“Tatapuson Ko an Pagigin Hostes Mo”

1, 2. Anong klase nin hostes an ikakabaldi niyato?

NAKAKAPURISAW makahiling nin sarong hostes. Tibaad isip-isipon ta kun taano ta nagin arog kaiyan an saiyang buhay. Dahil daw sa kadahasan o pang-aabuso sa harong kaya nagin arog siya kaiyan dawa hobenon pa? O dahil daw sa grabeng pagtios kaya napiritan siyang magin arog kaiyan? O gusto niya lang daw dulagan an maringis niyang agom? Ordinaryo na sana an arog kaiyan na mga istorya sa maraot na kinaban na ini. Kaya bakong makangangalas na tinawan ni Jesu-Cristo nin espesyal na atensiyon an nagkapirang hostes, asin trinato niya sinda nin may kabuutan. Idinuon niya na an mga nagsulsol saka nagbago kan saindang paagi nin pamumuhay makakaasa na magkakaigwa nin mas marahay na buhay.—Mat. 21:28-32; Luc. 7:36-50.

² Alagad, imahinaron ta an naiibang marhay na klase nin hostes. Imahinara an sarong babayi na tuyong pinili an arog kaiyan na buhay. Para sa saiya, bako iyan makasusupog kundi nakakatao saiya nin awtoridad! Gustong-gusto niya an kuwarta saka impluwensiya na nakukua niya sa trabahong iyan. Mas grabe pa, paano kun an babaying ini igwa nin marahay na agom na maimbod sa saiya pero tuyo niya ining binayaan para magin hostes? Siguradong mababaldi ka sa babaying iyan saka sa klase nin buhay na pinili niya. Kaya maiintindihan ta kun taano ta pauruutrong ginamit kan Diyos na Jehova an paglaladawan manungod sa hostes tanganing ipahiling kun ano an namamatian niya sa palsong relihiyon.

3. Anong mga rekord an pag-uulayan ta sa kapitulong ini?

³ Mababasa ta sa libro nin Ezekiel an duwang pambihirang rekord na diyan ilinaladawan kan prostitusyon an grabeng kawaran nin kaimbudan kan banwaan nin Diyos sa Israel asin Juda. (Ezek., kap. 16 asin 23) Pero bago ta siyasaton an duwang rekord na iyan, pag-ulayan nguna niyato an saro pang simbolikong hostes. Nagpuon an pagigin hostes kaini haloy na panahon pa bago kan panahon ni Ezekiel—bago pa ngani mag-eksister an Israel—asin nagpapadagos pa siya sagkod ngunyan. An hostes na ini ipinamidbid sa huring libro kan Bibliya, an Kapahayagan.

4, 5. Ano an “Dakulang Babilonya,” asin paano ta iyan naaraman? (Hilingon an ritrato sa kapinunan kan kapitulo.)

⁴ Sa bisyon na itinao ni Jesus ki apostol Juan sa pagtatapos kan inot na siglo C.E., nahiling ni Juan an sarong kakaibang babayi. Inaapod siyang “maimpluwensiyang hostes” asin “Dakulang Babilonya, an ina kan mga hostes.” (Kap. 17:1, 5) Sa laog nin dakul na siglo, sarong misteryo para sa mga lider nin relihiyon asin sa mga iskolar sa Bibliya kun siisay talaga an babaying ini. Iba-iba an sinasabi kan mga tawo. May mga nagsasabi na nagrerepresentar daa siya sa Babilonya, sa Roma, o sa Iglesya Katolika Romana. Alagad, sa laog nin dakul na dekada, aram na kan Mga Saksi ni Jehova kun siisay talaga an “maimpluwensiyang hostes” na ini. Siya an pambilog na kinaban na imperyo nin palsong relihiyon. Paano ta iyan naaraman?

