Mga Hoben na May Seguradong Ngapit

“MAKATATAKOT na marhay asin grabe kamakababalde na siring kan arin man na [kaso nin panlulupig]”​—iyan an paglaladawan sa krimen nin sarong huwes na nangengenot sa dai pa sana nahahaloy na pagbista. An sarong gang na kompuesto nin walong tinedyer, na an edad poon 14 sagkod 18, nanhipa nin sarong babaeng turista sa sarong lugar na pobre sa sentro kan siudad nin Londres, paorootro siang linugos, dangan isinalya sia sa karaning kanal dawa ngani sinabi nia na dai sia tataong maglangoy. Natural sana, an ina kan saro sa mga tinedyer nagsabi na sia rinaotan nin ginhawa kan madalan nia an bareta sa TV manongod sa ginibo kan saiyang aking lalaki.

Makamomondo, an pangyayaring ini nagpapabanaag kan kamugtakan sa sosyedad ngonyan. An kabangisan iyo na an uso, baga man sa kriminal na aktibidad, iriwal sa laog kan pamilya, o etnikong ralaban sa Balkanes, sentral asin solnopan na Aprika, asin sa iba pang lugar. An mga hoben nagdadakula sa tahaw nin siring na mga kamugtakan, o parate ninda iyan na nababaretaan. Kun siring, bakong makangangalas na an dakol nagigin matagas an boot, “dai nin natural na kapadangatan,” asin “mayong pagpopogol sa sadiri.”​—2 Timoteo 3:3.

“Maringis”

Kan isurat kan Kristianong apostol na si Pablo an ikaduwa niang surat sa saiyang kapwa magurang sa kongregasyon na si Timoteo, an Roma iyo an nagdodominar na pankinaban na kapangyarihan. An karingisan asin kadahasan lakop sa mga ampiteatro nin Roma. Pero, si Pablo nagpatanid na sa ngapit, an mga panahon magigin “masakit pakibagayan.” (2 Timoteo 3:1) Interesante nanggad, an Griegong termino na naglaladawan sa mga panahon na ini bilang “masakit pakibagayan” may kalabot na ideya nin pagigin “maringis” kaiyan. An sarong pangyayari durante kan daganon na ministeryo ni Jesus labing 30 taon bago kaini nagpapaheling kun ano an nasa likod kan kaisogan sa saiyang kapanahonan.

Minadatong pa sana si Jesus lunad nin baroto sa sirangan na baybayon kan Dagat nin Galilea. Pagtongtong nia sa baybayon, inatubang sia nin duwang lalaki. An saindang garo naghuhuramentadong itsura asin pagkuragrit nagparisa na may maraot na marhay na nangyayari sa sainda. Sinda “pambihira an ringis,” sa katunayan, sinaniban nin demonyo.a An ikinukurahaw ninda hale sa maraot na mga espiritu na nagkokontrol sa saindang madahas na mga hiro-hiro. “Ano an labot mi sa saimo, Aki nin Dios?” an kuragrit kan mga lalaki. “Ano nagdigdi ka tanganing pasakitan kami bago an itinalaan na panahon?” An maraot na mga espiritu na suminanib sa duwa nakaaaram nanggad na an Dios nagtalaan na nin panahon para sa paghokom sa mga demonyo. Ini mangangahulogan kan saindang daing katapusan na pagkalaglag. Alagad sagkod sa panahon na iyan gagamiton ninda an labi sa tawong mga abilidad ninda tanganing magsutsut nin maringis na kadahasan. An milagrosong paghiro ni Jesus na paluwason an mga demonyong idto an solamenteng nagtao nin kaginhawahan sa duwang lalaki.​—Mateo 8:​28-32; Judas 6.

Kun an mga tawo ngonyan, kabale an mga hoben, gumawe sa rungaw na paagi, marahay na girumdomon niato an pangyayaring iyan. Taano? Huli ta sa ika-20 siglong ini, kita napaaatubang sa konektadong peligro, siring sa ipinaliliwanag kan ultimong libro kan Biblia, an Kapahayagan: “Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Tabi mangnohon na an kasosopgan na ini para ki Satanas may kaibang “dakulang kaanggotan” huli ta aram niang halipot na an saiyang panahon.

