‘Hanapon an Katoninongan Asin Gibohon Iyan’

“Pag-omawon si Jehova, na nawiwili sa katoninongan kan saiyang lingkod.”—SALMO 35:27.

1. Anong katoninongan an nakakamtan niato ngonyan?

KANIGOAN na kagayagayahan sa barangang kinaban na ini na magkaigwa nin katoninongan! Nakawiwili nanggad na sumamba ki Jehova, “an Dios mismo nin katoninongan,” asin makihiras sa mga bendisyon kan saiyang “tipan nin katoninongan”! Nakagiginhawa, sa tahaw kan mga kagipitan sa buhay, na mamidbid “an katoninongan nin Dios na minalampas sa gabos na kaisipan” asin mamatean ‘an bogkos nin katoninongan’ na nakakapasaro sa banwaan nin Dios ano man an saindang nasyonalidad, tataramon, rasa, o sosyal na pinaghalean!—1 Tesalonica 5:23; Ezequiel 37:26; Filipos 4:7; Efeso 4:3.

2, 3. (a) Mantang an banwaan nin Dios sa kabilogan magtatagal, ano an puwedeng mangyari sa indibiduwal na mga Kristiano? (b) Ano an isinasadol kan Biblia na gibohon niato?

² Bilang mga Saksi ni Jehova, pinakamamahal niato an katoninongan na ini. Minsan siring, dai niato iyan puwedeng pagbasangbasangon. An katoninongan dai automatikong napagdadanay huli sana ta kita asosyado sa Kristianong kongregasyon o miembro nin sarong Kristianong pamilya. Mantang an linahidan na natatada asin an kairiba nindang mga kabilang sa “ibang karnero” magtatagal bilang sarong aripompon sagkod sa katapusan, an mga indibiduwal puwedeng mawaran kan saindang katoninongan asin maholog.—Juan 10:16; Mateo 24:13; Roma 11:22; 1 Corinto 10:12.

³ Pinatanidan ni apostol Pablo an linahidan na mga Kristiano kan saiyang kaaldawan: “Mag-ingat kamo, mga tugang, ta tibaad igwa nin siisay man dian sa saindo na magkaigwa nin maraot na puso na kulang nin pagtubod paagi sa pagbaya sa nabubuhay na Dios.” (Hebreo 3:12) An patanid na ini aplikado man sa dakulang kadaklan. Kaya sinasadol kan Biblia an mga Kristiano: “Hanapon [mo] an katoninongan asin gibohon iyan. Huli ta an mga mata ni Jehova nasa mga matanos, asin an saiyang mga talinga nasa saindang pagngayongayo; alagad an lalauogon ni Jehova tumang sa mga naggigibo nin maraot.”—1 Pedro 3:10-12; Salmo 34:14, 15.

“An Pag-asikaso sa Laman”

4. Ano an puwedeng makaraot sa pakipagkatoninongan niato sa Dios?

⁴ Ano an puwedeng makaolang sa paghanap niato sa katoninongan? Nasambitan ni Pablo an sarong bagay kan sia magsabi: “An pag-asikaso sa laman nangangahulogan nin kagadanan, alagad an pag-asikaso sa espiritu nangangahulogan nin buhay asin katoninongan; huli ta an pag-asikaso sa laman pakipag-iwal sa Dios.” (Roma 8:6, 7) Sa “laman,” an boot sabihon ni Pablo an satong makasalan na kamugtakan bilang bakong sangkap na mga tawo na may minanang makasalan na mga tendensia. An pagpadaog sa mga hilig kan makasalan na laman makararaot sa satong katoninongan. Kun an sarong Kristiano daing pagsolsol na naggigibo nin inmoralidad, nagpuputik, naghahabon, nagdodroga, o sa ibang paagi naglalapas sa banal na pagboot, rinaraot nia an pakipagkatoninongan ki Jehova na dati nasa saiya. (Talinhaga 15:8, 29; 1 Corinto 6:9, 10; Kapahayagan 21:8) Dugang pa, kun totogotan nia an materyal na mga bagay na magin mas mahalaga sa saiya kisa espirituwal na mga bagay, namemeligrong marhay an saiyang pakipagkatoninongan sa Dios.—Mateo 6:24; 1 Juan 2:15-17.

