Sarong Diyos na “Andam na Magpatawad”

1-3. (a) Ano an nagin magabat na pasan kan salmistang si David, asin paano siya nakanumpong nin karangahan para sa saiyang napupurisaw na puso? (b) Pag kita magkasala, ano an puwedeng magin magabat na pasan niyato, pero ano an inaasigurar sa sato ni Jehova?

“AN MGA sála ko lampas na sa sakong payo,” an isinurat kan salmistang si David. “Siring sa magabat na pasan, magabaton na iyan para makaya ko. Namagol ako asin lupaypay nang biyo.” (Salmo 38:4, 8) Aram ni David na pag nakakamati kita nin pagkakonsiyensiya huli sa pagkakasala, garo kita may magabat na pasan. Pero nakanumpong siya nin karangahan para sa saiyang napupurisaw na puso. Nasabutan niya na dawa ngani ikinakaungis ni Jehova an kasalan, dai Niya ikinakaungis an nagkasala kun talagang nagsusulsol an sarong iyan asin isinisikwal an saiyang makasalan na gibo. Huling lubos an pagtitiwala ni David sa pagigin andam ni Jehova na magpahiling nin pagkahirak sa mga nagsusulsol, sinabi niya: “Ika, O Jehova, . . . andam na magpatawad.”—Salmo 86:5.

² Pag kita nagkasala, tibaad mamati ta man an grabeng pagkakonsiyensiya na garo baga may magabat kitang pasan. Kapaki-pakinabang an pakamating iyan nin grabeng pagbasol. Mapapahiro kita kaiyan na gumibo nin positibong mga lakdang tanganing itanos an satong mga nagibong pagkakasala. Minsan siring, may peligro kun an saro pangibabawan nin pakamati nin pagkakonsiyensiya. Tibaad mag-insistir an satong pusong mapagkondenar sa sadiri na dai kita papatawadon ni Jehova, gurano man an satong pagsulsol. Kun kita “madaog kan sobrang kamunduan,” tibaad purbaran ni Satanas na papunduhon kita sa paglilingkod, na ipinapamati sa sato na dai kitang halaga sa pagmansay ni Jehova asin na dai kita angay na maglingkod sa saiya.—2 Corinto 2:5-11.

³ Iyan daw an pagmansay ni Jehova? Bako nanggad! An pagpapatawad sarong aspekto kan dakulang pagkamuot ni Jehova. Sa saiyang Tataramon, inaasigurar niya kita na kun magpapahiling kita nin tunay asin udok sa pusong pagsulsol, andam siyang magpatawad. (Talinhaga 28:13) Tanganing dai niyato isipon na an pagpapatawad ni Jehova garo baga dai ta makakamtan, siyasaton niyato kun taano asin kun paano siya nagpapatawad.

4. Ano an ginigirumdom ni Jehova manungod sa sato, asin paano niya kita tinatratar huli kaiyan?

⁴ Aram ni Jehova an satong mga limitasyon. “Aram niyang marhay kun paano kita hinaman, na ginigirumdom na kita alpog lang,” an sabi kan Salmo 103:14. Dai niya linilingawan na kita mga linalang hali sa alpog, na may mga kaluyahan na resulta nin pagigin bakong perpekto. An ekspresyon na aram niya “kun paano kita hinaman” nagpapagirumdom sa sato na si Jehova iinaagid kan Bibliya sa paragibo nin kuron asin kita man iinaagid sa mga lalagan na dalipay na saiyang pinoporma. (Jeremias 18:2-6) Ibinabagay kan Dakulang Paragibo nin Kuron an pagtratar niya sa sato sigun sa satong kaluyahan huli sa pagigin makasalan asin sa satong paghimati o dai paghimati sa saiyang paggiya.

