An Tataramon ni Jehova Nungkang Nasusudya

“Mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo.”—JOSUE 23:14.

 1. Siisay si Josue, asin ano an ginibo nia sa paghinanapos kan saiyang buhay?

SIA makosog asin daing takot na komandante militar, sarong tawong may pagtubod asin integridad. Sia naglakaw kaiba ni Moises asin pinili ni Jehova tanganing pangenotan an nasyon nin Israel hale sa makangingirhat na kaawagan pasiring sa sarong daga na binubulosan nin gatas saka tangguli. Sa paghinanapos kan saiyang buhay, an iginagalang na marhay na lalaking ini, si Josue, nagtao nin nakakapahirong pahayag nin pamamaaram sa kamagurangan na lalaki kan Israel. Daing duwa-duwa, an pahayag na iyan nakapakosog sa pagtubod kan mga naghinanyog sa saiya. Puedeng arog man kaiyan an magin epekto sa saindo.

2, 3. Kan kaolayon ni Josue an kamagurangan na lalaki kan Israel, ano an kamugtakan kan Israel, asin ano an sinabi ni Josue?

² Imahinaron an pangyayari, siring kan pagkaladawan sa Biblia: “Nangyari dakol na aldaw pagkatapos na tawan ni Jehova nin pahingalo an Israel sa gabos nindang kaiwal sa bilog na palibot, kan si Josue gurang na asin halawig na kun dapit sa mga aldaw, inapod ni Josue an bilog na Israel, an kamagurangan na lalaki kaiyan asin an mga namamayo kaiyan asin an mga hokom kaiyan patin an mga opisyal kaiyan, asin sinabi sa sainda: ‘Kun dapit sa sako, ako gurang na, ako halawig na kun dapit sa mga aldaw.’”—Josue 23:1, 2.

³ Haros 110 na an edad ni Josue, na nabuhay durante kan saro sa pinakapambihirang mga peryodo sa kasaysayan kan banwaan nin Dios. Naheling nia mismo an makakamhan na mga gibo nin Dios, asin naheling nia an kaotoban kan dakol sa mga panuga ni Jehova. Sa siring, huling lubos an kombiksion sa naeksperyensiahan nia mismo na sia nagsabi: “Aram nindong gayo sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.”—Josue 23:14.

 4. Anong mga pag-asegurar an itinao ni Jehova sa mga Israelita?

⁴ Anong mga tataramon ni Jehova an naotob sa bilog na buhay ni Josue? Pag-oolayan niato an tolong pag-asegurar na itinao ni Jehova sa mga Israelita. Enot, kakaldahon sinda nin Dios sa kaoripnan. Ikaduwa, poprotehiran nia sinda. Ikatolo, sususteniran nia sinda. Itinao ni Jehova an kaparehong mga pag-asegurar sa saiyang banwaan sa presenteng panahon, asin naheling niato na naotob iyan durante kan bilog na buhay niato. Pero, bago niato pag-olayan an ginibo ni Jehova sa presenteng mga panahon, helingon niato an saiyang aktibidad kan panahon ni Josue.

Kinalda ni Jehova an Saiyang Banwaan

5, 6. Paano kinalda ni Jehova an mga Israelita sa Egipto, asin ano an pinatunayan kaini?

⁵ Kan an mga Israelita mag-agrangay sa Dios huli kan saindang kaoripnan sa Egipto, nariparo iyan ni Jehova. (Exodo 2:23-25) Sa may naglalaad na palongpong, si Jehova nagsabi ki Moises: “Ako mahilig tanganing iligtas ko [an sakong banwaan] sa kamot kan mga Egipcio asin iluwas sinda sa dagang iyan pasiring sa daga na mataba asin mahiwas, sa daga na nagbobolos nin gatas asin tangguli.” (Exodo 3:8) Seguradong nakakaogma nanggad na maheling na inootob ini ni Jehova! Kan magsayuma si Faraon na togotan an Israel na humale sa Egipto, sinabihan sia ni Moises na gigibohon nin Dios an katubigan kan Nilo na magin dugo. An tataramon ni Jehova dai nasudya. An tubig sa Salog nin Nilo nagin dugo. Nagadan an mga sira, asin dai na puedeng inomon an tubig dian. (Exodo 7:14-21) Si Faraon nagdanay na matagas, asin si Jehova nagpadara nin siyam pang damat, na patienot na isinasaysay an lambang saro kaini. (Exodo, kapitulo 8-12) Pagkatapos na gadanon kan ikasampulong damat an mga panganay kan Egipto, pinagbotan ni Faraon an mga Israelita na humale—asin talagang naghale sinda!—Exodo 12:29-32.

