Pagranga Hale sa Dios nin Katoninongan

“Magparangaranga kamo kan mga tataramon na ini.”—1 TESALONICA 4:18.

 1. Anong mga pag-arang ni Pablo an nagpapaheling kan saiyang interes sa katoninongan?

SI Pablo, na apostol, nagmamawot na gayo na an Kristianong kongregasyon magin matoninong. Kaya, 13 sa saiyang surat, na iningatan para sa sato sa ipinasabong na Kasuratan, binubukasan nin pag-arang na an mga pinadarahan magkamit logod nin katoninongan hale sa Dios. Halimbawa, sa bago pa sanang kongregasyon sa Tesalonica, si Pablo nagsurat: “Mapasaindo logod an dai na kutana maninigong kabootan asin katoninongan.” Sa paghinanapos kan surat man sanang iyan, sia nag-arang: “An Dios mismo nin katoninongan magpakangbanal logod sa saindo nin lubos. Asin marahay sa gabos na paagi an saindo logod na espiritu asin kalag patin hawak maingatan na dai nin kanawayan sa presensia kan satong Kagurangnan na Jesu-Cristo.”—1 Tesalonica 1:1; 5:23.

 2. (a) Anong klaseng pagmakolog an ipinaheling ni Pablo sa kongregasyon? (b) Paano maaarog nin Kristianong kamagurangan ngonyan an halimbawa ni Pablo?

² Si Pablo asin an saiyang kairiba dai ipinanguri an sadiri sa ‘paggibo asin pagpapagal’ sa tahaw kan bagong mga nagturubod na idto. Sabi ni Pablo: “Kami nagin maboot sa tahaw nindo, arog kan pagmamahal nin nag-aaling na ina sa saiyang mga aki. Kaya, huli sa pagkaigwa nin pagkamoot sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” Dai daw niato naririsa sa mga tataramon na iyan an haraning pagmakolog, an tunay, odok na pagkamoot na namatean ni Pablo para sa kongregasyon na idto? Tunay nanggad, iyan arogan kan klase nin pagkamoot na ipinaheheling nin Kristianong kamagurangan sa mga 50,000 na kongregasyon nin mga Saksi ni Jehova sa bilog na daga ngonyan.—1 Tesalonica 2:7-9; Juan 13:34, 35; 15:12-14.

 3. (a) Paano si Timoteo nakapagtao nin pakinabang sa kongregasyon sa Tesalonica? (b) Katimbang ini kan ano ngonyan?

³ An Parasugot, si Satanas, nagtao nin mga kahorasaan sa mga Kristianong idto sa Tesalonica. Kaya si Timoteo isinugo ni Pablo sa sainda, tanganing ‘parigonon sinda asin rangahon sinda para sa saindang pagtubod.’ Si Timoteo nagbuwelta ki Pablo sa Atenas na may maogmang bareta manongod sa saindang kaimbodan asin pagkamoot. An gabos narangang gayo sa pakaaram kan pagtubod asin integridad nin lambang saro, asin sinda nagpadagos na makimaherak sa Dios na hipnoan an ano man na kakulangan. (1 Tesalonica 3:1, 2, 5-7, 10) Ini man nagpapaheling kan teokratikong areglo ngonyan, na an nagbibiyaheng mga paraataman nagpapakosog sa mga kongregasyon, dawa sa mga lugar na an mga Saksi ni Jehova naglilingkod sa irarom nin pagprohibir o mapait na paglamag.—Isaias 32:1, 2.

‘Sa Saiyang Presensia’

 4, 5. (a) Ano an inarang digdi ni Pablo, asin taano iyan ta maninigong tawan niato nin espesyal na interes ngonyan? (b) Taano ta may partikular na kahulogan an satong kaaldawan?

⁴ Tinapos ni apostol Pablo an kabtang na ini kan saiyang surat sa pag-arang na: “Pataluboon logod kamo kan Kagurangnan, iyo, papagsopayon kamo, sa pagkamoot sa lambang saro asin sa gabos, siring kan ginigibo mi man sa saindo; tanganing parigonon nia an saindong puso, na daing kasagwean sa kabanalan sa atubang nin satong Dios asin Ama sa presensia kan satong Kagurangnan na Jesus kaiba an gabos niang banal.”—1 Tesalonica 3:12, 13.

