“Ingatan Mo an Ipinagkatiwala sa Saimo”

1-2. Sigun sa 1 Timoteo 6:20, ano an itinao ki Timoteo?

SA PARATI, ipinagkakatiwala niyato sa iba an satong mahalagang mga bagay. Halimbawa, tibaad ideposito niyato sa bangko an satong kuwarta. Pag arog kaiyan, inaasahan niyato na iingatan an satong kuwarta asin dai iyan mawawara o mahahabon. Kaya nasasabutan niyato kun ano an buot sabihon kan ipagkatiwala sa saro an sarong bagay na para sa sato mahalagang marhay.

² Basahon an 1 Timoteo 6:20. Ipinagirumdom ni apostol Pablo ki Timoteo na nag-ako ini nin sarong mahalagang marhay na bagay—an tamang kaaraman manungod sa katuyuhan nin Diyos para sa katawuhan. Ipinagkatiwala man ki Timoteo an pribilehiyo na “ihulit . . . an tataramon” asin na “gibuhon . . . an trabaho nin sarong ebanghelisador.” (2 Tim. 4:2, 5) Dinagka ni Pablo si Timoteo na ingatan kun ano an ipinagkatiwala sa saiya. Arog ni Timoteo, may ipinagkatiwala sa satong mahalagang mga bagay. Ano iyan? Asin taano ta dapat niyatong ingatan an kayamanan na itinao sa sato ni Jehova?

3-4. Ano an nagkapirang dahilan kun taano ta mahalagang marhay an mga katotoohan sa Bibliya?

³ May kabuutan kitang tinawan ni Jehova nin tamang kaaraman manungod sa mahalagang marhay na mga katotoohan na yaon sa saiyang Tataramon, an Bibliya. Mahalagang marhay an mga katotoohan na ini huling tinutukduan kita kaini kun paano magkakaigwa nin marahay na relasyon ki Jehova asin ipinapaliwanag kaiyan kun ano an nagtatao nin tunay na kaugmahan sa buhay. Pag inako niyato an mga katotoohan na iyan asin namumuhay kauyon kaiyan, napapatalingkas kita sa pagkauripon sa palsong mga katukduan asin imoral na mga gibo.—1 Cor. 6:9-11.

⁴ An saro pang dahilan kaya mahalagang marhay an mga katotoohan na yaon sa Tataramon nin Diyos iyo na ihinahayag sana iyan ni Jehova sa mapakumbabang mga tawo na “igwang pusong nasa tamang kamugtakan.” (Gibo 13:48) Inaako kan mga ini an paagihan na ginagamit niya ngunyan para itao an mga katotoohan na iyan. (Mat. 11:25; 24:45) Dai niyato manunudan an mga katotoohan na ini kun sa sadiri sana niyato, asin mayo nanggad nin ano man na bagay na mas mahalaga kisa kaiyan.—Tal. 3:13, 15.

 5. Ano pa an ipinagkatiwala sa sato ni Jehova?

⁵ Ipinagkatiwala man sa sato ni Jehova an pribilehiyo na itukdo sa iba an katotoohan manungod sa saiya asin sa saiyang mga katuyuhan. (Mat. 24:14) An dara niyatong mensahe daing kaagid an halaga huling tinatabangan kaiyan an mga tawo na magin parte kan pamilya ni Jehova asin tinatawan sinda kan oportunidad na magkamit nin buhay na daing katapusan. (1 Tim. 4:16) Sadit man o dakula an personal niyatong pakikikabtang sa ministeryo, sinusuportaran ta an pinakamahalagang gibuhon na isinasagibo sa panahon na ini. (1 Tim. 2:3, 4) Sarong onra nanggad na magin kapwa trabahador nin Diyos!—1 Cor. 3:9.

 6. Ano an nangyari sa nagkapira na dai nagdanay na maingat?

⁶ May mga kakontemporanyo si Timoteo na dai pinahalagahan an pribilehiyo ninda bilang kapwa trabahador nin Diyos. Huling namutan ni Demas an sistemang ini nin mga bagay, binutasan niya an saiyang pribilehiyo na maglingkod kaiba ni Pablo. (2 Tim. 4:10) Minalataw na binayaan ni Figelo asin Hermogenes an saindang ministeryo huling natakot sinda na maeeksperyensiyahan man ninda an persekusyon na inagihan ni Pablo. (2 Tim. 1:15) Si Himeneo, Alejandro, asin Fileto nagin mga apostata asin binayaan an katotoohan. (1 Tim. 1:19, 20; 2 Tim. 2:16-18) Minalataw na gabos sinda makusog dati an pagtubod, pero naiwara ninda an saindang kakayahan na mahiling kun ano an tunay na mahalaga.

