Ika Daw “Andam na Magsunod”?

 1. Taano ta puwedeng magin masakit para sato na magsunod?

NASASAKITAN ka daw kun minsan na magin masinunod? Si Hading David iyo, kaya namibi siya sa Diyos: “Pukawon mo sa sako an pagmawot na magsunod sa saimo.” (Sal. 51:12) Namutan ni David si Jehova. Pero, may mga pagkakataon pa man giraray na nasasakitan kaidto si David na magin masinunod, asin iyo man kita. Taano man? Inot, namana ta an tendensiya na magin bakong masinunod. Ikaduwa, padagos na naghihinguwa si Satanas na sutsutan kitang magrebelde, arog kan ginibo niya. (2 Cor. 11:3) Ikatulo, lakop sa kinaban na ini an rebelyosong kaisipan, “an espiritu na iyo ngunyan an nang-iimpluwensiya sa mga aki nin pagsuway.” (Efe. 2:2) Dapat kitang magmaigot na marhay bako lang para labanan an satong tendensiya na magkasala kundi para labanan man an panggigipit sa sato kan Diyablo asin kan kinaban na ini na dai magsunod. Dapat na maghinguwa kitang sunudon si Jehova asin an mga tinawan niya nin awtoridad.

 2. Ano an buot sabihon kan pagigin “andam na magsunod”? (Santiago 3:17)

² Basahon an Santiago 3:17. An pinasabngan na kagsurat kaiyan na si Santiago nagsabi na an mga tawong madunong “andam na magsunod.” Isipon kun ano an buot sabihon kaiyan. Dapat na gusto asin andam niyatong sunudon idtong mga pinagkatiwalaan ni Jehova nin awtoridad. Siyempre, dai man inaasahan ni Jehova na susunudon ta an saro na naghahagad sa sato na suwayon an Saiyang mga pagbuot.​—Gibo 4:18-20.

 3. Taano ta mahalaga ki Jehova na sunudon ta idtong mga may awtoridad sa sato?

³ Tibaad mas madali para sa sato na magsunod ki Jehova kisa magsunod sa tawo. Kun sabagay, si Jehova pirming nagtatao nin perpektong instruksiyon. (Sal. 19:7) Pero bakong arog kaiyan an mga tawo na may awtoridad. Dawa arog kaiyan, an satong Ama sa langit tinawan nin awtoridad an mga magurang, mga opisyal sa gobyerno, asin mga elder. (Tal. 6:20; 1 Tes. 5:12; 1 Ped. 2:13, 14) Pag sinusunod ta sinda, an sinusunod ta talaga si Jehova. Pag-ulayan ta ngunyan kun paano ta susunudon an mga tawo na pinagkakatiwalaan ni Jehova nin awtoridad, dawa ngani may mga pagkakataon na tibaad masakit para sa sato na akuon asin sunudon an saindang instruksiyon.

 4. Taano ta dai sinusunod nin dakul na aki an saindang mga magurang?

⁴ An mga hoben napapalibutan nin mga kaedad ninda na may tendensiyang magin “masinuway sa mga magurang.” (2 Tim. 3:1, 2) Taano ta dakul sa sainda an masinuway? Pagmati kan iba mapagsagin-sagin an mga magurang ninda. Inaasahan sa mga aki na gigibuhon ninda an mga bagay na dai man nagigibo kan mga magurang mismo. Minamansay kan iba na makaluma, bakong praktikal, o istriktuhon man na marhay an sadol kan saindang mga magurang. Kun saro kang hoben, arog man daw kaiyan an pagmati mo? Dakul an nadidipisilan na iaplikar an pagbuot ni Jehova: “Magin masinunod kamo sa saindong mga magurang kauyon kan kabutan kan Kagurangnan, huli ta ini matanos.” (Efe. 6:1) Ano an makakatabang saimo na gibuhon iyan?