5. Ano an kalabot sa paghanap sa katoninongan?

⁵ Sa ibong na lado, sinabi ni Pablo: “An pag-asikaso sa espiritu nangangahulogan nin buhay asin katoninongan.” An katoninongan kabtang kan bunga kan espiritu, asin kun totokdoan niato an satong puso na mag-apresyar sa espirituwal na mga bagay, na ipinamimibi na tabangan kita kan espiritu nin Dios, kun siring malilikayan niato “an pag-asikaso sa laman.” (Galacia 5:22-24) Sa 1 Pedro 3:10-12, an katoninongan konektado sa katanosan. (Roma 5:1) Sinasabi ni Pedro na kaiba sa paghanap nin katoninongan an ‘pagrayo sa maraot asin paggibo nin marahay.’ An espiritu nin Dios makatatabang sato na ‘sunodon an katanosan’ asin kun siring papagdanayon an satong pakipagkatoninongan sa Dios.—1 Timoteo 6:11, 12.

6. Ano an saro sa mga paninimbagan kan mga magurang mapadapit sa katoninongan kan kongregasyon?

⁶ An pagsunod sa katoninongan dakulang bagay sa mga magurang sa kongregasyon. Halimbawa, kun may magprobar na ilaog an nakararamog na mga gibo, an mga magurang may paninimbagan na ingatan an kongregasyon paagi sa paghihingoa na sagweon an nagkasala. Kun akoon nia an pagsagwe, mababawi nia an saiyang katoninongan. (Hebreo 12:11) Kun dai, tibaad kaipuhan siang paluwason tanganing mapagdanay an matoninong na relasyon kan kongregasyon ki Jehova.—1 Corinto 5:1-5.

Pakipagkatoninongan sa Satong mga Tugang

7. Anong kapahayagan kan “pag-asikaso sa laman” an ipinatanid ni Pablo sa mga taga-Corinto?

⁷ An “pag-asikaso sa laman” makalalaglag bako sanang sa satong pakipagkatoninongan sa Dios kundi pati sa satong marahay na relasyon sa ibang Kristiano. Si Pablo nagsurat sa mga taga-Corinto: “Kamo makalaman pa. Huli ta mantang igwa nin pag-imon asin pasuruhay dian sa saindo, bako daw na kamo makalaman asin bako daw na kamo naglalakaw nin siring sa mga tawo?” (1 Corinto 3:3) An pag-imon asin pasuruhay iyo an mismong kabaliktaran nin katoninongan.

8. (a) Ano an puwedeng mangyari sa saro na ginigikanan nin pag-imon asin pasuruhay sa kongregasyon? (b) Sa ano nasasarig an satong pakipagkatoninongan sa Dios?

⁸ An pagraot sa katoninongan kan kongregasyon paagi sa pagpalataw nin pag-imon asin pasuruhay seryoso nanggad. Sa pagtaram manongod sa sarong kuwalidad na konektado sa katoninongan bilang bunga kan espiritu, si apostol Juan nagpatanid: “Kun an siisay man nagsasabi: ‘Namomoot ako sa Dios,’ alagad naoongis sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai makakahimong mamoot sa Dios, na dai nia naheheling.” (1 Juan 4:20) Sa kaagid na paagi, kun an saro ginigikanan nin pag-imon o pasuruhay sa tahaw nin magturugang, talaga daw na sia puwedeng makipagkatoninongan sa Dios? Dai nanggad! Kita sinasadol: “Padagos kamong mag-ogma, maliwat, maranga, mag-isip na may pagkaoroyon, mamuhay sa katoninongan; asin an Dios nin pagkamoot asin nin katoninongan mapapasaindo.” (2 Corinto 13:11) Iyo, kun kita padagos na mamumuhay na may pakipagkatoninongan sa lambang saro, dangan an Dios nin pagkamoot asin katoninongan mapapasatuya.

