Kun Ano an Puedeng Itokdo sa Sato kan Halimbawa ni Maria

Nabigla na daw kamong gayo huli sa sarong dai inaasahan na kadepisilan o responsabilidad? Napapagal na daw kamo sa aroaldaw na sakit nin pagpatamatama kan entrada nindo? Tibaad kabilang kamo sa minilyon na nariribaraw asin natatakot huli ta kinaipuhan nindang bayaan an saindang dagang tinuboan asin dumulag pasiring sa ibang lugar. Asin siisay sa sato an dai nakaeksperyensia nin grabeng kolog asin kapungawan pagkatapos na magadanan nin sarong namomotan?

ARAM daw nindo na napaatubang si Maria, na ina ni Jesus, sa gabos na kadepisilan na iyan? Dugang pa, napangganahan nia iyan! Ano an manonodan niato sa saiyang halimbawa?

Si Maria midbid nanggad sa bilog na kinaban. Asin bakong makangangalas, huling nagkaigwa sia nin daing kaagid na papel sa pagkaotob kan mga katuyohan nin Dios. Dugang pa, sinasamba si Maria nin minilyon na tawo. Iginagalang siang marhay kan Iglesia Katolika bilang namomotan na Ina asin arogan sa pagtubod, paglaom, saka pagkamoot sa kapwa. Dakol an tinokdoan na si Maria an naggigiya sa mga tawo pasiring sa Dios.

Paano nindo minamansay an ina ni Jesus? Asin mas mahalaga, paano sia minamansay nin Dios?

Sarong Daing Kaagid na Asignasyon

Kabilang si Maria, na aki ni Heli, sa Israelitang tribo nin Juda. An enot na pagkasambit sa saiya sa Biblia konektado sa sarong pambihirang pangyayari. Sarong anghel an nagdalaw sa saiya asin nagsabi: “Marahay na aldaw, ika na pano nin pabor, si Jehova nasa saimo.” Kan primero, si Maria napurisaw asin “nag-isip-isip kun ano daw an pataratarang ini.” Kaya sinabihan sia kan anghel na napili sia para sa makangangalas alagad labi-labi kaseryoso man na asignasyon na ipangidam, ipangaki, asin padakulaon an Aki nin Dios.​—Lucas 1:26-33.

Kanigoan na responsabilidad an ipinagkatiwala sa hoben na daragang ini! Ano an reaksion nia? Tibaad inisip-isip na marhay ni Maria kun siisay an maniniwala sa estorya nia. Mawawara daw an pagkamoot ni Jose, na saiyang katratong pakasalan, huli sa pagbados na iyan o magigin dahelan daw iyan na mapasupog sia sa publiko? (Deuteronomio 22:20-24) Dai sia nag-alangan na akoon an importanteng asignasyon na ini.

An makosog na pagtubod ni Maria nakatabang sa saiya na magpasakop sa kabotan kan saiyang Dios, si Jehova. Kombensido sia na aatamanon sia ni Jehova. Sa siring, sia nagkagsing: “Uya! An oripon na babae ni Jehova! Mangyari logod sa sakuya an siring sa saimong tataramon.” Andam si Maria na atubangon an mga kadepisilan na mangyayari huli ta pinapahalagahan nia an espirituwal na pribilehiong itinao sa saiya.​—Lucas 1:38.

Kan sabihon ni Maria ki Jose na bados sia, plinano ni Jose na dai na idagos an pagkatrato nindang pakasal. Seguradong labi-labi kamondong panahon idto para sa saindang duwa. Dai sinasabi kan Biblia kun gurano kalawig an masakit na panahon na ini. Minsan siring, seguradong naginhawahan nin labi-labi si Maria sagkod si Jose kan an anghel ni Jehova magpaheling ki Jose. An mensaherong iyan nin Dios an nagpaliwanag kan pambihirang pagbados ni Maria asin sinabihan kaiyan si Jose na ipuli si Maria bilang saiyang agom.​—Mateo 1:19-24.

