“An Diyos Mayong Pinapalain”

1-3. Anong bisyon an nahiling ni Pedro, asin taano ta kaipuhan tang masabutan an kahulugan kaiyan?

TAON nin 36 C.E. kaidto. Minatama ki Pedro an sinag kan saldang sa panahon nin tigrakdag mantang namimibi siya sa bubungan nin sarong harong sa gilid kan dagat sa duungan na siyudad nin Jope. Pirang aldaw na man siyang nakikidagos sa harong na ini. An pagdagos niya digdi nagpaparisa na, sa paano man, mayo siyang pagpapalain-lain. An kagsadiri kan harong, na an pangaran Simon, sarong paragibo nin balát, asin bakong gabos na Judio magugustong makidagos sa harong nin sarong tawo na arog kaiyan an trabaho.a Minsan siring, madali nang manudan ni Pedro an sarong mahalagang marhay na leksiyon manungod sa pagigin mayong pinapalain ni Jehova.

² Mantang namimibi si Pedro, nagkaigwa siya nin bisyon. Siguradong makakapurisaw sa siisay man na Judio an nahihiling niya sa bisyon. Itinutunton hali sa langit an garo telang lalagan na may mga hayop na ibinibilang na maati sigun sa Katugunan. Kan sabihan si Pedro na magbuno asin magkakan, nagsimbag siya: “Dai pa ako kasuarin man nagkakan nin ano man na maati saka bakong malinig.” Bako sanang sarong beses kundi tulong beses na sinabi sa saiya: “Dai mo na pag-apudon na maati an mga bagay na lininig na nin Diyos.” (Gibo 10:14-16) Naribong si Pedro huli kan bisyon, pero madali na niyang masabutan iyan.

³ Ano daw an kahulugan kan bisyon ni Pedro? Mahalaga na masabutan ta an kahulugan kaiyan, huling manunudan ta diyan an sarong mahalagang katotoohan manungod sa kun paano minamansay ni Jehova an mga tawo. Bilang tunay na mga Kristiyano, dai kita lubos na makakapagpatotoo mapadapit sa Kahadian nin Diyos kun dai ta manunudan na arugon si Jehova sa kun paano niya minamansay an mga tawo. Para maaraman an kahulugan kan bisyon ni Pedro, siyasaton ta an mahahalagang pangyayari may koneksiyon digdi.

4, 5. Siisay si Cornelio, asin ano an nangyari mantang namimibi siya?

⁴ Mayong kaaram-aram si Pedro na kan aldaw bago kaiyan, duman sa Cesarea na mga 50 kilometros sa bandang norte, sarong lalaki na an pangaran Cornelio an nagkaigwa man nin bisyon hali sa Diyos. Si Cornelio, na sarong senturyon sa hukbo nin Roma, ‘relihiyosong tawo.’b Saro man siyang arugan na padre de-pamilya, asin siya “may pagkatakot sa Diyos pati na an bilog niyang pamilya.” Si Cornelio bakong Judiong proselito; saro siyang bakong turing Hentil. Pero mapagmalasakit siya sa mga nangangaipong Judio, na tinatawan sinda nin materyal na tabang. An sinserong lalaking ini ‘pirming nagngangayo-ngayo sa Diyos.’—Gibo 10:2.

⁵ Kaidtong mga alas tres nin hapon, namimibi si Cornelio kan makahiling siya nin sarong bisyon na diyan sarong anghel an nagsabi sa saiya: “An saimong mga pamibi saka pagtabang sa mga pobre nakaabot sa Diyos, asin ginirumdom niya an mga iyan.” (Gibo 10:4) Ininstruksiyunan kan anghel si Cornelio na magsugo nin mga tawuhan para padumanon si apostol Pedro sa saiya. Makakalaog na si Cornelio sa sarong pinto na dating bakong bukas para sa saiya huli sa pagigin niyang bakong turing Hentil. Mag-aako na siya kan mensahe nin kaligtasan.

6, 7. (a) Magsaysay nin eksperyensiya na nagpapahiling na sinisimbag nin Diyos an mga pamibi kan mga sinserong tawo na gustong maaraman an katotoohan manungod sa saiya. (b) Ano an masasabi niyato sa siring na mga eksperyensiya?

