An Papel ni Maria sa Katuyohan nin Dios

DURANTE kan ministeryo ni Jesus, sarong babae an nagkosog kan saiyang tingog sa maribok na kadaklan asin nagkurahaw: “Maogma an matris na nagdara sa saimo asin an mga suso na sinusohan mo!” Kun gusto ni Jesus na sambahon nin mga tawo an saiyang ina, ini kutana sarong marahayon na oportunidad na irekomendar nia an paagi nin debosyon na iyan. Imbes, sia nagsimbag: “Bako, kundi, Maogma an mga nagdadangog sa tataramon nin Dios asin nag-ootob kaiyan!”​—Lucas 11:27, 28.

Dai tinawan ni Jesus an saiyang ina nin ano man na espesyal na mga onra; ni sinabihan man lamang nia an saiyang mga parasunod na gibohon iyan. Paano ini ikakaoyon sa pagsambang itinatao ki Maria nin dakol na sinserong nagtutubod? Sa liwanag kan sinasabi sa Banal na Kasuratan, estudyaran niato an nagkapira sa lakop na mga katokdoan manongod sa ina ni Jesus.

“Pano Ka nin Grasya,” “Biniyayaan . . . sa mga Babae”

Ipinaisi ki Maria kan anghel na si Gabriel kun ano an saiyang magigin papel sa katuyohan nin Dios. Sa pangyayaring iyan, tinaratara nia ini, na nagsasabi: “Marahay na aldaw, ika na pano nin pabor, si Jehova nasa saimo.” (Lucas 1:28) An ibang traduksion kan pataratara man sanang iyan iyo ini: “Aba, pano ka nin grasya, an Kagurangnan nasa saimo.” Dai nahaloy pakatapos kaiyan, tinaratara ni Elizabet si Maria paagi sa mga tataramon na ini: “Biniyayaan ka sa mga babae, asin biniyayaan an bunga kan saimong matris!” (Lucas 1:42) Dai daw ipinaparisa kan mga pananaram na ini na maninigo si Maria sa espesyal na pagsamba?

An totoo, dai. Minsan ngani iiniba an mga tataramon na ini sa sarong pamibi kan mga Katoliko ki Maria, an Biblia mismo dai nagtatao nin balidong rason sa pagpamibi sa saiya. Minidbid ni Gabriel asin Elizabet an daing kaagid na pribilehio ni Maria bilang an saro na mapangaki sa Mesiyas, alagad an ideya na mamibi sa saiya mayo sa Kasuratan. Sa kabaliktaran, kan magpatokdo an mga disipulo ni Jesus sa saiya kun paano mamibi, ipinarisa nia na sa saiyang Ama dapat mamibi. Sa katunayan, an bantog na modelong pamibi ni Jesus minapoon paagi sa mga tataramon na ini: “Ama niamo na nasa langit.”​—Mateo 6:9.

Kabilang sa mga Namamahala

An saro pang lakop na katokdoan manongod ki Maria iyo na sia na ngonyan “an Reyna kan kalangitan.” Dai noarin man itinatao sa saiya kan Biblia an siring na titulo. Minsan siring, ipinapaheling kaiyan na may espesyal na papel sia sa langitnon na areglo nin Dios. Anong papel iyan?

Sinabi ni Jesus na an nagkapira sa saiyang maimbod na mga disipulo makakaiba nia sa pamamahala sa saiyang Kahadean. (Lucas 22:28-30) An mga piniling iyan tatawan ni Jesus nin autoridad na maglingkod bilang “mga saserdote para sa satong Dios, asin sinda mamamahala bilang mga hade sa daga.” (Kapahayagan 5:10) Malinaw kitang ginigiyahan kan Biblia sa kongklusyon na kabilang si Maria sa mga tinawan kan halangkaw na pribilehiong ini. Paano niato nasabi ini?

Magigirumdoman nindo na pagkagadan ni Jesus, si Maria “nagpapadagos sa pamimibi” kaiba kan mga disipulo asin mga tugang ni Jesus. Mga 120 an nagtiripon para sa katuyohan na ini, kaiba “an nagkapirang babae.” (Gibo 1:12-15) Mantang ‘nagpapadagos an kapiestahan nin Pentecostes,’ an sabi kan Biblia, “sinda gabos magkairiba sa sarong lugar” kan an banal na espiritu nin Dios ibubo sa sainda, na tinawan sinda kan abilidad na magtaram nin ibang mga lenguahe.​—Gibo 2:1-4.

An bagay na kabilang si Maria sa mga binendisyonan sa paaging ini nagpapaheling na sia asin an iba pang babae na nag-ako kan banal na espiritu pinili na magin kabtang kan langitnon na Kahadean ni Jesus. Kaya igwa kita kan gabos na dahelan na magtubod na si Maria kaiba na ngonyan ni Jesus sa langitnon na kamurawayan. (Roma 8:14-17) Estudyare an nagkapira sa mga magigin pribilehio nia asin kan iba pang kairibang namamahala ni Jesus dapit sa pagkaotob kan mga katuyohan nin Dios.

Pagtao nin Marahayon na mga Bendisyon

Sinasabi kan libro sa Biblia na Kapahayagan na 144,000 na indibiduwal an bubuhayon liwat sa langitnon na kamurawayan tanganing maglingkod kaiba ni Jesus bilang mga saserdote, hokom, asin hade. (Kapahayagan 14:1, 4; 20:4, 6) Bilang mga saserdote, makikikabtang sinda sa pag-aplikar kan merito kan atang ni Jesus sa gabos na makinuyog na katawohan, na dinadara an mga ini sa espirituwal, moral, asin pisikal na pagkasangkap. (Kapahayagan 21:1-4) Kanigoan na pribilehio para sa gabos na maimbod na nagsasamba ki Jehova na maheling an marahayon na panahon na iyan!a

Si Maria nagkaigwa, asin igwa sagkod ngonyan, nin papel sa pagkaotob kan mga katuyohan ni Jehova. Huli sa saiyang kapakumbabaan, pagtubod, pagkuyog, asin debosyon bilang sarong ina, dai na baga sambiton pa an saiyang pakatagal sa ibong nin pagbalo, sia maninigong arogon. Huli sa papel nia na ipangaki an Mesiyas asin magtao nin daing katapusan na mga bendisyon sa katawohan, sia dapat na igalang na marhay.

Minsan siring, an pinakaimportanteng leksion na manonodan niato ki Maria iyo na sia, kaiba kan gabos na iba pang maimbod na lingkod nin Dios, nagsasamba ki Jehova asin bako sa ibang dios. Si Maria, pati na an iba pang kairibang namamahala ni Cristo sa langit, naglalangkaw kan saiyang tingog tanganing magpahayag: “Sa Saro na nakatukaw sa trono [si Jehova Dios] asin sa Kordero [si Jesu-Cristo], mapasainda logod an kaomawan asin an onra asin an kamurawayan patin an kosog sagkod pa man.”​—Kapahayagan 5:13; 19:10.

[Nota sa Ibaba]

[Blurb sa pahina 10]

Maninigong arogon an kapakumbabaan, pagtubod, asin pagkuyog ni Maria