Ama Asin Magurang sa Kongregasyon​—Pag-otob sa Duwang Katongdan

“Kun talagang an sarong lalaki dai tataong pangenotan an saiyang sadiring kairiba sa harong, paano sia makapangangataman sa kongregasyon nin Dios?”​—1 TIMOTEO 3:5.

1, 2. (a) Kan enot na siglo, paano an mga paraataman na daing agom asin may agom na mga paraataman na mayong mga aki nakapaglingkod sa saindang mga tugang? (b) Paano si Aquila asin Priscila halimbawa para sa dakol na mag-agom ngonyan?

AN MGA paraataman sa enot na Kristianong kongregasyon puedeng mga lalaking daing agom o mga lalaking may agom na mayong mga aki o mga lalaking de pamilya na may mga aki. Daing duwa-duwa na an nagkapira sa mga Kristianong idto nakasunod sa sadol ni apostol Pablo na itinao sa enot niang surat sa mga taga-Corinto, kapitulo 7, na nagdanay na daing agom. Si Jesus nagsabi: “Igwa nin mga kapon na ginibo an saindang sadiri na mga kapon huli sa kahadean kan kalangitan.” (Mateo 19:12) An daing agom na mga lalaking iyan, kapareho ni Pablo asin tibaad kan nagkapira sa kairiba nia sa pagbiahe, magigin libre na magbiahe tanganing tumabang sa saindang mga tugang.

² Dai sinasabi kan Biblia kun baga si Bernabe, Marcos, Silas, Lucas, Timoteo, asin Tito mga lalaking daing agom. Kun may agom, minalataw na sinda may igong katalingkasan sa mga paninimbagan sa pamilya tangani na makapagbiahe nin hararayo sa laen-laen na destino. (Gibo 13:​2; 15:​39-41; 2 Corinto 8:​16, 17; 2 Timoteo 4:​9-11; Tito 1:5) Posible man na inibanan sinda kan saindang agom na babae, arog ni Pedro asin “kan ibang mga apostol,” na minalataw na ipinag-iba an saindang agom na babae sa pagduman sa laen-laen na lugar. (1 Corinto 9:5) Si Aquila asin Priscila halimbawa nin mag-agom na andam na bumalyo nin lugar, na sinusundan si Pablo hale sa Corinto pasiring sa Efeso, dangan nagbalyo sa Roma, asin balik na naman sa Efeso. Dai sinasabi kan Biblia kun baga may mga aki sinda. Huli sa debotado nindang paglilingkod sa saindang mga tugang pinasalamatan sinda kan “gabos na kongregasyon kan mga nasyon.” (Roma 16:​3-5; Gibo 18:​2, 18; 2 Timoteo 4:19) Ngonyan, daing duwa-duwa na kadakol kan mag-agom na, arog ni Aquila asin Priscila, puedeng maglingkod sa ibang mga kongregasyon, tibaad paagi sa pagbalyo sa lugar na mas dakula an pangangaipo.

Ama Asin Magurang sa Kongregasyon

 3. Ano an nagsusuherir na dakol na kamagurangan kan enot na siglo an may agom na mga lalaki na may mga pamilya?

³ Minalataw na kan enot na siglo C.E., an mayoriya sa Kristianong kamagurangan mga lalaking may agom na may mga aki. Kan isabi ni Pablo an mga kualipikasyon na hinahagad sa sarong lalaki na “naghihingoang maabot an katongdan nin paraataman,” sinabi nia na an siring na Kristiano maninigong “sarong lalaki na nangengenot sa saiyang sadiring kairiba sa harong sa marahay na paagi, na an mga aki nasasakop sa lubos na kamayokodan.”​—1 Timoteo 3:​1, 4.