Inaatake

Siring sa parateng sinasambit sa mga pahina kan babasahon na ini, kan taon 1914 pinatukaw sa trono si Cristo Jesus bilang Hade sa Kahadean nin Dios sa langit. Si Jesus tolos-tolos na naghiro tumang sa pangenot na kaiwal nin Dios, si Satanas. Sa siring, an Diablo asin an saiyang mga demonyo pinalayas sa langit, asin sinda ngonyan nagkokonsentrar kan saindang atension sa dagang ini. (Kapahayagan 12:​7-9) Mantang nalilimitaran na marhay an hiwas kan saiyang impluwensia, si Satanas “naglalakaw na siring sa nagngangarob na leon, na naghahanap nin masisiba.” (1 Pedro 5:8) Sairisay an madali niang mabiktima? Bako daw na natural sana na iyan partikularmenteng idtong mga kulang nin eksperyensia sa buhay asin sa mga relasyon nin tawo? Sa siring, an mga hoben ngonyan pinupunteriya kan Diablo. Paagi sa kadaklan kan saindang musika asin mga paglibang, sinda diretso sa mga kamot kan dai naheheling na tusong parahinohinong ini.​—Efeso 6:​11, 12.

Dawa kun an mga hoben naghihingoang magin mapanggana sa buhay, sinda nadedepisilan. Poon sa katapusan kan Guerra Mundial II, an mga tawo sa dakol na nasyon na dating nakikilaban naghingoang makabawi paagi sa pagtao nin sa may kayang pamumuhay sa saindang pamilya. An materyal na mga rogaring, daing limitasyon na paglibang, asin pag-aling-aling nagin mayor na mga pasohan. Bilang resulta, dakol an nagdusa. “Idtong mga desididong yumaman,” an patanid ni Pablo ki Timoteo, “nahoholog sa sugot asin sa siod patin sa dakol na rungaw asin nakararaot na mawot . . . Huli ta an pagkamoot sa kuarta gamot nin gabos na klase nin nakadadanyar na bagay, asin sa pag-aabot sa pagkamoot na ini an nagkapira . . . sinaksak an bilog nindang sadiri nin dakol na kakologan.” (1 Timoteo 6:​9, 10) Sa pankagabsan, maheheling niato an mga tawo sa materyalistikong sosyedad ngonyan na sinaksak nin mga kakologan sa ekonomiya, pinansial, asin emosyonal. Kabale sa sainda an dakol na hoben, na biktima kan taktikang ini kan pangenot na kaiwal nin Dios.

Pero, marahay sana ta igwa nin maogmang bareta. Asin iyan dapit sa mga hoben, idtong mga may seguradong ngapit. Paano ini mangyayari?

Maghanap Asin Kamo Makakukua

An dakol na hoben igwa nin nobleng mga pamantayan. Hinahaboan ninda an nagrururong mga pamantayan na komun sa mga nasa edad na. Sinda nababalde sa inhustisya asin daing simpatiyang aktitud kan mga politiko asin negosyante na gutom sa kapangyarihan. Kun kamo hoben, tibaad arog kaini an saindong namamatean.

Estudyare si Cedric, sarong hoben na lalaki na nasa huring mga taon kan saiyang pagkatinedyer, na an eksperyensia dai napapalaen sa iba.b Kan aki pa, dakol an kinatatakotan nia, kabale na an pagkatakot sa pagkagadan. Inisip-isip nia kun ano an katuyohan nin buhay. Mantang dai nakasumpong nin simbag sa saiyang mga hapot kan sia mag-edad nang 15, inako na sana nia an pag-isip-isip manongod sa buhay kaiba nin ibang mga hoben na idealista. “Nagdodroga kami asin nagtuturukawtukaw mantang nag-oorolay sa laog nin dakol na oras,” an nagigirumdoman nia. “Naniniwala ka na kapareho mo an nasa isip nin gabos, alagad mayong nakaaaram kan simbag.”