⁵ Digdi si Pablo nagtatanaw sa maabot, sa panahon kan “presensia [ni Jesus] asin kan pagtatapos kan palakaw nin mga bagay” kun “an Aki nin tawo magdatong na sa saiyang kamurawayan, asin an gabos na anghel kaibanan nia.” An satong langitnon na Hade nagdatong kan 1914. Hale sa saiyang mamuraway na dai naheheling na trono, si Jesus ngonyan naghohokom sa mga nasyon asin banwaan kan daga, na ibinubulag an mapakumbaba, arog-karnerong mga tawo para sa kaligtasan sa “dakulang kahorasaan” asin buhay na daing katapusan sa paraisong daga.—Mateo 24:3-21; 25:31-34, 41, 46.

Mga Pagboot na Ikararahay Niato

 6. Anong sadol ni Pablo an kaipuhan na dangogon niato ngonyan?

⁶ Saro daw kamo na naghihingoang makaabot sa pasohan na iyan na buhay na daing katapusan? Kun iyo, kaipuhan na dangogon nindo an isinurat digdi ni Pablo sa mga taga-Tesalonica: “Sa katapustapusi, mga tugang, kami nakikimaherak saindo asin nagsasadol saindo huli sa Kagurangnan na Jesus, siring sa inako nindong togon sa samo kun paano kamo maninigong maglakaw asin magpasono sa Dios, siring na ngani sa paglakaw nindo ngonyan, na kamo padagos na gumibo kaiyan nin lubos pa. Huli ta aram nindo an mga pagboot na itinao mi sa saindo paagi sa Kagurangnan na Jesus.” (1 Tesalonica 4:1, 2) Ano an nagkapira sa “mga pagboot” na idinodoon digdi ni Pablo?

 7. (a) Anong mahalagang “pagboot” an itinatao digdi? (b) Mantang nag-ako na kan espiritu nin Dios, taano ta dai kita noarin man dapat na magpabaya?

⁷ An enot na “pagboot” may koneksion sa marahay na moral. Si Pablo prangkang nagsabi: “Iyo ini an kabotan nin Dios, an pagpakangbanal sa saindo, na kamo lumikay sa pakikisaro; na an lambang saro sa saindo makanood na magkapot sa saiyang sadiring lalagan sa kabanalan asin kagalangan, bakong sa maaraon na horot sa sekso siring kan nasa mga nasyon na dai nakakamidbid sa Dios.” Makaoogma, kita “nakakamidbid” sa Dios asin sa saiyang Aki, si Jesu-Cristo, asin naghihingoa na kamtan an buhay na daing katapusan. Makasosopog nanggad kun pabayaan niato na kita maguyod pabalik sa kinabanon na dalnak nin inmoralidad! Makamomondo, an iba nakaligtas sa dakol na taon sa mga kampo de konsentrasyon asin bilanggoan, o ginamit an bilog na buhay sa maigot na pagmimisyonero, tangani sanang pabayaan an Parasugot na sa huri madakop sindang dai nagbabantay manongod sa moral. Mantang nakaako na kan banal na espiritu nin Dios, noarin man dai logod niato iyan ‘pagpamondoon’ paagi sa salang gibo sa sekso.—1 Tesalonica 4:3-8; Juan 17:3; 1 Corinto 10:12, 13; Efeso 4:30.

 8, 9. (a) Ano an “pagkamoot sa magturugang”? (b) Paano daw niato mapatatalubo an siring na pagkamoot, asin may anong pakinabang?

