An Ibang Karnero Asin an Bagong Tipan

“An mga tagaibang daga . . . , an gabos na nag-ootob kan sabbath tanganing dai iyan malanghadan asin nangangapot sa sakong tipan, dadarahon ko man sinda sa sakong banal na bukid.”—ISAIAS 56:6, 7.

 1. (a) Oyon sa bisyon ni Juan, ano an nagibo mantang pinopogolan an mga doros kan paghokom ni Jehova? (b) Anong pambihirang kadaklan an naheling ni Juan?

SA IKAAPAT na bisyon sa librong Kapahayagan, naheling ni apostol Juan an mapanlaglag na mga doros kan paghokom ni Jehova na pinopogolan mantang tinatapos an pagtatak sa gabos na miembro kan “Israel nin Dios.” An mga ini an enot na bebendisyonan paagi ki Jesus, an pangenot na kabtang kan banhi ni Abraham. (Galacia 6:​16; Genesis 22:​18; Kapahayagan 7:​1-4) Sa bisyon man sanang iyan, naheling ni Juan an “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon . . . , na nagkukurahaw sa makosog na tingog, na nagsasabi: ‘Utang niato an kaligtasan sa satong Dios, na nagtutukaw sa trono, asin sa Kordero.’” (Kapahayagan 7:​9, 10) Sa pagsabing, “Utang niato an kaligtasan . . . sa Kordero,” ipinaheheling kan dakulang kadaklan na sinda binendisyonan man paagi sa Banhi ni Abraham.

 2. Kasuarin naheling an dakulang kadaklan, asin paano iyan namidbid?

² An dakulang kadaklan na ini namidbid kaidtong 1935, asin ngonyan iyan may kabilangan na labing limang milyon. Tinandaan na maligtas sa dakulang kahorasaan, an mga miembro kaiyan isusuhay para sa buhay na daing katapusan kun ibulag na ni Jesus “an mga karnero” sa “mga kanding.” An mga Kristianong kabilang sa dakulang kadaklan kaiba sa “ibang karnero” sa ilustrasyon ni Jesus kan mga toril nin karnero. Sinda naglalaom na mabuhay sagkod lamang sa sarong paraisong daga.​—Mateo 25:​31-​46; Juan 10:​16; Kapahayagan 21:​3, 4.

 3. Paano nagkakalaen an linahidan na mga Kristiano asin an ibang karnero kun manongod sa bagong tipan?

³ Para sa 144,000, an bendisyon kan tipan ki Abraham itinatao paagi sa bagong tipan. Bilang mga partisipante sa tipan na ini, sinda nagigin “sakop nin dai na kutana maninigong kabootan” asin “sakop kan ley ki Cristo.” (Roma 6:​15; 1 Corinto 9:21) Huli kaini, solamente an 144,000 na miembro kan Israel nin Dios an tamang nakikikabtang sa mga emblema durante kan Memorial kan kagadanan ni Jesus, asin sa sainda sana nakipagtipan si Jesus para sa sarong Kahadean. (Lucas 22:​19, 20, 29) An mga miembro kan dakulang kadaklan bakong partisipante sa bagong tipan. Minsan siring, sinda nakikiasosyar sa Israel nin Dios asin namumuhay kaiba ninda sa saindang “daga.” (Isaias 66:8) Kaya makatanosan sanang sabihon na sinda nagigin man sakop kan dai na kutana maninigong kabootan ni Jehova asin sakop kan ley ki Cristo. Minsan ngani bakong mga partisipante sa bagong tipan, sinda nakikinabang dian.

“An mga Tagaibang Daga” Asin an “Israel nin Dios”

4, 5. (a) Oyon ki Isaias, anong grupo an maglilingkod ki Jehova? (b) Paano naotob an Isaias 56:​6, 7 sa dakulang kadaklan?

