Si Jehova an Namomoon sa Sato!

“Kami kaipuhan na magkuyog sa Dios bilang poon kisa mga tawo.—GIBO 5:29.

1, 2. Anong apostolikong paninindogan an sinusunod kan mga Saksi ni Jehova kun an mga pagboot nin tawo nagtutumang sa saiyang banal na kabotan?

ITINOGOT ni Jehova Dios na darahon sa atubang kan korte suprema an 12 lalaki. Taon 33 C.E., asin an korte iyo an Judiong Sanhedrin. An binibista iyo an mga apostol ni Jesu-Cristo. Dangoga! ‘Kami nagboot sa saindo na dai magparatokdo basado sa ngaran na ini,’ an sabi kan halangkaw na saserdote, ‘alagad ta pinano na nindo an Jerusalem kan saindong katokdoan.’ Sa pagsimbag, si Pedro asin an ibang mga apostol nagsarabi: “Kami kaipuhan na magkuyog sa Dios bilang poon kisa mga tawo.” (Gibo 5:27-29) Sa kaagid na kahulogan sinabi ninda: “Si Jehova an Namomoon sa samo!”

² Iyo, si Jehova an Namomoon sa tunay na mga parasunod ni Jesus. Maliwanag ini sa libro nin Biblia na Gibo kan mga Apostol, na isinurat sa Roma kan mga 61 C.E. ni “Lucas an namomotan na parabolong.” (Colosas 4:14) Siring kan mga apostol, an banwaan ni Jehova ngonyan nagkukuyog sa langitnon na Namomoon sainda kun an mga pagboot nin tawo nagtutumang sa saiyang kabotan. Alagad ano pa an manonodan niato sa Gibo? (Sa personal na pag-adal, isinusuherir niamo na basahon nindo an mga kabtang kan libro na itinotokdo sa mas maitom an imprintang mga sitasyon.)

Pinagbotan ni Jesus an mga Saksi

 3. Kan an mga parasunod ni Jesus “nabautismohan sa banal na espiritu,” ano an saindang pangenot na katongdan?

³ Marigon na makapaninindogan sa Dios an mga apostol huli ta napakosog sinda sa espirituwal. Nagadan si Cristo sa hariging pasakitan, alagad aram ninda na binuhay na sia liwat. (1:1-5) “Pinatunayan nia na sia buhay” asin nagtokdo si Jesus nin mga katotoohan kan Kahadean sa nagmateryalisar na mga hawak sa laog nin 40 aldaw. Sinabihan man nia an saiyang mga disipulo na maghalat sa Jerusalem para sa bautismo “sa banal na espiritu.” Kun siring an paghuhulit an saindang magigin pangenot na katongdan, siring kan mga Saksi ni Jehova ngonyan.—Lucas 24:27, 49; Juan 20:19–21:24.

 4. Ano an nangyari kan an banal na espiritu nagdatong sa mga parasunod ni Jesus?

⁴ Dai pa nababautismohan sa banal na espiritu, an mga apostol salang gayong naghona na daganon na pamamahala an matapos kan pagsakop kan Roma kan naghapot sinda: “Kagurangnan, ibabalik mo ngonyan an kahadean sa Israel?” (1:6-8) Sa kaagid na kahulogan, sinabi ni Jesus na dai, huli ta ‘mayo sa sainda an pakaaram kan mga aldaw asin panahon.’ ‘Kun dumatong na sainda an banal na espiritu,’ ini magpapangyari sainda na magpatotoo dapit sa langitnon na Kahadean nin Dios, bako nin saro sa dagang ini. Maghuhulit sinda sa Jerusalem, Judea, asin Samaria, “patin sagkod sa kaporoporohi nin daga.” Sa tabang kan espiritu, an mga Saksi ni Jehova nagsasagibo kan siring na gibohon sa sokol na panbilog na globo sa mga huring aldaw na ini.