Masakit na mga Panahon

Ngonyan, dakol na bados an nag-aandam sa laog nin dakol na bulan para sa pagkamundag nin omboy, asin puedeng arog man kaiyan an ginibo ni Maria. Ini an magigin enot niang aki. Pero, may dai linalaoman na mga pangyayaring nagpakomplikado sa saiyang mga plano. Si Cesar Augusto nagmanda na magkaigwa nin sensus, na nag-oobligar sa gabos na magparehistro sa saindang pinaghalean na banwaan. Kaya iiniba ni Jose si Maria, na ngonyan nasa ikasiyam na bulan na kan pagbados nia, sa pagbiahe nin mga 150 kilometros, na posibleng marhay na sakay sa asno! Matawo sa Betlehem asin kaipuhan ni Maria nin sarong lugar na pribado tanganing duman mangaki, alagad an puede sana iyo an sarong kuadra. Seguradong depisil para ki Maria na mangaki sa sarong kuadra. Posibleng marhay na sia nasupog sagkod natakot.

Sa masakit na mga panahon na ini kan saiyang buhay, siertong biyong ipinahayag ni Maria ki Jehova an nasa saiyang puso, na nagtitiwala na sia asin an saiyang aki aatamanon Nia. Paghaloyhaloy, nagkapirang pastor an uminabot, na gustong-gusto na maheling an omboy. Sinabi ninda na inapod kan mga anghel an aking ini na “sarong Paraligtas, na iyo si Cristo na Kagurangnan.” Dangan mababasa niato: “Rinimpos ni Maria an gabos na isinabing ini, na naghohorophorop sa saiyang puso.” Hinorophorop nia an mga tataramon na ini asin napakosog sia kaini.​—Lucas 2:11, 16-19.

Kumusta man kita? Posibleng marhay na may aagihan man kitang kolog sa satong buhay. Apuera kaini, ipinapaheling kan Biblia na “an panahon asin pagkanorongod” puedeng mangyari sa kiisay man sa sato, kaya nag-aagi kita nin gabos na klase nin kasakitan asin kadepisilan. (Eclesiastes 9:11) Kun nangyayari iyan, nagraraot daw an satong boot asin binabasol an Dios? Bako daw na mas marahay na arogon an saboot ni Maria asin orog na rumani ki Jehova Dios paagi sa pag-adal sa saiyang Tataramon, an Biblia, dangan paghorophorop sa satong mga nanodan? An paggibo kaiyan siertong makakatabang sa sato na tagalan an mga pagbalo.

Dukha Asin Dulag

Napaatubang man si Maria sa iba pang mga kasakitan​—kaiba na an kadukhaan asin an bagay na sia napiritan na maghale sa saiyang dagang tinuboan. Napaatubang na daw kamo sa siring na mga kadepisilan? Segun sa sarong report, “kabanga kan kinaban​—mga tolong bilyon katawo—​an nabubuhay sa mayo pang duwang dolyar kada aldaw,” asin minilyon pa an nasasakitan na mapagtamatama an entrada ninda dawa ngani nag-iistar sinda sa mayaman daang mga nasyon. Kumusta man kamo? Napapagal na daw kamo, o kun beses nagagabatan pa ngani, huli sa aroaldaw na nakakapungot na rutina na pagsustento sa saindong pamilya nin kakanon, gubing, asin istaran?

Ipinaparisa kan Biblia na medyo dukha si Jose asin Maria. Taano man? Kabilang sa pira sanang detalye na ihinayag kan mga Ebanghelyo​—Mateo, Marcos, Lucas, asin Juan—​manongod sa mag-agom na ini iyo na 40 aldaw pagkapangaki ni Maria, sia asin si Jose nagduman sa templo tanganing itao an hinahagad na dolot​—“sarong padis na agbaan o duwang pitson.”a (Lucas 2:22-24) An atang na ini itinotogot sana para sa mga dukhang gayo na dai makapagdolot nin lalaking kordero. Sa siring, posibleng marhay na masakit para ki Jose asin Maria an pagpatamatama kan entrada ninda. Dawa arog kaiyan, nagin mapanggana sinda sa pagkaigwa nin mamomoton na relasyon sa pamilya. Daing duwa-duwa na an espirituwal na mga bagay an prioridad ninda.​—Deuteronomio 6:6, 7.

