Mas Dakulang mga Bendisyon Paagi sa Bagong Tipan

“Si Jesus . . . man an parapangoltanan sa orog karahay na tipan.”—HEBREO 8:6.

 1. Siisay an nagin ‘banhi kan babae’ na ipinanuga sa Eden, asin paano sia ‘linugad sa bool’?

PAKATAPOS na magkasala si Adan asin Eva, hinokoman ni Jehova si Satanas, an saro na nandaya ki Eva, na nagsasabi: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:15) Kan si Jesus bautismohan sa Salog nin Jordan kan 29 C.E., an Banhi na ipinanuga sa Eden nagtunga sa katapustapusi. Sa saiyang kagadanan sa sarong hariging pasakitan kan 33 C.E., naotob an sarong kabtang kan suanoy na hulang iyan. ‘Linugad [ni Satanas] sa bool’ an Banhi.

 2. Oyon sa mga tataramon mismo ni Jesus, paano nakikinabang an katawohan sa saiyang kagadanan?

² Marahay sana ta an lugad na iyan, minsan ngani makuri an kolog, bakong permanente. Si Jesus ibinangon hale sa mga gadan bilang inmortal na espiritu asin nagsakat sa saiyang Ama sa langit, kun saen idinolot nia an halaga kan saiyang pinabolos na dugo bilang “pantubos na karibay nin dakol.” Sa siring, an saiyang mga tataramon mismo nagkatotoo: “An Aki nin tawo dapat na iitaas man, tanganing an gabos na minatubod sa saiya magkaigwa nin buhay na daing katapusan. Huli ta an Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Mateo 20:28; Juan 3:​14-16; Hebreo 9:​12-14) An bagong tipan igwa nin importanteng marhay na papel sa kaotoban kan hula ni Jesus.

An Bagong Tipan

 3. Kasuarin enot na naheling na nagpupunsionar an bagong tipan?

³ Kan madali na siang magadan, sinabi ni Jesus sa saiyang mga parasunod na an saiyang pinabolos na dugo iyo an “dugo kan [bagong] tipan.” (Mateo 26:28; Lucas 22:20) Sampulong aldaw pagkasakat nia sa langit, an bagong tipan naheling na nagpupunsionar kan an banal na espiritu ibubo sa mga 120 disipulo na nagkatiripon sa sarong kuarto sa itaas sa Jerusalem. (Gibo 1:15; 2:​1-4) Ipinaheling kan pag-ayon kan 120 disipulong ini sa bagong tipan na an “dating” tipan, an tipan nin Ley, dai nang saysay.​—Hebreo 8:13.

 4. Nagkulang daw an daan na tipan? Ipaliwanag.

⁴ Nagkulang daw an daan na tipan? Dai man. Totoo, huling iyan sinalidahan na ngonyan, an Israel sa laman bako nang an espesyal na banwaan nin Dios. (Mateo 23:38) Alagad iyan huli sa pakisuway asin pagsikwal kan Israel sa Linahidan na Saro ni Jehova. (Exodo 19:5; Gibo 2:​22, 23) Minsan siring, bago sinalidahan an Ley, dakula an nagibo kaiyan. Sa laog nin dakol na siglo, nagtao iyan nin paagi na makadolok sa Dios asin nin proteksion sa falsong relihion. Igwa iyan nin mga patanaw sa ngapit kan bagong tipan asin, paagi sa paorootrong mga pag-atang kaiyan, ipinaheling kaiyan an grabeng pangangaipo na balukaton an tawo sa kasalan asin kagadanan. Tunay nanggad, an Ley sarong “paratokdo na minagiya pasiring ki Cristo.” (Galacia 3:​19, 24; Roma 3:​20; 4:​15; 5:​12; Hebreo 10:​1, 2) Minsan siring, paagi sa bagong tipan na an bendisyon na ipinanuga ki Abraham biyong maootob.

An mga Nasyon Binendisyonan Paagi sa Banhi ni Abraham

5, 6. Sa pangenot, espirituwal na kaotoban kan tipan ki Abraham, siisay an Banhi ni Abraham, asin arin na nasyon an enot na nag-ako nin bendisyon paagi sa saiya?

