Pagtitiwala sa Sarong Kinaban na Bakong Sangkap

“AN MARAHAY na minamawot ko dai ko ginigibo, kundi an maraot na hinahaboan ko iyo an ginigibo ko.” Totoo man daw ini sa saindo? Parigona an boot nindo sa pakaaram na nagin problema man iyan ni apostol Pablo; pero saro siang tawo na may marahayon na Kristianong integridad. Bako daw ining kontradiksion? Sa saiyang surat sa mga Kristiano sa Roma, siniyasat ni Pablo an problema: “Ngonyan, kun an hinahaboan ko iyo an sakong ginigibo, an naggigibo kaiyan bako nang ako, kundi an kasalan na nag-eerok sa sako.” Anong kasalan an boot niang sabihon, asin paano nia iyan pinangganahan tangani na magin tawong may integridad?​—Roma 7:​19, 20.

Sa enotan kan saiyang surat, si Pablo nagsurat: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” An “sarong tawo” iyo si Adan. (Roma 5:​12, 14) An Adanikong kasalan​—an kasalan kan enot na tawo, si Adan—​iyo an causa kan minanang mga pagkabakong sangkap kan rasa nin tawo asin pundamental na rason kun taano ta tunay na sarong angat an pagpapadanay nin integridad.

An pagmansay ni Pablo sa “orihinal na kasalan,” na dating apod dian, dai na inaako kan kadaklan ngonyan huli ta an tala kan Biblia manongod sa paglalang sinasayumahan na nin mga teologo apabor sa mga teoriya nin ebolusyon. “Ipinagilid na nin mga iskolar an bilog na teksto” an pagkasabi kaiyan nin sarong presenteng komentaryo dapit sa Roma 5:​12-14. Pero kaidtong sanggatos na taon na an nakaagi, daing pagliwatliwat na ipinaliwanag nin mga komentaryo sa Biblia na “kan magkasala si Adan . . . saiyang inolakitan kan kasalan na iyan asin kan mga epekto kaiyan an gabos niang aki.”a

An Orihinal na Pagkawara nin Integridad

Kun paanong an pag-eksister ni Adan, an enot na tawo, dinedeharan nin dakol ngonyan, si Satanas, an Diablo, ipinagilid man bilang imbento sana nin mitolohiya.b Alagad an mismong autoridad na si Jesu-Cristo nagsasabi sa sato na an sarong ini ‘dai nagdanay sa katotoohan,’ sa ibang pagtaram, dai sia mapagtitiwalaan. (Juan 8:44) Asin huli sa sutsut ni Satanas kaya si Adan asin an saiyang agom, si Eva, nagrebelde tumang ki Jehova asin rinaot an saindang integridad sa irarom nin pagbalo.​—Genesis 3:​1-19.

Huling kita gabos gikan ki Adan, kita gabos nagmana kan tendensia na magkasala. An madonong na tawong si Salomon nagsabi: “Mayo nin tawong matanos sa daga na padagos na naggigibo nin marahay asin dai nagkakasala.” (Eclesiastes 7:20) Pero, an siisay man na tawo puedeng magin mapagtitiwalaan. Taano ini ta posible? Huli ta dai nangangaipo nin sangkap na tawo an pagpapadanay nin integridad.

An Basehan nin Integridad

Si Hadeng David nin Israel dakol na ginibong sala, kabale an dokumentadong marhay na pakikisambay nia ki Bat-seba. (2 Samuel 11:​1-27) An dakol na pagkukulang ni David nagdoon na sia harayo sa pagkasangkap. Pero, ano an naheling ni Jehova sa tawong iyan? Kinakaolay an aki ni David, si Salomon, si Jehova nagsabi: “Maglakaw ka sa atubangan ko, arog kan paglakaw ni David na saimong ama, na may integridad sa puso asin may pagkatanos.” (1 Hade 9:4) Sa ibong kan saiyang dakol na sala, minidbid ni Jehova an pundamental na pagkamapagtitiwalaan ni David. Taano?

Itinao ni David an simbag kan sabihan nia si Salomon: “An gabos na puso sinisiyasat ni Jehova, asin an gabos na tendensia kan mga kaisipan saiyang namamansayan.” (1 Cronica 28:9) Nasala si David, alagad mapakumbaba sia, asin boot niang gibohon an tama. Permi niang inaako an pagsagwe asin pagtatanos​—sa katotoohan, hinagad nia iyan. “Siyasata ako, O Jehova, asin baloa ako; dalisaya an sakong mga bato asin an sakong puso” an saiyang pakiolay. (Salmo 26:2) Asin dinalisay nanggad si David. Halimbawa, an mga restriksion na bunga kan saiyang kasalan kaiba ni Bat-seba nagdanay sagkod sa katapusan kan saiyang buhay. Pero, dai noarin man prinobaran ni David na ipangatanosan an saiyang salang gibo. (2 Samuel 12:​1-12) Orog na mahalaga, dai sia noarin man suminuhay sa tunay na pagsamba. Sa rason na ini, asin huli sa tunay, odok sa pusong pagbasol asin pagsolsol ni David, si Jehova andam na patawadon an saiyang mga kasalan asin akoon sia bilang tawong may integridad.​—Helingon man an Salmo 51.

