Kun Paano an mga Sinabi ni Jesus Nakakapaoswag sa Kaogmahan

“[Si Jesus] nagtukad sa bukid; asin . . . an saiyang mga disipulo nagrani sa saiya; asin . . . [sia] nagpoon sa pagtokdo sa sainda.”​—MAT. 5:1, 2.

1, 2. (a) Sa anong mga kamugtakan itinao ni Jesus an saiyang Sermon sa Bukid? (b) Paano pinonan ni Jesus an saiyang diskurso?

TAON 31 C.E. kaidto. Ipinondo nguna ni Jesus an saiyang biahe sa paghuhulit sa Galilea tanganing selebraron an Paskua sa Jerusalem. (Juan 5:1) Pagbuelta sa Galilea, sia namibi nin magdamlag para sa paggiya nin Dios sa pagpili kan 12 apostol. Kan sunod na aldaw, nagtiripon an sarong kadaklan mantang pinapaomayan ni Jesus an mga may helang. Mantang presente an mga disipulo nia asin an iba pa, sia nagtukaw sa gilid nin bukid asin nagpoon na magtokdo.​—Mat. 4:23–5:2; Luc. 6:12-19.

² Pinonan ni Jesus an saiyang diskurso​—an Sermon sa Bukid—​paagi sa pagpaheling na an kaogmahan resulta kan pagkaigwa nin marahay na relasyon sa Dios. (Basahon an Mateo 5:1-12.) An kaogmahan ‘pagigin marahay an kamugtakan poon sa pagkakontento sagkod sa labi-labing kagayagayahan.’ Idinoon kan siyam na kaogmahan na tinokar ni Jesus kun taano ta maogma an mga Kristiano, asin an mga sinabing ini kapakipakinabang ngonyan siring kaidtong haros 2,000 na taon na an nakaagi. Pag-olayan niato ngonyan an kada saro kaiyan.

“An mga Nakakamate kan Saindang Espirituwal na Pangangaipo”

 3. Ano an boot sabihon kan pakamate niato nin espirituwal na pangangaipo?

³ “Maogma an mga nakakamate kan saindang espirituwal na pangangaipo, huli ta sainda an kahadean kan kalangitan.” (Mat. 5:3) “An mga nakakamate kan saindang espirituwal na pangangaipo” nakakaaram na sinda dukhang-dukha sa espirituwal asin kaipuhan ninda an pagkaherak nin Dios.

4, 5. (a) Taano ta maogma an mga nakakamate kan saindang espirituwal na pangangaipo? (b) Paano mapapanigoan an satong espirituwal na pangangaipo?

⁴ Maogma an mga nakakamate kan saindang espirituwal na pangangaipo, “huli ta sainda an kahadean kan kalangitan.” Paagi sa pag-ako ki Jesus bilang Mesiyas, nabukasan para sa saiyang enot na mga disipulo an posibilidad na mamahala kaiba nia sa langitnon na Kahadean nin Dios. (Luc. 22:28-30) Baga man kita personal na naglalaom na magin kaibang paramana ni Cristo sa langit o nag-aantisipar nin buhay na daing katapusan sa paraiso sa daga sa pamamahala kan Kahadean, magigin maogma kita kun kita talagang nakakamate nin espirituwal na pangangaipo asin biyong nakakaaram na kita nagsasarig sa Dios.

⁵ Bakong gabos nakakamate kan saindang espirituwal na pangangaipo, huli ta dakol an mayo nin pagtubod asin dai nagpapahalaga sa sagradong mga bagay. (2 Tes. 3:1, 2; Heb. 12:16) An mga paagi na mapapanigoan an espirituwal na pangangaipo niato iyo an mahigos na pag-adal sa Biblia, maigot na paggibo nin mga disipulo, asin regular na pag-atender sa Kristianong mga pagtiripon.​—Mat. 28:19, 20; Heb. 10:23-25.

