An Bendisyon ni Jehova sa Satong “Daga”

“an gabos mabubuhay sa aboton kan sapang masulog.”—EZEQUIEL 47:9.

1, 2. (a) Gurano kahalaga nin tubig? (b) Ano an ilinaladawan kan tubig sa salog sa bisyon ni Ezequiel?

AN TUBIG pambihirang fluido. An gabos na pisikal na buhay depende dian. Mayo ni saro sa sato na haloy na makapagdadanay na buhay kun mayo iyan. Nagdedepende man kita dian para sa paglinig, ta natutunaw saka nahuhugas nin tubig an mga ati. Kaya hinuhugasan niato dian an satong mga hawak, an satong mga gubing, pati an satong kakanon. An paggibo kaiyan puedeng magligtas kan satong buhay.

² Ginagamit kan Biblia an tubig tanganing magladawan sa espirituwal na mga probisyon ni Jehova para sa buhay. (Jeremias 2:13; Juan 4:7-15) Kaiba sa mga probisyon na ini an paglinig sa saiyang banwaan paagi sa atang na pantubos ni Cristo asin an kaaraman sa Dios na yaon sa saiyang Tataramon. (Efeso 5:25-27) Sa bisyon ni Ezequiel kan templo, an milagrosong salog na nagbobolos hale sa templo nagsisimbolisar sa mga bendisyon na iyan na nagtatao nin buhay. Alagad noarin mabolos an salog na iyan, asin ano an kahulogan kaiyan para sa sato ngonyan?

Nagbobolos an Sarong Salog sa Daga na Ibinalik sa Dati

 3. Ano an naeksperyensiahan ni Ezequiel, arog kan ibinabareta sa Ezequiel 47:2-12?

³ Bilang mga bihag sa Babilonya, an banwaan ni Ezequiel nangangaipong marhay kan mga probisyon ni Jehova. Kun siring, nakaparirigon nanggad sa boot na maheling ni Ezequiel na nagluluwas sa santuaryo an dalihig nin tubig asin nagbobolos paluwas sa templo sa bisyon! An sapa sinokol nin sarong anghel sa lagwat na 1,000 sokol sa siko. Iyan nagrararom poon sa pabukobuko sagkod sa patuhod sagkod sa pahabayan sagkod sa sapang masulog na nagkakaipong langoyon. An salog may darang buhay asin taba. (Ezequiel 47:2-11) Sinabihan si Ezequiel: “Harani sa sapang masulog matubo, sa may pangpang kaiyan sa kamping ini asin duman sa ibong, an gabos na klase nin kahoy na makakakan.” (Ezequiel 47:12a) Pag-abot kan sapang masulog sa Gadan na Dagat—katubigan na daing buhay—nagkaigwa nin buhay! Nagburunyog an sira. Uminoswag an industriya sa paninira.

4, 5. Paano an hula ni Joel mapadapit sa sarong salog kaagid kan ki Ezequiel, asin taano ta makahulogan ini?

⁴ An magayon na hulang ini tibaad nagpagirumdom sa desterradong mga Judio kan saro pang hula na isinurat nin mas naenot nin duwang siglo: “Sa harong ni Jehova may maluwas na burabod, asin dapat na patubigan kaiyan an kababan kan sapang masulog kan Mga Kahoy na Akasia.”a (Joel 3:18) An hula ni Joel, arog kan ki Ezequiel, nagsasabi bago pa na may salog na mabolos hale sa harong nin Dios, an templo, asin matao nin buhay sa marang rehion.

⁵ An The Watchtower haloy nang nagsasabi na an hula ni Joel naootob sa satong panahon.b Kun siring, segurado na iyo man an kaagid na bisyon ni Ezequiel. Sa ibinalik sa dating daga kan banwaan nin Dios ngonyan, arog kaidto sa suanoy na Israel, tunay na buminolos an mga bendisyon ni Jehova.