⁴ An propetang si Isaias nagsurat: “An mga tagaibang daga na nagdorolok ki Jehova tanganing maglingkod sa saiya asin kamotan an ngaran ni Jehova, tanganing magin mga lingkod nia, an gabos na nag-ootob kan sabbath tanganing dai iyan malanghadan asin nangangapot sa sakong tipan, dadarahon ko man sinda sa sakong banal na bukid asin pagagayagayahon ko sinda sa laog kan sakong harong nin pamibi. An saindang bilog na mga dolot na tinotong asin an saindang mga atang aakoon sa sakong altar.” (Isaias 56:​6, 7) Sa Israel, ini nangahulogan na “an mga tagaibang daga,” mga bakong Israelita, magsasamba ki Jehova​—na namomotan an saiyang ngaran, kinukuyog an mga kondisyon kan tipan nin Ley, inootob an Sabbath, asin nagdodolot nin mga atang sa templo, an “harong nin pamibi” nin Dios.​—Mateo 21:13.

⁵ Sa satong kaaldawan, “an mga tagaibang daga na nagdorolok ki Jehova” iyo an dakulang kadaklan. An mga ini naglilingkod ki Jehova kaiba an Israel nin Dios. (Zacarias 8:23) Idinodolot ninda an iyo man sanang inaakong mga atang kapareho kan Israel nin Dios. (Hebreo 13:​15, 16) Sinda nagsasamba sa espirituwal na templo nin Dios, an saiyang “harong nin pamibi.” (Ikomparar an Kapahayagan 7:15.) Inootob daw ninda an semanal na Sabbath? Dai pinagbotan an linahidan ni an ibang karnero na gibohon ini. (Colosas 2:​16, 17) Minsan siring, si Pablo nagsabi sa linahidan na Hebreong mga Kristiano: “Igwa pang natatada na pahingalo nin sabbath para sa banwaan nin Dios. Huli ta an luminaog na sa kapahingaloan nin Dios nagpahingalo na man sa saiyang mga gibo, arog kan ginibo nin Dios.” (Hebreo 4:​9, 10) An mga Hebreong idto luminaog sa “pahingalo nin sabbath” na ini kan magpasakop sinda sa “katanosan nin Dios” asin nagpahingalo sa paghingoang ipangatanosan an saindang sadiri paagi sa mga gibo kan Ley. (Roma 10:​3, 4) An linahidan na mga Kristianong Hentil nagkakamit kan iyo man sanang kapahingaloan paagi sa saindang pagpapasakop sa katanosan ni Jehova. An dakulang kadaklan nakikiayon sa sainda sa kapahingaloan na iyan.

 6. Paano nangangapot an ibang karnero ngonyan sa bagong tipan?

⁶ Dugang pa, an ibang karnero nangangapot sa bagong tipan kun paanong an mga tagaibang daga kan suanoy nangapot sa tipan nin Ley. Sa anong paagi? Bakong paagi sa pagigin mga partisipante dian kundi paagi sa pagpasakop sa mga ley na kalabot dian asin pakikinabang sa mga areglo kaiyan. (Ikomparar an Jeremias 31:​33, 34.) Kapareho kan mga kaiba nindang linahidan, an ibang karnero ‘nasusurat sa saindang puso’ an ley ni Jehova. Namomotan nindang marhay asin kinukuyog an mga togon asin prinsipyo ni Jehova. (Salmo 37:​31; 119:97) Kapareho kan linahidan na mga Kristiano, midbid ninda si Jehova. (Juan 17:3) Kumusta man an pagturi? Mga 1,500 na taon antes na gibohon an bagong tipan, sinadol ni Moises an mga Israelita: “Turion nindo an anit kan saindong puso.” (Deuteronomio 10:16; Jeremias 4:4) Mantang an obligatoryong pagturi sa laman nawara na kadungan kan Ley, kapwa an linahidan asin an ibang karnero kaipuhan na “turion” an saindang puso. (Colosas 2:11) Sa katapustapusi, pinatatawad ni Jehova an sala kan ibang karnero basado sa “dugo kan tipan” na pinabolos ni Jesus. (Mateo 26:28; 1 Juan 1:​9; 2:2) Sinda dai inaampon nin Dios bilang espirituwal na mga aki, siring sa ginibo nia sa 144,000. Alagad ipinahahayag nia na matanos an ibang karnero, sa sentido na si Abraham ipinahayag na matanos bilang katood nin Dios.​—Mateo 25:​46; Roma 4:​2, 3; Santiago 2:23.

