“Dai Ko Kayang Mag-alo”

 1. Taano ta dai kayang mag-alo ni Jeremias asin kan iba pang propeta ni Jehova?

“DANGOGA an tataramon ni Jehova.” An mga tataramon na iyan madadangog sa mga tinampo asin plasa kan Jerusalem poon kan 647 B.C.E. Asin dai nagpondo an propeta nin Dios. Dawa kan laglagon an siudad pakalihis nin 40 taon, inotro nia an sadol na iyan. (Jer. 2:4; 42:15) An Makakamhan sa Gabos na Dios nagsugo nin mga propeta tanganing siertohon na madangog kan mga Judio an Saiyang hatol asin makapagsolsol. Arog kan ipinapaheling sa enot na kabtang kan publikasyon na ini, si Jeremias nangongorog sa mga representante kaidto nin Dios sa pagtaram. Kan isugo si Jeremias, sinabihan sia nin Dios: “Tumindog ka patin itaram mo sa sainda an gabos na ipinagboboot ko sa saimo. Dai ka matakot nin grabe.” (Jer. 1:17) Magabat an gibohon na iyan. Si Jeremias nagtios nin kolog sa hawak asin emosyon, alagad sa ibong kan siring na mga pagbalo, napahiro siang otobon an asignasyon sa saiya. Sinabi nia: “An sakong puso nariribok sa laog ko. Dai ko kayang mag-alo.”—Jer. 4:19.

2, 3. (a) Paano inarog si Jeremias kan mga disipulo ni Jesus? (b) Taano ta maninigo nindong arogon an halimbawa ni Jeremias?

² An pag-otob ni Jeremias sa saiyang asignasyon bilang propeta nagserbing halimbawa para sa magigin mga lingkod ni Jehova. (Sant. 5:10) Dai nahaloy pakalihis kan Pentecostes 33 C.E., si apostol Pedro asin Juan inarestar kan mga autoridad na Judio, na pinagbotan sindang pumondo sa paghuhulit. Nabasa nindo an simbag ninda. “Dai kami puedeng mag-ontok sa pagtaram dapit sa mga bagay na samong naheling asin nadangog.” (Gibo 4:19, 20) Pagkatapos na humaon kan mga namamahala na mas grabe pa an sunod na gigibohon sa sainda, binutasan ninda si Pedro asin Juan. Aram nindo an resulta. An maimbod na mga lalaking idto habong pumondo asin dai nagpondo sa paghuhulit.

³ Base sa mga tataramon ni Pedro asin Juan sa Gibo 4:20, naheheling daw nindo an kaigotan ni Jeremias? Bilang ministro ni Jehova Dios sa kritikal na huring mga aldaw, arog ka man daw kaiyan kadeterminadong nag-iisip, ‘Dai ko kayang mag-alo!’? Helingon niato kun paano kita makakapagdanay na makosog arog ni Jeremias tanganing padagos na makapaghulit kan maogmang bareta sa ibong kan naggagrabeng kamugtakan sa palibot niato.

 4. Ano an kaisipan kan dakol na tawo sa suanoy na Jerusalem?

⁴ Bako daw na may kompiansa kamo na an panuga nin Dios na marahayon na ngapit sa pamamahala kan saiyang Aki iyo an pinakamarahay na bareta na puedeng madangog nin mga tawo? Pero, dakol ngonyan an arog kan nagkapirang Judio kaidto na nagsabi ki Jeremias: “Kun dapit sa tataramon na sinabi mo sa samuya sa ngaran ni Jehova, dai kami maghihinanyog sa saimo.” (Jer. 29:19; 44:16) Parateng nadadangog kaidto ni Jeremias an siring na mga tataramon. Iyo man an mga lingkod ni Jehova ngonyan, huling dakol an nagsasabi, “Dai ako interesado.” An pagigin daing interes kan dakol na tawo puedeng makapaluya sa kaigotan kan mga parahayag kan Kahadean. Kun arog kaiyan an saindong teritoryo, kaya nangluluya an nagkapira sa saindong kongregasyon o pati na kamo, ano an puedeng gibohon?

 5. (a) Ano an nagin reaksion ni Jeremias sa pagigin daing interes kan mga tawo? (b) Taano ta grabe kadelikado an kamugtakan kan mga daing interes sa maogmang bareta?

