Mga Tawo na Naghuhulit—Gikan sa Buot na Nagpepresentar an mga Ministro

1, 2. Anong dakulang gibuhon an ihinula ni Jesus, asin ano an mahalagang hapot?

AN MGA namamahala sa pulitika parating nanunuga pero dai iyan nauutob. Dawa an mga may pinakamarahay na intensiyon tibaad dai makautob kan mga ipinanuga ninda. Nakakaugma na kabaliktaran kaiyan, pirming inuutob kan Mesiyanikong Hadi, si Jesu-Cristo, an mga panuga niya.

² Kan magin Hadi si Jesus kan 1914, andam na siyang utubon an ihinula niya mga 1,900 na taon na an nakalihis. Kan madali na siyang magadan, ihinula niya: ‘Ining ebanghelyo kan Kahadian ihuhulit sa bilog na kinaban.’ (Mat. 24:14) An kautuban kaiyan magigin kabtang kan tanda kan saiyang presensiya bilang tagapamahala kan Kahadian. Minsan siring, may mahalagang hapot: Paano an Hadi maorganisar nin sarong hukbo na andam na maghulit sa huring mga aldaw—sarong panahon na dakul an magigin makasadiri, daing pagkamuot, asin bakong relihiyoso? (Mat. 24:12; 2 Tim. 3:1-5) Kaipuhan tang maaraman an simbag, huling kalabot diyan an gabos na tunay na Kristiyano.

 3. Anong kumpiyansa an ipinahiling ni Jesus, asin kiisay niya nanudan iyan?

³ Siyasaton ta giraray an makahulang sinabi ni Jesus. Nagpapahiling daw nin kumpiyansa an tataramon na “ihuhulit”? Iyo nanggad! Nakakasiyerto siya na sa huring mga aldaw may mga andam na magsuportar sa saiya. Kiisay niya nanudan an siring na kumpiyansa? Sa saiyang Ama. (Juan 12:45; 14:9) Bago siya nagin tawo, naobserbaran niya mismo na may kumpiyansa si Jehova sa pagigin andam kan mga nagsasamba sa Saiya. Aramon ta kun paano iyan ipinahiling ni Jehova.

 4. Dinagka ni Jehova an mga Israelita na suportaran an anong gibuhon, asin ano an ginibo ninda?

⁴ Girumduma kun ano an nangyari kan magbuot si Jehova ki Moises na itugdok an tabernakulo, o tolda, na magigin sentro nin pagsamba kan nasyon nin Israel. Paagi sa saiya, dinagka ni Jehova an bilog na banwaan na suportaran an pagtugdok. Sinabi sa sainda ni Moises: ‘Siisay man na may [andam] na puso magdara nin dulot ki Jehova.’ Ano an resulta? Padagos sindang ‘nagdara aga-aga nin gikan sa buot na dulot.’ Kadakul nanggad sindang dinara kaya kaipuhan nang ‘ulangon’ o pugulan sinda sa pagdara nin ano pa man! (Ex. 35:5; 36:3, 6) Pinatunayan kan mga Israelita na maninigo sinda sa kumpiyansa ni Jehova sa sainda.

5, 6. Sigun sa Salmo 110:1-3, anong sabuot an inasahan ni Jehova asin ni Jesus na mahihiling sa tunay na mga parasamba sa panahon kan katapusan?

