Magpagiya ki Jehova Pasiring sa Tunay na Katalingkasan

‘Maghiling sa sangkap na katogonan nin libertad.’—SANT. 1:25.

IKAKAPALIWANAG DAW NINDO?

Anong katogonan an minagiya sa tunay na katalingkasan, asin sairisay an nakikinabang sa katogonan na iyan?

Ano an sekreto tanganing magkaigwa nin tunay na katalingkasan?

Anong katalingkasan an makakamtan kan gabos na nagdadanay sa dalan pasiring sa buhay?

1, 2. (a) Ano an nangyayari sa mga katalingkasan kan kinaban, asin taano? (b) Anong katalingkasan an nakatagama sa mga lingkod ni Jehova?

NABUBUHAY kita sa panahon na nag-oorog an kahanaban, katampalasanan, asin kadahasan. (2 Tim. 3:1-5) Huli kaiyan, an mga gobyerno naggigibo nin dagdag pang mga ley, pinapakosog an puersa kan pulisiya, asin nagbubugtak nin elektronikong kagamitan para sa pagmanman. Sa nagkapirang nasyon, may mga siudadano na nagpoprobar na dugangan an saindang seguridad paagi sa pagbugtak nin mga aparato para sa alarma sa harong ninda, saka nin dagdag na mga barat asin kudal na de kuryente pa ngani. Dakol an habong magluwas kun banggi o pakawaton sa luwas an saindang mga aki na mayong nagbabantay—aldaw man o banggi. Malinaw nanggad, nawawara na an katalingkasan, asin posibleng marhay na magpapadagos iyan.

² Sa hardin nin Eden kaidto, pinalataw ni Satanas na an pagigin independiente ki Jehova iyo an liabe sa tunay na katalingkasan. Mapangraot asin dakulaon nanggad na kaputikan iyan! Tunay nanggad, mientras na orog na binabaliwala nin mga tawo an moral asin espirituwal na mga pamantayan nin Dios, orog man na nagsasakit an sosyedad sa kabilogan. Nakakaapektar man sa sato bilang mga lingkod ni Jehova an naggagrabeng kamugtakan na ini. Minsan siring, igwa kita nin paglaom na mahiling an katapusan kan pagkaoripon kan katawohan sa kasalan asin kalapaan, saka makamtan an inaapod kan Biblia na “mamurawayon na katalingkasan kan mga aki nin Dios.” (Roma 8:21, BPVa) Sa katunayan, pinonan na ni Jehova na andamon an saiyang mga lingkod para sa katalingkasan na iyan. Sa anong paagi?

 3. Anong katogonan an itinao ni Jehova sa mga parasunod ni Cristo, asin anong mga hapot an pag-oolayan niato?

³ An simbag yaon sa inaapod kan kagsurat sa Biblia na si Santiago na ‘sangkap na katogonan nin libertad’ o katalingkasan. (Basahon an Santiago 1:25.) Sa ibang mga bersion kan Biblia, an mga tataramon na iyan trinadusir na ‘katogonan na nagtatao nin katalingkasan’ (BPV) asin “tunay na ley nin katalingkasan” (An Banal na Biblia). Siempre, sa parate, an ley iinaasosyar nin mga tawo sa mga restriksion, bakong sa katalingkasan. Kun siring, ano an ‘sangkap na katogonan nin libertad’? Asin paano kita pinapatalingkas kan katogonan na iyan?

AN KATOGONAN NA NAGPAPATALINGKAS SA SATO

 4. Ano an ‘sangkap na katogonan nin libertad,’ asin sairisay an nakikinabang dian?

⁴ An ‘sangkap na katogonan nin libertad’ dai nanonongod sa Ley ni Moises, huling ihinayag kan Ley an mga paglapas asin inotob iyan ni Cristo. (Mat. 5:17; Gal. 3:19) Kun siring, anong katogonan an pinapanongdan ni Santiago? An nasa isip nia iyo “an katogonan ni Cristo,” na inaapod man na “katogonan nin pagtubod” asin “ley nin sarong talingkas na banwaan.” (Gal. 6:2; Roma 3:27; Sant. 2:12, NW) Kaya, kaiba “sa sangkap na katogonan” an gabos na kahagadan ni Jehova sa sato. Nakikinabang dian an linahidan na mga Kristiano sagkod an ‘ibang mga karnero.’—Juan 10:16.