⁵ Estudyare an nagin kaisipan ni Jeremias dawa daing interes an kadaklan sa mga taga Juda. Sa kapinonan kan pagigin propeta ni Jeremias, patienot na ipinaheling sa saiya ni Jehova an maabot na paghokom Nia. (Basahon an Jeremias 4:23-26.) Kaya nasabotan kan propeta na an buhay nin rinibo nakadepende sa saindang pagdangog sa mga sasabihon nia asin sa paghiro oyon dian. Arog man kaiyan an situwasyon kan mga tawo ngonyan, pati an mga nasa teritoryo nindo. Mapadapit sa “aldaw na iyan” nin paghokom nin Dios sa maraot na kinaban ngonyan, si Jesus nagsabi: “Madatong iyan sa gabos na nag-eerok sa ibabaw kan bilog na daga. Kun siring, magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na bagay na ini na nakatalagang mangyari, asin sa pagtindog sa atubangan kan Aki nin tawo.” (Luc. 21:34-36) Makakapagkongklusyon kamo base sa mga tataramon ni Jesus na grabe kadelikado an kamugtakan kan mga habong mag-ako kan maogmang bareta.

 6. Taano ta maninigo kamong padagos na maghulit, pati sa mga bakong gayong interesado sa saindong mensahe?

⁶ Minsan siring, an mga nagin nang interesado asin naghihinanyog saka naghihimate sa tataramon ni Jehova na ipinapaabot niato mag-aako nin mga pakinabang na daing kaagid an halaga. Tinatawan kita nin Dios nin oportunidad na makaligtas asin makalaog sa saiyang bagong kinaban. May pagkakapareho iyan sa ministeryo ni Jeremias. Puedeng makaligtas an mga taga Juda. (Basahon an Jeremias 26:2, 3.) Tanganing tabangan an mga tawo, dakol na dekada sindang sinadol ni Jeremias na “maghinanyog asin magbalik,” na maghimate sa tataramon kan tunay na Dios. Dai niato aram kun pira an nagsolsol asin nagbago kan saindang buhay bilang resulta kan pagpapatotoo kan propeta. Alagad may nagkapira na naggibo kaiyan, asin dakol man sa panahon niato. Mantang padagos niatong ihinuhulit an maogmang bareta, parate kitang may nababaretaan kun paano nagin interesado an mga dati habong maghimate. (Helingon an kahon na “Puedeng Magin Interesado an mga Dati Daing Interes,” sa pahina 184.) Bako daw na iyan saro pang dahelan na kita magdanay na aktibo sa nagliligtas-buhay na paghuhulit kan maogmang bareta?

 7. Paano prinobaran kan mga kaiwal na papondohon an gibohon ni Jeremias bilang propeta?

⁷ An sarong pambihirang aspekto kan ministeryo ni Jeremias iyo na an mga nagkokontra parateng nagpoprobar na papondohon sia sa saiyang gibohon. Kinontra sia sa publiko nin falsong mga propeta. (Jer. 14:13-16) Mantang si Jeremias naglalakaw sa mga tinampo kan Jerusalem, sia iniinsulto asin tinutuyatuya kan mga yaon duman. (Jer. 15:10) An nagkapira sa saiyang mga kaiwal nagpakana pa tanganing pakaraoton sia. (Jer. 18:18) An iba nagpalakop nin grabeng huringhuding tanganing an mga sadiosan an puso dai maghimate sa mga katotoohan nin Dios na ihinuhulit ni Jeremias. (Lam. 3:61, 62) Nagpondo daw si Jeremias? Dai, imbes padagos siang naghulit. Paano nia ginibo iyan?

 8. Mantang nag-oorog an pagkontra ki Jeremias, ano an nagin reaksion nia?

⁸ An pangenot na panglaban ni Jeremias sa gabos na pagkontra iyo an pagtitiwala ki Jehova. Sa kapinonan kan ministeryo ni Jeremias, sia sinabihan nin Dios na sia sususteniran asin poprotehiran Nia. (Basahon an Jeremias 1:18, 19.) Nagtubod si Jeremias sa panugang iyan, asin dai sia pinabayaan ni Jehova. Mantang nag-oorog an panggigipit asin pagkontra sa saiya, sia orog man na nagigin pusoan, makosog an boot, asin matinagal. Mangnoha kun paano nakatabang na marhay sa saiya an mga kualidad na iyan.