 7. Anong mga taktika an ginagamit sa sato ni Satanas?

⁷ Paano pinupurbaran ni Satanas na bayaan niyato an mga kayamanan na ipinagkatiwala sa sato ni Jehova? Mangnuhon an nagkapira sa mga taktika ni Satanas. Ginagamit niya an libangan asin an media tanganing magpalakop nin mga pamantayan, kaisipan, asin paggawi na makakapaluya sa pagkakapot niyato sa katotoohan. Pinupurbaran niyang takuton kita paagi sa panggigipit nin mga kairiba o persekusyon tanganing papunduhon kita sa paghuhulit. Asin pinupurbaran niyang akiton kita na magdangog sa “inaapod daang ‘kaaraman’” kan mga apostata tanganing bayaan niyato an katotoohan.—1 Tim. 6:20, 21.

 8. Ano an manunudan mo sa eksperyensiya kan brother na si Daniel?

⁸ Kun dai kita mag-iingat, puwedeng luway-luway na magluya an satuyang pagkakapot sa katotoohan. Pag-isipan an eksperyensiya ni Daniel,b na mahilig sa mga video game. Sinabi niya: “Mga diyes anyos ako kaidto kan magpuon akong magkawat nin mga video game. Kan primero, akseptable man na mga video game an kinakawat ko. Pero luway-luway akong nagpuon na magkawat nin mga video game na madahas asin sa-demonyo.” Pag-abot nin panahon, mga 15 oras na siyang nagkakawat nin mga video game kada aldaw. “Aram ko sa sadiri ko na irinarayo ako ki Jehova kan klase nin mga video game na kinakawat ko saka kan lawig nin panahon na itinatao ko diyan. Pero tuminagas na an puso ko, kaya kumbinsido ako na dai sako aplikado an mga prinsipyo sa Bibliya,” an sabi ni Daniel. An dai gayo risang impluwensiya kan libangan puwedeng madali sanang makapaluya sa pagkakapot niyato sa katotoohan. Kun mangyari iyan, tibaad maiwara niyato an mahalagang mga bagay na itinao sa sato ni Jehova.

 9. Sigun sa 1 Timoteo 1:18, 19, sa ano ikinumparar ni Pablo si Timoteo?

⁹ Basahon an 1 Timoteo 1:18, 19. Ikinumparar ni Pablo si Timoteo sa sarong suldados asin dinagka ini na ‘ipadagos an matanos na pakikilaban.’ An pakikilaban na iyan bakong literal, kundi espirituwal. Sa anong mga paagi nakakaagid an mga Kristiyano sa mga suldados na nasa pakikilaban? Anong mga kuwalidad an kaipuhan niyato bilang mga suldados ni Cristo? Pag-ulayan ta an limang leksiyon na manunudan ta sa ilustrasyon ni Pablo. Makakatabang sa sato an mga leksiyon na ini na mangapot sa katotoohan.

10. Ano an debosyon sa Diyos, asin taano ta kaipuhan niyato iyan?

¹⁰ Magkaigwa nin debosyon sa Diyos. An sarong marahay na suldados maimbod. Maigot siyang makikipaglaban para protektaran an mahal niya sa buhay o an sarong bagay na mahalaga sa saiya. Dinagka ni Pablo si Timoteo na magkaigwa nin debosyon sa Diyos—na iyo an kaimbudan sa Diyos. (1 Tim. 4:7) Mantang nagkukusog an pagkamuot asin debosyon niyato sa Diyos, nagkukusog man an pagmawot niyatong mangapot sa katotoohan.—1 Tim. 4:8-10; 6:6.