⁵ Kinondenar an hostes na ini huli sa imoral na pakikipagrelasyon niya sa “mga hadi sa daga,” o pulitikal na mga kapangyarihan. Kaya malinaw na bako siyang pulitikal na kapangyarihan. Saro pa, sinasabi sa Kapahayagan na “an mga negosyante sa daga,” o sistema nin komersiyo sa kinaban na ini, nagmumurundo dahil sa pagbagsak kan Dakulang Babilonya. Kaya dai puwedeng magrepresentar sa sistema nin komersiyo an Dakulang Babilonya. Kun siring, siisay siya? Nagsasagibo siya nin “espiritismo,” idolatriya, asin pandadaya. Bako daw na ginigibo iyan kan maraot na relihiyosong mga organisasyon kan kinaban na ini? Risahon man na ilinaladawan an hostes na ini na nakasakay, o igwa nin impluwensiya, sa pulitikal na mga organisasyon kan kinaban na ini. Pinepersegir niya man an maimbod na mga lingkod kan Diyos na Jehova. (Kap. 17:2, 3; 18:11, 23, 24) Bako daw na iyan mismo an ginigibo kan palsong relihiyon sagkod ngunyan?

6. Taano ta masasabi na an Dakulang Babilonya “ina kan mga hostes”?

⁶ Pero taano ta, apuwera sa apod na “maimpluwensiyang hostes,” inaapod man an Dakulang Babilonya na “ina kan mga hostes”? An palsong relihiyon igwa nin kadakul na grupo. Dai mabilang an mga denominasyon, sekta, asin kulto kaiyan. Puon kan ribarawon an mga lengguwahe sa suanoy na Babel, o Babilonya, luminakop sa bilog na kinaban an gabos na klase nin palsong relihiyosong mga doktrina, na nagresulta sa padagos na pagdakul nin manlain-lain na relihiyon. Tama sana na an pangaran kan “Dakulang Babilonya” kinua sa siyudad nin Babilonya, an pinaghalian kan palsong mga relihiyon! (Gen. 11:1-9) Huli kaiyan, an gabos na relihiyon na ini puwedeng ibilang na “mga aking babayi” nin sarong organisasyon, sarong maimpluwensiyang hostes. Parating ginagamit ni Satanas an mga relihiyon na ini tanganing akiton an mga tawo sa espiritismo, idolatriya, asin iba pang mga paniniwala saka kaugalian na naglalapastangan sa Diyos. Kaya pinatanidan an banwaan nin Diyos manungod sa maraot na organisasyon na iyan na lakop sa bilog na kinaban: “Lumuwas kamo sa saiya, banwaan ko, kun habo nindong madamay sa saiyang mga kasalan”!—Basahon an Kapahayagan 18:4, 5.

7. Taano ta sinusunod ta an patanid na “lumuwas” sa Dakulang Babilonya?

⁷ Sinunod mo na daw an patanid na iyan? Tandaan, si Jehova mismo an naglalang sa mga tawo para makamati na “kaipuhan ninda nin espirituwal na mga bagay.” (Mat. 5:3) Mapapaniguan sana an pangangaipong iyan paagi sa dalisay na pagsamba ki Jehova. Siyempre, gusto kan mga lingkod ni Jehova na rayuan an espirituwal na prostitusyon. Pero iba an gustong mangyari ni Satanas na Diyablo. Gustong-gusto niyang akiton an banwaan nin Diyos sa arog kaining klase nin prostitusyon. Sa parati, nagigin mapanggana siya. Kan panahon ni Ezekiel, halawig na panahon na napalabot an banwaan nin Diyos sa espirituwal na prostitusyon. Marahay na siyasaton niyato an kasaysayan na iyan, huling dakul kitang manunudan diyan manungod sa mga pamantayan ni Jehova asin sa saiyang hustisya saka pagkahirak.

8-10. Anong mahalagang kahagadan sa dalisay na pagsamba an makakatabang sa sato na masabutan an namamatian ni Jehova manungod sa pakikikabtang sa palsong relihiyon? Iilustrar.

⁸ Sa libro nin Ezekiel, ginamit ni Jehova an ilustrasyon manungod sa hostes tanganing ipahiling an epekto sa saiya kan kawaran nin kaimbudan kan banwaan niya. Pinasabngan si Ezekiel na isurat an duwang buhay na buhay na rekord na nagpapahiling kun paano si Jehova nakulgan asin nakamati na trinaydor siya huli sa pagigin bakong maimbod kan saiyang banwaan saka sa imoral nindang paggawi. Taano ta ikinumparar niya sinda sa mga hostes?

