Kapitulo 10

Makuring Pagkasurang sa “Harararom na Bagay ni Satanas”

TIATIRA

 1. Saen namumugtak an Tiatira may koneksion sa ibang kongregasyon, asin ano an relihiosong kamugtakan kaiyan?

MGA 65 kilometros sa timog-sirangan nin Bergama (Pergamo) yaon an asensadong banwaan nin Akhisar sa Turkiya. Kaidtong mga 1,900 na taon na an nakaagi, an banwaan na ini iyo an lugar nin Tiatira. An Tiatira pasil sanang maabot nin sarong nagbibiaheng paraataman paagi sa tinampong palaog hale sa Pergamo dangan malilibot nia an tolo pang kongregasyon sa Kapahayagan kapitulo 3—Sardis, Filadelfia, asin Laodicea. Bakong arog kan Pergamo, an Tiatira garo baga dai nagin prominenteng sentro nin pagsamba sa emperador, alagad iyan nagkaigwa nin mga altar asin templo na dusay sa paganong mga dios. An Tiatira nabantog bilang sentro nin komersio.

2, 3. (a) Ano an mas enot na rekord manongod sa sarong taga Tiatira na nagin Kristiano? (b) Ano an kahulogan para sa mga Kristiano sa Tiatira kan bagay na si Jesus iyo an “Aki nin Dios” asin na sia may “mga mata siring sa laad nin kalayo”?

² Kan si Pablo naghuhulit sa Macedonia, nanompongan nia an sarong babaeng taga Tiatira na an ngaran Lidia, sarong paratinda nin purpura. Si Lidia asin an bilog niang pamilya maogmang nag-ako kan mensaheng ihinuhulit ni Pablo asin nagpaheling nin pambihirang pagkamapag-istimar. (Gibo 16:14, 15) Sia nagin an enot na taga Tiatira na nakarekord na nag-ako nin Kristianismo. Pag-abot nin panahon, an mismong siudad nagkaigwa nin sarong kongregasyon nin mga Kristiano. Duman ipinadara ni Jesus an pinakahalawig niang mensahe: “Asin sa anghel kan kongregasyon sa Tiatira sumurat ka: Iyo ini an mga bagay na sinasabi kan Aki nin Dios, sia na an mga mata siring sa laad nin kalayo, asin an saiyang mga bitis siring sa pinakintab na tanso.”—Kapahayagan 2:18.

³ Iyo sana ini an panahon na an fraseng “Aki nin Dios” naglataw sa Kapahayagan, minsan ngani sa ibang lugar si Jehova talagang inaapod ni Jesus na “sakong Ama.” (Kapahayagan 2:27; 3:5, 21) An paggamit digdi kan titulong ini posibleng nagpagirumdom sa mga Kristianong taga Tiatira kan pagigin dayupot ni Jesus ki Jehova. An Aking ini may “mga mata [na] siring sa laad nin kalayo”—sarong patanid sa mga Kristiano sa Tiatira na malaad an saiyang paghokom tumang sa ano man na naheheling niang nakakaramog sa kongregasyon. Paagi sa ikaduwang pagsambit sa saiyang makintab, garo tansong mga bitis, idinodoon nia an saiya mismong kahangahangang halimbawa nin kaimbodan mantang naglalakaw sa dagang ini. Daing duda na hinimate kan mga Kristiano sa Tiatira an saiyang hatol, asin dapat na iyan man an gibohon niato ngonyan!—1 Pedro 2:21.

4, 5. (a) Taano ta maoomaw ni Jesus an mga Kristiano sa Tiatira? (b) Paano an kongregasyon sa Tiatira kapareho kan mga kongregasyon nin mga Saksi ni Jehova ngonyan?