9, 10. Anong mga pangyayari sa buhay ni Jeremias an makakadagka sa saindo na magin pusoan?

⁹ Sa sarong pangyayari, an rebeldeng mga saserdote asin propeta dinara si Jeremias sa atubangan kan mga prinsipe kan Juda tanganing ipagadan sia. Nagpondo daw si Jeremias huling natakot sa panghuhuma ninda? Dai. Epektibong marhay na pinahimutikan kan saiyang simbag an mga sahot kan mga apostatang idto kaya dai sia ginadan.—Basahon an Jeremias 26:11-16; Luc. 21:12-15.

¹⁰ Girumdomon na pagkatapos maghinanyog sa mapuersang mensahe kan propeta, pinandogan sia nin sarong opisyal sa templo na an ngaran Pasur. Siertong nagkongklusyon si Pasur na magkakaleksion si Jeremias asin masilensio na. Kaya binutasan sia ni Pasur kan sunod na aldaw. Alagad si Jeremias, na siertong nakokolgan pang gayo huli sa pasakit sa saiya, direktang nagtaram ki Pasur na sia hohokoman ni Jehova. Dawa an pagpasakit dai nanggad nakapaalo ki Jeremias! (Jer. 20:1-6) Taano man? Si Jeremias mismo nagsabi sa sato: “Si Jehova kaibanan ko siring sa makangingirhat na makakamhan. Kaya an mismong mga nagpepersegir sa sako magkakasiringkog asin dai manggagana.” (Jer. 20:11) Dawa kan mapaatubang si Jeremias sa maringis na mga nagkokontra, sia dai nagin matalaw. Marigon an saiyang pagtitiwala ki Jehova, asin kamo puede man na magin arog kaiyan.

11, 12. (a) Paano si Jeremias nagin madonong sa pagdesisyon kan sia kontrahon ni Hananias? (b) Ano an pakinabang kun kamo padagos na ‘magpupugol kun napapaatubang sa karatan’?

¹¹ Marahay na girumdomon na si Jeremias bakong panatiko. Sia nagin madonong sa pagdesisyon kun napapaatubang sa mga nagkokontra. Aram nia kun noarin mahale. Halimbawa, estudyare an naeksperyensiahan nia may koneksion ki Hananias. Pagkatapos na kontrahon sa publiko kan falsong propetang iyan an propetikong tataramon ni Jehova, sia itinanos ni Jeremias asin ipinaliwanag kaini kun paano mamimidbid an sarong tunay na propeta. Si Jeremias may darang kahoy na sakal na nangangahulogan na sinda mapapairarom sa sakal nin pang-ooripon kan Babilonya; grabe an kaanggotan ni Hananias kaya binari nia an sakal. May nakakaaram daw kan sunod na gigibohon ni Hananias? Kaya, ano an ginibo ni Jeremias? Mababasa niato: ‘Naglakaw na pahale an propeta.’ Iyo, naghale si Jeremias. Paghaloyhaloy, pinagbotan sia ni Jehova na bumalik asin sabihon ki Hananias an ipapaabot nin Dios—an mga Judio magigin oripon kan hade kan Babilonya asin magagadan si Hananias.—Jer. 28:1-17.

¹² Malinaw sa ipinasabong na pagkasaysay na ini na kun naghuhulit, kaipuhan na ibanan niato nin madonong na pagdesisyon an satong pagkapusoan. Kun an sarong kagharong habong akoon an sono sa Kasuratan na pangangatanosan asin maanggot, na nanghuhuma pa ngani, puede kitang magalang na magpaaram asin dumuman na sa sunod na harong. Dai kaipuhan na makiargumento sa siisay man mapadapit sa maogmang bareta kan Kahadean. Paagi sa padagos niatong ‘pagpupugol kun napapaatubang sa karatan,’ pinapagdadanay niatong bukas an oportunidad na tabangan an kagharong sa ibang panahon na mas paborable.—Basahon an 2 Timoteo 2:23-25; Tal. 17:14.

