Kapitulo 43

An Siudad na Nakakasula sa Kagayonan

Bisyon 16—Kapahayagan 21:9–22:5

Tema: Paglaladawan sa Bagong Jerusalem

Panahon nin kaotoban: Pagkatapos kan dakulang kahorasaan asin kan paghulog ki Satanas sa bungaw

1, 2. (a) Saen dinara kan sarong anghel si Juan tanganing maheling an Bagong Jerusalem, asin anong pagkakalaen an naheheling niato digdi? (b) Taano ta ini an mamuraway na kulminasyon kan Kapahayagan?

SI Juan dinara kaidto nin sarong anghel sa kaawagan tanganing ipaheling saiya an Dakulang Babilonya. Ngonyan dinara si Juan kan saro sa iyo man sanang grupo nin mga anghel sa sarong halangkawon na bukid. Kabaliktaran nanggad an naheheling nia! Ini bakong marompot, inmoral na siudad na arog kan Babilonikong patotot, kundi an Bagong Jerusalem—dalisay, espirituwal, banal—asin iyan naghihilig hale mismo sa langit.—Kapahayagan 17:1, 5.

² Maski an daganon na Jerusalem nungkang nagkaigwa nin arog kaining kamurawayan. Sinasabi sato ni Juan: “Asin uminabot an saro sa pitong anghel na igwa kan pitong mangko na pano kan pitong huring damat, asin sia nakipag-olay sa sako asin nagsabi: ‘Madia, ipapaheling ko sa saimo an nobya, an agom kan Kordero.’ Kaya dinara nia ako sa kapangyarihan kan espiritu sa sarong dakula asin halangkawon na bukid, asin ipinaheling nia sa sako an banal na siudad na Jerusalem na naghihilig hale sa langit gikan sa Dios asin igwa kan kamurawayan nin Dios.” (Kapahayagan 21:9-11a) Hale sa marahay na kamugtakan sa halangkawon na bukid na iyan, pinagmasdan ni Juan an magayon na siudad sa gabos na nakakaakit na detalye kaiyan. An mga tawong may pagtubod galagang naghahalat sa pagdatong kaiyan poon kan mahulog sa kasalan asin kagadanan an katawohan. Sa katapustapusi iyan uya na! (Roma 8:19; 1 Corinto 15:22, 23; Hebreo 11:39, 40) Iyan an kahangahangang espirituwal na siudad, na kompuesto nin 144,000 na maimbod na nagdanay na may integridad, na nakakasula sa kabanalan kaiyan asin nagpapabanaag kan mismong kamurawayan ni Jehova. Uya an mamuraway na kulminasyon kan Kapahayagan!

 3. Paano ilinaladawan ni Juan an kagayonan kan Bagong Jerusalem?

³ Garo dai ka makahangos sa kagayonan kan Bagong Jerusalem: “An kinang kaiyan kabaing nin mahal na marhay na bato, siring sa batong jaspe na nangingintab nin malinaw siring sa kristal. Iyan igwa nin dakula asin halangkawon na lanob asin igwa nin doseng tata, asin sa mga tata may doseng anghel, asin may nakasurat na mga ngaran, ngaran kan doseng tribo kan mga aki ni Israel. Sa sirangan may tolong tata, asin sa amihanan tolong tata, asin sa timog tolong tata, asin sa solnopan tolong tata. An lanob kan siudad igwa man nin doseng pundasyon na gapo, asin sa ibabaw kan mga iyan yaon an doseng ngaran kan doseng apostol kan Kordero.” (Kapahayagan 21:11b-14) Abaa kaangay na an enot na impresyon na irinekord ni Juan iyo an makinang na kaliwanagan! Nakakasula sa kagayonan siring sa sarong babaeng bagong kasal, an Bagong Jerusalem angay na agom ni Cristo. Iyan nagkikinang nanggad, na tama sana para sa sarong linalang kan “Ama kan langitnon na mga liwanag.”—Santiago 1:17.

 4. Ano an nagpaparisa na an Bagong Jerusalem bakong an nasyon nin Israel sa laman?

⁴ Sa 12 tata kaiyan, nakasurat an ngaran kan 12 tribo nin Israel. Kun siring, an simbolikong siudad na ini kompuesto kan 144,000, na tinatakan “hale sa lambang tribo kan mga aki ni Israel.” (Kapahayagan 7:4-8) Kaoyon kaini, an pundasyon na mga gapo igwa kan ngaran kan 12 apostol kan Kordero. Iyo, an Bagong Jerusalem bakong an nasyon nin Israel sa laman na an pundasyon iyo an 12 aki ni Jacob. Iyan an espirituwal na Israel, na an pundasyon iyo an “mga apostol asin propeta.”—Efeso 2:20.

 5. Ano an ipinaparisa kan “dakula asin halangkawon na lanob” kan Bagong Jerusalem asin kan bagay na may mga anghel sa kada pinto?