 7. Anong oportunidad an nabukasan para sa ibang karnero ngonyan, na ipinahayag na matanos kapareho ni Abraham?

⁷ Para sa 144,000, an pagigin ipinahayag na matanos nagbubukas kan dalan sa pagkaigwa ninda kan paglaom na mamahala kaiba ni Jesus sa langitnon na Kahadean. (Roma 8:​16, 17; Galacia 2:16) Para sa ibang karnero, an pagigin ipinahayag na matanos bilang mga katood nin Dios minatogot sa sainda na akoon an paglaom na buhay na daing katapusan sa sarong paraisong daga​—magsalang paagi sa pakatadang buhay sa Armagedon bilang kabtang kan dakulang kadaklan o paagi sa ‘pagkabuhay liwat kan mga matanos.’ (Gibo 24:15) Kanigoan na pribilehio na magkaigwa kan siring na paglaom asin magin katood kan Soberano kan uniberso, na magin “bisita sa [saiyang] tolda”! (Salmo 15:​1, 2) Iyo, kapwa an linahidan asin an ibang karnero makangangalas na binendisyonan paagi ki Jesus, an Banhi ni Abraham.

Sarong Mas Dakulang Aldaw nin Pagtubos

 8. Ano an ipinanganino kan mga atang sa Aldaw nin Pagtubos sa irarom kan Ley?

⁸ Kan ipinakikipag-olay an bagong tipan, ipinagirumdom ni Pablo sa mga nagbabasa kan surat nia an taonan na Aldaw nin Pagtubos sa irarom kan tipan nin Ley. Sa aldaw na iyan, idinodolot an magkasuhay na mga atang​—an saro para sa makasaserdoteng tribo ni Levi asin an saro pa para sa 12 tribo na bakong makasaserdote. Ini haloy nang ipinaliwanag na nanganganino sa dakulang atang ni Jesus na pakikinabangan kapwa kan 144,000 na may langitnon na paglaom asin kan minilyon na may daganon na paglaom.a Ipinaheling ni Pablo na sa kaotoban an mga pakinabang kan atang ni Jesus itinatao paagi sa mas dakulang Aldaw nin Pagtubos na sakop kan bagong tipan. Bilang Halangkaw na Saserdote kan mas dakulang aldaw na ini, itinao ni Jesus an saiyang sangkap na buhay bilang pantubos na atang tanganing kamtan an “daing katapusan na kaligtasan” para sa mga tawo.​—Hebreo 9:​11-​24.

 9. Mantang kabilang sa bagong tipan, ano an puedeng maogmang akoon kan linahidan na Hebreong mga Kristiano?

⁹ Dakol na Hebreong Kristiano kan enot na siglo an ‘maigot pa man giraray para sa Ley ni Moises.’ (Gibo 21:20) Kun siring, angay nanggad na pinagirumdom sinda ni Pablo: “[Si Jesus] parapangoltanan nin sarong bagong tipan, tangani na, huli ta nangyari an sarong kagadanan para sa saindang pagkabutas paagi sa pagtubos hale sa mga paglapas sa irarom kan enot na tipan, an mga inapod makaako kan panuga nin daing katapusan na pamana.” (Hebreo 9:15) Binutasan kan bagong tipan an Hebreong mga Kristiano sa daan na tipan, na naghayag kan saindang pagigin makasalan. Sa tabang kan bagong tipan, puede nindang maogmang akoon an “panuga nin daing katapusan na [langitnon na] pamana.”

10. Ano an ipinagpapasalamat sa Dios kan mga linahidan asin kan ibang karnero?

¹⁰ An “lambang” “naggigibo nin pagtubod sa Aki” makikinabang sa pantubos na atang. (Juan 3:​16, 36) Si Pablo nagsabi: “An Cristo idinolot nin makasaro sa gabos na panahon tanganing magpasan kan mga kasalan nin dakol; asin sa ikaduwa niang pagdatong iyan magigin siblag sa kasalan asin sa mga maigot na naghahanap sa saiya para sa saindang kaligtasan.” (Hebreo 9:28) Ngonyan, kaiba sa mga maigot na naghahanap ki Jesus an buhay pang linahidan na mga Kristiano kan Israel nin Dios asin an minilyon na minakompuesto kan dakulang kadaklan, na igwa man nin daing katapusan na mana. An duwang grupo nagpapasalamat sa Dios para sa bagong tipan asin para sa nagtataong buhay na mga bendisyon na konektado dian, kabale an mas dakulang Aldaw nin Pagtubos asin an ministeryo kan Halangkaw na Saserdote, si Jesus, sa Kabanalbanale sa langit.