 5. Taano ta an katogonan nin katalingkasan dai nakakapagabat?

⁵ Bakong arog kan mga kodigo nin ley nin dakol na nasyon, an “sangkap na katogonan” bakong komplikado ni nakakapagabat kundi kompuesto nin simpleng mga togon asin pundamental na mga prinsipyo. (1 Juan 5:3) ‘An sakal ko marahay, asin an pasan ko magian,’ an sabi ni Jesus. (Mat. 11:29, 30) Saro pa, an “sangkap na katogonan” dai nangangaipo nin halabang lista nin mga restriksion, o mga penalidad, huling iyan nakabase sa pagkamoot asin nakaukit sa isip saka puso, bako sa mga tablang gapo.—Basahon an Hebreo 8:6, 10.

KUN PAANO KITA PINAPATALINGKAS KAN “SANGKAP NA KATOGONAN”

6, 7. Ano an masasabi niato sa mga pamantayan ni Jehova, asin taano ta nakakapatalingkas an katogonan nin katalingkasan?

⁶ Paagi sa mga limitasyon na ibinugtak ni Jehova sa intelihenteng mga linalang nia, sinda nakikinabang asin napoprotektaran. An sarong halimbawa iyo an mga ley nin naturalesa na nagkokontrol kan enerhiya asin pisikal na mga bagay. Dai nagrereklamo an mga tawo na inaapi sinda kan mga ley na iyan. Imbes, inaapresyar ninda an mga iyan, huling aram ninda na an mga ley nin naturalesa kaipuhan para sa ikakarahay ninda. Kaagid kaiyan, an mga pamantayan ni Jehova sa moral asin espirituwal, na mababanaag “sa sangkap na katogonan” kan Cristo, para sa kapakinabangan nin tawo.

⁷ Apuera sa pagigin proteksion, tinotogotan kita kan katogonan nin katalingkasan na panigoan an gabos na tamang kamawotan niato na dai nadadanyaran an satong sadiri o napapakiaraman an mga deretso asin katalingkasan nin iba. Kun siring, an sekreto tanganing magin tunay na talingkas—na kaya tang gibohon an minamawot niato—iyo na magkaigwa nin tamang mga kamawotan na kaoyon kan personalidad asin mga pamantayan ni Jehova. Sa ibang pagtaram, kaipuhan niatong manodan na mamotan an namomotan ni Jehova asin ikaongis an ikinakaongis nia. Tinatabangan kita kan katogonan nin katalingkasan na gibohon iyan.—Amos 5:15.

8, 9. Anong mga pakinabang an nakakamtan kan mga nagsusunod sa katogonan nin katalingkasan? Iilustrar.

⁸ Mantang kita bakong perpekto, nakikipaglaban kita tanganing makontrol an salang mga kamawotan. Alagad, mantang maimbod niatong sinusunod an katogonan nin katalingkasan, napapatalingkas na kita dawa ngonyan. Sa pag-ilustrar: An bagong tinotokdoan sa Biblia na si Jay adikto sa sigarilyo. Kan nanodan nia na an saiyang bisyo ikinakaanggot nin Dios, kinaipuhan niang magdesisyon. Padagos daw siang masunod sa kamawotan kan saiyang laman o masunod sia ki Jehova? May kadonongan na pinili niang paglingkodan an Dios, dawa ngani hinahanaphanap kan hawak nia an nikotina. Ano an namatean nia pakapanggana nia sa saiyang bisyo? “Pambihirang katalingkasan asin labi-labing kagayagayahan an namatean ko,” an sinabi nia pagkatapos.