⁵ An simbolikong siudad may dakulaon na lanob. Kan suanoy na mga panahon, itinotogdok an mga lanob nin siudad para sa seguridad tanganing dai makalaog an mga kaiwal. An “dakula asin halangkawon na lanob” kan Bagong Jerusalem nagpapaheling na sia may espirituwal na seguridad. Daing kaiwal nin katanosan, daing marompot o madaya, na makakalaog noarin man. (Kapahayagan 21:27) Alagad para sa mga papalaogon, an paglaog sa magayon na siudad na ini garo paglaog sa Paraiso. (Kapahayagan 2:7) Pakapahalea ki Adan, may mga kerubin na ibinugtak sa atubangan kan orihinal na Paraiso tanganing dai makalaog an marompot na mga tawo. (Genesis 3:24) Siring man, may mga anghel na ibinugtak sa kada pinto kan banal na siudad nin Jerusalem tanganing masierto an espirituwal na seguridad kan siudad. Tunay nanggad, sa bilog na huring mga aldaw, binabantayan nin mga anghel an kongregasyon nin linahidan na mga Kristiano, na iyong nagigin Bagong Jerusalem, tangani na iyan dai maulakitan kan Dakulang Babilonya.—Mateo 13:41.

Pagsokol sa Siudad

 6. (a) Paano ilinaladawan ni Juan an pagsokol sa siudad, asin ano an ipinaparisa kan pagsokol na ini? (b) Ano an puedeng magin paliwanag sa bagay na an ginamit na sokol “segun sa sokol nin tawo, na iyo man sa anghel”? (Helingon an nota sa ibaba.)

⁶ Ipinagpapadagos ni Juan an saiyang salaysay: “Ngonyan an nakikipag-olay sa sako may kapot na gahong bulawan bilang pansokol, tanganing masokol nia an siudad asin an mga tata kaiyan patin an lanob kaiyan. Asin an siudad kuadrado, asin an laba kaiyan pareho sa lakbang kaiyan. Asin sinokol nia kan gaho an siudad, dose mil na estadio; an laba asin lakbang patin langkaw kaiyan parareho. Siring man, sinokol nia an lanob kaiyan, siento kuarenta y kuatrong sokol sa siko, segun sa sokol nin tawo, na iyo man sa anghel.” (Kapahayagan 21:15-17) Kan sokolon an santuaryo kan templo, ini naggarantiya kan kaotoban kan mga katuyohan ni Jehova mapadapit dian. (Kapahayagan 11:1) Ngonyan, an pagsokol kan anghel sa Bagong Jerusalem nagpapaheling kun paanong dai maliliwat an mga katuyohan ni Jehova mapadapit sa mamuraway na siudad na ini.a

 7. Ano an pambihira manongod sa sokol kan siudad?

⁷ Abaa kapambihira kan siudad na ini! Sarong eksaktong kubo (sa Ingles, cube) na 12,000 na estadio (mga 2,210 kilometros) an sokol sa palibot, na napapalibotan nin lanob na 144 sokol sa siko, o mga 65 metros, an langkaw. Mayo nin literal na siudad na puedeng magkaigwa nin siring kaining sokol. Iyan masakop nin teritoryo na mga 14 doble an hiwas sa Israel sa presenteng panahon, asin an langkaw kaiyan haros 560 kilometros na abot na sa espasyo! An Kapahayagan itinao sa mga tanda. Kaya, ano an sinasabi sato kan mga sokol na ini manongod sa langitnon na Bagong Jerusalem?

 8. Ano an ipinaparisa kan (a) lanob kan siudad na 144 sokol sa siko an langkaw? (b) sokol kan siudad na 12,000 na estadio? (c) pagigin eksaktong kubo kan korte kan siudad?

⁸ An lanob na 144 sokol sa siko an langkaw nagpapagirumdom sato na an siudad kompuesto nin 144,000 na aki nin Dios na inampon paagi sa espiritu. An numerong 12 na minalataw sa sokol kan siudad na 12,000 na estadio—na parareho an laba, lakbang, asin langkaw—ginagamit sa piguratibong paagi kun pinag-oolayan an organisasyon sa mga propesiya kan Biblia. Huli kaini, an Bagong Jerusalem matibayon an pagkadisenyong organisasyonal na areglo para sa pag-otob kan daing sagkod na katuyohan nin Dios. An Bagong Jerusalem, kaiba si Hadeng Jesu-Cristo, iyo an organisasyon ni Jehova sa Kahadean. Yaon man an korte kan siudad: sarong eksaktong kubo. Sa templo ni Salomon, an Kabanalbanale, na may simbolikong representasyon kan presensia ni Jehova, sarong eksaktong kubo. (1 Hade 6:19, 20) Kun siring, abaa kaangay na an Bagong Jerusalem, na papaliwanagon kan kamurawayan mismo ni Jehova, naheheling bilang eksakto, dakulang kubo! An gabos na sokol kaiyan eksakto an pagkabalanse. Iyan siudad na mayo nin mga diperensia o depekto.—Kapahayagan 21:22.

Mahal na Marhay na Materyales sa Pagtogdok

 9. Paano ilinaladawan ni Juan an materyales na ginamit sa pagtogdok kan siudad?

⁹ Ipinagpapadagos ni Juan an saiyang paglaladawan: “Ngonyan an ikinana sa lanob kaiyan jaspe, asin an siudad dalisay na bulawan na agid sa malinaw na salming. An mga pundasyon kan lanob kan siudad sinamnohan nin gabos na klase nin mahal na marhay na bato: an enot na pundasyon jaspe, an ikaduwa safiro, an ikatolo calcedonia, an ikaapat esmeralda, an ikalima sardonica, an ikaanom sardio, an ikapito crisolito, an ikawalo berilo, an ikasiyam topacio, an ikasampulo crisoprasa, an ikaonse jacinto, an ikadose amatista. Siring man, an doseng tata doseng perlas; an kada saro kan mga tata gibo sa sarong perlas. Asin an tinampo kan siudad dalisay na bulawan, siring sa silag na salming.”—Kapahayagan 21:18-21.