11. Taano ta kaipuhan niyato an disiplina sa sadiri?

¹¹ Magkaigwa nin disiplina sa sadiri. Dapat na disiplinahon nin sarong suldados an sadiri niya tanganing magdanay siyang andam sa pakikilaban. Nagdanay na makusog an espirituwalidad ni Timoteo huling sinunod niya an ipinasabong na sadol ni Pablo na rayuan an salang mga pagmawot, na magmaigot na mahiling saiya an diyosnon na mga kuwalidad, asin na makiasosyar sa mga kapagtubod. (2 Tim. 2:22) Nangaipo iyan nin disiplina sa sadiri. Kaipuhan niyato nin disiplina sa sadiri tanganing manggana kita sa pakikipaglaban niyato sa satong makalaman na mga pagmawot. (Roma 7:21-25) Apuwera kaiyan, kaipuhan niyato nin disiplina sa sadiri tanganing padagos niyatong mahali an lumang personalidad asin maisulot an bagong personalidad. (Efe. 4:22, 24) Asin pag pagal na kita pagkatapos nin sibot na maghapon, tibaad kaipuhan niyatong piriton an satong sadiri para mag-atender sa pagtiripon.—Heb. 10:24, 25.

12. Sa anong mga paagi kita magigin mahusay sa paggamit nin Bibliya?

¹² Kaipuhan nin sarong suldados na mag-ensayo sa paggamit kan saiyang mga armas. Para magin mahusay, kaipuhan niyang gibuhon iyan nin regular. Kaagid kaiyan, kaipuhan niyatong magin mahusay sa paggamit kan Tataramon nin Diyos. (2 Tim. 2:15) Makakanuod kita sa satong mga pagtiripon nin nagkapirang paagi para magibo iyan. Pero tanganing makumbinsir niyato an iba na mahalaga nanggad an katotoohan sa Bibliya, kaipuhan na magin regular kita sa satong personal na pag-adal sa Bibliya. Kaipuhan na gamiton niyato an Tataramon nin Diyos para pakusugon an satong pagtubod. Bako lang basta pagbasa sa Bibliya an kalabot digdi. Nangangaipo ini nin paghurop-hurop sa satong binabasa asin pag-research sa satong mga publikasyon tanganing masabutan asin maiaplikar ta nin tama an Kasuratan. (1 Tim. 4:13-15) Dangan magagamit na niyato an Tataramon nin Diyos para tukduan an iba. Sa giraray, bako lang basta pagbasa nin teksto sa Bibliya an kalabot digdi. Gusto niyatong tabangan an mga nagdadangog sa sato na masabutan an teksto asin kun paano iyan aplikado sa sainda. Paagi sa paghihinguwang magin regular sa satong personal na pag-adal sa Bibliya, mapapauswag niyato an satong kakayahan sa paggamit kan ipinasabong na Tataramon nin Diyos para tukduan an iba.—2 Tim. 3:16, 17.

13. Kauyon kan Hebreo 5:14, taano ta dapat kitang magin mapagmansay?

¹³ Magin mapagmansay. Dapat na kayang antisiparon nin sarong suldados kun may peligro dangan likayan iyan. Dapat man niyatong manudan na mamidbid an mga sitwasyon na puwedeng makadanyar sa sato dangan humiro para malikayan an peligro. (Tal. 22:3; basahon an Hebreo 5:14.) Halimbawa, kaipuhan niyatong madunong na pilion an satong libangan. An mga programa sa telebisyon asin pelikula sa parati nagtatampok nin imoral na paggawi. An siring na paggawi nakakapaanggot sa Diyos asin siguradong makakadanyar. Kaya, linilikayan niyato an libangan na puwedeng luway-luway na makapaluya sa satong pagkamuot sa Diyos.—Efe. 5:5, 6.

14. Paano nakatabang ki Daniel an pakasabot?

¹⁴ Nasabutan ni Daniel, na sinambit kasubago, na an pagkawat nin madahas asin sa-demonyong mga video game sarong problema. Nag-research siya sa Watchtower Library para makahanap nin materyal na makakatabang sa saiya na maatubang an saiyang problema. Ano an nagin epekto kaiyan sa saiya? Nagpundo na siya sa pagkawat nin maraot na mga video game. Kinanselar niya an mga subscription niya sa mga online game asin dai na siya nakikawat sa ibang mga gamer. Sinabi ni Daniel, “Imbes na magkawat nin mga video game, nagpuon akong magtao nin panahon sa paggibo nin mga aktibidad sa luwas o sa pakikiasosyar sa mga amigo sa kongregasyon.” Naglilingkod na ngunyan si Daniel bilang payunir asin elder.