Dai nahaloy pagkamundag ki Jesus, biyong nabago giraray an buhay ni Maria. Sarong anghel an nagsabi ki Jose na darahon an saiyang pamilya asin magdulag pasiring sa Egipto. (Mateo 2:13-15) Ini an ikaduwang beses na kinaipuhan ni Maria na bayaan an sarong pamilyar na lugar, alagad sa panahon na ini kaipuhan niang magduman sa ibang nasyon. Igwa nin dakulang komunidad nin mga Judio sa Egipto, kaya posibleng nakapamuhay si Maria asin Jose sa kaibanan kan sainda mismong mga kahimanwa. Minsan siring, an pag-istar sa ibang nasyon puedeng magin depisil asin nakakaribaraw. Kabilang daw kamo asin an saindong pamilya sa minilyon na binayaan an saindang dagang tinuboan, tibaad para sa kapakanan kan mga aki ninda o tanganing dumulag sa peligro? Kun iyo, masasabotan nindong marhay an nagkapira sa mga kasakitan na tibaad napaatubang ki Maria sa Egipto.

Sarong Debotong Agom Asin Ina

Apuera sa mga salaysay manongod sa pagkamundag asin pagkaomboy ni Jesus, kadikit sana an pagkasambit ki Maria sa Ebanghelyo. Pero, aram niato na si Maria asin Jose nagkaigwa nin kisiera anom pang aki. Tibaad ikabigla nindo ini. Minsan siring, isip-isipa kun ano an sinasabi kan mga Ebanghelyo.

Dakula an paggalang ni Jose sa pribilehio ni Maria na ipangaki an Aki nin Dios. Huli kaini, dai sia nakidorog ki Maria bago mamundag si Jesus. Sinasabi kan Mateo 1:25 na si Jose “dai nakidorog sa saiya sagkod na sia mangaki nin sarong lalaki.” An tataramon na “sagkod” sa bersikulong ini nagpaparisa na pagkatapos na mamundag si Jesus, nagin normal na an seksuwal na relasyon ni Maria asin Jose bilang mag-agom. Sinasabi kan pagkasaysay sa ebanghelyo na, bilang resulta, si Maria nagkaigwa nin mga aki ki Jose, mga lalaki sagkod babae. Si Santiago, Jose, Simon, asin Judas mga tugang ni Jesus sa ina. Nagkaigwa si Maria nin kisiera duwang aking babae. (Mateo 13:55, 56) Minsan siring, an mga aking ini ipinangidam sa normal na paagi.b

Espirituwal an kaisipan ni Maria. Minsan ngani dai hinahagad kan Ley na mag-atender an mga babae sa pagselebrar nin Paskua, kinatodan na ni Maria na umiba ki Jose sa taonan na pagpasiring sa Jerusalem para sa kapiestahan. (Lucas 2:41) Iyan aaboton nin mga 300 kilometros ida y bueltang pagbaklay kada taon​—kaiba an sarong nagdadakulang pamilya! Alagad, daing duwa-duwa na an mga pagbaklay na ini nakakaogmang mga okasyon sa pamilya.

Inaarog nin dakol na babae ngonyan an marahay na halimbawa ni Maria. Maigot asin daing kaimotan nindang inootob an saindang sono sa Kasuratan na mga obligasyon. An debotong mga babaeng ini parate nanggad na nagpapaheling nin dakulang pasensia, pakatagal, asin kapakumbabaan! An paghorophorop sa saboot ni Maria nakakatabang sa sainda na padagos na enoton an espirituwal na mga bagay kisa sa saindang sadiring mawot na kaginhawahan asin kaogmahan. Aram ninda, arog kan seguradong aram ni Maria, na mapapakosog asin magkakasararo an pamilya kun sinda nagsasamba sa Dios kaiba kan saindang agom asin mga aki.

