LEKSIYON 42
Ano an Sinasabi kan Bibliya Manungod sa Pagigin Daing Agom Asin Pagkaigwa nin Agom?
Sa ibang mga kultura, naniniwala an mga tawo na an pag-agom iyo an makakapaugma sa sarong tawo. Pero bako gabos na may agom maugma, saka bako man gabos na daing agom bakong maugma. An totoo, sinasabi kan Bibliya na an pagigin daing agom saka an pagkaigwa nin agom parehong regalo hali sa Diyos.
1. Ano an mga pakinabang kan pagigin daing agom?
Sinasabi kan Bibliya: “An siisay man na magdesisyon na mag-agom mapaparahay, pero an siisay man na dai mag-agom mas mapaparahay.” (Basahon an 1 Corinto 7:32, 33, 38.) Sa anong mga paagi “mas mapaparahay” an mga daing agom? An mga Kristiyanong daing agom mayo nin aasikasuhon na pangangaipo nin sarong agom. Kaya sa pangkagabsan, mas buwelo sinda. Halimbawa, an iba sa sainda mas napapahiwas an ministeryo sa espesyal na mga paagi, arog kan pagbiyahe sa ibang lugar para maghulit kan maugmang bareta. Urog sa gabos, mas dakul an saindang panahon para mapakusog an saindang relasyon ki Jehova.
2. Ano an mga pakinabang kan pagigin may agom na legal an pag-ibanan?
Arog kan pagigin daing agom, an pagigin may agom igwa man nin marahayon na mga pakinabang. Sinasabi kan Bibliya na “mas marahay an duwa kisa sa saro.” (Eclesiastes 4:9) Totoo ini lalo na sa mga Kristiyano na nagsusunod sa mga prinsipyo kan Bibliya sa saindang pag-ibanan bilang mag-agom. An mga mag-agom na legal an pag-ibanan nangangako na mamumutan, igagalang, asin papahalagahan ninda an kada saro. Huli kaiyan, mas tiwasay sinda kisa sa mga nagli-live-in lang. Asin pag legal an saindang pag-ibanan, nagtatao man iyan nin seguridad sa saindang mga aki.
3. Ano an pagmansay ni Jehova sa relasyon nin mag-agom?
Kan ikasal ni Jehova an inot na lalaki asin babayi, sinabi niya: “Babayaan kan lalaki an saiyang ama saka an saiyang ina asin magdadanay siyang kaibanan kan saiyang agom.” (Genesis 2:24) Gusto ni Jehova na mamutan kan mag-agom an lambang saro asin padagos sindang mag-ibanan sagkod na nabubuhay sinda. An pagsambay an solamenteng rason na itinutugot ni Jehova para sa diborsiyo. Sa sitwasyon na iyan, tinatawan ni Jehova nin deretso an inosenteng agom na magdesisyon kun baga makikipagdiborsiyo siya o dai.a (Mateo 19:9) Dai itinutugot ni Jehova sa mga Kristiyano an poligamya.—1 Timoteo 3:2.
ARAMON PA
Aramon kun paano ka magigin maugma—asin kun paano mo mapapaugma si Jehova—may agom ka man o mayo.
4. Gamiton sa pinakamarahay na paagi an regalo nin pagigin daing agom
Ibinilang ni Jesus na regalo an pagigin daing agom. (Mateo 19:11, 12) Basahon an Mateo 4:23, dangan pag-ulayan an hapot na ini:
Paano ginamit ni Jesus an regalo nin pagigin daing agom para paglingkudan an saiyang Ama asin para tabangan an iba?
Magigin maugma an mga Kristiyano na daing agom kun aarugon ninda si Jesus. I-play an VIDEO, dangan pag-ulayan an hapot.
Sa anong kapaki-pakinabang na mga paagi puwedeng magamit kan mga Kristiyano an saindang pagigin daing agom?
Aram mo daw?
Mayong sinasabi an Bibliya na minimum na edad na puwede nang mag-agom an saro. Pero, dinadagka kaiyan an saro na maghalat sagkod na “lampas na siya sa pagbukad nin pagkahoben,” an panahon na diyan an makusog na seksuwal na pagmati puwedeng makapadipisil sa sarong hoben na gumibo nin marahay na mga desisyon.—1 Corinto 7:36.
5. Magin madunong sa pagpili nin maaagom
An pagpili nin maaagom an saro sa pinakaimportanteng pagdedesisyunan sa buhay. Basahon an Mateo 19:4-6, 9, dangan pag-ulayan an hapot na ini:
Bago mag-agom, taano ta dapat na pag-isipan na marhay iyan kan sarong Kristiyano?
