“Gibuhon Nindo an Gabos na Bagay sa Ikakamuraway nin Diyos”

BILANG nagdusay na mga lingkod nin Diyos, may obligasyon kitang ipahiling an kamurawayan ni Jehova sa gabos na sinasabi asin ginigibo ta. Nagtao si apostol Pablo nin prinsipyo na magiya sa sato. Nagsurat siya: “Nagkakakan man kamo o nag-iinom o naggigibo nin ano pa man, gibuhon nindo an gabos na bagay sa ikakamuraway nin Diyos.” (1 Cor. 10:31) Kaiba digdi an pagsunod ta sa matanos na mga pamantayan ni Jehova, na diyan mahihiling ta an saiya mismong perpektong personalidad. (Col. 3:10) Dapat kitang magin paraarog sa Diyos, bilang banal na banwaan niya.—Efe. 5:1, 2.

² Para ipagirumdom ini sa mga Kristiyano, nagsurat si apostol Pedro: “Bilang makinuyog na mga aki, dai na kamo magpamolde sa dati nindong mga kamawutan kan kamo dai pang kaaraman dapit sa Diyos, kundi arog kan Saro na Banal na nag-apod sa saindo, magin banal kamo sa gabos nindong paggawi, huli ta nasusurat: ‘Magpakabanal kamo, huli ta ako banal.’” (1 Ped. 1:14-16) Arog sa Israel kaidto, kahagadan sa gabos na kabilang sa Kristiyanong kongregasyon na magin banal. Nangangahulugan ini na dapat sindang magdanay na malinig saka dai nadidigtaan nin maraot asin kinabanon na mga paggawi. Paagi kaini, nailalain sinda para sa sagradong paglilingkod.—Ex. 20:5.

³ Naipapahiling an kabanalan paagi sa pagsunod sa mga katugunan asin prinsipyo ni Jehova, na malinaw na mababasa sa Banal na Kasuratan. (2 Tim. 3:16) Paagi sa pag-adal kan Bibliya, natukduan kita manungod ki Jehova asin sa saiyang mga gibo, asin huli kaiyan naparani kita sa saiya. Nakumbinsir man kita na kaipuhan na hanapon nguna an Kahadian nin Diyos asin magin panginot sa satong buhay an paggibo kan kabutan ni Jehova. (Mat. 6:33; Roma 12:2) Para magibo ini, kaipuhan tang isulot an bagong personalidad.—Efe. 4:22-24.

⁴ Bako pirming pasil na magsunod sa matanos na mga pamantayan ni Jehova. Hinihinguwa kan satong kaiwal na si Satanas na Diyablo na isuhay kita sa katotoohan. Nadidipisilan kita kun minsan huli sa maraot na mga impluwensiya kan kinaban na ini asin sa sato mismong makasalan na mga tendensiya. Tanganing mautob ta an satong pagdusay, kaipuhan tang makipaglaban sa espirituwal na paagi. Sinasabi sa sato kan Kasuratan na dai kita mabigla kun mapaatubang kita sa pagkontra o mga pagbalo. Maagi talaga kita nin kasakitan alang-alang sa katanusan. (2 Tim. 3:12) Puwede kitang magin maugma dawa nag-aagi nin mga pagbalo, dahil aram ta na patunay iyan na ginigibo ta an kabutan nin Diyos.—1 Ped. 3:14-16; 4:12, 14-16.

⁵ Dawa ngani perpekto si Jesus, nakanuod siyang magin masinunod paagi sa mga kasakitan na inagihan niya. Dai siya nuarin man nagpadara sa mga sugot ni Satanas o nagkaigwa nin kinabanon na mga ambisyon. (Mat. 4:1-11; Juan 6:15) Dai lamang ngani siya nag-isip na magkompromiso. Dawa ngani naungis sa saiya an kinaban dahil sa kaimbudan niya, nagsunod siya sa matanos na mga pamantayan ni Jehova. Kan harani na an saiyang kagadanan, pinatanidan niya an saiyang mga disipulo na mauungis man sa sainda an kinaban. Puon kaidto nag-agi na nin kasakitan an mga parasunod ni Jesus, pero makusog an saindang buot huling aram ninda na nadaog kan Aki nin Diyos an kinaban.—Juan 15:19; 16:33; 17:16.