⁵ Si Jehova nanuga ki Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:18) Sa irarom kan daan na tipan, dakol na mahoyo an puso na tagaibang daga an binendisyonan paagi sa saindang pakikiasosyar sa Israel, an nasyonal na banhi ni Abraham. Minsan siring, sa pangenot na espirituwal na kaotoban kaiyan, an Banhi ni Abraham sarong sangkap na tawo. Ipinaliwanag ini ni Pablo kan sabihon nia: “An mga panuga isinabi ki Abraham asin sa saiyang banhi. Iyan nagsasabi, bakong: ‘Asin sa mga banhi,’ na garo baga siring sa dakol, kundi siring sa saro: ‘Asin sa saimong banhi,’ na iyo si Cristo.”​—Galacia 3:16.

⁶ Iyo, si Jesus iyo an Banhi ni Abraham, asin paagi sa Saiya an mga nasyon nag-aako nin bendisyon na nakalalabi nanggad kisa sa ano man na posibleng akoon kan Israel sa laman. Sa katunayan, an enot na nasyon na maako kan bendisyon na ini iyo mismo an Israel. Dai nahaloy pakatapos kan Pentecostes 33 C.E., sinabi ni apostol Pedro sa sarong grupo nin mga Judio: “Kamo an mga aki kan mga propeta asin kan tipan na ipinakipagtipan nin Dios sa saindong mga apoon, na nagsabi ki Abraham, ‘Asin sa saimong banhi an gabos na pamilya kan daga mabebendisyonan.’ Sa saindo nguna, pakatapos na patindogon an saiyang Lingkod, sia sinugo nin Dios tanganing bendisyonan kamo paagi sa pagpabakle sa lambang saro sa saindong maraot na mga gibo.”​—Gibo 3:​25, 26.

 7. Anong mga nasyon an binendisyonan paagi ki Jesus, an Banhi ni Abraham?

⁷ Dai nahaloy an bendisyon ipinaabot sa mga Samaritano dangan sa mga Hentil. (Gibo 8:​14-​17; 10:​34-​48) Sa pag-oltanan kaidto nin 50 asin 52 C.E., si Pablo nagsurat sa mga Kristiano sa Galacia sa Asia Minor: “An Kasuratan, huli sa patienot na pakaheling na ipahahayag nin Dios na matanos an mga tawo kan mga nasyon huli sa pagtubod, patienot na nagpahayag kan maogmang bareta ki Abraham, na an sabi: ‘Paagi sa saimo an gabos na nasyon bebendisyonan.’ Bilang resulta an gabos na nagdadanay sa pagtubod binebendisyonan sa kaibanan kan fiel na si Abraham.” (Galacia 3:​8, 9; Genesis 12:3) Minsan ngani an dakol na Kristiano sa Galacia “mga tawo kan mga nasyon,” sinda binendisyonan paagi ki Jesus huli sa saindang pagtubod. Sa anong paagi?

 8. Para sa mga Kristiano kan kaaldawan ni Pablo, ano an kaiba sa pagigin binendisyonan paagi sa Banhi ni Abraham, asin pira, sa katapustapusi, an mag-aako nin siring na bendisyon?

⁸ Sinabihan ni Pablo an taga-Galaciang mga Kristiano, ano man an saindang pinaghalean: “Kun kamo rogaring ni Cristo, kamo sa katunayan banhi ni Abraham, mga paramana mapadapit sa sarong panuga.” (Galacia 3:29) Para sa mga taga-Galaciang idto, an bendisyon paagi sa banhi ni Abraham kabale an saindang pagigin mga partisipante sa bagong tipan asin pagigin man mga kapwa paramana ni Jesus, mga kaiba ni Jesus sa banhi ni Abraham. Dai niato aram an populasyon kan suanoy na Israel. Aram sana niato na iyan nagin “siring kadakol kan mga baybay na yaon sa gilid nin dagat.” (1 Hade 4:20) Minsan siring, aram niato an ultimong bilang kan mga kaiba ni Jesus sa espirituwal na banhi​—144,000. (Kapahayagan 7:​4; 14:1) An 144,000 na idto hale sa “lambang tribo asin tataramon asin banwaan patin nasyon” kan katawohan asin nakikikabtang sa pagpaabot sa iba pa kan mga bendisyon kan tipan ki Abraham.​—Kapahayagan 5:9.