⁶ An pagkaldang iyan nagbukas kan dalan para ki Jehova na amponon an Israel bilang saiyang piniling nasyon. Ibinantog kaiyan an kadakulaan ni Jehova bilang Paraotob nin mga panuga, an saro na nungkang nasusudya an tataramon. Pinatunayan kaiyan an pagigin supremo ni Jehova sa gabos na dios kan mga nasyon. An pagbasa manongod sa pagkaldang iyan nagpapakosog kan satong pagtubod. Imahinaron kun ano an pagmate kun maeksperyensiahan iyan! Naheling ni Josue na daing duda na si Jehova “an Kaharohalangkawe sa bilog na daga.”—Salmo 83:18.

Prinotehiran ni Jehova an Saiyang Banwaan

 7. Paano prinotehiran ni Jehova an mga Israelita sa hukbo ni Faraon?

⁷ Kumusta man an ikaduwang pag-asegurar na poprotehiran ni Jehova an saiyang banwaan? An pag-asegurar na ini yaon sa panuga ni Jehova na kakaldahon nia sinda sa Egipto asin totogotan sindang makalaog sa Dagang Panuga. Girumdomon na an Israel linapag kan anggot na si Faraon kaiba an saiyang makosog na hukbo, na may ginatos na karuwahe. Seguradong may kompiansa nanggad an aroganteng tawo na iyan, nangorogna kan an mga Israelita garo baga nalaom sa pag-oltanan kan kabukidan asin dagat! Nag-interbenir ngonyan an Dios tanganing protehiran an saiyang banwaan paagi sa pagbugtak nin panganoron sa pag-oltanan kan duwang kampo. Sa lado kan mga Egipcio may kadikloman; sa lado kan mga Israelita may liwanag. Mantang an mga Egipcio inoolang kan panganoron na umabante, initaas ni Moises an saiyang sogkod asin nabanga an katubigan kan Dagat na Pula, na nagtao nin madudulagan na dalan para sa mga Israelita sagkod litag para sa mga Egipcio. Biyong linaglag ni Jehova an makosog na hukbong militar ni Faraon, na pinoprotehiran an Saiyang banwaan sa siertong pagkadaog.—Exodo 14:19-28.

 8. Anong pagprotehir an naeksperyensiahan kan mga Israelita (a) sa kaawagan asin (b) kan sinda lumaog sa Dagang Panuga?

⁸ Pagkabalyo sa Dagat na Pula, an mga Israelita naglagawlagaw sa daga na ilinadawan na “mahiwason asin teribleng kaawagan na dakol an mararang halas asin amamatak, mara, daing tubig na daga.” (Deuteronomio 8:15, The New English Bible) Prinotehiran man ni Jehova an saiyang banwaan duman. Asin kumusta man an paglaog ninda sa Dagang Panuga? Inolang sinda kan makosog na mga hukbong Cananeo. Pero, sinabi ni Jehova ki Josue: “Buhat, dumakit ka sa Jordan na ini, ika asin an bilog na banwaan na ini, pasiring sa daga na itatao ko sa sainda, sa mga aki ni Israel. Mayo nin siisay man na marigon na makakatindog sa atubangan mo sa gabos na aldaw kan saimong buhay. Kun paanong kaibanan ako ni Moises makakaibanan mo man ako. Dai taka babayaan ni papabayaan man.” (Josue 1:2, 5) An mga tataramon na idto ni Jehova dai nasudya. Sa laog nin haros anom na taon, dinaog ni Josue an 31 hade asin sinakop nia an dakulang kabtang kan Dagang Panuga. (Josue 12:7-24) Nagin imposible kutana an pagkongkistar na iyan kun mayo kan nagpoprotehir na pag-asikaso ni Jehova.