⁴ Nakakaogma, maoomaw ni Jesus an mga yaon sa Tiatira. Sia nagsasabi: “Aram ko an saimong mga gibo, asin an saimong pagkamoot asin pagtubod asin ministeryo patin pakatagal, asin na an mga gibo mo kaining huri orog kisa mga naenot.” (Kapahayagan 2:19) Bakong arog kan mga taga Efeso, an linahidan na mga Kristiano duman dai nawaran kan enot nindang pagkamoot ki Jehova. Marigon an saindang pagtubod. Apuera kaini, an saindang mga gibo orog kisa dati, asin kapareho kan tolong naenot na kongregasyon, an mga Kristiano sa Tiatira nagtatagal. Ini kaparehong-kapareho kan haros 100,000 na kongregasyon nin mga Saksi ni Jehova sa bilog na daga ngonyan! Risang marhay an pagkamoot ki Jehova, mantang an espiritu nin kaigotan sa ministeryo lakop sa organisasyon, na nakakaanimar sa hoben asin gurang. Padakol nang padakol an mga iinuubos an saindang makakaya bilang payunir, sa siring madonong na ginagamit an natatada pang panahon sa pagbalangibog kan mamuraway na paglaom sa nagdadangadang na Kahadean nin Dios!—Mateo 24:14; Marcos 13:10.

⁵ Sa laog nin dakol na dekada, an dakol na maimbod, na kabilang sa linahidan na natatada sagkod sa dakulang kadaklan, nagpapaheling nin arogan na pakatagal sa paglilingkod sa Dios, mantang an kinaban sa palibot ninda pairarom nin pairarom sa kadikloman na daing paglaom. Alagad ta kosogan niato an satong boot! Kinokompirmar kan Kapahayagan an patotoo nin naenot na mga propeta nin Dios. “An dakulang aldaw ni Jehova harani na. Iyan harani na, asin iyan naghihidaling marhay.”—Sofonias 1:14; Joel 2:1; Habacuc 2:3; Kapahayagan 7:9; 22:12, 13.

“An Babaeng Iyan na si Jezabel”

 6. (a) Sa ibong nin kaomaw-omaw na mga bagay, anong problema an narisa ni Jesus sa kongregasyon sa Tiatira na nagkakaipo tolos nin atension? (b) Siisay si Jezabel, asin igwa daw sia nin balidong deretso na magin propetisa?

⁶ Bako sana iyan an naheling kan nagkakalayong mga mata ni Jesus. May narisa siang nagkakaipo tolos nin atension. “Minsan siring,” sabi nia sa mga Kristiano sa Tiatira, “igwa ako nin laban saimo, na pinapabayaan mo an babaeng iyan na si Jezabel, na an apod sa saiyang sadiri propetisa, asin saiyang tinotokdoan saka ilinalagalag an sakong mga oripon tanganing makisaro asin kumakan nin mga iinatang sa mga idolo.” (Kapahayagan 2:20) Kan ikasampulong siglo B.C.E., nabantog si Reyna Jezabel, an parasamba ki Baal na agom ni Hadeng Acab kan Israel, huli sa saiyang pagigin paragadan, parapakisambay, asin dominante. Ipinagadan sia ni Jehu, bilang linahidan ni Jehova. (1 Hade 16:31; 18:4; 21:1-16; 2 Hade 9:1-7, 22, 30, 33) An idolatrosong si Jezabel mayo nin deretsong magin propetisa. Bako siang arog ni Miriam asin Debora, na naglingkod bilang maimbod na mga propetisa sa Israel. (Exodo 15:20, 21; Hokom 4:4; 5:1-31) Asin dai sia pinahiro kan espiritu ni Jehova na magpropesiya siring kan pagpahiro kaiyan sa gurang nang si Ana asin sa apat na aking daraga kan ebanghelisador na si Felipe.—Lucas 2:36-38; Gibo 21:9.

 7. (a) Sa pagsambit sa “babaeng iyan na si Jezabel,” manongod sa anong impluwensia na si Jesus malinaw na nagtataram? (b) Paano tibaad ipinapangatanosan nin nagkapirang asosyadong babae an saindang iginagaweng may katagasan nin payo?

⁷ Kun siring, maliwanag na palsipikado “an babaeng iyan na si Jezabel” na naghihingakong sarong propetisa sa Tiatira. Mayo sia kan pagsuportar kan espiritu nin Dios. Siisay sia? Posible na sia sarong babae o grupo nin mga babae na minagawe bilang daing supog, nakakaraot na impluwensia sa kongregasyon. Tibaad nadadara nin nagkapirang asosyadong babae an mga miembro kan kongregasyon na gumibo nin inmoralidad, mantang pangahas asin daing pangunlabot na ipinapangatanosan an saindang iginagaweng may katagasan nin payo paagi sa salang pag-aplikar nin mga kasuratan. Ini falsong pagpropesiya nanggad! Boot nindang impluwensiahan an iba na mahulog sa saindang mga dalan nin “pakikisaro, pagkamaati, seksuwal na horot, nakakadanyar na mawot, asin kaaraan, na idolatriya.” (Colosas 3:5) Boot ninda na an mga miembro kan kongregasyon padara sa inmoral, makisadiring pamumuhay na arog kan tinotogotan, o kinokonsinte, ngonyan sa kadaklan na relihion nin Kakristianohan.