13. Taano ta sinabihan ni Jehova si Jeremias: “Dai ka matakot,” asin taano ta maninigo niatong estudyaran ini?

¹³ An tunay na mga nagsasamba naapektaran kan makatatakot na mga kamugtakan bago laglagon an Jerusalem kan 607 B.C.E. Huli kaini, masasabotan nindo kun taano ta sinabihan nin Dios si Jeremias: “Dai ka matakot.” (Jer. 1:8; Lam. 3:57) Asin pinagbotan sia ni Jehova na sabihon sa ibang mga kahimanwa nia an iyo man sanang nakakaparigon na mga tataramon. (Basahon an Jeremias 46:27.) Ano an manonodan niato digdi? Sa peligrosong panahon na ini kan katapusan, kun minsan makakamate kita nin takot. Sa siring na mga panahon, kita daw mahinanyog ki Jehova, na garo man sana sinasabihan kita: “Dai [kamo] matakot”? Sa enot na kabtang kan publikasyon na ini, inestudyaran niato kun paano si Jeremias tinabangan nin Dios durante kan talagang makatatakot na panahon na idto. Repasohon niato nin halipot an nangyari tanganing maheling niato an leksion kaiyan para sa sato.

14, 15. (a) Sa anong peligrosong situwasyon namugtak si Jeremias? (b) Paano inotob ni Jehova an panuga nia na poprotehiran si Jeremias?

¹⁴ Mantang hinihigpitan kan mga Babilonyo an Jerusalem, nagutom nin grabe an mga tawo. Dai naghaloy dakol an mayo nang kakanon. (Jer. 37:21) Mas grabe pa sa tiggutom, nalaom si Jeremias sa lugar na puedeng iyo na an magin lolobngan nia. An maluya an boot na si Hadeng Zedequias napirit kan mga prinsipe kan Juda na ipagadan si Jeremias. Dangan ihinulog ninda si Jeremias sa hararom na bubon. Mayo iyan nin tubig, puro sana laboy. Mantang si Jeremias naglulubog sa laboy, mayo na siang naheheling na paagi na ikaligtas an sadiri nia. Kun kamo an nasa kamugtakan na iyan, bako daw na matatakot kamo?—Jer. 38:4-6.

¹⁵ Si Jeremias tawo man arog niato, asin nagtiwala sia sa tataramon ni Jehova na sia nungkang papabayaan Nia. (Basahon an Jeremias 15:20, 21.) Binalosan daw ni Jehova an pagtitiwalang iyan? Aram niato na iyo nanggad. Pinahiro nin Dios si Ebed-melec na kontrahon an mga prinsipe asin iligtas si Jeremias. Sa permiso kan hade, an propeta ilinuwas ni Ebed-melec sa malaboy na bubon tanganing dai magadan dian.—Jer. 38:7-13.

16. Sa anong mga peligro ilinigtas ni Jehova an mga maimbod sa saiya?

¹⁶ Dawa kan si Jeremias ikaluwas na sa bubon, namemeligro pa man giraray sia. Sa pakiolay ni Ebed-melec para ki Jeremias, sinabi nia sa hade: “Magagadan sia sa namumugtakan nia huli sa tiggutom. Huli ta mayo nang tinapay sa siudad.” (Jer. 38:9) Kadikiton na an kakanon sa Jerusalem kaya an mga taga duman nagkakakan na nin laman nin tawo. Pero, nag-interbenir giraray si Jehova tanganing iligtas an saiyang propeta. Asin sinabi ni Jeremias ki Ebed-melec an garantiya na sia poprotehiran man ni Jehova. (Jer. 39:16-18) Dai nalingawan ni Jeremias an pag-asegurar nin Dios: “Ako kaibanan mo tanganing iligtas ka.” (Jer. 1:8) Huling iniingatan kan Makakamhan sa Gabos na Dios an duwang maimbod na lalaking iyan, dai sinda magagadan sa kamot nin mga kaiwal na tawo ni sa gutom. Dai sinda nagadan kan laglagon an siudad na iyan. Ano an punto? Si Jehova nanuga na matao nin proteksion asin inotob nia iyan.—Jer. 40:1-4.