Si Cedric, kapareho nin dakol pang hoben, naghihimuyawot nin kaogmahan. An pagdroga sana dai nakapanigo sa saiya. Dai nahaloy sia napalabot sa paghabon asin pagnegosyo nin droga. Sa ibong kaiyan sia naghanap nin bagong mga angat. Sia nagpoon na maghabon nin mga bagay na pinedido. “Naogma akong gibohon ini,” an inadmitir nia. “Alagad nungka akong naghabon sa ordinaryong tawo. Kun ako minahabon nin kotse, binabayaan ko iyan sa marahay na kamugtakan. Kun ako nananalakat sa sarong lugar nin negosyo, ginigibo ko sana iyan duman sa mga aram ko na may seguro. Tinabangan ako kaiyan na ipangatanosan an sakong ginigibo.” Siring sa tibaad linaoman nindo, si Cedric nakarsel.

Nagigirumdoman ni Cedric: “Si Mark, na kapwa ko preso, nakipag-olay sa sako. Huling nariparo na ako igwa nin dakulang krus na nakatatu sa parteng itaas kan sakong takyag, hinapot nia ako kun taano ako ta igwa kaini. Naghona sia na iyan mahalaga sa sako sa relihiosong paagi.” Pakalihis nin duwang semana, tinawan ni Mark si Cedric nin sarong kopya kan librong Puwede Kamong Mabuhay Sagkod Lamang sa Paraiso Digdi sa Daga.c “‘Puwede Kamong Mabuhay Sagkod Lamang’​—an pirang tataramon na idto tolos na nakatudok sa sakong isip. Iyan an permi niamong pinag-oolayan, alagad nungka niamong nadiskobre an katotoohan manongod dian.” Pakatapos nin dakol na pakipag-olay sa saro sa Mga Saksi ni Jehova na nagdadalaw sa karsel, narealisar ni Cedric na an minawot nia puedeng kamtan​—alagad sa paagi sana nin Dios.

“Kan umontok ako sa pakikiasosyar sa sakong dating mga kaamigo, nagin marikas an pag-oswag ko,” an naobserbaran ni Cedric. An saiyang pag-oswag sa pagsabot asin pagkaigwa nin kaogmahan dai nagin madali. “Sagkod ngonyan ako naghihingoang magibo iyan,” an sabi nia. “Kaipuhan ko na magin maingat sa sakong pag-iisip.” Iyo, nasabotan ngonyan ni Cedric na an pagigin idealista naggiya sa saiya pasiring sa sarong silo kan Diablo, na naghohona na an saiyang mga pasohan makakamtan paagi sana sa pakikikabtang sa mga aktibidad na nakasentro sa kaogmahan.

Nakaoogma, si Cedric haloy nang nakaluwas sa karsel, asin sia naoogma sa regular na pakikiasosyar sa iba na nanompongan an saindang hinahanap. Sia ngonyan saro na sa Mga Saksi ni Jehova asin igwa kan saindang paglaom na mabuhay sa Paraiso digdi sa daga. Sia man naglalaom sa katapusan kan satanikong impluwensia sa gabos na porma kaiyan.

Siempre, bako sanang mga hoben na arog ki Cedric an may seguradong ngapit; an iba pinadakula nin diosnon na mga magurang, na itinadom sa saindang mga aki an pagkamoot sa katotoohan sa Biblia.

May Pakinabang sa Huri an Diosnon na Pagsasanay

“Patoodon mo an aki oyon sa dalan para sa saiya; minsan kun sia maggurang dai sia masiko dian,” an isinurat kan madonong na si Hadeng Salomon kan suanoy. (Talinhaga 22:6) Nagin totoo ini sa kaso kan dakol na bilog na kalag na mga hoben na piniling sunodon an pamantayan sa Biblia.

Ginibo ini ni Sheila, Gordon, asin Sarah. Nagigirumdoman ninda na an saindang mga magurang nagpahalagang marhay sa pagkuyog kan pagboot ni Cristo na ‘paduman asin gumibo nin mga disipulo’ paagi sa paghuhulit kan maogmang bareta kan Kahadean. (Mateo 24:14; 28:​19, 20) “Sa ano man na mga desisyon na dapat gibohon, nakatodan niamong mag-ina na sabihon sa kada saro, ‘Ano an magigin epekto kaiyan sa paghuhulit?’” an nagigirumdoman ni Sheila. “Dai niamo idinagos an dakol na proyekto bilang resulta kan pangangatanosan na ini,” an inadmitir nia, na idinugang pa, “alagad kanigoan na mga bendisyon an napasamuya!” Dawa sa katapusan nin halawig na mga aldaw na ginamit sa pagdalaw sa mga harong kan mga tawo na dara an maogmang bareta, si Sheila asin an saiyang ina nagbabaklay papuli na nagkakanta. “Lubos an sakong kagayagayahan,” an sabi nia. “Namamatean ko pa iyan ngonyan.”