10. Ano an ipinaparisa kan bagay na an siudad gibo sa jaspe, bulawan, asin “gabos na klase nin mahal na marhay na bato”?

¹⁰ Talagang nakakasula sa kagayonan an pagkatogdok kan siudad. Imbes na ordinaryo, daganon na materyales sa pagtogdok arog baga kan dalipay o gapo, an nababasa niato jaspe, dinalisay na bulawan, asin “gabos na klase nin mahal na marhay na bato.” Abaa kaangay na ilinaladawan kan mga ini an langitnon na materyales sa pagtogdok! Dai nang iba na mas kahangahanga pa digdi. An suanoy na kaban kan tipan kinalupkupan nin dalisay na bulawan, asin sa Biblia an elementong ini parateng nagrerepresentar sa mga bagay na marahay asin mahalaga. (Exodo 25:11; Talinhaga 25:11; Isaias 60:6, 17) Alagad an bilog na Bagong Jerusalem, asin pati an tinampo kaiyan, gibo sa “dalisay na bulawan na agid sa malinaw na salming,” na naglaladawan sa kagayonan asin sa sadiring halaga na haros dai kayang imahinaron.

11. Ano an naggagarantiya na an makompuesto sa Bagong Jerusalem magkikinang sa pinakahalangkaw na klase nin espirituwal na kadalisayan?

¹¹ Mayo nin tawong paratunaw nin metal na makakaprodusir nin siring kadalisay na bulawan. Alagad si Jehova an Pangenot na Paradalisay. Sia nagtutukaw “bilang paradalisay asin paralinig nin pirak,” asin dinadalisay nia an indibiduwal, maimbod na mga miembro kan espirituwal na Israel “siring sa bulawan asin siring sa pirak,” na hinahale sainda an gabos na ati. Solamente an mga indibiduwal na talagang dinalisay na asin lininig na an sa katapustapusi makompuesto sa Bagong Jerusalem, asin sa paaging ini itinotogdok ni Jehova an siudad gamit an buhay na materyales sa pagtogdok na nagkikinang sa pinakahalangkaw na klase nin espirituwal na kadalisayan.—Malaquias 3:3, 4.

12. Ano an kahulogan kan bagay na (a) an mga pundasyon kan siudad nasasamnohan nin 12 mahal na marhay na bato? (b) mga perlas an mga tata kan siudad?

¹² Dawa an mga pundasyon kan siudad magayon, ta iyan nasasamnohan nin 12 mahal na marhay na bato. Ini nagpapagirumdom sa suanoy na Judiong halangkaw na saserdote, na sa seremonyal na mga aldaw may sulot na efod na natatampokan nin 12 manlaenlaen na mahal na marhay na bato na medyo kaagid kan mga ilinaladawan digdi. (Exodo 28:15-21) Sierto nanggad na bako ining pagkanorongod sana! Imbes, idinodoon kaiyan an sa saserdoteng trabaho kan Bagong Jerusalem, na an “lampara” si Jesus, an dakulang Halangkaw na Saserdote. (Kapahayagan 20:6; 21:23; Hebreo 8:1) Siring man, paagi sa Bagong Jerusalem na ipapaabot sa katawohan an mga pakinabang sa ministeryo ni Jesus bilang halangkaw na saserdote. (Kapahayagan 22:1, 2) An 12 tata kan siudad, na an balang saro perlas na magayonon, nagpapagirumdom kan ilustrasyon ni Jesus na ibinaing an Kahadean sa perlas na halangkaw an halaga. An gabos na minalaog sa mga tatang iyan nakapagpaheling nin tunay na pagpapahalaga sa espirituwal na mga bagay.—Mateo 13:45, 46; ikomparar an Job 28:12, 17, 18.

Sarong Siudad nin Liwanag

13. Ano an sunod na sinabi ni Juan mapadapit sa Bagong Jerusalem, asin taano an siudad ta dai nangangaipo nin ano man na literal na templo?

¹³ Kan panahon ni Salomon, an pinakalataw sa Jerusalem iyo an templo na itinogdok sa pinakahalangkaw na lugar kan siudad sa Bukid nin Moria sa amihanan. Alagad kumusta an Bagong Jerusalem? Sinasabi ni Juan: “Asin mayo akong naheling na templo dian, huli ta si Jehova Dios na Makakamhan sa Gabos iyo an templo kaiyan, siring man an Kordero. Asin an siudad dai nangangaipo kan saldang o kan bulan tanganing tingrawan iyan, huli ta an kamurawayan nin Dios iyo an nagtatao nin liwanag dian, asin an lampara kaiyan iyo an Kordero.” (Kapahayagan 21:22, 23) An totoo, dai kaipuhan na magtogdok digdi nin literal na templo. An suanoy na templo kan mga Judio arogan sana, asin an tunay na inarogan kaiyan, an dakulang espirituwal na templo, nag-eksister na magpoon kan lahidan ni Jehova si Jesus bilang Halangkaw na Saserdote kan 29 C.E. (Mateo 3:16, 17; Hebreo 9:11, 12, 23, 24) An templo naghahagad man na magkaigwa nin grupo nin mga saserdote na magdodolot nin mga atang ki Jehova para sa banwaan. Alagad an gabos na kabilang sa Bagong Jerusalem saserdote. (Kapahayagan 20:6) Asin an dakulang atang, an sangkap na buhay ni Jesus bilang tawo, idinolot nin sararoan sana. (Hebreo 9:27, 28) Dugang pa, si Jehova personal na madodolok kan gabos na nag-iistar sa siudad.

