An “Holocaust”—Taano ta Tinogotan Iyan nin Dios?

AN “Holocaust” nagkaigwa nin nakapanluluyang epekto sa pagtubod nin dakol. An mga Judio asin bakong Judio pareho naghahapot, Kun igwa nin Dios, taano ta tinogotan nia iyan? Tama na daw na iatribuwir iyan sa ‘karingisan nin tawo sa tawo’? O igwa daw nin ibang bagay na nagpapaliwanag kun paano an mga lalaki asin babae na hale sa “sibilisadong” nasyon nakapagkonsinte, nakapagtokdo, nakatogot, o aktibong nakapakikabtang sa paggadan asin pagpara sa sarong rasa na aprobado kan Estado?

An Judiong Konserbatibong komunidad sa Estados Unidos kasuarin pa sana nagpublikar nin “Kapahayagan nin mga Prinsipyo nin Konserbatibong Judaismo,” na dian sinda nagsabi: “An pag-eksister nin karatan poon pa kaidto iyo an nagtatao kan pinakaseryosong kaolangan sa pagtubod. Huli sa grabe kamakatatakot na pangyayari na irenerepresentar kan Auschwitz asin Hiroshima, an problemang ini nagkaigwa nin bago, makatatakot na katunayan sa satong kapag-arakian. An hapot kun paano natogotan nin sarong matanos asin makapangyarihan na Dios an pagpara sa kadakol na inosenteng buhay dai nawawara sa relihiyosong konsensia asin dai mapaniwalaan.”

An mga Saksi ni Jehova, kaiba an minilyon pang iba, interesado sa hapot na iyan, asin rasonable sana, huli ta dakol sa saindang kapagtubod an nagadan sa mga kampo de konsentrasyon na Nazi. Kun siring, taano ta tinogotan nin Dios an karatan?

Libreng Kabotan Asin an Isyu

An nasabi sa enotan na Judiong publikasyon nagtatao nin parsial na simbag sa hapot, na sinasabi: “Sa paglalang sa mga tawo na may libreng kabotan, an Dios, siyempre, linimitaran kun gurano an Saiyang magigibo sa ngapit. Kun mayo kan tunay na posibilidad na an tawo pilion an sala kun napapaatubang sa marahay asin maraot, an bilog na ideya nin pagpili daing halaga. An pagtao sa tawo nin libreng kabotan puwedeng helingon na akto nin banal na pagkamoot na nagtotogot sa sadiri niatong integridad asin pagtalubo, dawa kun an satong mga desisyon puwede man na magtao nin makuring kamondoan.”

An opinyon na ini oyon sa rekord kan Hebreong Kasuratan. Magpoon sa kapinonan, an tawo may libertad na pumili—baga man idto an pagpili ni Adan asin Eva na magmasumbikal sa Dios (Genesis 3:1-7) o an pagpili ni Cain na gadanon an tugang niang si Abel. (Genesis 4:2-10) An mga Israelitas pinapili man ni Jehova: “Uya, ibinubugtak ko ngonyan sa atubangan mo an buhay asin karahayan, asin an kagadanan asin karatan. . . . Asin kaipuhan na pilion mo an buhay tanganing makapagpadagos kang mabuhay, ika asin an saimong aki.”—Deuteronomio 30:15, 19.

Pero igwa nin sarong mahalagang bagay na dai minamangno kan Judiong kapahayagan. An mismong saro na nagrebelde tumang sa Dios asin kan huri ginikanan kan mga pagsakit kan maimbod na si Job sagkod ngonyan aktibo, na rinaraot an isip nin mga tawo nin sa-diablong mga pagpili na sa pirang kaso nagbunga nin mga kampo de konsentrasyon, pagpasakit, asin lagduan na paggadan. An sarong iyan malinaw na ipinamimidbid sa libro ni Job bilang rebeldeng anghel na aki nin Dios, si Satanas, an Kaiwal.—Job 1:6; 2:1, 2.