15. Taano ta peligroso an bakong totoong mga istorya?

¹⁵ Arog ni Timoteo, dapat man niyatong mamidbid an peligro kan salang impormasyon na ipinapalakop nin mga apostata. (1 Tim. 4:1, 7; 2 Tim. 2:16) Halimbawa, tibaad purbaran nindang magpalakop nin bakong totoong mga istorya manungod sa satong mga tugang o magtanom nin mga pagduda manungod sa organisasyon ni Jehova. An salang mga impormasyon na iyan puwedeng makapaluya sa satong pagtubod. Dai kita dapat magpadaya sa propagandang ini. Taano? Huling an siring na mga istorya pinapalakop nin “mga tawo na may maraot na kaisipan asin dai na nakakasabot kan katotoohan.” An pasuhan ninda iyo na magpuon nin “pakipagdiskutiran asin pakipagdebate.” (1 Tim. 6:4, 5) Gusto ninda na maniwala kita sa pakaraot ninda tanganing pagdudahan na niyato an satong mga tugang.

16. Anong mga pandisturbo an dapat niyatong likayan?

¹⁶ Likayan an mga pandisturbo. Bilang “matibay na suldados ni Cristo Jesus,” kinaipuhan ni Timoteo na magdanay na nakapokus sa ministeryo imbes na malingling kan sekular o materyal na mga bagay. (2 Tim. 2:3, 4) Arog ni Timoteo, dai kita dapat magpadisturbo kan pagmawot na magkaigwa nin mas dakul na materyal na bagay. “An mapandayang kapangyarihan nin kayamanan” puwedeng makapuot sa satong pagkamuot ki Jehova, sa satong pagpapahalaga sa Tataramon nin Diyos, asin sa satong pagmawot na ihiras iyan sa iba. (Mat. 13:22) Dapat niyatong pagdanayon na simple an satong buhay asin gamiton an satong panahon asin kusog para “padagos na hanapon nguna an Kahadian.”—Mat. 6:22-25, 33.

17-18. Ano an puwede niyatong gibuhon para makalikay sa espirituwal na danyos?

¹⁷ Magin andam na humiro tulos. Kaipuhan nin sarong suldados na pagplanuhan antes pa kun paano siya mahiro. Para maingatan niyato an mga bagay na ipinagkatiwala sa sato ni Jehova, kaipuhan niyatong humiro tulos pag may peligro. Ano an makakatabang sa sato na magibo iyan? Kaipuhan niyatong pagplanuhan antes pa kun ano an gigibuhon niyato pag may peligro.

¹⁸ Bilang ilustrasyon, bago magpuon an sarong okasyon, sa parati sinasabi nguna sa mga nag-atender na hanapon kun sain an pinakaharaning exit. Taano? Para makaluwas tulos sinda pag may emerhensiya. Sa kaagid na paagi, puwede kitang magpraktis antes pa kun sain kitang “exit” maluwas kun may bigla kitang mahiling na imoral na eksena, grabeng kadahasan, o apostatang materyal mantang nag-i-Internet kita o naghihiling nin pelikula o programa sa TV. Kun nag-aandam kita sa kun ano an mga posibleng mangyari, makakadulag tulos kita sa espirituwal na danyos asin magdadanay kitang malinig sa paghiling ni Jehova.—Sal. 101:3; 1 Tim. 4:12.

19. Anong mga bendisyon an maeeksperyensiyahan niyato kun iingatan ta an mahalagang mga bagay na itinao sa sato ni Jehova?

¹⁹ Dapat niyatong ingatan an mahalagang mga bagay na itinao sa sato ni Jehova—an mahalagang marhay na mga katotoohan sa Bibliya asin an pribilehiyong itukdo iyan sa iba. Kun ginigibo niyato iyan, magkakaigwa kita nin malinig na konsiyensiya, nin buhay na may tunay na kahulugan, asin mamamatian niyato an kaugmahan sa pagtabang sa iba na mamidbid si Jehova. Paagi sa saiyang tabang, magigibo niyatong ingatan kun ano an ipinagkatiwala sa sato.—1 Tim. 6:12, 19.