 8. (a) Ano an sinabi ni Jesus manongod sa “Jezabel” na yaon sa Tiatira? (b) Paano namatean an salang impluwensia nin babae sa presenteng mga panahon?

⁸ Nagpadagos si Jesus sa pagsabi sa kamagurangan sa Tiatira: “Asin tinawan ko sia nin panahon na magsolsol, alagad ta habo niang pagsolsolan an saiyang pakikisaro. Uya! Madali ko na siang itapok sa higdaan sa paghelang, asin an mga nakikisambay sa saiya sa dakulang kahorasaan, apuera sana kun pagsolsolan ninda an saiyang mga gibo.” (Kapahayagan 2:21, 22) Kun paanong minalataw na si Acab dinominar kan orihinal na Jezabel dangan linabanan kaini an parakastigo nin Dios, si Jehu, tibaad hinihingoa man kan impluwensiang ini nin babae na kontrolon an mga agom na lalaki asin kamagurangan. Minalataw na pinapabayaan kan kamagurangan sa Tiatira an halangkaw an boot na impluwensiang ini ni Jezabel. Digdi nagtatao si Jesus nin mapuersang patanid sa sainda, saka sa lakop sa globong kongregasyon kan banwaan ni Jehova ngonyan. Sa presenteng mga panahon, may siring na mga babaeng ipinipirit an gusto na sinutsutan an saindang agom na magin mga apostata asin iyo pa nganing promotor nin pag-akusar sa husgado kan maimbod na mga lingkod ni Jehova.—Ikomparar an Judas 5-8.

 9. (a) Taano an mga tataramon ni Jesus manongod ki Jezabel ta dai nagtatao nin maraot na impresyon sa gabos na babae sa kongregasyon? (b) Noarin sana minalataw an impluwensia ni Jezabel?

⁹ Ini dai nanggad nagtatao nin maraot na impresyon sa maimbod na mga babae sa Kristianong kongregasyon. Ngonyan na mga aldaw, an dakulang kabtang kan paghuhulit ginigibo nin maimbod na mga tugang na babae; paagi sa ginigibo nindang mga pag-adal sa Biblia, kadakol na bagohan an natatabangan nindang makalaog sa kongregasyon. Binebendisyonan mismo nin Dios an areglong ini, arog kan ipinapaheling kan Salmo 68:11: “Si Jehova mismo an nagtataram; an mga babaeng nagsasabi kan maogmang bareta sarong dakulang hukbo.” An mga agom na lalaki puedeng matawan nin marahay na impluwensia kan mahoyo, magalang na gawe-gawe kan saindang agom, na “may dakulang halaga sa mga mata nin Dios.” (1 Pedro 3:1-4) An may kakayahan, mahigos na agom na babae inoomaw ni Hadeng Lemuel. (Talinhaga 31:10-31) Minalataw sana an impluwensia ni Jezabel kun an mga babae sala na an ginigibo paagi sa pagtentar sa mga lalaki o sa pag-angat o pag-ignoro sa pagkapayo.—Efeso 5:22, 23; 1 Corinto 11:3.

10. (a) Taano ta hohokoman si Jezabel asin an saiyang mga aki? (b) Nasa anong peligrosong kamugtakan an mga nagigin aki ni Jezabel, asin ano an maninigo nindang gibohon?