 4. Ano an hinagad sa may agom na kamagurangan na may mga aki?

⁴ Arog kan nasabotan niato, an paraataman dai obligadong magkaigwa nin mga aki, o mag-agom. Alagad kun may agom, tanganing makualipikar bilang magurang sa kongregasyon o ministeryal na lingkod, an Kristiano kaipuhan na gumibo nin tama asin mamomoton na pagkapayo sa saiyang agom na babae asin ipaheling na kaya niang papagdanayon sa tamang pagpasakop an saiyang mga aki. (1 Corinto 11:3; 1 Timoteo 3:​12, 13) An ano man na seryosong kaluyahan sa pamamahala sa saiyang kairiba sa harong madiskualipikar sa sarong tugang para sa espesyal na mga pribilehio sa kongregasyon. Taano? Ipinaliliwanag ni Pablo: “Kun talagang an sarong lalaki dai tataong pangenotan an saiyang sadiring kairiba sa harong, paano sia makapangangataman sa kongregasyon nin Dios?” (1 Timoteo 3:5) Kun an mga kalaman nia habong pumasakop sa saiyang pangangataman, ano an magigin reaksion nin iba?

“Igwa nin mga Aking Nagtutubod”

5, 6. (a) Anong kahagadan kun dapit sa mga aki an sinabi ni Pablo ki Tito? (b) Ano an linalaoman sa kamagurangan na may mga aki?

⁵ Kan iniinstruksionan si Tito na magnombra nin mga paraataman sa mga kongregasyon sa Creta, isinabi ni Pablo bilang kahagadan: “Kun may siisay man na lalaki na dai nin kanawayan, agom na lalaki nin sarong agom na babae, igwa nin mga aking nagtutubod na dai ikasusumbong huli sa karigsokan ni masinuhay man. Huli ta an paraataman kaipuhan na dai nin kanawayan bilang pinaniwalaan nin Dios.” Ano daw talaga an boot sabihon kan kahagadan na “igwa nin mga aking nagtutubod”?​—Tito 1:​6, 7.

⁶ An terminong “mga aking nagtutubod” nagtataram manongod sa mga hoben na nagdusay na kan saindang buhay ki Jehova asin nabautismohan na o sa mga hoben na nag-ooswag pasiring sa pagdusay asin bautismo. An mga miembro nin kongregasyon linalaoman an mga aki kan kamagurangan na sa pankagabsan magin pormal asin makinuyogkuyog. Maninigong marisa na an magurang sa kongregasyon ginigibo an bilog niang makakaya na pakosogon an pagtubod kan saiyang mga aki. Si Hadeng Salomon nagsurat: “Patoodon mo an aki oyon sa dalan para sa saiya; minsan kun sia maggurang dai sia masiko dian.” (Talinhaga 22:6) Alagad ano kun an hoben na nag-ako nin siring na pagpatood habong maglingkod ki Jehova o nakaginibo pa ngani nin grabeng kasalan?

 7. (a) Taano ta malinaw na an Talinhaga 22:​6 dai nagpapahayag nin dai mababaring reglamento? (b) Kun an aki nin sarong magurang sa kongregasyon dai gustohon na maglingkod ki Jehova, taano an magurang sa kongregasyon ta dai automatikong mawawaran kan saiyang mga pribilehio?

⁷ Malinaw na an talinhagang kinotar sa enotan dai nagsasabi nin dai maliliwat na reglamento. Dai kaiyan rinerebokar an prinsipyo nin libreng kabotan. (Deuteronomio 30:​15, 16, 19) Kun an aking lalaki o babae makaabot na sa edad nin pagkaresponsable, sia dapat na gumibo nin personal na desisyon mapadapit sa pagdusay asin bautismo. Kun an magurang sa kongregasyon malinaw na nagtao kan kinakaipuhan na espirituwal na tabang, paggiya, asin disiplina, pero dai ginusto kan hoben na maglingkod ki Jehova, an ama dai automatikong nadidiskualipikar sa paglilingkod bilang paraataman. Sa ibong na lado, kun an magurang sa kongregasyon may nagkapirang aking minor de edad na nag-iistar sa harong na, sunod-sunod, nagkakahelang sa espirituwal asin napapasubo sa problema, tibaad dai na sia ibilang na “sarong lalaki na nangengenot sa saiyang sadiring kairiba sa harong sa marahay na paagi.” (1 Timoteo 3:4) An punto, maninigo na hayag na an paraataman ginigibo an pinakamakakaya nia na magkaigwa nin “mga aking nagtutubod na dai ikasusumbong huli sa karigsokan ni masinuhay man.”a

