Magin Kita an Klase na May Pagtubod

“Kita . . . an klase na may pagtubod sa ikapagdadanay na buhay kan kalag.”—HEBREO 10:39.

 1. Taano ta masasabi na mahalagang marhay an pagtubod kan lambang maimbod na lingkod ni Jehova?

SA SUNOD na kamo yaon sa Kingdom Hall na pano nin mga nagsasamba ki Jehova, pumondo kamo nin kadikit tanganing masdan an mga nasa palibot nindo. Isip-isipa an dakol na paagi na sinda nagpapaheling nin pagtubod. Tibaad may maheling kamong mga may edad na na dakol nang dekada na naglilingkod sa Dios, mga hoben na sa aroaldaw pinaglalabanan an impluwensia nin kairiba, asin mga magurang na naghihigos sa pagpadakula sa mga aking matatakton sa Dios. Yaon an mga magurang sa kongregasyon asin ministeryal na lingkod, na dakol na paninimbagan an isinasaabaga. Iyo, tibaad makaheling kamo nin espirituwal na mga tugang na lalaki saka babae na laen-laen an edad na napanggaganahan an gabos na klase nin balakid tanganing makapaglingkod ki Jehova. Abaa kamahalagang marhay kan pagtubod kan lambang saro!—1 Pedro 1:7.

 2. Taano ta kapakipakinabang para sa sato ngonyan an hatol ni Pablo sa Hebreo kapitulo 10 asin 11?

² Pira sanang tawong bakong sangkap, kun igwa man, an mas nasabotan an halaga nin pagtubod kisa ki apostol Pablo. Sa katunayan, sinabi nia na an tunay na pagtubod nagbubunga kan ‘pagdadanay na buhay kan kalag.’ (Hebreo 10:39) Pero, aram ni Pablo na an pagtubod sinasalakay asin luway-luway na rinaraot sa daing pagtubod na kinaban na ini. Hararom an pagmalasakit nia sa Hebreong mga Kristiano sa Jerusalem saka Judea, na naglalapigot na mapagdanay an saindang pagtubod. Mantang hineheling niato an mga kabtang kan Hebreo kapitulo 10 asin 11, tawan niato nin atension an mga paaging ginamit ni Pablo sa pagparigon sa saindang pagtubod. Mantang ginigibo iyan, maheheling niato kun paano niato mapatatalubo an mas makosog na pagtubod sa satong sadiri asin sa mga nasa palibot niato.

Magpahayag nin Kompiansa sa Lambang Saro

 3. Paano ipinaheheling kan mga tataramon ni Pablo sa Hebreo 10:39 na sia may kompiansa sa saiyang mga tugang na lalaki saka babae sa pagtubod?

³ An enot na tibaad marisa niato iyo an positibong aktitud ni Pablo manongod sa mga nagbabasa sa surat nia. Isinurat nia: “Ngonyan bako kita an klase na minasibog pasiring sa kalaglagan, kundi an klase na may pagtubod sa ikapagdadanay na buhay kan kalag.” (Hebreo 10:39) An inisip ni Pablo an pinakamarahay, bakong an pinakamaraot, manongod sa saiyang fiel na mga kapwa Kristiano. Mangnoha man na ginamit nia an tataramon na “kita.” Si Pablo tawong matanos. Pero dai sia nagtaram na may kapalangkawan sa mga nagbabasa sa surat nia, na garo baga sia nasa halangkawon na grado nin katanosan na harayoon sa sainda. (Ikomparar an Eclesiastes 7:16.) Imbes, iiniba nia an sadiri nia sa sainda. Ipinahayag nia an odok sa pusong kompiansa na sia asin an fiel na Kristianong mga nagbabasa sa surat nia gabos mapapaatubang sa nakapanluluya sa boot na mga balakid na nasa atubangan ninda, na sinda makosog an boot na masayuma na sumibog pasiring sa kalaglagan, asin na sinda mapatutunayan na an klase na may pagtubod.