Sibot sa Sagradong Paglilingkod

11. Mantang nalinigan na an konsensia paagi sa atang ni Jesus, ano an maogmang ginigibo kapwa kan mga linahidan asin kan ibang karnero?

¹¹ Sa saiyang surat sa mga Hebreo, idinoon ni Pablo an nakalalabing halaga kan atang ni Jesus sa areglo kan bagong tipan kun ikokomparar sa mga dolot manongod sa kasalan sa irarom kan daan na tipan. (Hebreo 9:​13-15) An orog karahay na atang ni Jesus kayang “makalinig kan satong mga konsensia hale sa gadan na mga gibo tangani kitang makatao nin sagradong paglingkod sa nabubuhay na Dios.” Para sa Hebreong mga Kristiano, kabale sa “gadan na mga gibo” an “mga paglapas sa irarom kan enot na tipan.” Para sa mga Kristiano ngonyan, kabale dian an mga kasalan na nakomitir kan nakaagi na tunay na pinagsolsolan na asin ipinatawad na nin Dios. (1 Corinto 6:​9-​11) Huling nalinigan na an konsensia, an linahidan na mga Kristiano nagtatao nin “sagradong paglilingkod sa nabubuhay na Dios.” Asin siring man kaiyan an ginigibo kan dakulang kadaklan. Huling nalinigan na an saindang konsensia paagi sa “dugo kan Kordero,” sinda nasa dakulang espirituwal na templo nin Dios, na “nagtatao sa saiya nin sagradong paglilingkod aldaw asin banggi.”​—Kapahayagan 7:​14, 15.

12. Paano niato ipinaheheling na kita igwa nin “lubos na kasiertohan nin pagtubod”?

¹² Dugang pa, si Pablo nagsabi: “Dumolok kita na igwa nin tunay na mga puso sa lubos na kasiertohan nin pagtubod, huling an satong mga puso nawirikan gikan sa maraot na konsensia asin an satong mga hawak naparigosan nin malinig na tubig.” (Hebreo 10:​22) Paano niato ikapaheheling na yaon sa sato an “lubos na kasiertohan nin pagtubod”? Sinadol ni Pablo an Hebreong mga Kristiano: “Mangapot kita nin pusog sa hayag na pagtuga kan satong [langitnon na] paglaom na daing pagduwaduwa, huli ta sia na nanuga fiel. Asin konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:​23-25) Kun an satong pagtubod buhay, dai man niato ‘pababayaan an satong pagtorotiripon.’ Maoogma kitang dagkahon an satong mga tugang asin dagkahon man ninda sa pagkamoot asin sa marahay na mga gibo asin maparigon para sa mahalagang marhay na gibohon na pagpahayag sa publiko kan satong paglaom, sa daga man o sa langit.​—Juan 13:35.

An “Tipan na Daing Katapusan”

13, 14. Sa anong mga paagi na an bagong tipan daing katapusan?

¹³ Ano an mangyayari kun makamtan na kan ultimong kabtang kan 144,000 an saindang langitnon na paglaom? Dai na daw aplikado an bagong tipan? Sa panahon na iyan, mayo nang matatadang miembro kan Israel nin Dios sa daga. An gabos na partisipante sa tipan makakaibahan na ni Jesus “sa kahadean kan [saiyang] Ama.” (Mateo 26:29) Alagad nagigirumdoman niato an mga tataramon ni Pablo sa saiyang surat sa Hebreo: ‘An Dios nin katoninongan nagbuhay liwat hale sa mga gadan kan dakulang pastor kan aripompon na may dugo nin sarong tipan na daing katapusan.’ (Hebreo 13:20; Isaias 55:3) Sa anong sentido na an bagong tipan daing katapusan?