Mapagtitiwalaan sa Irarom nin Pagbalo

Si Jesus binalo ni Satanas na Diablo sa paghihingoang raoton an saiyang integridad. Kinaipuhan niang papagdanayon an saiyang integridad sa ibong nin mga kadepisilan asin pagsakit, na kabaliktaran ni Adan, na an pagkuyog bilang sangkap na tawo nabalo sana kan pagboot sa saiya na sunodon an sarong ley nin Dios. Dugang pa, pasan ni Jesus an sakit kan pakaaram na an pagkabalukat kan pamilya nin tawo nagdedepende sa saiyang integridad.​—Hebreo 5:​8, 9.

Si Satanas, na desididong raoton an integridad ni Jesus, dinolok sia kan si Jesus nanluluyang marhay​—pakatapos kan saiyang 40 aldaw na paghorophorop asin pag-ayuno sa kaawagan. Tolong beses niang sinugotan si Jesus​—gibohon na tinapay an mga gapo; tumagbang sa torre kan templo, na naglalaom na ililigtas sia nin mga anghel asin sa siring matao nin milagrosong tanda na magpapatunay sa saiyang pagigin Mesiyas; asin akoon an pamamahala sa gabos na kahadean kan kinaban na ini karibay nin saro sanang “akto nin pagsamba” ki Satanas. Alagad sinayumahan ni Jesus an lambang sugot, na pinapagdadanay an saiyang integridad ki Jehova.​—Mateo 4:1-11; Lucas 4:​1-13.

An Integridad ni Job

Bantog na marhay an paninindogan ni Job, na pinapagdanay an saiyang integridad sa irarom nin pagbalo. Interesante nanggad, dai nasabotan ni Job kun taano ta inabotan sia nin kalamidad. Dai nia aram na si Satanas nag-atribwir nin salang mga motibo sa saiya, na soboot si Job naglilingkod sa Dios huli sa paslong mga dahelan asin sinasabi na tanganing iligtas an saiyang sadiri, gikan sa boot na raraoton ni Job an saiyang integridad. Itinogot nin Dios na mamatean ni Job an masakiton na mga eksperyensia tanganing ipaheling na sala si Satanas.​—Job 1:​6-12; 2:​1-8.

Tolong falsong katood an uminentra sa eksena. Tuyong minisrepresentar ninda an mga pamantayan asin katuyohan nin Dios. Maski an agom ni Job, na dai man nasasabotan an isyu, dai naparigon an boot kan saiyang agom sa panahon nin labi-labing pangangaipo kaini. (Job 2:​9-13) Alagad marigon na nanindogan si Job. “Sagkod na ako magadan dai ko hahaleon sa sakuyang sadiri an sakuyang integridad! Sa sakuyang pagigin makatanosan nangangapot ako, asin dai ko iyan bubutasan; dai ako tutuyaon kan sakuyang puso huli sa arin man sa sakuyang mga aldaw.”​—Job 27:​5, 6.

An marahayon na halimbawa ni Job, pati an integridad kan dakol na iba pang fiel na lalaki asin babae, na nakarekord sa Biblia, nagpatunay na putikon si Satanas.

Integridad Asin an Kristianong Ministeryo

An integridad daw sarong kualidad na pinahahalagahan ni Jehova para sana sa saiyang sadiring satispaksion? Dai. An integridad igwa nin panlaog na halaga para sa satuya na mga tawo. Para sa satuyang kapakinabangan na si Jesus nagsadol sa sato na ‘kamotan si Jehova na satong Dios sa bilog niatong puso asin sa bilog niatong kalag patin sa bilog niatong isip.’ Tunay nanggad, ini “an pinakadakula asin enot na togon,” asin nangangaipo nin lalaki, babae, o aki na may integridad tanganing maotob iyan. (Mateo 22:​36-38) Ano an napapalabot, asin ano an mga balos?

An tawong may integridad puedeng pagtiwalaan, bako sanang kan saiyang kapwa tawo kundi, orog na mahalaga, nin Dios. An saiyang kadalisayan sa puso naheheling sa saiyang mga gawe-gawe; mayo sia nin pagsaginsagin. Bako siang tuso o maraot. Siring kaini an pagkasabi kaiyan ni apostol Pablo: “Isinikwal niamo an rirong na mga bagay na maninigong ikasopog, na dai naglalakaw na may katusohan, ni sinasalakan man an tataramon nin Dios, kundi paagi sa paghayag kan katotoohan nagrerekomendar kan samong sadiri sa lambang konsensia nin tawo sa pagheling nin Dios.”​—2 Corinto 4:2.