 4. Sa anong mga dahelan na si Pablo may kompiansa sa saiyang mga kapagtubod?

⁴ Paano nagkaigwa nin siring na kompiansa si Pablo? Ano dai nia naheheling an mga sala kan Hebreong mga Kristiano? Al kontraryo, tinawan nia sinda nin espesipikong hatol tanganing matabangan sinda na pangganahan an saindang espirituwal na mga pagkukulang. (Hebreo 3:12; 5:12-14; 6:4-6; 10:26, 27; 12:5) Pero, si Pablo may kisuerra duwang marahay na dahelan sa pagkaigwa nin kompiansa sa saiyang mga tugang. (1) Bilang paraarog ki Jehova, hiningoa ni Pablo na helingon an banwaan nin Dios nin arog kan pagheling sa sainda ni Jehova. Iyan bako sanang kun manongod sa saindang mga sala kundi kun manongod sa marahay nindang mga kualidad asin sa potensial ninda na pilion an paggibo nin tama sa ngapit. (Salmo 130:3; Efeso 5:1) (2) Si Pablo may lubos na pagtubod sa kapangyarihan kan banal na espiritu. Aram nia na mayo nin mga balakid, mayo nin mga kaluyahan nin tawo, na makaoolang ki Jehova sa pagtao nin “kosog na lihis sa ordinaryo” sa siisay man na Kristiano na naghihingoang fiel na maglingkod sa Saiya. (2 Corinto 4:7; Filipos 4:13) Kaya an kompiansa ni Pablo sa saiyang mga tugang na lalaki saka babae bakong napasala, harayo sa katunayan, o basta na sana naghahalat kan marahay. Idto may masarig na basehan asin napapasikad sa Kasuratan.

 5. Paano niato maaarog an kompiansa ni Pablo, asin may anong posibleng marhay na resulta?

⁵ Daing duwa-duwa, nakaolakit an kompiansa na ipinaheling ni Pablo. Segurado na dakulaon an nagin kahulogan para sa mga kongregasyon sa Jerusalem saka Judea kan pagtaram sa sainda ni Pablo sa paaging nakaparirigon na marhay sa boot. Sa ibong kan nakakapasadit na pagtuya asin mapaabaw-abaw na pagkaindiperente kan mga Judiong kontra sa sainda, an Hebreong mga Kristiano natabangan kan siring na mga tataramon na magdesidir sa saindang puso na magin an klase na may pagtubod. Magigibo daw niato an siring para sa lambang saro ngonyan? Pasilon na an maheling sana sa iba iyo an halawig na listahan nin mga sala asin palaen na ugale. (Mateo 7:1-5) Pero, mas matatabangan niato an lambang saro kun satong ririsahon saka pahahalagahan an daing kaagid na pagtubod na nasa lambang saro. Kun may siring na pagparigon sa boot, an pagtubod mas posibleng tumalubo.—Roma 1:11, 12.

Tamang Paggamit kan Tataramon nin Dios

 6. Saen nagkokotar si Pablo kan isurat nia an mga tataramon na nasusurat sa Hebreo 10:38?

⁶ Pinatalubo man ni Pablo an pagtubod sa saiyang mga kapagtubod paagi sa saiyang ekspertong paggamit kan Kasuratan. Halimbawa, isinurat nia: “‘Alagad an sakong matanos mabubuhay huli sa pagtubod,’ asin, ‘kun sia sumibog, an sakong kalag mayo nin kaogmahan sa saiya.’” (Hebreo 10:38) Kinokotar digdi ni Pablo an propetang si Habacuc.a An mga tataramon na ini posibleng marhay na pamilyar sa mga nagbabasa sa surat ni Pablo, Hebreong mga Kristiano na aram na marhay an makahulang mga libro. Kun iisipon an saiyang pasohan—pakosogon an pagtubod nin mga Kristiano sa laog asin harani sa Jerusalem kaidtong mga taon 61 C.E.—tamang-tama an pagkapili sa halimbawa ni Habacuc. Taano?

