Kun Taano ta May Kahulogan Para sa Saindo an Pamanggihan kan Kagurangnan

PINONAN ni Jesu-Cristo an Pamanggihan kan Kagurangnan kaidtong ultimong banggi kan saiyang buhay bilang tawo. Huwebes na banggi kaidto, Marso 31, asin si Jesus nagadan kan Biyernes na hapon, Abril 1. Mantang an aldaw sa Judiong kalendaryo poon sa banggi nin sarong aldaw sagkod sa banggi kan sumunod, an Pamanggihan kan Kagurangnan asin an kagadanan ni Jesus pareho nangyari kan Nisan 14, 33 C.E.

Taano ta pinonan ni Jesus an pagkakan na ini? Ano an kahulogan kan tinapay asin arak na ginamit nia? Siisay an maninigong makikabtang? Gurano kaparate na maninigong selebraron an pagkakan na ini? Asin paano iyan puwedeng magkaigwa nin kahulogan para sa saindo?

Taano ta Pinonan?

Manongod sa Pamanggihan kan Kagurangnan, sinabihan ni Jesus an saiyang mga apostol: “Padagos nindong gibohon ini sa paggirumdom sa sako.” Sono sa saro pang traduksion, sia nagsabi: “Gibohon nindo ini bilang girumdoman (sa Ingles, memorial) sa sako.” (1 Corinto 11:​24; The New English Bible) An totoo, an Pamanggihan kan Kagurangnan sa parate inaapod na Memorial kan kagadanan ni Cristo.

Si Jesus nagadan bilang nagdadanay sa integridad na parasuportar sa soberaniya ni Jehova asin kun siring pinatunayan na si Satanas putikon na parabalobagi sa pagsahot na an matanos na mga tawo naglilingkod sana sa Dios huli sa paslong mga motibo. (Job 2:​1-5) An saiyang kagadanan nagpagayagaya sa puso nin Dios.​—Talinhaga 27:11.

Paagi sa saiyang pagkagadan bilang sangkap na tawo, si Jesus ‘itinao man an saiyang kalag bilang pantubos na karibay nin dakol.’ (Mateo 20:28) Sa pagkakasala tumang sa Dios, iwinara kan enot na tawo an sangkap na buhay bilang tawo asin an mga paglaom kaiyan. Alagad ta “an Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Iyo, “an ibinabayad nin kasalan kagadanan, alagad an regalo na itinatao nin Dios daing sagkod na buhay paagi ki Cristo Jesus na satong Kagurangnan.”​—Roma 6:23.

‘Inako Hale sa Kagurangnan’

An mga tataramon ni apostol Pablo nagtatao nin liwanag sa pagselebrar sa kagadanan ni Cristo: “Inako ko hale sa Kagurangnan an itinao ko man sa saindo, na an Kagurangnan na si Jesus kan banggi na sia pasasaloiban nagkua nin tinapay asin, pakapasalamat, binaraak nia iyan asin nagsabi: ‘Ini nangangahulogan kan sakong hawak na manongod sa saindo. Padagos nindong gibohon ini sa paggirumdom sa sako.’ Siring man an ginibo nia sa kopa, pakapamanggi nia, na an sabi: ‘An kopang ini nangangahulogan kan bagong tipan sa puwersa kan sakong dugo. Padagos nindong gibohon ini, sa dayaday na pag-inom nindo kaiyan, sa paggirumdom sa sako.’ Huli ta sa dayaday na pagkakan nindo kan tinapay na ini asin pag-inom kan kopang ini, ibinabalangibog nindo an pagkagadan kan Kagurangnan, sagkod na sia dumatong.”​—1 Corinto 11:​23-26.

Mantang si Pablo dai kaiba ni Jesus asin kan 11 apostol kan Nisan 14, 33 C.E., malinaw na an impormasyon na ini ‘inako hale sa Kagurangnan’ paagi sa ipinasabong na kapahayagan. Pinonan ni Jesus an Memorial “kan banggi na sia pasasaloiban” ni Judas sa relihiyosong mga kaiwal na Judio, na nagtentar sa mga Romano na ipako si Cristo. An mga angay na makikabtang sa emblemang tinapay asin arak gigibohon iyan sa paggirumdom sa saiya.