⁹ Tanganing maaraman ta an simbag, girumdumon ta nguna su napag-ulayan ta sa Kapitulo 5 kan publikasyon na ini manungod sa sarong mahalagang marhay na kahagadan mapadapit sa dalisay na pagsamba. Sa Katugunan na itinao sa Israel, sinabi ni Jehova: “Dai ka magkaigwa nin ibang mga diyos apuwera sa sako [o, “bilang pagsuway sa sako,” nota sa ibaba]. . . . Ako, si Jehova na saimong Diyos, sarong Diyos na naghahagad nin eksklusibong debosyon.” (Exo. 20:3, 5) Pag-abot nin panahon, idinuon niya giraray an katotoohan na iyan: “Dai kamo magduko sa ibang diyos, huling si Jehova midbid na naghahagad nin eksklusibong debosyon. Iyo, siya sarong Diyos na naghahagad nin eksklusibong debosyon.” (Exo. 34:14) Malinawon nanggad an sinabi ni Jehova. Aakuon sana ni Jehova an satong pagsamba kun itatao niyato iyan nin eksklusibo sa saiya.

¹⁰ Puwede niyato ining iilustrar sa halimbawa nin mag-agom. Pareho sindang may deretso na umasa na mayo sinda nin kaagaw sa agom ninda. Kun an saro sa sainda mapahiling nin romantikong atensiyon o magkakaigwa nin seksuwal na relasyon sa iba, tama sana na magselos an agom niya asin makamati na trinaydor siya. (Basahon an Hebreo 13:4.) Sa kaagid na paagi, tama sanang mamatian ni Jehova na trinaydor siya kan an saiyang banwaan, na eksklusibong nagdusay sa saiya, nagsamba sa palsong mga diyos. Mapuwersa niyang ilinadawan sa Ezekiel kapitulo 16 an namati niyang pagtraydor na ini sa saiya.

11. Ano an isinaysay ni Jehova manungod sa Jerusalem asin sa pagpupuon kaini?

¹¹ Mababasa sa Ezekiel kapitulo 16 an pinakahalabang sinabi ni Jehova sa librong ini—asin an saro sa pinakahalaba niyang propesiya sa bilog na Hebreong Kasuratan. Nagpokus si Jehova sa siyudad nin Jerusalem na nagrerepresentar sa bakong maimbod na Juda. Isinaysay niya an mamundo asin nakakabiglang istorya manungod sa pagpupuon kaini saka sa pagtraydor kaini. Nagpuon siya na siring sa sarong daing kalaban-laban asin inabandonar na umboy, maati asin mayong nag-aasikaso. An mga magurang niya iyo an mga paganong Canaanita kan kadagaan. Totoo iyan huling an Jerusalem haloy na nasa kontrol nin sarong Canaanitang tribo, an mga Jebusita, sagkod na masakop ni David an siyudad. Kinahirakan ni Jehova an umboy na iyan, kinarigusan, asin tinawan kan mga pangangaipo. Pag-abot nin panahon, nagin siring siya sa sarong agom na babayi ki Jehova. An totoo, an mga Israelita, na pag-abot nin panahon nag-istar sa siyudad na iyan, igwa nin pakikipagtipan ki Jehova, na gikan sa buot nindang ginibo kaidtong panahon ni Moises. (Exo. 24:7, 8) Kan magin kabisera kan daga an Jerusalem, binendisyunan, pinauswag, saka pinagayon siya ni Jehova, arog kan ginigibo nin sarong mayaman saka makapangyarihan na agom na lalaki na pagtao sa saiyang agom nin magagayon na alahas.—Ezek. 16:1-14.