14. (a) Taano an Bagong Jerusalem ta dai nangangaipo kan saldang asin kan bulan tanganing tingrawan iyan? (b) Ano an ihinula kan propesiya ni Isaias may labot sa unibersal na organisasyon ni Jehova, asin paano kalabot digdi an Bagong Jerusalem?

¹⁴ Kan an kamurawayan ni Jehova umagi ki Moises sa Bukid nin Sinai, pinapagliwanag na marhay kaiyan an lalauogon ni Moises kaya kinaipuhan na tahoban nia iyan sa atubangan kan mga kapwa nia Israelita. (Exodo 34:4-7, 29, 30, 33) Kun siring, naiimahinar daw nindo kun gurano kaliwanag an sarong siudad na permanenteng pinapaliwanag kan kamurawayan ni Jehova? An siring na siudad dai puedeng magkaigwa nin banggi. Dai iyan mangangaipo nin literal na saldang o bulan. Iyan magliliwanag sagkod lamang. (Ikomparar an 1 Timoteo 6:16.) Arog kaiyan kakinang an liwanag kan Bagong Jerusalem. Tunay nanggad, an nobyang ini asin an Nobyong Hade kaiyan an nagigin kabisera kan unibersal na organisasyon ni Jehova—an saiyang “babae,” “an Jerusalem na nasa itaas”—na may labot dian nagpropesiya si Isaias: “Para sa saimo dai na magigin liwanag an saldang kun aldaw, asin an bulan dai na masubang sa pagtao saimo nin liwanag. Asin si Jehova magigin liwanag na nagdadanay sa panahon na daing talaan para sa saimo, asin an saimong Dios iyo an magigin saimong kagayonan. Dai na masolnop an saimong saldang, ni masadit man an saimong bulan; huli ta si Jehova magigin liwanag na nagdadanay sa panahon na daing talaan para sa saimo, asin matatapos na an mga aldaw kan saimong pagmondo.”—Isaias 60:1, 19, 20; Galacia 4:26.

Sarong Liwanag Para sa mga Nasyon

15. Anong mga tataramon sa Kapahayagan manongod sa Bagong Jerusalem an kaagid kan propesiya ni Isaias?

¹⁵ Ihinula man kan propesiyang ini: “Asin an mga nasyon maduruman nanggad sa saimong liwanag, asin an mga hade sa sinag kan saimong pagsirang.” (Isaias 60:3) Ipinapaheling kan Kapahayagan na kaiba sa mga tataramon na ini an Bagong Jerusalem: “Asin an mga nasyon maglalakaw paagi sa liwanag kaiyan, asin dadarahon dian kan mga hade kan daga an saindang kamurawayan. Asin an mga tata kaiyan dai na nanggad pipintoan kun aldaw, huli ta mayo dian nin banggi. Asin dadarahon ninda dian an kamurawayan asin an onra kan mga nasyon.”—Kapahayagan 21:24-26.

16. Sairisay an “mga nasyon” na maralakaw paagi sa liwanag kan Bagong Jerusalem?

¹⁶ Sairisay an “mga nasyon” na ini na naglalakaw paagi sa liwanag kan Bagong Jerusalem? Sinda mga tawo, na dating kabtang kan mga nasyon sa marigsok na kinaban na ini, na nagpapaheling nin marahay na reaksion sa liwanag na itinatao paagi sa mamuraway na siudad na ini na langitnon. Pangenot sainda an dakulang kadaklan, na nagruluwas na sa “gabos na nasyon asin tribo asin banwaan patin lenguahe” asin nagsasamba sa Dios aldaw asin banggi kaiba kan grupong Juan. (Kapahayagan 7:9, 15) Pagkatapos na maghilig hale sa langit an Bagong Jerusalem asin gamiton ni Jesus an mga liabe nin kagadanan asin nin Hades sa pagbuhay liwat sa mga gadan, minilyon pa an magigin kaiba ninda, na hale kaidto sa “mga nasyon,” na mamomoot ki Jehova asin sa saiyang Aki, an agid sa Korderong Agom kan Bagong Jerusalem.—Kapahayagan 1:18.