⁸ An suminunod na “pagboot” ni Pablo mapadapit sa phil·a·del·phiʹa, “pagkamoot sa magturugang.” (1 Tesalonica 4:9, 10) Ini espesyal na kapahayagan kan may prinsipyong pagkamoot, a·gaʹpe, na mainit man na irenerekomendar ni Pablo digdi sa bersikulo 9, saka sa kapitulo 3, bersikulo 6 asin 12. An phil·a·del·phiʹa dayupot nanggad na pagpadangat, arog kan malinaw na nasa pag-oltanan ni Jesus asin Pedro, asin sa pag-oltanan ni David saka Jonatan. (Juan 21:15-17; 1 Samuel 20:17; 2 Samuel 1:26) Iyan ikakadugang sa a·gaʹpe sa pagkultibar sa haraning pag-iba-iba, arog kan maheheling, halimbawa, sa kagayagayahan sa pag-iribaiba na namamatean nin dakol na Saksi ni Jehova sa pagpapayunir asin iba pang teokratikong aktibidad.

⁹ Sabi ni Pablo: “Padagos na gibohon iyan nin orog.” Kita perming puwedeng humiwas sa satong pagkamoot sa tugang. An marahay na kuwalidad na ini nangorognang minalipwas kun an kamagurangan asin ministeryal na mga lingkod nangengenot sa mahigos na paglilingkod sa Kahadean. Kun an gabos sa kongregasyon nagmamasibot sa ‘paghanap nguna sa Kahadean,’ an dai pagkasinabotan huli sa dai pagkasangkap nin tawo, pagkakatumang nin personalidad, asin kaagid na mga problema nagigin pansegunda. Permi niatong itorohok an satong mata sa pasohan!—Mateo 6:20, 21, 33; 2 Corinto 4:18.

10. Paano kita, bilang mga Kristiano, ‘makakalakaw nin maninigo’?

¹⁰ Ikinonektar digdi ni Pablo an saro pang “pagboot”—na gibohon niatong katuyohan na mamuhay na matoninong, dai makilabot sa iba, asin magtrabaho kan satong kamot. Kaya mantang kita ‘naglalakaw nin maninigo’ sa satong pan-aroaldaw na buhay, na nagpapaheling nin may prinsipyong pagkamoot asin pagpadangat sa tugang, an gabos niatong pangangaipo itatao.—1 Tesalonica 4:11, 12; Juan 13:35; Roma 12:10-12.

Naranga kan Paglaom sa Pagkabuhay Liwat

11. (a) Taano ta iinintrodusir ngonyan ni Pablo an pagkabuhay liwat? (b) Paano kita maninigong maapektaran kan hatol na ini ni Pablo?

¹¹ Sumunod an apostol nagtaram manongod sa makangangalas na paglaom sa pagkabuhay liwat. Taano ta iinintrodusir ni Pablo an temang ini? Boot niang pakosogon an saiyang mga tugang na tagalan an mga paglamag na nagdadangadang sa sainda. Namemeligro sindang mawaran kan saindang buhay. Minalataw na kan panahon na idto an nagkapira natorog na sa kagadanan. Nagkakaipo nin pagranga an mga kapagtubod. (1 Tesalonica 2:14-20) Sa paghona na an “presensia” ni Cristo harani na, inisip ninda kun ano an mangyayari sa mga nagadan na. An isinurat ngonyan ni Pablo nagtatao bako sanang nin pagranga sa mga nawaran nin Kristianong mga namomotan kundi nin pagpakosog man na magtagal sagkod na umabot an “aldaw” ni Jehova. An hatol ni Pablo maninigong tumabang sa sato gabos na magpaheling nin espirituwal na karigonan mantang kita nagpapadagos na ipahayag an maogmang bareta, na naghahalat sa biyong pagkatapos kan palakaw na ini nin mga bagay.—2 Tesalonica 1:6-10.