⁹ Sa eksperyensia ni Jay nanodan nia na an mga katalingkasan kan kinaban, na pinapabayaan an mga tawo na ‘magparaisip dapit sa laman,’ sa katunayan nangongoripon, mantang an mga katalingkasan na itinatao ni Jehova, na nangangahulogan nin ‘pag-isip dapit sa espiritu,’ nagpapatalingkas saka nagbubunga nin ‘buhay asin katoninongan.’ (Roma 8:5, 6) Saen si Jay nagkua nin kosog tanganing mapangganahan an nakakaoripon na bisyo nia? Bako sa sadiri nia kundi sa Dios. “Regular akong nag-aadal kan Biblia, namimibi na tawan nin banal na espiritu, asin naghahagad kan mamomoton na tabang na gikan sa boot na itinatao sa sako kan Kristianong kongregasyon,” an sabi nia. An iyo man sanang mga probisyon makakatabang sa sato gabos na magin tunay na talingkas. Hilingon niato kun paano.

MAGHILING SA TATARAMON NIN DIOS

10. Ano an boot sabihon kan ‘paghiling’ sa katogonan nin Dios?

¹⁰ An Santiago 1:25 nagsasabi: ‘An naghihiling sa sangkap na katogonan nin libertad asin nagdadanay dian bebendisyonan sa saiyang gibo.’ An orihinal na tataramon sa Griego na trinadusir na “naghihiling” nangangahulogan na “magduko tanganing hilingon,” na nagpaparisa nin dakulang paghihingoa. Iyo, kun gusto niatong maimpluwensiahan an satong isip asin puso kan katogonan nin katalingkasan, dapat tang gibohon an kabtang niato paagi sa mahigos na pag-adal kan Biblia saka mapagngayongayong paghorophorop sa binabasa ta.—1 Tim. 4:15.

11, 12. (a) Paano idinoon ni Jesus na kaipuhan niatong isabuhay an katotoohan? (b) Arog kan iinilustrar sa enotan, anong peligro an dapat na likayan nangorogna kan mga hoben?

¹¹ Kasabay kaiyan, dapat kitang ‘magdanay,’ o magtagal, sa pag-aplikar kan Tataramon nin Dios, sa siring isinasabuhay niato an katotoohan. Nagpahayag si Jesus nin kaagid na kaisipan kan sinabi nia sa mga nagtutubod sa saiya: ‘Kun magdanay kamo sa sakong mga tataramon, kamo mga tunay kong disipulo; asin maaaraman nindo an katotoohan, asin bubutasan [papatalingkason] kamo kan katotoohan.’ (Juan 8:31, 32) Segun sa sarong reperensia, an termino digdi na “maaaraman” nangangahulogan man na magkaigwa nin pagpapahalaga huli ta “an ‘naaraman’ mahalaga o importante sa nakaaram.” Sa siring, ‘naaaraman’ niato an katotoohan sa pinakalubos na paagi kun isinasabuhay niato iyan. Dangan tama sanang makakasabi kita na “an tataramon nin Dios” iyo ‘an naggigibo’ sa sato, na minomolde an personalidad niato tanganing mas maarog niato an satong langitnon na Ama.—1 Tes. 2:13.

¹² Hapoton an saimong sadiri, ‘Talaga daw na aram ko an katotoohan? Isinasabuhay ko daw iyan? O nagmamawot pa man giraray ako kan “mga katalingkasan” kan kinaban?’ Sa paggirumdom kan saiyang pagkahoben, sarong sister na pinadakula nin Kristianong mga magurang an nagsurat: “Kun nagdakula ka sa katotoohan, yaon pirme si Jehova, sabi ngani. Alagad sa situwasyon ko, dai ko man talaga sia namidbid. Nungka kong nanodan na ikaongis an ikinakaongis nia. Dai man lamang ako naniwala na an ginigibo ko mahalaga sa saiya. Saka nungka kong nanodan na dumolok sa saiya kun namomroblema ako. Nagsarig ako sa sadiri kong pakasabot, na ngonyan aram kong kamangmangan huling mayo akong aram kaidto.” Marahay na sana ta pag-abot nin panahon, narealisar kan sister na talagang sala an kaisipan nia, asin naggibo sia nin darakulang pagbabago. Nagregular payunir pa ngani sia.