 5. Paano madatong si Jesus na kaagid kan sia maghale?

⁵ Itinao pa sana ni Jesus an pagboot na iyan na panbilog na kinaban na paghuhulit kan nagpoon siang magsakat sa langit. An pagsakat na iyan nagpoon na paitaas parayo sa saiyang mga disipulo, asin dangan naglaog si Jesus sa presensia kan saiyang langitnon na Namomoon asin sa gibohon sa rona nin espiritu. (1:9-11) Pakatapos na sarong panganoron an nagtago ki Jesus sa pagheling kan mga apostol, nagmateryalisar sia sa saiyang hawak na laman. Duwang anghel an naglataw asin nagsabing sia ‘madatong sa iyo man sanang paagi.’ Asin iyo man nanggad. An mga disipulo ni Jesus sana an nakaheling saiya kan maghale, siring na an mga Saksi ni Jehova sana an nakarisa kan saiyang dai naheheling na pagbalik.

Nagpili si Jehova

 6. Paano pinili an karibay ni Judas Iscariote?

⁶ Dai naghaloy an mga apostol nagbalik sa Jerusalem. (1:12-26) Sa sarong kuwarto sa itaas (tibaad sa harong kan ina ni Marcos, si Maria) an 11 maimbod na apostol nagdanay sa pamibi kairiba kan mga tugang sa ina ni Jesus, kan iba niang disipulo, asin kan saiyang ina, si Maria. (Marcos 6:3; Santiago 1:1) Alagad siisay an maako kan “katongdan nin pangataman” ni Judas? (Salmo 109:8) Mga 120 disipulo an presente kan pinili nin Dios an lalaking karibay kan nagpasaloib ki Jesus, si Judas, na ibinabalik sa 12 an bilang kan mga apostol. An mapipili maninigong saro na disipulo durante kan panahon kan ministeryo ni Jesus asin saksi kan saiyang pagkabuhay liwat. Siyempre, an tawong iyan maninigo man na midbidon si Jehova bilang an Namomoon saiya. Pakatapos nin pamibi, pinagpabunotan ninda si Matias asin si Jose Barsabas. Pinangyari nin Dios na mapili si Matias.—Talinhaga 16:33.

 7. (a) Paano si Judas “nagbakal nin daga paagi sa kabayadan para sa kabikoan”? (b) Paano nagadan si Judas?

⁷ Sierto nanggad na dai minidbid ni Judas Iscariote si Jehova bilang an Namomoon saiya. Tara, ipinasaloib nia an Aki nin Dios para sa 30 pidasong pirak! Ibinalik ni Judas an kuwartang iyan sa halangkaw na mga saserdote, alagad sinabi ni Pedro na an parapasaloib “nagbakal nin daga paagi sa kabayadan para sa kabikoan.” Paano? Bueno, nagtao sia nin kuwarta asin nin rason na magbakal kan “Daga nin Dugo,” siring kan pag-apod kaiyan. Kairiba ini kan planodong daga sa sur na kabtang kan Kababan nin Hinnom. An saiyang relasyon sa saiyang langitnon na Namomoon lubos nang naraot, si Judas “nagbitay sa sadiri.” (Mateo 27:3-10) Tibaad an pisi o an sanga kan kahoy naputol, kaya sia ‘nahulog na pabaliktad, na makosog na nagputok sa tahaw nia’ kan mahulog sia sa matatarom na gapo. Logod na mayo sa sato an magin falsong tugang!

Napano nin Banal na Espiritu!

 8. Kasuarin nabautismohan sa banal na espiritu an mga disipulo, asin ano an epekto?

⁸ Ano naman an manongod sa ipinanugang bautismo sa banal na espiritu? Nangyari iyan kan Pentecostes 33 C.E., sampulong aldaw pakatapos kan pagsakat sa langit ni Jesus. (2:1-4) Nakakapahiro nanggad nin boot an pangyayaring iyan nin bautismo! Imahinaron an eksena. Mga 120 disipulo an nasa kuwarto sa itaas kan ‘sa panale nagdatong hale sa langit an ribok na siring sa hagobohob nin makosog na doros na nakapano sa harong.’ Bako iyan doros, alagad garo kaagid an tanog. Sarong dila “na garo kalayo” an nagtogdon sa lambang disipulo asin apostol. “Sinda gabos nagkaparano nin banal na espiritu asin nagpoon na magtaram nin manlaenlaen na tataramon.” Kan nangyari an bautismong iyan, sinda pinaniaki man kan banal na espiritu, linahidan, asin tinatakan bilang tanda kan espirituwal na mana.—Juan 3:3, 5; 2 Corinto 1:21, 22; 1 Juan 2:20.

