An Gabos Magigin Talingkas

“Ibinibilang ko na an mga pagdusa sa presenteng kapanahonan daing ano man na halaga kun ikokomparar sa kamurawayan na ihahayag sa sato. Huli ta an galagang pag-antisipar kan mga linalang naghahalat sa paghahayag kan mga aki nin Dios. Huli ta an mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios. Huli ta kita nakakaaram na an gabos na linalang padagos na nag-aaragrangay asin nagtitios nin kolog sagkod ngonyan.”—ROMA 8:18-22.

SA KABTANG na ini kan saiyang surat sa mga Kristiano sa Roma, marahayon an pagkasumaryo ni apostol Pablo kan dahelan kun taano an buhay ta mayo nin tunay na katalingkasan asin parateng gayo na nakamamate nin kadaihan nin halaga asin kolog. Ipinaliliwanag man nia kun paano ta makakamtan an tunay na katalingkasan.

“An mga Pagdusa sa Presenteng Kapanahonan”

Dai pinasasadit ni Pablo “an mga pagdusa sa presenteng kapanahonan” kun sinasabi nia na an mga iyan “daing ano man na halaga kun ikokomparar sa kamurawayan na ihahayag sa sato.” Durante kan panahon ni Pablo siring man kan huri, nagdusang marhay an mga Kristiano sa maringis na totalitaryong pamamahala kan mga autoridad na Romano, na daing pagmakolog sa mga diretso nin tawo. Kan oras na naniwala an Roma na an mga Kristiano kaiwal kan Estado, sinda may kabangisan na inapi kaiyan. An sabi kan historyador na si J. M. Roberts: “Dakol na Kristiano sa kabisera [Roma] an tunay nanggad na nagadan sa makababaldeng paagi sa estadio o sinolo na buhay.” (Shorter History of the World) Manongod sa mga biktimang ini kan paglamag ni Nero, an saro pang bareta nagsasabi: “An nagkapira ipinako sa krus, an nagkapira pinatos nin mga anit nin mga hayop asin linapag nin mga ayam, an nagkapira linahidan nin alkitran asin sinolo tanganing magserbing mga karaba kun banggi.”—New Testament History, ni F. F. Bruce.

An enot na mga Kristianong idto sierto na gusto kutana nin katalingkasan sa siring na pan-aapi, alagad habo nindang lapason an mga katokdoan ni Jesu-Cristo tanganing makamit iyan. Halimbawa, sinda nagdanay na biyong neutral sa paglalaban sa pag-oltanan kan namamahalang mga autoridad na Romano asin kan Judiong mga parapakilaban para sa katalingkasan na arog kan mga Zealot. (Juan 17:16; 18:36) Para sa mga Zealot, “an orolay manongod sa paghalat sa itinalaan na panahon nin pag-interbenir nin Dios bakong iyo an hinahagad kan presenteng krisis.” An kinakaipuhan, sabi ninda, iyo an “madahas na paghiro tumang sa kaiwal,” an Roma. (New Testament History) Iba an nasa isip kan enot na mga Kristiano. Para sa sainda an “paghalat sa itinalaan na panahon nin pag-interbenir nin Dios” iyo an solamenteng realistikong opsion. Kombensido sinda na daing iba kundi an pag-interbenir nin Dios an permanenteng matapos sa “mga pagdusa sa presenteng kapanahonan” asin matao nin tunay, nagdadanay na katalingkasan. (Miqueas 7:7; Habacuc 2:3) Pero bago niato pag-olayan kun paano iyan mangyayari, siyasaton ta kun taano ta primero “an mga linalang ipinasakop sa kasayangan.”

“Ipinasakop sa Kasayangan”

Digdi an terminong “linalang,” an sabi ni Benjamin Wilson sa The Emphatic Diaglott, dai nangangahulogan kan “mga hayop asin daing buhay na mga linalang” siring kan isinusuherir nin nagkapira kundi, imbes, “an bilog na katawohan.” (Ikomparar an Colosas 1:23.) Iyan nanonongod sa bilog na pamilya nin tawo—kita gabos na nagmamawot nin katalingkasan. Kita “ipinasakop sa kasayangan” huli sa mga ginibo kan satong orihinal na mga magurang. “Bakong sa sadiring boot” niato o bilang resulta nin personal na pagpili nin indibiduwal kaya nangyari ini. Minana ta an satong situwasyon. Basado sa punto de vista kan Kasuratan, sala si Rousseau kan sabihon nia na “an tawo namundag na talingkas.” An lambang saro sa sato namundag sa pagkaoripon sa kasalan asin pagkabakong sangkap, inooripon, sabi ngani, nin sarong palakaw na pano nin pagkadiskontento asin kasayangan.—Roma 3:23.

