Marahay na Personal na Itsura

DAKOL an sinasabi kan saindong personal na itsura manongod sa saindo. Mantang an hineheling ni Jehova kun ano an puso, an mga tawo sa pankagabsan nagkokonklusyon basado sa “kun ano an naheheling kan mga mata.” (1 Sam. 16:7) Kun kamo malinig asin areglado an bulos, posibleng marhay na iisipon nin iba na kamo may paggalang sa sadiri, asin mas may tendensia sindang maghinanyog sa saindo. Huli sa angay nindong paggubing magigin paborable man an impresyon sa organisasyon na saindong irinerepresentar asin sa pagheling kan mga naghihinanyog sa saindo sa Dios na saindong sinasamba.

Mga Susundan na Dapat Iaplikar. An Biblia dai nagtatao nin dakol na reglamento manongod sa personal na itsura. Alagad iyan nagtatao nin timbang na mga prinsipyo na makatatabang sa sato na gumibo nin tamang mga desisyon. Pundamental sa gabos na ini an bagay na satuyang ‘ginigibo an gabos na bagay sa ikamumuraway nin Dios.’ (1 Cor. 10:31) Anong mga prinsipyo an kalabot kun mapadapit sa satong personal na itsura?

Enot, ineenkaminar kita kan Biblia na magin malinig, sa satong hawak sagkod sa satong gubing. Sa saiyang Ley sa suanoy na Israel, si Jehova nagtao nin mga kahagadan mapadapit sa kalinigan. Halimbawa, kun nagtatrabaho an mga saserdote, kaipuhan na sinda magkarigos asin labhan an saindang gubing sa designadong mga panahon. (Lev. 16:4, 24, 26, 28) An mga Kristiano bakong sakop kan Ley ni Moises, alagad balido sagkod ngonyan an mga prinsipyong yaon dian. (Juan 13:10; Kap. 19:8) Nangorogna kun kita pasiring sa lugar nin pagsamba o nakikikabtang sa ministeryo sa langtad, maninigo na malinig an satong hawak, an satong hangaw, asin an satong gubing tangani na dai kita ikabata nin iba. An mga nagpapahayag o nakikikabtang sa mga demonstrasyon sa atubangan kan kongregasyon maninigong magtao nin marahay na halimbawa sa bagay na ini. An pagtao nin atension sa satong personal na itsura nagpapaheling nin paggalang ki Jehova asin sa saiyang organisasyon.

Ikaduwa, pinakasasadol kita kan Biblia na pataluboon an kabinian asin toltol na isip. Sinadol ni apostol Pablo an mga Kristiana na “magsamno sa saindang sadiri . . . na may kabinian asin toltol na isip, bakong nin mga estilo nin mga pagsalapid nin buhok asin bulawan o perlas o mamahalon na gayong gubing, kundi sa paagi na angay sa mga babae na naghihingakong sinda may reberensia sa Dios.” (1 Tim. 2:9, 10) An kabinian asin toltol na isip importante man sa gubing asin pag-alinyar nin mga lalaki.

An tawong mabini interesado na dai makapaanggot sa iba na dai man kuta kaipuhan asin dai makaapod nin sobrang atension sa sadiri. An toltol na isip nagbubunga nin diskresion, o marahay na paghusgar. An tawong nagpapaheling kan mga kualidad na ini may pagkatimbang na bunga nin paggalang sa diosnon na mga pamantayan. Dai ipinupuera kan pagpaheling kan mga kualidad na ini an paggubing sa paaging nakaaatraer kundi tinatabangan kita na magin rasonable sa satong itsura asin likayan an maartehon na mga estilo nin gubing asin pag-alinyar. (1 Juan 2:16) Gusto niatong iaplikar an mga prinsipyong ini baga man kita yaon sa lugar nin pagsamba, nakikikabtang sa ministeryo sa langtad, o may ginigibong ibang aktibidad. Dawa an satong pangaroaldaw na gubing maninigong magpabanaag nin kabinian asin toltol na isip. Sa eskuelahan o sa satong sekular na trabaho, magkakaigwa nin mga oportunidad na gumibo nin impormal na paghuhulit. Minsan ngani an sulot niato tibaad bakong kapareho kan kun kita nag-aatender sa mga pagtiripon, kombension, asin asamblea, an satong gubing maninigo pa man giraray na maayos, malinig, asin mabini.