⁵ Naglaom daw si Jehova na makakahiling siya nin siring na pagigin andam sa mga nagsasamba sa saiya sa huring mga aldaw? Iyo! Labing 1,000 taon bago mamundag si Jesus sa daga, pinasabngan ni Jehova si David na magsurat dapit sa panahon na mapuon na mamahala an Mesiyas. (Basahon an Salmo 110:3.)a Magkakaigwa nin mga kaiwal an bagong patukawon na Hadi, si Jesus. Alagad, magkakaigwa man siya nin sarong hukbo nin mga parasuportar. Dai sinda kaipuhan piriton na maglingkod sa Hadi. Dawa an mga hoben gikan sa buot na mapresentar kan saindang sadiri, na magigin dakulon nanggad kaya angay na ikumparar sa dakulon na tagdo nin ambon na nakakatahob sa daga pag amay na aga.b

⁶ Aram ni Jesus na nanunungod sa saiya an hula sa Salmo 110. (Mat. 22:42-45) Huli kaini, lubos an kumpiyansa niya na magkakaigwa siya nin maimbod na mga parasuportar na gikan sa buot na mapresentar kan saindang sadiri para ihulit an maugmang bareta sa bilog na daga. Ano an ipinapahiling kan mga pangyayari sa kasaysayan? Talaga daw na an Hadi nagkaigwa nin sarong hukbo na magigin andam na maghulit sa huring mga aldaw?

 7. Pakapatukawa ki Jesus bilang Hadi, anong mga lakdang an ginibo niya tanganing andamon para sa gibuhon an mga nagsusuportar sa saiya?

⁷ Dai nahaloy pakapatukawa ki Jesus bilang Hadi, may ginibo siyang mga lakdang tanganing andamon an mga parasunod niya para sa mahiwason na gibuhon. Arog kan naaraman ta sa Kapitulo 2, nagsiyasat asin naglinig siya puon 1914 sagkod sa kapinunan kan 1919. (Mal. 3:1-4, NW) Dangan, kan 1919, ninombrahan niya an maimbod na uripon para manginot sa mga lingkod niya. (Mat. 24:45) Puon kan taon na iyan, nagtatao na nin espirituwal na kakanon an uripon—paagi sa mga pahayag sa kumbensiyon asin imprentadong publikasyon—na pauruutrong nagduduon kan responsabilidad nin gabos na Kristiyano na personal na maghulit.

8-10. Paano an mga kumbensiyon nakapahiro sa mga tugang na maghulit? Magtao nin halimbawa. (Hilingon man an kahon na “Inot na mga Kumbensiyon na Nakapahiro sa mga Tugang na Maghulit.”)

⁸ Mga pahayag sa kumbensiyon. Huling gustong-gusto kan Mga Estudyante sa Bibliya na tawan nin paggiya, nagtiripon sinda sa Cedar Point, Ohio, E.U.A., puon Setyembre 1 sagkod 8, 1919, para sa saindang inot na mayor na kumbensiyon pagkatapos kan Giyera Mundiyal I. Kan ikaduwang aldaw, nagtao nin pahayag si Brother Rutherford na diyan idinuon niya sa mga delegado: “An misyon nin sarong Kristiyano sa daga . . . iyo na ibalangibog an mensahe kan kahadian kan Kagurangnan.”

⁹ Uminabot an pinakatampok kan kumbensiyon pakalihis nin tulong aldaw kan magpahayag si Brother Rutherford na may titulong “Diskurso Para sa Katabang na mga Trabahador,” na ipinublikar sa The Watch Tower na may titulong “Nagpapahayag kan Kahadian.” Nagsabi siya: “Pag nag-iisip-isip an sarong Kristiyano, natural sanang maghapot siya, Ano an katuyuhan kan buhay ko digdi sa daga? An simbag niya dapat na, May kabuutan na ginibo kan Kagurangnan na ako magin embahador niya para ipaabot sa kinaban an mensahe nin Diyos na pakipag-ulian, saka an pribilehiyo asin katungdan ko iyo na ipaisi an mensaheng iyan.”

¹⁰ Sa makasaysayan na pahayag na iyan, ipinaisi ni Brother Rutherford na ipupublikar an bagong magasin na The Golden Age (ngunyan Awake!) para gamiton sa paggiya sa mga tawo pasiring sa Kahadian bilang an solamenteng paglaom nin katawuhan. Dangan, naghapot siya kun pira sa nagdadangog an gustong magdistribwir kaini. Sabi kan report dapit sa kumbensiyon: “Nakakapukaw sa buot an reaksiyon ninda. Nagtirindog gabos an sais mil.”c Malinaw nanggad na an Hadi may mga parasuportar na andam asin gustong-gustong ibalangibog an Kahadian niya!