17. Sairisay an “mga hade kan daga” na ‘magdadara kan saindang kamurawayan’ sa Bagong Jerusalem?

¹⁷ Sairisay, kun siring, an “mga hade kan daga” na ‘magdadara dian kan saindang kamurawayan’? Bako sindang an literal na mga hade kan daga bilang sarong grupo, huli ta sinda mapasiring sa kalaglagan sa pakikilaban tumang sa Kahadean nin Dios sa Armagedon. (Kapahayagan 16:14, 16; 19:17, 18) An mga hade daw na ini haralangkaw an ranggo sa mga nasyon na nagin kabtang kan dakulang kadaklan, o sinda daw binuhay liwat na mga hade na mapasakop sa Kahadean nin Dios sa bagong kinaban? (Mateo 12:42) Bako nanggad, huli ta sa kadaklan, an kamurawayan kan siring na mga hade kinabanon asin haloy nang nawara. Kun siring, an “mga hade kan daga” na nagdadara kan saindang kamurawayan sa Bagong Jerusalem segurado na an 144,000, na binakal “hale sa lambang tribo asin lenguahe asin banwaan patin nasyon” tanganing mamahala bilang mga hade kaiba kan Kordero, si Jesu-Cristo. (Kapahayagan 5:9, 10; 22:5) Dinadara ninda sa siudad an saindang kamurawayan na itinao nin Dios tanganing makadagdag sa kinang kaiyan.

18. (a) Sairisay an dai papalaogon sa Bagong Jerusalem? (b) Sairisay sana an papalaogon sa siudad?

¹⁸ Nagpapadagos si Juan: “Alagad an ano man na bakong sagrado asin an siisay man na naggigibo nin makababaldeng bagay asin nin kaputikan dai makakalaog dian sa ano man na paagi; idto sanang mga nakasurat sa rolyo nin buhay kan Kordero an makakalaog dian.” (Kapahayagan 21:27) Mayo nin siisay man na naulakitan kan sistema nin mga bagay ni Satanas na puedeng magin kabtang kan Bagong Jerusalem. Dawa ngani permanenteng nakabukas an mga tata kaiyan, mayo nin siisay man na “naggigibo nin makababaldeng bagay asin nin kaputikan” na papalaogon dian. Dai magkakaigwa nin mga apostata sa siudad na iyan ni siisay man na miembro kan Dakulang Babilonya. Asin kun an siisay man magprobar na lapastanganon an siudad paagi sa pag-impluwensia sa magigin mga miembro kaiyan na magin maraot mantang sinda yaon pa digdi sa daga, mayong mangyayari sa saindang mga paghihingoa. (Mateo 13:41-43) Solamente an “mga nakasurat sa rolyo nin buhay kan Kordero,” an 144,000, an sa katapustapusi malaog sa Bagong Jerusalem.b—Kapahayagan 13:8; Daniel 12:3.

An Salog kan Tubig nin Buhay

19. (a) Paano ilinaladawan ni Juan an Bagong Jerusalem bilang paagihan nin mga bendisyon sa katawohan? (b) Noarin mabolos an “salog kan tubig nin buhay,” asin paano niato ini naaaraman?

¹⁹ An nakakasula sa kagayonan na Bagong Jerusalem iyo an magigin paagihan kan marahayon na mga bendisyon sa katawohan digdi sa daga. Ini an sunod na naaraman ni Juan: “Asin ipinaheling nia sa sako an sarong salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero sa tahaw kan tinampo kaiyan.” (Kapahayagan 22:1, 2a) Noarin mabolos an “salog” na ini? Mantang iyan nagbobolos “hale sa trono nin Dios asin kan Kordero,” iyan mangyayari sana pagkapoon kan aldaw kan Kagurangnan kan 1914. Idto an panahon para sa pangyayari na ibinareta kan pagpatanog kan ikapitong trumpeta asin kan marahayon na paisi: “Nangyari na an kaligtasan asin an kapangyarihan patin an kahadean kan satong Dios asin an autoridad kan saiyang Cristo.” (Kapahayagan 11:15; 12:10) Durante kan panahon kan katapusan, inaagda kan espiritu asin kan nobya an mga may tamang inklinasyon na kumua kan tubig nin buhay na daing bayad. An tubig hale sa salog na ini padagos na makukua ninda sagkod sa katapusan kan sistemang ini nin mga bagay asin pagkatapos pa kaiyan, sagkod sa bagong kinaban, kun an Bagong Jerusalem ‘maghilig na hale sa langit gikan sa Dios.’—Kapahayagan 21:2.

20. Ano an nagpaparisa na may makukua nang tubig nin buhay?

²⁰ Bako ini an enot na pangyayari na iinopresir sa katawohan an tubig na nagtatao nin buhay. Kan sia yaon digdi sa daga, nagtaram si Jesus manongod sa tubig na nagtatao nin buhay na daing katapusan. (Juan 4:10-14; 7:37, 38) Dugang pa, madali nang madangog ni Juan an mamomoton na pangagda: “An espiritu asin an nobya padagos na nagsasabi: ‘Madia!’ Asin an siisay man na nagdadangog magsabi: ‘Madia!’ Asin an siisay man na napapaha dumolok; an siisay man na boot, kumua kan tubig nin buhay na daing bayad.” (Kapahayagan 22:17) An pangagdang ini ibinabalangibog na dawa ngonyan, na nagpaparisa na may makukua nang tubig nin buhay. Alagad sa bagong kinaban, an tubig na iyan mabolos bilang salog talaga hale sa trono nin Dios asin maagi sa Bagong Jerusalem.