 7. Kasuarin isinurat ni Habacuc an saiyang hula, asin ano an mga kamugtakan sa Juda kan panahon na idto?

⁷ Malinaw na isinurat ni Habacuc an saiyang libro mga duwang dekada na sana bago malaglag an Jerusalem kan 607 B.C.E. Sa bisyon, naheling kan propeta an mga Caldeo (o, Babilonyo), sarong “nasyon na mapait asin pusokpusokan,” na biglang sinalakay an Juda asin linaglag an Jerusalem, na sinasakop an mga banwaan asin nasyon. (Habacuc 1:5-11) Alagad an siring na kalamidad ihinula poon kan kaaldawan ni Isaias, labing sarong siglo bago pa. Kan panahon ni Habacuc, si Joaquim nagin kasalihid kan marahay na si Hadeng Josias, asin uminoswag na naman an karatan sa Juda. Pinaglamag asin ginadan pa ngani ni Joaquim an mga nagtataram sa ngaran ni Jehova. (2 Cronica 36:5; Jeremias 22:17; 26:20-24) Bakong makangangalas na an labi-labi an kamondoan na propetang si Habacuc nagkurahaw: “Sagkod noarin, O Jehova?”—Habacuc 1:2.

 8. Taano an halimbawa ni Habacuc ta makatatabang sa mga Kristiano kan enot na siglo asin ngonyan?

⁸ Dai aram ni Habacuc kun gurano na kaharani kan pagkalaglag nin Jerusalem. Kaagid kaiyan, dai aram kan mga Kristiano kan enot na siglo kun noarin matatapos an Judiong sistema nin mga bagay. Ni aram man niato ngonyan an “aldaw asin oras” na madatong an paghokom ni Jehova tumang sa maraot na palakaw na ini. (Mateo 24:36) Kun siring, tawan niato nin atension an duwang simbag ni Jehova ki Habacuc. Enot, inasegurar nia an propeta na an katapusan madatong nin eksakto sa panahon. “Dai iyan mahuhuri,” sabi nin Dios, dawa kun sa punto de vista nin tawo, tibaad iyan garo atrasado. (Habacuc 2:3) Ikaduwa, ipinagirumdom ni Jehova ki Habacuc: “Kun manongod sa matanos, huli sa saiyang pagigin fiel sia padagos na mabubuhay.” (Habacuc 2:4) Abaa kagayon, kasimpleng mga katotoohan! An pinakaimportante, bakong kun noarin madatong an katapusan, kundi kun baga kita nagpapadagos na namumuhay na may pagtubod.

 9. Paano an makinuyog na mga lingkod ni Jehova padagos na nabuhay huli sa saindang pagigin fiel (a) kan 607 B.C.E.? (b) pakalihis kan 66 C.E.? (c) Taano ta mahalagang marhay na pakosogon niato an satong pagtubod?

⁹ Kan laglagon asin samsaman an Jerusalem kan 607 B.C.E., naheling ni Jeremias, kan sekretaryo niang si Baruc, ni Ebed-melec, asin kan maimbod na mga Recabita an katotoohan kan panuga ni Jehova ki Habacuc. Sinda ‘padagos na nabuhay’ paagi sa pagkaligtas sa teribleng pagkalaglag kan Jerusalem. Taano? Binalosan ni Jehova an saindang pagigin fiel. (Jeremias 35:1-19; 39:15-18; 43:4-7; 45:1-5) Siring man, an Hebreong mga Kristiano kan enot na siglo seguradong naghimateng marhay sa hatol ni Pablo, ta kan an mga hukbo nin Roma sumalakay sa Jerusalem kan 66 C.E. dangan suminibog sa dai maaraman na dahelan, fiel na hinimate kan mga Kristianong idto an patanid ni Jesus na dumulag. (Lucas 21:20, 21) Sinda padagos na nabuhay huli sa saindang pagigin fiel. Kaagid kaiyan, kita magpapadagos na mabuhay kun kita manompongan na fiel pagdatong kan katapusan. Kanigoan kahalagang marhay na dahelan na pakosogon an satong pagtubod ngonyan!