Siempre, bakong parareho an gubing niato gabos. Dai man iyan inaasahan sa sato. Laen-laen an gusto nin mga tawo, asin ini tama man. Alagad maninigo na pirmeng iaplikar an mga susundan sa Biblia.

Ipinaheling ni apostol Pedro na mas importante pa ngani kisa mga estilo nin buhok asin pan-ibabaw na gubing an gubing na konektado sa “natatagong persona kan puso.” (1 Ped. 3:3, 4) Kun an puso niato pano nin pagkamoot, kagayagayahan, katoninongan, kabootan, asin pagtubod na marigon an pundasyon, an mga ini magigin espirituwal na mga gubing para sa sato na talagang nagtatao nin onra sa Dios.

Ikatolo, sinasadol kita kan Biblia na estudyaran kun baga husay an satong itsura. Sa 1 Timoteo 2:9, nasasambitan an “husay na gubing.” Minsan ngani si apostol Pablo nagtataram manongod sa gubing nin mga babae, an prinsipyong iyan aplikado man sa mga lalaki. An bagay na husay maayos asin areglado. Baga man maykaya kita o bako, puede kitang magkaigwa nin maayos na itsura.

An saro sa enot na mga aspekto nin personal na itsura na naririsa nin iba iyo an satong buhok. Iyan dapat na maayos, o husay. An lokal na kostumbre sagkod erensia pareho may labot sa estilo kan buhok nin mga tawo. Sa 1 Corinto 11:14, 15, manonompongan niato an hatol ni apostol Pablo manongod sa estilo nin buhok, na malinaw na kinonsiderar an duwang bagay na ini. Minsan siring, kun an estilo kan buhok nin saro nagtatao kan impresyon na gusto niang mag-itsurang saro na bako niang kasekso, ini kontra sa mga prinsipyo kan Biblia.​—Deut. 22:5.

Para sa mga lalaki, puedeng kaiba sa maayos na personal na itsura an pagigin daing bigote. Sa mga lugar na may dignidad an pagheling nin dakol sa bigote, an siisay man na igwa kaini maninigo na papagdanayon iyan na maayos an tusar.

Ikaapat, an satong itsura dai maninigong magpabanaag nin pagkamoot sa kinaban asin sa mga ugale kaiyan. Nagpatanid si apostol Juan: “Dai kamo mamoot sa kinaban o sa mga bagay kan kinaban.” (1 Juan 2:15-17) An kinaban na ini midbid sa dakol na makasalan na mawot. Kabilang digdi nasasambitan ni Juan an mawot kan makasalan na laman asin an pagpaabaw-abaw kan mga rogaring nin saro. Dinadara man kan Kasuratan an atension sa espiritu nin pagrebelde, o pakisuway sa autoridad. (Tal. 17:11; Efe. 2:2) An mga mawot asin aktitud na ini parateng nahahayag sa paggubing asin pag-alinyar nin mga tawo. Bilang resulta, an itsura ninda tibaad bakong mabini, seksi, sobra sa dekorasyon, kurumos, waga, o pabaya. Bilang mga lingkod ni Jehova, linilikayan niato an mga estilo na nagpapabanaag nin siring na mga ugale na bakong sa Kristiano.

Imbes na arogon an kinaban, kanigoan kamas marahay na pabayaan na an marahay na halimbawa nin maygurang sa espirituwal na mga lalaki asin babae sa Kristianong kongregasyon an makaimpluwensia sa saindong gubing asin pag-alinyar! An hoben na mga lalaki na naglalaom na magpahayag sa publiko sa maabot na panahon puedeng masdan an gubing kan mga kualipikado nang tumao nin pampublikong mga pahayag. An gabos makakanood sa halimbawa nin mga indibiduwal na dakol nang taon na nakikikabtang nin maimbod sa pampublikong ministeryo.​—1 Tim. 4:12; 1 Ped. 5:2, 3.