NAKAKATABANG AN BANAL NA ESPIRITU NA MAPATALINGKAS KA

13. Paano nakakatabang an banal na espiritu na mapatalingkas kita?

¹³ Sa 2 Corinto 3:17, mababasa niato: ‘Kun saen an espiritu nin Kagurangnan, dian an libertad.’ Paano makakatabang an banal na espiritu sa satong katalingkasan? Kabilang sa iba pang bagay, pinapatalubo kaiyan sa sato an mga kualidad na mahalaga sa katalingkasan—“pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.” (Gal. 5:22, 23, NW) Kun mayo kan mga kualidad na iyan, nangorogna an pagkamoot, dai magigin tunay na talingkas an mga tawo—sarong katunayan na risang-risa sa kinaban ngonyan. Interesante nanggad, pagkasurat kan bunga kan espiritu, sinabi pa ni apostol Pablo: ‘Tumang sa mga siring dai nin katogonan.’ Ano an boot niang sabihon? An bunga kan espiritu nin Dios dai nalilimitaran nin ano man na katogonan, o ley, na makakaolang sa pagtalubo kaiyan. (Gal. 5:18) Total, ano an magigin katuyohan kan siring na ley? Kabotan ni Jehova na pataluboon niato an arog-Cristong mga kualidad sagkod lamang asin ipahiling iyan na mayong kaolangan.

14. Sa anong mga paagi inooripon kan espiritu kan kinaban an mga tawo?

¹⁴ An mga nabibihag kan espiritu kan kinaban asin pinapanigoan an saindang makalaman na mga kamawotan tibaad mag-isip na sinda talingkas. (Basahon an 2 Pedro 2:18, 19.) Minsan siring, kabaliktaran nanggad kaiyan an totoo. Kadakoldakol na reglamento saka regulasyon an kaipuhan tanganing kontrolon an nakakadanyar na mga mawot asin gawe-gawe ninda. ‘An katogonan dai ginibo manongod sa matanos na tawo, kundi manongod sa mga tampalasan asin masinuhay,’ an sabi ni Pablo. (1 Tim. 1:9, 10) Sinda oripon man nin kasalan, na namomotibar na gumibo ‘kan mga mawot nin laman,’ na sarong maringis na kagurangnan. (Efe. 2:1-3) An siring na mga indibiduwal garo man sana mga insekto na pasiring sa mangko na may dugos o tangguli. Huling nadara kan kamawotan ninda, dai na sinda makahale dian.—Sant. 1:14, 15.

PINATALINGKAS MANTANG NASA LAOG KAN KRISTIANONG KONGREGASYON

15, 16. Gurano kahalaga an satong pakikiasosyar sa kongregasyon, asin sa anong mga bagay kita talingkas?

¹⁵ Kan makiasosyar ka na sa Kristianong kongregasyon, dai ka man nag-aplay na magin miembro kaiyan, arog baga sa sarong social club. Imbes, nakabilang ka sa kongregasyon huling dinagka ka ni Jehova. (Juan 6:44) Ano an nagpahiro sa saiya na gibohon iyan? An nahiling daw nia sarong tawong matanos asin may takot sa Dios? “Dai nanggad!” tibaad sabihon mo. Kun siring, ano an nahiling nin Dios? Nahiling nia an sarong puso na andam na sumunod sa saiyang nakakapatalingkas na katogonan, sarong puso na mapasakop sa saiyang maboot na paggiya. Sa laog kan kongregasyon, inataman ni Jehova an saimong puso paagi sa pagpakakan sa saimo sa espirituwal, na pinapatalingkas ka sa mga kaputikan asin superstisyon sa relihion, asin paagi sa pagtokdo sa saimo kun paano papataluboon an arog-Cristong personalidad. (Basahon an Efeso 4:22-24.) Bilang resulta, may pribilehio ka na mapabilang sa solamenteng banwaan sa kinaban na tamang apodon na “talingkas na banwaan.”—Sant. 2:12, NW.

¹⁶ Isip-isipa ini: Natatakot ka daw kun kaiba mo an mga namomoot nin bilog na puso ki Jehova? Pirme ka daw na nagkikiling huli sa pagduda? Mantang nakikipag-olay ka sa laog nin Kingdom Hall, dai mo daw binubutasan an mga gamit mo ta tibaad mawara? Kabaliktaran nanggad! Pamugtak ka asin talingkas. Arog daw kaiyan an mamamatean mo kun yaon ka sa sarong sekular na pagtiripon? Posibleng marhay na dai! Dugang pa, an katalingkasan na nakakamtan mo ngonyan sa banwaan nin Dios panamit pa sana kan katalingkasan sa maabot na panahon.