Sarong Hula na Naotob

 9. Paanong nasa mga kabilang sa bagong tipan an ley ni Jehova?

⁹ Kan ihinuhula an bagong tipan, si Jeremias nagsurat: “‘Ini an tipan na gigibohon ko sa harong ni Israel pakalihis kan mga aldaw na idto,’ an sabi ni Jehova. ‘Ibubugtak ko an sakong ley sa sainda, asin sa saindang puso iyan isusurat ko.’” (Jeremias 31:33) Karakteristiko kan mga kabilang sa bagong tipan na sinda maglingkod ki Jehova huli sa pagkamoot. (Juan 13:​35; Hebreo 1:9) An ley ni Jehova nasusurat sa saindang puso, asin odok na minamawot nindang gibohon an saiyang kabotan. Totoo, sa suanoy na Israel may nagkapirang fiel na indibiduwal na namomoot na marhay sa ley ni Jehova. (Salmo 119:97) Alagad an dakol dai. Pero sinda nagdanay na kabtang kan nasyon. Mayo nin siisay man na puedeng magdanay sa bagong tipan kun an ley nin Dios dai nakasurat sa saiyang puso.

10, 11. Para sa mga kabilang sa bagong tipan, sa anong paagi na si Jehova ‘nagigin saindang Dios,’ asin paano sia mamimidbid ninda gabos?

¹⁰ Sinabi pa ni Jehova mapadapit sa mga kabilang sa bagong tipan: “Ako magigin saindang Dios, asin sinda magigin sakong banwaan.” (Jeremias 31:33) Sa suanoy na Israel dakol an nagsasamba sa mga dios kan mga nasyon, alagad sinda nagdanay na mga Israelita. Basado sa bagong tipan, si Jehova naglalang nin espirituwal na nasyon, an “Israel nin Dios,” tanganing salidahan an Israel sa laman. (Galacia 6:16; Mateo 21:​43; Roma 9:​6-8) Minsan siring, mayo nin siisay man na magdadanay na kabtang kan bagong espirituwal na nasyon kun sia mapondo sa pagsamba ki Jehova asin sa saiya sana.

¹¹ Sinabi man ni Jehova: “Sinda gabos makamimidbid na sa sako, pagpoon sa pinakasadit sa sainda sagkod sa pinakadakula sa sainda.” (Jeremias 31:34) Sa Israel, dakol an inignoro sana si Jehova, na garo man sana nagsasabi: “Si Jehova dai maggigibo nin marahay, asin dai sia maggigibo nin maraot.” (Sofonias 1:12) Mayo nin siisay man na magdadanay na kabtang kan Israel nin Dios kun iniignoro nia si Jehova o inaatian nia an dalisay na pagsamba. (Mateo 6:​24; Colosas 3:5) An espirituwal na mga Israelita “banwaan na nakakamidbid sa saindang Dios.” (Daniel 11:32) Sinda naoogmang marhay na ‘magkua nin kaaraman dapit sa iyo sanang tunay na Dios asin dapit ki Jesu-Cristo.’ (Juan 17:3) An pakamidbid ki Jesus nagpapararom kan saindang kaaraman dapit sa Dios huling, sa daing kaparehong paagi, si Jesus “an nagpaliwanag sa [Dios].”​—Juan 1:​18; 14:​9-11.

12, 13. (a) Ano an basehan ni Jehova sa pagpatawad kan mga kasalan kan mga kabilang sa bagong tipan? (b) Mapadapit sa kapatawadan nin mga kasalan, paanong an bagong tipan nakalalabi sa daan na tipan?

