‘Mamutan Mo si Jehova na Saimong Diyos’

 1. Taano ta lalong nagrarom an pagkamuot nin Diyos asin kan Aki sa lambang saro?

IPINAHAYAG kan Aki ni Jehova na si Jesu-Cristo: ‘Ako namumuot sa Ama.’ (Juan 14:31) Sinabi man ni Jesus: ‘An Ama namumuot sa Aki.’ (Juan 5:20) Dai ta iyan maninigong ikangalas. Tutal, sa laog nin halawigon na panahon bago nagin tawo si Jesus, siya an ekspertong trabahador nin Diyos. (Tal. 8:30) Mantang magkaibanan na nagtrabaho si Jehova asin si Jesus, dakul an nanudan kan Aki dapit sa mga kuwalidad kan saiyang Ama asin kadakul an dahilan niya tanganing mamutan Siya. An totoo, an dayupot na pag-ibanan an malinaw na dahilan kaya lalong nagrarom an pagkamuot ninda sa lambang saro.

 2. (a) Ano an kalabot sa pagkamuot? (b) Anong mga hapot an pag-uulayan ta?

² Kalabot sa pagkamuot an pakamati nin hararom na kapadangatan sa sarong tawo. Mababasa ta sa Bibliya: “Si Jehova mamumuton na marhay sa kapadangatan.” (Sant. 5:11, NW) Huling padangat kita nin Diyos, dapat na arog man kaiyan an mamatian ta sa saiya. Kun kinukuyog ta si Jehova, ipapahiling niya an pagkamuot niya sa sato. (Basahon an Deuteronomio 7:12, 13.) Pero talaga daw na puwede tang mamutan an Diyos dawa dai ta siya nahihiling? Ano an buot sabihon kan mamutan si Jehova? Taano ta dapat ta siyang mamutan? Asin paano ta maipapahiling an satong pagkamuot sa Diyos?

3, 4. Taano ta puwede tang mamutan si Jehova?

³ ‘An Diyos Espiritu’; huli kaiyan, dai ta siya nahihiling. (Juan 4:24) Pero, puwede tang mamutan si Jehova, asin pinagbubutan kita kan Kasuratan na ipahiling an pagkamuot na iyan. Halimbawa, sinabihan ni Moises an mga Israelita: ‘Mamutan mo si Jehova na saimong Diyos sa bilog mong puso asin sa bilog mong kalag asin sa bilog mong [kusog].’—Deut. 6:5.

⁴ Taano ta puwede kitang magkaigwa nin hararom na pagkamuot sa Diyos? Huling linalang niya kita na may espirituwal na pangangaipo asin tinawan niya kita nin kakayahan na magpahiling nin pagkamuot. Kun napapaniguan nin tama an satong espirituwal na pangangaipo, nagrararom an pagkamuot ta ki Jehova asin igwa kita nin marigon na basehan na magin maugma. “Maugma an mga nakakamati kan saindang espirituwal na pangangaipo,” an sabi ni Jesus, “huli ta sainda an Kahadian kan kalangitan.” (Mat. 5:3, NW) Mapadapit sa inaapod kan iba na natural na kamawutan nin mga tawo na sumamba, sinasabi: “Maninigo kitang magkaigwa nin may pagkangirhat na paggalang, pagngalas asin reberensiya huling nahihiling ta na dakul na tawo an naghahanap asin naniniwala sa sarong supremong persona.”—Man Does Not Stand Alone, ni A. C. Morrison.

