sa sainda na an Babilonya bakong dai kayang aboton kan Kaglalang kan daga, na dai napapagal o nanluluya.

43:18-21—Taano ta sinabihan an nagbaralik na mga desterrado na ‘dai paggirumdomon an mga dating bagay’? Ini bako sa sentido na maninigo nindang lingawan an nakaaging mga ginibo ni Jehova na pagliligtas. Imbes, gusto ni Jehova na omawon ninda sia basado sa “bagong bagay” na maeeksperyensiahan ninda mismo, arog kan ligtas na pagbaklay ninda pasiring sa Jerusalem, na tibaad maagi sa mas deretsong agihan sa desierto. An “sarong dakulang kadaklan” na nagluwas sa “dakulang kahorasaan” magkakaigwa man nin bago asin personal na mga dahelan na pamurawayon si Jehova.—Kapahayagan 7:9, 14.

49:6—Paanong an Mesiyas “liwanag kan mga nasyon,” dawa ngani an saiyang daganon na ministeryo para sana sa mga aki ni Israel? Ini huli kan nangyari pagkagadan ni Jesus. An Isaias 49:6 iinaaplikar kan Biblia sa saiyang mga disipulo. (Gibo 13:46, 47) Ngonyan, an linahidan na mga Kristiano, na tinatabangan kan sarong dakulang kadaklan nin mga parasamba, nagseserbing “liwanag kan mga nasyon,” na nagtatao nin kaliwanagan sa mga tawo “sagkod sa kaporoporohi kan daga.”—Mateo 24:14; 28:19, 20.

53:10—Sa anong sentido na naoogmang marhay si Jehova sa pagronot sa saiyang Aki? Seguradong makolog para ki Jehova, an mapagmalasakit asin may pakikidamay na Dios, na maheling na nagdudusa an saiyang namomotan na Aki. Dawa siring, ikinaogma Niang marhay an gikan sa boot na pagkuyog ni Jesus asin an gabos na mahahaman kan saiyang pagdusa asin kagadanan.—Talinhaga 27:11; Isaias 63:9.

53:11—Ano an kaaraman na paagi kaiyan an Mesiyas “magdadara nin matanos na kamugtakan sa dakol na banwaan”? Ini an kaaraman na nakua ni Jesus huli sa pagdigdi sa daga, pagigin sarong tawo, asin pagsakit na daing hustisya sagkod sa kagadanan. (Hebreo 4:15) Sa siring, itinao nia an atang na pantubos, na kinakaipuhan tanganing tabangan an linahidan na mga Kristiano asin an dakulang kadaklan na magkaigwa nin matanos na kamugtakan sa atubangan nin Dios.—Roma 5:19; Santiago 2:23, 25.

56:6—Sairisay “an mga taga ibang daga,” asin sa anong mga paagi na sinda ‘nagpupugol sa tipan ni Jehova’? “An mga taga ibang daga” iyo an “ibang mga karnero” ni Jesus. (Juan 10:16) Pinupugolan ninda an bagong tipan sa sentido na sinda nagkukuyog sa mga ley na konektado sa tipan na iyan, lubos na nakikikooperar sa mga areglo na ginibo paagi kaiyan, nakikikabtang sa espirituwal na pagkakan na kapareho kan sa linahidan na mga Kristiano, asin nagsusuportar sa sainda sa paghuhulit kan Kahadean asin paggibo nin disipulo.

Mga Leksion Para sa Sato:

40:10-14, 26, 28. Si Jehova makosog asin maboot, makapangyarihan sa gabos asin madonong sa gabos, asin mas dakula nanggad an pakasabot na labi sa kaya niatong roropon.

40:17, 23; 41:29; 44:9; 59:4. An politikal na pakikipag-alyansa asin mga idolo “bakong tunay.” An pagtiwala sa sainda mayo lamang nin halaga.

42:18, 19; 43:8. An pagpirong kan satong mga mata sa nasusurat na Tataramon nin Dios asin an pagtakop kan satong mga talinga sa saiyang instruksion paagi sa “maimbod asin mapagmansay na oripon” nangangahulogan nin pagigin buta asin bungog sa espirituwal.—Mateo 24:45.

43:25. Pinapara ni Jehova an mga paglapas para sa kapakanan nia. An pagkatalingkas niato sa kaoripnan sa kasalan asin kagadanan asin pag-ako nin buhay sekondaryo sana sa santipikasyon kan ngaran ni Jehova.

44:8. Yaon sa sato an pagsuportar ni Jehova, na siring kasarig asin karigon sa gapo. Maninigong dai kita noarin man matakot na magpatotoo manongod sa saiyang pagka-Dios!—2 Samuel 22:31, 32.

44:18-20. An idolatriya tanda nin karatan kan puso. Mayo nin ano man na bagay na maninigong mag-okupar sa lugar ni Jehova sa satong puso.

46:10, 11. An kakayahan na ‘papagdanayon an saiyang desisyon,’ an boot sabihon, otobon an saiyang katuyohan, malinaw na ebidensia kan pagka-Dios ni Jehova.

48:17, 18; 57:19-21. Kun kita malaom ki Jehova para sa kaligtasan, marani sa saiya, asin matao nin atension sa saiyang mga togon, an satong katoninongan magigin siring kaabunda kan tubig sa masulog na salog asin an satong matanos na mga gibo siring kaabunda kan mga alon sa dagat. An mga dai naghihimate sa Tataramon nin Dios siring sa “dagat na iinaapwak.” Mayo sinda nin katoninongan.