Taano ta napasiring kaini? Huli ta an satong orihinal na mga magurang, si Adan asin Eva, gustong magin “arog nin Dios,” na magkaigwa nin biyong pagpili kan gusto, na sinda mismo an nagdedesisyon kun ano an marahay asin maraot. (Genesis 3:5) Inignoro ninda an sarong mahalagang marhay na bagay manongod sa katalingkasan. Solamente an Kaglalang an puedeng magkaigwa nin absolutong katalingkasan. Sia an Unibersal na Soberano. (Isaias 33:22; Kapahayagan 4:11) An katalingkasan nin tawo dapat na mangahulogan nin katalingkasan na may mga limitasyon. Iyan an dahelan kaya inenkaminar ni disipulo Santiago an mga Kristiano kaidtong saiyang kaaldawan na sinda pasakop sa “sangkap na ley para sa katalingkasan.”—Santiago 1:25.

Tama sanang pinalayas ni Jehova si Adan asin Eva sa saiyang unibersal na pamilya, asin nagadan sinda bilang resulta. (Genesis 3:19) Alagad kumusta man an saindang mga gikan? Minsan ngani an ikakapamana sana ninda ngonyan iyo an pagkabakong sangkap, kasalan, asin kagadanan, may pagkaherak na tinogotan pa sinda ni Jehova na mangaki. Kaya “an kagadanan nakalakop sa gabos na tawo.” (Roma 5:12) Sa sentidong iyan an mga linalang “ipinasakop [nin Dios] sa kasayangan.”

An “Paghahayag kan mga aki nin Dios”

An mga linalang ipinasakop ni Jehova sa kasayangan “basado sa paglaom” na pag-abot nin panahon an katalingkasan ibabalik sa pamilya nin tawo paagi sa mga aktibidad kan “mga aki nin Dios.” Sairisay ining “mga aki nin Dios”? Sinda mga disipulo ni Jesu-Cristo na, arog kan iba pang “mga linalang” na tawo, namundag na oripon nin kasalan asin pagkabakong sangkap. Paagi sa pagkamundag sinda mayo nin lehitimong lugar sa malinig, sangkap na unibersal na pamilya nin Dios. Alagad may pambihirang ginigibo si Jehova para sa sainda. Paagi sa pantubos na atang ni Jesu-Cristo, sinda pinatatalingkas Nia sa pagkaoripon sa minanang kasalan asin ipinahahayag sindang “matanos,” o malinig sa espirituwal. (1 Corinto 6:11) Dangan inaampon nia sinda bilang “mga aki nin Dios,” na ibinabalik sinda sa saiyang unibersal na pamilya.—Roma 8:14-17.

Bilang inampon na mga aki ni Jehova, sinda magkakaigwa nin mamuraway na pribilehio. Sinda magigin “mga saserdote kan satuyang Dios, asin sinda mamamahala bilang mga hade sa daga” kaiba ni Jesu-Cristo bilang kabtang kan langitnon na Kahadean, o gobyerno, nin Dios. (Kapahayagan 5:9, 10; 14:1-4) Ini gobyerno na marigon na napapasikad sa mga prinsipyo nin katalingkasan asin hustisya—bakong sa pan-aapi asin karingisan. (Isaias 9:6, 7; 61:1-4) Sinasabi ni apostol Pablo na an mga aking ini nin Dios kairiba ni Jesus, an haloy nang ipinanugang ‘banhi ni Abraham.’ (Galacia 3:16, 26, 29) Bilang siring, sinda igwa nin mahalagang marhay na papel sa pag-otob sa sarong panuga nin Dios sa saiyang katood na si Abraham. An sarong kabtang kan panugang iyan iyo na paagi sa banhi (o, gikan), ni Abraham “an gabos na nasyon sa daga magbebendisyon nanggad kan saindang sadiri.”—Genesis 22:18.

Anong bendisyon an itinatao ninda sa katawohan? An mga aki nin Dios may kabtang sa pagpatalingkas sa bilog na pamilya nin tawo sa grabeng mga epekto kan kasalan ni Adan asin sa pagbalik kan katawohan sa pagkasangkap. An mga tawo “hale sa gabos na nasyon asin tribo asin banwaan” puedeng magbendisyon kan saindang sadiri paagi sa paggibo nin pagtubod sa pantubos na atang ni Jesu-Cristo asin paagi sa pagpasakop sa maboot na pamamahala kan saiyang Kahadean. (Kapahayagan 7:9, 14-17; 21:1-4; 22:1, 2; Mateo 20:28; Juan 3:16) Paagi kaini “an gabos na linalang” magkakamit giraray kan “mamuraway na katalingkasan kan mga aki nin Dios.” Ini dai magigin an klase nin limitado, temporaryong politikal na katalingkasan kundi, imbes, katalingkasan sa gabos na bagay na nagin dahelan nin kolog asin kapurisawan sa pamilya nin tawo poon pa kan isikwal ni Adan asin Eva an soberaniya nin Dios. Bakong makangangalas na nasabi ni apostol Pablo na “an mga pagdusa sa presenteng kapanahonan daing ano man na halaga” kun ikokomparar sa mamuraway na paglilingkod na gigibohon kan mga fiel!