Makosog na Bolos nin mga Bendisyon

 6. An pagwirik nin dugo sa altar sa bisyon maninigo na nagpagirumdom nin ano sa mga Judio?

⁶ Ano an ginigikanan kan mga bendisyon sa banwaan nin Dios na ibinalik sa dati? Bueno, mangnoha na an tubig nagbobolos hale sa templo nin Dios. Siring man ngonyan, an mga bendisyon gikan ki Jehova paagi sa saiyang dakulang espirituwal na templo—an areglo para sa dalisay na pagsamba. An bisyon ni Ezequiel may idinadagdag na mahalagang detalye. Sa patyong nasa laog, an sapa nagbobolos na inaagihan an altar, sa timog sana kaiyan. (Ezequiel 47:1) An altar nasa mismong sentro kan templo sa bisyon. Si Jehova maingat iyan na ilinaladawan ki Ezequiel asin nagboboot na iyan wirikan kan dugo nin sarong atang. (Ezequiel 43:13-18, 20) An altar na iyan may dakulang kahulogan para sa gabos na Israelita. An pakipagtipan ninda ki Jehova ginibong balido kaidto pa kan wirikan ni Moises nin dugo an sarong altar sa ibaba kan Bukid nin Sinai. (Exodo 24:4-8) An pagwirik nin dugo sa altar sa bisyon maninigong nagpagirumdom sa sainda na oras na sinda makabalik sa saindang daga na ibinalik sa dati, an mga bendisyon ni Jehova mabolos sagkod na saindang inootob an saindang pakipagtipan sa saiya.—Deuteronomio 28:1-14.

 7. Ano an kahulogan para sa mga Kristiano ngonyan kan simbolikong altar?

⁷ Kaagid kaiyan, an banwaan nin Dios ngonyan binebendisyonan paagi sa sarong tipan—sarong mas marahay, an bagong tipan. (Jeremias 31:31-34) Iyan man ginibong balido kaidto pa paagi sa dugo, an ki Jesu-Cristo. (Hebreo 9:15-20) Ngonyan, baga man kita kabilang sa mga linahidan, na mga partisipante sa tipan na iyan, o kabilang sa “ibang karnero,” na mga makikinabang dian, may dakulang kahulogan para sa sato an simbolikong altar. Iyan nagsisimbolisar sa kabotan nin Dios may koneksion sa atang ni Cristo. (Juan 10:16; Hebreo 10:10) Kun paanong an simbolikong altar yaon sa mismong sentro kan espirituwal na templo, an atang na pantubos ni Cristo mahalagang marhay sa dalisay na pagsamba. Iyan an basehan kan kapatawadan kan satong mga kasalan asin huli kaini kan gabos niatong paglaom sa ngapit. (1 Juan 2:2) Sa siring nagmamaigot kita na mamuhay oyon sa ley na konektado sa bagong tipan, “an ley kan Cristo.” (Galacia 6:2) Sagkod na ginigibo niato iyan, makikinabang kita sa mga probisyon ni Jehova para sa buhay.

 8. (a) Ano an mayo sa patyong nasa laog kan templo sa bisyon? (b) Paagi sa ano malilinigan kan mga saserdote sa templo sa bisyon an saindang sadiri?

⁸ An saro sa mga pakinabang na iyan iyo an malinig na kamugtakan sa atubangan ni Jehova. Sa templo sa bisyon, an patyong nasa laog mayo nin sarong bagay na risang-risa sa patyo kan tabernakulo asin sa templo ni Salomon—sarong dakulang planggana, na sa huri inapod na dagat, na hanawan kan mga saserdote. (Exodo 30:18-21; 2 Cronica 4:2-6) Ano daw an magagamit sa paglinig kan mga saserdote sa templo sa bisyon ni Ezequiel? Tara, an milagrosong sapa na nagbobolos sa patyong nasa laog! Iyo, bebendisyonan sinda ni Jehova kan paagi na magkamit nin malinig, o banal, na kamugtakan.

 9. Paano puedeng magkaigwa nin malinig na kamugtakan ngonyan an mga kabilang sa linahidan asin an mga kabilang sa dakulang kadaklan?