¹² Sa katapustapusi, si Jehova nanuga: “Ipatatawad ko an saindang sala, asin an saindang kasalan dai ko na gigirumdomon.” (Jeremias 31:34b) Kaiba sa Ley ni Moises an ginatos na nasusurat na susundon na ipinakukuyog sa mga Israelita. (Deuteronomio 28:​1, 2, 15) An gabos na naglapas kan Ley nagdolot nin atang tanganing tahoban an saindang mga kasalan. (Levitico 4:​1-7; 16:​1-​31) An dakol na Judio naniwala na sinda puedeng magin matanos paagi sa saindang sadiring mga gibo sono sa Ley. Pero narerealisar kan mga Kristiano na nungka nindang aakoon bilang bayad an katanosan paagi sa saindang sadiring mga gibo. Dai ninda malilikayan na magkasala. (Roma 5:12) Sa irarom kan bagong tipan, an matanos na kamugtakan sa atubangan nin Dios posible sana basado sa atang ni Jesus. Minsan siring, an siring na kamugtakan sarong balaog, dai na kutana maninigong kabootan hale sa Dios. (Roma 3:​20, 23, 24) Kahagadan pa man giraray ni Jehova an pagkuyog kan saiyang mga lingkod. Si Pablo nagsasabi na idtong mga kabilang sa bagong tipan “sakop kan ley ki Cristo.”​—1 Corinto 9:21.

¹³ Huli kaini, an mga Kristiano igwa man nin atang para sa kasalan, alagad mas dakula nanggad an halaga kisa sa mga atang na sakop kan tipan nin Ley. Si Pablo nagsurat: “An lambang saserdote [na sakop kan tipan nin Ley] minatindog aroaldaw tanganing maglingkod asin magdolot kan pareho man sanang mga atang nin parate, huli ta an mga ini dai lubos na nakakahale sa mga kasalan. Alagad [si Jesus] nagdolot nin sarong atang para sa mga kasalan para sa gabos na panahon asin nagtukaw sa too nin Dios.” (Hebreo 10:​11, 12) Huling an mga Kristiano sa bagong tipan naggigibo nin pagtubod sa atang ni Jesus, si Jehova ipinahahayag sindang matanos, mayo nin kasalan, asin sa siring nasa kamugtakan na lahidan bilang saiyang espirituwal na mga aki. (Roma 5:1; 8:​33, 34; Hebreo 10:​14-​18) Kun sinda nagkakasala huli sa pagkabakong sangkap nin tawo, puede sindang maghagad nin kapatawadan ki Jehova, asin basado sa atang ni Jesus, pinatatawad sinda ni Jehova. (1 Juan 2:​1, 2) Minsan siring, kun pilion ninda an tuyong pagkakasala, nawawara an saindang matanos na kamugtakan asin an pribilehio na magin mga partisipante sa bagong tipan.​—Hebreo 2:​2, 3; 6:​4-8; 10:​26-​31.

An Daan na Tipan Asin an Bago

14. Anong pagturi an hinahagad kan tipan nin Ley? kan bagong tipan?

¹⁴ An mga lalaki sa daan na tipan tinuturi bilang tanda na sinda sakop kan Ley. (Levitico 12:​2, 3; Galacia 5:3) Pagkapoon kan Kristianong kongregasyon, an iba naghona na an bakong Judiong mga Kristiano maninigong turion man. Alagad nasabotan kan mga apostol asin kamagurangan sa Jerusalem, na ginigiyahan kan Tataramon nin Dios asin kan banal na espiritu, na dai na ini kaipuhan. (Gibo 15:​1, 5, 28, 29) Pakalihis nin pirang taon, si Pablo nagsabi: “Bakong Judio an Judio sa luwas, ni an pagturi na sa luwas sana sa laman. Alagad Judio an Judio sa laog, asin an saiyang pagturi iyo an sa puso paagi sa espiritu, asin bakong paagi sa nasusurat na pagboot.” (Roma 2:​28, 29) An literal na pagturi, dawa sa mga Judio sa laman, mayo nang espirituwal na halaga sa pagheling ni Jehova. Para sa mga nasa bagong tipan, an puso, bakong an laman, an kaipuhan na turion. An gabos na nasa saindang kaisipan, kamawotan, asin motibasyon na dai nakasosono o maati sa pagheling ni Jehova dapat na haleon.a Dakol ngonyan an buhay na patotoo kan kapangyarihan kan banal na espiritu na liwaton an mga pag-iisip sa paaging ini.​—1 Corinto 6:​9-​11; Galacia 5:​22-​24; Efeso 4:​22-​24.