21. Ano an irinerepresentar kan “salog kan tubig nin buhay,” asin paano kita tinatabangan kan bisyon ni Ezequiel sa salog na ini tanganing maaraman niato ini?

²¹ Ano ining “salog kan tubig nin buhay”? An literal na tubig sarong mahalagang marhay na elemento sa buhay. Kun daing pagkakan an tawo puedeng mabuhay nin nagkapirang semana, alagad kun daing tubig magagadan sia sa laog nin mga sarong semana. An tubig panlinig man asin mahalagang marhay sa salud. Sa siring, an tubig nin buhay seguradong nagrerepresentar sa sarong bagay na kaipuhan sa buhay asin salud kan katawohan. Si propeta Ezequiel tinawan man nin bisyon kaining “salog kan tubig nin buhay,” asin sa saiyang bisyon, an salog nagbobolos hale sa templo asin pasiring sa Gadan na Dagat. Dangan, milagro nin mga milagro! An daing buhay, sagom sa kemikal na dagat na iyan nagin tabang na tubig na pano nin sira! (Ezequiel 47:1-12) Iyo, binuhay giraray kan salog sa bisyon an dating gadan, na nagpapatunay na an salog kan tubig nin buhay naglaladawan sa probisyon nin Dios paagi ki Jesu-Cristo sa pagtao giraray nin sangkap na buhay nin tawo sa “gadan” na rasa nin tawo. An salog na ini “malinaw siring sa kristal,” na nagpapaheling kan kadalisayan asin kabanalan kan mga probisyon nin Dios. Bako iyan na arog kan nadigtaan nin dugo, nakakagadan na “tubig” kan Kakristianohan.—Kapahayagan 8:10, 11.

22. (a) Saen naghahale an salog, asin taano ta angay ini? (b) Ano an kalabot sa tubig nin buhay, asin ano an kaiba sa simbolikong salog na ini?

²² An salog naghahale sa “trono nin Dios asin kan Kordero.” Angay ini, mantang an basehan kan nagtatao nin buhay na mga probisyon ni Jehova iyo an atang na pantubos, asin itinao ini huli ta si Jehova “namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Kalabot man sa tubig nin buhay an Tataramon nin Dios, na inaapod na tubig sa Biblia. (Efeso 5:26) Minsan siring, an kaiba sa salog kan tubig nin buhay bako sanang an katotoohan kundi siring man an gabos pang ibang probisyon ni Jehova, na basado sa atang ni Jesus, para sa pagkalda kan makinuyog na mga tawo sa kasalan asin kagadanan asin pagtao sainda nin buhay na daing katapusan.—Juan 1:29; 1 Juan 2:1, 2.

23. (a) Taano ta angay na an salog kan tubig nin buhay nagbobolos sa tahaw kan tinampo kan Bagong Jerusalem? (b) Anong panuga nin Dios ki Abraham an maootob kun abunda nang bumolos an tubig nin buhay?

²³ Durante kan Sangribong Taon na Paghade, an mga pakinabang sa pantubos lubos na iaaplikar paagi sa pagkasaserdote ni Jesus asin kan 144,000 na katabang niang mga saserdote. Angay nanggad, kun siring, na an salog kan tubig nin buhay nagbobolos sa tahaw kan tinampo kan Bagong Jerusalem. Ini kompuesto kan espirituwal na Israel, na kaiba si Jesus minakompuesto sa tunay na banhi ni Abraham. (Galacia 3:16, 29) Kun siring, kun an tubig nin buhay bumolos na nin abunda sa tahaw kan tinampo kan simbolikong siudad, “an gabos na nasyon sa daga” magkakaigwa nin lubos na oportunidad na bendisyonan an saindang sadiri paagi sa banhi ni Abraham. An panuga ni Jehova ki Abraham lubos nang maootob.—Genesis 22:17, 18.

Mga Kahoy nin Buhay

24. Ano ngonyan an naheling ni Juan sa man-ibong-ibong na tampi kan salog kan tubig nin buhay, asin ano an ilinaladawan kaiyan?

²⁴ Sa bisyon ni Ezequiel, an salog nagin pang masulog, asin naheling kan propeta na sa man-ibong-ibong na tampi kaiyan nagtutubo an gabos na klase nin namumungang kahoy. (Ezequiel 47:12) Alagad ano an naheling ni Juan? Ini: “Asin sa tamping ini kan salog asin duman sa ibong igwa nin mga kahoy nin buhay na nagbubunga nin doseng gusi, na nagbubunga bulan-bulan. Asin an mga dahon kan mga kahoy pambolong sa mga nasyon.” (Kapahayagan 22:2b) An “mga kahoy nin buhay” na ini seguradong naglaladawan man sa kabtang kan probisyon ni Jehova sa pagtao nin daing sagkod na buhay sa makinuyog na katawohan.