¹⁰ Sa pagtaram manongod sa “babaeng iyan na si Jezabel,” si Jesus nagpapadagos: “Asin an saiyang mga aki gagadanon ko paagi sa nakakagadan na damat, kaya maaaraman kan gabos na kongregasyon na ako iyo an nagsisiyasat kan mga bato asin puso, asin itatao ko sa lambang saro sa saindo an segun sa saindong mga gibo.” (Kapahayagan 2:23) Si Jezabel asin an saiyang mga aki tinawan ni Jesus nin panahon na magsolsol, alagad ta sinda nagpoprosegir sa saindang inmoral na mga gibo asin huli kaini dapat sindang hokoman. Igwa nin mapuersang mensahe digdi para sa mga Kristiano ngonyan. Peligrosong marhay an helang sa espirituwal kan mga nag-aarog ki Jezabel, baga man lalaki o babae, asin sa siring nagigin mga aki nia paagi sa paglapas sa mga prinsipyo sa Biblia manongod sa pagkapayo asin moralidad o paagi sa pagigin matagas an payo kaya pinapalimanlimanan ninda an teokratikong areglo. Totoo, kun an siring makiolay sa kamagurangan sa kongregasyon na ipamibi sia, “an pamibi nin pagtubod magpapaomay sa may kamatean, asin babangonon sia ni Jehova”—basta sia mapakumbabang gumawe kaoyon kan mga pamibing iyan. Alagad dai isipon nin siisay man na madadaya nia an Dios o si Cristo paagi sa pagprobar na itago an inmoral na mga gibo o sa pagsaginsagin na maigot sa paglilingkod.—Santiago 5:14, 15.

11. Paano tinatabangan an mga kongregasyon ngonyan na magin puka sa pakalaog nin bakong tamang impluwensia nin babae?

¹¹ Marahay sana ta an kadaklan na kongregasyon nin mga Saksi ni Jehova ngonyan puka sa peligrong ini. Mapagbantay an kamagurangan sa mga tendensia pasiring sa bakong teokratikong mga aktitud asin sa paggibo nin maraot. Pinagmamaigotan nindang tabangan an mga lalaki sagkod babae na nasa peligro tangani na mapakosog kan mga ini an saindang espirituwalidad asin mapakarhay giraray sinda bago magin huri an gabos. (Galacia 5:16; 6:1) Sa mamomoton asin marigon na paagi, pinupugolan kan Kristianong mga paraataman na ini an ano man na paghihingoa nin mga babae na bumilog nin mga grupo para sa pagpalakop nin mga mobimiento na nakakaagid sa liberasyon para sa mga babae. Dugang pa, sa panapanahon may itinataong napapanahon na hatol sa mga publikasyon kan Mga Saksi ni Jehova.a

12. Sa anong paagi na an grupong Juan ngonyan nagpapaheling nin kaigotan na kapareho kan ki Jehu?

¹² Minsan siring, kun may grabeng inmoralidad, asin nangorogna kun ini nagigin ugale, dapat na itiwalag an mga parakasalang habong magsolsol. Magigirumdoman niato an kaigotan ni Jehu sa paghale kan gabos na gira kan impluwensia ni Jezabel sa Israel. Siring man, an grupong Juan ngonyan naggigibo nin marigon na aksion, na nagtatao nin halimbawa sa saindang kairibang “Jonadab” asin pinapatunayan na sinda laen na marhay sa konsintidor na mga ministro nin Kakristianohan.—2 Hade 9:22, 30-37; 10:12-17.

13. Ano an mangyayari sa mga nagpapadara sa salang impluwensia nin babae?

¹³ Bilang Mensahero asin Hokom ni Jehova, tama an ginigibo kan Aki nin Dios sa pagpamidbid ki Jezabel sa presenteng panahon asin sa pagtapok sa saiya sa higdaan sa paghelang, ta an saiyang espirituwal na helang talagang dai nararahayan. (Malaquias 3:1, 5) An mga napadara sa salang impluwensiang ini nin babae magtitios man nin dakulang kahorasaan—an kamondoan na matiwalag, haleon sa Kristianong kongregasyon na garo gadan. Kun an mga ini dai magsolsol, magbakle, asin makabalik sa kongregasyon, sinda napapaatubang man sa pisikal na kagadanan paagi sa “nakakagadan na damat”—sa pinakahuri, sa dakulang kahorasaan. Mientras tanto, posible an pakabalik kun biyo nindang pagsosolsolan an sala nindang mga gibo.—Mateo 24:21, 22; 2 Corinto 7:10.

14. (a) Paano ginagamit ni Jesus an kamagurangan sa pag-asikaso sa nagkapirang problema, arog baga kan ano man na impluwensia ni Jezabel? (b) Paano maninigong suportaran kan kongregasyon an kamagurangan na nag-aasikaso sa siring na mga problema?