15. Paano nagkakaagid an Israel sa laman asin an Israel nin Dios kun dapit sa makahadeng pamamahala?

¹⁵ Sa areglo kan tipan nin Ley, si Jehova an Hade kan Israel, asin pag-abot nin panahon ginamit nia an saiyang soberaniya paagi sa mga hadeng tawo sa Jerusalem. (Isaias 33:22) Si Jehova man an Hade kan Israel nin Dios, an espirituwal na Israel, asin poon kan 33 C.E., sia namahala paagi ki Jesu-Cristo, na nag-ako kan “gabos na autoridad sa langit asin sa daga.” (Mateo 28:18; Efeso 1:​19-​23; Colosas 1:​13, 14) Ngonyan, an Israel nin Dios rinerekonoser si Jesus bilang Hade kan langitnon na Kahadean nin Dios, na pinatindog kan 1914. Si Jesus orog karahay na Hade kisa ki Ezequias, Josias, asin iba pang fiel na mga hade kan suanoy na Israel.​—Hebreo 1:​8, 9; Kapahayagan 11:15.

16. Anong klaseng pagkasaserdote an Israel nin Dios?

¹⁶ An Israel bako sanang kahadean kundi igwa man nin linahidan na mga saserdote. Kan 33 C.E., an Israel nin Dios an suminalida sa Israel sa laman asin nagin “lingkod” ni Jehova, an saiyang “mga saksi.” (Isaias 43:10) An mga tataramon ni Jehova sa Israel na nakarekord sa Isaias 43:​21 asin Exodo 19:​5, 6 aplikado sa espirituwal na Israel nin Dios poon kan panahon na idto. An bagong espirituwal na nasyon nin Dios kan panahon na iyan nagin nang sarong “rasang pinili, sarong makahadeng mga saserdote, banal na nasyon, banwaan para sa espesyal na pagkasadiri,” na may paninimbagan na ‘ipahayag nin mahiwas an mga kamurawayan ni Jehova.’ (1 Pedro 2:9) An gabos na kabilang sa Israel nin Dios, lalaki asin babae, minakompuesto nin sarong grupo nin mga saserdote. (Galacia 3:​28, 29) Bilang dagdag na kabtang kan banhi ni Abraham, sinda ngonyan nagsasabi: “Pangag-ogma, kamong mga nasyon, kaiba kan saiyang banwaan.” (Deuteronomio 32:43) An mga kabilang sa espirituwal na Israel na yaon pa digdi sa daga minakompuesto kan “fiel asin madonong na oripon.” (Mateo 24:​45-47) Solamente paagi sa pakikiiba sa sainda na ikatatao an inaakong sagradong paglilingkod sa Dios.

An Kahadean nin Dios—An Ultimong Kaotoban

17. Anong pagkamundag an naeeksperyensiahan kan mga kabilang sa bagong tipan?

¹⁷ An mga Israelita na namundag pakatapos kan 1513 B.C.E. nagin sakop kan tipan nin Ley pagkamundag. An mga iinaayon ni Jehova sa bagong tipan nakaeeksperyensia man nin pagkamundag​—na sa kamugtakan ninda, sarong espirituwal na pagkamundag. Nasambitan ini ni Jesus sa Fariseong si Nicodemo kan sabihon nia: “Totoong-totoo na sinasabi ko sa saimo, Kun an saro dai namundag giraray, dai sia makakaheling kan kahadean nin Dios.” (Juan 3:3) An 120 disipulo kan Pentecostes 33 C.E. iyo an enot na bakong sangkap na mga tawo na nakaeksperyensia kan bagong pagkamundag na ini. Huling ipinahayag na matanos sa irarom kan bagong tipan, sinda nag-ako nin banal na espiritu bilang “patienot na tanda” kan saindang makahadeng pamana. (Efeso 1:14) Sinda “namundag sa espiritu” tanganing magin inampon na mga aki nin Dios, na nagpangyari sa sainda na magin mga tugang ni Jesus asin sa siring “kapwa mga paramana ni Cristo.” (Juan 3:6; Roma 8:​16, 17) An saindang pagigin “namundag giraray” nagbukas kan dalan para sa makangangalas na mga oportunidad.