Sinusteniran ni Jehova an Saiyang Banwaan

9, 10. Paano sinusteniran ni Jehova an saiyang banwaan sa kaawagan?

⁹ Pag-olayan niato ngonyan an ikatolong pag-asegurar na sususteniran ni Jehova an saiyang banwaan. Dai nahaloy pagkakalda ninda sa Egipto, nanuga an Dios sa mga Israelita: “Uya, mapaoran ako sa saindo nin tinapay hale sa kalangitan; asin an banwaan dapat na lumuwas asin kanya-kanyang magpurot kan igo para sa kada aldaw.” Talagang itinao nin Dios an ‘tinapay na iyan na hale sa langit.’ “Kan maheling iyan kan mga aki ni Israel, sinda nagpoon na magsabi sa lambang saro: ‘Ano iyan?’” Iyan manna, an tinapay na ipinanuga ni Jehova sa sainda.—Exodo 16:4, 13-15.

¹⁰ Sa laog nin 40 taon sa kaawagan, inataman ni Jehova an mga Israelita, na tinatawan sinda nin pagkakan asin tubig. Sinegurado pa ngani nia kaidto na an saindang mga gubing dai maluma asin na an saindang mga bitis dai maggatok. (Deuteronomio 8:3, 4) Naheling mismo iyan gabos ni Josue. Kinalda, prinotehiran, asin sinusteniran ni Jehova an saiyang banwaan, siring nanggad kan ipinanuga nia sa sainda.

Pagkalda sa Presenteng mga Panahon

11. Ano an inanunsiar ni Tugang na Russell sa Bethel kan Oktubre 1914, asin ano an kahulogan kaini?

¹¹ Kumusta man sa satong panahon? Kan Biernes na aga, Oktubre 2, 1914, si Charles Taze Russell, na iyo an nangengenot sa Mga Estudyante sa Biblia kan panahon na idto, naglaog sa komedor kan Bethel sa Brooklyn, Nueva York. “Marahay na aga sa gabos,” an maogmang sinabi nia. Dangan, bago sia magtukaw, magayagaya niang inanunsiar: “An panahon kan mga Hentil tapos na; tapos na an panahon kan saindang mga hade.” Sa giraray, nag-abot na an panahon ni Jehova, an Soberano kan uniberso, tanganing humiro para sa saiyang banwaan. Asin talagang naghiro sia!

12. Anong pagkalda an nangyari kan 1919, asin may anong mga resulta?

¹² Pakalihis sana nin limang taon, kinalda ni Jehova an saiyang banwaan sa “Dakulang Babilonya,” an poderosong pambilog na kinaban na imperyo nin falsong relihion. (Kapahayagan 18:2) Dikit na sanang gurang na an nakaheling mismo kan nakakaogmang pagkalda na iyan. Pero, malinaw niatong naheheling an mga resulta. Inestablisar giraray ni Jehova an dalisay na pagsamba asin pinagsararo an mga naghihimuyawot na sumamba sa saiya. Ihinula ini paagi ki propeta Isaias: “Mangyayari sa huring kabtang kan mga aldaw na an bukid kan harong ni Jehova marigon na mapapatindog na halangkaw pa sa alitoktok kan mga bukid, asin iyan ilalangkaw nanggad nin mas halangkaw pa sa mga bulod; asin dian maburunyog an gabos na nasyon.”—Isaias 2:2.