12. Anong tunay na panranga an makakamtan niato kun nagagadan an sarong namomotan, asin gikan saen?

¹² Si Pablo nagsasabi: “Mga tugang, habo mi na kamo daing pakaaram manongod sa mga natotorog sa kagadanan; tanganing dai kamo magmondo siring kan iba na dai nin paglaom.” (1 Tesalonica 4:13) Kanigoan na karangahan asin katoninongan nin isip an manonompongan sa paglaom sa pagkabuhay liwat! Pakalihis nin mga limang taon, iiintrodusir ni Pablo an ikaduwa niang surat sa mga Kristiano sa Corinto paagi sa pagsabi: “Mapasaindo logod an dai na kutana maninigong kabootan asin katoninongan hale sa Dios na satong Ama asin sa Kagurangnan na Jesu-Cristo. Omawon logod an Dios asin Ama kan satong Kagurangnan na si Jesu-Cristo, an Ama nin maboot na mga pagkaherak asin an Dios nin gabos na karangahan, na minaranga sa samo sa gabos niamong kasakitan, tanganing maranga niamo an mga nasa ano man na kasakitan paagi sa karangahan na irinaranga mismo sa samo nin Dios.”—2 Corinto 1:2-4.

13, 14. (a) Taano ta boot ni Pablo na an mga Kristiano mapaaram manongod sa kahulogan nin kagadanan? (b) Ano an ipinaheheling kan Kasuratan na kamugtakan kan gadan?

¹³ Habo kan apostol na kita daing pakaaram manongod sa kamugtakan kan mga gadan. Pag-abot nin panahon, magkakaigwa nin dakulang apostasiya sa tahaw nin naghihingakong mga Kristiano, kaya sinda mabuwelta sa mga pilosopiyang Babiloniko asin Griego. An mga apostatang iyan maako sa doktrina ni Plato manongod sa nasa erensiang inmortalidad kan kalag—na ngonyan pundamental na katokdoan sa bilog na pankinaban na imperyo nin falsong relihiyon. An pagkamisteryoso kan “buhay pagkagadan,” baga man sinasabing sa langit, purgatoryo, o lugar nin daing sagkod na pagpasakit, dai nagtatao nin tunay na pagranga. Dugang pa, an inmortalidad na nasa erensia kontra sa doktrina nin pagkabuhay liwat, huli ta paano bubuhayon liwat an saro kun an kalag dai nagagadan?

¹⁴ Si Pablo nagsurat digdi “manongod sa mga natotorog sa kagadanan.” Iyo, “natotorog.” An tawo na natotorog daing pag-aram asin dai nin nagigibo. (Ikomparar an Eclesiastes 9:5, 10.) May okasyon sa ministeryo ni Jesus na sia nagsabi na si Lazaro “nagpahingalo” asin na sia, si Jesus, ‘pupukawon sia sa pagtorog.’ Kan dai masabotan kan mga disipulo ni Cristo an mga tataramon na idto, “si Jesus nagsabi na sa sainda nin sayod: ‘Si Lazaro nagadan.’” An mga tugang ni Lazaro, si Marta asin Maria, naranga kan paglaom sa pagkabuhay liwat, asin dinarahan sinda ni Jesus nin dugang pang karangahan. Alagad segurado na napakosog nanggad an saindang pagtubod kan buhayon ni Jesus an saiyang katood, na apat nang aldaw na gadan, hale sa pagkatorog sa kagadanan!—Juan 11:11-14, 21-25, 43-45.

15. (a) Paano napakokosog an satong paglaom sa pagkabuhay liwat? (b) Paano kita puwedeng matabangan na magtood sa pagkagadan nin sarong namomotan?

¹⁵ An milagrong iyan, kaiba an iba pang pagbuhay liwat ni Jesus sa gadan, asin nangorogna an pagbuhay ni Jehova ki Jesus mismo—an gabos na dokumentadong mga pangyayaring ini nagpapakosog sa satong pagsarig sa makangangalas na paglaom sa pagkabuhay liwat. (Lucas 7:11-17; 8:49-56; 1 Corinto 15:3-8) Totoo, an kagadanan nagdadara nin kamondoan asin luha, asin masakit na matood sa pagkawara nin namomotan. Alagad kanigoan na karangahan asin kosog an nakakamtan niato sa garantiya na an Soberanong Kagurangnan na Jehova “hahalonon an kagadanan sagkod lamang, asin papahidon . . . an mga luha sa gabos na lalauogon”! (Isaias 25:8; Kapahayagan 21:4) An saro sa pinakamarahay na bolong sa kamondoan iyo an pagmasibot sa paglilingkod sa Dios nin katoninongan, na itinatao sa iba an nakaoogma sa pusong paglaom sa Kahadean na may pagpasalamat na inako niato mismo.—Ikomparar an Gibo 20:35.