Agom nin “Agom na Babae na Dai nin Pagtubod”

 8. Ano an maninigong igawe nin sarong magurang sa kongregasyon sa saiyang agom na babae na dai nin pagtubod?

⁸ Mapadapit sa mga Kristiano na agom nin mga dai nin pagtubod, si Pablo nagsurat: “Kun an siisay man na tugang na lalaki igwa nin agom na babae na dai nin pagtubod, pero sia minaoyon na mag-erok sa kaibanan nia, dai nia sia pagbayaan . . . Huli ta . . . an agom na babae na dai nin pagtubod nasasantipikar dian sa tugang na lalaki; ta kun dai, an saindong mga aki magigin maramog nanggad, alagad ngonyan sinda banal. Huli ta, . . . agom na lalaki, paano mo naaaraman na dai mo ikaliligtas an saimong agom na babae?” (1 Corinto 7:​12-14, 16) An mga tataramon digdi na “dai nin pagtubod” dai nagtataram manongod sa agom na babae na mayo nin relihiosong mga paniniwala kundi sa saro na bakong dusay ki Jehova. Sia puedeng Judia, o nagtutubod sa paganong mga dios. Ngonyan, an sarong magurang sa kongregasyon puedeng agom nin sarong babae na laen man an relihion, agnostika, o ateista pa ngani. Kun gusto kan babae na magdanay kasaro nia, dai nia ini maninigong bayaan huli sana sa nagkakalaen na mga paniniwala. Sia maninigo pa man giraray na ‘padagos na makiiba sa saiya oyon sa kaaraman, na tinatawan sia nin onra siring sa lalagan na mapapasaon, an babae,’ na namumuhay sa paglaom na ikaligtas ini.​—1 Pedro 3:7; Colosas 3:​19.

 9. Sa kadagaan na an ley nagtatao kapwa sa agom na lalaki asin agom na babae kan diretso na ipaaram sa saindang mga aki an kanya-kanyang relihiosong mga paniniwala, paano maninigong gumawe an sarong magurang sa kongregasyon, asin paano ini makaaapektar sa saiyang mga pribilehio?

⁹ Kun an paraataman may mga aki, magibo sia nin tamang pagkapayo bilang agom na lalaki asin ama sa pagpadakula sa sainda “sa disiplina asin pagtatanos nin isip ni Jehova.” (Efeso 6:4) Sa dakol na kadagaan an mag-agom pareho tinatawan kan ley nin diretso na tawan nin relihiosong pagtotokdo an saindang mga aki. Sa kasong ini tibaad hagadon kan agom na babae na gamiton an saiyang diretso na ipaaram sa mga aki an saiyang relihiosong mga paniniwala asin gibo, na tibaad kaiba an pagdara sa sainda sa saiyang simbahan.b Siempre, maninigong sunodon kan mga aki an saindang konsensia na pinatood sa Biblia mapadapit sa dai pagpartisipar sa falsong relihiosong mga seremonya. Bilang payo kan pamilya, gagamiton kan ama an diretso nia na adalan an saiyang mga aki asin iiba sinda sa mga pagtiripon sa Kingdom Hall kun posible. Pag-abot ninda sa edad na puede na sindang gumibo nin sadiri nindang mga desisyon, magsasadiri na sindang magdesisyon kun arin na dalan an saindang padudumanan. (Josue 24:15) Kun naheheling kan mga kapwa nia kamagurangan asin kan mga miembro kan kongregasyon na ginigibo nia an gabos na itinotogot sa saiya kan ley tangani na matokdoan nin tama an saiyang mga aki sa dalan kan katotoohan, dai sia madidiskualipikar bilang paraataman.