5. Paano ilinaladawan kan libro nin Roma an makapangyarihan na puwersa nin kasalan?

⁵ Nasasabutan ni Jehova kun gurano kamakapangyarihan kan kasalan. An kasalan ilinaladawan kan saiyang Tataramon bilang makapangyarihan na puwersa na nagkokontrol sa mga tawo asin nagdadara sa sainda sa kagadanan. Gurano man nanggad kamakapangyarihan kan kasalan? Sa libro nin Roma, ipinapaliwanag ni apostol Pablo: Kita “nasa irarom nin kasalan,” kun paanong an mga suldados nasa irarom kan saindang komandante (Roma 3:9); an kasalan ‘namamahala’ sa katawuhan siring sa sarong hadi (Roma 5:21); “yaon” iyan sa sato (Roma 7:17, 20); an “katugunan” kaiyan nagpapadagos na may epekto sa sato, na garo man sana kinokontrol an gabos niyatong ginigibo. (Roma 7:23, 25) Makapangyarihan nanggad an kasalan na nagkokontrol sa satong makasalan na laman!—Roma 7:21, 24.

6, 7. (a) Paano minamansay ni Jehova an mga naghahagad kan saiyang pagkahirak na tunay na nagsusulsol? (b) Taano ta dai niyato dapat isipon na pirming mapahiling nin pagkahirak an Diyos?

⁶ Huli kaini, aram ni Jehova na bakong posible para sa sato an perpektong pagsunod, gurano man kita kaigot sa satong paghihinguwa na magibo iyan. Mamumuton na sinisiyerto niya sa sato na kun hahagadon niyato an saiyang pagkahirak asin tunay na masulsol, papatawadon niya kita. Sinasabi kan Salmo 51:17: “An mga atang na nakakapaugma sa Diyos iyo an nalugadan na espiritu; an pusong nalugadan asin runot, O Diyos, dai mo isisikwal.” Nungkang isisikwal, o tatalikdan, ni Jehova an pusong “nalugadan asin runot” huli sa grabeng pagkakonsiyensiya.

⁷ Pero, nangangahulugan daw ini na puwede niyatong isipon na pirming mapahiling nin pagkahirak an Diyos, na ginagamit an satong pagigin makasalan bilang sarahutan para magkasala? Dai nanggad! Si Jehova dai nagpapadara sa sentimyento sana. An saiyang pagkahirak igwang limitasyon. Dai niya nanggad papatawadon an mga may katagasan an puso na naggigibo nin tuyong pagkakasala, na dai nagpapahiling nin ano man na pagsulsol. (Hebreo 10:26) Minsan siring, pag nakakahiling siya nin saro na tunay na nagsusulsol, andam siyang magpatawad. Konsideraron ta ngunyan an nagkapira sa magagayon na paglaladawan na ginamit sa Bibliya para iladawan an marahayon na aspektong ini kan pagkamuot ni Jehova.

8. Ano an garo man sana ginigibo ni Jehova pag pinapatawad niya an satong mga pagkakasala, asin anong pagtitiwala an itinatao kaini sa sato?

⁸ Sinabi kan nagsusulsol na si David: “Sa katapos-tapusi, itinuga ko sa saimo an sakuyang kasalan; dai ko pigtahuban an sakuyang sála. . . . Asin pinatawad mo an sakong mga pagkakasala.” (Salmo 32:5) An tataramon na “pinatawad” iyo an traduksiyon kan tataramon sa Hebreo na sa pundamental nangangahulugan “alsahon” o “darahon.” An pagkagamit sa Salmo 32:5 kan tataramon na “pinatawad” nanunungod sa paghali kan “pakamati nin pagkakasala, karatan, o paglapas.” Kaya garo man sana inalsa ni Jehova an mga kasalan ni David asin dinara iyan parayo. Daing duda na pinagian kaini an purupasan ni David na pakamati nin pagkakasala. (Salmo 32:3) Lubos man kitang makakapagtiwala na dadarahon nin Diyos parayo an satong mga kasalan kun hahagadon ta an saiyang pagpapatawad basado sa satong pagtubod sa atang na pantubos ni Jesus.—Mateo 20:28.