 9. Manongod sa ano an itinaram kan pano nin espiritung mga disipulo?

⁹ An pangyayaring ini nakaapektar sa mga Judio asin mga proselita sa Jerusalem gikan sa ‘lambang nasyon sa irarom kan langit.’ (2:5-13) Sa pagngalas naghapot sinda: ‘Taano ta an lambang saro sa sato nakakadangog sa tataramon kan saiyang namundagan?’ Tibaad idto an tataramon sa mga lugar siring sa Media (sirangan nin Judea), Frigia (sa Asia Minor), asin Roma (sa Europa). Mantang an mga disipulo nagtaram sa manlaenlaen na tataramon “dapit sa makangangalas na mga bagay nin Dios,” dakol na nagdadangog an nagngaralas, alagad an mga paratuya nagsuherir na sinda mga burat.

Nagtao si Pedro nin Nakakapahirong Patotoo

10. An pangyayari kan Pentecostes 33 C.E. nag-otob kan anong hula, asin igwa daw ini nin modernong panahon na kaagid?

¹⁰ Si Pedro nagpoon na magpatotoo paagi sa pagpaheling na an alas nuebe nin aga amay na gayo tanganing magin burat. (2:14-21) Imbes, an pangyayaring ini kaotoban kan panuga nin Dios na ibububo an banal na espiritu sa saiyang banwaan. Pinasabngan nin Dios si Pedro na itokdo an panahon niato paagi sa pagdugang kan mga tataramon na “sa mga huring aldaw” asin “sinda maghuhurula.” (Joel 2:28-32) Si Jehova magtatao nin mga ngangalasan sa langit asin nin mga tanda sa daga bago an saiyang dakulang aldaw, asin solamenteng idtong mga nag-aapod sa saiyang ngaran na may pagtubod an maliligtas. An kaagid na pagbubo nin espiritu sa mga linahidan an nagpangyari sainda na “maghula” na may dakulang kosog asin kakayahan ngonyan.

11. Manongod ki Jesus, ano an ginibo kan mga Judio asin nin Dios?

¹¹ Sunod na ipinamidbid ni Pedro an Mesiyas. (2:22-28) Pinatunayan nin Dios an pagigin Mesiyas ni Jesus paagi sa pagpangyari saiya na magsagibo nin mapangyaring mga gibo, mga tanda, asin mga ngangalasan. (Hebreo 2:3, 4) Alagad ipinako sia kan mga Judio sa harigi “paagi kan kamot kan mga tawong tampalasan,” an mga Romano na dai nagkukuyog kan pagboot nin Dios. Si Jesus “itinao paagi kan ihinatol asin patienot na kaaraman nin Dios” kaya ini an banal na kabotan. Alagad, si Jesus binuhay liwat nin Dios, asin kinua an saiyang hawak na tawo tanganing dai iyan makaeksperyensia nin kalapaan.—Salmo 16:8-11.

12. Ano an patienot na naheling ni David, asin depende sa ano an kaligtasan?

¹² An Mesiyanikong hula orog pang idinoon mantang nagpadagos an patotoo ni Pedro. (2:29-36) Sinabi niang patienot na natanaw ni David an pagkabuhay liwat kan saiyang pinakadakulang aki, si Jesus na Mesiyas. Gikan sa halangkaw na kamugtakan sa toong kamot nin Dios sa langit, ibinubo ni Jesus an banal na espiritu na inako hale sa saiyang Ama. (Salmo 110:1) An mga nagdadangog ki Pedro ‘nakaheling asin nakadangog’ kan paghiro kaini sa pakaheling kan mga dila na garo kalayo sa ibabaw kan mga payo kan mga disipulo asin pakadangog kan mga lenguahe kan ibang daga na itinaram ninda. Ipinaheling man nia na an kaligtasan depende sa pagmidbid ki Jesus bilang Kagurangnan asin Mesiyas.—Roma 10:9; Filipos 2:9-11.

Si Jehova Nagtatao nin Pag-oswag

13. (a) Tanganing angay na mabautismohan, ano an maninigong midbidon kan mga Judio asin mga proselita? (b) Pira an nabautismohan, asin ano an epekto sa Jerusalem?