Buhay na Pagsaysay kan mga Halimbawa nin Pagtubod

10. Paano ilinadawan ni Pablo an pagtubod ni Moises, asin paano niato maaarog si Moises sa bagay na ini?

¹⁰ Pinatalubo man ni Pablo an pagtubod paagi sa mapuersang paggamit nin mga halimbawa. Mantang binabasa nindo an Hebreo kapitulo 11, mangnoha kun paano nia buhay na isinasaysay an mga halimbawa nin mga personahe sa Biblia. Halimbawa, sinasabi nia na si Moises “nagpadagos na marigon na garo baga nakaheheling kan Saro na dai naheheling.” (Hebreo 11:27) Sa ibang pagtaram, si Jehova tunay na marhay para ki Moises na garo nia naheheling an Dios na dai naheheling. Masasabi man daw an siring manongod sa sato? Madaling magtaram manongod sa relasyon ki Jehova, alagad an pagpatalubo saka pagpakosog sa relasyon na iyan nagkakaipo nin trabaho. Iyan trabahong kaipuhan niatong gibohon! Tunay daw na marhay si Jehova para sa sato kaya sia kinokonsiderar niato kun naggigibo kita nin mga desisyon, pati an garo baga saradit na desisyon? An arog kaiyan na klase nin pagtubod matabang sa sato na matagalan dawa an pinakagrabeng oposisyon.

11, 12. (a) Sa irarom nin anong mga kamugtakan na tibaad nabalo an pagtubod ni Enoc? (b) Anong nakaparirigon sa boot na balos an inako ni Enoc?

¹¹ Estudyare man an pagtubod ni Enoc. Masakit niatong imahinaron an oposisyon na inatubang nia. Kaipuhan na itao ni Enoc an malanit na mensahe nin paghokom tumang sa maraot na mga tawo na nabubuhay kan panahon na idto. (Judas 14, 15) An paglamag na nagtatao nin peligro sa fiel na tawong ini malinaw na maisog na marhay, madahas na marhay, kaya “ibinalyo sia” ni Jehova, na kinua sia hale sa kamugtakan na buhay pasiring sa pagtorog sa kagadanan bago sia madakop nin mga kaiwal. Kaya dai naheling ni Enoc an kaotoban kan hula na isinabi nia. Minsan siring, nag-ako sia nin balaog na, sa nagkapirang bagay, mas marahay pa ngani.—Hebreo 11:5; Genesis 5:22-24.

¹² Ipinaliliwanag ni Pablo: “Bago kan pagbalyo sa saiya nagkamit [si Enoc] kan patotoo na napanigoan nia nin marhay an Dios.” (Hebreo 11:5) Ano an kahulogan kaini? Bago sia natorog sa kagadanan, tibaad nagkaigwa nin bisyon si Enoc, tibaad kan daganon na Paraiso na dian sia mapapagmata dai na mahahaloy. Sa paano man, ipinaaram ni Jehova ki Enoc na Sia nanigoan na gayo sa saiyang pagkafiel. Pinagayagaya ni Enoc an puso ni Jehova. (Ikomparar an Talinhaga 27:11.) Nakapupukaw nanggad sa boot an paghorophorop sa nagin buhay ni Enoc, bako daw? Boot daw nindo na magkaigwa nin siring na buhay na may pagtubod? Kun siring, pensara an siring na mga halimbawa; helingon sinda bilang tunay na mga tawo. Magin determinado na mabuhay paagi sa pagtubod, aroaldaw. Girumdoma man na an klase na may pagtubod dai naglilingkod ki Jehova basado sa sarong petsa o termino kun noarin ootobon nin Dios an gabos niang panuga. Imbes, desidido kitang maglingkod ki Jehova sagkod lamang! An paggibo nin siring nangangahulogan kan pinakamarahay na pamumuhay sa sistemang ini nin mga bagay asin sa masunod.

Kun Paano Makosog sa Pagtubod

13, 14. (a) Paano an mga tataramon ni Pablo na nasusurat sa Hebreo 10:24, 25 makatatabang sa sato na gibohon na magayagayang okasyon an satong mga pagtiripon? (b) Ano an pangenot na dahelan nin Kristianong mga pagtiripon?