13. Anong paglangkaw nin bilang an naheling nindo sa tahaw kan banwaan ni Jehova?

¹³ An mga tataramon ni Isaias naotob nanggad. Kan 1919, pinonan kan linahidan na natatada an mapusong pambilog na kinaban na kampanya nin paghuhulit na ilinangkaw an pagsamba sa tunay na Dios. Kan dekada nin 1930, nagin risang-risa na tinitipon na an “ibang mga karnero.” (Juan 10:16) Rinibo nguna an natipon, dangan ginatos na ribo, asin ngonyan minilyon an naninindogan para sa dalisay na pagsamba! Sa sarong bisyon na itinao ki apostol Juan, ilinaladawan sinda bilang “sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin lenguahe.” (Kapahayagan 7:9) Ano an naheling nindong pag-oswag sa bilog na buhay nindo? Pirang Saksi ni Jehova an yaon sa daga kan enot nindong manodan an katotoohan? Ngonyan, an bilang kan mga naglilingkod ki Jehova labi na sa 6,700,000. Paagi sa pagkalda sa saiyang banwaan sa Dakulang Babilonya, binukasan ni Jehova an dalan para sa nakakapukaw sa boot na paglangkaw nin bilang na naheheling na niato ngonyan sa bilog na kinaban.

14. Anong pagkalda an maabot pa?

¹⁴ Si Jehova igwa pang gigibohon na pagkalda, na dian mapapalabot an gabos na nasa ibabaw kan daga. Sa kahangahangang pagpaheling nin kapangyarihan, hahaleon ni Jehova an gabos na nagtutumang sa saiya, asin kakaldahon nia an saiyang banwaan pasiring sa bagong kinaban na dian mag-eerok an katanosan. Magigin dakulang kaogmahan nanggad na maheling an katapusan kan maraot asin an pagpopoon kan pinakamamuraway na panahon sa bilog na kasaysayan nin tawo!—Kapahayagan 21:1-4.

An Pagprotehir ni Jehova sa Panahon Niato

15. Taano ta kaipuhan an pagprotehir ni Jehova sa presenteng mga panahon?

¹⁵ Siring kan nasabotan niato, kinaipuhan kan mga Israelita kan panahon ni Josue an pagprotehir ni Jehova. Napapalaen daw an banwaan ni Jehova sa presenteng mga panahon? Dai nanggad! Pinatanidan ni Jesus an saiyang mga parasunod: “Dadarahon kamo nin mga tawo sa kahorasaan asin gagadanon kamo, asin ikakaongis kamo kan gabos na nasyon huli sa ngaran ko.” (Mateo 24:9) Sa nakaaging mga taon, an mga Saksi ni Jehova sa dakol na nasyon nagtagal nin grabeng pagtumang asin maringis na persekusyon. Pero, pinatunayan ni Jehova na kaiba sia kan saiyang banwaan. (Roma 8:31) An saiyang Tataramon nag-aasegurar sa sato na mayo nin ano man na bagay, ‘ni armas na ginibo tumang sa sato,’ an makakapapondo sa satong paghuhulit asin pagtotokdo dapit sa Kahadean.—Isaias 54:17.

16. Anong ebidensia an naheling nindo na pinoprotehiran ni Jehova an saiyang banwaan?

¹⁶ Sa ibong kan pagkaongis kan kinaban, an banwaan ni Jehova padagos na nagdakol. An mga Saksi ni Jehova padagos na nag-ooswag sa 236 na kadagaan—mapuersang ebidensia nanggad na kaiba niato si Jehova tanganing protehiran kita sa mga nagmamawot na paraon o pasilensiohon kita. Nagigirumdoman daw nindo an ngaran kan poderosong mga lider nin politika o relihion na sa bilog na buhay nindo inapi nin grabe an banwaan nin Dios? Ano an nangyari sa sainda? Haen na sinda ngonyan? An kadaklan sa sainda mayo na, arog man sana ki Faraon kan panahon ni Moises asin Josue. Asin kumusta man an mga lingkod nin Dios sa presenteng panahon na maimbod na nagadan? Pinoprotehiran sinda sa memorya ni Jehova. Mayo na nin mas ligtas na lugar na puedeng mamugtakan ninda. Malinaw nanggad, pag-abot sa pagprotehir, an mga tataramon ni Jehova napatunayan na totoo.