12. Paano luway-luway na nakalaog sa Jerusalem an palsong pagsamba?

¹² Mangnuhon an sunod na nangyari. Sinabi ni Jehova: “Nagpuon kang magtiwala sa kagayunan mo, asin nagi kang hostes dahil sa saimong kabantugan. Sige mong pakidurog sa maski siisay man na minaagi, asin napasaiya an saimong kagayunan.” (Ezek. 16:15) Kan panahon ni Solomon, binendisyunan na marhay ni Jehova saka pinauswag an saiyang banwaan kaya an Jerusalem nagin sarong kahanga-hangang marhay na siyudad sa bilog na kinaban kan suanoy na panahon. (1 Ha. 10:23, 27) Pero luway-luway na nakalaog an palsong pagsamba. Huli sa pagmawot ni Solomon na mapauyunan an dakul niyang agom na taga ibang nasyon, pinunan niyang atian an Jerusalem paagi sa pagsamba sa paganong mga diyos. (1 Ha. 11:1-8) Asin mas grabe pa an ginibo kan nagkapira sa mga nagsurunod sa saiya na hadi—inatian ninda an bilog na kadagaan paagi sa palsong pagsamba. Ano an namatian ni Jehova manungod sa arog kaiyan na prostitusyon saka pagtraydor? Sinabi niya: “An arog kaiyan na mga bagay dai dapat mangyari asin dai na nuarin man dapat mautro.” (Ezek. 16:16) Pero lalo pa nganing naggrabe an karatan kan saiyang banwaan!

13. Anong karatan an ginibo kan banwaan nin Diyos sa Jerusalem?

¹³ Imahinara na sana an kulog saka pagkabaldi na namatian ni Jehova mantang ibinubuyagyag niya an karatan kan pinili niyang banwaan: “Kinua mo an satong mga aking lalaki saka mga aking babayi, tapos inatang mo sinda sa mga idolo para sibaon—kulang pa daw an mga ginigibo mong paghohostes? Ginaradan mo an mga aki ko, asin idinulot mo sinda bilang mga atang paagi sa pagsulo sa sainda.” (Ezek. 16:20, 21) An grabe karaot na mga gibong iyan nagpapahiling kun gurano karaot si Satanas. Gustong-gusto niyang tentaran an banwaan ni Jehova na makikabtang sa grabe kamakababalding mga gibo! Pero nahihiling ni Jehova an gabos. Kayang-kayang halion nin Diyos an ano man na mga epekto kan marauton na mga gibo ni Satanas, asin ipapautob niya an hustisya.—Basahon an Job 34:24.

14. Sa ilustrasyon ni Jehova, siisay an duwang tugang kan Jerusalem, asin siisay an pinakamaraot sa saindang tulo?

¹⁴ Alagad, dai man lamang nanggirabo an Jerusalem sa karatan niya. Nagpadagos siya sa saiyang prostitusyon. Sinabi ni Jehova na mas malala pa siya kisa sa ibang mga hostes huling siya pa mismo an nagbabayad sa iba para makidurog sa saiya asin gumibo nin imoralidad! (Ezek. 16:34) Sinabi nin Diyos na an Jerusalem arog nanggad sa saiyang “ina,” an paganong mga tribo na dating nagdodominar sa kadagaan. (Ezek. 16:44, 45) Sa pagpapadagos kan ilustrasyon manungod sa pamilya, sinabi ni Jehova na an matuang tugang na babayi kan Jerusalem iyo an Samaria, na mas nainot saiyang nagsagibo nin prostitusyon. Sinambit man nin Diyos an saro pang tugang niyang babayi, an Sodoma. Ipinapagirumdom kaini sa gabos an manungod sa suanoy na siyudad nin Sodoma na linaglag huli sa kapalangkawan asin grabeng karatan kaini. An punto digdi ni Jehova iyo na mas maraot pa an Jerusalem kisa sa mga tugang kaini na Samaria saka Sodoma! (Ezek. 16:46-50) Binaliwala kan banwaan nin Diyos an dakulon na patanid, asin nagpadagos sinda sa makababalding mga gibo ninda.