25. Anong abundang probisyon an itinatao ni Jehova para sa naghihimateng mga tawo sa lakop sa globong Paraiso?

²⁵ Abaa kaabundang probisyon an itinatao ni Jehova para sa naghihimateng mga tawo! Bako sanang makakainom sinda kan nakakapapreskong tubig kundi makakaguno man sinda sa mga kahoy nin pasarusalidang klase nin nakakasustenir na bunga. Ay, kun nanigoan sana kutana an satong orihinal na mga magurang kan kaagid na “kawiliwiling” probisyon sa Paraiso sa Eden! (Genesis 2:9) Alagad ngonyan an lakop sa globong Paraiso uya na, asin nagtatao pa ngani si Jehova nin probisyon paagi sa mga dahon kan simbolikong mga kahoy na iyan para “pambolong sa mga nasyon.”c Nakakalabi sa ano pa man na medisinang ipinapabakal ngonyan, baga man hale sa masitas na pambolong o sa iba pa, an may pagtubod na katawohan dadarahon sa espirituwal asin pisikal na pagkasangkap kan nakakapaginhawang paggamit kan simbolikong mga dahon na iyan.

26. Ano an tibaad kaiba sa mga kahoy nin buhay, asin taano?

²⁶ Tibaad kaiba sa mga kahoy na iyan, na nababaribing marhay kan salog, an 144,000 na miembro kan agom kan Kordero. Mantang nasa daga pa sinda man nag-iinom sa probisyon nin Dios para sa buhay paagi ki Jesu-Cristo. Interesante nanggad, an pinaniaki nin espiritu na mga tugang na ini ni Jesus inaapod sa propesiya na “darakulang kahoy nin katanosan.” (Isaias 61:1-3; Kapahayagan 21:6) Sinda nakapamunga na nin kadakol na espirituwal na bunga sa ikakaomaw ni Jehova. (Mateo 21:43) Asin durante kan Sangribong Taon na Paghade, magkakaigwa sinda nin kabtang sa pagtabang sa mga tawo na makinabang sa nagtatao nin buhay na mga probisyon ni Jehova na magseserbing “pambolong sa mga nasyon” sa kasalan asin kagadanan.—Ikomparar an 1 Juan 1:7.

Dai Na Magkakaigwa nin Banggi

27. Ano pang dugang na mga bendisyon an sinasabi ni Juan para sa mga nagkapribilehio na lumaog sa Bagong Jerusalem, asin taano ta sinasabing “dai na magkakaigwa nin ano man na sumpa”?

²⁷ Pakalaog sa Bagong Jerusalem—daing duwa-duwa na mayo nin pribilehio na mas makangangalas pa kisa digdi! Isip-isipa na sana—an dati hamak, bakong sangkap na mga tawo masunod ki Jesus duman sa langit tanganing magin kabtang kan siring kamamuraway na areglo! (Juan 14:2) Tinatawan kita ni Juan nin ideya sa mga bendisyon na kakamtan kan mga ini, na sinasabi: “Asin dai na magkakaigwa nin ano man na sumpa. Kundi an trono nin Dios asin kan Kordero mamumugtak sa siudad, asin an saiyang mga oripon matao sa saiya nin sagradong paglilingkod; asin maheheling ninda an saiyang lalauogon, asin an saiyang ngaran mamumugtak sa saindang angog.” (Kapahayagan 22:3, 4) Kan an mga saserdoteng Israelita magin maraot, sinda isinumpa ni Jehova. (Malaquias 2:2) An daing pagtubod na “harong” kan Jerusalem ipinahayag ni Jesus na pinabayaan na. (Mateo 23:37-39) Alagad sa Bagong Jerusalem, “dai na magkakaigwa nin ano man na sumpa.” (Ikomparar an Zacarias 14:11.) An gabos na nag-eerok dian nag-agi na sa kalayo nin mga pagbalo digdi sa daga, asin huling nakadaog, sinda ‘nagsulot na nin kadaihan nin kalapaan asin nin inmortalidad.’ Sa kaso ninda, aram ni Jehova, kun paanong aram nia kaidto sa kaso ni Jesus, na nungka na sinda masuhay sa pagtubod. (1 Corinto 15:53, 57) Dugang pa, “an trono nin Dios asin kan Kordero” mamumugtak dian, kaya segurado an kamugtakan kan siudad sa bilog na panahon na daing sagkod.

28. Taano ta nakasurat sa angog kan mga miembro kan Bagong Jerusalem an ngaran nin Dios, asin anong nakakapukaw sa boot na oportunidad an nakatagama sainda?

²⁸ Kapareho mismo ni Juan, an gabos na magigin miembro kan langitnon na siudad na iyan “mga oripon” nin Dios. Bilang siring, heling na marhay an pagkasurat sa saindang angog kan ngaran nin Dios, na nagsasabing sia an Kagsadiri sa sainda. (Kapahayagan 1:1; 3:12) Ibibilang ninda na sarong pribilehiong dai masokol an halaga an pagtao saiya nin sagradong paglilingkod bilang kabtang kan Bagong Jerusalem. Kan si Jesus yaon pa digdi sa daga, sinabi nia an nakakapukaw sa boot na panugang ini sa may esperansang magin mga namamahala: “Maogma an mga dalisay an puso, huli ta maheheling ninda an Dios.” (Mateo 5:8) Abaa kamagigin maogma an mga oripon na ini na aktuwal na maheling asin sambahon nin personal si Jehova!