¹³ Ipinaheling ni Pablo sa Hebreong mga Kristiano an dakol na praktikal na paagi na mapakokosog ninda an saindang pagtubod. Estudyaran niato an duwa sana. Posibleng marhay na pamilyar kita sa sadol nia sa Hebreo 10:24, 25, na sinasadol kita na regular na magtiripon sa satong Kristianong mga pagtiripon. Pero girumdoma na an ipinasabong na mga tataramon dian ni Pablo dai nangangahulogan na kita magigin sanang pasibong mga miron sa siring na mga pagtiripon. Imbes, ilinaladawan ni Pablo an mga pagtiripon bilang mga oportunidad na magkamiridbidan, pahiroon an lambang saro na mas lubos na maglingkod sa Dios, asin magparinigonan nin boot. Yaon kita dian tanganing magtao, bako sanang tanganing mag-ako. Nakatatabang iyan na gibohon na magayagayang okasyon an satong mga pagtiripon.—Gibo 20:35.

¹⁴ Pero, sa pangenot, nag-aatender kita sa Kristianong mga pagtiripon tanganing sambahon si Jehova Dios. Ginigibo niato iyan paagi sa pag-iba sa pamimibi saka pag-awit, sa atentong paghinanyog, asin sa pagdolot kan “bunga nin mga ngabil”—mga kapahayagan nin pag-omaw ki Jehova sa satong mga komento saka kabtang sa pagtiripon. (Hebreo 13:15) Kun isasaisip niato an mga pasohan na iyan saka gigibohon iyan kada pagtiripon, daing duda na mapakokosog an satong pagtubod kada pagtiripon.

15. Taano ta sinadol ni Pablo an Hebreong mga Kristiano na pangaptan nin pusog an saindang ministeryo, asin taano ta angay ngonyan an iyo man sanang hatol?

¹⁵ An saro pang paagi na mapatalubo an pagtubod iyo an gibong paghuhulit. Isinurat ni Pablo: “Mangapot kita nin pusog sa hayag na pagtuga kan satong paglaom na daing pagduwaduwa, huli ta sia na nanuga fiel.” (Hebreo 10:23) Tibaad sadolon nindo an iba na mangapot nin pusog sa sarong bagay kun garo baga namemeligro na iyan butasan ninda. Tunay na ginigipit ni Satanas an Hebreong mga Kristianong idto na butasan an saindang ministeryo, asin ginigipit man nia ngonyan an banwaan nin Dios. Nasa atubangan an siring na pangigipit, ano an maninigo niatong gibohon? Estudyare an ginibo ni Pablo.

16, 17. (a) Paano nagkaigwa nin pagkapusoan si Pablo para sa ministeryo? (b) Anong mga aksion an maninigo niatong gibohon kun natatakot kita sa sarong aspekto kan satong Kristianong ministeryo?

¹⁶ Sa mga Kristiano sa Tesalonica, nagsurat si Pablo: “Pakatapos na kami magdusa nguna asin trataron nin daing galang (siring kan aram nindo) sa Filipos, kami nagkaigwa nin pagkapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.” (1 Tesalonica 2:2) Paano si Pablo asin an saiyang kairiba ‘trinatar nin daing galang’ sa Filipos? Segun sa nagkapirang nag-espesyalisar, an termino sa Griego na ginamit ni Pablo nagpapahayag nin mapag-insulto, makasusupog, o madahas na tratamiento. An mga autoridad sa Filipos pinakol sinda nin mga badas, ibinilanggo sinda, asin ibinugtak sinda sa mga pandog. (Gibo 16:16-24) Paano naapektaran kan makolog na eksperyensiang iyan si Pablo? Naheling daw si Pablo kan mga nasa sunod na siudad sa saiyang pagbiahe bilang misyonero, an Tesalonica, na nagsibog huli sa takot? Dai, sia “nagkaigwa nin pagkapusoan.” Dinaog nia an takot asin nagpadagos na maghulit nin pusoan.