⁹ Siring man ngonyan, an mga linahidan binendisyonan nin malinig na kamugtakan sa atubangan ni Jehova. Ibinibilang sinda ni Jehova na banal, na ipinahahayag sindang matanos. (Roma 5:1, 2) Paano man an “dakulang kadaklan,” na ilinadawan kan mga tribong bakong saserdote? Sinda nagsasamba sa patyong nasa luwas, asin an iyo man sanang sapa minaagi sa kabtang na iyan kan templo sa bisyon. Abaa kaangay, kun siring, na naheling ni apostol Juan an dakulang kadaklan na may sulot na malinig na mga gubing na puti mantang sinda nagsasamba sa patyo kan espirituwal na templo! (Kapahayagan 7:9-14) Ano man an pagtratar sa sainda sa ruminaot na kinaban na ini, makasisierto sinda na basta sinda nagtutubod sa atang na pantubos ni Cristo, ibinibilang sindang malinig asin dalisay ni Jehova. Paano sinda nagtutubod? Paagi sa pagsunod sa mga gira ni Jesus, na bilog an kompiansa sa atang na pantubos.—1 Pedro 2:21.

10, 11. Ano an sarong mahalagang kabtang kan simbolikong tubig, asin ano an koneksion kaini sa makangangalas na pagdakula kan salog?

¹⁰ Arog kan nasabi na, may saro pang mahalagang marhay na kabtang an simbolikong tubig na ini—an kaaraman. Sa Israel na ibinalik sa dati, binendisyonan ni Jehova an saiyang banwaan nin pagtotokdo sa Kasuratan paagi sa kabilogan na grupo nin mga saserdote. (Ezequiel 44:23) Sa kaagid na paagi, binendisyonan ni Jehova an saiyang banwaan ngonyan nin bastanteng pagtotokdo manongod sa saiyang Tataramon nin katotoohan, paagi sa “makahadeng kabilogan na grupo nin mga saserdote.” (1 Pedro 2:9) An kaaraman manongod ki Jehova Dios, manongod sa saiyang mga katuyohan para sa katawohan, asin nangorogna manongod ki Jesu-Cristo saka sa Mesiyanikong Kahadean nagbolos sa padakula nang padakula na sapang masulog durante kan huring mga aldaw na ini. Abaa karahay kan nagrararom na baha nin espirituwal na kapreskohan na inaako niato!—Daniel 12:4.

¹¹ Kun paanong an salog na sinokol kan anghel pararom nang pararom, an bolos man kan mga bendisyon na nagtatao nin buhay hale ki Jehova bigla asin risang marhay na nagdakol tangani na matawan nin lugar an pag-abot nin mga tawo sa satong maogmang espirituwal na daga. An saro pang hula sa pagbabalik sa dati nagsabi: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” (Isaias 60:22) Nagkatotoo an mga tataramon na ini—minilyon an nagdagsa tanganing umiba sa sato sa dalisay na pagsamba! Nag-andam si Jehova nin abundang “tubig” para sa gabos na madolok sa saiya. (Kapahayagan 22:17) Sinisierto nia na an saiyang daganon na organisasyon magwaras nin mga Biblia saka babasahon sa Biblia sa bilog na kinaban, sa ginatos na lenguahe. Siring man, may inareglong Kristianong mga pagtiripon saka kombension sa bilog na kinaban tangani na an gabos matawan kan garo kristal kalinaw na tubig nin katotoohan. Ano an epekto sa mga tawo kan siring na mga probisyon?

An Tubig Nagtatao nin Buhay!

12. (a) Taano an mga kahoy sa bisyon ni Ezequiel ta nakapamumunga nin arog kaiyan? (b) Ano an irinerepresentar kan mabungang mga kahoy na ini durante kan huring mga aldaw?