9. Gurano kaharayo na irinarayo sa sato ni Jehova an satong mga kasalan?

⁹ Naggamit si David nin saro pang buhay na buhay na paglaladawan sa pagpapatawad ni Jehova: “Kun gurano kaharayo kan sirangan sa sulnupan, arog man niya kaiyan kaharayong ibinubugtak hali sa sato an satong mga paglapas.” (Salmo 103:12) An aldaw minasirang sa sirangan asin minasulnop sa sulnupan. Gurano kaharayo kan sirangan sa sulnupan? An sirangan pirming nasa pinakaharayong distansiya sa sulnupan; nungkang magkakatagbuan an duwang iyan. Sarong iskolar an nagkomento na an pananaram na ini nangangahulugan nin “sa pinakaharayong mapupuwede; sa pinakaharayong maiimahinar niyato.” Pinasabngan si David na isurat an mga tataramon na ini para maaraman ta na pag nagpapatawad si Jehova, irinarayo niya sa sato an satong mga kasalan sa pinakaharayong maiimahinar niyato.

10. Pag pinapatawad ni Jehova an satong mga kasalan, taano ta dai niyato dapat mamati na dara-dara pa niyato an mantsa kan mga kasalan na iyan sagkod na kita nabubuhay?

¹⁰ Napurbaran mo nang maghali nin mantsa sa bado na kulor puti? Tibaad sa ibong kan gabos mong paghihinguwa, dai pa man giraray nahali an mantsa. Mangnuha an paglaladawan ni Jehova kun paano siya lubos na nagpapatawad: “Dawa pa an mga kasalan nindo kakulor nin iskarlata, papapution iyan na garo niyebe; dawa kasingpula an mga iyan nin pulang tela, magigin kasingputi an mga iyan nin telang lana.” (Isaias 1:18) An tataramon na “iskarlata” nangangahulugan na pulang-pula an kulor.a An “crimson” man sarong mapulahon na kulor nin tinugma na tela. (Nahum 2:3, nota sa ibaba) Nungka tang mahahali an mantsa nin kasalan paagi sana sa sadiri niyatong mga paghihinguwa. Pero si Jehova, kaya niyang papution na garo niyebe o garo telang lana na dai tinugma an mga kasalan na garo iskarlata asin crimson. Pag pinapatawad ni Jehova an satong mga kasalan, dai ta dapat mamati na dara-dara pa niyato an mantsa kan mga kasalan na iyan sagkod na kita nabubuhay.

11. Sa anong paagi iinaapon ni Jehova an satong mga kasalan sa likudan niya?

¹¹ Pagkatapos na marahay si Hezekias sa hilang na haros ikagadan na niya, nagsurat siya nin nakakapukaw sa buot na kanta nin pasasalamat. Sinabi niya ki Jehova: “Iinapon mo sa likudan mo an gabos kong kasalan.” (Isaias 38:17) Digdi ilinadawan niya si Jehova na garo baga kinukua an mga kasalan nin nagsusulsol na nagkasala asin iinaapon iyan sa likudan Niya kun sain dai na Niya iyan nahihiling ni naririsa. Sigun sa sarong reperensiya, an itinataong ideya kaiyan puwede man na ipahayag nin arog kaini: “Pinangyari mo [an sakong mga kasalan] na garo baga dai ko ginibo iyan.” Bako daw na nakakapakusog sa buot iyan?

12. Paano ipinaparisa ni propeta Mikas na pag nagpapatawad si Jehova, hinahali na Niya nin permanente an satong mga kasalan?

¹² Sa sarong panuga manungod sa pagbabalik, ipinahayag ni propeta Mikas an saiyang kumbiksiyon na papatawadon ni Jehova an nagsusulsol niyang banwaan. Isinurat niya: “Siisay an Diyos na arog mo, na . . . nagpapalampas sa paglapas kan mga natatada sa saiyang mana? . . . Iaapon mo sa kairaruman kan dagat an gabos nindang kasalan.” (Mikas 7:18, 19) Imahinara an nagin kahulugan kan mga tataramon na iyan sa mga nabubuhay kan mga panahon kan Bibliya. May posibilidad pa daw na makua giraray an sarong bagay na iinapon “sa kairaruman kan dagat”? Sa siring, ipinaparisa kan mga tataramon ni Mikas na pag nagpapatawad si Jehova, hinahali na niya nin permanente an satong mga kasalan.