¹³ Epektibo nanggad an mga tataramon ni Pedro! (2:37-42) An saiyang mga paradangog nagkarulugad sa puso sa pagkonsintir sa paggadan sa Mesiyas. Kaya nagsadol sia: “Magsorolsol kamo, asin an lambang saro logod saindo mabautismohan sa ngaran ni Jesu-Cristo para sa kapatawadan kan saindong mga kasalan, asin akoon nindo an daing bayad na regalo nin banal na espiritu.” An mga Judio asin mga proselita nagmimidbid na ki Jehova bilang Dios asin kan saindang pangangaipo para sa saiyang espiritu. Nangangaipo sinda ngonyan na magsolsol asin akoon si Jesus bilang an Mesiyas tanganing mabautismohan sa ngaran (akoon an katongdan asin gibohon) kan Ama, kan Aki, asin kan banal na espiritu. (Mateo 28:19, 20) Sa pagpatotoo sa mga Judio asin proselitang idto, ginamit ni Pedro an enot na espirituwal na liyabe na itinao saiya ni Jesus sa pagbukas kan pintuan nin kaaraman asin oportunidad para sa nagtutubod na mga Judio na makalaog sa langitnon na Kahadean. (Mateo 16:19) Kan sarong aldaw na iyan, 3,000 an nabautismohan! Imahinaron an kadakol na saksi ni Jehova na iyan na naghuhulit sa sadit na teritoryo kan Jerusalem!

14. Taano asin sa anong paagi an mga nagtutubod nagkaigwang “iriba kan gabos na bagay”?

¹⁴ An dakol na hale sa hararayong lugar nagkulang nin mga probisyon para sa mas halawig na pag-ontok alagad nagmawot na makanood nin orog pa manongod sa saindang bagong pagtubod asin maghulit sa iba. Kaya an enot na mga parasunod ni Jesus mamomoton na nagtabang sa lambang saro, siring kan ginigibo kan mga Saksi ni Jehova ngonyan. (2:43-47) An mga nagtutubod temporaryong nagkaigwa kan “gabos na bagay para sa gabos.” Ipinabakal kan iba an saindang rogaring, asin an mga pondo idinistribuwir sa siisay man na nangangaipo. Ini an marahay na pagpoon kan kongregasyon mantang ‘idinudugang ni Jehova aroaldaw an mga naliligtas.’

An Pagpaomay Asin an mga Resulta Kaini

15. Ano an nangyari mantang si Pedro asin Juan naglaog sa templo, asin ano an nagin reaksion kan mga tawo?

¹⁵ Sinuportaran ni Jehova an mga parasunod ni Jesus paagi sa “mga tanda.” (3:1-10) Kaya, kan alas 3:00 n.h. mantang si Pedro asin Juan naglaog sa templo para sa oras nin pamimibi na kairiba sa pag-atang sa banggi, sarong lalaking lopog magpoon kan saiyang pagkamundag an harani sa Magayon na Tata na naghahagad nin “mga balaog nin pagkaherak.” ‘Mayo ako nin pirak ni bulawan,’ an sabi ni Pedro, ‘alagad an nasa sako iyo an itatao ko saimo: Sa ngaran ni Jesu-Cristo na taga-Nazaret, lumakaw ka!’ An lalaki naomayan tolos-tolos! Mantang naglaog sia sa templo na “naglalakaw asin naglulukso asin nag-oomaw sa Dios,” an mga tawo ‘napano nin pagngalas.’ Tibaad nagirumdoman nin iba an mga tataramon: “An pilay matukad na garo usa.”—Isaias 35:6.

16. Paano napaomayan kan mga apostol an lalaking lopog?

¹⁶ An nagngaralas na mga tawo nagtiripon sa portiko ni Salomon, an may atop na media-agua sa sirangan na kabtang kan templo. Duman nagpatotoo si Pedro. (3:11-18) Ipinaheling nia na pinangyari nin Dios an mga apostol na paomayan an lalaking lopog paagi kan Saiyang pinamuraway na Lingkod, si Jesus. (Isaias 52:13–53:12) Pinaindahan kan mga Judio “iyan na banal asin matanos na saro”; minsan siring binuhay sia liwat ni Jehova. Minsan siring na an mga tawo asin an saindang mga poon dai nakaaram na an Mesiyas an saindang ipinagadan, sa siring inotob nin Dios an makahulang mga tataramon na an “saiyang Cristo magtitios.”—Daniel 9:26.