⁶ Tanganing dai kita magin parte kan kinaban, kaipuhan tang sunudon an matanos na mga pamantayan ni Jehova, arog kan ginibo kan satong Kagurangnan. Apuwera sa dai pakikilabot sa mga isyu sa pulitika asin sa kontrobersiyal na mga isyu kan mga tawo sa kinaban, dapat man kitang mag-ingat laban sa hababaon na moralidad kaiyan. Isinasapuso ta an konseho na nasa Santiago 1:21: “Halion nindo an gabos na karamugan asin an gabos na klase nin karatan, asin akuon na may kahuyuan an tataramon na itinatadom sa saindo, huling iyan makakapagligtas sa saindo.” Paagi sa pag-adal asin pag-atender sa mga pagtiripon, ‘naitatadom an tataramon’ nin katotoohan sa satong isip saka puso, na nakakatabang sa sato na dai lamang magmawot kan inaalok kan kinaban. Nagsurat an disipulong si Santiago: “Dai nindo aram na an pakikiamigo sa kinaban pakikiiwal sa Diyos? Kun siring, an siisay man na gustong magin amigo kan kinaban ginigibo an saiyang sadiri na kaiwal nin Diyos.” (Sant. 4:4) Iyan an dahilan kaya sinasadol kitang marhay kan Bibliya na sunudon an matanos na mga pamantayan ni Jehova asin magdanay na bakong parte kan kinaban.

⁷ Pinapatanidan kita kan Tataramon nin Diyos laban sa makasusupog asin imoral na paggawi. Sinasabi kaiyan sa sato: “An seksuwal na imoralidad asin an ano man na klase nin karigsukan o kapasluan dai man lamang dapat masambitan diyan sa saindo, na iyo an angay para sa mga tawong banal.” (Efe. 5:3) Kaya dai ta dapat pagtugutan an satong isip na magparaisip nin mga bagay na malaswa, makasusupog, o marauton, asin dai ta nanggad pagtugutan na makaiba iyan sa mga urulay niyato. Paagi kaiyan, pinapatunayan niyato na gusto tang sumunod sa malinig asin matanos na mga pamantayan ni Jehova sa moral.

⁸ Apuwera sa espirituwal asin moral na kalinigan, mahalaga man sa mga Kristiyano an pisikal na kalinigan. Sa suanoy na Israel, kahagadan kan Diyos nin kabanalan na manteniron an kalinigan kan kampo. Dapat man na malinig kita tanganing si Jehova ‘daing mahiling na ano man na kadustaan’ sa sato.—Deut. 23:14.

⁹ An kabanalan asin pisikal na kalinigan magkakonektar na marhay sa Bibliya. Halimbawa, nagsurat si Pablo: “Mga namumutan, linigon niyato an satuyang mga sadiri sa gabos na bagay na nakakaramog sa laman asin espiritu, na sa siring urog kitang nagigin banal mantang ipinapahiling ta an pagkatakot sa Diyos.” (2 Cor. 7:1) Kaya an mga Kristiyano dapat na maghinguwa na pirming magin malinig an hawak paagi sa regular na pagkarigos asin paglaba kan saindang bado. Dawa ngani iba-iba an kamugtakan sa kada nasyon, sa parati may makukua man na sabon asin tubig para masigurado na pirming magin malinig an satong hawak pati na an satong mga aki.

¹⁰ Huli sa satong paghuhulit, sa parati bisto kitang marhay sa satong komunidad. Pag pinapagdanay tang pakarhay, malinig, asin areglado an laog saka luwas kan harong ta, saro na ining patotoo sa satong mga pagtaraid. Puwedeng pagtarabangan iyan kan bilog na pamilya. Dapat siguraduhon kan mga brother na an saindang harong asin palibot malinig saka areglado huling nagtatao iyan nin positibong impresyon sa iba. Iyan, pati na an saindang panginginot sa espirituwal na mga bagay, nagpapahiling na an mga payo nin pamilya nanginginot sa mahusay na paagi sa sadiring pamilya ninda. (1 Tim. 3:4, 12) An mga sister igwa man nin responsabilidad sa pag-asikaso sa mga bagay-bagay, lalo na sa laog kan harong. (Tito 2:4, 5) Para sa mga aki na natawan nin marahay na pagsasanay, dapat man na siguraduhon nindang pirming maayos asin malinig an saindang sadiri saka an saindang kuwarto. Kaya sa pagtarabangan kan pamilya, nasasanay na sinda sa pagigin malinig, na angay sa bagong kinaban na papamahalaan kan Kahadian nin Diyos.

¹¹ Dakul na lingkod ni Jehova ngunyan an naggagamit nin awto sa pag-atender sa mga pagtiripon. May mga lugar na kaipuhan talaga nin awto na magagamit sa ministeryo. Dapat na pirming malinig iyan asin nasa kondisyon. An satong harong asin awto dapat na magpatotoo na kita kabilang sa malinig saka banal na banwaan ni Jehova. Aplikado man an prinsipyong iyan sa ginagamit tang bag saka Bibliya sa ministeryo.