Pagkasunodsunod kan Pagbuhay Liwat

16, 17. (a) Paano paparaon an “ultimong kaiwal”? (b) Anong pagkasunodsunod nin pagbuhay liwat an ipinaliwanag ngonyan ni Pablo?

¹⁶ Makosog an satong pagtubod na si Cristo, an “enot na bunga” kan pagkabuhay liwat asin ngonyan natutukaw sa trono sa too nin Dios sa kalangitan, biyong ootobon an mamuraway na mga katuyohan ni Jehova sa Kahadean. (Hebreo 6:17, 18; 10:12, 13) Arog kan sabi ni Pablo sa saro pang surat: “Sia [si Jesu-Cristo] kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga bitis. Bilang an ultimong kaiwal, an kagadanan paparaon.” Paano? Sa sarong kabtang paagi sa pagkabuhay liwat asin sa paghale sa mga epekto kan kagadanan na minana ki Adan. Bago pa sanang ipaliwanag iyan kan apostol sa paaging ini: “Mantang an kagadanan huli sa sarong tawo, siring man an pagkabuhay liwat kan mga gadan huli sa sarong tawo. Huli ta kun paanong an gabos nagagadan dian ki Adan, siring man an gabos bubuhayon dian ki Cristo. Alagad an lambang saro sa saiyang sadiring ranggo: si Cristo an enot na bunga, dangan an mga rogaring ni Cristo sa panahon kan saiyang presensia.” (1 Corinto 15:20-26) An pagkasunodsunod na ini kan pagbuhay liwat an sumunod na sinabi ni Pablo sa enot niang surat sa mga taga-Tesalonica, na an sabi:

¹⁷ “Kun kita minatubod na si Jesus nagadan asin nabuhay liwat, siring man an mga natorog sa kagadanan paagi ki Jesus dadarahon nin Dios sa kaibanan nia. Huli ta iyo ini an isinasabi mi sa saindo paagi sa tataramon ni Jehova, na kita na nabubuhay sagkod sa presensia kan Kagurangnan dai sa ano man na paagi maeenot sa mga natorog sa kagadanan; huli ta an Kagurangnan man sana mahilig sa langit na may tingog na nagboboot, na may tingog kan arkanghel asin trumpeta nin Dios, asin an mga nagadan na kasaro ni Cristo enot na maburuhat.”—1 Tesalonica 4:14-16.

18. Kasuarin binuhay liwat an mga linahidan na “natorog sa kagadanan”?

¹⁸ Pakalihis kan 1914, sa panahon kan “presensia” ni Jesus sa kapangyarihan kan Kahadean, sia, bilang an arkanghel, nagtao kan langitnon na pagboot sa mga “kasaro ni Cristo” na magtiripon. Sa kaso kan mga linahidan na “natorog sa kagadanan,” an garo trumpetang pag-apod na ini naghahagad kan saindang espirituwal na pagkabuhay liwat sa kalangitan. An Torrengbantayan haloy nang nag-atubang kan punto-de-vista na an pagbuhay liwat na ini sa linahidan na mga Kristiano nagpoon kan taon 1918.

19. Noarin asin paano an mga natatada “aagawon sa mga panganoron,” asin sa anong katuyohan?

¹⁹ Minsan siring, kumusta man an natatadang linahidan na mga Kristiano sa daga, na ngonyan nagkakadikit na grupo nin mayo pang 10,000? An mga ini man kaipuhan na tapuson an saindang buhay sa daga na may kaimbodan. Garo baga sia kaiba ninda sa presensia ni Cristo, si Pablo nagsurat: “Dangan kita na buhay pa na nawawalat, kaibanan ninda, aagawon sa mga panganoron tanganing sabaton an Kagurangnan sa doros; asin paagi kaiyan kita danay na makakaibanan kan Kagurangnan.” (1 Tesalonica 4:17; ikomparar an Kapahayagan 1:10.) Kaya, pag-abot nin panahon, an gabos na 144,000 bubuhayon tanganing maglingkod bilang mga saserdote asin hade sa langitnon na Bukid nin Sion kaiba kan Kordero, si Jesu-Cristo. “Iyo ini an enot na pagkabuhay liwat.” (Kapahayagan 14:1, 4; 20:4, 5) Alagad ano an natatagama sa binilyon na tawo na yaon na ngonyan sa lolobngan?