Sarong beses, kan papuli na si Maria asin Jose hale sa sarong kapiestahan sa Jerusalem​—na posibleng marhay na may pira nang aki—​narisa ninda na dai ninda kaiba an 12 anyos na si Jesus. Maiimahinar daw nindo an kapurisawan ni Maria durante kan tolong aldaw na nakakatarantang paghanap sa aki nia? Kan sa katapustapusi manompongan nia asin ni Jose si Jesus sa templo, ini nagsabi: “Dai kamo nakakaaram na ako dapat na nasa harong kan sakong Ama?” Sa giraray, an salaysay nagsasabi, “an gabos na isinabing ini maingat na rinimpos [ni Maria] sa saiyang puso.” Ini an saro pang nagpaparisa kan hararom na espirituwalidad ni Maria. Maingat niang hinorophorop an gabos na nangyari mapadapit ki Jesus. Pakalihis nin mga taon, posibleng marhay na isinaysay nia sa mga kagsurat kan Ebanghelyo an malinaw na mga nagigirumdoman nia mapadapit digdi asin sa iba pang pangyayari sa enot na mga taon kan buhay ni Jesus.​—Lucas 2:41-52.

Pagtagal sa Ibong nin Pagsakit Asin Kagadanan

Ano an nangyari ki Jose, an kag-ampon na ama ni Jesus? Pagkatapos na si Jose masambitan nin halipot sa pagkasaysay sa sarong pangyayaring iyan kan si Jesus hoben pa, dai na sia nasambitan sa rekord kan Ebanghelyo. Sinasabot nin nagkapira na an dai pagkasambit na ini ki Jose nagpaparisa na sia nagadan kaidtong bago nagpoon an ministeryo ni Jesus.c Ano man an nangyari, garo nanggad balo na si Maria sa katapusan kan ministeryo ni Jesus. Kan magagadan na si Jesus, ipinagkatiwala nia an saiyang ina ki apostol Juan. (Juan 19:26, 27) Posibleng marhay na dai iyan gigibohon ni Jesus kun si Jose buhay pa.

Dakol na bagay an magkaibanan na inagihan ni Maria asin Jose! Sinda dinalaw kan mga anghel, nagdulag sa sarong maisog na namamahala, nagbalyo nin istaran nin nagkapirang beses, asin nag-ataman nin dakulang pamilya. Pirang banggi daw sindang seguradong nagtukaw na magkaibanan asin nag-olay manongod ki Jesus, na iniisip-isip kun ano an mapapaatubang sa saiya sa ngapit, na naghahadit kun baga sinasanay asin inaandam ninda sia sa tamang paagi? Dangan bigla na sana, nagsosolo na si Maria.

Nagadan na daw an saindong agom? Namamatean pa daw nindo an kolog asin kapungawan na bunga kan pagkagadan nia, dawa nakalihis na an dakol na taon? Daing duda na naranga si Maria kan saiyang pagtubod asin kan pakaaram na magkakaigwa nin pagkabuhay liwat.d (Juan 5:28, 29) Minsan siring, dawa ngani nakakarangang isipon iyan, dai kaiyan natapos an mga problema ni Maria. Arog nin kadakol na nagsosolong ina ngonyan, inatubang nia an masakit na gibohon na pag-ataman sa saiyang mga aki na mayo nin tabang nin agom.

Tama sanang isipon na si Jesus na an pangenot na nagbuhay sa pamilya kan magadan si Jose. Mantang nagdadakula an mga tugang ni Jesus, makakaya na nindang akoon an saindang kabtang sa mga responsabilidad sa pamilya. Kan si Jesus “mga treinta anyos na,” naghale na sia sa harong asin pinonan an saiyang ministeryo. (Lucas 3:23) Ipinag-oorgolyo alagad ikinakamondo man nin kadaklan na magurang kun minahale na sa harong an sarong dakula nang aki. Dakolon na panahon, paghihingoa, asin emosyon an itinatao sa mga aki kaya tibaad garo baga haloy na mawara an grabeng kapungawan paghale ninda. Naghale na daw an siisay man sa mga aki nindo tanganing aboton an saindang mga pasohan? Ipinag-oorgolyo daw nindo sinda, alagad kadungan kaiyan, kun minsan, minamawot daw nindo na kutana mas harani sinda? Kun siring, maiimahinar nindo an tibaad namatean ni Maria kan si Jesus maghale na sa harong.