Mga Nagmomondo na “Maogma”

 6. Sairisay “an mga nagmomondo,” asin taano ta “maogma” sinda?

⁶ “Maogma an mga nagmomondo, huli ta sinda rarangahon.” (Mat. 5:4) “An mga nagmomondo” iyo man sana an klase nin mga tawo na “nakakamate kan saindang espirituwal na pangangaipo.” Dai sinda nagmomondo sa paagi na sinda nagrereklamo manongod sa saindang kamugtakan sa buhay. Sinda nagmomondo huli sa sainda mismong pagigin makasalan asin sa presenteng mga kamugtakan na resulta kan pagkabakong sangkap nin tawo. Taano ta “maogma” an siring na mga nagmomondo? Huli ta sinda nagtutubod sa Dios asin ki Cristo saka nararanga sa pagkaigwa ninda nin marahay na relasyon ki Jehova.​—Juan 3:36.

 7. Ano an maninigong magin saboot niato manongod sa kinaban ni Satanas?

⁷ Kita daw nagmomondo bilang indibiduwal huli sa lakop na pagkabakong matanos sa kinaban ni Satanas? Ano talaga an saboot niato manongod sa iinaalok kan kinaban na ini? Si apostol Juan nagsurat: “An gabos na nasa kinaban​—an mawot kan laman asin an mawot kan mga mata asin an pagpaabaw-abaw kan kaya sa buhay—​bakong gikan sa Ama.” (1 Juan 2:16) Alagad paano kun namamatean niato na an sato mismong espirituwalidad luway-luway na naaapektaran kan “espiritu kan kinaban,” an nagtutulod na puersa na nagdodominar sa sosyedad nin tawo na siblag sa Dios? Kun siring, odok kitang mamibi, mag-adal kan Tataramon nin Dios, asin magpatabang sa kamagurangan. Mantang orog kitang minadayupot ki Jehova, ‘makakanompong kita nin karangahan’ para sa satong sadiri, ano man an dahelan kan kapurisawan niato.​—1 Cor. 2:12; Sal. 119:52; Sant. 5:14, 15.

Maogma Nanggad “an mga Mahoyo”!

8, 9. Ano an boot sabihon nin pagigin mahoyo, asin taano ta maogma an mga mahoyo?

⁸ “Maogma an mga mahoyo, huli ta mamanahon ninda an daga.” (Mat. 5:5) An “kahoyoan nin boot,” o pagigin mahoyo, dai nagsusuherir nin kaluyahan o mapagsaginsagin na kabootan. (1 Tim. 6:11) Kun kita mahoyo, ipapaheling niato iyan paagi sa paggibo kan kabotan ni Jehova asin pag-ako kan paggiya nia. An kahoyoan nin boot magigin risang-risa man sa paagi kan pagtratar niato sa mga kapagtubod asin sa iba pa. An siring na kahoyoan kaoyon kan hatol ni apostol Pablo.​—Basahon an Roma 12:17-19.

⁹ Taano ta maogma an mga mahoyo? Huli ta “mamanahon ninda an daga,” an sabi kan mahoyong si Jesus. Sia an pangenot na Paramana kan daga. (Sal. 2:8; Mat. 11:29; Heb. 2:8, 9) Minsan siring, an mahoyo na “kaibang mga paramana ni Cristo” makikikabtang sa pagmana nia kan daga. (Roma 8:16, 17) Sa daganon na rona kan Kahadean ni Jesus, dakol na iba pang mahoyo an magkakamit nin buhay na daing katapusan.​—Sal. 37:10, 11.

10. Paanong an kadaihan nin kahoyoan nakakaapektar sa satong mga pribilehio nin paglilingkod asin sa relasyon niato sa iba?

¹⁰ Arog ni Jesus, maninigo kitang magin mahoyo. Alagad, paano kun midbid kita sa pagigin maluminaban? An siring na agresibo asin antipatikong ugale tibaad magin dahelan na rayoan kita nin mga tawo. Kun kita Kristianong mga lalaki na nagmamawot na magkaigwa nin paninimbagan sa kongregasyon, an ugaleng ini makakadiskualipikar sa sato. (1 Tim. 3:1, 3) Sinabihan ni Pablo si Tito na danay na ipagirumdom sa mga Kristiano sa Creta na “dai magin maluminaban, magin rasonable, nagpapaheling nin bilog na kahoyoan sa gabos na tawo.” (Tito 3:1, 2) Bendisyon nanggad sa iba an siring na kahoyoan!