Mangnoha na sinasambit ni Pablo an mga aktitud na may koneksion sa Kristianong ministeryo. Paano makapaglilingkod sa iba an sarong Kristianong ministro kun bakong dalisay an saiyang mga kamot, kun bako siang tawong may integridad? An namamayo sa sarong relihiosong orden sa Irlandia na bago pa sanang magdemitir malinaw na nag-iilustrar kan punto. Inadmitir nia na saiyang “tinogotan an sarong padi na nakikidorog sa aki na magpadagos na magtrabaho kaiba nin mga aki haloy na panahon pakatapos na mahayag an saiyang seksuwal na pagmaltrato sa mga aki,” sono sa peryodikong The Independent. Ipinaliwanag kan rekord na an pagmaltrato luminawig nin labing 24 taon. An padi nabilanggo nin apat na taon, alagad isip-isipa an pagsakit na itinao sa mga aking kinolgan nia durante kan mga taon na idto huli ta an namamayo sa saiya mayo nin moral na integridad na gumibo nin aksion!

Integridad​—An mga Balos

Si apostol Juan sarong tawong daing takot. Huli sa saindang malaad na entusiasmo, sia asin an saiyang tugang na si Santiago inapod ni Jesus na “Mga Aki nin Dagoldol.” (Marcos 3:17) Sarong tawong may pambihirang integridad, si Juan, kaiba si Pedro, nagpaliwanag sa mga namamahalang Judio na sia ‘dai puedeng mag-ontok sa pagtaram’ dapit sa mga bagay na saiyang naheling asin nadangog mantang sia nasa kaibanan ni Jesus. Si Juan saro man sa mga apostol na nagsabi: “Kami kaipuhan na magkuyog sa Dios bilang namamahala kisa sa mga tawo.”​—Gibo 4:​19, 20; 5:​27-32.

Minalataw na kan si Juan magsasanggatos na an edad, sia nadistiero sa Isla nin Patmos “huli sa pagtaram dapit sa Dios asin pagpatotoo ki Jesus.” (Kapahayagan 1:9) Sa saiyang edad, tibaad inisip nia na tapos na an saiyang ministeryo. Alagad solamente sarong tawo na kapareho nia an integridad an puedeng paniwalaan kan asignasyon na isurat an nakapupukaw sa boot na bisyon sa Kapahayagan. Digdi, fiel si Juan. Kanigoan na pribilehio iyan para sa saiya! Asin dakol pa an madatong. Pagkatapos, minalataw na sa palibot nin Efeso, isinurat nia an saiyang tala nin Ebanghelyo asin tolong surat. Kanigoan kadakulang mga pribilehio na mapangganang tuminapos sa 70 taon nin fiel, mapagtitiwalaan na paglilingkod!

An pagigin tawong may integridad sa pankagabsan na paagi nagtatao nin hararom na satispaksion. An pagigin mapagtitiwalaan sa pagheling nin Dios nagbubunga nin daing katapusan na mga balos. Ngonyan, “sarong dakulang kadaklan” nin tunay na mga parasamba an inaandam na lumaog sa sarong bagong kinaban nin katoninongan asin pagkaoroyon, na may paglaom na buhay na daing katapusan. (Kapahayagan 7:9) Dapat na suportaran an integridad sa mahalagang marhay na mga bagay na moralidad asin pagsamba, sa ibong kan mga kasakitan sa palakaw na ini nin mga bagay asin sa dakol na angat na tibaad itao ni Satanas. Laoman nindo na paagi sa kapangyarihan na itinatao ni Jehova, puede kamong magin mapanggana!​—Filipos 4:13.

Nagtataram kapwa manongod sa presente asin sa ngapit, an salmistang si David pinakokosog an boot niato gabos kan sabihon nia, sa sarong pamibi nin pasasalamat ki Jehova: “Kun manongod sa sako, huli sa sakuyang integridad tinabangan mo ako, asin ibubugtak mo ako sa atubangan kan saimong lalauogon sagkod sa panahon na daing katapusan. Pag-omawon si Jehova . . . Amen asin Amen.”​—Salmo 41:​12, 13.

[Nota sa ibaba]

[Retrato sa pahina 4]

Sa ibong kan saiyang mga sala, si David nagin maninigong pagtiwalaan

[Retrato sa pahina 5]

Winalatan kita ni Jesus kan pinakamarahay na halimbawa nin pagigin mapagtitiwalaan

[Mga retrato sa pahina 7]

An pagigin mapagtitiwalaan nagbubunga nin dakulang satispaksion