Dai Inaasahan na mga Pagbalo

An saro pa sa mga pagbalo ki Maria posibleng dai nia noarin man inasahan. Mantang naghuhulit si Jesus, dakol an nagsunod sa saiya​—alagad an saiya mismong mga tugang dai. “Sa katunayan, an saiyang mga tugang dai nagtutubod sa saiya,” an sabi kan Kasuratan. (Juan 7:5) Daing duwa-duwa, sinabi sa sainda ni Maria an sinabi sa saiya kan anghel​—na si Jesus “Aki nin Dios.” (Lucas 1:35) Pero, para ki Santiago, Jose, Simon, asin Judas, matuang tugang sana ninda si Jesus. Kaya si Maria nasa sarong pamilya na magkakalaen an punto de vista sa relihion.

Nanluya daw an boot ni Maria asin nawaran na sia nin paglaom? Dai nanggad! Sa sarong pangyayari, kan si Jesus naghuhulit sa Galilea, nagduman sia sa sarong harong tanganing magkakan, asin dakol na tawo an nagtiripon tanganing maghinanyog sa saiya. Siisay an nasa luwas na naghahanap sa saiya? Si Maria asin an mga tugang ni Jesus. Kaya kun si Jesus harani sa saindang harong, sinusundan sia ni Maria asin minalataw na dinadara nia an saiyang ibang mga aki, na tibaad naglalaom sia na mababago an saindang saboot dapit ki Jesus.​—Mateo 12:46, 47.

Tibaad napapaatubang man kamo sa kadepisilan nin paghihingoang sundon si Jesus mantang an ibang miembro kan saindong pamilya habo. Dai manluya an boot, asin dai mawaran nin paglaom! Arog ni Maria, dakol an mapasensiang dinagka an mga kapamilya sa laog nin dakol na taon bago may naheling na totoong pagbabago. An siring na pakatagal mahalagang marhay sa Dios, maghimate man o dai an ibang tawo.​—1 Pedro 3:1, 2.

An Pinakamasakit na Pagbalo

An huring pagbalo ki Maria, na nakarekord sa Kasuratan, daing duda na iyo an pinakamakolog sa puso. Naheling nia na nagadan sa labi-labing sakit an namomotan niang aki pagkatapos na isikwal ini kan saiyang mga kahimanwa. An pagkagadan nin sarong aki ilinadawan bilang “an pinakamakolog sa boot na kagadanan,” “an pinakanakakapanluya sa boot na kagadanan,” baga man an aki sadit pa o adulto na. Arog kan ihinula mga dekada na an nakaagi, an pagmate ni Maria garo baga sarong espada an pinalagbas sa saiya!​—Lucas 2:34, 35.

Tinogotan daw ni Maria an pangultimong pagbalo na ini na makaraot sa saiyang emosyon o makapaluya sa saiyang pagtubod ki Jehova? Dai. Sa suminunod na pagkasambit ki Maria sa rekord kan Biblia, maheheling niato na kaibanan nia an mga disipulo ni Jesus asin sinda “nagpapadagos sa pamimibi.” Asin dai sia nagsosolo. Kaibanan nia an iba pa niang aki, na kan panahon na ini nagtutubod na sa saindang matuang tugang. Siertong nakaranga nanggad iyan ki Maria!e​—Gibo 1:14.

Lubos asin nakakakontento an buhay ni Maria bilang maimbod na babae, agom, asin ina. Dakol siang eksperyensia na kapakipakinabang sa espirituwal. Napangganahan nia an dakol na pagbalo asin kasakitan. Kun kita napapaatubang sa dai inaasahan na mga kadepisilan o kun kita naghahadit na gayo manongod sa mga problema sa pamilya, makakanood nanggad kita sa saiyang halimbawa nin maimbod na pakatagal.​—Hebreo 10:36.