11, 12. Ano an sinabi kan The Watch Tower kan 1920 dapit sa kun nuarin gigibuhon an ihinula ni Jesus?

¹¹ Imprentadong mga publikasyon. Paagi sa The Watch Tower, nagin mas malinaw pa an kahulugan kan gibuhon na ihinula ni Jesus—an paghuhulit kan maugmang bareta kan Kahadian. Pag-ulayan ta an nagkapirang halimbawa kan inot na mga taon kan dekada nin 1920.

¹² Anong mensahe an ibabalangibog bilang kautuban kan Mateo 24:14? Nuarin iyan gigibuhon? Ipinaliwanag iyan sa artikulong “Ebanghelyo kan Kahadian” sa The Watch Tower na Hulyo 1, 1920: “An maugmang bareta digdi iyo an mapadapit sa katapusan kan lumang areglo nin mga bagay asin pag-establisar kan kahadian kan Mesiyas.” Malinaw na ipinahiling kan artikulo kun nuarin iyan ihuhulit: “Dapat na ipaabot an mensaheng ini sa pag-ultanan kan dakulang giyera mundiyal [Giyera Mundiyal I] asin kan ‘dakulang kahurasaan.’” Huli kaini, nagsabi pa iyan: “Ngunyan na an panahon . . . na ibalangibog an maugmang bareta sa gabos na lugar nin Kakristiyanuhan.”

13. Paano pinukaw kan The Watch Tower kan 1921 an pagigin andam kan linahidan na mga Kristiyano?

¹³ Pipiriton daw an mga lingkod nin Diyos na gibuhon an ihinula ni Jesus? Dai. Pinukaw kan artikulong “Kusugi an Buot Mo,” sa The Watch Tower na Marso 15, 1921, an pagigin andam kan linahidan na mga Kristiyano. Dinagka an kada saro na haputon an sadiri: “Bako daw na pinakadakulang pribilehiyo ko, saka obligasyon ko, na makikabtang sa gibuhon na ini?” Sabi pa kaiyan: “Nakakasiyerto kita na pag nasabutan ta [na sarong pribilehiyo an pakikikabtang diyan], kita magigin arog ki Jeremias, na sa puso niya an tataramon kan Kagurangnan nagin ‘garo kalayo na nagsusulo sa saiyang mga tulang,’ na nagmomotibar sa saiya na padagos na magtaram.” (Jer. 20:9) Ipinapahiling kan mamumuton na pagdagkang iyan an kumpiyansa ni Jehova asin ni Jesus sa maimbod na mga parasuportar kan Kahadian.

14, 15. Kan 1922, dinagka kan The Watch Tower an linahidan na mga Kristiyano na gamiton an anong pamamaagi nin paghuhulit?

¹⁴ Paano maninigong ipaabot sa iba nin tunay na mga Kristiyano an mensahe kan Kahadian? Sa halipot pero mapuwersang artikulo na “Mahalagang Marhay an Paglilingkod,” sa The Watch Tower na Agosto 15, 1922, dinagka an linahidan na mga Kristiyano na makikabtang sa “aktibong pagdara kan imprentadong mensahe asin pakikipag-ulay sa mga tawo sa harong ninda, na nagpapatotoo na harani na an kahadian nin langit.”

¹⁵ Malinaw na puon 1919, ginagamit ni Cristo an saiyang maimbod asin mapagmansay na uripon para pauruutrong iduon na an pribilehiyo saka obligasyon nin Kristiyano digdi sa daga iyo na ibalangibog an mensahe kan Kahadian. Pero, ano an reaksiyon kan inot na Mga Estudyante sa Bibliya sa pagdagka na magbalangibog kaiyan?