¹² An salog sa bisyon ni Ezequiel nagtatao nin buhay saka salud. Kan maaraman ni Ezequiel an manongod sa mga kahoy na matubo harani sa salog, sinabihan sia: “Dai maluluyos an mga dahon kan mga iyan, ni mauubos man an bunga kan mga iyan. . . . Asin an bunga kan mga iyan dapat na magin para sa pagkakan asin an mga dahon kan mga iyan para sa pagpaomay.” Taano ta namumunga sa makangangalas na paaging ini an mga kahoy na ini? “Huli ta an tubig para dian—iyan nagbobolos hale sa mismong santuaryo.” (Ezequiel 47:12b) Ining simbolikong mga kahoy nagseserbing anino kan gabos na probisyon nin Dios para sa pagbalik kan katawohan sa pagkasangkap basado sa atang na pantubos ni Jesus. Yaon digdi sa daga ngonyan na panahon, an linahidan na natatada nangengenot sa pagtao nin espirituwal na kakanon saka pagpaomay. Pagkaako kan gabos sa 144,000 kan saindang langitnon na balos, an mga pakinabang gikan sa saindang sa saserdoteng paglilingkod bilang mga namamahala kaiba ni Cristo magpapadagos sa umaaboton pa, na sa katapustapusi masagkod sa biyong pagkadaog kan Adanikong kagadanan.—Kapahayagan 5:9, 10; 21:2-4.

13. Anong pagpaomay an nagibo sa satong panahon?

¹³ An salog sa bisyon nagpasiring sa daing buhay na Gadan na Dagat asin pinaomayan an gabos na aboton kaiyan. An dagat na ini naglaladawan sa mga kamugtakan na gadan sa espirituwal. Alagad nagburunyog an buhay “sa lambang lugar na aboton kan nadoble na sapang masulog.” (Ezequiel 47:9) Kaagid kaiyan, sa huring mga aldaw, nabubuhay an mga tawo sa espirituwal na paagi saen man makaabot an tubig nin buhay. An mga naenot na nabuhay giraray sa siring na paagi iyo an linahidan na natatada kan 1919. Sinda nabuhay giraray sa espirituwal na paagi hale sa garo gadan, daing gibong kamugtakan. (Ezequiel 37:1-14; Kapahayagan 11:3, 7-12) Poon kaidto an mahalagang marhay na tubig na iyan nakaabot na sa ibang gadan sa espirituwal, asin an mga ini nabuhay saka nagin padakol nang padakol na dakulang kadaklan nin ibang karnero, na namomoot saka naglilingkod ki Jehova. Dai na mahahaloy, an probisyon na ini ipaaabot man sa kaburunyogan nin mga binuhay liwat.

14. An pag-oswag kan industriya nin paninira sa sarong kalabaan kan baybayon kan Gadan na Dagat nag-iilustrar na marhay kan ano ngonyan?

¹⁴ An espirituwal na bagsik nagbubunga nin pagigin maprodukto. Ini iiniilustrar kan industriya nin paninira na nag-ooswag sa mga baybayon kan dagat na dati gadan. Sinabihan ni Jesus an saiyang mga parasunod: “Gigibohon ko kamong mga parasira nin mga tawo.” (Mateo 4:19) Sa huring mga aldaw, an paninira nagpoon sa pagtipon kan mga nawawalat pa sa linahidan, alagad iyan dai nagpondo dian. An nagtatao nin buhay na tubig hale sa espirituwal na templo ni Jehova, pati an bendisyon na tamang kaaraman, nakaaapektar sa mga tawo sa gabos na nasyon. Saen man makaabot an sapang masulog, espirituwal na buhay an ibinunga.

15. Ano an nagpapaheling na bakong gabos maako kan mga probisyon nin Dios para sa buhay, asin ano an magigin kasagkodan kan mga siring?

¹⁵ Siempre, bakong gabos paborable an reaksion ngonyan sa mensahe nin buhay; ni gigibohon man iyan kan gabos na bubuhayon liwat durante kan Milenyal na Paghade ni Cristo. (Isaias 65:20; Kapahayagan 21:8) Sinasabi kan anghel na may mga parte kan dagat na dai maoomayan. An malapok, daing buhay na mga lugar na ini ‘itatao sa asin.’ (Ezequiel 47:11) Kun dapit sa mga tawo sa satong kaaldawan, bakong gabos na inoopresiran kan nagtatao nin buhay na tubig ni Jehova nag-aako kaiyan. (Isaias 6:10) Sa Armagedon, an gabos na ginustong magdanay sa daing buhay saka may helang sa espirituwal na kamugtakan itatao sa asin, an boot sabihon, lalaglagon sagkod lamang. (Kapahayagan 19:11-21) Minsan siring, an mga fiel na nag-iinom kan tubig na ini makalalaom na maligtas asin maheling an pangultimong kaotoban kan hulang ini.