Sinususteniran ni Jehova an Saiyang Banwaan Ngonyan

17. Anong pag-asegurar an itinao ni Jehova mapadapit sa espirituwal na pagkakan?

¹⁷ Sinusteniran ni Jehova an saiyang banwaan sa kaawagan, asin sinususteniran nia sinda ngonyan. Pinapakakan kita sa espirituwal kan “maimbod asin mapagmansay na oripon.” (Mateo 24:45) Inaako niato an kaaraman manongod sa espirituwal na mga katotoohan na ihinilom sa laog nin dakol na siglo. An anghel nagsabi ki Daniel: “Ihilom mo an mga tataramon asin serahan mo nin tatak an libro, sagkod sa panahon kan katapusan. Dakol an magririlibot, asin an tunay na kaaraman magigin abunda.”—Daniel 12:4.

18. Taano ta masasabi na abunda ngonyan an tunay na kaaraman?

¹⁸ Nabubuhay na kita ngonyan sa panahon kan katapusan, asin abunda nanggad an tunay na kaaraman. Sa bilog na kinaban, an mga mamomoton sa katotoohan giniyahan kan banal na espiritu sa tamang kaaraman manongod sa tunay na Dios asin sa saiyang mga katuyohan. An Biblia lakop sa daga ngonyan, asin iyo man an mga publikasyon na nagtatabang sa mga tawo na masabotan an mahalagang marhay na mga katotoohan na yaon sa Biblia. Halimbawa, estudyare an lista nin mga laog kan ginagamit sa pag-adal na publikasyon na Ano Man Nanggad an Itinotokdo kan Biblia?a Kabilang sa mga kapitulo kaiyan an: “Ano an Katotoohan Manongod sa Dios?,” “Haen an mga Gadan?,” “Ano an Kahadean nin Dios?,” asin “Taano ta Tinotogotan nin Dios an Pagdusa?” Hinorophorop kan mga tawo an siring na mga hapot sa laog nin rinibong taon. Ngonyan an simbag sa siring na mga hapot pasil nang makukua. Dawa pakalihis nin dakol na siglo nin kawaran nin aram asin nin apostatang katokdoan nin Kakristianohan, nangingibabaw an Tataramon nin Dios, na sinususteniran an gabos na naghihimuyawot na maglingkod ki Jehova.

19. Anong mga panuga an naheling nindong naotob, asin ano an nagin kongklusyon nindo?

¹⁹ Daing duwa-duwa na basado sa naheling mismo kan satong mga mata, makakapagsabi kita: “Mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.” (Josue 23:14) Kinakalda, pinoprotehiran, asin sinususteniran ni Jehova an saiyang mga lingkod. May ikakatokdo daw kamong panuga nia na dai naotob sa saiyang itinalaan na panahon? Imposibleng gibohon iyan. Kita madonong na nagtitiwala sa masasarigan na Tataramon nin Dios.

20. Taano ta puede kitang magtanaw sa ngapit na may kompiansa?

²⁰ Kumusta man an ngapit? Sinabi sa sato ni Jehova na an kadaklan sa sato makakalaom na mabuhay sa sarong daga na liniwat tanganing magin nakakaogmang marhay na paraiso. Pira sana sa sato an igwa kan paglaom na mamahala sa langit kaiba ni Cristo. Ano man an satong paglaom, igwa kita kan gabos na dahelan na magdanay na maimbod arog ni Josue. Maabot an panahon na maootob an satong paglaom. Dangan gigirumdomon niato an gabos na ipinanuga ni Jehova, asin kita man masabi: “Iyan gabos naotob.”

[Nota sa Ibaba]

Ikakapaliwanag daw Nindo?

• Anong mga pag-asegurar ni Jehova an naheling ni Josue na naotob?

• Anong mga pag-asegurar nin Dios an naheling nindong naotob?

• Sa ano kita makakasierto mapadapit sa tataramon nin Dios?

[Ritrato sa pahina 23]

Nag-interbenir si Jehova tanganing kaldahon an saiyang banwaan

[Ritrato sa pahina 23]

Paano prinotehiran ni Jehova an saiyang banwaan sa Dagat na Pula?

[Ritrato sa pahina 24]

Paano sinusteniran ni Jehova an saiyang banwaan sa kaawagan?

[Mga Ritrato sa pahina 25]

Inaataman ni Jehova an saiyang banwaan ngonyan