“MAMURAWAYON NA KATALINGKASAN KAN MGA AKI NIN DIOS”

17. Paano mapapatalingkas an katawohan kun ‘ihayag na an mga aki’ nin Dios?

¹⁷ Kan tinotokar an katalingkasan na itinagama ni Jehova para sa mga lingkod nia sa daga, si Pablo nagsurat: ‘An gabos na linalang naghahalat na ihayag an mga aki’ nin Dios. Dangan sinabi pa nia: ‘An linalang papatalingkason nin Dios tanganing dai na iyan malapa, asin tanganing makahiras sa mamurawayon na katalingkasan kan mga aki nin Dios.’ (Roma 8:19-21, BPV) “An linalang” nanonongod sa katawohan na may daganon na paglaom, an mga makikinabang kun “ihayag” na an linahidan nin espiritu na mga aki nin Dios. An paghahayag na iyan mapoon kun an “mga aki” na ini, na binuhay na liwat pasiring sa langit, makikabtang na ki Cristo sa paghale kan karatan sa daga asin pagligtas sa “dakulang kadaklan” pasiring sa bagong sistema nin mga bagay.—Kap. 7:9, 14.

18. Ano pang katalingkasan an itatao sa makinuyog na katawohan, asin anong katalingkasan an makakamtan ninda sa katapustapusi?

¹⁸ An kinaldang katawohan makakaeksperyensia nin biyong bagong katalingkasan—katalingkasan sa impluwensia ni Satanas asin kan mga demonyo. (Kap. 20:1-3) Dakulang kaginhawahan nanggad iyan! Pagkatapos kaiyan, an 144,000 na kapwa hade asin saserdote ni Cristo magpapadagos sa pagpatalingkas sa katawohan paagi sa luway-luway na pag-aplikar kan mga pakinabang kan atang na pantubos sagkod na biyong mapara an Adanikong kasalan asin pagkabakong perpekto. (Kap. 5:9, 10) Huling nagin maimbod dawa nag-agi nin pagbalo, makakamtan kan mga tawo an mismong perpektong katalingkasan na katuyohan ni Jehova para sa sainda—an “mamurawayon na katalingkasan kan mga aki nin Dios.” Isip-isipa! Dai ka na masasakitan na gibohon an tama sa paghiling nin Dios, huling an saimong hawak, puso, asin isip magigin perpekto na asin lubos nang mababanaag sa saimong personalidad an mga kualidad nin Dios.

19. Ngonyan, ano an dapat niatong padagos na gibohon tanganing magdanay sa dalan pasiring sa tunay na katalingkasan?

¹⁹ Hinahalat mo daw an “mamurawayon na katalingkasan kan mga aki nin Dios”? Kun iyo, togotan an saimong isip asin puso na padagos na maimpluwensiahan kan ‘sangkap na katogonan nin libertad.’ Iyo, mahigos na pag-adalan an Kasuratan. Isabuhay an katotoohan, isapuso iyan. Mamibi na tawan ka nin banal na espiritu. Makinabang nin lubos sa Kristianong kongregasyon asin sa espirituwal na pagkakan na itinatao ni Jehova. Dai pagtogotan si Satanas na dayaon ka, arog kan pagdaya nia ki Eva, na mag-isip na an mga kahagadan nin Dios sobra kaestrikto. Totoo, an Diablo tusong marhay. Alagad arog kan pag-oolayan niato sa sunod na artikulo, dai na kita kaipuhan na ‘maenotan ni Satanas huli ta tatao kita kan saiyang mga palakaw.’—2 Cor. 2:11.

[Nota sa Ibaba]

[Mga Ritrato sa pahina 9]

Makosog pa man daw giraray an pagmawot ko sa “mga katalingkasan” kan kinaban?

[Mga Ritrato sa pahina 9]

Isinasabuhay ko daw an katotoohan?