¹² An satong pagbado asin pag-ayos sa sadiri dapat na kauyon kan diyosnon na mga prinsipyo. Dai gayod kita maatubang sa sarong prominenteng tawo kun bakong presentable o bakong pormal an bado ta. Kaya lalo nang dapat kitang magin presentable pag irinerepresentar ta si Jehova sa ministeryo o sa plataporma! An satong pag-ayos sa sadiri asin mga istilo nin bado may epekto sa iisipon kan iba manungod sa pagsamba ki Jehova. Bako talagang angay kun kita bakong mabini o daing konsiderasyon sa iba. (Miq. 6:8; 1 Cor. 10:31-33; 1 Tim. 2:9, 10) Kaya pag nag-aandam kita para maglingkod sa langtad o mag-atender sa mga pagtiripon kan kongregasyon, pansirkitong asembleya, o kumbensiyon, dapat tang isaisip an sinasabi kan Kasuratan manungod sa pisikal na kalinigan asin mabining itsura. Gusto niyato na pirming tawan nin onra asin pamurawayon si Jehova.

¹³ Aplikado man iyan pag nagbibisita kita sa headquarters o sa sangang opisina kan Mga Saksi ni Jehova. Tandaan na an pangaran na Bethel nangangahulugan na “Harong nin Diyos.” Kaya an satong pagbado asin paggawi pag nagbibisita sa mga iyan dapat na kapareho man kan sa pag-atender ta sa mga pagtiripon sa Kingdom Hall.

¹⁴ Dawa kun kita naglilibang, gusto tang tawan nin atensiyon an satong pagbado asin pag-ayos sa sadiri. Puwede tang haputon an satong sadiri, ‘Masusupog daw akong magpatotoo nin impormal huli sa bado ko?’

¹⁵ Kaipuhan an pahingalo asin paglilibang para magdanay na balanse asin marahay an salud. Sarong beses, inagda ni Jesus an mga disipulo niya na umiba sa saiya sa sarong tagong lugar para “magpurupahingalo.” (Mar. 6:31) An pahingalo saka kapaki-pakinabang na paglilibang puwedeng magin marahay na pampalipas nin oras. Naibabalik kaiyan an satong kusog para maipadagos an pang-aroaldaw na mga gibuhon.

¹⁶ Sa kadakulan kan mga libangan sa ngunyan, kaipuhan na magin mapamili an mga Kristiyano asin gamiton an diyosnon na kadunungan sa pagdedesisyon. May pakinabang an paglilibang, pero bako iyan an pinakaimportante sa buhay. Pinapatanidan kita na sa “huring mga aldaw,” an mga tawo magigin “mamumuton sa pagpasiram-siram imbes na mamumuton sa Diyos.” (2 Tim. 3:1, 4) An kadaklan sa ibinibilang sa ngunyan na libangan dai puwede para sa mga gustong sumunod sa matanos na mga pamantayan ni Jehova.

¹⁷ Kinaipuhan na labanan kan inot na mga Kristiyano an maraot na impluwensiya kan mga tawo sa palibot ninda na mas iniinot an pagpasiram-siram sa buhay. Sa mga arena kaidto sa Roma, nalilibang an mga tawo sa paghiling kan mga tawong nagsasakit. Ipinapahiling sa mga pasali sa entablado an kadahasan, paggadan, asin seksuwal na imoralidad para malibang an mga tawo, pero linikayan iyan kan inot na mga Kristiyano. Arog man kaiyan an ipinapahiling sa kadaklan na libangan sa ngunyan para paniguan an maraot na mga hilig nin mga tawo. Kaipuhan tang bantayan na marhay an satong paggawi asin likayan an mga libangan na nakakaraot sa moral. (Efe. 5:15, 16; Sal. 11:5) Saka dawa kun wara man maraot sa mismong libangan, tibaad bakong akseptable an lugar asin ginigibo kan mga tawong yaon diyan.—1 Ped. 4:1-4.

¹⁸ Igwa man nin mga libangan na puwede sa mga Kristiyano. Dakul an nakinabang sa pagsunod sa mga konseho kan Kasuratan asin sa balanseng mga suhestiyon na mababasa sa mga publikasyon ta.