29. Taano ta sinasabi ni Juan manongod sa langitnon na Bagong Jerusalem na “dai na magkakaigwa nin banggi”?

²⁹ Nagpapadagos si Juan: “Siring man, dai na magkakaigwa nin banggi, asin dai na sinda magkakaipo nin liwanag nin lampara ni liwanag kan saldang, huli ta si Jehova Dios magliliwanag sa sainda.” (Kapahayagan 22:5a) An suanoy na Jerusalem, arog kan arin man na ibang siudad sa daga, nagsarig sa saldang para sa liwanag kun aldaw asin sa liwanag kan bulan saka sa artipisyal na liwanag kun banggi. Alagad sa langitnon na Bagong Jerusalem, an siring na ilaw dai na kaipuhan. An siudad papaliwanagon ni Jehova mismo. An “banggi” puede man na gamiton sa piguratibong sentido, na nanonongod sa kasakitan o sa pagbulag ki Jehova. (Miqueas 3:6; Juan 9:4; Roma 13:11, 12) Nungka na magkakaigwa kan klaseng iyan nin banggi sa mamuraway, makinang na presensia kan makakamhan sa gabos na Dios.

30. Paano tinatapos ni Juan an kahangahangang bisyon, asin ano an sinisierto sato kan Kapahayagan?

³⁰ Tinatapos ni Juan an kahangahangang bisyon na ini sa pagsabi manongod sa mga oripon na ini nin Dios: “Asin sinda mamamahala bilang mga hade sagkod pa man.” (Kapahayagan 22:5b) Totoo, sa katapusan kan sangribong taon, an mga pakinabang sa pantubos lubos nang ikinaaplikar, asin ipepresentar ni Jesus sa saiyang Ama an nagin nang sangkap na rasa nin tawo. (1 Corinto 15:25-28) Kun ano an nasa isip ni Jehova para ki Jesus asin sa 144,000 pagkatapos kaiyan, dai niato aram. Alagad sinisierto sato kan Kapahayagan na an pribilehiadong sagradong paglilingkod ninda ki Jehova magpapadagos sa bilog na panahon na daing sagkod.

An Maogmang Kulminasyon kan Kapahayagan

31. (a) Anong kulminasyon an isinesenyalar kan bisyon sa Bagong Jerusalem? (b) Ano an gigibohon kan Bagong Jerusalem para sa iba pang maimbod sa katawohan?

³¹ An pagkaotob kan bisyon na ini sa Bagong Jerusalem, an nobya kan Kordero, iyo an maogmang kulminasyon na itinotokdo kan Kapahayagan, asin angay sana iyan. An gabos na kapwa Kristiano ni Juan kan enot na siglo na enot na pinadarahan kan libro naglaom na makalaog sa siudad na iyan bilang inmortal na espiritung mga namamahala kaiba ni Jesu-Cristo. Iyan man an paglaom kan natatada sa linahidan na mga Kristiano na buhay pa digdi sa daga ngonyan. Sa siring, an Kapahayagan pasiring na sa mamuraway na kulminasyon kaiyan, kun makasaro na kan Kordero an kompleto nang nobya. Sunod, paagi sa Bagong Jerusalem, an mga pakinabang sa atang na pantubos ni Jesus iaaplikar sa katawohan, tanganing sa katapustapusi an gabos na maimbod magkaigwa nin buhay na daing katapusan. Sa paaging ini an nobya, an Bagong Jerusalem, bilang maimbod na katabangtabang kan saiyang Nobyong Hade, makikikabtang sa pag-establisar nin matanos na bagong daga sa bilog na panahon na daing sagkod—gabos para sa kamurawayan kan satong Soberanong Kagurangnan na si Jehova.—Mateo 20:28; Juan 10:10, 16; Roma 16:27.

32, 33. Ano an nanodan niato sa Kapahayagan, asin ano an maninigong magin odok sa pusong reaksion niato?

³² Kun siring, abaang kagayagayahan an namamatean niato mantang kita patapos na sa pag-estudyar sa libro nin Kapahayagan! Naheling niato na an pangultimong mga paghihingoa ni Satanas asin kan saiyang banhi biyong nasudya asin an matanos na mga paghokom ni Jehova ginibo nin lubos. An Dakulang Babilonya kaipuhan na mawara na sagkod lamang, na susundan kan gabos na iba pang elemento kan kinaban ni Satanas na dai na mababakle an karatan. Si Satanas mismo asin an saiyang mga demonyo ihuhulog sa bungaw asin sa huri lalaglagon. An Bagong Jerusalem mamamahala kaiba ni Cristo duman sa kalangitan mantang nagpapadagos an pagbuhay liwat asin an paghokom, asin an nagin nang sangkap na katawohan sa katapustapusi magkakamit nin buhay na daing katapusan sa Paraisong daga. Buhay na buhay nanggad an pagkaladawan kan Kapahayagan sa gabos na bagay na ini! Pinapakosog nanggad kaiyan an satong determinasyon na ‘ipahayag an daing katapusan na maogmang baretang ini bilang nakakaogmang notisya sa lambang nasyon asin tribo asin lenguahe patin banwaan’ sa daga ngonyan! (Kapahayagan 14:6, 7) Iinuubos daw nindo an saindong makakaya sa dakulang gibohon na ini?

³³ Mantang pano-pano nin pagpasalamat an satong puso, tawan niato nin atension an pantapos na mga tataramon kan Kapahayagan.

[Mga Nota sa Ibaba]