¹⁷ Saen naghale an pagkapusoan ni Pablo? Sa sadiri nia? Dai, sinabi nia na sia nagkaigwa nin pagkapusoan “paagi sa samong Dios.” An sarong reperensia para sa mga paratradusir kan Biblia nagsasabi na an pahayag na ini puedeng tradusiron na “Hinale nin Dios an takot sa samong puso.” Kaya kun sa pagmate nindo bako kamong pusoan manongod sa saindong ministeryo, o kun an sarong aspekto kaiyan garo baga partikularmenteng kinatatakotan nindo, taano ta dai makiolay ki Jehova na gibohon man iyan sa saindo? Hagadon sa saiya na haleon an takot sa saindong puso. Hagadon sa saiya na tabangan kamo na magkaigwa nin pagkapusoan para sa gibohon. Dugang pa, gumibo nin nagkapirang iba pang praktikal na aksion. Halimbawa, iareglo na umiba sa saro na eksperto sa klase nin paghuhulit na ikinapupurisaw nindo. Tibaad iyan may labot sa komersial na teritoryo, paghuhulit sa kalye, impormal na paghuhulit, o paghuhulit paagi sa telepono. Tibaad magusto an kapadis nindo na iyong mangenot sa primero. Kun siring, magmasid asin makanood. Pero magkaigwa kan pagkapusoan na probaran iyan.

18. Anong mga bendisyon an tibaad maeksperyensiahan niato kun kita magkakaigwa nin pagkapusoan sa satong ministeryo?

¹⁸ Kun kamo magkaigwa kan pagkapusoan, isip-isipa an puedeng ibunga. Kun kamo magpoprosegir asin dai pababayaan na kamo panluyahan nin boot, posibleng marhay na kamo magkaigwa nin maogmang mga eksperyensia sa paghiras sa iba kan katotoohan, mga eksperyensia na tibaad dai kutana nindo nakamtan. (Helingon an pahina 25.) Magkakaigwa kamo kan pagkakontento sa pakaaram na napanigoan nindo si Jehova paagi sa paggibo nin sarong bagay na depisil para sa saindo. Maeeksperyensiahan nindo an saiyang bendisyon saka tabang sa pagdaog sa saindong mga pagkatakot. Magigin mas makosog an saindong pagtubod. An totoo, dai nindo mahihimong pataluboon an pagtubod nin iba na dai man napatatalubo an sadiri nindong pagtubod.—Judas 20, 21.

19. Anong mahalagang marhay na balos an natatagama sa “klase na may pagtubod”?

¹⁹ Logod na padagos nindong pakosogon an saindong pagtubod asin an pagtubod kan mga nasa palibot nindo. Magigibo nindo iyan paagi sa pagparigon sa saindong sadiri asin sa iba paagi sa ekspertong paggamit kan Tataramon nin Dios, pag-adal sa mga halimbawa nin pagtubod sa Biblia saka buhay na pagsaysay kaiyan, pag-andam para sa saka pakikikabtang sa Kristianong mga pagtiripon, asin pangangapot nin pusog sa mahalagang marhay na pribilehio na ministeryo sa publiko. Mantang ginigibo nindo an mga bagay na ini, makasisierto kamo na kamo tunay nanggad na saro sa “klase na may pagtubod.” Girumdoma man na an mga kabilang sa klaseng ini may mahalagang marhay na balos. Sinda “an klase na may pagtubod sa ikapagdadanay na buhay kan kalag.”b Logod na padagos na tumalubo an saindong pagtubod, asin logod na papagdanayon kamong buhay ni Jehova Dios sagkod lamang!

[Mga Nota sa Ibaba]

Ano an Isisimbag Nindo?

◻ Paano si Pablo nagpahayag nin kompiansa sa Hebreong mga Kristiano, asin ano an manonodan niato digdi?

◻ Taano ta tamang-tama an pagkasambit ni Pablo sa propetang si Habacuc?

◻ Anong mga halimbawa nin pagtubod sa Kasuratan an buhay na isinaysay ni Pablo?

◻ Anong praktikal na mga paagi sa pagpatalubo nin pagtubod an irinekomendar ni Pablo?

[Retrato sa pahina 23]

Pakatapos kan makolog na eksperyensia nia sa Filipos, si Pablo nagkaigwa nin pagkapusoan na magpadagos sa paghuhulit

[Mga retrato sa pahina 24]

Kaya daw nindong magkaigwa nin pagkapusoan na probaran an manlaenlaen na klase nin paghuhulit?