Sinda Nagugutom sa “Katanosan”

11-13. (a) Ano an boot sabihon kan magutom asin mapaha sa katanosan? (b) Paano “mababasog” an mga nagugutom asin napapaha sa katanosan?

¹¹ “Maogma an mga nagugutom asin napapaha sa katanosan, huli ta sinda mababasog.” (Mat. 5:6) An “katanosan” na nasa isip ni Jesus iyo an kualidad na paggibo nin tama paagi sa pagsunod sa kabotan asin mga togon nin Dios. An salmista nagsabi na sia “lupaypay sa paghidaw” para sa matanos na hudisyal na mga desisyon nin Dios. (Sal. 119:20) Kita daw nagpapahalagang marhay sa katanosan kaya nagugutom asin napapaha kita para dian?

¹² Sinabi ni Jesus na an mga nagugutom asin napapaha sa katanosan magigin maogma huli ta sinda “mababasog,” o biyong makokontento. Nagin posible ini pagkatapos kan Pentecostes 33 C.E., huli ta sa panahon na iyan an banal na espiritu ni Jehova nagpoon nang ‘magtao sa kinaban nin nakakakombensir na patotoo mapadapit sa katanosan.’ (Juan 16:8) Paagi sa banal na espiritu, pinasabngan nin Dios an mga tawo na isurat an Kristianong Griegong Kasuratan, na kapakipakinabang na marhay “sa pagdisiplina sa katanosan.” (2 Tim. 3:16) An espiritu nin Dios nagpapangyari man na kita “magsulog kan bagong personalidad na linalang segun sa kabotan nin Dios sa tunay na katanosan.” (Efe. 4:24) Bako daw na nakakarangang maaraman na an mga may pagsolsol na naghahagad nin kapatawadan sa mga kasalan ninda basado sa atang na pantubos ni Jesus puedeng magkaigwa nin matanos na kamugtakan sa atubangan nin Dios?​—Basahon an Roma 3:23, 24.

¹³ Kun kita igwa nin daganon na paglaom, an satong pagkagutom asin pagkapaha sa katanosan lubos na mapapanigoan kun makamtan na niato an buhay na daing katapusan sa matanos na mga kamugtakan sa daga. Mientras tanto, magin determinado kitang mamuhay kaoyon kan mga pamantayan ni Jehova. Si Jesus nagsabi: ‘Padagos na hanapon nguna an kahadean asin an katanosan nin Dios.’ (Mateo 6:33) Paagi sa paggibo kaiyan magkakaigwa kita nin tunay na kaogmahan asin dakol na gibohon may koneksion sa pagsamba sa Dios.​—1 Cor. 15:58.

Kun Taano ta Maogma “an mga Maheherakon”

14, 15. Paano niato puedeng ipaheling an pagkaherak, asin taano ta maogma “an mga maheherakon”?

¹⁴ “Maogma an mga maheherakon, huli ta sinda papahelingan nin pagkaherak.” (Mat. 5:7) “An mga maheherakon” napapahiro kan pagmalasakit asin pagkaherak sa iba. Milagrosong pinaginhawa ni Jesus an pagsakit nin dakol huli ta naherak sia sa sainda. (Mat. 14:14) An pagkaherak ipinapaheling sa hudisyal na paagi kun pinapatawad kan mga tawo an mga nagkakasala sa sainda, kun paanong maheherakon na pinapatawad ni Jehova an mga nagsosolsol. (Ex. 34:6, 7; Sal. 103:10) Puede niatong ipaheling an pagkaherak sa paaging iyan asin paagi man sa satong maboot na mga tataramon saka gibo na nakakapaginhawa sa mga indibiduwal na daing sukat. An sarong marahayon na paagi na ikapaheling an pagkaherak iyo an pagsabi sa iba kan mga katotoohan sa Biblia. Huling si Jesus napahiro nin pagkaherak sa sarong kadaklan, sia “nagpoon na magtokdo sa sainda nin dakol na bagay.”​—Mar. 6:34.