20, 21. (a) Ano an natatagama sa binilyon na tawo na nasa saindang lolobngan? (b) Anong grupo an noarin man dai na kaipuhan na magadan sa ibabaw kan daga, asin taano? (c) Kun magadan an mga indibiduwal sa grupong ini, ano an maogmang paglaom ninda?

²⁰ Minsan ngani sinda dai espisipikong nasambitan ni Pablo sa saiyang enot na surat sa mga taga-Tesalonica, sinisierto sato kan Kapahayagan 20:12 na “an mga gadan, an darakula asin saradit” bubuhayon liwat tanganing umatubang sa trono nin paghokom nin Dios. (Helingon man an Juan 5:28, 29.) Minsan siring, ngonyan an “dakulang kadaklan” na minilyon an kabilangan natipon na sa atubangan kan tronong iyan. Bilang grupo, an mga ini ililigtas na buhay sa nagdadangadang na “dakulang kahorasaan.” Sinda pinapastoran kan Kordero asin ginigiyahan sa “mga burabod kan tubig nin buhay,” kaya dai na sinda noarin man kaipuhan na magadan sa ibabaw kan daga. Alagad huli sa edad o dai linalaoman na pangyayari, an iba sa sainda tibaad magadan sa panahon kan “presensia” kan Kagurangnan. (Kapahayagan 7:9, 14, 17; Eclesiastes 9:11) Kumusta man an mga ini?

²¹ An maogmang paglaom sa amay na pagkabuhay liwat natatagama sa gabos na “ibang karnerong” iyan. (Juan 10:16) An saindang pagtubod asin mga gibo, kapareho kan ki Abraham kaidtong suanoy, nagdara na sa sainda sa pakipagkatood sa Dios. Arog kan mga lalaki asin babaeng may pagtubod na isinasaysay sa Hebreo kapitulo 11, an mga “ibang karnerong” ini sa modernong aldaw nagtagal na sa mga pagbalo. Makatanosan sana, sinda man magkakamit nin “mas marahay na pagkabuhay liwat,” siertong amay pa sa panahon paka-Armagedon. (Hebreo 11:35; Santiago 2:23) An totoo, an lambang saro na, sa pagtubod, ‘nagkakan kan laman ni Jesus asin nag-inom kan saiyang dugo’ makikikabtang sa kaotoban kan saiyang panuga: Sia “igwa nin buhay na daing katapusan, asin bubuhayon ko sia liwat sa huring aldaw.”—Juan 6:54; Roma 5:18, 21; 6:23.

22. Paano kita puwedeng magparangaranga?

²² Pakapaliwanagan kan mamuraway na paglaom sa pagkabuhay liwat, si Pablo nagsasadol: “Magparangaranga kamo kan mga tataramon na ini.” (1 Tesalonica 4:18) Dangan ipinaliwanag pa nia an mahahalagang bagay manongod sa “presensia kan satong Kagurangnan na Jesus.” (1 Tesalonica 5:23) Ano daw ini? Helingon an artikulong “Katoninongan Hale sa Dios—Noarin?” sa masunod na luwas.

Bilang Sumaryo—

◻ Ano an mga inarang ni Pablo para sa mga Kristiano?

◻ Anong mga “pagboot” an itinao kan apostol na ikararahay niato?

◻ Paano an Tataramon nin Dios nakararanga sato mapadapit sa mga gadan?

◻ Anong pagkasunodsunod kan pagbuhay liwat an isinasaysay ni Pablo?