 5. Taano ta kahanga-hanga na sinunod ni Jesus an saiyang mga magurang, arog kan sinasabi sa Lucas 2:46-52?

⁵ Makakanuod ka na magin masinunod sa pinakamarahay na ehemplo​—si Jesus. (1 Ped. 2:21-24) Perpekto siyang tawo na may bakong perpektong mga magurang. Pero tinawan ni Jesus nin onra an saiyang mga magurang dawa kan masala sinda asin kan may mga pagkakataon na dai ninda siya nasabutan. (Exo. 20:12) Pag-isipan an nangyari kan 12 anyos si Jesus. (Basahon an Lucas 2:46-52.) Nabayaan siya kan saiyang mga magurang sa Jerusalem. Responsabilidad ni Jose saka ni Maria na siguraduhon na kaibahan ninda an gabos nindang aki kan papuli na sinda pagkatapos kan kapiyestahan. Kan nanumpungan na ni Jose saka ni Maria si Jesus, binasol ni Maria si Jesus sa itinao kaining problema sa sainda! Puwede kutanang sabihon ni Jesus na bakong makatanusan iyan. Imbes, simple lang saka magalang an nagin simbag niya sa saiyang mga magurang. Minsan siring, “dai [ni Jose asin ni Maria] nasabutan an sinabi niya sa sainda.” Pero, si Jesus “padagos [pa man giraray na] nagpasakop sa sainda.”

6-7. Ano an makakatabang sa mga hoben na sunudon an saindang mga magurang?

⁶ Mga hoben, nasasakitan daw kamong sunudon an saindong mga magurang pag nakakagibo sinda nin mga sala o pag dai ninda kamo nasasabutan? Ano an makakatabang? Inot, isipon kun ano an namamatian ni Jehova. Sinasabi kan Bibliya na pag sinusunod nindo an saindong mga magurang, “nakakapaugma ini sa Kagurangnan.” (Col. 3:20) Aram ni Jehova pag dai kamo lubos na nasasabutan kan saindong mga magurang o pag naggigibo sinda nin mga susundon na bakong madaling sunudon. Pero pag pinili pa man giraray nindong sunudon sinda, mapapaugma nindo Siya.

⁷ Ikaduwa, isipon kun ano an namamatian kan saindong mga magurang. Pag sinusunod nindo an saindong mga magurang, napapaugma nindo sinda asin mas pagtitiwalaan pa kamo ninda. (Tal. 23:22-25) Posibleng marhay na magigin mas dayupot man kamo sa sainda. “Kan mas parati ko nang sinusunod an mga pigpapagibo sa sakuya kan mga magurang ko,” an sabi kan brother na taga Belgium na si Alexandre, “nagbago an pag-iribanan mi. Nagin mas dayupot saka mas maugma kami.”b Ikatulo, isipon na an pagigin masinunod nindo sa ngunyan makakatabang sa saindo pag-abot nin panahon. Si Paulo, na nakaistar sa Brazil, nagsabi, “An pagsunod ko sa sakong mga magurang nakatabang sa sako na sunudon si Jehova asin an iba pa na may awtoridad.” An Tataramon nin Diyos nagtatao nin masarig na dahilan na sunudon an saindong mga magurang. Sinasabi kaiyan: “Tanganing maparahay ka asin magdanay ka nin halawig na panahon sa daga.”​—Efe. 6:2, 3.

 8. Taano ta pinipili kan dakul na hoben na sunudon an saindang mga magurang?

⁸ Nahiling kan dakul na hoben na marahay an kinakaabtan kan mga bagay-bagay pag nagsusunod sinda. Si Luiza, na taga Brazil man, nasakitan kan inot na masabutan kun taano ta dai siya pigtugutan kaidto na magkaigwa nin cell phone. Nagrason siya na an kadaklan ngani sa mga kaedad niya igwa na nin cell phone. Pero kan huri narealisar niya na pinoprotektaran man sana siya kan saiyang mga magurang. Ngunyan sinabi niya, “An pagsunod ko sa mga magurang ko dai ko ibinibilang na sarong straitjacket, kundi saro iyan na seat belt na puwedeng magligtas kan buhay ko.” Si Elizabeth, sarong hoben na sister na taga United States, nasasakitan pa man giraray kun minsan na magsunod sa saiyang mga magurang. Sinabi niya, “Pag dai ko lubos na naiintindihan kun taano ta naggigibo an mga magurang ko nin sarong partikular na patakaran, piggigirumdom ko an mga panahon na naprotektaran ako kan mga patakaran ninda.” Si Monica, na nakaistar sa Armenia, nagsabi na pirming marahay an kinakaabtan kan mga bagay-bagay para sa saiya pag sinusunod niya an saiyang mga magurang imbes na pag sinusuway niya sinda.