 5. Paano ta naaaraman na puwedeng manumpungan an Diyos?

⁵ Puwede daw niyatong manumpungan an Diyos? Iyo, huling gusto niyang manumpungan ta siya. Lininaw iyan ni apostol Pablo kan siya magpatotoo sa sarong grupo na nagtitiripon sa Areopago. Nangyari iyan sa lugar na natatanaw an Partenon—sarong templo na ginibo para ki Atena, an patron na diyosa kan suanoy na Atenas. Imahinaron na yaon ka duman mantang si Pablo nagtataram manungod sa ‘Diyos na naggibo kan kinaban asin kan gabos na yaon diyan’ dangan ipinaliwanag niya na Siya ‘dai nag-iirok sa mga templo na ginibo nin mga kamot.’ Sinabi pa kan apostol na ginibo nin Diyos hali ‘sa saro sana an gabos na nasyon nin mga tawo tanganing mag-irok sa bilog na daga, pakatalaani sainda kan saindang mga panahon asin kan kasagkudan kan saindang irukan, tanganing sinda maghanap sa Diyos, ta tibaad pa [mahanap] siya asin makua ninda, minsan siya bakong harayo sa lambang saro sa sato.’ (Gui. 17:24-27) Iyo, puwedeng manumpungan nin mga tawo an Diyos. Labing pito may kabangang milyon na Saksi ni Jehova an talagang ‘nakua’ siya—asin tunay nanggad na namumutan ninda siya.

 6. Ano an sinabi ni Jesus na ‘pinakadakula asin inot na pagbuot’?

⁶ An pagkamuot niyato ki Jehova dapat na gikan sa puso. Lininaw iyan ni Jesus kan maghapot an sarong Fariseo: ‘Paratukdo, arin an pinakadakulang pagbuot sa Katugunan?’ Si Jesus nagsimbag: ‘“Mamutan mo si Jehova na saimong Diyos sa bilog mong puso asin sa bilog mong kalag patin sa bilog mong isip.” Ini iyo an pinakadakula asin an inot na pagbuot.’—Mat. 22:34-38.

 7. Ano an buot sabihon kan mamutan an Diyos sa (a) ‘bilog niyatong puso’? (b) ‘bilog niyatong kalag’? (c) ‘bilog niyatong isip’?

⁷ Ano an buot sabihon ni Jesus kan sabihon niyang dapat tang mamutan an Diyos sa ‘bilog niyatong puso’? An buot niyang sabihon iyo na dapat tang mamutan si Jehova sa bilog niyatong piguratibong puso, na kalabot diyan an satong mga pagmawot, emosyon, asin sabuot. Dapat man niyatong mamutan siya sa ‘bilog niyatong kalag,’ o buhay asin pagkatawo niyato. Dugang pa, dapat tang mamutan an Diyos sa ‘bilog niyatong isip,’ o kan bilog niyatong intelihensiya. Kaya idinuduon ni Jesus na dapat na lubos niyatong mamutan si Jehova.

 8. An lubos na pagkamuot sa Diyos mapahiro sa sato na gibuhon an ano?

⁸ Kun namumutan ta an Diyos sa bilog niyatong puso, kalag, asin isip, magigin mahigos kitang estudyante kan saiyang Tataramon, bilog na puso tang gigibuhon an mga katuyuhan niya, asin maigot tang ipapahayag an maugmang bareta kan Kahadian. (Mat. 24:14; Roma 12:1, 2) An tunay na pagkamuot ki Jehova urog na mapadayupot sato sa saiya. (Sant. 4:8) Siyempre, bakong posible na ilista an gabos na dahilan kun taano ta dapat tang mamutan an Diyos. Minsan siring, pag-ulayan ta an pira sana sa mga iyan.

 9. Taano ta namumutan mo si Jehova bilang an satong Kaglalang asin Paratao?

⁹ Si Jehova an satong Kaglalang asin Paratao. ‘Huli sa saiya kita nabubuhay asin naghihiro patin [nag-eeksister],’ an sabi ni Pablo. (Gui. 17:28) Itinao sa sato ni Jehova an satong magayunon na istaran na daga. (Sal. 115:16) Nagtao man siya nin kakanon asin iba pang bagay na kaipuhan ta tanganing mabuhay kita. Kaya, puwedeng sabihon ni Pablo sa idolatrosong mga taga Listra na an ‘Diyos na buhay dai nagpabaya na dai magkaigwa nin saksi na siya naggibo nin marahay, asin nagtao sa saindo nin mga uran na hali sa langit asin mga panahon nin tigbungahan, na pinapano niya an saindong mga puso nin kakanon asin nin kaugmahan.’ (Gui. 14:15-17) Bako daw na dahilan iyan tanganing mamutan an Kahuruhalangkawing Kaglalang asin mamumuton na Paratao?—Par. 12:1.