17. Taano ta maninigo kamong magtubod sa panuga ni Jehova na poprotehiran an saiyang mga lingkod?

¹⁷ Dai mapupugolan an maabot na kulminasyon kan kaotoban kan hula ni Jesus manongod sa pagtatapos kan sistema nin mga bagay. Dai na mahahaloy, magkakaigwa nin “mga tanda sa saldang asin bulan patin mga bitoon, asin sa daga kahandalan nin mga nasyon, na dai naaaraman an gigibohon . . . mantang an mga tawo nalulunosan huli sa takot asin paghalat sa mga bagay na maabot sa ineerokan na daga.” (Luc. 21:25, 26) Dapat kitang maghalat tanganing maheling kun paano maootob an mga tandang iyan asin kun gurano kagrabeng pagkatakot an mamamatean nin dakol huli kaiyan. Pero, ano man an mangyari, dai nindo noarin man dapat pagdudahan an kakayahan asin pagmawot ni Jehova na iligtas an saiyang banwaan. Minsan siring, laen nanggad an kaaabtan kan mga dai nia inooyonan. (Basahon an Jeremias 8:20; 14:9.) Dawa pa kun an saiyang mga lingkod nasa kamugtakan na garo baga mayo nang paglaom, siring sa malaboy asin madiklom na bubon, kaya niang iligtas sinda! An mga tataramon nin Dios ki Ebed-melec aplikado sa saiyang banwaan: “‘Totoong gayo na ililigtas taka, asin dai ka mahuhulog sa tarom nin espada; asin siertong makakamtan mo an saimong kalag bilang samsam, huli ta nagtiwala ka sa sako,’ an sabi ni Jehova.”—Jer. 39:18.

18. (a) Anong mga tataramon an buminago sa buhay ni Jeremias? (b) Ano an kahulogan para sa saindo kan pagboot nin Dios sa Jeremias 1:7?

¹⁸ “Sa gabos na susugoan ko sa saimo, maninigo kang magduman; asin an gabos na ipagboboot ko sa saimo, maninigo mong itaram.” (Jer. 1:7) Nabago sagkod lamang an buhay ni Jeremias kan madangog nia an pagboot na iyan nin Dios. Poon kaidto, an nagin pangenot sa saiyang buhay iyo an ipahayag an “tataramon ni Jehova.” An pananaram na iyan paorootrong maheheling sa bilog na libro nin Jeremias. Sa huring kapitulo, isinaysay ni Jeremias an pagbihag sa Jerusalem asin an pagdistiero sa ultimong hade kaiyan na si Zedequias. Iyo, padagos na tinokdoan asin sinadol ni Jeremias an mga taga Juda na kuyogon si Jehova sagkod na nagin malinaw na tapos na nia an saiyang gibohon.

19, 20. (a) Taano ta marahay na arogon nindo an paglilingkod ni Jeremias? (b) Paano an paghuhulit konektado sa pakamate nin kagayagayahan asin pagkakontento? (c) Ano an epekto sa saindo kan pag-estudyar sa libro nin Jeremias asin Lamentacion?

¹⁹ Dakol an pagkakapareho kan asignasyon ki Jeremias asin kan pampublikong ministeryo kan Mga Saksi ni Jehova ngonyan. Arog nia, naglilingkod kamo sa tunay na Dios durante nin panahon nin paghokom. An ibang paninimbagan nangangaipo nin panahon asin kosog nindo; pero an paghuhulit kan maogmang bareta iyo nanggad an pinakamahalagang magigibo nindo sa sistemang ini nin mga bagay. Paagi kaiyan, pinapamuraway nindo an dakulang ngaran nin Dios asin inaako an saiyang lubos na deretso asin autoridad bilang Unibersal na Soberano. (Basahon an Lamentacion 5:19.) Ipinapaheling man nindo an pambihirang pagkamoot sa kapwa paagi sa pagtabang sa iba na mamidbid an tunay na Dios asin maaraman an saiyang mga kahagadan tanganing mabuhay.—Jer. 25:3-6.

²⁰ Ini an sinabi ni Jeremias mapadapit sa ipinapagibo sa saiya ni Jehova: “An saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova Dios nin mga hukbo.” (Jer. 15:16) An siring na paggayagaya asin pagkakontento naeeksperyensiahan kan gabos ngonyan na pinapahiro kan saindang puso na magtaram para sa tunay na Dios. Kun siring, may marahay na dahelan kamo na padagos na ipahayag an mensahe ni Jehova, arog kan ginibo ni Jeremias.