‘Pangengenot sa Saiyang Kairiba sa Harong sa Marahay na Paagi’

10. Kun magurang sa kongregasyon an sarong lalaking de pamilya, saen an pangenot niang obligasyon?

¹⁰ Minsan sa sarong magurang sa kongregasyon na sarong ama asin na an agom na babae kapwa Kristiano, bakong pasil na bangabangaon nin tama an saiyang panahon asin atension sa saiyang agom na babae, mga aki, asin mga paninimbagan sa kongregasyon. Malinaw na marhay sa Kasuratan na an sarong Kristianong ama may obligasyon na atamanon an saiyang agom na babae asin mga aki. Si Pablo nagsurat: “Tunay na kun an siisay man dai nagsusustento sa mga sadiri nia, asin orog na sa kairiba nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Sa surat man sanang iyan, sinabi ni Pablo na idto sanang may agom na mga lalaki na pinatunayan na sinda marahay na agom na lalaki asin ama an maninigong irekomendar na maglingkod bilang mga paraataman.​—1 Timoteo 3:​1-5.

11. (a) Sa anong mga paagi na an magurang sa kongregasyon maninigong ‘magsustento sa mga sadiri nia’? (b) Paano ini makatatabang sa sarong magurang sa kongregasyon na maotob an saiyang mga paninimbagan sa kongregasyon?

¹¹ An magurang sa kongregasyon maninigong ‘magsustento’ sa mga sadiri nia bako sanang sa materyal kundi pati sa espirituwal asin emosyonal na paagi. An madonong na si Hadeng Salomon nagsurat: “Andama an saimong gigibohon sa luwas, asin andama iyan sa oma. Dangan kaipuhan man na saimong pakosogon an saimong kairiba sa harong.” (Talinhaga 24:27) Kaya minsan ngani sinusustentohan an mga pangangaipo sa materyal, emosyonal, asin sa pag-aling-aling kan saiyang agom na babae asin mga aki, maninigo na pakosogon man sinda sa espirituwal nin sarong paraataman. Ini nagkakaipo nin panahon​—panahon na dai nia ikadudusay sa mga bagay sa kongregasyon. Alagad iyan panahon na may mayaman na balos sa porma nin pampamilyang kaogmahan asin espirituwalidad. Sa katapustapusi, kun makosog sa espirituwal an saiyang pamilya, tibaad mas kadikit na panahon an gagamiton kan magurang sa kongregasyon sa pag-asikaso sa pampamilyang mga problema. Mas magigin libre an isip nia sa pag-asikaso sa mga bagay kan kongregasyon. An halimbawa nia bilang marahay na agom na lalaki asin marahay na ama magtatao nin espirituwal na pakinabang sa kongregasyon.​—1 Pedro 5:​1-3.

12. Sa anong pampamilyang bagay maninigong magtao nin marahay na halimbawa an mga ama na magurang sa kongregasyon?

¹² Kaiba sa pangengenot sa kairiba sa harong sa marahay na paagi an pag-iskedyul nin panahon na mangenot sa sarong pampamilyang pag-adal. Partikularmenteng mahalaga na an kamagurangan magtao nin marahay na halimbawa sa bagay na ini, ta an marigon na mga pamilya nagpapapangyaring magkaigwa nin marigon na mga kongregasyon. An panahon nin sarong paraataman dai maninigo na dayaday na okupadong marhay nin ibang mga pribilehio nin paglilingkod kaya mayo na sia nin panahon na makipag-adal sa saiyang agom na babae asin mga aki. Kun ini an nangyayari, maninigo na siyasaton nia giraray an saiyang iskedyul. Tibaad kaipuhan na liwaton nia an iskedyul o inaan an panahon na itinatao nia sa ibang bagay, na kun beses sinasayumahan pa ngani an nagkapirang pribilehio.

Timbang na Pangangataman

13, 14. Anong hatol an itinao kan “fiel asin madonong na oripon” sa kamagurangan na de pamilya?

