Mga Hoben​—Pagmaigotan na Aboton an mga Pasohan na Nagtataong Onra sa Dios

“Patuodon mo an saimong sadiri na diosnon na debosyon an saimong intension.”​—1 TIMOTEO 4:7.

1, 2. (a) Taano ta tinawan ni Pablo nin komendasyon si Timoteo? (b) Paano an mga hoben ngonyan ‘pinapatuod an saindang sadiri na diosnon na debosyon an saindang intension’ na pag-aaboton?

“MAYO na ako nin iba na may kaisipan na arog kan sa saiya na mangangataman nin tunay sa mga bagay mapadapit sa saindo. . . . Siring sa aki sa kaibanan nin ama sia naglingkod na garo oripon sa kaibanan ko sa pagpalakop kan maogmang bareta.” (Filipos 2:20, 22) Iiniba ni apostol Pablo an mainit na komendasyon na ini sa saiyang surat sa enot na siglong mga Kristiano sa Filipos. Siisay an pinapanongdan nia? Si Timoteo, an mas hoben na kaibaiba nia sa pagbiahe. Imahinaron kun paano seguradong nakapaogma sa puso ni Timoteo an pagkompirmar na ini kan kapadangatan asin kapanarigan ni Pablo!

² An espirituwal an kaisipan na mga hoben arog ni Timoteo pirmeng nagigin kapakipakinabang na marhay sa tahaw kan banwaan ni Jehova. (Salmo 110:3) Ngonyan, dakol na hoben sa organisasyon nin Dios an naglilingkod bilang mga payunir, misyonero, boluntaryo sa pagtogdok, asin Bethelite. Kaomaw-omaw man na marhay an mga maigot na nakikikabtang sa mga aktibidad kan kongregasyon mantang inaasikaso an iba pang mga paninimbagan. An siring na mga hoben nag-aako nin tunay na satispaksion na hale sa pagmamaigot na aboton an mga pasohan na nagtataong onra sa satong langitnon na Ama, si Jehova. Talagang ‘pinapatuod ninda an saindang sadiri na diosnon na debosyon an saindang intension’ na pag-aaboton.—1 Timoteo 4:7, 8.

 3. Anong mga hapot an kokonsideraron sa artikulong ini?

³ Bilang sarong hoben, pinagmamaigotan mo daw na aboton an espesipikong espirituwal na mga pasohan? Saen ka makakanompong nin tabang asin pagparigon sa boot tanganing magibo iyan? Paano mo malalabanan an mga pangigipit kan materyalistikong kinaban na ini? Anong mga bendisyon an malalaoman mong akoon kun pagmamaigotan mong aboton an mga pasohan na nagtataong onra sa Dios? Aramon niato an simbag sa mga hapot na ini paagi sa pagkonsiderar sa buhay asin karera ni Timoteo.

An Pinaghalean ni Timoteo

 4. Sabihon sa halipot an buhay ni Timoteo bilang sarong Kristiano.

⁴ Nagdakula si Timoteo sa Listra, sarong sadit na banwaan sa Romanong probinsia nin Galacia. Posibleng marhay na nanodan nia an manongod sa Kristianismo kan sia tinedyer pa, kaidtong si Pablo maghulit sa Listra kan mga 47 C.E. Si Timoteo nagkaigwa tolos nin marahayon na reputasyon sa tahaw kan Kristianong mga tugang duman. Kan magbalik sa Listra pakalihis nin duwang taon asin maaraman an pag-oswag ni Timoteo, pinili ni Pablo si Timoteo bilang kaibaiba nia sa pagmimisyonero. (Gibo 14:5-20; 16:1-3) Kan magin maygurang si Timoteo, ipinaniwala sa saiya an mas dakula pa nganing mga paninimbagan, kaiba an importanteng marhay na asignasyon na pakosogon an mga tugang. Kan si Pablo, mantang nasa bilanggoan sa Roma, magsurat ki Timoteo kan mga 65 C.E., si Timoteo naglilingkod kaidto bilang sarong Kristianong magurang sa kongregasyon sa Efeso.