9. Paano niato naaaraman na an mga Kristiano kun beses magkakaigwa nin mga dai pagkasinabotan asin dai pagkakaoyon?

⁹ Ini dai nangangahulogan na nungka na magkakaigwa nin dai pagkasinabotan an mga Kristiano. Kan mga semana pakalihis kan Pentecostes, nagkaigwa nin dai pagkaoroyon sa hoben na Kristianong kongregasyon manongod sa pagwaras nin kakanon aroaldaw. (Gibo 6:1) Sarong beses an dai pagkakaoyon ni Pablo asin Bernabe nagbunga nin “matarom na pagputok nin kaanggotan.” (Gibo 15:39) Kinaipuhan na hatolan ni Pablo si Euodias asin Sintique, na siertong marahay, mahigos na mga tugang na babae, “na magkasaro sa pag-isip dian sa Kagurangnan.” (Filipos 4:2) Bakong makangangalas na si Jesus nagtao nin detalyadong hatol sa kun paano reresolberan an mga pagkaraot kan katoninongan sa pag-oltanan nin mga Kristiano asin itinampok an pagkaapretado nin pag-asikaso tolos sa siring na mga problema! (Mateo 5:23-25; 18:15-17) Dai nia kutana itinao an hatol na ini kun dai sia nin inaantisipar na problema sa pag-oltanan kan saiyang mga parasunod.

10. Anong mga situwasyon an kun beses minalataw sa kongregasyon, asin anong paninimbagan an ibinubugtak kaini sa gabos na kalabot?

¹⁰ Kaya ngonyan, posible nanggad na an saro maanggot huli sa bakong mataktikang tataramon o pinaghohonang pan-iinsulto nin kapwa Kristiano. An ugale nin sarong tawo tibaad ikinauuyam na marhay nin saro. Tibaad magkabanggaan an mga personalidad. An saro tibaad kontrang marhay sa desisyon kan kamagurangan. Sa mismong grupo nin mga magurang, tibaad an sarong magurang may makosogon na opinyon asin pinoprobaran na dominaron an ibang magurang. Sa ibong kan bagay na nangyayari an mga siring, kaipuhan pa man giraray na hanapon niato an katoninongan asin gibohon iyan. An angat iyo an pag-asikaso sa mga problemang ini sa Kristianong paagi tanganing “mapagdanay an nakapagpapasarong bogkos nin katoninongan.”—Efeso 4:3.

11. Anong mga probisyon an ginibo ni Jehova tanganing matabangan kita na magibo an pakipagkatoninongan sa lambang saro?

¹¹ An Biblia nagsasabi: “Pag-omawon si Jehova, na nawiwili sa katoninongan kan saiyang lingkod.” (Salmo 35:27) Iyo, boot ni Jehova na kita magin matoninong. Kaya, guminibo sia nin duwang pambihirang probisyon tanganing matabangan kita na mapagdanay an pakipagkatoninongan niato sa lambang saro asin sa saiya. An saro iyo an banal na espiritu, na bunga kaiyan an katoninongan, kaiba an konektadong matoninong na mga kuwalidad, arog baga kan pakatios, kabootan, kahoyoan, asin pagpopogol sa sadiri. (Galacia 5:22, 23) An saro pa banal na kadonongan, na manongod kaiyan satong mababasa: “An kadonongan hale sa itaas enot sa gabos malinig, dangan matoninong, makatanosan, andam na magkuyog, pano nin pagkaherak asin marahay na mga bunga.”—Santiago 3:17, 18.

12. Ano an maninigo niatong gibohon kun naraot an pakipagkatoninongan niato sa satong mga tugang?

¹² Kun siring, kun nararaot an pakipagkatoninongan niato sa iba, maninigo na arangon niato an kadonongan hale sa itaas tanganing tokdoan kita kun paano magawe, asin maninigong arangon niato an banal na espiritu tanganing pakosogon kita na gibohon an tama. (Lucas 11:13; Santiago 1:5; 1 Juan 3:22) Kaoyon sa satong pamibi, kita makalalaom sa burabod nin banal na kadonongan, an Biblia, para sa giya, saka helingon an yaon na mga babasahon sa Biblia para sa hatol sa kun paano iaaplikar an Kasuratan. (2 Timoteo 3:16) Tibaad boot man niatong humagad nin hatol sa kamagurangan sa kongregasyon. An ultimong tangga kuyogon an inakong paggiya. An Isaias 54:13 nagsasabi: “An saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.” Ini nagpaparisa na an katoninongan niato depende sa satong paggibo kan mga itinotokdo sato ni Jehova.