An Salog Nagbobolos sa Paraiso

16. Noarin asin paano magkakaigwa kan pangultimong kaotoban kaiyan an bisyon ni Ezequiel kan templo?

¹⁶ Arog kan iba pang hula sa pagbabalik sa dati, an bisyon ni Ezequiel kan templo magkakaigwa kan pangultimong kaotoban kaiyan durante kan Milenyo. Sa panahon na iyan an grupo nin mga saserdote mayo na digdi sa daga. “Sinda magigin mga saserdote nin Dios asin kan Cristo, patin mamamahala bilang mga hade sa kaibanan nia [sa langit] sa laog kan sangribong taon.” (Kapahayagan 20:6) An langitnon na mga saserdoteng ini magigin kaibaiba ni Cristo sa pagtao kan lubos na mga pakinabang sa atang na pantubos ni Cristo. Sa siring na paagi an matanos na katawohan maliligtas, ibabalik sa pagkasangkap!—Juan 3:17.

17, 18. (a) Paano ilinaladawan sa Kapahayagan 22:1, 2 an salog na nagtatao nin buhay, asin noarin an pangenot na panahon nin aplikasyon kan bisyon na iyan? (b) Sa Paraiso, taano an salog kan tubig nin buhay ta magkakaigwa nin panahon nin pagdakulang marhay?

¹⁷ Sa panahon na iyan an salog na naheling ni Ezequiel garo man sana magbobolos dara an pinakaepektibong tubig nin buhay. Ini an pangenot na panahon nin aplikasyon kan hula na nasusurat sa Kapahayagan 22:1, 2: “Ipinaheling nia sa sako an salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero pasiring sa tahaw kan tinampo kaiyan. Asin sa kamping ini kan salog asin duman sa ibong igwa nin mga kahoy nin buhay na nagbubunga nin kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.”

¹⁸ Durante kan Milenyo, an gabos na helang—pisikal, mental, asin emosyonal—paoomayan. Ini ilinaladawan na marhay kan “pagpaomay sa mga nasyon” paagi sa simbolikong mga kahoy. Sa tabang kan mga probisyon na itinatao ni Cristo asin kan 144,000, “mayo nin nag-eerok na masabi: ‘Naghehelang ako.’” (Isaias 33:24) Asin an salog mapapasa panahon kan nakalalabi sa gabos na pagdakula kaiyan. Iyan kaipuhan na humiwas saka rumarom tangani na ikatao an kaipuhan kan minilyon, tibaad binilyon, na binuhay liwat na mainom sa dalisay na tubig na ini nin buhay. An salog sa bisyon pinaomayan an Gadan na Dagat, na may darang buhay saen man bumolos an tubig kaiyan. Sa Paraiso, an mga lalaki saka babae mabubuhay sa pinakalubos na sentido, na naoomayan sa minanang Adanikong kagadanan kun sinda tumubod sa mga pakinabang sa pantubos na itinatao sa sainda. Ihinuhula kan Kapahayagan 20:12 na may “mga balumbon” na bibikladon sa mga aldaw na iyan, na nagtatao nin dugang pang liwanag nin pakasabot na pakikinabangan kan mga binuhay liwat. Makamomondo, an nagkapira masayumang paomayan, dawa sa Paraiso. An mga rebeldeng ini an ‘itatao sa asin’ nin kalaglagan na daing katapusan.—Kapahayagan 20:15.

19. (a) Paano maootob sa Paraiso an pagdistribwir kan daga? (b) Anong kabtang kan Paraiso an ilinaladawan kan siudad? (c) Ano an kahulogan kan namumugtakan kan siudad na haroharayo sa templo?