¹⁴ Dapat na maaraman “kan gabos na kongregasyon” na si Jesus nagsisiyasat sa “mga bato,” an pinakakairairaroming emosyon, asin sa “puso,” an kalaoglaoging persona, pati an mga motibong nasa irarom. Sa katuyohan na ini, ginagamit nia an pinagtitiwalaan na mga bitoon, o kamagurangan, sa pag-asikaso sa nagkapirang problema, arog baga kan ano man na minalataw na impluwensia ni Jezabel. (Kapahayagan 1:20) Pakatapos na lubos nang nasiyasat kan kamagurangan an arog kaining bagay asin itinao na an paghusgar, mayo nin deretso an mga indibiduwal na siyasaton an mga dahelan asin rason kan ginibong aksion. Maninigo na mapakumbabang akoon kan gabos an ginibo kan kamagurangan asin padagos na suportaran an mga bitoon na ini kan kongregasyon. An kaimbodan ki Jehova asin sa saiyang organisasyonal na mga areglo babalosan. (Salmo 37:27-29; Hebreo 13:7, 17) Para sa saindo, logod na bendisyon an magin kabtang nindo kun itao na ni Jesus sa lambang saro an segun sa saiyang mga gibo.—Galacia 5:19-24; 6:7-9.

“Pangaptan Nindo nin Higot an Yaon Saindo”

15. (a) Ano an sinabi ni Jesus sa mga dai naraot ni Jezabel? (b) Ano an nagpapaheling na bakong gabos na naghingakong Kristiano kan 1918 naraot kan apostatang Kakristianohan?

¹⁵ An sunod na mga tataramon ni Jesus nakakaranga: “Minsan siring, sinasabi ko sa iba pa sa saindo na yaon sa Tiatira, sa gabos na mayo kan katokdoan na ini, sa mga dai nakaaram kan sinasabi nindang ‘harararom na bagay ni Satanas’: Dai ko na kamo tatawan nin iba pang pagabat. Minsan siring, pangaptan nindo nin higot an yaon saindo sagkod na ako dumatong.” (Kapahayagan 2:24, 25) May maimbod na mga kalag sa Tiatira na dai naimpluwensiahan ni Jezabel. Kaagid kaiyan, sa laog nin 40 taon bago kan 1918 asin poon kaidto, bakong gabos na naghihingakong Kristiano nagtogot sa inmoral, maraot na mga gibo na lakop na marhay sa Kakristianohan. An sadit na grupo nin Mga Estudyante sa Biblia, na ngonyan midbid na Mga Saksi ni Jehova, na naghingoa na tabangan an mga miembro nin iglesia na makasabot na an dakol na doktrina nin Kakristianohan bakong Kristiano an ginikanan, naghiro na haleon sa sadiri ninda an gabos na Babilonikong paniniwala asin kaugalean na inako paagi sa apostatang Kakristianohan. Kaiba digdi an nangongonsinteng katokdoan kan “babaeng iyan na si Jezabel.”

16. Minsan ngani si Jesus asin an Kristianong namamahalang grupo kan enot na siglo dai nagtao nin dagdag na pagabat, anong mga bagay an dapat na likayan?

¹⁶ Inenkaminar man kan grupong Juan ngonyan an saindang kairiba, an dakulang kadaklan, na mag-ingat sa inmoral na mga impluwensia, arog kan yaon sa marigsok na langtad nin pag-aling-aling. Dai kaipuhan na magdalan o makaeksperyensia nin karatan huli sa pag-usyoso o tanganing maaraman kun ano an dapat na likayan. Sarong kadonongan na magdanay na harayo nanggad sa “harararom na bagay ni Satanas.” Arog kan sabi ni Jesus: “Dai ko na kamo tatawan nin iba pang pagabat.” Ipinapagirumdom kaini sa sato an dekreto kan Kristianong namamahalang grupo kan enot na siglo: “Pinagmarahay kan banal na espiritu asin niamo mismo na dai na kamo dagdagan nin pagabat, puera sana sa kinakaipuhan na mga bagay na ini, na padagos na lumikay sa mga bagay na iinatang sa mga idolo asin sa dugo asin sa mga bagay na tinook patin sa pakikisaro. Kun maingat kamong maglilikay sa mga bagay na ini, mapaparahay kamo.” (Gibo 15:28, 29) Tanganing maparahay sa espirituwal, likayan an falsong relihion, salang paggamit nin dugo (arog baga kan pag-ineksion nin dugo), asin inmoralidad! Asin posibleng mapoprotehiran man an saindong pisikal na salud.