 5. Oyon sa 2 Timoteo 3:14, 15, anong duwang dahelan an nagkontribwir sa desisyon ni Timoteo na pagmaigotan na aboton an espirituwal na mga pasohan?

⁵ Malinaw na pinili ni Timoteo na pagmaigotan na aboton an espirituwal na mga pasohan. Alagad ano an nagmotibar sa saiya na gibohon iyan? Sa ikaduwang surat nia ki Timoteo, nasambitan ni Pablo an duwang nagdedeterminar na dahelan. “Magpadagos ka sa mga bagay na saimong nanodan asin nakombensir na paniwalaan,” an isinurat nia, “mantang aram mo kun kiisay mo iyan nanodan asin na poon sa pagkaomboy naaraman mo na an banal na mga kasuratan.” (2 Timoteo 3:14, 15) Siyasaton nguna niato an nagin kabtang kan ibang mga Kristiano sa mga pagpili ni Timoteo.

Pakinabang sa Positibong mga Impluwensia

 6. Anong pagsasanay an inako ni Timoteo, asin paano sia naghimate?

⁶ Nagdakula si Timoteo sa sarong harong na nababanga huli sa relihion. An saiyang ama sarong Griego, asin an saiyang ina, si Eunice, saka an saiyang lolang si Loida Judio an ginikanan. (Gibo 16:1) Si Timoteo tinokdoan ni Eunice asin Loida nin mga katotoohan hale sa Hebreong Kasuratan poon sa saiyang pagkaomboy. Pagkakombertir ninda sa Kristianismo, daing duwa-duwa na nagtabang sinda sa pagkombensir sa saiya na magtubod sa Kristianong mga katokdoan. Malinaw nanggad na lubos na inaprobetsaran ni Timoteo an marahayon na pagsasanay na ini. Si Pablo nagsabi: “Nagigirumdoman ko an pagtubod na yaon sa saimo na dai nin ano man na pagsaginsagin, asin na enot ngunang yaon sa saimong lola na si Loida asin sa saimong ina na si Eunice, alagad may pagkompiar ako na yaon man sa saimo.”—2 Timoteo 1:5.

 7. Anong bendisyon an ikinakaogma nin dakol na hoben, asin paano ini nagtataong pakinabang sa sainda?

⁷ Ngonyan, dakol na hoben an binendisyonan nin matatakton sa Dios na mga magurang asin apoon na minimidbid an kahalagahan nin espirituwal na mga pasohan, kapareho ni Loida asin Eunice. Halimbawa, nagigirumdoman pa ni Samira an halawig na mga pakikipag-olay nia kaidto sa saiyang mga magurang kan sia tinedyer pa. “Tinokdoan ako ni Nanay asin ni Tatay na mansayon an mga bagay siring kan pagmansay ni Jehova saka gibohon na prioridad an paghuhulit,” an pagsaysay nia. “Pirme ninda akong minomotibar na pagmaigotan na aboton an bilog na panahon na paglilingkod.” Paborable an nagin reaksion ni Samira sa pagparigon sa boot kan saiyang mga magurang asin ngonyan ikinakaogma nia an pribilehio nin paglilingkod bilang miembro kan pamilyang Bethel sa saiyang nasyon. Kun pinaparigon kamo kan saindong mga magurang na magkonsentrar sa espirituwal na mga pasohan, tawan nin maingat na pagkonsiderar an saindang sadol. An iniisip ninda iyo an pinakaikakarahay nindo.—Talinhaga 1:5.