An impluwensia ni Satanas asin an mga pinapipilian nia lakop sa kinaban ngonyan, na nagbubunga nin kadahasan asin nin pagmenus sa buhay asin moral na mga pamantayan. An ano man na ikararayo an atension nin tawo sa paglaom sa pagsakop kan Kahadean nin Dios, baga man politikal na mga pilosopiya, pagkabaranga sa rasa asin relihiyon, pag-abuso sa droga, sobrang kasingawan, mga idolong tawo—ini gabos nakaootob sa katuyohan ni Satanas. Bakong makangangalas na ihinula kan Biblia na kun an maraot na ini iholog sa palibot kan daga, iyan mangangahulogan nin “herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon”! Magpoon kan 1914 kita nabubuhay sa panahon na iyan nin madahas na kaanggotan.—Kapahayagan 12:12.

An katawohan nagkaigwa, asin sagkod ngonyan igwa, kan pagpili na pumasakop sa paghade nin Dios o kan saiyang Kaiwal, si Satanas. An mismong pagpiling ini nagpaparisa nin haloy nang isyu sa pag-oltanan nin Dios asin ni Satanas na kaidto pang mga 6,000 na taon na an nakaagi. Pero ipinaririsa kan Biblia na si Jehova Dios nagtalaan nin panahon para sa paghusay sa isyung ini—asin poon kan 1914 an katawohan nabubuhay na sa panahon kan katapusan kan palakaw na ini na dominado ni Satanas.—2 Timoteo 3:1-5, 13.

An Kahadean nin Dios madali nang laglagon an gabos na karatan asin an mga gusto dian. An mga pumiling gumibo nin marahay tatawan nin buhay na daing katapusan sakop nin Dios sa sarong sangkap, daing polusyon na daga.—Kapahayagan 11:18; 21:3, 4.

“Uya! Ginigibo Kong Bago an Gabos na Bagay”

An ngapit na katuyohan nin Dios para sa dagang ini asin sa makinuyog na mga nag-eerok dian hahaleon sa satong memorya an gabat kan nakaagi: “An dating mga bagay dai na magigirumdoman, dai na iyan noarin man masabong sa isip.”—Isaias 65:17, Tanakh, A New Translation of the Holy Scriptures According to the Traditional Hebrew Text.

Kun siring, kun an paghade na nin Dios an nakasasakop sa bilog na daga, an ano man na sakit na inagihan nin mga tawo sa huri mapapara sa saindang isip. Sa panahon na iyan an mga kagayagayahan matatahoban na an gabos na nakaaging makatatakot na mga memorya, huli ta arog kan panuga kan Biblia, an Dios “papahidon . . . an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:4, 5.

Malinaw na ipinaheheling kan Biblia na harani na an panahon na gagamiton nin Dios an saiyang makakamhan sa gabos na kapangyarihan sa paghale sa mga ginigikanan nin kasakitan, baga man tawo o demonyo. An Talinhaga 2:21, 22 nagsasabi: “An mga matanos iyo an mag-eerok sa daga, an mga daing kanawayan iyo an magdadanay dian. Mantang an mga maraot mapapara sa daga.” (Tanakh) Iyo, an Dios ‘lalaglagon idtong mga naglalaglag kan daga.’ (Kapahayagan 11:18) Kabale man dian, sa katapustapusi, si Satanas na Diablo.

Dai itotogot nin Dios na mahaloy pang raoton nin mga maraot an daga; ni totogotan man nia an mga maraot na pasakitan, padusahan, asin ibilanggo an saindang kapwa. An siisay man na dai magustong gumawe oyon sa Saiyang makatanosan na mga pagboot dai pababayaan na magdanay. Idto sanang mga may paggalang sa kabotan asin pagboot nin Dios an magdadanay na buhay.

Kaidtong labi nang 4,000 na taon an nakaagi, an Dios “naheling kun gurano kagrabe kan karatan nin tawo sa ibabaw kan daga, asin kun paanong an gabos na planong naisipan kan saiyang isip daing iba kundi maraot sa gabos na panahon.” Sia huminiro paagi sa pagtao kan dakulang Baha. (Genesis 6:5, Tanakh) Igwa nin orog na dahelan na an Dios humiro liwat. Alagad kun itatao niato sa Dios an maninigong pag-omaw sa saiya ngonyan, an buhay na daing katapusan mapapasato sa dai na mahahaloy.—Isaias 65:17-25; Juan 17:3; 1 Timoteo 6:19.

Minsan siring, kumusta man an minilyon na gadan na yaon sa mga lolobngan, kaiba an mga biktima kan “Holocaust”? Ano an paglaom ninda? Malilingawan na daw sinda?