17. (a) Paano sinugotan ni Satanas an mga tawo ngonyan paagi sa “harararom na bagay”? (b) Ano an maninigong magin aktitud niato manongod sa “harararom na bagay” kan nakakaakit sa intelektuwal na kinaban ni Satanas?

¹⁷ May iba pang “harararom na bagay” si Satanas ngonyan, arog baga kan komplikadong mga pagbanabana asin mga pilosopiya na nakakaaling sa isip. Apuera sa nangongonsinte, inmoral na mga pangangatanosan, kabale man digdi an espiritismo asin teoriya nin ebolusyon. Ano an pagmansay kan madonong sa gabos na Kaglalang sa “harararom na bagay” na ini? Kinotar sia ni apostol Pablo na nagsasabi: “Lalaglagon ko an kadonongan kan mga madonong.” Kabaliktaran kaiyan, an “harararom na bagay nin Dios” simple, malinaw, asin nakakaogma. Isinisikwal nin madonong na mga Kristiano an “harararom na bagay” kan nakakaakit sa intelektuwal na kinaban ni Satanas. Girumdoma, “an kinaban malihis sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.”—1 Corinto 1:19, Kingdom Interlinear; 2:10; 1 Juan 2:17.

18. Anong mga bendisyon an ipinanuga ni Jesus sa linahidan na mga Kristiano na magmamaimbod sagkod sa katapusan, asin ano an magigin pribilehio kan mga binuhay liwat na ini sa Armagedon?

¹⁸ Sa mga Kristianong idto sa Tiatira, nakakaogmang mga tataramon an sinasabi ngonyan ni Jesus. Iyan man nakakaparigon sa boot kan linahidan na mga Kristiano ngonyan: “Asin sa saiya na makadaog asin nag-ootob kan sakong mga gibo sagkod sa katapusan itatao ko an autoridad sa mga nasyon, asin magpapastor sia sa mga tawo paagi sa sogkod na batbat kaya magkakaparasa sinda siring sa mga lalagan na dalipay, siring kan inako ko sa sakong Ama.” (Kapahayagan 2:26, 27) Makangangalas nanggad ining pribilehio! An autoridad na ini na inaako kan linahidan na mga nakadaog pagkabuhay ninda liwat iyo an pakikiiba ki Jesus sa paggamit kan “sogkod na batbat” na panlaglag tumang sa rebeldeng mga nasyon sa Armagedon. An mga bomba nuklear kan mga nasyon maburobuso sana na garo basang kuwitis kun parasaon na ni Cristo an saiyang mga kaiwal na siring sa mga lalagan na dalipay.—Salmo 2:8, 9; Kapahayagan 16:14, 16; 19:11-13, 15.

19. (a) Siisay an “bitoon sa makaaga,” asin paano sia itatao sa mga makakadaog? (b) Anong pagparigon sa boot an itinatao sa dakulang kadaklan?

¹⁹ Idinugang pa ni Jesus: “Asin itatao ko sa saiya an bitoon sa makaaga.” (Kapahayagan 2:28) Ipinaliwanag mismo ni Jesus sa huri kun ano an “bitoon” na ini, na an sabi: “Ako iyo an gamot asin an gikan ni David, asin an maliwanag na bitoon sa makaaga.” (Kapahayagan 22:16) Iyo, si Jesus an nakakaotob sa propesiya na pinirit ni Jehova na paluwason sa nagsasayumang mga ngabil ni Balaam: “Sarong bitoon an seguradong maluwas sa Jacob, asin sarong setro an tunay nanggad na matindog hale sa Israel.” (Bilang 24:17) Paano itatao ni Jesus sa mga makakadaog an “bitoon sa makaaga”? Malinaw na paagi sa pagtao kan saiyang sadiri sa sainda, paagi sa pagdara sa sainda sa pinakaharani, pinakadayupot na relasyon sa saiya. (Juan 14:2, 3) Ini tunay nanggad na makosogon na pan-agyat na magtagal! Nakakapahiro man para sa dakulang kadaklan na maaraman na madali nang gamiton kan “maliwanag na bitoon sa makaaga” an saiyang autoridad sa Kahadean sa pagbabalik kan Paraiso digdi sa daga!