Noarin mapoon an “paghahayag kan mga aki nin Dios”? Dai nang gayo mahahaloy poon ngonyan, kun liwanagon na ni Jehova sa gabos kun sairisay an mga aki nin Dios. Mangyayari ini kun an “mga aking” ini, na binuhay na liwat sa rona nin mga espiritu, makikabtang na ki Jesu-Cristo sa paglinig sa dagang ini kan karatan asin pan-aapi sa ralaban nin Dios na Har–Magedon. (Daniel 2:44; 7:13, 14, 27; Kapahayagan 2:26, 27; 16:16; 17:14; 19:11-21) Naheheling ta sa palibot niato an kadakol na ebidensia na kita nasa poro nang marhay kan “huring mga aldaw,” an panahon na matatapos an halawig na pagtogot nin Dios sa pagrebelde asin sa ibinunga kaiyan na karatan.—2 Timoteo 3:1-5; Mateo 24:3-31.

Iyo, totoo, siring kan sabi ni apostol Pablo, na “an gabos na linalang padagos na nag-aaragrangay asin nagtitios nin kolog sagkod ngonyan”—alagad dai na mahahaloy pang marhay. Maheheling kan minilyon na nabubuhay ngonyan an “pagbabalik kan gabos na bagay na isinabi nin Dios paagi sa ngoso kan saiyang banal na mga propeta kan suanoy na panahon,” kabale an pagbalik kan katoninongan, katalingkasan, asin hustisya sa bilog na pamilya nin tawo.—Gibo 3:21.

Tunay na Katalingkasan sa Katapustapusi

Ano an dapat nindong gibohon tanganing kamtan an “mamuraway na katalingkasan [na ini] kan mga aki nin Dios”? Si Jesu-Cristo nagsabi: “Kun kamo magdanay sa sakong tataramon, kamo tunay na sakong mga disipulo, asin mamimidbid nindo an katotoohan, asin an katotoohan mapatalingkas sa saindo.” (Juan 8:31, 32) Iyan an liabe sa katalingkasan—pakanood dangan pagkuyog sa mga pagboot asin katokdoan ni Cristo. Ini nagtatao nin sarong sokol nin katalingkasan maski sa ngonyan. Sa harani nang ngapit, iyan matao nin lubos na katalingkasan sa irarom kan pamamahala ni Cristo Jesus. An madonong na gibohon iyo na aramon an “tataramon” ni Jesus paagi sa pag-adal sa Biblia. (Juan 17:3) Arog kan enot na mga Kristiano, aktibong makiasosyar sa kongregasyon kan tunay na mga disipulo ni Cristo. Sa paggibo kaiyan, makikinabang kamo sa nakapatatalingkas na mga katotoohan na itinatao ni Jehova paagi sa saiyang organisasyon ngonyan.—Hebreo 10:24, 25.

Mantang “naghahalat sa paghahayag kan mga aki nin Dios,” puede nindong pataluboon an kompiansa ni apostol Pablo sa nagpoprotehir na pag-ataman asin pagsuportar ni Cristo, dawa kun an mga pagdusa asin inhustisya garo baga dai makaya. Pakatapos na ipaliwanag an paghahayag kan mga aki nin Dios, si Pablo naghapot: “Siisay an mapasuhay sa sato sa pagkamoot kan Cristo? An kahorasaan daw o kasakitan o paglamag o gutom o kahubaan o panganib o minasbad?” (Roma 8:35) Siempre, an mga Kristiano kaidtong kaaldawan ni Pablo, kun gagamiton an mga tataramon ni Rousseau, “nakakadena” pa sa laen-laen na mapan-aping puersa. Sinda “ginagadan sa bilog na aldaw” siring sa “mga karnero na bobonoon.” (Roma 8:36) Tinogotan daw ninda iyan na makapagabat sa sainda?

“Al kontraryo,” an isinurat ni Pablo, “sa gabos na bagay na ini kita biyong nanggagana paagi sa saiya na namoot sa sato.” (Roma 8:37) Nanggagana sa ibong kan gabos na kinaipuhan na tagalan kan enot na mga Kristiano? Taano man? “Ako kombensido,” an sabi nia bilang simbag, “na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang makapasusuhay sa sato hale sa pagkamoot nin Dios na yaon dian ki Cristo Jesus na satong Kagurangnan.” (Roma 8:38, 39) Kamo man puedeng ‘manggana’ sa ano man na ‘kahorasaan o kasakitan o paglamag’ na tibaad kaipuhan nindong tagalan mientras tanto. Iginagarantiya kan pagkamoot nin Dios na sa dai na mahahaloy—dai na nanggad mahahaloy poon ngonyan—kita “patatalingkason sa [gabos na] pagkaoripon . . . asin magkakaigwa kan mamuraway na katalingkasan kan mga aki nin Dios.”

[Mga retrato sa pahina 6]

“An gabos na linalang padagos na nag-aaragrangay asin nagtitios nin kolog sagkod ngonyan”

[Retrato sa pahina 7]

‘An mga linalang patatalingkason sa gabos na pagkaoripon asin magkakaigwa kan mamuraway na katalingkasan kan mga aki nin Dios’