Pero, ano an masasabi manongod sa pagtao ki Maria nin espesyal na relihiosong debosyon? An salaysay daw kan Biblia dapit sa pambihirang papel ni Maria nagtatao nin dahelan na sambahon sia?

[Mga Nota sa Ibaba]

[Kahon/​Ritrato sa pahina 6]

Igwa daw nin mga Tugang si Jesus?

Igwa. Prinobaran nin nagkapirang teologo na diskutiron an katotoohan na iyan, minsan ngani nagkapirang beses na malinaw na ihinahayag kan mga Ebanghelyo an bagay na iyan. (Mateo 12:46, 47; 13:54-56; Marcos 6:3) Minsan siring, may duwang bagay na sinabi an mga iskolar sa Biblia manongod sa mga teoriya na mayo nin ibang aki si Maria. Enot, may motibo sa likod nin siring na mga teoriya​—tanganing suportaran an sarong doktrina na naglataw pakalihis nin harohalawig na panahon, an katokdoan kan iglesia na nagdanay na birhen si Maria sa bilog niang buhay. Ikaduwa, kun an mga teoriya mismo sisiyasaton na marhay, iyan dai nakakakombensir.

Halimbawa, isinusuherir nin saro sa siring na mga teoriya na an inaapod na “mga tugang” ni Jesus mga aki ni Jose sa naenot niang agom. Bakong totoo an ideyang ini, huli ta sa katunayan dai kaiyan itatao ki Jesus an legal na deretso bilang panganay na magmana kan pagkahade ni David.​—2 Samuel 7:12, 13.

An saro pang teoriya iyo na an mga tugang na ini ni Jesus pinsan nia talaga, dawa ngani naggagamit an Griegong Kasuratan nin magkakalaen na termino para sa “tugang,” “pinsan,” asin “paryente.” Huli kaini, inaapod kan iskolar na si Frank E. Gaebelein na harayong mangyari an mga teoriyang ini nin teolohiya. Sia nagkongklusyon: “An pinakanatural na pagsabot sa ‘mga tugang’ . . . iyo na an terminong iyan nanonongod sa mga aki ni Maria saka ni Jose asin sa siring nanonongod sa mga tugang ni Jesus sa ina.”

[Kahon sa pahina 7]

Nagkaigwa Sia nin Kosog nin Boot na Magbago

Namundag si Maria sa sarong pamilyang Judio, asin sinunod nia an Judiong relihion. Nag-aatender sia sa lokal na sinagoga, na apod sa lugar nin pagsamba kan mga Judio, asin nagduduman sia sa templo sa Jerusalem. Minsan siring, mantang nag-ooswag an kaaraman ni Maria dapit sa mga katuyohan nin Dios, nasabotan nia na an mga tradisyon kan saiyang mga apoon dai na inooyonan nin Dios. An Judiong mga lider nin relihion an nagpagadan sa saiyang Aki, an Mesiyas. Bago nangyari iyan, ipinaisi sa sainda ni Jesus: “Uya! An saindong harong pinabayaan na sa saindo.” (Mateo 23:38) Hinale nin Dios an saiyang bendisyon sa sistema nin relihion na dinakulaan ni Maria.​—Galacia 2:15, 16.

Kan maestablisar an Kristianong kongregasyon, si Maria tibaad mga 50 anyos na o labi pa. Ano an gigibohon nia? Nangatanosan daw sia na namundag sia sa sistema nin relihion kan mga Judio asin na gusto niang magdanay na maimbod sa mga tradisyon kan saiyang mga apoon? Sinabi daw nia na gurangon na sia tanganing magbago? Siempre dai! Nasabotan ni Maria na an bendisyon nin Dios yaon na ngonyan sa Kristianong kongregasyon, kaya nagkaigwa sia nin pagtubod asin kosog nin boot na magbago.

[Ritrato sa pahina 5]

Pagdulag pasiring sa Egipto

[Ritrato sa pahina 8]

An pinakamakolog na eksperyensia na puedeng agihan nin sarong ina