Selebraron Iyan nin Gurano Kadayaday?

Ano an boot sabihon kan mga tataramon ni Pablo na: “Sa dayaday na pagkakan nindo kan tinapay na ini asin pag-inom kan kopang ini, ibinabalangibog nindo an pagkagadan kan Kagurangnan, sagkod na sia dumatong”? An maimbod na linahidan na mga Kristiano “dayaday” na makikakabtang sa mga emblema kan Memorial sagkod na sinda magadan, na sa huri bubuhayon liwat sa langitnon na buhay. Sa atubangan nin Dios asin kan kinaban, dayaday nindang ibabalangibog sa siring na paagi an saindang pagtubod sa probisyon ni Jehova na atang ni Jesus. Gurano kahaloy? “Sagkod na sia dumatong,” sabi ni Pablo, na malinaw na nangangahulogan na magpapadagos an mga selebrasyon na ini sagkod sa pagdatong ni Jesus sa pag-ako kan saiyang linahidan na mga parasunod sa langit paagi sa pagkabuhay liwat sa panahon kan saiyang “presensia.” (1 Tesalonica 4:​14-17) Kaoyon ini sa mga tataramon ni Cristo sa 11 maimbod na apostol: “Kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”​—Juan 14:3.

Maninigo daw na selebraron aroaldaw o serosemana an kagadanan ni Cristo? Bueno, si Jesus pinonan an Pamanggihan kan Kagurangnan asin ginadan kan Paskua, na nagsiselebrar kan pagkakalda nin Israel sa kaoripnan sa Egipto. An totoo, sia inaapod na “si Cristo na satuyang paskua” ta sia an Kordero na iinatang para sa mga Kristiano. (1 Corinto 5:7) An Paskua siniselebrar nin sarong beses sana kada taon, sa Nisan 14. (Exodo 12:​6, 14; Levitico 23:5) Isinusuherir kaini na an kagadanan ni Cristo maninigong selebraron nin arog kadayaday kan Paskua​—taon-taon, bakong aroaldaw o serosemana.

Sa laog nin nagkapirang siglo an dakol na naghihingakong Kristiano sinilebrar an kagadanan ni Jesus nin sarong beses kada taon. Huli ta ginigibo ninda iyan sa Nisan 14, inapod sindang Quartodecimans, na an boot sabihon “mga makikatorse.” Mapadapit sa sainda, an historyador na si J. L. von Mosheim nagsurat: “An mga Kristiano sa Asia Minor natood na selebraron an sagradong kapiyestahan na ini, na naggigirumdom sa pagpopoon kan pamanggihan kan Kagurangnan, asin sa kagadanan ni Jesu-Cristo, sa panahon na kinakakan nin mga Judio an saindang kordero sa Paskua, sa banggi kan ikakatorseng aldaw kan enot na bulan [Nisan]. . . . Ibinilang ninda an halimbawa ni Cristo na igwa kan puwersa nin sarong pagboot.”

Kahulogan kan mga Emblema

Si Pablo nagsabi na si Jesus “nagkua nin tinapay asin, pakapasalamat, binaraak nia iyan.” An garo kraker na tinapay na idto na gibo sa harina asin tubig na daing lebadura kinaipuhan na baakon bago kakanon. Sa simbolismo kan Biblia, an lebadura nangangahulogan nin kasalan o karatan. Sa pagsadol sa mga Kristianong taga-Corinto na paluwason sa kongregasyon an sarong inmoral na lalaki, si Pablo nagsabi: “Dai nindo aram na an kadikit na lebadura nakapauusbog sa bilog na masa? Halea nindo an daan na lebadura, tangani na kamo mani bagong masa, mantang kamo mayo nin lebadura. Huli ta, sa katotoohan, si Cristo na satuyang paskua iinatang na. Kaya otobon ta an kapiyestahan, bakong sa daan na lebadura, ni sa lebadura nin karatan asin kabikoan, kundi sa daing lebadurang mga tinapay nin sinseridad asin katotoohan.” (1 Corinto 5:​6-8) Kun paanong an kadikit na lebadura nakapauusbog sa bilog na masa nin tinapay, siring man an kongregasyon magigin maramog sa mga mata nin Dios kun dai hahaleon an nakararaot na impluwensia kan makasalan na lalaki. Kaipuhan na haleon ninda an “lebadura” sa tahaw ninda, kun paanong an mga Israelita dai puwedeng magkaigwa nin lebadura sa saindang harong sa panahon kan Kapiyestahan kan mga Tinapay na Mayo nin Lebadura na kasunod kan Paskua.