17. (a) Anong aksion an maninigong gibohon kan mga Judio? (b) Ano an nangyari magpoon kan ‘isinugo si Cristo’ sa panahon niato?

¹⁷ Huli sa saindang tratamiento sa Mesiyas, ipinaheling ni Pedro kun ano an maninigong gibohon kan mga Judio. (3:19-26) Kaipuhan sindang “magsorolsol,” o mamondo huli sa saindang mga kasalan, asin “magbakle,” o makombertir, na ginigibo an kabaliktaran na paagi. Kun nagsagibo sinda nin pagtubod ki Jesus bilang an Mesiyas, inako an pantubos, madatong an kaginhawahan sa sainda hale ki Jehova bilang idtong mga pinatawad sa mga kasalan. (Roma 5:6-11) Pinagirumdoman an mga Judio na sinda mga aki kan tipan na ginibo nin Dios sa saindang mga magurang, na sinasabi ki Abraham: “Sa saimong banhi an gabos na pamilya kan daga mabebendisyonan.” Kaya enot na isinugo nin Dios an saiyang Mesiyanikong lingkod tanganing iligtas an nagbakleng mga Judio. Nakaiinteres, magpoon kan ‘isinugo si Cristo’ sa kapangyarihan kan langitnon na Kahadean kan 1914, nagkaigwa nin nakagiginhawang pagbalik kan mga katotoohan asin teokratikong organisasyon sa tahaw kan mga Saksi ni Jehova.—Genesis 12:3; 18:18; 22:18.

Dai Sinda Nag-ontok!

18. Ano an “gapo” na isinikwal kan Judiong “mga paratogdok,” asin sa kiisay sana igwa nin kaligtasan?

¹⁸ Naanggot huli ta si Pedro asin Juan nagpahayag kan pagkabuhay liwat ni Jesus, ipinabilanggo sinda kan halangkaw na mga saserdote, kan poon sa templo, asin kan mga Saduceo. (4:1-12) An mga Saduceo dai nagtutubod sa pagkabuhay liwat, alagad dakol pang iba an nagin mga paratubod, an mga lalaki sana may bilang na mga 5,000. Kan siniyasat sa atubang kan korte suprema sa Jerusalem, sinabi ni Pedro na an lopog naomayan “sa ngaran ni Jesu-Cristo na taga-Nazaret,” na ipinako ninda alagad binuhay liwat nin Dios. An “gapong” ini na isinikwal kan Judiong “mga paratogdok” nagin “an pamayuhan kan anggulo.” (Salmo 118:22) “Dugang pa,” sinabi ni Pedro, “mayo nin kaligtasan sa siisay pa man.”

19. Kan pinagbotan na mag-ontok sa paghuhulit, paano nagsimbag an mga apostol?

¹⁹ Nagkaigwa nin pagmamaigot na ontokon an siring na orolay. (4:13-22) Presente an napaomayan na lalaki, imposibleng paindahan ining “mahalagang tanda,” alagad pinagbotan si Pedro asin Juan na ‘dai na magtaram o magtokdo sa ngaran ni Jesus.’ An simbag ninda? ‘Dai kami puwedeng mag-ontok sa pagtaram dapit sa mga bagay na samong naheling asin nadangog.’ Kinuyog ninda si Jehova bilang an Namomoon sainda!

Sinimbag an mga Pamibi!

20. Para sa ano namibi an mga disipulo, asin ano an resulta?

²⁰ Siring sa mga Saksi ni Jehova na namimibi sa mga pagtiripon, an mga disipulo namibi kan an binutasan na mga apostol nagbareta kan nangyari sainda. (4:23-31) Narisa na an mga poon na si Herodes Antipas asin si Poncio Pilato, kaibanan an mga Romanong Hentil asin an mga banwaan sa Israel, nagtiripon tumang sa Mesiyas. (Salmo 2:1, 2; Lucas 23:1-12) Bilang simbag sa pamibi, pinano ni Jehova an mga disipulo nin banal na espiritu, kaya sinda nagtaram kan tataramon nin Dios na may kapusoan. An Namomoon sainda dai hinagadan na iontok an paglamag kundi pangyarihon sindang maghulit na may kapusoan sa ibong kaini.