¹⁹ Kun minsan, puwedeng imbitaran sa harong an nagkapirang pamilya para sa pagtiripon-tipon bilang magturugang sa pagtubod. O puwede man imbitaran an mga tugang sa handaan sa kasal o iba pang mga okasyon. (Juan 2:2) Dapat isaisip kan mga nag-imbitar na sinda an may paninimbagan sa mga mangyayari diyan. Kaipuhan nanggad na mag-ingat pag dakulang grupo an pagtiripon-tipon. Dahil mayong gayo nin nagmamangno sa siring na mga pagtiripon-tipon, may mga nakakalingaw sa tamang paggawi bilang Kristiyano. May mga nagpapangana sa pagkakan asin pag-inom nin arak saka nakakagibo pa ngani nin magabat na pagkakasala. Huli kaiyan, nahiling nin mapagrisang mga Kristiyano na mas marahay kun lilimitaran an bilang nin mga imbitado asin an lawig kan siring na mga pagtiripon-tipon. Kun may iluluwas na arak, dapat na tama sana an pag-inom. (Fil. 4:5) Kun gigibuhon ta an gabos para masigurado na an pagtiripon-tipon angay sa Kristiyano asin nakakapakusog sa espirituwal, dai magigin panginot sa sato an kakanon saka inumon.

²⁰ Marahayon an magin mapag-istimar. (1 Ped. 4:9) Kun nag-iimbitar kita nin ibang Kristiyano sa satong harong para magkakan, magmirindal, maglibang, asin magtiripon-tipon, dai ta paglingawan an mga may masakit na kamugtakan sa buhay. (Luc. 14:12-14) Kun kita man an bisita, dapat na sunudon ta an konseho na nasa Marcos 12:31. Pirmi kitang magpahiling nin apresasyon sa kabuutan nin iba.

²¹ Nauugma an mga Kristiyano sa abundang regalo nin Diyos asin dahil aram ninda na puwede sindang “magkakan asin mag-inom saka magin maugma sa gabos [nindang] pinagpagalan.” (Ecl. 3:12, 13) Kun ‘ginigibo niyato an gabos na bagay sa ikakamuraway nin Diyos,’ mauugma an mga kag-imbitar saka an mga bisita mantang ginigirumdom an pagtiripon-tipon huling napakusog sinda sa espirituwal.

²² An mga aki kan mga Saksi ni Jehova nakikinabang sa sekular na edukasyon. Nag-eeskuwela sinda huli ta gusto nindang magin mahusay sa pagbasa saka pagsurat. May mga subject sa eskuwelahan na puwedeng magamit kan mga hoben sa pag-abot ninda sa espirituwal na mga pasuhan ninda. Dawa nag-eeskuwela, pinagmamaigutan nindang ‘girumdumon an saindang Kahuruhalangkawing Kaglalang’ paagi sa pag-inot sa espirituwal na mga bagay.—Ecl. 12:1.

²³ Kun ika sarong hoben na Kristiyano na nag-eeskuwela pa, maghinguwang iwasan an dai man kinakaipuhan na pakikiiba-iba sa kinabanon na mga hoben. (2 Tim. 3:1, 2) Dahil nagtatao si Jehova nin kinakaipuhan na proteksiyon, kaya mong makaiwas sa impluwensiya kan kinaban. (Sal. 23:4; 91:1, 2) Kaya para maproteksiyunan ka, akuon asin gamiton mo an mga probisyon ni Jehova.—Sal. 23:5.

²⁴ Tanganing padagos na magin siblag sa kinaban mantang nag-eeskuwela, an kadaklan na hoben na Saksi nagdesisyon na dai magpartisipar sa ekstrakurikular na mga aktibidad sa eskuwelahan. Tibaad dipisil ining masabutan kan mga kaklase asin maestra mo. Pero an mahalaga iyo an mapaugma an Diyos. Kaya gamiton mo an saimong konsiyensiya na sinanay sa Bibliya asin magin desidido ka na dai magbali sa kinabanon na mga kompetisyon o nasyonalismo. (Gal. 5:19, 26) Mga hoben, kun kamo nagdadangog sa suno sa Kasuratan na konseho kan saindong Kristiyanong mga magurang asin nakikiiba-iba pirmi sa marahay na mga amigo sa kongregasyon, masusunod nindo an matanos na mga pamantayan ni Jehova.

²⁵ An mga payo nin pamilya igwa nin suno sa Kasuratan na paninimbagan na sustentuhan an saindang pamilya. (1 Tim. 5:8) Pero bilang mga ministro, aram ninda na mas mahalaga an intereses kan Kahadian kisa sa saindang sekular na trabaho. (Mat. 6:33; Roma 11:13) Paagi sa pamumuhay na may debosyon sa Diyos asin sa pagigin kontento na sa pagkaigwa nin kakanon saka bado, nalilikayan ninda an mga kahaditan asin siod nin materyalistikong pamumuhay.—1 Tim. 6:6-10.