 8. Paano nakinabang si Timoteo sa nakakapakosog na Kristianong pakiibaiba?

⁸ Mahalaga man para sa saindo na maghanap nin nakakapakosog na pakiibaiba sa Kristianong kasararoan nin magturugang. Namidbid na marhay si Timoteo kan Kristianong kamagurangan sa sadiri niang kongregasyon asin kan mga nasa Iconio, mga 30 kilometros an rayo. (Gibo 16:1, 2) Kinultibar nia an dayupot na pakikikatood ki Pablo, saro na may mapuersang personalidad. (Filipos 3:14) An mga surat ni Pablo nagpaparisa na si Timoteo maogmang nag-ako nin sadol asin na ini listo sa pag-arog sa mga halimbawa nin pagtubod. (1 Corinto 4:17; 1 Timoteo 4:6, 12-16) Si Pablo nagsurat: “Ika maingat na nagsunod sa sakong katokdoan, sa sakong pamumuhay, sa sakong katuyohan, sa sakong pagtubod, sa sakong pakatios, sa sakong pagkamoot, sa sakong pagtagal.” (2 Timoteo 3:10) Iyo, maingat na nagsunod si Timoteo sa halimbawa ni Pablo. Kaagid kaiyan, kun magigin dayupot kamo sa mga indibiduwal sa kongregasyon na makosog sa espirituwal, matatabangan kamong pataluboon an marahay na espirituwal na mga pasohan.—2 Timoteo 2:20–22.

Pag-adalan an “Banal na mga Kasuratan”

 9. Apuera sa pagpili nin tamang mga kaibaiba, ano an dapat nindong gibohon tanganing ‘patuodon an saindong sadiri na diosnon na debosyon an saindong intension’ na pag-aaboton?

⁹ An pagmamaigot daw na maabot an espirituwal na mga pasohan resulta sana kan pagpili nin tamang kaibaiba? Bako. Arog ni Timoteo, kaipuhan nindong gumibo nin maingat na pagsiyasat sa “banal na mga kasuratan.” An pag-adal tibaad bako nindong paboritong aktibidad, alagad girumdomon na kinaipuhan ni Timoteo na ‘patuodon an saiyang sadiri na diosnon na debosyon an saiyang intension’ na pag-aaboton. An mga parakawat parateng nagsasanay na marhay sa laog nin dakol na bulan tanganing maabot an saindang pasohan. Kaagid kaiyan, an pag-aabot sa espirituwal na mga pasohan nagkakaipo nin pagsasakripisyo asin maigot na paghihingoa. (1 Timoteo 4:7, 8, 10, nota sa ibaba) ‘Alagad paanong an pag-adal sa Biblia makakatabang sa sako na maabot an sakong mga pasohan?’ an tibaad ihapot nindo. Konsideraron niato an tolong paagi.

10, 11. Taano an Kasuratan ta magmomotibar sa saindo na pag-aaboton an espirituwal na mga pasohan? Magtao nin ilustrasyon.

¹⁰ Enot, an Kasuratan an matao sa saindo nin tamang motibasyon. Ihinahayag kaiyan an marahayon na personalidad kan satong langitnon na Ama, an saiyang kadarudakulaing akto nin pagkamoot sa kapakanan niato, asin an daing sagkod na mga bendisyon na nakatagama para sa maimbod na mga lingkod nia. (Amos 3:7; Juan 3:16; Roma 15:4) Mantang nagtatalubo an saindong kaaraman dapit ki Jehova, nagtatalubo man an saindong pagkamoot sa saiya asin an saindong kamawotan na idusay an saindong buhay sa saiya.

¹¹ Dakol na Kristianong hoben an nagsasabi na an regular na personal na pag-adal sa Biblia mahalagang marhay na tabang tanganing isapuso ninda an katotoohan. Halimbawa, si Adele pinadakula sa sarong Kristianong harong alagad ta nungkang nagbugtak nin ano man na espirituwal na mga pasohan. “Iiniiba ako kan sakong mga magurang sa Kingdom Hall,” an pagsaysay nia, “alagad dai ako personal na nag-aadal o naghihinanyog sa mga pagtiripon.” Pakatapos na mabautismohan an saiyang tugang na babae, pinonan ni Adele na orog na seryosohon an katotoohan. “Pinonan kong basahon an bilog na Biblia. Nagbabasa ako nin dikit na kabtang dangan nagsusurat nin komento manongod sa nabasa ko pa sana. Yaon pa sa sako an gabos na isinurat ko. Nabasa ko an Biblia sa laog nin sarong taon.” Bilang resulta, namotibar si Adele na idusay an saiyang buhay ki Jehova. Sa ibong nin grabeng pisikal na kabiadian, payunir na sia ngonyan, o bilog na panahon na ebanghelisador.