13. Ano an kahulugan kan mga tataramon ni Jesus na “patawadon mo kami sa samuyang mga utang”?

¹³ Ginamit ni Jesus an koneksiyon nin mga inutangan asin nin may utang tanganing iilustrar an pagpapatawad ni Jehova. Sinadol kita ni Jesus na mamibi: “Patawadon mo kami sa samuyang mga utang.” (Mateo 6:12, nota sa ibaba) Sa siring, ikinumparar ni Jesus an mga kasalan sa mga utang. (Lucas 11:4) Pag nagkakasala kita, ‘nagkakautang’ kita ki Jehova. Mapadapit sa kahulugan kan pandiwang Griego na itrinadusir na “patawadon,” sinabi nin sarong reperensiya: “Pabayaan, butasan, an utang, paagi sa dai na pagsingil kaiyan.” Kaya pag si Jehova nagpapatawad, garo man sana kinakanselar niya an utang na sisingilon kutana sa sato. Nakakaranga nanggad ini para sa nagsusulsol na mga parakasala. Dai na nuarin man sisingilon ni Jehova an kinanselar na niyang utang!—Salmo 32:1, 2.

14. An pananaram na “mapara an saindong mga kasalan” nagtatao nin anong ladawan sa satong isip?

¹⁴ An pagpapatawad ni Jehova ilinaladawan pa sa Gibo 3:19: “Kaya magsurulsol kamo asin magbakli tanganing mapara an saindong mga kasalan.” An tataramon na “mapara” traduksiyon kan pandiwang Griego na puwedeng mangahulugan na “pahidon, . . . kanselaron o halion.” Sigun sa nagkapirang iskolar, an halimbawang ginamit digdi nanunungod sa pagpara nin mga letra na surat-kamot. Paano ini posible? An tinta na parating ginagamit kan suanoy na mga panahon gibo sa pinagsaralak na karbon, pulot, asin tubig. Pakasurat tulos gamit an siring na tinta, an saro puwedeng kumua nin basang espongha asin paraon an isinurat. Magayunon na paglaladawan ini kan pagkahirak ni Jehova. Pag pinapatawad niya an satong mga kasalan, garo siya nagkukua nin espongha asin pinapara iyan.

15. Ano an gusto ni Jehova na maaraman niyato manungod sa saiya?

¹⁵ Pag pighuhurop-hurop ta an manlain-lain na paglaladawan na ini, bako daw na malinaw na gusto ni Jehova na maaraman niyato na siya talagang andam na patawadon an satong mga kasalan basta sinsero kitang nagsusulsol? Dai kita dapat matakot na papadusahan niya kita sa maabot na panahon huli sa mga kasalan na iyan. Ipinapahiling ini nin saro pang bagay na ihinahayag kan Bibliya manungod sa dakulang pagkahirak ni Jehova: Pag siya nagpapatawad, linilingawan na niya iyan.

16, 17. Pag sinasabi kan Bibliya na linilingawan na ni Jehova an satong mga kasalan, ano an buot sabihon kaiyan, asin taano ta siring an simbag mo?

¹⁶ Nanuga si Jehova mapadapit sa mga kabilang sa bagong tipan: “Papatawadon ko an saindang pagkakasala, asin dai ko na gigirumdumon an kasalan ninda.” (Jeremias 31:34) Nangangahulugan daw ini na pag nagpapatawad si Jehova dai na niya nagigirumduman an mga kasalan? Dai, bakong arog kaiyan an buot sabihon. Sinasabi sa sato kan Bibliya an mga kasalan nin dakul na indibidwal na pinatawad ni Jehova, kaiba si David. (2 Samuel 11:1-17; 12:13) Malinaw na aram pa ni Jehova an nagibo nindang mga kasalan. An rekord kan saindang mga kasalan, pati an saindang pagsulsol asin an pagpapatawad nin Diyos, ipinasurat para sa satong kapakinabangan. (Roma 15:4) Kun siring, ano an buot sabihon kan Bibliya sa pagsabi kaiyan na dai na “gigirumdumon” ni Jehova an mga kasalan kan mga pinatawad niya?