Ikalima, sa pagdesisyon kun ano an tama, dapat na isaisip niato na “dawa si Cristo dai nagpanigo sa saiya man sana.” (Roma 15:3) An pangenot na interes ni Jesus iyo an pag-otob kan kabotan nin Dios. Inenot man ni Jesus an pagtabang sa iba kisa personal na kagianan. Pag-abot sa nagkapirang estilo nin gubing asin pag-alinyar, kun may mabugtak nin kaolangan sa pag-oltanan niato asin kan mga tawo sa lugar na pinaglilingkodan niato ngonyan, ano an maninigo niatong gibohon? An pag-arog sa mapakumbabang espiritu na ipinaheling ni Cristo makatatabang sa sato na magdesisyon nin madonong. Sinabi ni apostol Pablo an prinsipyo: “Dai kami sa ano man na paagi nagtatao nin ano man na dahelan nin pagkasingkog.” (2 Cor. 6:3) Sa dahelan na iyan tibaad lingawan ta nguna an mga estilo nin buhok o gubing na may tendensiang serahan an isip kan mga gusto niatong hulitan.

Postura. Kalabot man sa marahay na personal na itsura an tamang postura. Siempre, bakong parareho an tindog niato gabos, asin dai kita naghihingoa na kumomporme sa sarong arogan. Minsan siring, mahalagang mangnohon na segun sa pagkagamit sa Biblia, an pagtindog nin tanos nagpapamate nin personal na dignidad asin optimismo. (Lev. 26:13; Luc. 21:28) Minsan siring, huli sa pagtrabaho nin dakol na taon na nakaduko o huli sa naglalangkaw na edad o pisikal na kaluyahan, an sarong tugang na lalaki o babae tibaad dai na makatindog nin tanos o tibaad kaipuhan na sumandig. Alagad para sa mga kaya iyan, rekomendado an pagtindog nin tanos kun nakikipag-olay sa iba tangani na dai magpaheling nin pagkaindiperente o garo paghagad nin dispensasyon. Siring man, minsan ngani bakong sala na kun minsan ibugtak nin nagpapahayag an saiyang kamot sa podyum, mas positibong impresyon an sa pankagabsan ikatatao sa mga nagdadangog kun dai sia mag-amba sa podyum.

Maayos na Kasangkapan. Bako sana na maninigong magin malinig asin husay an satong personal na itsura kundi maninigo man na magin malinig asin maayos an satong kasangkapan na ginagamit sa ministeryo.

Konsiderara an saindong Biblia. Bakong posible para sa sato gabos na kumua nin bagong Biblia kun luma na an satong Biblia. Minsan siring, dawa gurano na kahaloy niatong ginagamit an satong Biblia, maninigong maheling dian an maingat na paggamit.

Siempre, kadakol kan paagi nin pagbugtak nin gamit sa bag, alagad iyan maninigong maayos. Nakaheling na daw kamo nin mga papel na nahulog sa Biblia kan babasahon nin sarong parahayag an sarong teksto sa kagharong o tibaad kan nagpapahayag sa kongregasyon an sarong tugang? Nadisturbo kamo, bako daw? Kun nakadidisturbo an mga papel na napapaipit sa Biblia, tibaad paagi sa pagsaray kaiyan sa ibang lugar magin husay an saindong kasangkapan. Aramon man na an pagbugtak kan Biblia o iba pang relihiosong publikasyon sa salog ibinibilang na grabeng kadaihan nin galang sa nagkapirang kultura.

Maninigo na magin importante sa sato an marahay na personal na itsura. Nakaiimpluwensia man iyan sa pagheling nin iba sa sato. Alagad orog sa gabos, tinatawan niato iyan nin maingat na atension ta boot niatong ‘masamnohan an katokdoan kan satong Paraligtas, an Dios, sa gabos na bagay.’​—Tito 2:10.