15. Ano an katuyuhan ni Jehova sa pagsagibo kan paghukom sa Jerusalem, asin ano an itinatao kaining paglaom?

¹⁵ Ano ngunyan an gigibuhon ni Jehova? Sinabi niya sa Jerusalem: “Titipunon ko an gabos mong sambay na pinaugma mo” asin, “itatao taka sa kamot ninda.” Lalaglagon siya kan mga dating kaalyado kan Saiyang banwaan. Huhubaan ninda siya saka sasamsaman kan saiyang mahahalagang bagay. “Gagarapuon ka ninda saka gagadanon gamit an saindang mga espada,” an sabi kan Diyos. Ano an katuyuhan ni Jehova sa pagsagibo kan paghukom na ini? Bako para puhuon an saiyang banwaan. Imbes, ini an dahilan niya: “Tatapuson ko an pagigin hostes mo.” Sinabi pa kan Diyos: “Papahupaon ko an grabeng kaanggutan ko sa saimo paagi sa pagsagibo nin paghukom, asin mawawara an kaanggutan ko sa saimo; asin magigin kalmado ako asin bako nang anggot.” Arog kan tinukar sa Kapitulo 9 kan publikasyon na ini, an panghaluyan na katuyuhan ni Jehova iyo na ibalik sa banwaan niya an dalisay na pagsamba pagkatapos kan pagigin distiyero ninda. Taano? Sinabi niya: “Gigirumdumon ko an tipan na ipinakipagtipan ko sa saimo kan panahon kan saimong pagkahoben.” (Ezek. 16:37-42, 60) Bakong arog kan banwaan niya, talagang maimbod si Jehova!—Basahon an Kapahayagan 15:4.

16, 17. (a) Taano ta dai na niyato sinasabi na si Ohola asin Oholiba mga tipikong paglaladawan kan Kakristiyanuhan? (Hilingon an kahon na “An Magtugang na Hostes.”) (b) Anong praktikal na mga leksiyon an manunudan ta sa Ezekiel kapitulo 16 asin 23?

¹⁶ Paagi sa halaba asin mapuwersang mga tataramon ni Jehova na nakarekord sa Ezekiel kapitulo 16, dakul siyang itinutukdo sa sato manungod sa saiyang matanos na mga pamantayan, sa saiyang hustisya, saka sa saiyang hararom na pagkahirak. Totoo man iyan sa Ezekiel kapitulo 23. Isinasapuso kan tunay na mga Kristiyano ngunyan an malinaw na mga mensahe ni Jehova manungod sa prostitusyon kan saiyang banwaan. Dai lamang niyato gugustuhon na kulgan si Jehova arog kan ginibo kan Juda asin Jerusalem! Kaya gusto niyatong lubos na likayan an idolatriya. Kaiba digdi an kahanaban asin materyalismo. (Mat. 6:24; Col. 3:5) Gusto tang padagos na ipagpasalamat na nagin mahihirakon si Jehova asin ibinalik niya an dalisay na pagsamba sa huring mga aldaw na ini asin na dai na niya nuarin man tutugutan na maramugan iyan! Inestablisar niya sa espirituwal na Israel an “sarong permanenteng tipan,” sarong tipan na dai mararaot nin kawaran nin kaimbudan o prostitusyon. (Ezek. 16:60) Kaya pahalagahan niyato an pribilehiyo tang magin kabtang kan malinig na banwaan ni Jehova ngunyan.

¹⁷ Alagad, base sa mga sinabi ni Jehova laban sa mga hostes na ilinadawan sa Ezekiel, ano an itinutukdo kaiyan sa sato manungod sa “maimpluwensiyang hostes,” an Dakulang Babilonya? Aramon ta.

18, 19. Anong mga pagkakapareho an maririsa ta sa mga hostes na ilinadawan sa Ezekiel asin sa hostes na ilinadawan sa Kapahayagan?

¹⁸ Dai nagbabago si Jehova. (Sant. 1:17) An sabuot niya manungod sa palsong relihiyon dai nagbago sa bilog na kasaysayan kan Dakulang Babilonya. Kaya dai kita nabibigla na mahiling an dakul na pagkakapareho kan paghukom niya sa mga hostes sa libro nin Ezekiel asin kan paghukom niya sa “maimpluwensiyang hostes” sa libro nin Kapahayagan.

¹⁹ Halimbawa, sa propesiya ni Ezekiel, maririsa ta na an padusa sa mga hostes bakong direktang hali ki Jehova kundi sa mismong mga nasyon na diyan nakakomiter nin espirituwal na imoralidad an saiyang bakong maimbod na banwaan. Sa kaagid na paagi, kinondenar an pambilog na kinaban na imperyo nin palsong relihiyon huli sa imoral na pakipagrelasyon kaini sa “mga hadi sa daga.” Asin hali kiisay an padusa sa saiya? Mababasa niyato na an pulitikal na mga organisasyon na ini “mauungis . . . sa hostes asin sasamsaman ninda siya saka huhubaan, asin uubuson nindang kakanon an saiyang laman saka biyo siyang tututungon sa kalayo.” Taano ta gigibuhon kan mga gobyerno kan kinaban na ini an siring na paghiro? Huli ta “[ilalaag] nin Diyos sa saindang puso na isagibo an saiyang kaisipan.”—Kap. 17:1-3, 15-17.