 9. Ano an sabuot nin dakul manungod sa pagsunod sa ley?

⁹ Uyon an dakul na tawo na kaipuhan ta an sekular na mga gobyerno asin na dapat tang sunudon an kisiyera pira sa mga ley na ipinapautob kan “haralangkaw na awtoridad” na ini. (Roma 13:1) Pero an iyo man sanang mga tawo tibaad magduwa-duwang magsunod sa sarong ley na sa hiling ninda bakong makatanusan o garo baga magabaton man. Halimbawa, pag-isipan an manungod sa pagbayad nin buhis. Un-kuarto kan mga nasurbey sa sarong nasyon sa Europa naniniwala na “tama sana na dai magbayad nin buhis kun sa hiling mo bako iyan makatanusan.” Kaya, bakong makangangalas na mga 67% sana kan mga buhis na dapat itao sa gobyerno an pigbabayadan kan mga siyudadano kaiyan.

10. Taano ta sinusunod niyato dawa an mga ley na habo ta?

¹⁰ Sinasabi kan Bibliya na an mga gobyerno nin tawo nagtatao nin kasakitan, kontrolado ni Satanas, asin madali nang laglagon. (Sal. 110:5, 6; Ecl. 8:9; Luc. 4:5, 6) Sinasabi man kaiyan sa sato na “an siisay man na nagtutumang sa awtoridad minatumang sa areglo nin Diyos.” An satong limitadong pagpasakop sa haralangkaw na awtoridad kabtang kan temporaryong areglo ni Jehova tanganing mapagdanay an pagigin areglado kan mga bagay-bagay. Kun siring, dapat niyatong “itao sa gabos an para sa sainda,” kaiba diyan an mga buhis, paggalang, asin pagsunod. (Roma 13:1-7) Tibaad mansayon ta an sarong ley na bakong kumbenyente, bakong makatanusan, o magastos kun susunudon. Alagad sinusunod ta si Jehova, asin sinasabi niya sa sato na sunudon niyato an mga awtoridad na ini basta dai ninda hinahagad sa sato na balgahon an saiyang mga pagbuot.​—Gibo 5:29.

11-12. Arog kan sinasabi sa Lucas 2:1-6, ano an ginibo ni Jose asin Maria tanganing sunudon an sarong ley na bakong kumbenyente, asin ano an nagin resulta? (Hilingon man an mga ritrato.)

¹¹ Makakanuod kita sa halimbawa ni Jose asin Maria, na nagin andam na magsunod sa haralangkaw na awtoridad dawa pag bako iyan kumbenyente. (Basahon an Lucas 2:1-6.) Kan mga siyam na bulan nang bados si Maria, nabalo an pagigin masinunod ninda ni Jose. Si Augusto, na tagapamahala kan Imperyo nin Roma, ipinagbuot an pagpaparehistro. Kinaipuhan ni Jose asin Maria na magbaklay pa-Betlehem, na maabot sa 150 kilometros an distansiya asin nag-aagi sa mabulod na lugar. An pagbaklay na iyan bakong madali, lalo na para ki Maria. Tibaad ikinahadit nindang mag-agom an kaligtasan ni Maria asin kan ipinagbabados kaini. Paano kun sa dalan siya abutan nin pangangaki? An dara-dara niya sa saiyang tulak iyo an magigin Mesiyas. Dahil daw diyan dai na sinda masunod sa gobyerno?

¹² Dai tinugutan ni Jose asin Maria an arin man sa mga kahaditan na iyan para magduwa-duwa kun baga masunod sinda sa ley. Binendisyunan ni Jehova an saindang pagigin masinunod. Ligtas na nakaabot si Maria sa Betlehem, nangaki nin sarong umboy na marahay an salud, asin nakatabang pa ngani para mautob an propesiya sa Bibliya!​—Mik. 5:2.