¹⁷ An pandiwang Hebreo na itrinadusir na “dai ko na gigirumdumon” bako sanang paggirumdom sa nakaagi an ipinapakahulugan. Sinasabi kan Theological Wordbook of the Old Testament na kaiba diyan “an dagdag na kahulugan na paggibo nin angay na aksiyon.” Kaya digdi, an ‘paggirumdom’ sa kasalan nangangahulugan nin paggibo nin aksiyon tumang sa mga parakasala. (Oseas 9:9) Alagad sa pagsabi nin Diyos na “dai ko na gigirumdumon an kasalan ninda,” sinisiyerto niya sa sato na oras na patawadon niya an mga parakasalang nagsusulsol, dai na siya magibo nin aksiyon tumang sa sainda sa maabot na panahon huli sa mga kasalan na iyan. (Ezekiel 18:21, 22) Kaya pag liningawan na ni Jehova an satong mga kasalan, dai na niya iyan pauruutrong ginigirumdom pa tanganing akusaran o padusahan kita nin pauruutro. Bako daw na nakakarangang maaraman na pag pinapatawad nin Diyos an satong mga kasalan, linilingawan na niya iyan?

18. Taano ta an pagpapatawad dai nangangahulugan na an nagsusulsol na parakasala nakalibre na sa gabos na konsekwensiya kan saiyang salang gibo?

¹⁸ An pagigin andam daw ni Jehova na magpatawad nangangahulugan na an nagsusulsol na parakasala nakalibre na sa gabos na konsekwensiya kan saiyang salang gibo? Dai nanggad. Dai kita puwedeng magkasala na dai napapadusahan. Isinurat ni Pablo: “Ano man an itinatanom nin sarong tawo, ini man an saiyang aanihon.” (Galacia 6:7) Puwedeng mapaatubang kita sa nagkapirang konsekwensiya kan satong ginibo. Dai ini nangangahulugan na pakatapos na patawadon kita ni Jehova pinapangyari niya na mag-agi kita nin kasakitan. Pag may problema na mag-abot, dai dapat isipon nin sarong Kristiyano, ‘Siguro pinapadusahan ako ni Jehova huli sa nagibo kong mga kasalan.’ (Santiago 1:13) Sa ibong na lado, dai kita pinoprotektaran ni Jehova sa gabos na epekto kan satong salang mga gibo. An diborsiyo, dai ginustong pagbados, hilang na ikinakaulakit paagi sa pagdudurog, pagkawara nin tiwala o paggalang—sa parati iyo an dai malilikayan asin mamundong konsekwensiya nin kasalan. Girumduma na dawa pakatapos na patawadon si David sa saiyang mga kasalan may koneksiyon ki Bat-seba asin Urias, dai prinotektaran ni Jehova si David sa kapaha-pahamak na mga konsekwensiya kan saiyang pagkakasala.—2 Samuel 12:9-12.

19-21. (a) Paano an katugunan na nasusurat sa Levitico 6:1-7 nagtao nin pakinabang sa biktima saka sa nagkasala? (b) Kun may ibang nadanyaran kan satong mga kasalan, nauugma si Jehova kun ginigibo niyato an ano?

¹⁹ An satong mga kasalan puwedeng magkaigwa nin dagdag pang mga konsekwensiya, nangurugna kun may ibang nadanyaran kan satong mga ginibo. Halimbawa, konsideraron an pagkasaysay sa Levitico kapitulo 6. Tinatawan digdi nin atensiyon kan Katugunan ni Moises an sitwasyon manungod sa saro na nakagibo nin magabat na pagkakasala huli sa pagkua sa pagsadiri nin kapwa Israelita paagi sa paghabon, pangingikil, o pandadaya. Dangan an parakasala pignigaran na ginibo niya iyan, asin nagsusumpa pa ngani nin bakong totoo. Sa kasong ini mayo nin testigo, kaya dai napadusahan an nagkasala. Minsan siring, pag-abot nin panahon, naribok an konsiyensiya kan nagkasala asin itinuga an saiyang kasalan. Tanganing kamtan an pagpapatawad nin Diyos, may tulo pa siyang dapat na gibuhon: ibalik an kinua niya, tapos dadagdagan niya pa nin 20 porsiyento kan halaga kaiyan, asin magtao nin lalaking karnero para magin dulot para sa pagkakasala. Dangan, sinasabi kan katugunan: “Gigibuhon kan saserdote an pagbayad sa kasalan para sa saiya sa atubangan ni Jehova, asin papatawadon siya.”—Levitico 6:1-7.