20. Ano an nagpapahiling na dai na mababago an paghukom na gigibuhon sa Babilonya?

²⁰ Kaya gagamiton ni Jehova an mga nasyon kan kinaban na ini tanganing isagibo an saiyang paghukom sa gabos na palsong relihiyon, kaiba na an dakul na relihiyon kan Kakristiyanuhan. Dai na mababago an paghukom na ini; mayo na nin kapatawadan, mayo na nin oportunidad pa para sa relihiyon na magbago. Ihinahayag kan Kapahayagan na an Babilonya “dai na . . . nuarin man manunumpungan.” (Kap. 18:21) An mga anghel nin Diyos mag-uugma huli sa pagbagsak niya. Sasabihon ninda: “Umawon nindo si Jah! Asin an aso kan pagtutong sa saiya padagos na mag-iitaas sagkod nuarin pa man.” (Kap. 19:3) An paghukom na ini magdadanay sagkod pa man. Dai na nuarin man tutugutan na magkaigwa nin palsong relihiyon na mangraraot sa dalisay na pagsamba. Sa piguratibong paagi, an aso hali sa nagkakalayong paghukom asin paglaglag sa Babilonya padagos na mag-iitaas sagkod pa man.

21. An paglaglag sa palsong relihiyon tanda na nagpuon na an anong panahon, asin sa ano masagkod an panahon na iyan?

²¹ Pag sinalakay na kan mga gobyerno kan kinaban na ini an Dakulang Babilonya, isasagibo ninda an paghukom nin Diyos. Saro ining mahalagang pangyayari sa kautuban kan katuyuhan ni Jehova. Ini an tanda kan pagpupuon kan dakulang kasakitan—sarong panahon nin grabeng karibarawan na dai pa nangyari kasuarin man. (Mat. 24:21) An kasakitan na iyan masagkod sa Armagedon, an giyera ni Jehova laban sa maraot na sistemang ini nin mga bagay. (Kap. 16:14, 16) Arog kan mahihiling sa masunod na mga kapitulo kan publikasyon na ini, dakul an manunudan ta sa libro nin Ezekiel manungod sa mga mangyayari sa dakulang kasakitan. Pero bago kaiyan, anong praktikal na mga leksiyon sa Ezekiel kapitulo 16 asin 23 an gusto niyatong tandaan saka iaplikar?

22, 23. Paano makakaapekto sa satong sagradong paglilingkod an pagsiyasat niyato sa paglaladawan manungod sa mga hostes sa Ezekiel asin Kapahayagan?

²² Gustong-gusto ni Satanas na impluwensiyahan an mga nagsasagibo nin dalisay na pagsamba. Ugmahon siyang marhay pag nagkakaigwa siya nin oportunidad na irayo kita sa dalisay na pagsamba asin nagigin arog kita kan mga hostes na ilinadawan sa libro nin Ezekiel. Dapat tang tandaan na dai tutugutan ni Jehova na magkaigwa siya nin kaagaw sa pagsamba; dai niya kukunsintihon an kawaran nin kaimbudan! (Bil. 25:11) Sinisigurado ta na harayo kita sa palsong relihiyon asin na dai “magdutdot nin ano man na maati” sa paghiling nin Diyos. (Isa. 52:11) Kaipuhan man na magdanay kitang neutral pag-abot sa iriwal saka korontrahan sa pulitika kan kinaban na ini na nagkakawsa nin pagkabaranga. (Juan 15:19) Para sa sato, an nasyonalismo kapareho man kan mga palsong relihiyon na an nasa likod iyo si Satanas, asin dai kita nakikilabot diyan.

²³ Urog sa gabos, tandaan ta na igwa kitang dakulang pribilehiyo na sambahon si Jehova sa saiyang malinig asin dalisay na espirituwal na templo. Mantang pinapahalagahan ta an mahalagang marhay na areglong iyan, lugod na lalo kitang magin determinado na dai makikabtang sa palsong relihiyon asin sa prostitusyon kaini!