16. Ano an reaksiyon nin nagkapirang piniling elder sa ideya na an gabos maninigong makikabtang sa ministeryo?

¹⁶ Kan mga dekada nin 1920 asin 1930, may mga nagkontra sa ideya na maninigong makikabtang sa ministeryo an gabos na linahidan na Kristiyano. Ipinaliwanag kan Watch Tower na Nobyembre 1, 1927 an nangyayari kaidto: “Igwa nin mga may katungdan ngunyan sa iglesya [o kongregasyon] bilang elder . . . na habong dagkahon an mga tugang na maglingkod, asin sinda mismo habong makikabtang diyan. . . . Pigmemenos ninda an suhestiyon na magharong-harong para darahon sa mga tawo an mensahe nin Diyos, kan saiyang Hadi asin kahadian.” Direktang sinabi kan artikulo: “Panahon na para markahan asin likayan sinda kan mga maimbod, saka sabihan na dai ta na ipagkakatiwala sa sainda an pagigin elder.”d

17, 18. Ano an ginibo kan kadaklan na tugang sa mga kongregasyon kun dapit sa instruksiyon hali sa headquarters, asin ano an ginibo nin minilyon sa nakalihis na 100 na taon?

¹⁷ Marahay sana ta maugmang sinunod kan kadaklan na tugang sa mga kongregasyon an instruksiyon hali sa headquarters. Para sa sainda, pribilehiyo an paghuhulit kan mensahe kan Kahadian. Sabi kan The Watch Tower na Marso 15, 1926: “Magigin boluntaryo an mga maimbod . . . para sabihon sa mga tawo an mensaheng ini.” Sinda huminiro kauyon kan hula sa Salmo 110:3 asin nagin andam na mga parasuportar kan Mesiyanikong Hadi.

¹⁸ Sa nakalihis na 100 na taon, minilyon an gikan sa buot na nagpresentar kan saindang sadiri para ibalangibog an Kahadian. Sa sunod na pirang kapitulo, pag-uulayan ta kun paano sinda naghulit—an mga pamamaagi saka kasangkapan na ginamit ninda—asin kun ano an nagin resulta. Pero, pag-ulayan ta nguna kun taano ta minilyon an boluntad na naghuhulit kan Kahadian, dawa dakul sa kinaban an makasadiri. Mantang pinag-uulayan ta iyan, marahay na haputon niyato an sadiri, ‘Taano ta ihinuhulit ko sa iba an maugmang bareta?’

19. Taano ta sinusunod niyato an konseho ni Jesus na padagos na ‘hanapon nguna an Kahadian’?

¹⁹ Tinawan ni Jesus nin konseho an mga parasunod niya na padagos na ‘hanapon nguna an Kahadian.’ (Mat. 6:33) Taano ta sinusunod niyato iyan? Sa pundamental, huling minimidbid ta an kahalagahan kan Kahadian, na iyan an panginot sa katuyuhan nin Diyos. Arog kan naaraman ta sa sinundan na kapitulo, luway-luway na ihinahayag kan banal na espiritu an nakakaugmang mga katotoohan dapit sa Kahadian. Pag napapahiro an puso ta nin mahalagang marhay na katotoohan dapit sa Kahadian, napapahiro kitang hanapon nguna iyan.

20. Base sa ilustrasyon ni Jesus dapit sa nakatagong kayamanan, paano mahiro an mga parasunod niya may koneksiyon sa konseho na padagos na hanapon nguna an Kahadian?