“Maogma an mga Matoninong”

13, 14. (a) Ano an ipinaririsa kan sinabi ni Jesus na “matoninong”? (b) Paano kita magigin mga parapatoninong?

¹³ Si Jesus, sa saiyang Sermon sa Bukid, nagsabi: “Maogma an mga matoninong, ta sinda aapodon na ‘mga aki nin Dios.’” (Mateo 5:9) An “matoninong” digdi dai nanonongod sa saro na tiwasay sana huli sa kanaturalan nia. An orihinal na termino sa Griego nangangahulogan “parapatoninong.” An parapatoninong eksperto sa pagpabalik sa katoninongan kun iyan nariribok. Alagad mas mahalaga, an parapatoninong naghihingoa na likayan na maraot an katoninongan. ‘An katoninongan namomogol sa saiyang puso.’ (Colosas 3:15) Kun an mga lingkod nin Dios maghihingoang magin mga parapatoninong, magigin kadikiton an problema sa tahaw ninda.

¹⁴ An pagigin parapatoninong kaiba an pagmidbid sa satong mga kaluyahan. Halimbawa, an Kristiano tibaad aranggoton o sensitibo asin madaling makolgan an boot. Kun nasa kagipitan, tibaad papanlingawon sia kan saiyang mga emosyon sa mga prinsipyo kan Biblia. Ini malalaoman sa mga tawong bakong sangkap. (Roma 7:21-23) Minsan siring, an iriwal, pasuruhay, asin mga pagputok nin kaanggotan nalilista bilang mga gibo kan laman. (Galacia 5:19-21) Kun naheheling niato sa satong sadiri an siring na mga tendensia—o kun iyan iinaapod nin iba sa satong atension—maninigo na kita mamibi nin odok asin daing ontok na logod pataluboon sa sato kan espiritu ni Jehova an pagpopogol sa sadiri asin kahoyoan. An totoo, an gabos maninigong pagmaigotan na kultibaron an siring na mga kuwalidad bilang kabtang kan saiyang bagong pagkatawo.—Efeso 4:23, 24; Colosas 3:10, 15.

15. Paano an kadonongan hale sa itaas katumang nin daing rason na katagasan nin payo?

¹⁵ Kun beses, an kongregasyon o grupo nin mga magurang nariribok nin saro na matagas an payo, perming nag-iinsister sa sadiri niang paagi. Totoo, kun dapit sa banal na pagboot, an Kristiano maninigo na desidido, dai maliliwat an desisyon. Asin kun sa paghona niato kita may marahay na ideya na makikinabang an iba, dai man nin sala sa pagpahayag kan nasa boot niato, basta ipaliwanag niato an satong dahelan. Alagad habo niatong magin arog kan mga nasa kinaban na “dai maoyonan.” (2 Timoteo 3:1-4) An kadonongan hale sa itaas matoninong, makatanosan. An mga an hiro nagigin nang ugale na may katagasan na paninindogan sa gusto maninigong kumuyog sa hatol ni Pablo sa mga taga-Filipos na ‘dai maggibo nin ano man huli sa kapalangkawan.’—Filipos 2:3.

16. Paano an hatol ni Pablo sa librong Filipos nakatatabang sato na mahale an kapalangkawan?

¹⁶ Sa surat man sanang iyan, si Pablo nagsasadol na kita maninigo na, “sa kapakumbabaan nin pag-isip,” odok na ‘ibilang an iba na mas halangkaw kisa sato.’ Ini an kabaliktaran nin kapalangkawan. An maygurang na Kristiano dai inienot sa isip an pagpirit kan sadiri niang mga ideya, pagtahob sa kasopganan, o pagprotehir sa sadiri niang posisyon asin autoridad. Ini tumang sa sadol ni Pablo na ‘magrisa, bako sanang sa personal na interes sa saindong sadiri, kundi siring man sa personal na interes kaidto man na iba.’—Filipos 2:4; 1 Pedro 5:2, 3, 6.