¹⁵ May dahelan kitang umoyon sa sinabi ni Jesus: “Maogma an mga maheherakon, huli ta sinda papahelingan nin pagkaherak.” Kun maheherakon niatong tinatratar an iba, posibleng marhay na iyan man an gibohon ninda sa sato. Kun nagpaheling kita nin pagkaherak sa iba, pag-abot kan paghokom nin Dios tibaad hokoman kita nin paborable. (Sant. 2:13) An kapatawadan nin mga kasalan asin buhay na daing sagkod para sana sa mga maheherakon.​—Mat. 6:15.

Kun Taano ta Maogma “an mga Dalisay an Puso”

16. Ano an boot sabihon nin pagigin “dalisay an puso,” asin paano ‘naheheling an Dios’ kan mga igwa kan kualidad na iyan?

¹⁶ “Maogma an mga dalisay an puso, huli ta maheheling ninda an Dios.” (Mat. 5:8) Kun “dalisay an puso” niato, magigin risang-risa an kadalisayan sa satong mga kinawiwilihan, kamawotan, asin motibo. Ipapaheling niato an “pagkamoot na gikan sa malinig na puso.” (1 Tim. 1:5) ‘Maheheling niato an Dios’ huling kita may panglaog na kalinigan. Dai man talaga ini nangangahulogan na aktuwal na maheheling si Jehova, huli ta “mayong tawo na makakaheling sa [Dios] asin mabubuhay.” (Ex. 33:20) Minsan siring, mantang an personalidad nin Dios sangkap na ipinapabanaag ni Jesus, sia makakapagsabi: “Sia na nakaheling sa sako nakaheling man sa Ama.” (Juan 14:7-9) Bilang mga parasamba ki Jehova sa daga, ‘maheheling niato an Dios’ paagi sa pagmasid kun paano sia minahiro para sa sato. (Job 42:5) Para sa linahidan na mga Kristiano, an pakaheling sa Dios maabot sa kulminasyon kaiyan kun sinda buhayon na liwat pasiring sa espiritung buhay asin aktuwal nindang maheling an saindang langitnon na Ama.​—1 Juan 3:2.

17. Ano an magigin epekto sa sato kan pagkaigwa nin dalisay na puso?

¹⁷ Huling an dalisay na puso malinig sa moral asin espirituwal, dai iyan nagkokonsentrar sa mga bagay na maati sa pagheling ni Jehova. (1 Cron. 28:9; Isa. 52:11) Kun dalisay an puso niato, magigin dalisay an satong sinasabi asin ginigibo, asin dai magigin mapagsaginsagin an paglilingkod niato ki Jehova.

“An mga Mapagpatoninong” Magigin mga Aki nin Dios

18, 19. Paano minagawe “an mga mapagpatoninong”?

¹⁸ “Maogma an mga mapagpatoninong, huli ta sinda aapodon na ‘mga aki nin Dios.’” (Mat. 5:9) “An mga mapagpatoninong” namimidbid paagi sa gigibohon ninda asin sa dai ninda gigibohon. Kun kita an klase nin mga tawo na nasa isip ni Jesus, kita mapagpatoninong asin ‘dai nagbabalos nin maraot sa maraot sa kiisay pa man.’ Imbes, ‘danay niatong hinahanap an karahayan kan iba.’​—1 Tes. 5:15.

¹⁹ An Griegong termino na trinadusir na “mapagpatoninong” sa Mateo 5:9 literal na nangangahulogan na “mga parapatoninong.” Tanganing makabilang sa mga mapagpatoninong, dapat na aktibo kitang nagpapalakop nin katoninongan. An mga parapatoninong dai naggigibo nin ano man na bagay na ‘nagpapasuway sa mga magkamiridbidan.’ (Tal. 16:28) Bilang mga mapagpatoninong, kita naggigibo nin positibong mga lakdang tanganing ‘magmaigot na magibo an pakipagkatoninongan sa gabos na tawo.’​—Hebreo 12:14.