²⁰ Aram ni Jesus kun paano mahiro an mga parasunod niya may koneksiyon sa konseho na padagos na hanapon nguna an Kahadian. Isip-isipa an ilustrasyon niya dapit sa nakatagong kayamanan. (Basahon an Mateo 13:44.) Sarong aldaw, mantang an trabahador nagtatrabaho sa uma, may nakua siyang nakatagong kayamanan asin nahiling niya tulos an halaga kaiyan. Ano an ginibo niya? ‘Sa kaugmahan niya, siya naglakaw asin ipinabakal an gabos niyang sadiri, asin binakal an uma.’ Ano an leksiyon para sa sato? Pag nakua ta an katotoohan dapit sa Kahadian asin nahiling an halaga kaiyan, magaya-gaya tang gigibuhon an ano man na kinakaipuhan na sakripisyo tanganing mapagdanay niyato na inot sa satong buhay an intereses kan Kahadian.e

21, 22. Paano ipinapahiling nin maimbod na mga parasuportar kan Kahadian na iniinot ninda iyan? Magtao nin halimbawa.

²¹ Ipinapahiling nin maimbod na mga parasuportar kan Kahadian paagi sa gibo, bako sa tataramon sana, na iniinot ninda an Kahadian. Ginagamit ninda an saindang buhay, kakayahan, asin materyal na mga rugaring para sa paghuhulit kan Kahadian. Dakul an guminibo nin darakulang sakripisyo para sa bilog na panahon na ministeryo. Nahiling mismo kan gabos na andam na mga parahulit na binebendisyunan ni Jehova an mga nag-iinot kan Kahadian. Pag-ulayan ta an sarong halimbawa dakul na dekada na an nakaagi.

²² Magkaibang naglingkod si Avery asin Lovenia Bristow bilang colporteur (payunir) sa timog na parte kan Estados Unidos puon kan huring kabtang kan dekada nin 1920. Pakalihis nin dakul na taon, nagirumduman ni Lovenia: “Puon kaidto, dakul na taon kaming maugmang magkaibanan bilang payunir. Dakul na beses na dai mi aram kun sain makua nin kuwarta para sa gasolina o mga groseri. Pero maski paano, pirmi iyan na itinatao ni Jehova. Padagos sana kaming nagpapayunir. Pirmi kaming igwa kan talagang kaipuhan mi.” Nagirumduman ni Lovenia an sarong pangyayari kan naglilingkod sinda sa Pensacola, Florida, na dikit na sana an kuwarta ninda saka mga groseri. Pag-uli ninda sa saindang harong na trailer, naabutan ninda an duwang dakulang bag nin mga groseri na may nakasurat: “Sa pagkamuot kan Pensacola Company.”f Nagirumduman ni Lovenia an dakul na dekada nin bilog na panahon na ministeryo: “Nungka kaming pinabayaan ni Jehova. Nungkang nawara an pagtitiwala mi saiya.”

23. Ano an sabuot mo sa nakua mong katotoohan dapit sa Kahadian, asin ano an determinado mong gibuhon?

²³ Bako parareho an panahon na ginagamit ta sa paghuhulit. Magkakalain an kamugtakan ta. Minsan siring, para sa sato gabos, sarong pribilehiyo an bilog na kalag na pagpahayag kan maugmang bareta. (Col. 3:23) Huling pinapahalagahan ta an nakua niyato na mahalagang marhay na katotoohan dapit sa Kahadian, andam kita—iyo, gustong-gusto ta—na gumibo nin ano man na sakripisyong makakaya para maglingkod sa pinakalubos na mapupuwede. Bako daw na iyan an determinado mong gibuhon?

24. Ano an saro sa pinakadakulang nagigibo kan Kahadian sa huring mga aldaw?

²⁴ Sa nakaaging siglo, inuutob nanggad kan Hadi an hula niya sa Mateo 24:14. Asin ginigibo niya iyan na daing pamimirit. Pagkatapos na lumuwas an mga parasunod niya sa makasadiring kinaban na ini, gikan sa buot nindang iprinesentar an saindang sadiri na maghulit. An paghuhulit ninda kan maugmang bareta sa bilog na daga kabtang kan tanda kan presensiya ni Jesus bilang tagapamahala kan Kahadian—asin saro sa pinadakulang nagigibo kan Kahadian sa huring mga aldaw.