10. Ano an dapat na magin sabuot niyato sa probisyon nin Diyos na paghali kan kasalan asin kagadanan?

¹⁰ Ginibong posible nin Diyos an paghali kan kasalan asin kagadanan na minana ta ki Adan. (Roma 5:12) Tunay nanggad, ‘ipinapamidbid nin Diyos an saiyang sadiring pagkamuot sa sato, huli ta kan kita mga parakasala pa, si Cristo nagadan dahil sa sato.’ (Roma 5:8) Daing duda, an satong puso pano-pano nin pagkamuot ki Jehova huli ta ginibo niyang posible na mag-ako kita nin kapatawadan sa mga kasalan ta kun kita nagsusulsol asin nagtutubod sa atang na pantubos ni Jesus.—Juan 3:16.

11, 12. Sa anong mga paagi kita tinawan ni Jehova nin paglaom?

¹¹ Si Jehova nagtatao nin paglaom na ‘nagpapano sa sato nin kaugmahan asin katuninungan.’ (Roma 15:13) Huli sa tao nin Diyos na paglaom, natatagalan ta an mga pagbalo sa pagtubod. An mga linahidan na nagin ‘maimbod sagkod sa kagadanan tatawan kan korona nin langitnon na buhay.’ (Kap. 2:10) An mga may daganon na paglaom na pinapagdanay an saindang integridad magkakamit nin daing sagkod na mga bendisyon sa ipinanugang Paraiso sa bilog na daga. (Luc. 23:43) Ano an natural na reaksiyon ta sa siring na mga paglaom? Bako daw na napapano kita nin kaugmahan asin katuninungan, saka pagkamuot sa Kagtao kan ‘gabos na marahay na balaog asin kan gabos na sangkap na balaog’?—Sant. 1:17.

¹² Tinawan kita nin Diyos kan nakakaugmang paglaom na pagkabuhay liwat. (Gui. 24:15) Siyempre, namumundo nanggad kita sa pagkagadan nin sarong namumutan, pero huli sa paglaom na pagkabuhay liwat, dai kita ‘nagmumundo siring kan iba na dai nin paglaom.’ (1 Tes. 4:13) Huli sa pagkamuot, gustong-gusto nin Diyos na Jehova na buhayon an mga gadan, lalo na an mga maimbod, arog kan matanos na si Job. (Job 14:15) Imahinaron an maugmahon na pag-iriba-iba giraray sa panahon na an mga binuhay liwat maugmang sasabaton digdi sa daga. An satong puso pano-pano nanggad nin pagkamuot para sa satong Ama sa langit na nagtao sa sato kan makangangalas na paglaom na pagkabuhay liwat!

13. Ano an ebidensiya na talagang nagmamakulog sa sato an Diyos?

¹³ Talagang nagmamakulog sa sato si Jehova. (Basahon an Salmo 34:6, 18, 19; 1 Pedro 5:6, 7.) Huling aram ta na an satong mamumuton na Diyos pirming andam na tumabang sa mga maimbod sa saiya, tiwasay an pagmati ta bilang kabtang kan aripumpon kan saiyang pasabsaban. (Sal. 79:13) Dugang pa, an pagkamuot nin Diyos sa sato magigin risang-risa sa gigibuhon niya para sa sato paagi sa Mesiyanikong Kahadian. Pag hinali na kan pinili niyang Hadi na si Jesu-Cristo an kadahasan, pang-aapi, asin karatan sa daga, bebendisyunan an makinuyog na katawuhan nin nagdadanay na katuninungan asin abundansiya. (Sal. 72:7, 12-14, 16) Bako daw na mauyon ka na an siring na paglaom nagtatao sa sato nin dahilan na mamutan an satong mapagmakulog na Diyos sa bilog niyatong puso, kalag, kusog, asin isip?—Luc. 10:27.