Mapadapit sa daing lebadurang tinapay sa Memorial, si Jesus nagsabi: “Ini nangangahulogan kan sakong hawak na manongod sa saindo.” (1 Corinto 11:24) An tinapay nagrirepresentar sa sangkap na hawak na laman ni Jesus, na manongod dian si Pablo nagsurat: “Kan [si Jesus] pumadigdi sa kinaban sia nagsabi: ‘“Habo ka nin atang asin dolot, kundi inandaman mo ako nin hawak. Dai ka nag-oyon sa bilog na mga dolot na tinotong asin sa dolot manongod sa kasalan.” Dangan ako nagsabi, “Uya! nagdatong ako (sa balumbon kan libro na isinurat dapit sa sako) sa paggibo kan boot mo, O Dios.”’ . . . Huli kan nasabing ‘kabotan’ kita napakangbanal paagi sa pagdolot kan hawak ni Jesu-Cristo nin makasaro para sa gabos na panahon.” (Hebreo 10:​5-10) An sa tawong sangkap na hawak ni Jesus daing kasalan asin nagserbing pantubos na atang para sa katawohan.​—Hebreo 7:26.

Pakapamibian kan kopa nin daing salak na mapulang arak, si Jesus nagsabi: “An kopang ini nangangahulogan kan bagong tipan sa puwersa kan sakong dugo.” (1 Corinto 11:25) An saro pang traduksion iyo ini: “An kopang ini nangangahulogan kan bagong tipan na rinatipikar kan sakong dugo.” (Moffatt) Kun paanong an dugo nin iinatang na mga baka asin kanding ginibong balido an tipan nin Pagboot sa pag-oltanan nin Dios asin kan nasyon nin Israel, ginibo man na balido kan dugo ni Jesus na pinabolos sa kagadanan an bagong tipan. An pagkasambit sa tipan na iyan minatabang sato na mamidbid an tamang mga makikakabtang sa mga emblema sa Memorial.

Siisay an Maninigong Makikabtang?

An linahidan na mga parasunod ni Jesus, na nasa bagong tipan, tama sanang nakikakabtang sa mga emblema sa Memorial. An tipan na ini ginibo sa pag-oltanan nin Dios asin kan espirituwal na Israel. (Jeremias 31:​31-34; Galacia 6:16) Alagad ta an bagong tipan sa katapustapusi matao nin mga bendisyon sa gabos na makinuyog na tawo, asin puwede kamong makabilang sa mga mag-aako kan mga bendisyon na iyan.

An mga nakikakabtang sa mga emblema sa Memorial dapat na kaiba sa personal na tipan para sa Kahadean na ginibo ni Jesus. Kan pinoponan an pagkakan na ini, sinabihan ni Jesus an saiyang maimbod na mga apostol: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Lucas 22:29) An tipan sa Kahadean na ginibo nin Dios ki Hadeng David nagtokdo sa pagdatong ni Jesus, an saro na maghahade sagkod lamang sa langitnon na Kahadean. An 144,000 na espirituwal na mga Israelita, na makakaiba nia sa paghade, ilinaladawan na nagtitindog sa langitnon na Bukid nin Sion kaiba kan Kordero, si Jesu-Cristo. Pagkabuhaya liwat, sinda maghahade kaiba ni Cristo bilang katabang na mga hade asin saserdote. (2 Samuel 7:​11-16; Kapahayagan 7:​4; 14:​1-4; 20:6) Solamente an mga kaiba sa bagong tipan asin sa personal na pakitipan ki Jesus an tamang makikabtang sa mga emblema kan Pamanggihan kan Kagurangnan.