²⁶ Dapat na pirming isaisip kan gabos na nagdusay na Kristiyanong nagtatrabaho an mga prinsipyo sa Kasuratan. Tanganing masustentuhan an satong sadiri sa onestong paagi, dai kita maiba sa mga gibong balga sa katugunan nin Diyos o sa ley kan nasyon. (Roma 13:1, 2; 1 Cor. 6:9, 10) Isinasaisip ta an mga peligro na dara nin maraot na pag-iriba. Bilang mga suldados ni Cristo, dai kita naglalaog sa mga negosyong nagbabalga sa mga pamantayan nin Diyos, magkokompromiso kan satong Kristiyanong neutralidad, asin magsasapeligro kan satong espirituwalidad. (Isa. 2:4; 2 Tim. 2:4) Saka dai kita malaog sa trabahong konektado sa kaiwal nin Diyos na palsong relihiyon, an “Dakulang Babilonya.”—Kap. 18:2, 4; 2 Cor. 6:14-17.

²⁷ Pag sinusunod ta an matanos na mga pamantayan nin Diyos, dai ta gagamiton an teokratikong mga pagtiripon para mag-indorso nin negosyo o para sa iba pang personal na pakinabang. An talagang katuyuhan kan satong pag-iribanan mantang nasa Kristiyanong mga pagtiripon, asembleya, asin kumbensiyon iyo na sambahon si Jehova. Nagkakakan kita sa saiyang espirituwal na lamesa asin pinapakusog niyato an kada saro. (Roma 1:11, 12; Heb. 10:24, 25) An siring na pag-iribanan dapat na nakasentro sa espirituwal na mga bagay.

²⁸ Bilang pagsunod sa matanos na mga pamantayan ni Jehova, kaipuhan kan mga lingkod niya na ‘papagdanayon an pagkasararo kan espiritu sa nakakapasararong bugkos nin katuninungan.’ (Efe. 4:1-3) Imbes na sadiri sana an isipon, hinihinguwa kan lambang saro na gumibo nin marahay sa iba. (1 Tes. 5:15) Siguradong nahihiling mo iyan sa kongregasyon nindo. Ano man an satong lahi, nasyonalidad, estado sa buhay, kabuhayan, o inadalan, gabos kita may saro sanang sinusunod na matanos na mga pamantayan. Dawa mga bakong Saksi nakakaobserbar sa magayunon na karakteristikong ini kan mga lingkod ni Jehova.—1 Ped. 2:12.

²⁹ Para urog pang iduon an basehan nin pagkasararo, nagsurat si Pablo: “Igwa nin sarong hawak, asin nin sarong espiritu, kun paanong igwa nin saro sanang paglaom na diyan kamo inapod; sarong Kagurangnan, sarong pagtubod, sarong bawtismo; sarong Diyos asin Ama kan gabos, na igwa nin awtoridad sa gabos asin hinahaman an mga bagay-bagay paagi sa gabos saka ginagamit an saiyang kapangyarihan sa gabos.” (Efe. 4:4-6) Buot sabihon kaini, dapat na nagkakasararo kita sa pakasabot sa pundamental na mga doktrina kan Bibliya saka sa mas harararom na katukduan kan Bibliya. Paagi kaiyan, ipinapahiling ta na minimidbid ta an soberaniya ni Jehova. Iyo, itinao ni Jehova sa banwaan niya an dalisay na lengguwahe nin katotoohan kaya nakakapaglingkod sinda na may pagkasararo.—Sof. 3:9.

³⁰ An pagkasararo asin katuninungan kan Kristiyanong kongregasyon nakakaginhawa sa gabos na nagsasamba ki Jehova. Naeeksperyensiyahan ta an kautuban kan panuga ni Jehova: “Pagkakasararuon ko sinda, na garo mga karnero na ilinaag sa turil.” (Miq. 2:12) Gusto tang papagdanayon an katuninungan asin pagkasararong iyan paagi sa pagsunod sa matanos na mga pamantayan ni Jehova.

³¹ Talagang maugma an mga napabilang sa malinig na kongregasyon ni Jehova! Sulit an ano man na sakripisyo na tibaad kaipuhan tang gibuhon para apudon sa ngaran ni Jehova. Mantang iniingatan ta an satong mahalagang marhay na relasyon ki Jehova, magmamaigot kitang marhay na sunudon an saiyang matanos na mga pamantayan asin tabangan an iba na iyo man an gibuhon.—2 Cor. 3:18.