13. Ano an puwedeng magin epekto sa satong mga tugang kan satong pagigin masinunod?

¹³ Pag sinusunod ta an haralangkaw na awtoridad, makikinabang kita saka an iba. Paano man? An sarong bagay, malilikayan niyato an padusa na itinatao sa mga nagbabalga sa ley. (Roma 13:4) An satuya mismong pagsunod igwa nin epekto sa kun paano minamansay kan mga awtoridad an Mga Saksi ni Jehova sa kabilugan. Halimbawa, nagkapirang dekada na an nakaagi sa Nigeria, may mga suldados na nagralaog sa sarong Kingdom Hall mantang igwang pagtiripon an kongregasyon. Hinahanap ninda an mga nagrarayot na nagpoprotesta manungod sa pagbayad nin mga buhis. Alagad sinabihan kan namamahalang opisyal an mga suldados na magharali na, na sinasabi: “An Mga Saksi ni Jehova bakong mga parareklamo sa pagbayad nin buhis.” Sa kada sinusunod mo an ley, napapagayon mo an reputasyon kan banwaan ni Jehova​—sarong reputasyon na tibaad pag-abot nin panahon makatabang na maprotektaran an saimong mga kapagtubod.​—Mat. 5:16.

14. Ano an nakatabang sa sarong sister na magin “andam na magsunod” sa haralangkaw na awtoridad?

¹⁴ Pero, tibaad may tendensiya pa man giraray kita kun minsan na dai magsunod sa haralangkaw na awtoridad. “Masakiton nanggad para sa sako na magin masinunod,” an pag-admitir ni Joanna, sarong sister sa United States, “huling an pira sa mga kapamilya ko nag-agi nin inhustisya sa kamot kan mga awtoridad.” Pero grabeng paghihinguwa an ginibo ni Joanna para baguhon an saiyang sabuot. Inot, ipinundo niya an pagparabasa nin mga post sa social media na nakakapukaw sa saiyang negatibong pagmati sa mga awtoridad. (Tal. 20:3) Ikaduwa, namibi siya ki Jehova para tabangan siyang magtiwala sa saiya imbes na sa pagbabago na puwedeng gibuhon kan gobyerno nin tawo. (Sal. 9:9, 10) Ikatulo, nagbasa siya nin mga artikulo sa satong mga publikasyon manungod sa neutralidad. (Juan 17:16) Sinabi ngunyan ni Joanna na an paggalang asin pagsunod sa mga awtoridad nagtao saiya nin “katuninungan na dai haros maipaliwanag.”

15. Taano ta tibaad nasasakitan kitang magsunod sa mga instruksiyon na hali sa organisasyon ni Jehova?

¹⁵ Hinahagad sa sato ni Jehova na “magin masinunod sa mga nanginginot” sa kongregasyon. (Heb. 13:17) Dawa ngani perpekto an satong Lider, si Jesus, an mga ginagamit niya para manginot digdi sa daga bakong mga perpekto. Tibaad masakitan kitang sunudon sinda, lalo na kun may pigpapagibo sinda sa sato na dai ta gustong gibuhon. Kan inot si apostol Pedro nagduwa-duwang magsunod. Kan ininstruksiyunan siya nin sarong anghel na kakanon an mga hayop na bakong malinig sigun sa Katugunan ni Moises, nagsayuma si Pedro​—bako sanang sarong beses, kundi tulong beses! (Gibo 10:9-16) Taano? Para saiya garo bakong tama an bagong instruksiyon. Tuod siya na gibuhon an mga bagay-bagay sa ibang pamamaagi. Kun si Pedro ngani nadipisilan na magsunod sa instruksiyon na hali sa sarong perpektong anghel, tibaad mas lalo nang madipisilan kitang sumunod sa instruksiyon na hali sa bakong perpektong mga tawo!