20. Sairisay ngonyan an “mga aki nin Dios,” asin sairisay pa an magigin mga aki nin Dios pag-abot nin panahon?

²⁰ Maogma an mga mapagpatoninong huli ta “sinda aapodon na ‘mga aki nin Dios.’” An maimbod na linahidan na mga Kristiano inampon na ni Jehova asin sinda nagin “mga aki nin Dios.” Sinda igwa na nin dayupot na relasyon ki Jehova bilang mga aki nia huli ta sinda nagtutubod ki Cristo asin bilog na pusong nagsasamba sa “Dios nin pagkamoot asin nin katoninongan.” (2 Cor. 13:11; Juan 1:12) Kumusta man an mapagpatoninong na “ibang mga karnero” ni Jesus? Si Jesus an magigin saindang “Amang Daing Sagkod” durante kan saiyang Milenyal na Paghade, alagad sa katapusan kaiyan sia mismo mapasakop ki Jehova asin sinda magigin mga aki nin Dios sa lubos na kahulogan kaiyan.​—Juan 10:16; Isa. 9:6; Roma 8:21; 1 Cor. 15:27, 28.

21. Paano kita mahiro kun kita “nabubuhay segun sa espiritu”?

²¹ Kun kita “nabubuhay segun sa espiritu,” an pagigin mapagpatoninong saro sa mga kualidad niato na maheheling tolos nin iba. Dai niato ‘pupukawon an pagdaraogan’ o ‘papaanggoton an lambang saro.’ (Gal. 5:22-26; New International Version) Imbes, naghihingoa kitang “makipagkatoninongan sa gabos na tawo.”​—Roma 12:18.

Maogma Minsan Pinepersegir!

22-24. (a) Ano an dahelan ta maogma an mga pinepersegir huli sa katanosan? (b) Ano an pag-oolayan niato sa sunod na duwang artikulong pag-aadalan?

²² “Maogma an mga pinersegir huli sa katanosan, huli ta sainda an kahadean kan kalangitan.” (Mat. 5:10) Sa pagdetalye kaini, si Jesus nagsabi pa: “Maogma kamo kun an mga tawo pinag-oolog-olog kamo asin pinepersegir kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan; huli ta sa paaging iyan pinaglamag ninda an mga propeta na naenot sa saindo.”​—Mat. 5:11, 12.

²³ Arog kan mga propeta nin Dios kan suanoy, linalaoman nin mga Kristiano na sinda pag-oolog-ologon, pepersegiron, asin putik na papakaraoton​—gabos iyan “huli sa katanosan.” Minsan siring, paagi sa maimbod na pagtagal sa siring na mga pagbalo, igwa kita kan satispaksion na paogmahon asin tawan nin onra si Jehova. (1 Ped. 2:19-21) An satong pagsakit dai makakaina sa dakulang kaogmahan niato sa paglilingkod ki Jehova ngonyan o sa ngapit. Dai iyan makakaina sa kaogmahan na mamahala kaiba ni Cristo sa langitnon na Kahadean o sa kagayagayahan na matawan nin buhay na daing katapusan bilang saro sa daganon na mga sakop kan gobyernong iyan. An siring na mga bendisyon nagtatao nin ebidensia kan pag-oyon, kabootan, asin pagigin buka kan palad nin Dios.

²⁴ Dakolon pa an manonodan sa Sermon sa Bukid. Ipinapaliwanag an manlaenlaen na leksion sa sunod na duwang artikulong pag-aadalan. Helingon niato kun paano niato ikakaaplikar an mga sinabing iyan ni Jesu-Cristo.

Ano an Isisimbag Nindo?

• Taano ta maogma “an mga nakakamate kan saindang espirituwal na pangangaipo”?

• Ano an dahelan ta maogma “an mga mahoyo”?

• Taano ta maogma an mga Kristiano minsan ngani pinepersegir sinda?

• Arin na kaogmahan na sinabi ni Jesus an nangorognang nakakamotibar sa saimo?

[Ritrato sa pahina 7]

An siyam na kaogmahan na idinoon ni Jesus kapakipakinabang pa man giraray ngonyan siring kaidtong nakaagi

[Ritrato sa pahina 8]

An sarong marahayon na paagi na ikapaheling an pagkaherak iyo an pagsabi sa iba kan mga katotoohan sa Biblia