52:5, 6. An mga taga Babilonya salang nagkonklusyon na an tunay na Dios maluya. Dai ninda narealisar na an kaanggotan ni Jehova sa saiyang banwaan iyo an dahelan kan pagkaoripon kan Israel. Kun inaagihan nin kalamidad an ibang tawo, madonong na dai tolos kita magkonklusyon dapit sa causa kaiyan.

52:7-9; 55:12, 13. Igwa kita nin kisuerra tolong dahelan na magayagayang makikabtang sa paghuhulit kan Kahadean asin paggibo nin disipulo. An satong mga bitis magayon sa pagheling kan mga mapakumbaba na nagugutom sa espirituwal. Naheheling ta si Jehova nin “mata sa mata,” o may dayupot kitang relasyon sa saiya. Nakakamtan man niato an espirituwal na prosperidad.

52:11, 12. Tanganing magin kualipikado na magdara kan “mga kagamitan ni Jehova”—an mga probisyon nia para sa sagradong paglilingkod—kaipuhan kitang magin malinig sa espirituwal asin moral.

58:1-14. Daing kamanungdanan an mapagsaginsagin na pagpaheling nin debosyon asin katanosan. An tunay na mga parasamba maninigong pano nin tunay na mga kapahayagan nin diosnon na debosyon asin mga gibo nin sa magturugang na pagkamoot.—Juan 13:35; 2 Pedro 3:11.

59:15b-19. Minamasdan ni Jehova an mga gibo-gibo nin tawo asin mainterbenir sia sa itinalaan niang panahon.

SIA “MAGIGIN KORONA NIN KAGAYONAN”

(Isaias 60:1–66:24)

Sinasambit an pagbabalik kan tunay na pagsamba sa suanoy na mga panahon saka sa panahon niato, an Isaias 60:1 nagsasabi: “Tumindog ka, O babae, pasiranga an liwanag, huli ta an saimong liwanag nagdatong na asin sa saimo an mismong kamurawayan ni Jehova suminirang.” An Sion “magigin korona nin kagayonan sa kamot ni Jehova.”—Isaias 62:3.

Si Isaias namibi ki Jehova para sa mga kahimanwa nia na masolsol durante kan pagkadistiero ninda sa Babilonya. (Isaias 63:15–64:12) Pakatapos na ipaheling an kalaenan kan tunay na mga lingkod asin kan mga bakong tunay, ipinahayag kan propeta kun paano bebendisyonan ni Jehova an mga naglilingkod sa Saiya.—Isaias 65:1–66:24.

Mga Hapot sa Kasuratan na Sinimbag:

61:8, 9—Ano an “tipan na daing talaan an pagdadanay,” asin sairisay an “banhi”? Ini an bagong tipan na ginibo ni Jehova sa linahidan na mga Kristiano. An “banhi” iyo an “ibang mga karnero”—an minilyon na naghihimate sa saindang mensahe.—Juan 10:16.

63:5—Paanong an kabangisan nin Dios nagsusuportar sa saiya? An kabangisan nin Dios sarong kontroladong emosyon—an saiyang matanos na gurobgutob. An saiyang kabangisan nagsusuportar asin nagmomotibar sa saiya na gibohon an saiyang matanos na mga paghokom.

Mga Leksion Para sa Sato:

64:6. An bakong sangkap na mga tawo dai makakapagligtas kan sadiri ninda. Kun mapadapit sa pagbayad sa mga kasalan, an saindang matanos na mga gibo daing pagkakaiba sa maating mga gubing.—Roma 3:23, 24.

65:13, 14. Binebendisyonan ni Jehova an saiyang maimbod na mga lingkod, na abundang pinapanigoan an saindang espirituwal na pangangaipo.

66:3-5. Ikinakaongis ni Jehova an pagsaginsagin.

“Mag-ogma Kamo”

Abaa kanakakaranga kan mga propesiya dapit sa pagbabalik sa dati para sa maimbod na mga Judio na desterrado sa Babilonya! “Mag-ogma kamo,” an sabi ni Jehova, “asin maggayagaya kamo sagkod lamang sa sakong linalalang. Huli ta uya linalalang ko an Jerusalem na magin dahelan nin kagayagayahan asin an saiyang banwaan na magin dahelan nin labi-labing kagayagayahan.”—Isaias 65:18.

Kita man nabubuhay sa sarong panahon na an daga natatahoban nin kadikloman asin an mahibog na kaduloman nasa mga nasyon. (Isaias 60:2) Yaon ngonyan an “delikadong mga panahon na masakit pakibagayan.” (2 Timoteo 3:1) Kun siring, an mensahe ni Jehova dapit sa kaligtasan na yaon sa libro nin Biblia na Isaias dakulang pamparigon sa boot niato.—Hebreo 4:12.

[Nota sa Ibaba]

[Ritrato sa pahina 8]

Aram daw nindo an pangenot na dahelan kun taano ta namibi si Ezequias na iligtas sa mga Asirio?

[Ritrato sa pahina 11]

“Abaang gayon sa ibabaw kan kabukidan kan mga bitis kan nagdadara nin maogmang bareta!”