⁶ Sinisimbag daw nin Diyos an mga pamibi kan mga sinserong tawo ngunyan na gustong maaraman an katotoohan manungod sa saiya? Hilinga an sarong eksperyensiya. Sarong babayi sa Albania an nag-ako nin kopya nin An Torrengbantayan na may artikulo manungod sa pagpadakula nin mga aki.c Sinabi niya sa Saksing nagtuktok sa pinto ninda: “Aram mo daw na namimibi ako sa Diyos na tabangan niya ako sa pagpadakula sa mga aki kong babayi? Ika an isinugo niya! Talagang naabot mo an puso ko; ining impormasyon na ini an talagang kaipuhan ko!” An babayi saka an saiyang mga aki nagpuon nang makipag-adal nin Bibliya, asin kan huri nakipag-adal na man an agom niya.

⁷ Nagkataon sana daw iyan? Dai nanggad! An arog kaining eksperyensiya pauruutrong nangyayari sa bilog na kinaban, kaya dai iyan masasabing nagkataon sana. Kun siring, ano an masasabi niyato manungod diyan? Inot, sinisimbag ni Jehova an mga pamibi kan mga sinserong indibidwal na naghahanap sa saiya. (1 Ha. 8:41-43; Sal. 65:2) Ikaduwa, tinatabangan kita kan mga anghel sa satong gibuhon na paghuhulit.—Kap. 14:6, 7.

8, 9. Ano an ipinaaram kan espiritu ki Pedro, asin ano an nagin reaksiyon niya?

⁸ Mantang nasa bubungan pa si Pedro asin “nariribong” sa kun ano an kahulugan kan bisyon, nag-abot sa harong ni Simon an mga mensaherong isinugo ni Cornelio. (Gibo 10:17) Maiba daw si Pedro sa mga lalaking ini asin malaog sa harong nin sarong Hentil mantang tulong beses siyang nagsayumang magkakan kan mga kakanon na ibinibilang na maati sigun sa Katugunan? Sa paano man, ipinaaram kan banal na espiritu kun ano an kabutan nin Diyos manungod sa bagay na ini. Sinabi kaiyan ki Pedro: “Uya! May tulong lalaki na naghahanap sa saimo. Kaya magbaba ka na asin mag-iba sa sainda, saka dai ka magparaduwa-duwa, ta isinugo ko sinda.” (Gibo 10:19, 20) Daing duda, an bisyon na nahiling ni Pedro manungod sa garo telang lalagan nakatabang sa saiya na magin andam na magsunod sa paggiya kan banal na espiritu.

⁹ Kan maaraman ni Pedro na hali sa Diyos an instruksiyon na ipaapod siya ni Cornelio, pinalaog niya sa harong an mga mensaherong Hentil “asin pinadagos duman bilang mga bisita niya.” (Gibo 10:23a) Pinunan na kan masinunod na apostol na iuyon an saiyang kaisipan sa mga pagbabago may koneksiyon sa pagsagibo kan kabutan nin Diyos.

10. Paano ginigiyahan ni Jehova an saiyang mga lingkod, asin anong mga hapot an kaipuhan niyatong ihapot sa satong sadiri?

¹⁰ Sagkod sa ngunyan, padiit-diit na ipinapasabot ni Jehova sa saiyang mga lingkod an saiyang kabutan. (Tal. 4:18) Paagi kan saiyang banal na espiritu, ginigiyahan niya “an maimbod asin mapagmansay na uripon.” (Mat. 24:45) Paminsan-minsan, puwedeng makaresibi kita nin mga paglilinaw sa satong pakasabot sa Tataramon nin Diyos o mga pagbabago sa nagkapirang areglo kan organisasyon. Kaya, marahay na haputon ta an satong sadiri: ‘Ano an nagigin reaksiyon ko sa arog kaiyan na mga pagbabago? Nagpapasakop daw ako sa paggiya kan espiritu nin Diyos pag-abot sa arog kaining mga bagay?’

11, 12. Ano an ginibo ni Pedro pag-abot niya sa Cesarea, asin ano an nanudan niya?

¹¹ Kinaagahan, si Pedro asin an siyam na iba pa—an tulong mensahero na isinugo ni Cornelio asin an “anom na tugang” na Judio hali sa Jope—nagpasiring sa Cesarea. (Gibo 11:12) Huling inaasahan na ni Cornelio an pag-abot ni Pedro, tinipon niya “an saiyang mga paryente saka dayupot na mga amigo”—na minalataw na gabos Hentil. (Gibo 10:24) Pag-abot ni Pedro, ginibo niya an sarong bagay na dai niya lamang hunaon na gigibuhon niya: Naglaog siya sa harong nin bakong turing Hentil! Sinabi ni Pedro: “Aram na aram nindo na bawal nanggad sa sarong Judio na makiiba-iba o magrani sa bako niyang kalahi, pero ipinahiling nin Diyos sa sako na dai ko dapat sabihon na maati o bakong malinig an siisay man na tawo.” (Gibo 10:28) Nasasabutan na ngunyan ni Pedro na an itinutukdo kan nahiling niyang bisyon bako sanang leksiyon manungod sa kun anong klaseng mga kakanon an dapat na kakanon nin saro. Dai niya dapat “sabihon na maati o bakong malinig an siisay man na tawo,” dawa an saro na Hentil.