16. Dawa ngani posibleng inisip ni apostol Pablo na bakong rasonable an instruksiyon na itinao sa saiya, ano an ginibo niya? (Gibo 21:23, 24, 26)

¹⁶ Si apostol Pablo nagin “andam na magsunod” dawa kan tinawan siya nin instruksiyon na sa pagmati niya bakong rasonable. Nakadangog an mga Kristiyanong Judio nin uruistorya manungod ki Pablo​—mga uruistorya na nagsasabi na naghuhulit daa siya “nin apostasya laban sa Katugunan ni Moises” asin pigbabasang-basang niya daa iyan. (Gibo 21:21) Ininstruksiyunan si Pablo kan Kristiyanong kamagurangan sa Jerusalem na mag-iba nin apat na lalaki sa templo asin linigon an saiyang sadiri sa seremonyal na paagi para ipahiling na pigsusunod niya an Katugunan. Pero aram ni Pablo na an mga Kristiyano bako nang sakop kan Katugunan. Asin mayo man siyang salang nagibo. Alagad, dai nagduwa-duwa si Pablo. Kaya, “kan sunod na aldaw, iiniba ni Pablo an mga lalaki asin naglinig siya kan saiyang sadiri sa seremonyal na paagi kaibanan ninda.” (Basahon an Gibo 21:23, 24, 26.) An pagigin masinunod ni Pablo nagresulta sa pagkasararo.​—Roma 14:19, 21.

17. Ano an manunudan mo sa eksperyensiya ni Stephanie?

¹⁷ An sister na si Stephanie nasakitan na akuon an sarong desisyon na ginibo kan nanginginot na mga brother sa saiyang nasyon. Maugma kaidtong naglilingkod sindang mag-agom sa sarong grupo na iba an lengguwahe. Dangan, hinali kan sangang opisina an grupong iyan, asin ibinalik an mag-agom sa kongregasyon na nagtataram kan sadiri nindang lengguwahe. “Mamunduon ako,” an sabi ni Stephanie. “Dai ako kumbinsido na igwa nin mas dakulang pangangaipo sa lengguwahe mi.” Dawa arog kaiyan, nagdesisyon siyang suportaran an bagong instruksiyon. “Pag-abot nin panahon, naintindihan ko kun taano ta madunong an nagin desisyon kan mga brother,” an sabi niya. “Nagin kaming mga magurang sa espirituwal kan nagkapira sa kongregasyon mi na mayong kapagtubod na kapamilya. Pigba-Bible study ko an sarong bago pa sanang magin aktibo giraray na parahayag na sister. Asin ngunyan mas dakul na an panahon ko sa pag-personal study.” Sabi pa niya, “Igwa ako nin malinig na konsiyensiya huling aram ko na ginibo ko an pinakamakakaya ko na magin masinunod.”

18. Paano kita makikinabang sa pagigin masinunod?

¹⁸ Puwede kitang makanuod na magsunod. “Nanudan [ni Jesus] an pagsunod,” bako sa marahay na mga kamugtakan, kundi “sa mga bagay na saiyang tinios.” (Heb. 5:8) Arog ni Jesus, sa parati nanunudan ta na magin masinunod pag nasa masakit na mga kamugtakan. Halimbawa, kan kakapuon pa sana kan COVID-19 na pandemya asin sinabihan kita na ipundo an mga pagtiripon sa satong mga Kingdom Hall asin an satong ministeryong pagharong-harong, nasakitan ka daw na magsunod? Alagad, an saimong pagigin masinunod nagprotektar sa saimo, nakatabang para magkasararo an mga tugang sa kongregasyon, asin nakapaugma ki Jehova. Gabos kita ngunyan mas andam nang sumunod sa ano man na mga instruksiyon na itatao sa sato sa panahon kan dakulang kasakitan. Puwedeng magdepende diyan an satong kaligtasan!​—Job 36:11.

19. Taano ta gusto mong magin masinunod?

¹⁹ Nanudan niyato na an pagigin masinunod nagtatao nin dakulon na bendisyon. Pero an panginot na dahilan kaya pinipili tang sunudon si Jehova iyo na namumutan ta siya asin gusto tang paugmahon siya. (1 Juan 5:3) Dai ta nanggad mababalusan si Jehova sa gabos na ginigibo niya para sa sato. (Sal. 116:12) Pero puwede kitang sumunod sa saiya asin sa mga may awtoridad sa sato. Kun nagsusunod kita, ipinapahiling ta na madunong kita. Asin napapaugma kan madunong an puso ni Jehova.​—Tal. 27:11.