12, 13. (a) An pag-adal sa Biblia makakatabang sa sarong hoben na gibohon an anong mga pagbabago, asin paano? (b) Magtao nin mga halimbawa kan praktikal na kadonongan na yaon sa Tataramon nin Dios.

¹² Ikaduwa, an Biblia matabang sa saindo na gumibo nin kinakaipuhan na mga pagbabago sa saindong personalidad. Sinabihan ni Pablo si Timoteo na an “banal na mga kasuratan” “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.” (2 Timoteo 3:16, 17) Paagi sa regular na paghorophorop sa mga bagay na may koneksion sa Tataramon nin Dios asin paagi sa pag-aplikar kan mga prinsipyo sa Biblia, totogotan nindo an espiritu nin Dios na dalisayon an saindong personalidad. Papataluboon kaiyan sa saindo an mahalagang marhay na mga kualidad, siring kan kapakumbabaan, pagmamaigot, kahigosan, asin tunay na pagkamoot sa mga kapwa Kristiano. (1 Timoteo 4:15) Yaon ki Timoteo an mga kualidad na ini, asin sa siring sia nagin kapakipakinabang ki Pablo sagkod sa mga kongregasyon na pinaglingkodan ni Timoteo.—Filipos 2:20-22.

¹³ Ikatolo, dakol na praktikal na kadonongan an makukua sa Tataramon nin Dios. (Salmo 1:1-3; 19:7; 2 Timoteo 2:7; 3:15) Tatabangan kamo kaiyan na madonong na pilion an saindong mga katood, pilion an nakakarahay na aling-alingan, asin atubangon an dakol na iba pang depisil na desisyon. (Genesis 34:1, 2; Salmo 119:37; 1 Corinto 7:36) An paggibo nin madonong na mga desisyon ngonyan mahalagang marhay sa pagmamaigot na aboton an saindong espirituwal na mga pasohan.

“Makipaglaban Ka kan Marahay na Pakilaban”

14. Taano an pagmamaigot na aboton an espirituwal na mga pasohan ta bakong an pinakapasil na gibohon?

¹⁴ An pagtao nin prioridad sa mga pasohan na nagtataong onra ki Jehova iyo an pinakamadonong na gibohon alagad bako nanggad an pinakapasil. Halimbawa, pag-abot sa pagpili nin karera, tibaad mapaatubang kamo sa grabeng pangigipit nin mga paryente, kaedad, asin marahay an intension na mga paratokdo na naniniwala na an mas halangkaw na edukasyon asin halangkaw an sueldong karera iyo an liabe sa tunay na kapangganahan asin kaogmahan. (Roma 12:2) Arog ni Timoteo, kaipuhan nindong ‘makipaglaban kan marahay na pakilaban kan pagtubod’ tanganing ‘makapangapot nin marigon sa buhay na daing katapusan’ na itinatagama ni Jehova sa saindo.—1 Timoteo 6:12; 2 Timoteo 3:12.

15. Anong pagtumang an posibleng inatubang ni Timoteo?

¹⁵ Kun an daing pagtubod na mga miembro nin pamilya dai inooyonan an saindong mga pagpili, an pagbalo nangorognang nagigin masakit. Posibleng kinaipuhan na paglabanan ni Timoteo an siring na pagtumang. Oyon sa sarong reperensia, an pamilya ni Timoteo posibleng “kabilang sa mga edukado asin may kaya.” An saiyang ama tibaad naglaom nanggad na makua sia nin mas halangkaw na edukasyon asin ipagpapadagos an negosyo kan pamilya.a Imahinaron kun ano an nagin reaksion kan ama ni Timoteo kan maaraman na mas pinili ni Timoteo an mga peligro asin kadaihan nin kasegurohan sa pinansial huli sa paglilingkod bilang misyonero kaiba ni Pablo!