¹² An gabos na naghahalat interesado nang marhay sa sasabihon ni Pedro. “Uni kami gabos ngunyan, nasa atubangan nin Diyos, tanganing magdangog sa gabos na ipinagbuot ni Jehova sa saimo na sabihon samuya,” an sabi ni Cornelio. (Gibo 10:33) Imahinara na sana an mamamati mo kun madangog mo ini sa sarong interesado! Nagpuon si Pedro paagi sa mapuwersang mga tataramon na ini: “Ngunyan lubos ko nang nasasabutan na an Diyos mayong pinapalain, kundi sa lambang nasyon, inaako niya an tawong may pagkatakot sa saiya asin naggigibo nin matanos.” (Gibo 10:34, 35) Nanudan ni Pedro na an pagmansay ni Jehova sa mga tawo dai nakadepende sa rasa, nasyonalidad, o itsura. Nagpadagos si Pedro paagi sa pagpatotoo sa sainda manungod sa ministeryo, kagadanan, asin pagkabuhay liwat ni Jesus.

13, 14. (a) Tanda nin ano an pagkakumbertir ni Cornelio asin kan iba pang mga Hentil kan 36 C.E.? (b) Taano ta dai niyato dapat paghusgaran an mga tawo base sa saindang itsura?

¹³ Dangan may nangyari na dai pa nuarin man nangyari kaidto: “Mantang nagtataram pa si Pedro,” an banal na espiritu ibinubo sa mga tawong idto na “mga tawo kan mga nasyon.” (Gibo 10:44, 45) Ini sana an solamenteng pangyayari na sinambit sa Kasuratan na an banal na espiritu ibinubo bago an bawtismo. Huling nasabutan ni Pedro na tanda ini nin pag-uyon nin Diyos, “nagtao siya nin instruksiyon sa sainda na bawtismuhan an mga ini [an grupong idto nin mga Hentil].” (Gibo 10:48) An pagkakumbertir kan mga Hentil na ini kan 36 C.E. iyo an nagin tanda na tapos na an panahon kan pagpahiling nin Diyos nin espesyal na pabor sa mga Judio. (Dan. 9:24-27) Sa pagkakataon na ini, ginamit ni Pedro an ikatulo asin huri sa “mga liyabe kan Kahadian.” (Mat. 16:19) An liyabeng ini nagbukas kan pinto sa bakong turing mga Hentil para magin mga Kristiyanong linahidan nin espiritu.

¹⁴ Bilang mga parabalangibog kan Kahadian ngunyan, aram niyato na “mayong pinapalain an Diyos.” (Roma 2:11) Kabutan niya na “an gabos na klase nin tawo maligtas.” (1 Tim. 2:4) Kaya dai niyato dapat paghusgaran an mga tawo base sa saindang itsura. An asignasyon ta iyo na lubos na magpatotoo mapadapit sa Kahadian nin Diyos, asin kalabot diyan an paghuhulit sa gabos na tawo, ano man an saindang rasa, nasyonalidad, itsura, o relihiyon.

15, 16. Taano ta nakidiskutiran ki Pedro an nagkapirang Kristiyanong Judio, asin paano siya nagpaliwanag?

¹⁵ Siguradong gustong-gusto ni Pedro na ibareta an nangyari, kaya nagpasiring siya sa Jerusalem. Minalataw na bago pa man siya makaabot, nabaretaan na kan mga tugang duman na an mga bakong turing Hentil ‘inako an tataramon nin Diyos.’ Pagkaabot ni Pedro, “pinunan siyang tuyawon kan mga nagsusuportar sa pagturi.” Napurisaw sinda huling naglaog siya “sa harong nin mga tawong bakong turi asin nagkakan kaiba ninda.” (Gibo 11:1-3) Bako man isyu kun baga puwedeng magin mga parasunod ni Cristo an mga Hentil. Imbes, pig-iinsistir kan mga disipulong Judiong idto na kaipuhan na sunudon kan mga Hentil an Katugunan—kaiba na an pagturi—tanganing magin akseptable ki Jehova an saindang pagsamba. Malinaw nanggad na an nagkapirang mga disipulong Judio nasasakitan na butasan an Katugunan ni Moises.