14. Anong dakulaon na pribilehiyo an itinao sa sato nin Diyos?

¹⁴ Itinao sa sato ni Jehova an dakulaon na pribilehiyo na maglingkod bilang mga Saksi niya. (Isa. 43:10-12) Namumutan ta an Diyos huling tinawan niya kita nin oportunidad na suportaran an saiyang soberaniya asin magdara nin tunay na paglaom sa mga tawo sa kinaban na ini na pano nin problema. Dugang pa, makakataram kita na may pagtubod asin kumbiksiyon huling ipinapahayag ta an maugmang bareta na nakabasar sa Tataramon kan tunay na Diyos, na an mga panuga nagtatao nin paglaom asin pirming nauutob. (Basahon an Josue 21:45; 23:14.) Siyempre, dakulon pa an bendisyon asin dahilan na mamutan si Jehova. Pero paano ta maipapahiling an pagkamuot niyato sa saiya?

15. Paano kita matatabangan kan pag-adal asin pag-aplikar kan Tataramon nin Diyos?

¹⁵ Mahigos na pag-adalan asin iaplikar an Tataramon nin Diyos. An paggibo kaiyan nagpapahiling na namumutan ta si Jehova asin talagang gusto ta na an tataramon niya magin ‘liwanag sa satuyang dalan.’ (Sal. 119:105) Kun napupurisaw kita, mararanga kita kan mamumuton na mga pag-asegurar na arog kaini: ‘An puso na baraak asin mapakumbaba dai mo isisikwal, O Diyos.’ ‘An saimong pagkahirak, O Jehova, nangangataman sa sako. Sa kadaklan nin sakong mga [kahaditan], an saimong mga karangahan nakakaranga sa sakuyang kalag.’ (Sal. 51:17; 94:18, 19) Si Jehova asin si Jesus nagpapahiling nin pagkahirak sa mga nagsasakit. (Isa. 49:13; Mat. 15:32) Paagi sa pag-adal sa Bibliya, mas maaaraman ta nanggad an mamumuton na pagmakulog ni Jehova sa sato kaya mapapahiro kitang magkaigwa nin hararom na pagkamuot sa saiya.

16. Paano an regular na pamimibi nagpapararom kan satong pagkamuot sa Diyos?

¹⁶ Regular na mamibi sa Diyos. An satong mga pamibi urog na mapadayupot sa sato sa ‘Naghihinanyog kan pamibi.’ (Sal. 65:2) Kun nahihiling ta na sinisimbag nin Diyos an satong mga pamibi, minararom an pagkamuot ta sa saiya. Halimbawa, tibaad nahihiling ta na dai niya kita tinutugutan na matentaran nin labi sa satong makakaya. (1 Cor. 10:13) Kun nahahadit kita asin udok na mamimibi ki Jehova, puwede tang mamatian an daing kaparehong ‘katuninungan nin Diyos.’ (Fil. 4:6, 7) Kun beses, puwede kitang mamibi nin silensiyo—arog kan ginibo ni Nehemias—asin marerealisar ta na sinimbag iyan. (Neh. 2:1-6) Mantang kita “nagdadanay nin maigot sa pamibi” asin nahihiling ta na sinisimbag ni Jehova an mga pakimahirak ta, nagrararom an satong pagkamuot sa saiya pati an satong kumpiyansa na tatabangan niya kita na maatubang an urog pang mga pagbalo sa pagtubod.—Roma 12:12.

17. Kun namumutan ta an Diyos, paano niyato mamansayon an pag-atender sa pagtiripon?

¹⁷ Ugalion na mag-atender sa Kristiyanong mga pagtiripon, asembleya, asin kumbensiyon. (Heb. 10:24, 25) Nagtitiripon kaidto an mga Israelita para magdangog asin makanuod dapit ki Jehova tanganing magkaigwa sinda nin hararom na paggalang sa saiya asin mautob an saiyang Ley. (Deut. 31:12) Bakong pagabat an pagsunod sa kabutan nin Diyos kun talagang namumutan ta siya. (Basahon an 1 Juan 5:3.) Kun siring, dai ta nuarin man pagtugutan an ano man na magin dahilan na baliwalaon ta an pag-atender sa pagtiripon. Siguradong habo niyato na an ano man na bagay magin dahilan na mawara an satong inot na pagkamuot ki Jehova.—Kap. 2:4.