16. Paano inatubang nin sarong hoben an pagtumang nin magurang?

¹⁶ An hoben na mga Kristiano ngonyan napapaatubang sa kaparehong mga kadepisilan. Nagigirumdoman ni Matthew, na naglilingkod sa sangang opisina kan Mga Saksi ni Jehova: “Kan magpoon akong maglingkod bilang payunir, naanggot na marhay an sakong ama. Inisip nia na ‘sinayang’ ko an sakong edukasyon paagi sa pagtrabaho bilang sarong dyanitor tanganing masuportaran an sakong ministeryo. Pinag-olog-olog nia ako, na ipinapagirumdom sa sako kun gurano an puedeng ganaron ko kun naglaog ako sa bilog na panahon na trabaho.” Paano inatubang ni Matthew an pagtumang na iyan? “Sinunod ko an estriktong iskedyul sa pagbasa sa Biblia asin danay na namibi, nangorogna sa mga panahon na madali na kutanang mawara an sakong pagpupugol sa sadiri.” Binalosan an determinasyon ni Matthew. Pag-abot nin panahon, nagrahay an relasyon nia sa saiyang ama. Orog man na naparani si Matthew ki Jehova. “Naheling kong itinao sa sako ni Jehova an mga pangangaipo ko, pinarigon nia an sakong boot, asin prinotehiran nia ako sa salang mga desisyon,” an sabi ni Matthew. “Dai ko kutana maeeksperyensiahan an ano man sa mga bagay na ini kun dai ko pinag-aabot an espirituwal na mga pasohan.”

Magdanay na Nakapokus sa Espirituwal na mga Pasohan

17. Paanong an nagkapira tibaad dai tinutuyong desganaron an mga nagpaplanong lumaog sa bilog na panahon na paglilingkod? (Mateo 16:22)

¹⁷ An daing gayo risang pagpadesganar sa pagmamaigot nindong aboton an saindong espirituwal na mga pasohan tibaad maghale pa ngani sa mga kapagtubod. ‘Taano ta kaipuhan pang magpayunir ka?’ tibaad maghapot an nagkapira. ‘Puede kang mamuhay nin normal alagad nakikikabtang pa man giraray sa paghuhulit. Maghanap ka nin marahay na trabaho asin seguradohon mo an pinansial na seguridad.’ Garo baga marahay na sadol ini, alagad talaga daw na sinasanay nindo an saindong sadiri na diosnon na debosyon an saindong intension na pag-aaboton kun susundon nindo iyan?

18, 19. (a) Paano kamo makakapagdanay na nakapokus sa espirituwal na mga pasohan? (b) Ipaliwanag kun anong mga pagsasakripisyo an ginigibo nindo, bilang hoben, para sa kapakanan kan Kahadean?

¹⁸ Minalataw na an nagkapirang Kristiano kan panahon ni Timoteo igwa kan kaparehong kaisipan. (1 Timoteo 6:17) Tanganing tabangan si Timoteo na magdanay na nakapokus sa espirituwal na mga pasohan, pinarigon ni Pablo an boot kaini, na sinasabi: “Mayo nin tawong naglilingkod na soldados na nalilingling sa mga negosyo sa buhay, tanganing makamtan nia an pag-oyon kan saro na naglista sa saiya bilang soldados.” (2 Timoteo 2:4) An sarong soldados na nasa aktibong serbisyo dai puedeng malingling sa mga okupasyon na pangsibilyan. An buhay nia asin kan iba nakadepende sa pagigin andam nia pirme na sumunod sa mga pagboot kan saiyang komandante. Bilang sarong soldados na sakop ni Cristo, kaipuhan na magin determinado man kamo asin likayan na masiod kan dai kaipuhan na materyal na pinagmamaigotan na makamtan na puedeng makaolang sa saindo sa lubos na pag-otob kan saindong nagliligtas-buhay na ministeryo.—Mateo 6:24; 1 Timoteo 4:16; 2 Timoteo 4:2, 5.