¹⁶ Paano nagpaliwanag si Pedro? Uyon sa Gibo 11:4-16, nagsaysay siya nin apat na ebidensiya na an ginibo niya may paggiya hali sa langit: (1) su bisyon na ipinahiling sa saiya nin Diyos (Bersikulo 4-10); (2) su pagbuot sa saiya kan espiritu (Bersikulo 11, 12); (3) su pagdalaw kan anghel ki Cornelio (Bersikulo 13, 14); asin (4) su pagbubo kan banal na espiritu sa mga Hentil. (Bersikulo 15, 16) Nagtapos si Pedro paagi sa sarong mapuwersang hapot: “Kaya, kun itinao nin Diyos sa sainda [sa mga nagturubod na Hentil] an iyo man sanang daing bayad na regalong [banal na espiritu na] itinao niya sa sato [na mga Judio] na mga nagturubod sa Kagurangnan na Jesu-Cristo, siisay man ako para mapugulan ko an Diyos?”—Gibo 11:17.

17, 18. (a) Paano nabalo an mga Kristiyanong Judio huli kan patotoo ni Pedro? (b) Taano ta puwedeng magin sarong angat na papagdanayon an pagkasararo kan kongregasyon, asin anong mga hapot an marahay na ihapot niyato sa satong sadiri?

¹⁷ Huli kan patotoo ni Pedro, mababalo nanggad an mga Kristiyanong Judiong idto. Magigibo daw nindang halion sa saindang puso an ano man na pagpalain-lain asin akuon bilang kapwa ninda Kristiyano an bago pa sanang mabawtismuhan na mga Hentil? Sinasabi sa sato kan pagkasaysay: “Kan madangog ninda ini [kan mga apostol asin kan iba pang mga Kristiyanong Judio], nagpundo na sinda sa pagkontra, asin pinamuraway ninda an Diyos, na sinasabi: ‘Kun siring, tinawan man nin Diyos an mga tawo kan mga nasyon nin oportunidad na makapagsulsol tanganing magkamit sinda nin buhay.’” (Gibo 11:18) Huli sa positibong sabuot na iyan, napagdanay an pagkasararo kan kongregasyon.

¹⁸ Puwedeng magin dipisil man na mapagdanay an pagkasararo ngunyan, huling hali sa “gabos na nasyon asin tribo asin banwaan saka lengguwahe” an tunay na mga parasamba. (Kap. 7:9) Dahil diyan, manlain-lain na rasa, kultura, asin pinaghalian an mahihiling ta sa dakul na kongregasyon. Marahay na haputon niyato an satong sadiri: ‘Nahali ko na daw sa puso ko an ano man na pagpalain-lain? Determinado daw ako na nungkang pagtugutan na makaapektar sa pagtratar ko sa sakong Kristiyanong mga tugang an kinabanon na mga ugali na nagkakawsa nin pagkabaranga—kaiba na an pagpalain-lain huli sa nasyon, tribo, kultura, asin rasa?’ Girumdumon an nangyari ki Pedro (Cefas) mga pirang taon pagkakumbertir kan inot na mga Hentil. Tinugutan niya na maimpluwensiyahan siya kan pagpalain-lain kan iba kaya “suminuway siya” sa mga Kristiyanong Hentil. Asin dahil diyan, kinaipuhan siyang itanos ni Pablo. (Gal. 2:11-14) Lugod na pirmi kitang mag-ingat laban sa silo nin pagpalain-lain.

19. Kairisay nagpuon na maghulit an mga Kristiyanong Judio sa Antioquia, asin ano an nagin resulta?

¹⁹ Nagpuon daw na maghulit sa mga bakong turing Hentil an mga parasunod ni Jesus? Mangnuhon an nangyari dai nahaloy sa Antioquia sa Siria.d Dawa ngani igwa nin dakulang komunidad nin mga Judio sa siyudad na iyan, marahay man an pag-iribanan kan mga Judio asin mga Hentil duman. Kaya magayon na teritoryo an Antioquia para maghulit sa mga Hentil. Duman pinunan nin nagkapirang disipulong Judio na ipahayag an maugmang bareta “sa mga tawong nagtataram nin Griego.” (Gibo 11:20) Naghulit sinda bako lang sa mga Judiong nagtataram nin Griego kundi siring man sa mga bakong turing Hentil. Binendisyunan ni Jehova an gibuhon, asin “dakulang bilang an nagturubod.”—Gibo 11:21.

20, 21. Paano nagpahiling si Bernabe nin kababaan nin buot, asin paano niyato maaarog an siring na kuwalidad sa pagsagibo ta kan satong ministeryo?