18. An pagkamuot sa Diyos nagpapahiro sa sato na gibuhon an ano may koneksiyon sa maugmang bareta?

¹⁸ Maigot na sabihon sa iba an katotoohan kan maugmang bareta. (Gal. 2:5) An pagkamuot ta sa Diyos nagpapahiro sa sato na magtaram dapit sa Mesiyanikong Kahadian kan saiyang namumutan na Aki, na mangangabayo para sa “katotoohan” sa Armagedon. (Sal. 45:4; Kap. 16:14, 16) Sarong kagaya-gayahan nanggad na makikabtang sa paggibo nin mga disipulo paagi sa pagtabang sa mga tawo na makanuod dapit sa pagkamuot nin Diyos asin sa panuga niyang bagong kinaban!—Mat. 28:19, 20.

19. Taano ta maninigo tang apresyaron an areglo ni Jehova sa pagpastor kan saiyang aripumpon?

¹⁹ Apresyaron an areglo nin Diyos sa pagpastor kan saiyang aripumpon. (Gui. 20:28) Si Jehova pirming minahiro para sa pinakaikakarahay niyato kaya itinao niya sa sato an Kristiyanong mga elder. An mga elder siring sa ‘pailihan tumang sa duros asin pailihan tumang sa alon, garo mga sapa nin tubig sa daga nin tighuraw, garo limpoy nin sarong dakulang gapo sa mainit na daga.’ (Isa. 32:1, 2) Inaapresyar nanggad niyato an sarong pahiplian sa makusog na duros o sa maliputon na bagyong mauranon! Kun mainiton an saldang, nagpapasalamat kita sa limpoy na itinatao nin dakulang gapo. An mga pananaram na ini na may piguratibong kahulugan nakakatabang sa sato na mahiling na an mga elder nagtatao nin kinakaipuhan na espirituwal na tabang asin kaginhawahan. Paagi sa pagsunod sa mga nanginginot sa sato, ipinapahiling ta na inaapresyar niyato an ‘balaog na mga lalaking’ ini asin ebidensiya iyan kan pagkamuot ta sa Diyos asin ki Cristo, an Payo kan kongregasyon.—Efe. 4:8; 5:23; Heb. 13:17.

20. Kun namumutan mo an Diyos, paano ka mahiro kauyon kan Santiago 1:22-25?

²⁰ Kun namumutan mo si Jehova, magigin ‘paragibo ka kan tataramon, asin bako sanang paradangog.’ (Basahon an Santiago 1:22-25.) An ‘paragibo’ may pagtubod na minaresulta sa mga gibo na arog kan maigot na paghuhulit asin pakikikabtang sa Kristiyanong mga pagtiripon. Huling namumutan mo talaga an Diyos, kukuyugon mo an perpektong ley ni Jehova, na kaiba diyan an gabos na hinahagad niya sa saimo.—Sal. 19:7-11.

21. Sa ano puwedeng iagid an saimong udok sa pusong mga pamibi?

²¹ An pagkamuot ki Jehova Diyos an mapahiro sa saimo na parating dumulok sa saiya paagi sa udok sa pusong pamibi. Ikinukumparar an saiyang pamibi sa pagtutong nin insenso na kahagadan sa tipan na Ley, an salmistang si David nag-awit: ‘Akuon mo [Jehova] an sakong pamibi siring sa insenso; asin an initaas kong mga kamot bilang pamangging atang.’ (Sal. 141:2, An Marahay na Bareta Biblia; Ex. 30:7, 8) An saimo lugod na mapakumbabang mga pakikimahirak, udok na mga pagngayo-ngayo, asin udok sa pusong mga tataramon nin pag-umaw saka pasasalamat sa Diyos magin arog sa mahamot na insenso na nagsisimbolisar sa mga pamibi na inaako nin Diyos.—Kap. 5:8.

22. Anong klaseng pagkamuot an tutukaron ta sa masunod?

²² Sinabi ni Jesus na dapat tang mamutan an Diyos asin siring man an satong kapwa. (Mat. 22:37-39) Arog kan mahihiling ta sa dugang pang pagtukar sa kuwalidad na ini, an pagkamuot ta ki Jehova asin sa saiyang mga prinsipyo makakatabang sa sato na magkaigwa nin marahay na relasyon sa mga tawo asin magpahiling nin pagkamuot sa satong kapwa.