Matatabangan ka kan Bibliya na maaraman kun anong marahay na mga kuwalidad an dapat na hanapon mo sa sarong agom. An pinakamahalaga, dapat na namumutan niya si Jehova.b Basahon an 1 Corinto 7:39 asin 2 Corinto 6:14. Dangan pag-ulayan an mga hapot na ini:
Taano ta sa mga kapwa Kristiyano sana kita dapat na magpili nin maaagom?
Sa hiling mo, ano daw an mamamatian ni Jehova kun an pipilion tang magin agom dai namumuot sa Saiya?
Kun an duwang magkaibang klase nin hayop pag-iibanon sa sarong sakal, pareho iyan na masasakitan. Magkakaigwa man nin dakul na problema kun an sarong Kristiyano maagom nin bakong kapagtubod
6. Arugon an pagmansay ni Jehova sa relasyon nin mag-agom
Sa suanoy na Israel, idinidiborsiyo kan nagkapirang lalaki an saindang agom dahil sa makasadiring mga rason. Basahon an Malakias 2:13, 14, 16, dangan pag-ulayan an hapot na ini:
Taano ta ikinakaanggot ni Jehova an diborsiyo na an mga dahilan bakong kauyon kan Bibliya?
An pagsambay asin diborsiyo nagdadara nin grabeng kakulugan asin mga problema sa inosenteng agom asin mga aki
I-play an VIDEO, dangan pag-ulayan an hapot.
Kun an agom mo bakong kapagtubod, ano an magigibo mo para magin maugma an saindong pag-ibanan?
7. Sunudon an mga pamantayan ni Jehova para sa mga mag-agom
Tibaad kaipuhan nin saro na maghinguwang marhay para masunod an mga pamantayan ni Jehova para sa mga mag-agom.c Pero binebendisyunan ni Jehova an mga naggigibo kaiyan. I-play an VIDEO.
Basahon an Hebreo 13:4, dangan pag-ulayan an mga hapot na ini:
Sa hiling mo, rasonable daw an mga pamantayan ni Jehova para sa mga mag-agom? Taano?
Sa kadaklan na nasyon, may legal na mga kahagadan kun manungod sa pag-agom asin pagdiborsiyo. Inaasahan ni Jehova na susunudon kan mga Kristiyano an mga kahagadan na iyan kan gobyerno. Basahon an Tito 3:1, dangan pag-ulayan an hapot na ini:
Kun may agom ka, rehistrado daw an saindong kasal?
TIBAAD MAY MAGHAPOT: “Taano ta mapakasal pa man? Dai puwedeng mag-live-in na lang?”
Ano an isisimbag mo?
SUMARYO
An pagigin daing agom asin pagkaigwa nin agom regalo hali ki Jehova. Pareho iyan na puwedeng magtao nin kaugmahan asin pagkakontento kun susunudon an mga pamantayan ni Jehova.
Rebyu
Kun an saro mayong agom, paano niya magagamit sa pinakamarahay na paagi an saiyang pagigin daing agom?
Taano ta sinasabi kan Bibliya na mag-agom sana nin sarong kapwa Kristiyano?
Ano an sinasabi kan Bibliya na solamenteng dahilan para sa diborsiyo?
HILINGON MAN
Ano an buot sabihon kan “sa parasunod kan Kagurangnan sana” mag-agom?
“Mga Hapot Hale sa mga Parabasa” (An Torrengbantayan, Hulyo 1, 2004)
Hilingon an duwang halipot na video na makakatabang para makagibo nin marahay na mga desisyon manungod sa pakikipag-date asin pag-agom.
Aramon kun taano ta nasabi nin sarong brother na mas mahalagang marhay an itinao saiya ni Jehova kisa sa mga isinakripisyo niya.
Ano an pirang bagay na dapat ikonsiderar nin sarong tawo bago magdesisyon na makipagdiborsiyo o makipagsuwayan?
“Igalang an Areglo nin Diyos sa Pag-aguman” (An Torrengbantayan, Disyembre 2018)
a Kun manungod sa pagsuwayan nin mag-agom na mayong kalabot na pagsambay, hilingon an Dagdag na Impormasyon 4.
b May mga kultura na mga magurang an nagpipili nin maaagom kan saindang aki. Sa arog kaiyan na kamugtakan, an inot na kokonsideraron kan mamumuton na mga magurang, bako an kuwarta o kamugtakan sa buhay kan iniisip nindang puwedeng magin agom kan aki ninda, kundi kun baga namumutan kaini si Jehova.
c Kun may ka-live-in ka, ika an madesisyon kun susuwayan mo siya o papakasalan.