²⁰ An katugunan na ini mahihirakon na probisyon hali sa Diyos. Nagtao iyan nin pakinabang sa biktima, na an rugaring naibalik asin daing duda na nakaginhawang marhay kan sa katapos-tapusi akuon kan nagkasala an kasalan kaini. Apuwera pa diyan, an katugunan nagtao man nin pakinabang sa nagkasala na sa katapos-tapusi pinahiro kan saiyang konsiyensiya na admitiron an saiyang kasalan asin itanos an nagibo niyang sala. Sa katunayan, kun dai niya iyan ginibo, dai siya papatawadon nin Diyos.

²¹ Dawa ngani bako na kitang sakop kan Katugunan ni Moises, an Katugunan na iyan nagtatao sa sato nin pakasabot sa kaisipan ni Jehova, kaiba na an kaisipan niya sa pagpapatawad. (Colosas 2:13, 14) Kun may ibang nadanyaran kan satong mga kasalan, nauugma an Diyos kun ginigibo niyato an satong makakaya na maitanos an nagibong sala. (Mateo 5:23, 24) Tibaad kaiba digdi an pag-admitir na kita nakagibo nin sala asin paghagad pa ngani nin dispensa sa biktima. Dangan puwede tang hagadon ki Jehova na patawadon kita basado sa atang ni Jesus. Pag ginibo ta iyan, magkakamit kita kan kapatawadan nin Diyos.—Hebreo 10:21, 22.

22. Ano an tibaad kaiba sa pagpapatawad ni Jehova?

²² Arog nin siisay man na mamumuton na magurang, si Jehova puwedeng magtao nin kapatawadan na may kaibang disiplina. (Talinhaga 3:11, 12) An nagsusulsol na Kristiyano tibaad kaipuhan na butasan an pribilehiyo niyang maglingkod bilang elder, ministeryal na lingkod, o payunir. Tibaad masakit para sa saiya na temporaryong mawaran nin pribilehiyo na mahalagang marhay sa saiya. Minsan siring, an arog kaiyan na disiplina dai nangangahulugan na dai siya pinatawad ni Jehova. Dapat tang girumdumon na an disiplina hali ki Jehova pruweba kan saiyang pagkamuot sa sato. An pag-ako asin pag-aplikar kaiyan para sa ikakarahay niyato.—Hebreo 12:5-11.

23. Taano ta dapat na nungka niyatong isipon na dai na kita puwedeng kahirakan ni Jehova, asin taano ta dapat niyatong arugon an saiyang pagpapatawad?

²³ Nakakaginhawa nanggad na maaraman na an satong Diyos “andam na magpatawad”! Sa ibong kan mga pagkakasala na tibaad nagibo niyato, dapat na nungka niyatong isipon na dai na kita puwedeng kahirakan ni Jehova. Kun talagang magsusulsol kita, gumibo nin lakdang para maitanos an sala, asin udok na mamibi para sa kapatawadan basado sa pinabulos na dugo ni Jesus, lubos kitang makakapagtiwala na papatawadon kita ni Jehova. (1 Juan 1:9) Arugon ta an saiyang pagpapatawad sa pagtratar niyato sa lambang saro. Tutal, kun si Jehova, na dai nagkakasala, mamumuton na marhay na pinapatawad kita, bako daw na kita, bilang makasalan na mga tawo, dapat man na gibuhon an pinakamakakaya ta para patawadon an lambang saro?