Papagdanayon an Integridad

20. Anong mga pangyayari sa Kakristianohan an nagpapagirumdom sato kan nagkapira sa mga kaluyahan sa kongregasyon sa Tiatira?

²⁰ Seguradong naparigon na marhay an boot kan mga Kristiano sa Tiatira kan mensaheng ini. Isip-isipa na sana—an pinamuraway na Aki nin Dios sa langit personal na nakipag-olay sa mga Kristiano sa Tiatira manongod sa nagkapira nindang problema! Segurado na an kisuerra nagkapira sa kongregasyon naghinanyog sa siring kamamomoton na pagpapastor. An mensaheng ini na pinakahalawig sa pito nakakatabang man sato na mamidbid an tunay na Kristianong kongregasyon ngonyan. Kan 1918 kan si Jesus dumatong sa templo ni Jehova para sa paghokom, an mayoriya sa mga organisasyon na naghihingakong Kristiano nadigtaan nin idolatriya asin espirituwal na inmoralidad. (Santiago 4:4) An iba ibinasar an saindang mga paniniwala sa mga katokdoan nin mga babaeng may independienteng kaisipan kan ika-19 siglo, arog ni Ellen White kan Seventh-Day Adventists asin ni Mary Baker Eddy kan Christian Scientists, asin ngonyan dakol na babae an naghuhulit sa pulpito. (Ipaheling an pagkakalaen kan 1 Timoteo 2:11, 12.) Sa laen-laen na klase nin Katolisismo, si Maria parateng mas tinatawan nin onra kisa sa Dios asin ki Cristo. Dai sia tinawan nin siring na onra ni Jesus. (Juan 2:4; 19:26) Puede daw talagang rekonoseron bilang Kristiano an mga organisasyon na nag-aako sa siring na bakong tamang impluwensia nin babae?

21. Anong mga leksion para sa mga indibiduwal an yaon sa mensahe ni Jesus sa Tiatira?

²¹ Marahay na horophoropon nin indibiduwal na mga Kristiano, baga man kabilang sa grupong Juan o sa ibang mga karnero, an mensaheng ini. (Juan 10:16) An iba tibaad masugotan na lumakaw sa dalan nin kapasilan, arog kan mga disipulo kaidto ni Jezabel sa Tiatira. Yaon man an sugot na makikompromiso. Ngonyan, kaipuhan na atubangon an mga isyu na arog baga kan pagkakan nin dugo o pagpaineksion nin dugo. An iba tibaad maghona na an kaigotan sa paglilingkod sa langtad o an mga pagpapahayag nagtatao sainda nin deretso na dai na magin estrikto sa ibang bagay, arog baga kan pagdalan nin madahas asin inmoral na mga pelikula asin video, o pagpangana sa inomon na de alkohol. An patanid ni Jesus sa mga Kristiano sa Tiatira nagsasabi sato na dai kita dapat na mag-abuso. Boot ni Jehova na kita magin malinig, bilog na kalag, bakong baranga, arog kan dakol na Kristiano sa Tiatira.

22. Paano idinodoon ni Jesus an halaga kan pagkaigwa nin talingang nagdadangog?

²² Ultimo, si Jesus nagsabi: “An may talinga magdangog sa sinasabi kan espiritu sa mga kongregasyon.” (Kapahayagan 2:29) Sa ikaapat na beses, inotro digdi ni Jesus an nakakapukaw na mga tataramon na ini, asin iyan an konklusyon sa tolo pang maabot na mensahe. Igwa daw kamo kan siring na naghihimateng talinga? Kun siring, padagos kamong maghinanyog nin atento mantang an Dios, paagi sa saiyang espiritu, nagpapadagos na magtao nin hatol paagi sa saiyang pinakapaagihan.

[Nota sa Ibaba]

[Mga ritrato sa pahina 51]

Ngonyan, an dakulang kabtang kan paghuhulit ginigibo nin maimbod na mga tugang na babae mantang hababa an boot na sinusuportaran ninda an teokratikong autoridad