¹⁴ Primero, bakong arog kan tipan nin Ley, iyan dai noarin man sasalidahan. Ikaduwa, an mga resulta kan pagpunsionar kaiyan permanente, siring kan paghade ni Jesus. (Ikomparar an Lucas 1:33 sa 1 Corinto 15:​27, 28.) An langitnon na Kahadean igwa nin daing sagkod na kabtang sa mga katuyohan ni Jehova. (Kapahayagan 22:5) Asin ikatolo, an ibang karnero padagos na makikinabang sa areglo kan bagong tipan. Durante kan Sangribong Taon na Paghade ni Cristo, an fiel na mga tawo padagos na ‘magtatao ki Jehova nin sagradong paglilingkod aldaw asin banggi sa saiyang templo’ siring sa ginigibo ninda ngonyan. Dai na gigirumdomon ni Jehova an saindang nakalihis nang mga kasalan na ipinatawad na basado sa “dugo kan tipan” ni Jesus. Sinda padagos na magkakamit nin matanos na kamugtakan bilang mga katood ni Jehova, asin an saiyang ley masusurat pa man giraray sa saindang puso.

15. Iladawan an relasyon ni Jehova sa saiyang mga parasamba digdi sa daga sa bagong kinaban.

¹⁵ Puede daw na sabihon ni Jehova sa panahon na iyan dapit sa mga lingkod na tawong ini: ‘Ako an saindang Dios, asin sinda an sakong banwaan’? Iyo. “Sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda.” (Kapahayagan 21:3) Sinda magigin “an kampo kan mga banal,” an mga representante sa daga kan “mahal na siudad,” an langitnon na nobya ni Jesu-Cristo. (Kapahayagan 14:1; 20:9; 21:2) An gabos na ini magigin posible huli sa saindang pagtubod sa “dugo kan tipan” na pinabolos ni Jesus asin sa saindang pagpapasakop sa langitnon na mga hade asin saserdote, na kan nasa daga pa iyo an Israel nin Dios.​—Kapahayagan 5:10.

16. (a) Anong mga oportunidad an naghahalat sa mga bubuhayon liwat sa daga? (b) Anong mga bendisyon an maabot sa katapusan kan sangribong taon?

¹⁶ Kumusta man an mga gadan na bubuhayon liwat digdi sa daga? (Juan 5:​28, 29) Sinda man aagdahon na ‘magbendisyon kan saindang sadiri’ paagi ki Jesus, an Banhi ni Abraham. (Genesis 22:18) Kaipuhan man nindang kamotan an ngaran ni Jehova, na naglilingkod sa saiya, nagdodolot nin mga atang na inaako, asin nagtatao nin sagradong paglilingkod sa saiyang harong nin pamibi. An mga naggigibo kaiyan malaog sa kapahingaloan nin Dios. (Isaias 56:​6, 7) Sa katapusan kan sangribong taon, an gabos na fiel ikinabalik na sa pagkasangkap bilang tawo paagi sa paglilingkod ni Jesu-Cristo asin kan saiyang 144,000 na kapwa saserdote. Sinda magigin matanos, bako sanang ipapahayag na matanos bilang mga katood nin Dios. Sinda ‘mabubuhay,’ na biyong talingkas sa kasalan asin kagadanan na minana ki Adan. (Kapahayagan 20:5; 22:2) Kanigoan na bendisyon iyan! Sa satong pagmansay ngonyan, garo baga tapos na sa panahon na iyan an makasaserdoteng gibohon ni Jesus asin kan 144,000. An mga bendisyon kan mas dakulang Aldaw nin Pagtubos ikinaaplikar na nin lubos. Dugang pa, ‘itatao [ni Jesus] an kahadean sa saiyang Dios asin Ama.’ (1 Corinto 15:24) Magkakaigwa nin pangultimong pagbalo sa katawohan, dangan si Satanas asin an saiyang mga demonyo lalaglagon sagkod lamang.​—Kapahayagan 20:​7, 10.