²⁰ Tanganing maasikaso an hinog nang teritoryong idto, an kongregasyon sa Jerusalem isinugo si Bernabe sa Antioquia. Dakulon duman nin mga interesado kaya dai niya kakayanon kun siya sana. Siisay pa man an mas makakatabang sa saiya kundi si Saulo, na iyo an magigin apostol sa mga nasyon? (Gibo 9:15; Roma 1:5) Ibibilang daw ni Bernabe na karibal si Saulo? Dai. Sa kabaliktaran, nagpahiling si Bernabe nin kababaan nin buot. Siya na mismo an nagduman sa Tarso para hanapon si Saulo asin iiba pabalik sa Antioquia tanganing makatabang sa saiya. Sarong taon sindang magkaibanan na pinapakusog an mga disipulo sa kongregasyon duman.—Gibo 11:22-26a.

²¹ Paano kita makakapahiling nin kababaan nin buot sa satong ministeryo? Kaiba sa kuwalidad na ini an pagmidbid sa satong mga limitasyon. Magkakalain an mga kakusugan asin kakayahan niyato gabos. Halimbawa, an iba tibaad mahusay sa impormal na pagpapatotoo o sa pagharong-harong pero nasasakitan na magsagibo nin pagdalaw liwat o makapuon nin pag-adal sa Bibliya. Kun gusto mong umuswag sa sarong aspekto kan ministeryo, puwedeng ika na mismo an maghagad nin tabang. Paagi sa pagkaigwa nin siring na inisyatiba, magigin mas mabunga ka asin mag-aani nin mas dakulang kagaya-gayahan sa ministeryo.—1 Cor. 9:26.

22, 23. Anong kapahayagan nin pagkamuot na sa-magturugang an ipinahiling kan mga tugang sa Antioquia, asin paano sinda inaarog kan mga lingkod nin Diyos sa ngunyan?

²² Sa Antioquia inot na “inapod na mga Kristiyano an mga disipulo paagi sa paggiya nin Diyos.” (Gibo 11:26b) An pangaran na iyan na itinao nin Diyos angay nanggad na magladawan sa mga gustong arugon an paagi nin pamumuhay ni Cristo. Kan magin Kristiyano an mga tawo kan mga nasyon, nagkasararo daw bilang magturugang an mga Kristiyanong Judio asin mga Kristiyanong Hentil? Pag-isipan an nangyari kan magkaigwa nin grabeng tiggutom kan mga 46 C.E.e Pag igwa nin tiggutom kaidto, apektadong marhay an mga pobre huling mayo sindang tipon na kuwarta o kakanon. Durante kan tiggutom na idto, an mga Kristiyanong Judio na nakaistar sa Judea, na an dakul minalataw na mga pobre, nangangaipo nin kakanon asin iba pang mga bagay. Kan maaraman iyan kan mga tugang sa Antioquia—kaiba na an mga Kristiyanong Hentil—nagpadara sinda nin “ayuda sa mga tugang na nakaistar sa Judea.” (Gibo 11:29) Sarong tunay na kapahayagan nanggad iyan nin pagkamuot na sa-magturugang!

²³ Siring man kaiyan an mga lingkod nin Diyos sa ngunyan. Pag nababaretaan niyato na nangangaipo an satong mga tugang—sa ibang kadagaan man o sa sato mismong lugar—andam kitang gumibo nin mga paagi para tumabang. An mga Komite kan Sangay tulos na nagbibilog nin mga Disaster Relief Committee tanganing asikasuhon an satong mga tugang na naapektaran nin natural na mga kalamidad, arog nin bagyo, linog, asin tsunami. Ipinapahiling kan siring na mga ginigibong pag-ayuda an pagigin tunay kan satong kasararuan nin magturugang.—Juan 13:34, 35; 1 Juan 3:17.

24. Paano niyato maipapahiling na isinasapuso niyato an kahulugan kan bisyon na nahiling ni Pedro?

²⁴ Bilang tunay na mga Kristiyano, isinasapuso niyato an kahulugan kan bisyon na nahiling ni Pedro mantang nasa bubungan siya kan harong sa Jope kan inot na siglo. Nagsasamba kita sa sarong Diyos na mayong pinapalain. Kabutan niya na lubos kitang magpatotoo mapadapit sa saiyang Kahadian, asin kalabot diyan an paghuhulit sa iba ano man an saindang rasa, nasyonalidad, o kamugtakan sa buhay. Kaya, magin determinado lugod kita na tawan nin oportunidad na maghimati sa maugmang bareta an gabos na andam na magdangog.—Roma 10:11-13.