Matoninong na mga Tataramon

17. Anong salang paggamit sa dila an puwedeng makaraot sa katoninongan kan kongregasyon?

¹⁷ An saro na nagsusunod sa katoninongan nangorognang maingat sa paggamit nia nin dila. Si Santiago nagpapatanid: “An dila sarong sadit na kabtang alagad nananagsag nin darakulang bagay. Uya! Saditon sanang kalayo an kaipuhan tanganing masolo an mahiwason na kadlagan!” (Santiago 3:5) An nakadadanyar na tsismis, pagtatsar sa iba kun nakatalikod sinda, daing kabootan asin maringis na mga tataramon, paggumodgumod asin pagrereklamo, saka bakong sadiosan na pag-omaw para sa personal na bentaha—ini gabos mga gibo nin laman na nakararaot sa katoninongan kan banwaan nin Dios.—1 Corinto 10:10; 2 Corinto 12:20; 1 Timoteo 5:13; Judas 16.

18. (a) Sa kaso nin dai tinutuyong salang paggamit sa dila, ano an tamang gibohon kan gabos na kalabot? (b) Kun an kaanggotan nagpapangyari sa saro na makataram nin makolog, ano an reaksion nin maygurang na mga Kristiano?

¹⁸ Totoo, sinabi ni Santiago: “An dila, mayo ni saro sa katawohan na nakakamanso kaiyan.” (Santiago 3:8) Minsan an maygurang na mga Kristiano kun beses may nasasabi na odok nindang pinagbabasolan pagkatapos. Kita gabos naglalaom na patatawadon kita nin iba sa siring na mga sala kun paanong pinatatawad niato sinda. (Mateo 6:12) Kun beses an matarom na pagputok nin kaanggotan puwedeng magpaluwas nin nakakokolog na mga tataramon. Dangan, an parapatoninong makakagirumdom na “an simbag, kun mahoyo, nakapararayo nin kaanggotan, tara an tataramon na makolog nakapaaanggot.” (Talinhaga 15:1) Sa parate, sia kaipuhan na sanang guminhawa nin hararom asin magsayumang simbagon nin orog pang anggot na mga tataramon an anggot na mga tataramon. Dangan, kun luminipot na an mga payo, an maheherakon na parapatoninong tataong lingawan an mga bagay na isinabi sa kainitan nin payo. Asin an mapakumbabang Kristiano tatao kun paano mahagad nin dispensasyon asin pagmamaigotan na paomayan an ano man na lugad na naginibo nia. Tanda nin moral na kosog an makapagsabi nin sadiosan, “Patawada ako.”

19. Ano an nanonodan niato ki Pablo asin Jesus manongod sa kun paano matao nin hatol?

¹⁹ An dila tibaad kaipuhan na gamiton sa paghatol sa iba. Si Pablo sinagwe sa publiko si Pedro kan ini gumawe nin sala sa Antioquia. Asin si Jesus nagtao nin makosog na hatol sa saiyang mga mensahe sa pitong kongregasyon. (Galacia 2:11-14; Kapahayagan, kapitulo 2, 3) Kun pag-aadalan niato an mga halimbawang ini, manonodan niato na an hatol dai maninigong sobra kahoyo kaya nawara na logod an punto. Pero, si Jesus asin Pablo bakong maisog o maringis. An hatol ninda bakong paluwasan kan sainda mismong mga pagkabigo. Sinda tunay na naghihingoa na tabangan an saindang mga tugang. Kun marisa kan naghahatol na dai nia biyong napopogolan an saiyang dila, tibaad booton nia na pumondo asin magpalipot nguna nin kadikit bago magtaram. Ta kun dai, tibaad makataram sia nin maisog asin gikanan nin problemang mas grabe kisa pinagmamaigotan niang resolberan.—Talinhaga 12:18.