An espiritu nin Dios nagpapatotoo kaiba kan espiritu nin mga linahidan na sinda mga aki Nia asin kairibang paramana ni Cristo. Si Pablo nagsurat: “An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo, basta kita iribang magtios tangani man kitang iribang mapamuraway.” (Roma 8:​16, 17) An banal na espiritu, o puwersa aktiba, nin Dios minapatubo sa boot nin mga linahidan kan kasiertohan na sinda para sa langitnon na buhay. Ibinibilang ninda na ipinanonongod sa sainda an gabos na sinasabi kan Kasuratan manongod sa langitnon na buhay asin andam sindang isakripisyo an gabos na daganon na bagay, pati an buhay bilang tawo. Minsan ngani magigin magayonon an buhay sa daganon na Paraiso, mayo sinda kan paglaom na iyan. (Lucas 23:43) An segurado asin dai maliliwat na langitnon na paglaom na bakong basado sa falsong relihiyosong mga opinyon nagtatao sainda nin diretso na makikabtang sa mga emblema sa Memorial.

Ikaaanggot ni Jehova kun an saro magpamidbid na inapod na magin langitnon na hade asin saserdote mantang dai man sia nag-ako nin siring na pag-apod. (Roma 9:​16; Kapahayagan 22:5) Ginadan nin Dios si Core huli sa pangahas na paghihingoang magin saserdote. (Exodo 28:​1; Bilang 16:​4-11, 31-35) Kaya, ano kun huli sa makosog na mga emosyon o dating relihiyosong mga ideya an saro salang makikabtang sa mga emblema sa Memorial? Kun siring sia maninigong pumondo sa pakikakabtang asin mapakumbabang arangon an kapatawadan nin Dios.​—Salmo 19:13.

Kun Paano Kamo Apektado

An saro dai kaipuhan na makikabtang sa mga emblema sa Memorial tanganing makinabang sa pantubos na atang ni Jesus asin mag-ako nin buhay na daing sagkod digdi sa daga. Halimbawa, daing ipinaririsa an Biblia na an mga matatakton sa Dios na arog ni Abraham, Sara, Isaac, Rebeca, Booz, Rut, asin David makikakabtang sa mga emblemang ini minsan noarin. Pero sinda asin an gabos pang iba na nagmamawot nin daing sagkod na buhay sa kinaban na ini kaipuhan na tumubod sa Dios asin ki Cristo patin sa probisyon ni Jehova na pantubos na atang ni Jesus. (Juan 3:​36; 14:1) An taonan na pagselebrar kan kagadanan ni Cristo nagsiserbing pagirumdom sa dakulang atang na iyan.

An halaga kan atang ni Jesus ipinaheling kan si apostol Juan magsabi: “Isinusurat ko sa saindo an mga bagay na ini tanganing dai kamo makaginibo nin kasalan. Minsan siring, kun an siisay man makaginibo nin kasalan, igwa kita nin parasorog sa Ama, si Jesu-Cristo, sarong matanos. Asin sia sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.” (1 Juan 2:​1, 2) Masasabi nin linahidan na mga Kristiano na si Jesus “pantubos na atang para sa [saindang] mga kasalan.” Pero, sia atang man para sa mga kasalan kan bilog na kinaban, na minagibong posible kan buhay na daing sagkod para sa makinuyog na katawohan sa Paraisong daga na haranihon na ngonyan!

Sa pagigin presente sa paggirumdom sa kagadanan ni Cristo, makikinabang kamo sa nakapupukaw sa isip na pahayag sa Biblia. Ikapagigirumdom saindo kun gurano an ginibo para sa sato ni Jehova Dios asin ni Jesu-Cristo. Magigin kapakipakinabang sa espirituwal na makitipon sa mga may hararom na pagpahalaga sa Dios asin ki Cristo patin sa pantubos na atang ni Jesus. Tibaad pakosogon kan okasyon an kamawotan nindo na mag-ako kan dai na kutana maninigong kabootan nin Dios, na naggigiya pasiring sa buhay na daing sagkod. Odok niamo kamong iniimbitaran na makitipon sa mga Saksi ni Jehova pagkasolnop kan aldaw sa Abril 6, 1993, sa paggirumdom sa kagadanan ni Jesu-Cristo ta an Pamanggihan kan Kagurangnan puwedeng magkaigwa nin dakulang kahulogan para sa saindo.