LEKSIYON 02
An Bibliya Nagtatao nin Paglaom
An mga tawo sa bilog na kinaban nag-aagi nin mga problema na nagdadara sa sainda nin kamunduan, kahaditan, asin pagsakit. Nangyari na man daw iyan saimo? Tibaad nagsasakit ka huli sa minamating hilang o nagadanan ka nin mahal sa buhay. Tibaad maihapot mo, ‘Magigin okey pa daw an buhay ko?’ Mauugma ka sa simbag kan Bibliya.
1. Anong paglaom an itinatao sa sato kan Bibliya?
Ipinapaliwanag kan Bibliya kun taano ta pano-pano nin problema an kinaban. Igwa man iyan nin maugmang bareta na dai na mahahaloy hahalion nin Diyos an mga problemang iyan. An mga pangako kan Bibliya puwedeng magtao saimo nin “magayon na puturo asin paglaom.” (Basahon an Jeremias 29:11, 12.) An mga pangakong iyan makakatabang sa sato na makayanan an mga problema, magin positibo, asin magin maugma bako lang ngunyan kundi habangbuhay.
2. Ano an ipinapangako kan Bibliya na mangyayari sa maabot?
Sinasabi kan Bibliya na pag-abot nin panahon ‘an kagadanan mawawara na, saka dai na man magkakaigwa nin pagmundo, o nin pagtangis, o nin kulog.’ (Basahon an Kapahayagan 21:4.) An mga problema na nagpapasakit sa mga tawo—arog kan pagtios, inhustisya, hilang, asin kagadanan—mawawara na. Nangangako an Bibliya na an mga tawo mabubuhay nin daing katapusan sa Paraiso digdi sa daga.
3. Paano ka makakapagtiwala sa mga pangako kan Bibliya?
Dakul na tawo an nag-aasang magigin marahay an mga bagay-bagay pag-abot nin panahon pero dai sinda sigurado kun talagang mangyayari iyan. Alagad bakong arog kaiyan kun manungod sa mga pangako kan Bibliya. Magkakaigwa kita nin tiwala sa sinasabi kaiyan kun ‘maingat tang sisiyasaton an Kasuratan.’ (Gibo 17:11) Mantang pinag-aadalan mo an Bibliya, mapapatunayan mo sa sadiri mo kun baga totoo an sinasabi kaiyan manungod sa maabot na panahon.
ARAMON PA
Aramon an pira sa mga pangako kan Bibliya na mangyayari sa maabot na panahon. Hilingon kun paano nakakatabang ngunyan sa mga tawo an paglaom na itinatao kan Bibliya.
4. Nangangako an Bibliya na puwede kitang mabuhay nin daing katapusan na mayo nin ano man na problema
Hilingon sa ibaba an nagkapira sa mga pangako kan Bibliya. Arin diyan an gustong-gusto mong mangyari? Taano?
Basahon an mga teksto na kasunod kan kada pangako, dangan pag-ulayan an mga hapot na ini:
Nakatao daw saimo nin paglaom an mga tekstong ini? Makakatao man daw iyan nin paglaom sa mga kapamilya saka amigo mo?
Isipon na nabubuhay ka sa kinaban na
AN GABOS NA TAWO DAI NA . . . |
AN GABOS NA TAWO . . . |
|---|---|
|
|
|
|
|
|
|
|
|
|
5. Makakatabang saimo an paglaom na sinasabi kan Bibliya
Dakul an nadidisganar o naaanggot pa ngani dahil sa mga nangyayaring problema. Hinihinguwang marhay kan iba na pakarhayon an sistema. Hilingon kun paano nakatabang sa mga tawo ngunyan an mga pangako kan Bibliya sa maabot. I-play an VIDEO, dangan pag-ulayan an mga hapot na ini:
Sa video, anong inhustisya an nakaparibok sa isip ni Rafika?
Dawa ngani dai man nahali an inhustisyang nahiling niya, paano siya natabangan kan Bibliya?
An paglaom na sinasabi kan Bibliya makakatabang sa sato na malabanan an pagkadisganar asin makayanan an satong mga problema. Basahon an Talinhaga 17:22 saka Roma 12:12, dangan pag-ulayan an mga hapot na ini:
Sa hiling mo, makakatabang daw an paglaom na sinasabi kan Bibliya para magin mas marahay an buhay mo ngunyan? Taano?
MAY MGA NAGSASABI: “Imposible man na mangyari an mga pangako kan Bibliya.”
Sa hiling mo, taano ta mahalaga na aramon mo mismo kun baga mangyayari talaga iyan?
SUMARYO
Nangangako an Bibliya na pag-abot nin panahon magigin maugma an buhay sa daga. Nagtatao iyan sa sato nin paglaom, asin natatabangan kita kaiyan na makayanan an mga problema.
Rebyu
Taano ta kaipuhan maaraman kan mga tawo an mga pangako nin Diyos?
Ano an sinasabi kan Bibliya na mangyayari pag-abot nin panahon?
Paano makakatabang sa saimo ngunyan an mga pangakong iyan?
HILINGON MAN
Aramon pa kun ano an nagigibo kan paglaom.
“Pag-asa—Saan Mo Ito Masusumpungan?” (Gumising!, Abril 22, 2004)
Aramon kun paano nakakatabang an paglaom sa mga may naghahaloy na hilang.
“Makakatabang Daw an Bibliya sa mga Igwa nin Naghahaloy na Hilang?” (Artikulo sa jw.org/bcl)
Mantang pighihiling an music video, isipon na yaon ka saka an saimong pamilya sa Paraiso na ipinangako kan Bibliya.
Basahon kun paano nabago an buhay kan sarong aktibista kan maaraman niya an mga pangako kan Bibliya sa maabot.