¹³ Bakong bago an hatol na gibohon na timbang an mga paninimbagan sa pamilya asin sa kongregasyon. Sa dakol nang taon an “fiel asin madonong na oripon” nagtatao nin hatol sa kamagurangan dapit sa bagay na ini. (Mateo 24:45) Labi nang 37 taon an nakaagi, an The Watchtower kan Setyembre 15, 1959, pahina 553 asin 554, nagsadol: “An totoo, bako daw na sa katotoohan an kaipuhan gibohon na timbang an gabos na naghahagad na ini kan satong panahon? Sa paggibong timbang na ini tawan nin tamang gabat an intereses kan saindong pamilya. Tunay na dai lalaoman ni Jehova Dios an sarong lalaki na gamiton an gabos niang panahon sa aktibidad kan kongregasyon, sa pagtabang sa saiyang mga tugang asin pagtaraed na magkamit nin kaligtasan, pero dai asikasohon an kaligtasan kan sadiri niang kairiba sa harong. An agom na babae asin mga aki nin sarong lalaki pangenot na paninimbagan.”

¹⁴ An Torrengbantayan kan Nobyembre 1, 1986, pahina 19, naghatol: “An pakikikabtang sa ministeryo sa langtad bilang pamilya gigibohon kamong mas harani, pero an pambihirang mga pangangaipo nin mga aki naghahagad nin pagdusay kan saindong pribadong panahon asin emosyonal na kosog. Kun siring, kaipuhan an pagkatimbang tanganing maaraman kun guranong panahon an magagamit nindo para sa . . . mga trabaho sa kongregasyon, mantang inaasikaso man nindo sa espirituwal, emosyonal, asin materyal an ‘mga sadiri nindo.’ Kaipuhan na [an sarong Kristiano] ‘makanood nguna na maggibo nin diosnon na debosyon sa [saiyang] kairiba sa harong.’ (1 Timoteo 5:​4, 8)”

15. Taano an magurang sa kongregasyon na may agom na babae asin mga aki ta nagkakaipo nin kadonongan asin pakamansay?

¹⁵ An sarong talinhaga sa Kasuratan nagsasabi: “Nin huli sa kadonongan an kairiba sa harong mapakokosog, asin nin huli sa pakamansay iyan magigin masarig.” (Talinhaga 24:3) Iyo, tangani na maotob nin sarong paraataman an saiyang teokratikong mga obligasyon asin kadungan kaiyan mapakosog an saiyang kairiba sa harong, tunay na kaipuhan nia an kadonongan asin pakamansay. Sono sa Kasuratan, bako sanang saro an saiyang pangangatamanan. Kalabot an saiyang mga paninimbagan sa pamilya asin an saiyang mga paninimbagan sa kongregasyon. Kaipuhan nia an pakamansay tanganing mapagdanay na timbang an mga ini. (Filipos 1:​9, 10) Kaipuhan nia an kadonongan tanganing ikabugtak kun ano an saiyang mga ipaoorog. (Talinhaga 2:​10, 11) Minsan gurano an pakamate nia nin paninimbagan na asikasohon an saiyang mga pribilehio sa kongregasyon, maninigo niang marealisar na bilang agom na lalaki asin ama, an pangenot na paninimbagan nia na itinao nin Dios iyo an pag-asikaso asin pagliligtas sa saiyang pamilya.

Marahay na mga Ama Saka Marahay na mga Magurang sa Kongregasyon

16. Ano an bentaha nin sarong magurang sa kongregasyon kun sia saro man na ama?

¹⁶ An magurang sa kongregasyon na may mga aki na marahay an ugale puedeng magin tunay na yaman. Kun nakanood siang atamanon nin marhay an saiyang pamilya, nasa kamugtakan siang tabangan an ibang mga pamilya sa kongregasyon. Orog niang nasasabotan an saindang mga problema asin makatatao sia nin hatol na nagpapabanaag kan saiyang sadiring eksperyensia. Makaoogma, rinibong kamagurangan sa bilog na kinaban an marahay an ginigibo bilang mga agom na lalaki, ama, asin paraataman.