17. Huli sa kagayagayahan na naghahalat sa sato, ano an maninigo na determinadong gibohon kan lambang saro sa sato?

¹⁷  Ano an magigin papel, kun igwa man, kan “tipan na daing katapusan” sa nakaoogmang peryodo na mapoon sa panahon na iyan? Dai niato iyan masasabi. An ihinayag ni Jehova sagkod sa presente igo na sa ngonyan. Namumungnan kita huli kaiyan. Isip-isipa na sana​—buhay na daing katapusan bilang kabtang kan “bagong kalangitan asin sarong bagong daga”! (2 Pedro 3:13) Mayo man logod nin magpaluya sa satong pagmawot na manahon an panugang iyan. An paninindogan nin marigon tibaad bakong pasil. Si Pablo nagsabi: “Kaipuhan nindo an pakatagal, tanganing, pakatapos na magibo nindo an kabotan nin Dios, maako man nindo an kaotoban kan panuga.” (Hebreo 10:36) Pero girumdomon na an ano man na problema na dapat daogon, ano man na pagtumang na dapat pangganahan, nagigin daing halaga kun ikokomparar sa kagayagayahan na naghahalat sa sato. (2 Corinto 4:17) Huli kaini, mayo logod sa sato na magin “an klase na minasibog sa kalaglagan.” Imbes, patunayan logod niato na kita “an klase na may pagtubod sa ikapagdadanay na buhay kan kalag.” (Hebreo 10:39) Kita gabos logod magtiwala nin lubos ki Jehova, an Dios nin mga tipan, para sa daing sagkod na bendisyon kan lambang saro sa sato.

[Nota sa ibaba]

Nasabotan daw Nindo?

◻ Apuera sa linahidan na mga Kristiano, sairisay pa an binebendisyonan paagi sa Banhi ni Abraham?

◻ Sa pagigin binendisyonan paagi sa bagong tipan, paano nakakaagid an ibang karnero sa mga proselito na sakop kan daan na tipan?

◻ Paano binendisyonan an ibang karnero paagi sa areglo kan mas dakulang Aldaw nin Pagtubos?

◻ Taano ta inapod ni Pablo an bagong tipan na “tipan na daing katapusan”?

[Kahon sa pahina 21]

An Sagradong Paglilingkod sa Templo

An dakulang kadaklan nagsasamba kaiba an linahidan na mga Kristiano sa daganon na patyo kan dakulang espirituwal na templo ni Jehova. (Kapahayagan 7:​14, 15; 11:2) Mayo nin dahelan na magkonklusyon na sinda nasa sarong suhay na Patyo kan mga Hentil. Kan si Jesus yaon pa digdi sa daga, igwa nin Patyo kan mga Hentil sa templo. Minsan siring, sa ipinasabong nin Dios na mga plano kan templo ni Salomon asin ni Ezequiel, mayo nin probisyon para sa Patyo kan mga Hentil. Sa templo ni Salomon, igwa nin mas nasa luwas na patyo na dian an mga Israelita asin proselito, lalaki asin babae, iribang nagsasamba. Ini an makahulang arogan kan daganon na patyo kan espirituwal na templo, na dian naheling ni Juan an dakulang kadaklan na nagtatao nin sagradong paglilingkod. Minsan siring, mga saserdote asin Levita sana an puedeng lumaog sa mas nasa laog na patyo, na namumugtakan kan dakulang altar; mga saserdote sana an puedeng maglaog sa Banal; asin an halangkaw na saserdote sana an puedeng maglaog sa Kabanalbanale. Nasasabotan na an mas nasa laog na patyo asin an Banal nanganganino kan napapalaen na espirituwal na kamugtakan kan linahidan na mga Kristiano digdi sa daga. Asin an Kabanalbanale naglaladawan sa mismong langit, na duman an linahidan na mga Kristiano nag-aako nin inmortal na buhay kaiba kan saindang langitnon na Halangkaw na Saserdote.—Hebreo 10:19, 20.

[Retrato sa pahina 23]

Huli sa kagayagayahan na naghahalat sa sato, magpadagos kitang “may pagtubod sa ikapagdadanay na buhay kan kalag”