18. An pagigin namundag giraray nagbubukas nin anong makangangalas na mga oportunidad para sa mga kabilang sa bagong tipan?

¹⁸ Kan pinangongoltanan an bagong tipan, si Jesus naggibo nin dugang pang tipan sa saiyang mga parasunod, na nagsasabi: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Lucas 22:29) An tipan na ini sa Kahadean iinandam an dalan para sa kaotoban nin sarong pambihirang bisyon, na nakarekord sa Daniel 7:​13, 14, 22, 27. Naheling ni Daniel an “saro na kaagid sa aki nin tawo” na tinatawan nin makahadeng autoridad kan “Suanoy nin mga Aldaw,” si Jehova Dios. Dangan naheling ni Daniel na “sinadiri kan mga banal an kahadean.” Si Jesus iyo an “kaagid sa aki nin tawo” na, kan 1914, nag-ako kan langitnon na Kahadean hale ki Jehova Dios. An saiyang linahidan nin espiritung mga disipulo iyo an “mga banal” na kahiras nia sa Kahadean na iyan. (1 Tesalonica 2:12) Paano?

19, 20. (a) Para sa mga kabilang sa bagong tipan, an panuga ni Jehova ki Abraham magkakaigwa nin anong pangultimo, mamuraway na kaotoban? (b) Anong dugang pang hapot an kaipuhan na estudyaran?

¹⁹ Pagkagadan ninda, an mga linahidan na ini kapareho ni Jesus ibinangon hale sa mga gadan bilang inmortal na espiritung mga linalang tanganing maglingkod kaiba nia bilang mga hade asin saserdote sa langit. (1 Corinto 15:​50-​53; Kapahayagan 20:​4, 6) Kanigoan kamuraway na paglaom! “Sinda mamamahala bilang mga hade sa daga,” bako sanang sa daga kan Canaan. (Kapahayagan 5:​10) Sinda daw ‘makasasadiri kan mga tata kan saindang mga kaiwal’? (Genesis 22:17) Iyo, asin sa dai na mapagdududahan na paagi, kun maheling na ninda an kalaglagan kan kaiwal na relihiosong patotot, an Dakulang Babilonya, asin kun an binuhay liwat na mga linahidan na ini makikabtang na ki Jesus sa pagpastor kan mga nasyon “paagi sa sogkod na batbat” asin sa pagronot kan payo ni Satanas. Sa siring sinda magkakaigwa nin kabtang sa pag-otob kan ultimong detalye kan hula sa Genesis 3:15.​—Kapahayagan 2:​26, 27; 17:14; 18:​20, 21; Roma 16:20.

²⁰ Pero, tibaad maghapot kita, An 144,000 na fiel na kalag na ini sana daw an kalabot sa tipan ki Abraham asin sa bagong tipan? Dai, an iba na bakong direktang kabilang sa mga tipan na ini bebendisyonan paagi sa sainda, siring sa maheheling sa masunod na artikulo.

[Nota sa ibaba]

Nagigirumdoman daw Nindo?

◻ Kasuarin enot na naheling na nagpupunsionar an bagong tipan?

◻ Ano an nagibo paagi sa daan na tipan?

◻ Siisay sa pangenot an Banhi ni Abraham, asin sa anong pagkasunodsunod na binendisyonan an mga nasyon paagi sa Banhi na iyan?

◻ Para sa 144,000, ano an pangultimong kaotoban kan tipan ki Abraham asin kan bagong tipan?

[Retrato sa pahina 15]

An kapatawadan nin mga kasalan may mas hararom na kahulogan para sa mga sakop kan bagong tipan kisa sa mga sakop kan daan na tipan