17. (a) Ano an maninigo na dai noarin man paglingawan nin sarong lalaki na kapwa ama asin magurang sa kongregasyon? (b) Paano maninigong magpaheling nin pakikidamay an ibang miembro kan kongregasyon?

¹⁷ Tangani na magin magurang sa kongregasyon an sarong lalaking de pamilya, sia kaipuhan na maygurang na Kristiano na, mantang inaataman an saiyang agom na babae asin mga aki, kayang organisaron an saiyang mga gibo tanganing makatao nin panahon asin atension sa iba sa kongregasyon. Maninigo na dai nia noarin man paglingawan na an saiyang pagpapastor minapoon sa harong. Sa pakaaram na an kamagurangan na may agom na babae asin mga aki may paninimbagan kapwa sa saindang mga obligasyon sa pamilya asin sa saindang mga obligasyon sa kongregasyon, an mga miembro kan kongregasyon maghihingoang dai maggibo nin sobrang mga kahagadan sa saindang panahon. Halimbawa, an sarong magurang sa kongregasyon na may mga aki na maeskuela pagkaaga tibaad dai puedeng perming magdanay pa nin kadikit na oras pakalihis kan pagtiripon sa banggi. An ibang miembro kan kongregasyon maninigong saboton ini asin magpaheling nin pakikipagkapwa.​—Filipos 4:5.

An Satong Kamagurangan Maninigong Kamotan Niato

18, 19. (a) An pagsiyasat niato sa 1 Corinto kapitulo 7 nagpangyari sa sato na marealisar an ano? (b) Ibibilang niatong ano an siring na mga Kristiano?

¹⁸ An pagsiyasat niato sa kapitulo 7 kan enot na surat ni Pablo sa mga taga-Corinto nagpangyari sa sato na masabotan na, sa pagsunod sa sadol ni Pablo, kadakol kan lalaking daing agom na ginagamit an saindang katalingkasan sa paglilingkod sa intereses kan Kahadean. Rinibo man an may agom na tugang na lalaki na mayong aki na, mantang nagtatao nin igong atension sa saindang agom na babae, naglilingkod bilang marahay na mga paraataman sa mga distrito, sirkito, kongregasyon, asin sangang opisina kan Watch Tower, na igwa kan marahayon na kooperasyon kan saindang agom na babae. Ultimo, sa haros 80,000 na kongregasyon kan banwaan ni Jehova, igwa nin dakol na ama na bako sanang mamomoton na inaataman an saindang agom na babae asin mga aki kundi nagtatao man nin panahon na paglingkodan an saindang mga tugang bilang mainataman na mga pastor.​—Gibo 20:28.

¹⁹ Si apostol Pablo nagsurat: “An kamagurangan na lalaki na nangengenot sa marahay na paagi ibilang na angay sa dobleng onra, orog na idtong mga nagmamaigot sa pagtaram asin pagtokdo.” (1 Timoteo 5:17) Iyo, an kamagurangan na nangengenot sa marahay na paagi sa saindang harong asin sa kongregasyon maninigong tawan kan satong pagkamoot asin paggalang. Tunay na maninigo niatong ‘padagos na kamotan an siring na mga lalaki.’​—Filipos 2:29.

[Mga Nota sa Ibaba]

Bilang Repaso

◻ Paano niato naaaraman na an dakol na magurang sa kongregasyon kan enot na siglo C.E. mga lalaking de pamilya?

◻ Ano an kahagadan sa may agom na kamagurangan na may mga aki, asin taano?

◻ Ano an boot sabihon kan pagkaigwa nin “mga aking nagtutubod,” alagad ano kun dai pilion kan aki kan magurang sa kongregasyon na maglingkod ki Jehova?

◻ Sa anong mga bagay na an magurang sa kongregasyon maninigong ‘magsustento sa mga sadiri nia’?

[Retrato sa pahina 23]

An marigon na mga pamilya nagpapapangyaring magkaigwa nin marigon na mga kongregasyon