20. Ano an maninigong gumiya sa gabos na sinasabi niato sa o manongod sa satong mga tugang na lalaki asin babae?

²⁰ Arog kan nasabi na, an katoninongan asin pagkamoot konektadong marhay bilang mga bunga kan espiritu. Kun an sinasabi niato sa satong mga tugang—o manongod sa sainda—perming nagpaparisa kan satong pagkamoot sa sainda, kun siring iyan makakokontribuwir sa katoninongan kan kongregasyon. (Juan 15:12, 13) An satong mga tataramon dapat na “igwa nin kabootan, na tinimplahan nin asin.” (Colosas 4:6) Maninigo na iyan managom, sabi ngani, na nakapupukaw sa puso. Si Jesus nagsadol: “Magkaigwa kamo nin asin sa saindo man sana, asin papagdanayon an katoninongan sa tahaw nindo.”—Marcos 9:50.

“Giboha an Bilog Nindong Makakaya”

21. Ano an risa manongod sa banwaan nin Dios sa saindang semanal na mga pagtiripon asin sa panahon nin mga asamblea asin kombension?

²¹ An salmista nagsurat: “Uya! Kanigoan karahay asin kanigoan kaogma na an magturugang mag-ontok na sararo!” (Salmo 133:1) Tunay, naoogma kitang makaibanan an satong mga tugang, nangorogna sa satong semanal na mga pagtiripon asin sa mga asamblea patin darakulang kombension. Sa siring na mga panahon an katoninongan risa pati kan mga tagaluwas.

22. (a) Anong falsong katoninongan an hohonaon nin mga nasyon na saindang naaabot sa dai na mahahaloy, na madara sa ano? (b) Sa anong tunay na katoninongan masagkod an tipan nin Dios sa katoninongan?

²² Sa dai na mahahaloy hohonaon nin mga nasyon na sinda nagkakaigwa nin katoninongan na mayo si Jehova. Alagad mantang sinasabi ninda, “Katoninongan asin katiwasayan!” an biglang pagkalaglag maabot sa gabos na mayo nin pakipagkatoninongan sa Dios. (1 Tesalonica 5:3) Pakalihis kaiyan, an dakulang Prinsipe nin Katoninongan magpapadagos sa pagpaomay sa katawohan gikan sa kapahapahamak na mga resulta kan orihinal na pagkawara kan pakipagkatoninongan nin tawo sa Dios. (Isaias 9:6, 7; Kapahayagan 22:1, 2) Dangan, an tipan nin Dios sa katoninongan magbubunga nin katrangkilohan na lakop sa kinaban. Pati an mga hayop sa kadlagan makakaeksperyensia nin kapahingaloan sa pag-iiriwal.—Salmo 37:10, 11; 72:3-7; Isaias 11:1-9; Kapahayagan 21:3, 4.

23. Kun namomotan niato an paglaom na matoninong na bagong kinaban, ano an maninigo niatong gibohon ngonyan?

²³ Magigin mamurawayon nanggad iyan na panahon! Kamo daw galagang naghahalat dian? Kun iyo, “sunoda nindo an katoninongan sa kaibanan nin gabos na tawo.” Hanapon an pakipagkatoninongan ngonyan sa saindong mga tugang, asin nangorogna ki Jehova. Iyo, “mantang naghahalat kamo kan mga bagay na ini, giboha an bilog nindong makakaya na sa katapustapusi makua niang daing digta asin dai nin kanawayan patin nasa katoninongan.”—Hebreo 12:14; 2 Pedro 3:14.

Nagigirumdoman daw Nindo?

◻ Ano an puwedeng makaraot sa pakipagkatoninongan niato ki Jehova?

◻ Anong klaseng mga dai pagkasinabotan an tibaad kaipuhan na resolberan sa kongregasyon?

◻ Anong probisyon an ginibo ni Jehova tanganing matabangan kita na hanapon an katoninongan asin sunodon iyan?

◻ Anong makalaman na mga kaisipan an puwedeng rumaot sa katoninongan kan kongregasyon, asin paano niato iyan mapaglalabanan?

[Retrato para sa pahina 10]

Abunda an katoninongan sa tahaw kan mga tinokdoan ni Jehova

[Retrato para sa pahina 12]

Kanigoan karahay kan katoninongan nin magturugang na naglilingkod na may pagkasararo!