¹⁹ Imbes na pagmaigotan na magkaigwa nin komportableng buhay, kultibaron an mapagsakripisyong espiritu. “Magin andam dawa mayo kan mga kaginhawahan sa buhay, bilang saro sa mga soldados ni Cristo Jesus.” (2 Timoteo 2:3, The English Bible in Basic English) Kan kaibanan ni Pablo, nanodan ni Timoteo an sekreto nin pagigin kontento dawa sa pinakadepisil na mga kamugtakan. (Filipos 4:11, 12; 1 Timoteo 6:6-8) Magigibo man nindo iyan. Andam daw kamong gumibo nin mga pagsasakripisyo para sa kapakanan kan Kahadean?

Mga Bendisyon Ngonyan Asin sa Ngapit

20, 21. (a) Isaysay an nagkapira kan mga bendisyon na resulta kan pagmamaigot na aboton an espirituwal na mga pasohan. (b) Ano an determinado nindong gibohon?

²⁰ Sa laog nin mga 15 taon, si Timoteo nagdanay sa kaibanan ni Pablo. Naheling mismo ni Timoteo an pagkaorganisar kan bagong mga kongregasyon mantang ipinapalakop an maogmang bareta sa haros bilog na amihanan kan Mediterraneo. An saiyang buhay mas nakakaogma asin nakakakontento kisa kun pinili nia kutana an “normal” na buhay. Paagi sa pagmamaigot na aboton an espirituwal na mga pasohan, kamo man mag-aani nin daing kaagid sa halaga na espirituwal na mga bendisyon. Mapaparani kamo ki Jehova asin aakoon an pagkamoot asin paggalang nin mga kapwa Kristiano. Imbes na makamate nin kolog nin boot asin pagkadiskontento na resulta nin pagmamaigot na magkaigwa nin materyal na kayamanan, kakamtan nindo an tunay na kaogmahan na naggigikan sa bakong maimot na pagtatao. Pinakamahalaga sa gabos, ‘makakapangapot kamo nin marigon sa tunay na buhay’—buhay na daing sagkod sa paraisong daga.—1 Timoteo 6:9, 10, 17-19; Gibo 20:35.

²¹ Kaya kun dai pa nindo ginibo iyan, maogma niamo kamong pinaparigon na ponan tolos na sanayon an saindong sadiri na diosnon na debosyon an saindong intension na pag-aaboton. Rumani sa mga nasa kongregasyon na makakatabang sa saindo na aboton an espirituwal na mga pasohan, asin hagadon an saindang paggiya. Gibohon na prioridad an regular na personal na pag-adal sa Tataramon nin Dios. Magin determinado na labanan an materyalistikong espiritu kan kinaban na ini. Asin pirmeng girumdomon na an Dios na “abundang nagtatao sa sato kan gabos na bagay para sa satong pagkaogma” nanunuga sa saindo na puede kamong magkaigwa nin nagsosopay na mga bendisyon ngonyan sagkod sa ngapit kun pipilion nindo an mga pasohan na nagtataong onra sa saiya.—1 Timoteo 6:17.

[Nota sa Ibaba]

Nagigirumdoman daw Nindo?

• Saen makakakua nin tabang an mga hoben tanganing pag-aaboton an espirituwal na mga pasohan?

• Taano ta mahalagang marhay an maingat na pag-adal sa Biblia?

• Paano malalabanan nin mga hoben an materyalistikong impluwensia kan kinaban na ini?

• Anong mga bendisyon an resulta nin pag-aabot sa espirituwal na mga pasohan?

[Ritrato sa pahina 24]

Pinagmaigotan ni Timoteo na aboton an marahay na mga pasohan

[Mga Ritrato sa pahina 25]

Anong positibong mga impluwensia an nakatabang ki Timoteo?

[Mga Ritrato sa pahina 26]

Naghihingoa daw kamong aboton an espirituwal na mga pasohan?