21. Siisay si Bernabe, asin anong mga kuwalidad an yaon saiya?

²¹ An mga nagtutubod padagos na iribang nagkaigwa kan gabos na bagay, asin mayo ni saro na nangangaipo. (4:32-37) An saro na nagkontribuwir iyo an Levitang si Jose kan Chipre. Nginaranan sia kan mga apostol na Bernabe, na nangangahulogan “Aki nin Karangahan,” posibleng huli ta sia matinabang asin matinao. Sierto nanggad, kita gabos nagmamawot na magin siring kaiyan na klase nin tawo.—Gibo 11:22-24.

Nahayag an mga Putikon

22, 23. Ano an kasalan ni Ananias asin Safira, asin paano kita makikinabang sa saindang eksperyensia?

²² Alagad, si Ananias asin an saiyang agom, si Safira, nag-ontok sa pagmidbid ki Jehova bilang Namomoon sainda. (5:1-11) Nagpabakal sinda nin daga asin itinago an ibang kuwarta mantang nagsasaginsagin na itinao ini gabos sa mga apostol. An kaaraman na itinao kan banal na espiritu nagpangyari ki Pedro na maaraman an saindang pagsaginsagin, na nagsagkod sa saindang kagadanan. Patanid nanggad ini sa mga sinusugotan ni Satanas na magin tuso!—Talinhaga 3:32; 6:16-19.

²³ Pakatapos kan insidenteng ini, mayo nang may maraot na mga motibo an nagkaigwa nin kapusoan na makiiba sa mga disipulo. An iba nagturubod. (5:12-16) Dugang pa, mantang an mga may helang asin pinasasakitan nin marompot na mga espiritu nagsagibo nin pagtubod sa kapangyarihan nin Dios, ‘sinda gabos nagkaoromayan.’

Magkuyog sa Dios Kisa mga Tawo

24, 25. Taano an Judiong mga lider ta linamag an mga apostol, alagad anong pamantayan an itinao kan mga maimbod na ini para sa gabos na lingkod ni Jehova?

²⁴ An halangkaw na saserdote asin an mga Saduceo nagmaigot na ngonyan na olangon an makangangalas na pag-oswag paagi sa pagbilanggo sa gabos na apostol. (5:17-25) Alagad kan bangging iyan binutasan sinda kan anghel nin Dios. Asin sa pagkaaga nagtokdo sinda sa templo! An paglamag dai nagpaontok sa mga lingkod ni Jehova.

²⁵ Alagad, nagkaigwang pangigipit kan an mga apostol dinara sa atubang kan Sanhedrin. (5:26-42) Alagad, kan pinagbotan na mag-ontok sa pagtotokdo, sinabi ninda: “Kami kaipuhan na magkuyog sa Dios bilang poon kisa mga tawo.” Nagtao ini nin pamantayan para sa mga disipulo ni Jesus, an saro na sinusunod kan mga Saksi ni Jehova ngonyan. Pakatapos na patanidan kan paratokdo sa Pagboot na si Gamaliel, hinampak kan mga lider an mga apostol, na pinagbotan sindang mag-ontok sa paghuhulit, asin binutasan sinda.

26. Paano an ministeryo kan mga apostol ikakokomparar sa mga Saksi ni Jehova ngonyan?

²⁶ Maogma an mga apostol na ibinilang sindang angay na magtios nin kasopganan huli sa ngaran ni Jesus. “Asin aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta.” Iyo, mga ministro sinda sa harong-harong. Siring man an modernong panahon na mga Saksi nin Dios, na nag-ako man kan saiyang espiritu huli ta nagkukuyog sinda saiya asin nagsasabi, “Si Jehova an Namomoon sa Sato!”

Paano Kamo Masimbag?

◻ Anong pagboot an inotob kan mga parasunod ni Jesus, kan nakaagi asin sa presente?

◻ Ano an nangyari kan aldaw nin Pentecostes 33 C.E.?

◻ Kasuarin asin paano ginamit ni Pedro an enot na espirituwal na liyabe na itinao saiya ni Jesus?

◻ Ano an manonodan niato sa eksperyensia ni Ananias asin Safira?

◻ Kun pinagbotan na mag-ontok sa paghuhulit, anong pamantayan an itinao kan mga apostol para sa gabos na Saksi ni Jehova?