¹⁹ Sa panahon man na iyan, an paghiras kan daga sa bisyon ni Ezequiel magkakaigwa kan pangultimong kaotoban kaiyan. Naheling ni Ezequiel na an daga idinistribwir nin tama; kaagid kaiyan, an lambang fiel na Kristiano makasisierto na sia magkakaigwa nin lugar, mana, sa Paraiso. Posibleng marhay, an kamawotan na magkaigwa nin sadiring harong na iistaran saka aasikasohon maootob sa aregladong paagi. (Isaias 65:21; 1 Corinto 14:33) An siudad na naheling ni Ezequiel angay na naglaladawan sa areglo sa pag-administrar na katuyohan ni Jehova para sa bagong daga. An linahidan na grupo nin mga saserdote dai na magigin presente sa pisikal sa tahaw nin katawohan. Iyan an isinusuherir kan bisyon sa pagladawan kan siudad na yaon sa “sekular” na daga na haroharayo sa templo. (Ezequiel 48:15) Mantang an 144,000 namamahala kaiba ni Cristo sa langit, an Hade dai mawawaran nin mga representante digdi sa daga. An mga sakop niang tawo makikinabang na marhay sa mamomoton na paggiya saka pagdirehir kan grupong namamayo. Minsan siring, an tunay na kabisera kan gobyerno, bakong digdi sa daga, kundi sa langit. An gabos digdi sa daga, pati an grupong namamayo, magpapasakop sa Mesiyanikong Kahadean.—Daniel 2:44; 7:14, 18, 22.

20, 21. (a) Taano ta angay an ngaran kan siudad? (b) Ano an mga ihahapot niato sa satong sadiri huli sa pakasabot niato sa bisyon ni Ezequiel?

²⁰ Mangnoha an pangultimong mga tataramon kan hula ni Ezequiel: “Poon sa aldaw na iyan an ngaran kan siudad magigin Si Jehova Mismo Yaon Dian.” (Ezequiel 48:35) An siudad na ini dai maeksister sa pagtao nin kapangyarihan o impluwensia sa mga tawo; ni magigin iyan yaon tanganing ipaotob an kabotan nin siisay man na tawo. Iyan siudad ni Jehova, na pirmeng nagpapabanaag kan saiyang isip asin kan saiyang mamomoton, rasonableng mga dalan. (Santiago 3:17) Ini nagtatao sa sato nin nakaoogmang garantiya na padagos na bebendisyonan ni Jehova an saiyang aregladong “bagong daga” na sosyedad nin mga tawo sagkod sa ngapit na magdadanay nin daing talaan na panahon.—2 Pedro 3:13.

²¹ Dai daw napapalukso an satong puso huli sa tinatanaw niato sa umaaboton? Angay sana, kun siring, marahay na ihapot kan lambang saro sa sato: ‘Ano an reaksion ko sa makangangalas na mga bendisyon na ihinayag sa bisyon ni Ezequiel? Ako daw fiel na nagsusuportar sa ginigibo nin mamomoton na mga paraataman, kaiba an mga kabilang sa linahidan na natatada asin an may esperansang magin mga miembro kan grupong namamayo? Ginibo ko daw na pinakasentro kan sakong buhay an dalisay na pagsamba? Lubos ko daw na inaaprobetsaran an tubig nin buhay na nagbobolos nin abundang marhay ngonyan?’ An lambang saro logod sa sato padagos na gibohon iyan asin magkaigwa nin dakulang kaogmahan sa mga probisyon ni Jehova sa bilog na panahon na daing sagkod!

[Mga Nota sa Ibaba]

Ano an Isisimbag Nindo?

◻ Ano an ilinaladawan kan tubig na nagbobolos hale sa templo?

◻ Anong pagpaomay an nagibo ni Jehova paagi sa simbolikong salog, asin taano ta ruminarom an salog?

◻ Ano an ilinaladawan kan mga kahoy sa may mga pangpang kan salog?

◻ Ano an ilaladawan kan siudad durante kan Milenyal na Paghade, asin taano ta angay an ngaran kan siudad?

[Mga retrato sa pahina 23]

An salog nin buhay nagrerepresentar kan probisyon nin Dios para sa kaligtasan