Nagigirumdoman ni Gordon an dakol na magayagayang Sabadong banggi. “Iniimbitaran ako sa harong kan mga magurang sa kongregasyon, na duman nagkakaigwa kami nin kapakipakinabang na mga patood asin pag-orolay. Pinarigon an boot niamo na tuomon an mga bersikulo sa Biblia, sueltong magtaram dapit sa Makakasuratan na mga topiko, magsaysay nin eksperyensia sa paghuhulit, asin aramon kun paano naghihiwas an gibohon kan Kahadean,” an nagigirumdoman ni Gordon. “Gabos ini nakatabang sa sako na magbugtak nin marahay na pundasyon asin kultibaron an pagkamoot ki Jehova Dios.”

Si Sarah igwa nin maogmang mga memorya nin mga bangging kaiba nia an nagdadalaw na mga Saksi. “Nagkakarakan kami nin iriba. Dangan tanganing makompleto an aldaw, nagtutugtog kami nin piano, na inaakompanyaran an mga nag-aawit nin mga awit manongod sa Kahadean nin Dios. Nakatabang na marhay sa samo an musika, nangorogna durante kan mga taon na kami nag-eeskuela, huli ta iyan nagtogot sa samo na mag-iribaiba bilang pamilya.”

Siempre, bakong gabos na hoben na naghihingoang paogmahon si Jehova may pinakamarahay na mga kamugtakan sa pamilya. Minsan siring, an dayupot na pakikiasosyar sa ibang pamilya nin Saksi sa kongregasyon nagtatao sa sainda nin kasegurohan asin pakamate nin dayupot na relasyon.

Pakamahalon an Sarong Seguradong Pundasyon Para sa Ngapit

An mga hoben ngonyan igwa nin mapipilian. Puede sindang magpadagos kaiba kan maraot na kinaban na ini mantang iyan pabugsok nin dirediretso pasiring sa kalaglagan sa nagdadangadang na “dakulang kahorasaan” na ihinula ni Jesus. O puede sindang ‘manarig mismo sa Dios asin kuyogon an saiyang mga pagboot,’ siring sa inawit kan pinasabngan na salmistang si Asaf. An pagigin makinuyog sa Dios ililikay sinda sa pagigin “kapag-arakian na sutil asin rebelde, sarong kapag-arakian na dai nag-andam kan saindang puso asin an espiritu dai mapagtitiwalaan kun dapit sa Dios.”​—Mateo 24:21; Salmo 78:​6-8.

Sa labing 80,000 na kongregasyon nin Mga Saksi ni Jehova sa bilog na kinaban, manonompongan nindo an dakol na hoben na puede nindong hangaan. Sinda naghimate sa hatol ni apostol Pablo sa hoben na si Timoteo na “maggibo nin marahay, na magin mayaman sa marahay na mga gibo, magin matinao, andam na magwaras, na nagririmpos para sa sainda man sana nin marahay na pasisikadan para sa ngapit.” Bilang resulta, sinda ngonyan ‘nakapangapot nin marigon sa tunay na buhay.’ (1 Timoteo 6:​18, 19) Orog pa nindong aramon an manongod sa tunay na mga Kristianong ini paagi sa pag-atender sa saindang mga pagtiripon. Dangan kamo puede man na magkaigwa kan paglaom na seguradong ngapit.

[Mga Nota sa Ibaba]

[Retrato sa pahina 7]

An maraot na mga espiritu nasa likod kan “pambihira an ringis” na mga lalaki na pinaomayan ni Jesus

[Retrato sa pahina 8]

Pagtogdok “nin marahay na pasisikadan para sa ngapit”